TBP Balochi

چہ مستونگ ءَ سربوتگیں ھالانی رِد ءَ گوستگیں شپ ءَ لکپاس ءَ پاکستان ءِ پھازگی کارمنداں یک پک اپ گاڑی ءِ سر ءَ سنگ جتگ –

سِنگ ءِ لگگ ءَ زالبولے زدگ بوتگ کہ اشی ءِ بگیری ءَ مھلوک ءَ زھرشانی کنان ءَ کراچی تاں شال ءَ رؤکیں شھدگ لکپاس ھند ءَ سرجمی ءَ بند کتگ –

زھرشانی سوب ءَ ھردو نیمگاں گاڑیانی لین لگ اِتگ، دگ بازیں اداراں بند بوتگ –

درنگاز کنوکانی گوشگ ات کہ لکپاس ءِ چیک پوسٹ ءَ پوج ءِ کارمندانی رویش سک باز ھراب ءُ زوراکی کنگ ءَ انت آ دمگی مردمانی گوم ءَ زوراکی کنگ ءَ انت –

آھانی گوشگ ات کہ سروزیر ءَ بلوچستان ءِ درسیں چیک پوسٹانی ھلاس کنگے جار جتگ بلے ھما ھما ریاستی چیک پوسٹ جوڈ کنگ بوتگ انت کہ مردمانی ازت ءُ آبرو ءِ ھچ ھیال ءَ نہ دار انت آھاں کئے ھلاس کنت –

دمگی مردمانی گوشگ ات کہ ادا اسمگلرانی گاڑی گوں سلاہ ءُ منشیات ءَ گوز انت کس ھچے نہ کنت ءُ دمگی مردم چیک ءُ تان ءِ نام ءَ بازیں اداراں تاں وار کنگ بنت –

پدائی اُرش ءُ ریاستی لیکہ

ٹی بی پی شونگال

بلوچ راجی آجوئی ءِ جُنز وتی راجدپتری ءِ یکشلی ءَ گوں برجاہ اِنت ءُ برجاھیں جنگ ءِ بُنھشت کار خیر بخش مری ءَ جُنز ءِ بندات گوں آغا عبدالکریم ءِ یاگی گری ءِ یکشلی نامینتگ اَت۔ ھپتاد سالی بلوچ راجی آجوئی جد ءُ جھد ءِ تہ ءَ بازیں جھلی ءُ بُرزی ءَ چہ گوزگ ءَ پد وتی یکشلی ءِ برجاہ دارگ ءَ سوبمند بیتگ ءُ برجاھیں جنگ گوستگیں جنگاں چہ گیشتر مھکم ءُ توانا دروشم ءَ برجاہ اِنت۔

پاکستانی ڈیھ ءِ ھپتاد سالاں چہ بلوچ راجی جُنز ءَ لھتے مردم اگاں ھاسیں ٹولیانی جیڑہ گُشگ ءُ جنگ ءِ ھستی مَنَگ ءَ چہ رد کُتگ اِش۔ بیست ءُ یکمی کرن ءِ بندات ءَ گوں آجوئی ءِ جُنز ءِ بندات گوں جسٹس نواز مری ءِ کوش ءُ خیر بخش مری ءِ دزگیری ءَ گوں یکجاہ کنگ ءِ کوشست ءَ گوں کنگ بیت۔ آجوئی ءِ جُنز ءِ دارگ ءَ بے سوبی ءَ پد پوجی زور شاھیں جنرل پرویز مشرف ءَ بلوچ راجی جنگ سئے سرداراں گوں بندوک کُتگ ءُ گُشتگ اَت کہ “ما اِیشاں چہ ھموداں جنیں کہ ایشاں سما ھم نہ کپ ایت“ کہ ایشی ءِ پسہ ءَ نواب خیر بخش مری ءَ گُشتگ اَت ریاست ءَ ھم زانشت بہ بیت کہ ما ھم ھپتاد ءِ دھک ءِ بلوچ نہ اِنت ءُ ریاست ءَ آئی ءِ جند ءِ زبان ءَ پیسہ دیگ بیت اِنت۔

جنرل مشرف ءِ پوجی ھاکمی ءَ پد پاکستان ءِ پیسرگیں سروک آصف زرداری ءَ بلوچاں گوں سُھلکاری کنگ ءِ درشان کُتگ، اِیشانی سر ءَ شست سال ءَ زلم ءُ زوراکیانی سر ءَ ماپی لوٹ اِتگ ءُ پیپلزپارٹی ءَ ”آغاز حقوق بلوچستان پیکج“ ءِ جار جَتگ اَت بلے آجوئی ءِ جُنز ءَ ھلاس کنگ ءَ بے سوبی ءَ پد شرم الشیخ سمٹ ءَ بلوچ جُنز گوں انڈیا ءَ بندوک کنگ ءِ کوشست کنگ بیتگ اَت، کہ چریشی ءَ پد ھزارانی کچ ءَ مردم زورانسری بیگواہ کنگ بیتگ اَت ءُ بازیں مردمانی ژانگولیں جون دگانی سر ءُ کوھ ءُ گیاباناں دور دیگ بیتگ اَنت۔

بلوچ جُنز ءِ تہ ءَ پدائی اُرشانی بندات دو ھزار یازدہ ءَ درویش بلوچ ءِ شال ءَ شفیق مینگل ءِ سر ءَ بیوکیں اُرش ءَ چہ بیتگ بلے دو ھزار ھژدہ ءَ ریحان بلوچ دالبندن ءَ چینی انجینئرانی سر ءَ پدائی اُرش کنگ ءَ پد بی ایل اے ءِ مجید بریگیڈ ءَ پاکستان ءُ چین ءِ مُزانی سر ءَ سیتانی سر ءَ بازیں تباہ کاریں اُرش کنگ بیتگ اَنت۔ شاری بلوچ، آجوئی ءِ جُنز ءِ اولی زالبولیں پدائی بیتگ بلے سمعیہ بلوچ ءِ پدائی اُرش ءَ پد اولی بَر ءَ مجید بریگیڈ ءِ زالبولیں پدائیانی اکس شِنگ کُتگ اَنت کہ چریشی ءَ زانگ بیت کنت کہ مجید بریگیڈ ءِ زالبولانی مزنیں کساسے ھوار اَنت۔

شاری بلوچ ءِ پدائی اُرش ءَ پد ڈیھ ءَ آ زھنی نادراہ نامینگ ءِ کوشست کُتگ اَت ءُ سمعیہ بلوچ ءِ کرد توتک ءَ آئی ءِ کھول ءِ مردمانی زورانسری بیگواھی ءُ نمیران کنگ ءِ پَدگَرد گُشگ بئیگ ءَ اِنت بلے بلوچ جنگ ءِ دپتر ءَ بلدیں کواس یکشلی ءَ گوں درشان کنان اَنت کہ بلوچ جنگ، آجوئی ءِ ھاتر ءَ سمائی بنھشتانی سر ءَ بندات کَنگ بیتگ ءُ بلوچ گلانی جُنزی پیسلہ ادارتی بنھشتانی سر ءَ کنگ بیگ ءَ اَنت۔

بلوچ آجوئی دوستیں پاٹی ءُ گلانی بلوچ راجی آجوئی ءِ جُنز ءَ گوستگیں دو دھکاں مھکمیں دروشم ءَ برجاہ داشتگ اِش ءُ پہ ریاست ءِ ھاتر ءَ باوری نہ اِنت کہ آ بلوچ جنگ ءِ ھستی ءَ بہ بج اَنت ءُ گوں تاکت ءِ زور ءَ جنگ ءَ ھلاس کُت بہ کن اَنت۔ اگاں ڈیھ ءِ نیمگ ءَ زوراکی ءِ سر ءَ بلوچ راجی جنگ ءِ ھلاس کنگ ءِ کوشست برجاہ بہ بنت گُڑا اے گپ چہ کُڑا دیر نہ اِنت کہ بلوچ سلاہ بندیں گلانی اُرشانی ترندی ءِ تہ ءَ ھم گیشی کیت اِنت۔

روکپتی بلوچستان ءِ بنجاھی شھر زاھدان ءَ نیکراھی وانگ جاہ دارلعلوم ءِ استاد گوستگیں روچ ءَ ناگتی بیران بیتگ-

اھوالانی رد ءَ زاھدان ءَ دالعلوم ءِ استاد مولوی فقیر مھمد نھتانی ماں گوستگیں روچ ءَ ناگتی بیران بیتگ-

اھوالانی رد ءَ مولوی فقیر مھمد بازیں وھداں چہ سیستان ءُ بلوچستان ءِ ھکانی واستا توار چِست کنوکیں مردماں چہ یکے بیتگ کہ آئی ءَ ھمک وھد ءَ ھکانی گرگ ءِ ھاتر ءَ وتی توار ھم توار کتگ –

اھوالانی رد ءَ چرے زھرشانی ءُ ھکانی ھاتر ءَ بیوکیں زھرشانی پژدر ءَ مولوی فقیر مھمد بازیں براں ایرانی چیریں ادارھاں لوٹائینتگ ءُ بیھار داتگ –

لس اھوالانی رد ءَ آ بازیں زھنی بیم ءُ ترسانی دیگ ءِ پُژدر ءَ آ دلپٹ بیتگ ءُ گوستگیں روچ ءَ ماں زاھدان ءَ بیران بیتگ-

ائید ءِ روچ ءَ مات ءِ ترانگ ءَ کپت آں

نبشتہ کار: سنگت بلوچ

دی بلوچستان پوسٹ

اما اما تو ائید ءِ روچ ءَ چی کنگ ءَ بہ ئے من ءَ انگت یات اِنت کہ تو ھر ائید ءَ ھک ءُ پھلی کُتگ ءُ من ءَ ھمباز کُتگ ءُ گریتگ۔وتی دست منی بڈ ءَ جتگ ءُ پد ءَ گریتگ۔ من ءَ انگت ھما روچ یات اِنت کہ تو من ءَ گْوَشت کہ تو ھچ سکّی مہ گندات ئے، چُکّانی مراداں بہ گندات ئے، مدام گوھاروکانی دیم ءَ بات ئے ءُ پت ءِ ساھگ ءَ بُرودات ئے۔ اما من ءَ ھما روچ انگت یات اِنت کہ چہ ائید ءِ نماز ءَ پد تو منی واستا پُراٹا ءُ پتکگیں گوشت آورت ءُ منی کشّ ءَ نِشت ئے چار اِت ءُ گْوَشت ابا جان ورگ ءَ بور۔ من ءَ اما جان ھما روچ انگت یات اِنت کہ لوگ ءَ لین نیست اَت ءُ تو وتی سولر والا پنکا منی دیم ءَ جت ءُ وت گرم ءِ تہ ءَ وپت ئے۔ اما جان من ءَ ھما روچ انگت یاد اِنت کہ تو وت وتی لاپ ءَ سنگے بستگ ات ءُ مارا ورگ داتگ ات اما جان تو چی کنگ ءَ بہ ئے۔ اما جان زاناں تو منی ودار ءَ کنگ ءَ بہ ئے؟ بوت کنت تو دگانی سر ءَ نشتگ ئے ءُ ترا منی اکس داست ءَ بیت ءُ گوشگ ءَ بہ ئے کہ منی چک بیگواہ اِنت ءُ باریں کدی واتر بیت اِنت۔

اما من ءَ تئی واستا سک زھیر کنت اما ترا یات اِنت کہ تو مدام ڈنّ ءَ منی تھت ءِ یک نیمگے ءَ چادرے جتگ کہ من ءَ مردم مہ گند اَنت۔ اما ترا یات اِنت کہ تو منی سر ءَ ھر سھب ءَ ساپیں چادرے پِر داتگ کہ من ءَ روچ مہ لگ ایت۔ اما من ءَ تئی واستا سک زھیر کنت اما اد ءَ جست کنوک کس نیست۔ اما اد ءَ بس تھاری اِنت من وت نہ زان آں کہ سھب کدی بیت ءُ شپ کدی۔ اما اما ناں اد ءَ ساپیں چادرے ھست کہ من پِر ئے بہ دے آں ءُ نیکہ یک پنکایے کہ گْوات بہ ور آں۔ اما منی مُود سک مزن اَنت من وت نہ زان آں من کدی جان شُشتگ ءُ کدی سر رَستگ۔ اما منی سر سک کِچّگ دنت اما بْیا منی سر ءَ سمار اما تو بْیا من ءَ ھمباز بہ کن بلّے سکون باں۔

اما من ءَ تو گیر کا ئے اما تو منی ساہ ءِ کپّ ئے۔ اما گپّے بہ گْوَش آں اما اے رستر مدام کا اَنت ترا دژمان دے اَنت من ءَ ھِچّ وش نہ بیت من ءَ گْوَش ئے تیر لگ اِیت وھدے کہ آ ترا دژمان دے اَنت۔ اما برے برے من زدّ ءَ کپ آں آیاں گْوَش آں ہَرا منڈی کے اولاد مارنا ہے تو مارو لیکن میرے امی کو ایک بھی گالی مت دو۔

اما من ھِچّ پوہ بُوَگ ءَ نہ آں کہ منی گُناہ چے اِنت من پرچا بندیگ آں۔من پرچا جستے ءِ چیدگ آں۔ اما اِے رستر مدام من ءَ جن اَنت کہ وتی مات ءَ یلہ کن۔ اما تو شرتر زان ئے بے تو من ھِچّ نہ باں بے تو منی ھستی ءَ ھچ ارزشت نیست۔ گُڑا اے پیم چیتور بیت۔ اما من وتی گڈی ساہ ءِ ساھت ءَ بس تئی نام ءَ گر آں اما تو یل دیگی چیزے نہ ئے چہ منی مرگ ءَ پد تو ھست ئے ءُ ھست بات ئے۔

اما من چوناھا سرپد نہ بوتگ آں کہ مرچی ائید اِنت من ھما وھد ءَ سرپد بیت آں کہ وھدے یک مردے منی کرّ ءَ اتک ءُ گوں ترندیں توارے ءَ من ءَ گْوَشت ئے لو کھانا کھاؤ آج ائید کا دن ہے لو بریانی کھاؤ۔ گڑا من ابکّہ بوت آں کہ زاناں مرچی ائید اِنت؟ من گْوَش ئے پورا دگہ دگنیایے ءَ شُت آں۔ من گل بوت آں کہ مرچی ائید اِنت مات ءَ منی گُد استری داتگ اَنت ءُ منی سواس ھیر اَنت۔ چہ ائید ءِ نماز ءَ پد من کا آں لوگ ءَ مات ءِ اڈکُتگیں پراٹا ءُ پتکگیں گوشتاں ور آں۔ من گل بوت آں کہ من رو آں وتی ھمبلانی کرّ ءَ ائید مبارکی کن آں ءُ دگہ باریں چے چے۔

انگت ءَ یکے ءَ گوں بمناکیں توارے ءَ من ءَ اردو ءِ تہ ءَ دژمانے دات ءُ گْوَشت ئے سور کے اولاد کھانا کھاؤ بریانی ٹھنڈا ہو چکا ہے۔ چہ ایشی ءِ آیگ ءَ پد گُڑا من زانت کہ من ھمے تھاریں کوٹی ءِ تہ ءَ آں۔ باز وھد اِنت کہ من بندیگ آں۔ نی من زانت کہ من چہ وتی مات ءَ سک دیر آں ءُ من نہ زان آں منی مات، گوھار، چُک(سمُل) چے کنگ ءَ بَہ اَنت۔ من ھِچّ کُت نہ کن آں ھمے آورتگیں بریانی منی جان ءَ ھَرام بوت اَنت دل ءَ نہ گْوَشت کہ ورگ ءَ بہ ور۔ اما تو من ءَ سک یات پیداک ئے منی سمُل تو من ءَ سک یاد پیداک ئے۔

دریگتیں اے پنجابی مہ یتکیں ءُ من ءَ مہ گْوَشتیں کہ مرچی ائید اِنت ءُ ما ائید ءَ بریانی اَڈّ کُتگ۔ اما من باریں زندگ باں یا ناں بلے من ترا گْوَشگ لوٹ آں کہ منی ھکّاں شرّی ءِ سر ءَ پھل کن کہ من ترا ھزابی کُتگ اماں منی ھکّاں پھل کن اگاں من ترا دلرنج کُتگ۔۔۔ اما جان مدام سلامت بات ئے ھچ سکّی مہ گندات ئے تئی بچیگ بیگواہ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شَھموکیں پَرِی داں اَبَدمان اِیت

نبشتہ کار: ھَوَا بلوچ

دی بلوچستان پوسٹ

دل گُش اِیت تئی نام ءَ چار دانک نِبشتہ بِہ کن آں بَلَے تئی کِرد ءِ زیبائی ءِ درشان کَنگ گوں من ءَ نَہ بیت چُشیں لَبز ھم نیست کہ من تئی دیمونی ءِ بابت ءَ نِبشتہ بِہ کن آں منی ھیال ءَ ھَر وڑیں زانوگِریں مردُمے بِہ بیت بَلَے تئی کِرد ءِ درشان کَنگ گوں آئی ءَ ارزان نہ بیت ۔

منی ھیال ءَ تو مَروچی ھما کتاب ءِ کہ وانگ ءُ زانگ اَلّم لوٹ ئے اَگاں یک مردُمے ترا بُوان اِیت آ اَلّم وت ءَ زانت ءُ پجاہ کار اِیت ۔

سَمّو جان ! تو یک گرانبھائیں انسان ءِ اِت ئے تو مُدام پہ وتی بَزّگیں راج ءِ وشھالی ءِ ھاتر ءَ جُھد کُت ترا گوں سرڈگار ءَ بے کساس مھر اَت تو ھما لوگ ءِ جِنک اِت ئِے کہ آ لوگ ءَ بس یکیں گوانک اَت کہ وت ءَ چَہ اے مُھریں زَمزیلاں بِہ سِند اِت تو جِند نَدْر ریھان ءِ نام گِپتیں دشتار اِت ئے ءُ اُستاد اسلم ءِ لاڑوکیں نشار اِت ئے ترا چو ریھان ءُ استاد ءِ رَنگ ءَ گوں زمین ءَ ھم مھر بُوّت تو زمین ءِ مھر پدّر کُت وتی زاتی زند ءُ واھِشت دُرست یَلَہ کُت اَنت بس راج ءِ ھیال گور کُت وت ءَ راجدپتر ءِ تاکاں اَبَدمان کُت ءُ جُھد ءَ ھاٹیگ بکش اِت ۔

مَروچی تو سَرجمیں راج ءَ ھوار وتی سنگت ءُ دزگُوھار ھم سَرپد کُت اَنت تَچک ءَ گُشت اَنت کہ مارا جُھد ءِ بَھر بُوّگی اِنت اے راجی جُھد دیم ءَ بَرَگی اِنت نِندگ ءُ بس چارگی نَہ اِنت پہ چارگ ءَ ھچ نَہ بیت انچو کہ مئے برات کُربانی دئیگ ءَ اَنت بائید اِنت ھمئے رَنگ ءَ بلوچ شیرزالیں زالبول ھم کُربانی ءِ دئیگ بِہ زان اَنت اے اَھد ءِ زندگیں مردُم ما اِنت کہ مئے اَھد ءَ زلُم ءُ زوراکی بَرجاہ اِنت گُڑا مارا اے اَھد ءِ جاوَر بدل کَنگی اَنت جُھد ءِ بَھر بُوّگی اِنت اے جاوَر ءُ ھالت پہ بلوچ راج ءَ ھما وَھد ءَ ھلاس بنت کہ راج یکمُشت ءُ تپاک بہ بنت گُڑا ھما وَھد ءَ بلوچ راج ءِ زندِمان پہ وشھالی ءُ ایمِنی گْوز اِیت ۔

اے گَپّ نُوں بلوچ زالبولاں یَلَہ کَنگی اَنت کہ من زالبولے آں من ءَ ھَکّ نیست اِناں زالبول ءَ ھم ھَکُ ھَست پہ وتی سرڈگار ءِ رَکّینگ ءِ واستا زالبول ءَ ھم راجی جُھد ءِ بَھر بُوّگی اِنت زالبول بیت یاکہ ورناہ ءُ کماش دُرستاں راجی زَمہ واری وتی بَڈّ ءَ بَندگی اَنت ءُ وت ءَ گوں گَرنچ دئیگی اَنت ۔

راجی زندِمان ءِ رَکّینگ ءِ واستا ورناہ ءُ زالبولاں دیمونی دئیگی اِنت ءُ راجی زندِمان ءِ رَکّگ گوں راج ءِ بھادُریں پَرزندانی گرانبھائیں دیمونیاں گوں بَندوک انت۔

بائید اِنت نُوں بلوچ زالبول پَہ وتی راج ءِ آسُودگیں باندات ءِ واستا وتی راج ءِ وشھالی ءُ دیمروی ءِ واستا پاد بیا اَنت اے جُھد ءَ وتی جُھد بِہ لِیک اَنت نُوں بلوچ راج ءَ وت ءَ چَہ اے جُھد ءُ جنگ ءَ گِستا کَنگی نَہ اِنت بلوچ زالبولاں جیڑگی اِنت وت ءَ ماں اے جُھد ءُ جنگ ءَ ھَوار کَنگی اِنت دُژمن ءِ ھلاپ ءَ نَپرت دارگی اِنت ءُ دیمونی دئیگی اِنت پَہ آیوکیں پدریچ ءِ زندِمان ءِ رُژنائی ءِ ھاتر ءَ پہ سَرڈگار ءِ آجوئی ءِ ھاتر ءَ زوراک ءِ مُھریں سَانکَل پْروشَگی اَنت ۔

مَروچی مارا وت ءَ بے ھاٹیگ ءُ نِزور کَنگی نَہ اِنت اَگاں ما وت ءَ نِزور ءُ بے ھاٹیگ بِہ کن اِنت ءُ بس بِچاریں گُڑا ھَمُک روچ مئے بلوچ ورناہ ءُ زالبول زورگیریں ریاست ءِ لَٹّانی دیمپان بِہ بَنت ۔

زندگی ءِ یَلَ کَنگ راستے کہ مردُم ءَ تُور اِیت بَلَے مَروچی بلوچ ورناہ ءُ زالبول پہ شان ءُ نازے وتی مَرگ ءَ وت اَمباز کَن اَنت وتئی زند ءَ یک مانا یے دئِے اَنت زند یک مانا ئے بدار اِیت گُڑا مردُم زندگ گُشگ بیت مَروچی اے زند ، زند ءِ ھِساب ءَ نَہ اِنت کہ تئی سَر ءَ دِگہ یک نہ پاکیں ریاستے ھاکم کنگ ءَ اِنت چَہ ترا تئی مال ءُ مَڈّیاں پُلَگ ءَ اِنت تئی برات ءُ پِت ءَ ھَر روچ بیگواہ کَنگ ءَ اِنت اے زند ، زندے نَہ اِنت۔

مَروچی اَگاں ما چَہ زاتی پِگر ءُ زند ءَ دَرَ نَہ کَپت اِیں سَما ءُ سَسّا نَہ کُت گُڑا باندا یک توکَلے جوڑ بُوّت نَہ کن اِیں ءُ نَہ کہ ھَستیں وَھد ءَ اَڑ ءُ جنجالاں چَہ وتی راج ءَ دَرَ کَنگ ءَ سوبین بیت کُت کن اِیں بَلَے مَروچی اُستاد اسلم ءِ کاروان پہ مُھکمی دیم ءَ روان اِنت زی شارُل شُتگ مَروچی سُمیعہ ، نُوں ھمئِے رَنگ ءَ اے جُھد بَرجاہ مان اِیت چَہ شارُل ءُ سُمیعہ ءَ پَد ھزاراں زالبول کئیت شُورھاں وتی سینگ ءَ بَند اَنت وت ءَ پہ زمین کُربان کن اَنت ۔

مَروچی ماتیں گُلزمین وتئی سَر ءَ پَھر بَندگ ءَ اِنت کہ سَمّو تی وڑیں کسان سالیں جِنک دُژمن کُشیں شُورھاں بند اَنت وت ءَ نمیران کن اَنت ۔

مَروچی سَمّو چَہ تئی رِتکگیں ھوناں ورناہ زالبول پِگر ءُ لِیکَھی بُندر ءَ مُھکم کُتگ اَنت سَمّو تئی وڑیں گُوھارانی سَر ءَ ما پَھر بَندیں کہ تو وتی مِھلبیں ھاک ءِ رَکّینگ ءِ واستا وتی زند ءِ واھِشت ءُ واھگ دُرست یک کِرّ کُت اَنت دُژمن ءِ پْروش دئیگ ءِ راہ تچک کُت ۔

سَما کُرت من زمین ءِ آہ پَمشکہ
منی جُون شُورھاں نَزّارگ ءَ اِنت

(شاکر شیخ )

رُکست اَپ ھَوارُن کامریڈ سُمیعہ بلوچ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھج ءِ سیزن سال دوھزار ءُ بیست ءُ سَے ءِ سوبمندی ءَ شاہ سلمان بند عبدالعزیز ءَ امارات ءِ سروک شیخ مھمد بند زاید ال نھیان، کویت ءِ امیر شیخ نواف الاحمد جابری الصباح ءُ او آئی دی، جی سی سی ءِ سیکریٹری جنرل ءُ عرب پارلیمنٹ ءِ اسپیکر ءَ مراد باتی پیش کتگ اَنت-

سرکاری ھال سرکنوکیں ادارہ ایس پی اے ءِ رد ءَ امارات ءِ سروک ءَ شاہ سلمان بند عندالعزیز ءَ را کلوہ داتگ کہ ھج ءِ سیزن ءِ سوبمندی ءِ مراد باتی دیان ءَ گوشتگ کہ سعودی ءِ سرکار ءُ آئی ءِ ادارھانی نیمگ ءَ ھج ءِ واستا چن ءُ لانچ کرتگیں کار ستاہ شاہ اَنت –

متھدہ عرب امارات ءِ کسان کمک سرکاش ءُ سر وزیر شیخ مھمد بن راشد آل مکتوم، نائب سروک ءُ سروزیر شیخ منصور بند زاید ال نھیان ءَ گوشتگ ھج ءِ مراد باتی پیش کنگ ءَ کلوہ راہ داتگ اَنت-

ایشی ءَ چہ پیش بھرینی شاہ ءَ وتی کلوہ ءَ گوشتگ کہ اے سال ءَ ھج ءِ سیزن ءَ جوانیں گر ءُ داری بیتگ اَنت ءُ جوانی ءَ مردمانی ھمدمتکاری کنگ بیتگ اَنت کہ ایشی ءِ سر ءَ شاہ سلمان مراد باتی ءِ دیگ ھک اِنت –

بھرینی ولی اھد شھزادہ سلمان بن حمد ال خلیفہ ءَ شاہ سلمان ءُ ولی اھد شھزادہ مھمد بن سلمان ءَ جتا جتائیں کلوانی توک ءَ مراد باتی دیم داتگ اَنت-

اسلامی کمکی گل او آئی ایس ءَ ھج ءِ گر ءُ دار ءُ سوبمندی ءِ سر ءَ شاہ سلمان بن عبدالعزیز ءُ ولی اھد ءِ ستاہ شانی کتگ-

ایس پی اے ءِ رد ءَ سیکریٹری جنرل حسن طہ ءَ گوشتگ کہ حرمجن شیفین مسلمانانی دلانی توک ءَ ھدمتکاری ءُ جوانیں رنگے ءَ گر ءُ دار کنگ ستاہ شانی اِنت-

عرب پارلیمنٹ ءَ اے سال ءَ ھج ءِ سیزن ءِ سرجمی ءَ سلمان بن عبدالعزیز ءَ سعودی ارب ءِ جھدانی ستاہ شانی کتگ بیتگ-

عرب پارلیمنٹ ءِ اسپیکر ءَ وتی یک درشانے ءَ گوشتگ سعودی ءِ سرکار ھج کنوکانی جوانی ءَ کمک ءَ کنت اِنت-

ھلیجی کمکاری کونسل جی سی سی ءِ سیکریٹری جاسم مھمد البدوی ءَ درشانے ءَ گوشتگ کہ ھج کنوکانی گر ءُ دار ءُ آیانی کمکاری کنک ھمک مردمانی واستا پھری یے ایشی ءَ ڈیھ ءِ کلانیں رھشون شاہ عبدالعزیز ءَ چہ شاہ سلمان ءِ وھد ءَ جوانی ءَ پیلو کتگ –

آئی ءَ ھج کنوکانی درگت ءَ سعودی ءِ سرکار ءِ جھدانی ستاہ شانی کتگ اَنت-

سربوتگیں ھالانی رِد ءَ آواران ءِ دمگ مشکے ءَ تیرگواری ءِ وئیل ءَ یک مردمے بیران بوتگ ءُ زھگے زدگ بوتگ –

گیشیں ھالانی رِد ءَ گوستگیں بیگاھے ادار پنچ ءَ مشکے جونگو ءَ ناشناسیں سلاہ بندیں مردمانی تیرگواری ءَ عیسی ء جنگی خان بیران بوتگ وھدیکہ یک کسانیں زھگے زدگ بوتگ –

اھوالکار ءِ رِد ءَ عیسی چار رند ءَ پاکستانی پوج ءَ پیسر ءَ زورانسری آوار جتگ ءُ بیگواہ کتگ بوتگ ءُ آئی سرکاری کشندہ ٹولیانی نیمگ ءَ مرگ ءِ بیھار ھم دیگ بوتگ –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ وتی آفیشل ٹیلی گرام چینل ھکل ءَ شنگ کرتگیں درشان ءِ تہ ءَ مستونگ ءُ مارگٹ ءِ پاکستانی پوج ءِ سر ءَ بوتگیں اُرشانی زمّہ واری منّ اِتگ ءُ گوشتگ کہ اے اُرشاں یک دشمن کارمندے مرتگ ءُ سَے زدگ بوتگ انت –

جارکش جئیند بلوچ ءِ رِد ءَ بی ایل اے ءِ سرمچاراں گوستگیں شپ ءَ مستونگ ءِ دمگ تلخہ خاوی ءَ زورگیریں پاکستانی پوج ءِ یک پانگسے ءِ سر ءَ مزنیں سلاھاں گوں اُرش کتگ چریشی ءَ یک پوجی کارمندے ھما دمان ءَ مرتگ وھدیکہ پوج ءَ گیشتر جانی ءُ مالی تاوان ءِ دیمپانی کنگ کپتگ –

جارکش ءِ رِد ءَ سرمچاراں زرغون گیس فیلڈ ءِ نزیک ءَ مارگٹ ءِ دمگ زورگیریں پوج ءِ یک دگہ پانگسے ءِ سر ءَ ھم اُرش کتگ ءُ گرنیڈ لانچرے بازیں گولہ آس داتگ، اُرش ءِ آسر ءَ کم چہ کم سَے پوجی کارمند زدگ بوتگ انت وھدیکہ آھاں مزنیں مالی تاوان ءِ بوتگ –

جارکش ءِ رِد ءَ بی ایل اے اے اُرشانی زمہ واری ءَ منیت ءُ کول کنت کہ سرڈگارے آجوئی ءَ تاں مئے اُرش برجاہ مان انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ پنجگور ءَ پاکستانی پوج ءِ سر ءَ بوتگیں اُرش ءِ زمّہ واری منّ اِتگ –

جارکش میجر گوھرام بلوچ ءِ رِد ءَ بی ایل ایفءِ سرمچاراں بیست ءُ نُھ ءُ سی جون ءِ میانی شپ ءَ پنجگور ءِ دمگ شاھو کھن ءُ مجبور آباد ءِ میان ءَ ابدار پٹ ءَ تمر فیکٹری ءَ برجاھیں پاکستانی پوج ءِ بنجلے سر ءَ اے ون گولہ آس داتگ کہ آ بنجل ءِ تہ ءَ کپتگ اَنت چریشی ءَ دُژمنیں پوج ءَ جانی ءُ مالی ءُ تاوان بوتگ –

میجر ءِ رِد ءَ اُرش ءَ پد پاکستانی پوج ءَ چاریں نیمگاں تیرگواری کتگ –

جارگش ءَ وتی درشان ءِ گڈسر ءَ گوشتگ کہ دُژمنیں پوج ءِ سر ءَ مئے اُرش زورگپتیں بلوچستان ءِ آجوئی ءَ تاں برجاہ مان انت –

روکپتی بلوچستان ءِ دو جتا جتائیں جاھاں دو کس آوار جنگ ءَ پد بیگواہ کنگ بیتگ اَنت-

سر بیتگیں اھوالانی رد ءَ روکپتی بلوچستان ءِ بنجاھی شھر زاھدان ءَ یک ورنایے بیگواہ کنگ بیتگ –

آوار جنگ بیتگیں ورنا ءِ پجار اویس شالی ء مھمد علی جھمنند شیراز ءِ نام ءَ زانگ بیتگ-

اھوالانی رد ءَ اویس شیراز ءِ جھمنند اِنت کہ لھتے روچ ءَ پیش زاھدان ءَ اتکگ بیتگ ءُ واتر شیراز ءَ روگ ءَ بیتگ کہ بس ءِ ٹرمینل ءَ آوار جنگ ءُ بیگواہ کنگ بیتگ-

اھوالانی رد ءَ اویس ٹرمینل ءَ شتگ ءُ پد ءَ لھتے ساھت ءَ پد آئی ءِ نمبر ءُ رھوت بند بیتگ اَنت ءُ آئی ءِ وارس بس ءِ ٹرمینل ءَ شتگ انت اود ءُ جست ءُ پرس اش کتگ ءُ پد آئی ءِ درگت ءَ دگہ ھچ اھوال دیم ءَ نیتکگ اَنت –

ھمے وڑ ءَ ایرانشھر ءَ ایرانی لشکر ءَ یک نیکراھی مردمے آوار جنگ ءَ پد گون وت برتگ-

آوار جنگ بیتگیں مردم ءِ پجار مولوی مھمد اسلام عبدالزئی ءِ نام ءَ زانگ بیتگ –