زبانانی مرگ
نبشتہ کار: کندیل بلوچ
دی بلوچستان پوسٹ
راج ءَ زندگ دارگ ءِ واستا زبان زندگ دارگ لوٹ ایت بلّے مروچی ما وتی زبان اَنچوش گار ءُ بیگواه کُتگ هما جاه ءَ مارا زبان ءِ پھمگ ءِ پکار بے بیت ما تھنا هما وهد ءَ وتی زبان ءَ کارمرز کن ایں –
یکّ راجے کہ اِے جھان ءَ مانیت آرا وتی زبان زندگ دارگی اِنت اگاں نہ راج راجے نہ مانیت یکّ راجے ءَ را یا یکّ نسلے ءَ را اگاں چہ آئی ءَ آئی ءِ ماتی زبان پچگرگ بہ بیت نہ آ راج نسل چہ هیلکاری ردوم ءَ زبھر بیت بلکیں آ تھنا یکّ ردومی زبانے هیل کنت چہ جوانیں الم ءُ زانت ءِ پھمگ ءُ دربرگ ءَ زبھر بیت اِنت-
ھمے رنگ ءَ مروچی مئے جندے زبان ءَ اَچ مارا مئے آوکیں نسل ءَ را دور کنگ بوگ ءَ اِنت دانکہ باندا روچ اِے راج پہ ارزانی چہ جھان ءَ گار ءُ بیگواه کنگ بہ بیت پرچاکہ آگاں یکّ راجے گار ءُ بیگواه کنگ لوٹ ئے.گُڑا پیسرا آئی زبان ءِ سر ءَ اُرش بہ کّن آ راج وت گار ءُ بیگواه بیت دُگنیا ءِ لھتے اَنچیں راج ءُ نسل ھست اَنت کہ آهانی زبان تھنا پھمگ ءِ جاه ءَ ساه کش اَنت چہ زورآوریں تاکتانی نیمگ ءَ اِے زبانانی دیمروئی ءِ درستیں راه ءُ در بند کنگ بوتگ اَنت همے لڑ ءَ براهوئی زبان هم هوار اِنت گوں کہ اِے زبان مرگ ءِ آماچ بوگ ءَ اِنت وتی جندے زبان ءِ وت نہ وانگ ءُ نہ وانینگ آهانی سر ءَ دری زوراکیں زبانانی مُشگ یکّ شوربندی یے پمیشکّا بازیں استان ھست اَنت کہ زبانانی مُشگ بنیات ءَ ایدگہ نزوریں راج ءُ نسلانی بکاہ ءُ بچار ءَ گار کنگ لوٹ اَنت-
کہ چہ آئی ءَ سوب ءَ ایردستیں راج ءُ نسل مُدامی وت ءَ جھل جن اَنت ءُ نزور سرپد بنت پمیشکا اِے پیمیں راج الم ءُ زانت ءِ اَسل ارواه (روح) ءَ سرپد نہ بنت ءُ آ تھنا درآمدیں زبانانی دام ءِ چمگّ ءَ کّپ اَنت همے درآمدیں زبان ءِ هیلکاری ءَ را الم ءِ سرپد بنت اِنت-
پہ درور بہ چار اِت مرچیگیں دور ءَ انگریزی زبان اِنت کہ اِیردستیں راجانی سر ءَ اَنچو مُشگ بوگ ءَ اِنت ءُ آهانی مجگ ءُ دلاں همے مارشت ودی کنگ بوگ ءَ اِنت کہ انگریزی زبان ءِ جند یکّ زانشتے، المے پمیشکا هر همُک مردم اِے زبان ءَ پہ پھر وانیت ءُ چہ جندے زبان ءَ یکّ ایردستیں راجے ءَ را زبھر کنگ ءِ مستریں سبب زورآوریں کہ آ نزور ءُ اِیردستیں راجاں چہ آهانی زبان ءِ سیادی ءَ سندگ لوٹ ایت-
هما زبان کہ مرچیگیں دور ءَ تھنا پہ پھمگ ءَ کارمرز بیت آ زوت اِیدگہ زوراکیں زبانانی دیم ءَ مرگ ءِ آماچی ءِ لڑ ءَ اِیردست کنگ بیت ءُ اِے زبانانی جاگہ ءَ دری زورآکیں زبان گیر اَنت اِے گار ءُ بیگواه بوهوکیں زبانانی لڑ ءَ براہوئی زبان هم هوار اِنت زبانانی لڑ ءَ گار ءُ بیگوا بوگ ءَ اِنت زبان ءِ بیگواهی کُٹم،نسل، ءُ راجانی گار ءُ بیگواه بوگ ءَ اِنت-
آگاں ماتی زبان چہ راج ءُ نسلاں بے بھر کنگ بوت گُڑا آ تھنا وانگ نہ دربرگ ءِ سیادی ءِ درچ هم هلاس بیت مرچیگیں دور ءَ تہ ءَ زورآوریں زبان پہ ایردستیں زبانانی گار ءُ بیگواه کنگ ءَ روچ شپ کوشسست ءَ هاں کہ آزورآوریں زبانانی تہ ءَ انگریزی، چینی، اسپانوی زبان گیشتر همے راهے سر ءَ کار کنگ ءَ اَنت آ وتی زوراکیں زبان ءِ دیم ءَ سرجمیں دگنیا ءِ نزوریں ءُ کم کارمرز کنوکیں زبانانی گار کنگ ءُ مرگ آماچ کنگ ءَ اَنت-
وهدیکے یکّ نسل ءُ راجے ءَ چہ آئی ماتی زبان ءِ پچگرگ بہ بیت گُڑا آئی ءِ همبراهی ءَ تھنا آئی ءِ پجار گار نہ بیت اِنت بلّکیں آئی ءِ سمائی ردوم نزور بیت اِے وڑیں راج ءُ نسل گیشتر کُنٹ زھن بنت ءُ کم کم ءَ چہ زورآکیں راجانی دست ءَ نشان اِیش گار بیت اِنت-
“گوگی وتیانگو” 5 جنوری (1938) ءَ ماں کینیا ءِ دمگ کامیریتهو ءَ ودی بیت کینیا هما اِیردستیں زمیناں چہ یکّے کہ (1901) ءَ بگّرداں (1960) انگریزانی اِیردست بیتگ گوگی وتیانگو هما اِیردستی ءِ زمانگ ءَ وتی چم پچ کُت آں اِسپیت پوستانی راج ءِ ساهگ ءَ هروڑیں زُلم ءُ زوراکی ءِ گوں نزیکی ءَ گوں گند ایت گوگی هما نبشتہ کار اِنت کہ لبزانک ءَ پہ چاگردی مٹ ءُ بدلی ءَ کارمرز کنگ ءَ اِنت ماتی زبان ءِ ارزشت ءُ زبان ءِ سیاست ءِ بابت ءَ گوگی شوکیں رنگے ءَ نبشتہ کنت (1977) ءَ گوگی یکّ تهیٹر پروگرامے وتی ماتی زبان ءَ گیکو کنت گُڑا همے سبب ءَ کینیا ءِ سرکار گوگی ءَ دزگیر کنت اِے بابت ءَ گوگی گُش ایت کہ من وهدے دزگیر کنگ ءُ زندان ءَ برگ بوتاں گُڑا من نیشت جیڑ اِیت من اِے پیمیں هزار تهیٹر گّپ انگریزی ونتگ من ءَ کس ءَ هچ نہ گُشتگ بلّئے یکّ تهیٹر ءِ من وتی ماتی زبان کُت اِیش من زندانی آں گوگی گُش ایت من هما وهد ءَ زبان ءِ ارزشت ءَ پوه بوتاں چہ همدا گوگی پہ وتی گداراں انگریزی زبان ءَ رُخصت کنت “ڈی کالونایزنگ دی مائینڈ” ءِ تہ ءَ گوگی اِے گّپ ءَ تچک گُش ایت کہ نو آ هچ رنگیں کتاب انگریزی ءَ نبشتہ نہ کنت گوگی ءِ اِے هبر ءَ شنگار هیران بیت گوگی ءَ گُش ایت تو آگاں وتی ماتی زبان ءَ نبشتہ بکّن ءِ گُڑا تئی کتاباں کّس نہ وانیت همے پّسو ءَ گوگی گُش ایت اَنچوشکے انگریزی نبشتہ بوتگیں مواد اپریکی زبان ءَ رُجانک بوتگاں همے رنگ ءَ اپریکی زبان ءَ نبشتہ بوتگیں انگریزی زبان ءَ رُجانک بہ بنت مہ آهانی زبان ونتگ او دربُرتگ آ کے مئے زبان ءَ نہ زان اَنت اِے هماهانی جیڑه اِنت انچوشکے مہ آهانی زبان ونتگ دربُرتگ آ هم مئے زبان ءَ بوان اَنت در بر اَنت-
هر زورآکیں زبان کہ اِیردستیں راجانی زبان ءَ گار کنت یا آ بندیگیں سرڈگارے مردم ءَ نزوریں راجاں زورگیری ءَ جنت ءُ کُش ایت آ راج ءُ نسلانی کُشنده گُشگ بیت ءُ انگریزی زبان وت ءَ درستیں نروریں راجانی اِیردستیں زبانانی سر ءَ پہ زورآکی مُشگ ءَ اِنت پمیشکا انگریزی زبان، زبانانی کُشنده گُشگ بیت راج ءَ زندگ دارے پیسسرا زبان زندگ بیدار همے رنگ ءَ کہ مہ پہ وتی بندیگں سرڈگار ءَ جُھد کنگ ءَ آں اَنچو مارا وتی زبان ءِ پھازگ ءُ آئی ءِ دیمروئی ءَ جُھد کنگی اِنت ابید زبان ءَ راج نہ مان اَنت -بلوچ ءُ آئی زبان ءُ پجار مُدام میزرآن بات اَنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
