TBP Balochi

بلوچستان ءِ دمگ دکی ءَ اشکرانی کھن ءَ چیر تر اتگیں دومی کاریزکار ءِ لاش پنجاہ ءُ یک روچ ءَ پد کشگ بیتگ-

گیشیں اھوالانی رد ءَ چار مئی ءَ توپانی ھور ءُ ھارانی سبب ءَ اشکرانی کھن ءَ آپ ءِ پترگ ءَ دو کاریزکار کھن ءِ تہ ءَ نُھ سد فٹ ءَ چیر تر اتگ اَنت-

مائنز انسپکٹر مقصود احمد ءِ گوشگ اِبت ھردوکیں کاریزکارانی درکنگ ءَ جد ءُ جھد برجاہ بیتگ ءُ ایشانی توک ءَ یک کاریزکارے عبدالباقی ءِ لاش چل ءُ سَے روچ ءَ پد لاش کش اتگ-

مائنز انسپکٹر ءَ گوشتگ کہ یک ماھے بیست روچاں برجاھیں پٹ ءُ پول سرجم بیتگ ءُ دومی کاریزکار ءِ لاش پنجاہ ءُ یکمی روچ ءَ درکنگ بیتگ کہ جھل ءَ لیِچانی توک ءَ چیر تر اتگ بیتگ-

بلوچستان ءِ دمگ کیچ ءَ وتکش تراکے بیتگ –

پولیس ءِ رد ءَ تربت ءِ شھر ءَ عیسی قومی پارک ءَ یک وتکش تراکے بیتگ ءُ پولیس ءُ سیکورٹی کارندہ تراک جاہ ءَ سر بیتگ اَنت-

دمگی مردم گوشگ ءَ اَت وتکش کنوک زالبولے بیتگ، بلے داں انگت ءَ اے سرپدی نہ بیتگ نشانگ چی بیتگ اے درگت ءُ دگہ آیوک اَنت-

میان اُستمان ءِ گوشگ اِنت اطالوی جزیرے لیمپیڈوسا ءِ نزیک ءَ درانڈیھاں روکیں مردمانی بوجیگ بڈ اتگ ءُ چریشی ءَ چہ چل مردم ءَ گیش بیگواہ اَنت-

فرانسیسی ھال سر کنوکیں ادارہ اے ایف پی ءِ رد ءَ اٹلی ءَ پناہ گزینانی واستا کار کنوکیں میان اُستمان ءِ ھائی کمشنر ( یو این ایچ سی آر) ءِ نمائندگ چیارا کارڈولیٹی ءَ گوشتگ کہ بوجیگ ءِ بڈگ ءِ وئیل پشمبے ءَ پیش اتکگ کہ بیگواہ بیتگیں مردمانی تہ ءَ یک تپلے ھم ھوار اِنت –

میان اُستمان ءِ لڈ ءُ بار کنوکیں ادارہ ءِ جارکش فلاویو ڈی جیاکومو ءَ گوشتگ کہ میل تیونس ءِ شھر ءَ سفیکس ءَ در کپتگ ءُ ایشی ءَ کیمرون، برکینا، فاسو ءُ آئیوری کوسٹ ءِ لڈ ءُ بار کرتگیں مردم سوار بیتگ اَنت-

آئی ءَ گوشتگ کہ ترندین گوات ءُ برزیں چولانی سبب ءَ بوجیگ پِر لیٹ اتگ ءُ لھتے بچیتگیں مردم لیمپیڈوسا ءَ آرگ بیتگ اَنت ءُ لھتے واتر تیونس ءَ برگ بیتگ اَنت-

بیگواہ بیتگیں مردمانی تہ ءَ ھپت زالبول ءُ یک زھگے ھوار اِنت ءُ ھمے وڑ زندگ ءَ بچیتگیں مردم درست مردین اَنت – آئی ءَ گوشتگ کہ ما نومبر ءِ چہ تیونس ءِ راہ ءَ تیونسی جھمنند دیمپانی ءَ درستاں گیش افریقہ ءَ آیوکیں مردم دیستگ اَنت –

کاڑدولیٹی ءَ ٹوئٹر ءَ اٹلی، یونان ءُ اسپین ءَ روکیں بوجیگانی وئیل ءِ درگت ءَ گپ کنان ءَ گوشتگ کہ یورپ ءِ درا بیران بیتگیں مردمانی ھساب بے ھیال نہ بیوکین اِنت – ریاستانی میان ءَ زر ءَ یک مھکمیں رنگے ءَ مردمانی بچینگ نی زمہ واری بیت اِنت-

یو این ایچ سی آر ءِ نمائندگ چیاراکارڈولیٹی ءَ گوشتگ کہ ما لھتے میلانی تباہ بوگ ءَ سرپد نہ اِنت – آئی ءَ یورپی بھری جھازاں گشت ءُ تیونس ءِ راہ ءِ ھواری ءَ لیبیا ءِ راہ چار ءُ گزاری کنگ ءِ دزبندی کتگ، آئی ءَ گوشتگ اگاں ناں گڑا ما اے مولم ءَ تباھیانی بس ندارگ چاروک بہ ایںٹ تیونس ءِ زر ءَ کساس یک سد ءُ چل ءُ پنچ کلو میٹر ءِ دوری ءَ زرباری اطالوی جزیرہ بھیرہ روم ءَ گوزوکیں لڈ ءُ بار کرتگیں مردمانی یک گچینی راھانی توک ءَ یکے –

جھل مگسی ءَ تیرگواری ءِ وئیلے ءَ سَے مردم بیران ءُ دو زدگ بیتگ اَنت – بیران بیتگیں مردم ٹکی جیڑہ ءُ گیرت ءِ نام ءَ کُشگ بیتگ اَنت-

گیشیں اھوالانی رد ءَ مروچی گنداواہ ءِ ھند سیڈ فارم ءِ نزیک ءَ ھونریچی میڑے ءَ کھنجانی برادری ءِ دو مردم کُشگ ءُ دو زدگ بیتگ اَنت-

بیران بیتگیں مردمانی پجار سبزی پروش مھمد اسمان کھنجانی لاشاری ءُ مھکمہ ھیلتھ ءِ ملازم علی اضغر کھنجانی ھوار اَنت ءُ ھمے ور سلیمان کھنجانی ءُ قدیر حیسن کھنجانی زدگ کنگ بیتگ اَنت-

وئیل ءَ پد پولیس وئیل جاہ ءَ سر بیتگ ءُ لاش ءُزدگ بیتگیں مردمے ھیڈکوارٹر ھسپتال گنداواہ ءَ رسینتگ اَنت ءُ جرمکار تچگ ءُ روگ ءَ سوبمند بیتگ اَنت –

دومی نیمگ ءَ جھل مگسی ءِ ھند ڈھرو مائی فقیر ءَ یک مردمے کشگ بیتگ – کشگ بیتگیں مردم ءِ پجار ظفر علی ء عبدالستار کھوسہ ءِ نام ءَ زانگ بیتگ –

لاش آر ایچ سی ھسپتال جھل مگسی ءَ برگ بیتگ ءُ اھوالانی رد ءَ اے مرد گیرت ءِ نام ءَ کُشگ بیتگ –

متھدہ ارب امارات ءِ بنجاھی شھر انوظبی ءَ یک عرب زالبولے ءَ بدزبانی ءِ پژدر ءَ شست ھزار درھم ءِ جرمانگ ءِ دیمپانی کنگ کپتگ-

الامارات الیوم ءِ نیمگ ءَ سر بیتگیں اھوالانی رد ءَ انٹرنیشنل بک فیئر ءَ ھواریں یک مردمے ءِ ھلاپ ءَ بد زبانی،ناوشی ھیال ءُ انفارمیشن نیٹ ورک ءِ زور ءَ پرائیویسی ءِ تالان کنگ ءِ بھتام بیتگ-

آمیدگس ءَ زالبول ءَ را شش ماہ زندانی ءُ پنجاہ ھزار درھم جرمانگ بستگ ءُ چہ موباھل ءَ سرجمیں اکس ءُ سوشل میڈیا ءَ وتی اکاونٹ ءَ بہ کنت –

زالبول ءَ را دَہ ھزار درھم دستی دیگ ءِ ھکم داتگ ءُ آئی ءَ را اے درگت ءَ سَے سال زندانی کنگ ءِ سزا ھم داتگ –

آمیدگس ءَ ھکم دیان ءَ گوشتگ کہ سزایانی سرجم بوگ ءَ پد عرب زالبول چہ ڈیھ ءَ کشگ بہ بیت اِنت –

بلوچ لبریشن آرمی ءِ جارکشّ جیئند بلوچ ءَ ماں رسانکدر ءَ وتی شِنگ کُرتگیں درشان ءِ تہ ءَ گوشتگ کہ بلوچ لبریشن آرمی ءِ سرمچاراں مروچی شال ءَ بالی پٹ دگّ ، عالمو چار راہ ءِ سر ءَ پولیس کارندھانی سر ءَ اُرش کُرتگ کہ آئی ءِ سبب ءَ یک پولیس کارندھے ھوالدار عبدالرزاق زدگ بوتگ ۔

آئی ءَ گوشتگ کہ ھمے وھد ءَ سرمچاراں پنجگور ءِ ھِند سھاکی ءَ آسانک بُرزگ ءِ دمگ ءَ پاکستانی لشکر ءِ یک پانگسے ءِ سر ءَ گوں گرانیں سِلاھاں اُرش کُرتگ ءُ گرنیڈ لانچر ءِ بازیں گولہ آس داتگ کہ آئی ءِ سبب ءَ دُژمِن ءَ را بازیں جانی ءُ مالی تاوانانی دیمپانی کنگ کپتگ ۔

آئی ءَ دیمترا گوشتگ کہ سرمچاراں 21 جون 2023 ءَ مستونگ ءِ ھِند کابو ءُ مروچی کیچ ءِ ھِند ھیرونک ءَ یوپون شِرکت ءِ دو ھال ءُ اھوالی ٹاور گوں تراکناکیں شورواں تباہ کُرتگ انت ۔

جارکشّ ءَ دیمتِرا گوشتگ کہ بلوچ لبریشن آرمی اے چاریں اُرشانی زمہ واریاں منّ ایت ۔ مکسد ءِ گِرگ ءَ تاں کبزہ گیریں پاکستانی لشکر ءُ آئی ءِ ھمراہ دارانی سر ءَ مئے اُرش ھمے رنگ ءَ برجاہ بنت انت ۔

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ رھشون استاد واحد کمبر ءَ رسانکدراں وتی شنگ کرتگیں دلپدردی درشانے ءَ گْوشتگ کہ میران پنام شھداد اناگتی بیرانی ءَ سک باز دلپدرداں آ یک پرمڑاھیں ھمبلے بیتگ –

آئی ءَ گْوشتگ کہ میران انیگیں آجوئی ءِ جھد ءِ مُھمکیں جھدکارے بیتگ، آئی ءِ بیرانی پہ راجی جھد ءَ ٹوھیں تاوانے، بلے جھدکارے ءِ داں مرگ ءِ دمان ءَ گوں جُھد ءَ بندوک بیگ آئی ءِ مُھکمی ءُ دُژمن ءِ بے سوبی ءَ پدر کنت۔ مارا وتی چوشیں ھمبلانی سر ءَ ناز اِنت –

اُستاد واھد کمبر ءَ گوشتگ کہ من وتی نمیرانیں ھمبل ءَ سھریں دْروت ندر کناں ءُ اے گرانیں ساھتاں گوں آئی ءِ کھول ءِ گماں شریدار آں –

زانگ بہ بیت تمپ ءِ دمگ گومازی ءِ جاھمنند میران پنام ء شھداد ء صالح محمد ءَ گوستگیں دوازدہ سالاں گیش انت کہ آ بلوچ راجی آجوئی جھد ءَ گوں ھمگرنچ بوتگ کہ گوستگیں روچاں آئی ءَ اے کوڈھیں دنیا یل داتگ –

اھوالکار ءِ رِد ءَ سَے روچ ساری آئی ءِ جاور نگیگ بوتگ انت کہ نادراہ جاہ ءَ برگ بوتگ، ڈاکٹرانی رِد ءَ آئی بلڈپریشر (BP) سک جھل بوتگ ءُ آ بیران بوتگ –

سربوتگیں ھالانی رِد ءَ پاکستانی پوج ءَ بلوچستان ءِ دمگ ھزدار ٹٹ کُتگ ءُ دمک بند کتگ انت –

اھوالکار ءِ رِد ءَ اسد اباد ءَ پھازگی لشکر ءَ میتگ ءِ بازیں دمک ٹٹ کُتگ ءُ روگ ءُ آیگ ءِ راہ ءُ در سرجمی ءَ بند کتگ انت چریشی ءَ دمگی مردم سک باز دلسیاہ انت –

دمگی مردماں اے کار ترندی ءَ گوں ایرجتگ ءُ گوشتگ کہ پیش ءَ مردم دگانی سر ءَ دلسیاہ کنگ بوتگ انت نوں دمک ءُ دراں پٹ پول ءِ نام ءَ مردمانی ازت ءُ آبرو ءَ برگ انت ءُ ٹٹ کنگ ءَ انت –

زانگ بہ بیت گوستگیں سال ءِ جنوری ءَ کیچ ءِ بنجاھی شھر تربت ءَ ھم پھازگی لشکر ءَ بازار ءِ دمک ءُ در ٹٹ کتگ ءُ مردم دلسیاہ کتگ انت –

بازار ءِ بازیں جاہ ءَ ایف سی ءَ دمک ٹٹ کتگ انت دگ بند کتگ انت –

کہ چریشی ءَ پد دمگی مردم ءُ سیاسی پاٹیاں زھرشانی کنان ءَ گوشتگ کہ ٹٹ جنگ ءِ کار سیمسراں بندات کنگ بوتگ ءُ نوں شھر ءُ بازار ءُ دمکاں سربوتگ انت –

روکپتی بلوچستان ءِ بنجاھی شھر زاھدان، راسک، چھبار، ایرانشھر ءُ پشین ءَ جمعہ خونین ءِ یات ءَ لس مھلوک ءَ زھرشانی روانک کش اتگ اَنت-

زھرشانی روانک ھمک آدینگانی پئیم ءَ اے آدینگ ءَ ھم کنگ بیتگ کہ اود ءَ مردماں زھرشانی کنان ءَ ایرانی سرکار ءِ ھلاپ ءَ اوگام جتگ ءُ وتی مردمانی ھونانی ھساب دیگ ءِ لوٹ کتگ –

آیاں گوشتگ کہ ما وتی کُشتگیں براتانی بیراں چہ ایران ءِ سرکار ءَ گریں ءُ مئے برات کُشتگ انت ما ھم مریں –

ھمے وڑ ءَ راسک ءُ زاھدان ءَ دینی وانگ جاھاں چار مردم ایرانی لشکر ءَ آوار جنگ ءَ پد بیگواہ کرتگ اَنت –

چہ راسک ءَ ایرانی لشکر ءَ مفتاح العلوم ءَ چار دو استاداں ھوار یک نودربرے آوار جنگ ءَ پد بیگواہ کرتگ اَنت-

آوار جنگ بیتگیں مردمانی پجار حافظ کامران سالمی زئی، مولوی نذیر بخش زئی ءُ فرزاد دھقانی ءِ ناماں زانگ بیتگ اَنت-

اھوالانی رد ءَ اود ءَ پوج ءَ تیرگواری کتگ ءُ پد ءَ اود ءَ نودربر ءُ استاد آوار جتگ ءُ بیگواہ کتگ اَنت –

ھمے وڑ ءَ چہ زاھدان ءَ ایرانی لشکر ءَ ھم یک ورنایے آوار جتگ ءُ بیگواہ کرتگ –

آوار جنگ بیتگیں مردم ءِ پجار اھمد شاھوزئی ء ناصر ءِ نام ءَ زانگ بیتگ –

زانگ بہ بیت گوستگیں روچ ءَ راسک ءِ نامی ئیں عالم دین مولانا عبدالغفار نقشبندی ءَ وتی تامر بندیں کلوہ ءَ بلوچ مھلوک ءَ را یکجا بیگ ءُ زُلمانی ھلاپ ءَ چست بوگ ءِ کڈنی کتگ بیتگ ات –

روکپتی بلوچستان ءَ یک دراجیں مُدتے ءَ مردم ھمک آدینگاں زھرشانی کنگ ءَ اَنت کہ اود ءَ بیگواہ کتگیں مردم، کُشتگیں ءُ پاھو دیگانی سر ءَ رھرشانی کنگ ءَ گندگ بنت –

سربوتگیں ھالانی رِد ءَ کیچ ءُ پنجگور ءَ ناشناسیں مردماں موبائیل ٹاور ءِ مانداشتگ ءُ پوج ءِ سر ءَ اُرش کتگ –

ھالانی رِد ءَ پنجگور ءُ کیچ ءِ میانی دمگ سھاکی ءَ برجاھیں پوجی پانگسے ءِ سر ءَ ناشناسیں سلاہ بندیں مردماں اُرش کُتگ –

اھوالکار ءِ رِد ءَ اُرش ءَ پوج ءَ تاوان رستگ بلے تنی وھدی واکدارانی نیمگ ءَ ھچ وڈیں ھال شنگ کنگ نہ بوتگ –

دومی نیمگ ءَ چہ کیچ ھیرونک ءَ ناشناسیں سلاہ بندیں مردماں موبائیل ٹاور ءِ سر ءَ اُرش کُتگ ءُ مشینری تاوان داتگ انت –

زانگ بہ بیت بلوچستان ءَ موبائیل ٹاور ءُ پوج ءِ سر ءَ بوتگیں اُرشانی زمہ واری بلوچ سلاہ بندیں گلاں منّ اِتگ انت بلے اے اُرش ءِ زمہ واری ھچ گل ءَ نہ منّ اِتگ –