TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءِ تہ ءَ گوشتگ کہ مئے سرمچاراں آواران ءِ دمگ جھاؤ ءَ پاکستانی پوج ءِ چوکی راکٹ ءُ وتکاریں سلاھانی گون ءَ اُرش کتگ-

جارکش ءِ رد ءَ سرمچاراں چار شمبے ءَ پنچ جولائی ءَ جھاؤ ءِ ھند ڈولیجی ءَ زورگریں لشکر ءِ چوکی ءِ سر ءَ راکٹ ءُ وتکاریں سلاھانی گون ءَ اُرش کتگ-

راکٹ چوکی ءِ تہ ءَ کپتگ اَنت چریشی ءَ دشمنیں لشکر ءَ جانی ءُ مالی تاوانانی دیمپانی کنگ کپتگ-

آئی ءَ گوشتگ بی ایل ایف اے اُرش ءِ زمہ واری ءَ من ایت ءُ بلوچستان ءِ آجوئی ءَ داں اُرش برجاہ بنت اِنت-

اسرائیل ءِ نیمگ ءَ لبنان ءِ سیمسری ھند ءِ میتگ ءِ ھوارینگ ءِ جھد کتگ ءُ چریشی ءَ ھردوکیں ڈیھانی جنگ ءُ چوپ-

عرب نیوز ءِ رد ءَ اسرائیل ءِ گامگیج زیرگ ءَ پد گجر، شیبا فارمز ءُ فرچوبا ءِ ھنداں یک ادارے ءَ داں تیرگواری بیتگ-

لبنان ءَ جاڑیگیں میان اُستمان ءِ امن لشکر ءَ اژدری ھردوکاناں رھوت کتگ ءُ گوشتگ کہ ھردوک اوپار ءِ سر ءَ چار ءُ ٹپاس بہ کن اَنت ءُ اے دابیں چیزانی سر ءَ جاور گیشتر ناگیگ بنت اِنت-

لبنان ءِ ریٹائرذ جنرل عبدالرھمان چیھیتلی ءَ عرب نیوز ءَ گوں گپ کنان ءَ گوشتگ کہ اے جاور اجکہ کنوکیں نہ اَنت اے گیشتر گیش بوت کن اَنت-

ریٹائرڈ جنرل عبدالرھمان چھیتلی ءَ اسرائیل ءِ زری سیمسراں ھد بندی ءِ واستا گپ ءُ تران ءِ وھد ءَ لبنان ءِ باسکانی سروکی کتگ بیتگ – دوھزار ءُ ھپت ءُ دوھزار ءُ سیزدہ ءَ گجر ءَ اسرائیل ءِ زورگری ھم پروش داتگ-

آئی ءَ گوشتگ کہ اسرائیل یک ردیں رنگے ءَ بیتگ ءُ چریشی ءَ لبنان ءِ نیمگ ءَ گولہ ءِ آس دیگ ھژدری بیتگ-

اسرائیل ءِ مول ءُ مراد ھمیش بوتگ آ اے میتگ ءَ گون وت ءَ ھوارینگ بیتگ- گجر ءِ میتگ ءِ نزیک ءَ یک ترندیں تراکے ءِ توار ھم اشکنگ بیتگ- ءُ اسرائیل ءَ لبنان ءِ سر ءَ بھتام جتگ کہ آئی ءَ راکٹ آس داتگ اَنت –

ایشی ءِ پسو ءَ اسرائیل ءِ نیمگ ءَ کساس بیست شیل فرچوبا ءُ فرھامم ءِ ھنداں آس دیگ بیتگ اَنت-

اسرائیل ءِ گوشگ اِنت اے ھما دمگ اَنت اسرائیل ءِ سر ءَ بمب آس دیگ بیتگ اَنت –

میان اُستمان ءِ امن لشکر ءِ واکدارانی گوشگ اِنت تراکانی توار اشکنگ بیتگ اَنت گڑا زوت کارندہ پٹ ءُ پول ءِ واستا دیم دیگ بیتگ اَنت بلے راستیں اھوال سر نہ بیتگ اَنت پد ءَ نیمروچ ءَ اھوال اتکگ اَنت تیرگوار کنگ بیتگ –

چریشی ءَ پد میان اُستمان ءِ امن لشکر ءِ سروک میجر جنرل سٹیفیو ڈیل کول ءَ لبنان ءُ اسرائیل ءِ واکداراں گوں رھوت کتگ –

اے وئیل یک ھنچیں وھدے ءَ دیم ءَ اتکگ کہ ھردوکیں نیمگاں پیسر ءَ چہ جاور ناگیگی ءِ دیمپان اَنت –

دومی نیمگ ءَ اے وئیل ءَ پد ھزب اللہ ءِ ترندیں درشان دیم ءَ اتکگ ءُ گجر ءِ سر ءَ زورگری ءِ جھد ایر جتگ –

میان اُستمان ءِ رد ءَ اے ھند ءُ دمگ لبنان ءِ زمین ءَ ھوار بنت اِنت-

بلوچ نودربر کیچ ءِ نیمگءَ پنچ شمبے ءِ روچ ءَ کیچ ءِ بنجاھی شھر تربت ءَ بلوچ نودربرانی زورانسری بیگواھیانی بگیرءَ زھرشانی کنگ بیتگ۔

زھرشانی روانک ءِ تہءَ بچک ءُ جنکیں نودربراں مزنیں کچ ءَ بھر زُرتگ۔ مُچی ءَ ھواریں مردماں ڈگری کالج دگءَ روانک کشان ءَ شھید فدا چارراہ ءِ سرءَ زھر کُتگ۔

زھرشانی کنوکاں بیگواھیں سالم بلوچ، اکرم نعیم، سکی ساوڈ و دگہ بیگواھانی عکس دستءَ بیتگ اَنت ءُ آیانی زورانسری بیگواھی ءِ بگیرءَ ءُ یل کنائنگ ءَ پہ اوگام جتگ اَنت۔

شھید فدا چارراہ ءِ سرءَ ترانکاراں مُچی ءَ گوں تران کنان ءَ نودربرانی زورانسری بیگواھی ترندی ءَ گوں ایر جتگ ءُ اِشی گیر آئینی ءُ گیر کانودی کار ءِ گشان ءَ بیگواھیں سالم بلوچ، اکرم نعیم ءُ سکی ساوڈ ءُ دگہ بیگواھیں مردمانی یل کنگ ءِ لوٹ کُتگ۔

آیاں گُشتگ کہ بلوچ نودربرانی ودوکیں بیگواھیانی سوب ءَ مئے وانگ ءُ زانشت سانمند بئیگ ءَ اِنت ءُ نودربراں ھوار سرجمیں کھول ترُس ءُ بے باوری ءِ آماچ اَنت۔

زھرشانی کنوکاں گُشتگ کہ ما وتی لوگ، وانگجاہ ءُ داں مساپر بساں ھم نہ رکیتگ اِنت اے درچ دارگ بہ بیر ءُ درستیں بیگواھیں نودربر یل کنگ بہ بنت ءُ بلوچ نودربراں وانگ ءُ زندگ بوھگ ءَ یل کنگ بہ بیت۔

بلوچستان ءَ زورانسری آوار جنیانی بگیری ءَ بیگواھیں مردمانی پانکجنیں گل وائس فار بلوچ مسنگ پرسنز ءِ دراج کشیں زھرشانی بنجل ءَ مروچی پنچ ھزار ءَ نود ءُ شش روچ سرجم بوتگ انت –

مروچی چہ کراچی لیاری ءَ سیاسی ءُ چاگردی باسک عدیل بلوچ، نور شاہ بلوچ، کامریڈ عاصم بلوچ، ریحان بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ کراچی ءِ دیرگیں شھر لیاری ءِ مردم یک ءُ دومی گوم ءَ میڈینگ بوتگ انت – گولہ باری، تراک ءُ چہ تیرگواری ءَ راج چیرترین اِتگ ءُ گینگوار جوڈ کتگ انت –

ماما قدیر بلوچ ءَ گوشتگ کہ چیریں ادارھاں شوربندی ءِ رِد ءَ بلوچانی تہ ءَ نشہ عام کتگ ءُ آ دُز ءُ ڈنگ جوڈ کتگ انت ءُ وڈ وڈا بلوچ ءِ ھون ریزی کتگ –

ماما قدیر بلوچ ءَ گوشتگ کہ بلوچستان ءِ جتا جتائیں ھند ءُ دمگاں ھزارانی کچ ءَ بلوچ رھشوناں وتی جانانی دیمھونی داتگ انت ءُ اے جھد مارا سر کتگ نوں مئے آؤکیں پدریچ ءِ زمہ واری بیت انت کہ اے نمیران بوتگیں سرانی ھوناں ھُشک بوگ ءَ میل انت –

آئی ءَ دیمتر ءَ گوشتگ کہ بولان ءِ دامن ءَ کہ ھما شھیدانی ھون تالان انت کہ تر ءُ تاجگ انت آھانی تاجگیں وشبوہ آیگ انت مرگاپ ءَ مروچی ھم شھیدانی ھون وتی ھستی ءِ گواھی ءَ دیگ انت شیراز ءِ ھون تنی وھدی ھُشک نہ بوتگ انت پنجگور ءَ نمیران بوتگیں سرانی ھون ھنگت تر ءُ تاجگ انت ڈیرہ بُگٹی ءِ یکجاھیں کبر مروچی ھم مئے زمیر ءَ چست کنگ ءَ انت ـ شھیدانی روح مارا توار پر جنگ ءَ انت ـ نیوکاہان شھدائے کبرستان ءَ کربان بوتگیں شھیدانی پگر ءُ پلسپہ ھک ءُ راستی ءِ سوت ءَ جنگ ءَ انت – ھزدار ءَ دست کپتگیں ژانگولیں نوکیں سھب ءِ آھگے اھوال ءَ دیگ انت شال ءِ بازار ءَ شھید سباء ءِ پاکیں ھون مئے گوشاں سرگوشی کنگ ءَ انت ھما ھون کہ گمنامی ءِ نزر بوتگ انت آ ھم مپت ءَ مہ رو انت راج ءَ میدان ءَ آیگی انت انچو ھونانی رچگ ءَ پد ھم ما وش واب بہ بہ ایں گڈا مئے آؤکیں پدریچ مارا لانت دنت –

دی بلوچستان پوسٹ

زند ءِ زیبائی ءِ رنگاں گوں اَبدمان بوت ئے
اُپّ مباتاں پہ وتن، تو اُوں نمیران بوت ئے

کِرد بنی آدم ءَ نامے اگاں بکشات بِہ کنت
دپتر ءَ راج ءِ منی، زاناں تو گیران بوت ئے

مرگ ساہ زُرتیں سراں ھست بیت دائم وَ بلے!
راھے ءَ چونیں بچار تو پد ءَ کُربان بوت ئے

ھَو اے آشوب اِنت کہ اگریچیں دل ءَ زندگ بیت
تو زمین ءَ پہ وتی مُھکمیں اِیمان بوت ئے

من کہ ماہ گنج پہ ستاہ ءَ تئی لبزے جیڑاں
بس ھیالاں ھمے دانکیں، تو نمیران بوت ئے

گوستگیں روچ ءَ بزاں پنچ جولائی ءَ آدم ھکانی اکیڈمی آواران کولواہ ءِ چیردستی ءَ آواران نامداریں لچھکار ءُ ندکار مقبول وفا ءِ سپرنامگ “دردانی اوگار” ءِ دیم درائی ماں آواران ءَ شھید آدم جان بزنجو لس کتابجاہ ءَ سھب ءِ ادار دھ ءَ مراگش ءِ برجم دارگ بوتگ –

اے مراگش کتاب جاہ ءِ کارمستر کلم قادر ءِ پاگواجھی برجم دارگ بوتگ ءُ مراگش ءِ گچینی مھمان آواران ءِ نامداریں شائر حاجی محمد یعقوب عادل قمبرانی ، اورنگ زیب بزنجو ، عابد حسین بلوچ ، عبدالواحد آوارنی ، بوتگ انت –

اے مراگش سَے بھراں بزاں گشتانک، شئر ءُ شائری، سازءُ زیمل بوتگ –

مراگش ءِ بنگیج چہ ھاوند ءِ پاکیں نام ءَ مُلا عبدالقیوم حقانیءَ کرتگ ءُ گشانکی بھر ءِ جارچینی ءِ ڈبہ حمل دولت ءِ کوپگاں بوتگ –

مراگش ءَ گچینی مھمان حاجی محمد یعقوب عادل قمبرانیءَ “دردانی اوگارءِ “دیم درائی کرتگ ءُ چہ دیمدرائی ءَ پد کارمستر کلیم قادر ءَ دیوان ءَ بھر زورکیں سْیاسی، لبزانکی، چاگردی، مزھبی رھشون ءُ نودربراں دردانی اوگار سوگات کتگ انت –

مراگش ءِ اولی بھر گشتانکی ءَ کفایت قاضی، میر اورنگ زیب بزنجو، عبدالواحد آوارانی، امان قاضی، وحید ھمراز، ڈاکٹر شکیل بلوچ، عارف اسلام ءُ دلپل شوھاز ءَ مقبول وفا ءِ سپرنامگ ،،دردانی اوگار،، ءُ مقبول وفا ءِ لبزانکی کردانی سرا وتی ھیال درشان کرتگ انت-

مراگش ءِ دومی بھر شئر ءُ شائری ءِ بوتگ ءُ شائری ءں جارچینی ءِ ڈبہ دلپل شوھاز گون بوتگ – شائری بھرءِ گچینی مھمان آواران ءِ نامداریں شائر ءُ لچھکار نعیم رھچار بوتگ –

شائری ءِ دیوان ءَ کلیم قادر، کفایت قاضی ، مقبول وفا، نعیم رھچار وحید ھمراز، عارف اسلام، طالب فرید، گمشاد شمس، مختیار مھر، دلپل شوھاز، عوض ھمراز،عافیہ جی ایم حمل دولت، رئیس حمل، شاھنواز رھگواز، مھیم دربیش، عاقل جمیل، حبیب گپتار، زبیر دانش، الیاس رھچار، امداد کَلمَتی، امان رحیم، ساکم بشیر، عابد ودار، سمیر ھمراز واحد ساگر،ءَ بھر زُرتگ ءُ وتی ھیال درشان کُتگ انت –

مراگش ءِ سمی بھر ساز ءُ زیملی دیوان بوتگ کہ اود ءَ بلوچی زبان ءِ وش تواریں گُشندھاں سوت جتگ –

روکپتی بلوچستان ءِ جتا جتائیں جاھاں چار کس بیران بیتگ اَنت، یک مردمے ایرانی لشکر ءَ تیر جتگ ءُ کشتگ، دو مردمے ناشناسناں جتگ ءُ کشتگ انت ءُ دگہ دگ ءِ وئیل ءَ بیران بیتگ اَنت-

سر بیتگیں اھوالانی رد ءَ روکپتی بلوچستان ءِ دمگ چھبار ءَ ایرانی لشکر “سپاہ ” ءَ تیرگواری کنان ءَ یک مردمے کُشتگ –

کُشگ بیتگیں مردم ءِ پجار ظریف رئیسی ء حسین جھمنند بوگ کسرکند ءِ نام ءَ زانگ بیتگ –

اھوالانی رد ءَ ظریف کُشگ ءَ پد ایرانی لشکر ءَ آئی ءِ لاش گون وت برتگ –

اھوالانی رد ءَ چار ماہ ءَ پیش ماں کسر کند ءَ ایرانی لشکر ءَ ظریف رئیسی ءِ گس ءِ سر ءَ بیڑ ھم برتگ بیتگ ءُ بلے آ اود ءَ جاڑیگ نہ بیتگ ءُ چریشی ءَ آئی ءِ کھول ترسینگ بیتگ –

اھوالانی رد ءَ ظریف رئیسی گوستگیں روچ ءَ ماں چھبار ءَ یک چیک پوسٹے ءِ سر ءَ ایرانی لشکر ءَ تیر جتگ ءُ کُشتگ ءُ پد ءَ آئی ءِ لاش گون وت برتگ –

ظریف رئیسی ءِ کوش ءُ دزگیری ءِ بارو ءَ دگہ گپ ایرانی لشکر ءَ دیم ءَ نیاورتگ اَنت بلے روکپتی بلوچستان ءُ گیشتر چوشیں وئیل کہ آیانی سر ءَ کوش ءِ بھتام ءُ دگہ چیزانی سر ءَ مردم ھمے داب ءَ مرگ ءِ دیمپان بنت اِنت-

ھمے داب ءَ بمپور ءَ ناشناساں یک ورنایے تیر جتگ ءُ کُشتگ –

اھوالانی رد ءَ بمپور ءَ سلاہ بندیں مردماِ رضا شیخ ویس ء امیر تیرانی نشانگ کتگ ءُ کُشتگ –

ھمے داب ءَ ماں بنگلان ءَ یک مردمے چاکو جنگ ءُ کُشگ بیتگ –

اھوالانی رد ءَ بنگلان ءَ ناشناسیں مردماں سراپ کتگ ءُ حسین رئیسی ء کادر بکش چاکو جتگ ءُ کُشتگ –

ھمے وڑ ءَ روکپتی بلوچستان ءَ درساں ترسناکیں تیریں وئیل کہ اود ءَ دگ ءِ چَک ءَ پیش آیگ ءَ اَنت –

ایرانشھر ءَ یک گاڑی ءِ چپ بوگ ءَ تیل کشیں مصطفیٰ بامری ء کاسم بامری جھمنند دلگان بیران بیتگ-

روکپتی بلوچستان ءَ یکیں ھپتگ ءِ کساس دگ ءِ وئیلاں پنچ مردم بیران بیتگ اَنت، روکپتی بلوچستان ءَ ناوشتریں وئیل کہ اود ءَ دگ ءِ چَک ءَ مردم بیران ءُ یا زدگ بوگ ءَ دیر نہ کن اَنت-

سربوتگیں ھالانی رِد ءَ بلوچستان ءِ دمگ پنجگور ءَ بمب تراکے ءَ یک مردمے سک باز زدگ بوتگ وھدیکہ دومی نیمگ ءَ آواران ءِ دمگ جھاؤ ءَ ناشناسیں سلاہ بندیں مردماں پوجی پانگسے ءِ سر ءَ اُرش کتگ –

گیشیں ھالانی رِد ءَ پنجگور ءِ بمب تراک خدابادان ءَ بوتگ کہ یک گاڑی ءِ تراکناکیں شوروانی نشانگ جوڈ کنگ بوتگ –

پولیس ءَ تراک ءِ ھبر راست کتگ ءُ گوشتگ کہ تراک ءَ علی ء عبدالحفیظ نامی مردمے زدگ بوتگ –

اھوالکار ءِ رِد ءَ اے گاڑی ھما وھد ءَ نشانگ کنگ بوتگ کہ آروس ءِ مراگش ءَ نشانہ بازی ءَ پد اے مرد واتر آیگ ءَ بوتگ-

اھوالکار ءِ رِد ءَ تراک ءَ دگہ مردم ھم کمے زدگ انت وھدیکہ علی سک باز زدگ انت –

دومی نیمگ ءَ چہ آواران ءِ دمگ جھاؤ ءَ ھمے ھال انت کہ ناشناسیں سلاہ بندیں مردماں پاکستانی پوج ءِ پانگسے ءِ سر ءَ اُرش کُتگ –

اھوالکار ءِ رِد ءَ ڈولیجی ءَ بکشازھی میتگ ءَ برجاھیں زورگریں پاکستانی پوج ءِ پانگس ءِ سر ءَ کنگ بوتگ ۔ اُرش داں دیر ءَ برجاہ بوتگ گمان کنگ بیت پاکستانی پوج ءَ جانی ءُ مالی تاوان رستگ –

پاکستانی پوج ءِ سر ءَ بوتگیں ارشانی زمّہ واریاں گیشتر بلوچ آجوئی لوٹوکیں سلاہ بندیں گل منّ انت – بلے تنی وھدی ھردو ارشانی زمّہ واری ھچ گلاں نہ منّ اِتگ انت ـ