TBP Balochi

بلوچستان ءِ جتاجتائیں دمگاں پاکستانی پوج ءَ بازیں مردمے آوار جتگ وھدے سے لاش دزکپتگ اَنت-

گیشیں ھالانی رِد ءَ بلوچستان ءِ تیاب دپی شھر گوادر ءِ دمگ جیونی ءِ ھند پانوان ءَ مروچی سُھب ءَ پاکستانی پوج ءَ کاروائی کنان ءَ بازیں مردمے آوار جتگ-

دمگی اِھوالکار ءِ رِد ءَ پاکستانی پوج ءَ مروچی سھب بانگواہ ءَ دمگ انگیر ءَ کتگ بازیں لوگ پٹ ءُ پول کتگ اَنت ءُ اے میان ءَ بازیں مردمے آوار جنگ ءُ بیگواہ کنگ بیتگ-

آوار جنگ بیتگیں مردمانی تہ ءَ پیرل گل ء احمد، سمیر ء پیرگل، سراج ء ابراھیم، رھیم جان ء حاصل خان، گمان ء مراد جان، نوید ء داد محمد، سید محمد ء لال بخش، شاھزیب ء سید محمد، ناخدا نور محمد ء یوسف ، امان ء داد محمد، حکیم ء عبدالکریم ءُ سید محمد ء یوسف نام ءَ چہ بیتگ اَنت-

ھمے وڑ تیاب دپی شھر چہ گوادر ءَ ادریس رحمت، جھمنند گوادر نیو ٹاؤن یک جولائی 2026 ءِ شپ ءَ چہ لوگ ءَ پاکستانی پوج ءَ زورانسری بیگواہ کتگ-

ھمے وڑ چہ شال ءَ ھال اِنت ھمے سال ھشت اپریل سھب ءِ کساس ساھت سے ءَ دو مردم سی ٹی ڈی کارندھاں آوار جتگ، آیانی پجّار شاھد بلوچ ءُ نور محمد بلوچ نام ءَ چہ بیتگ اَنت-

چہ تونسہ شریف ءَ مبین بلوچ نامیں مردمے دو جولائی 2026 ءَ سھب ءِ کساس ساھت سے ءَ آوار جتگ ءُ بیگواہ کتگ-

دومی نیمگ ءَ ھمے ھال آیگ اِنت کہ گنز ءُ پانوان دگ ءِ کش ءَ سے پجّار نہ بوتگیں مردمانی لاش دزکپتگ اَنت کہ پہ پجّار ءِ ھاتر ءَ نادُراھجاہ ءَ برگ بیتگ اَنت-

بلوچستان ءِ دمگ کیچ ءِ ھند مند ءُ دشت ءَ سلاہ بندین مردماں پاکستانی پوج ءِ سر ءَ سلاہ بندین مردماں اُرش کتگ –

گیشیں اھوالانی رد ءَ مند ءَ سلاہ بندیں مردماں پاکستانی پوج ءِ سر ءَ اُرش کتگ ءُ جانی تاوان داتگ-

دمگی مردمانی رد ءَ سلاہ بندیں مردماں پاکستانی پوج ءِ راشن بروکیں کاروان ءِ سر ءَ اُرش کتگ ءُ آیانی سلاہ ھم گون وت برتگ انت ءُ جنگ ءُ چوپ ءَ پد دمگ ءَ ھیلی کاپٹر اتکگ ءُ سر بیتگ انت-

دومی نیمگ ءَ مچات ءَ پاکستانی پوج ءِ سر ءَ ھم اُرش بیتگ ءُ اود ءَ پوج ءَ جانی تاوانانی دیمپانی انت-

اھوالانی رد ءَ دشت بلنگور مچات ءَ پاکستانی پوج ءِ سر ءَ ناشناسیں مردماں ریموٹ کنٹرول بمبے ءَ نشانگ کتگ-

زانگ بہ بیت گوستگیں روچ ءَ بلوچ لبریشن آرمی ءِ نیمگ ءَ جیونی پانوان ءَ پاکستانی پورس کوسٹ گارڈ ءِ بنجل ءِ سر ءَ فدائین اُرشے کنگ بیتگ ات-

گل ءِ جارکش جیئند بلوچ ءِ رد ءَ اُرش ءَ پوج ءِ سِی ءَ گیش کارندہ مرتگ ءُ بنجل سرجم ءَ تباہ بوتگ –

بلوچستان ءِ تیاب دپی شھر گوادر ءَ مروچی بیتگیں اُرش ءِ تامُر بی ایل اے ءِ نیمگ ءَ شنگ کنگ بیتگیں – چل ءُ سے سیکنڈ اے تامُر ءَ گندگ کئیت کہ یک ٹرکے دگ ءِ سر ءَ روان اناگاہ ءَ تاب کنت بُنجل ءِ نیمگ ءَ روت، چریشی ءَ پد تُرندیں تراکے بیتگ- تامُر ءِ رِد ءَ اُرش ءِ آسر ءَ بُنجل ءَ سکا تاوان رس اِتگ ءُ گندگ ءَ ماڑی ءِ یک بلاھیں بھرے تباہ بیتگ-

بلوچ لبریشن آرمی ءِ جارکش جیئند بلوچ ءِ رِد ءَ اے وئیل مروچی بیگاہ ءِ کساس شش سی ءُ دو ملٹ سر ءَ جیونی ءِ دمگ پانوان ءَ بیتگ- اود ءَ کوسٹ گارڈ ءِ بُنجل نشانگ کتگ- درشان ءِ تہ ءَ گوشگ بیتگ کہ یک وتکش تراکارے ءَ، آئی ءِ پجّار عطاء اللہ بلوچ پنّام ءِ اجمل نام ءَ چہ بیتگ ءُ آئی ءِ سیادی مجید بریگیڈ ءَ اِنت، شووراں چہ پُریں مزدا گاڑی یے بُنجل ءِ تہ ءَ تراکینتگ-

واکدار ءَ وئیل راست کنان ءَ گوشتگ کہ جیونی ءِ دمگ پانوان ءَ پاکستان کوسٹ گارڈز ءِ بُنجل سر ءَ وتکش گاڑی اُرشے کنگ بیتگ- آئی ءِ رِد ءَ تراک شورواں پُریں مال بریں ٹرک چوکی ءِ بُنجاھی ماڑی ءَ چہ ڈک وارتگ، چریشی ءَ پد تُرندیں تراک ءَ چہ ماڑی ءِ مزنیں بھرے کپتگ- تراک توار داں دیر دیر ءَ تاں اش کنگ بیتگ-

اِھوالکار ءِ رِد ءَ اُرش ءِ وھد ءَ چوکی ءِ سر ءَ پاکستان کوسٹ گارڈز ءِ تھرڈ بٹالین ءُ پاکستان آرمی ءِ سی ءُ دو پنجاب رجمنٹ ءِ کارندہ ھست اَنت- اے چوکی جیونی شھر ءَ چہ کساس دہ کلومیٹر ءِ گستائی ءَ برجاہ ءَ اِنت-

دمگی اِھوالکار ءِ گوشگ اِنت کہ اُرش ءَ پد پوج ءِ گیشیں کارندہ دمگ ءَ سر بیتگ اَنت ءُ سرجمیں دمگ انگیر ءَ کتگ- ھالانی رِد ءَ کوسٹل ھائی وے ءَ ھوار جیونی ءِ نیمگ ءَ آؤکیں ءُ رؤکیں بازیں راہ بند کنگ کتگ، وھدے کہ دمگ تُرندیں سیکیورٹی چیک پوسٹس جوڑ کتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ گوادر ءِ دمگ جیونی ءَ پانوان ءَ زورگیریں پاکستانی لشکر ءِ کوسٹ گارڈز کیمپ ءِ سر ءَ فدائی اُرش ءِ زمہ واری من اتگ۔ اے سوبمندیں آپریشن ءَ تاں انوگ ءَ دژمن ءِ 30 ءَ چہ گیش کارندہ بیران ءُ درجناں سک ٹپیگ بوتگ اَنت۔

جارکش ءَ گوشتگ مرچی شپ ءِ شش ءُ نیم ءَ جیونی ءِ دمگ پانوان ءَ کوسٹ گارڈ ءِ کیمپ ءَ مئے فدائی یونٹ مجید بریگیڈ ءِ فدائی سرمچار عطا اللہ بلوچ پنام ءِ اجمل ءَ کیمپ ءِ تہ ءَ چہ تراکناکیں شورواں پُریں مزدا گاڑی یے سوبمندیں رنگے ءَ زرتگ ءُ تراک کتگ۔ اے فدائی تراک ءِ آسر ءَ کوسٹ گارڈز ءِ نوآبادیاتی کیمپ سرجم ءَ ھاک ءُ پُر بیتگ۔

جارکش ءَ گوشتگ فدائی اُرش ءَ چہ پد مئے تنظیم ءِ اسپیشل فورس فتح اسکواڈ ءَ تیزی ءَ ءُ مھکمیں رنگے ءَ دیم ءَ شت ءُ چہ ھر نیمگ ءَ ھلاس بوتگیں کیمپ ءِ سر ءَ اُرش کتگ۔ فتح اسکواڈ ءِ سرمچاراں کیمپ ءِ نزیک ءَ ھما رند ءِ کارندہ تیرگواری کتگ ءُ کشتگ اَنت کہ آ تراک ءِ ترس ءَ پروشی ءُ سکیں ترس ءُ بیم ءِ آماچ بیتگ اَنت۔

ھاکانی چیر ءَ دفن بوتگیں کارندہ ءُ ٹپیانی سنگینیں جاور ھال ءِ دیم ءَ آرگ ءَ دژمن ءِ تاوان ءِ تہ ءَ گیشیں گمان ھست۔ اے فدائی ءِ کارروائی ءِ سرجمیں اھوال ءُ ویڈیو زوت چہ گل ءِ ھالرسانی رسانکدر ءَ شنگ کنگ بیت۔ دژمن ءِ سر ءَ مئے ھونریچیں اُرش داں زورگپتیں بلوچستان ءِ سرجمیں آجوئی ءَ گوں ترندی ءَ برجاہ مان اَنت۔

گوادر ءِ دمگ جیونی ءَ کوسٹ گارڈز ءِ کیمپ ءَ تراکناکیں شورواں گاڑی ءِ تراک، کیمپ سرجمی ءَ تباہ بوتگ-

گوادر ءِ دمگ جیونی پانوان ءَ پاکستانی اُرد ءِ کوسٹ گارڈز ءِ کیمپ ءَ مرچی بیگاہ ءَ تراکناکیں چیزاں چہ پُریں گاڑی ءِ نشانگ جوڑ کنگ بوتگ۔

ھالانی رد ءَ مزنیں تراک ءَ پد سلاہ بندیں مردماں ھم لشکر ءِ سر ءَ اُرش کتگ ءُ اے اُرش ءَ بیست ءَ چہ گیش کوسٹ گارڈ ءِ کارندہ بیران بوتگ اَنت۔

پاکستانی واکداراں انگت ءَ اے درگت ءَ ھچ وڑیں ھال ءُ اھوال دات نہ کتگ۔

بلوچستان ءِ جتاجتائیں دمگاں پاکستانی پوج ءُ پُھل گوں تراک ءَ نشانگ کنگ بوتگ اَنت-

گیشیں ھالانی رِد ءَ مستونگ ءِ دمگ دشت ءَ سبی دگ سر ءَ نادرا کارگس نزیک ءِ پاکستانی پوج ءِ یک گاڑی یے بمب تراک ءِ نشانگ کنگ بیتگ-تُرندیں تراک ءِ آسر ءَ پوج ءِ گاڑی ءَ ھوار پُھل ءَ تاوان رس اِتگ

واکدار ءَ تراک راست کتگ بلے تاوانانی درگت ءَ ھچ وڑیں درشان شنگ نہ کتگ-

ھمے وڑ مروچی نیمروچ ءِ وھد ءَ نوشکی ھاران دگ سر ءَ ریکو ءِ نزیک ءَ زرین جنگل ءِ ھند سر ءَ ناشناسیں مردماں پاکستانی پوج ءِ یک گاڑی یے تراک ءِ نشانگ کنگ بیتگ-

دمگی اِھوالکار ءِ رِد ءَ تراکناکیں شورو دگ ءِ کش ءَ ایر کتگ چریشی ءَ بال بیرنگ کارمرز کتگ وھدے کہ تراک پوج ءِ چوکی ءَ چہ کساس کلومیٹرے ءِ گستایے ءَ بیتگ-

تراک ءِ آسر ءَ کارندھاں جانی تاوان چست کنگ کپگ ءِ ھال اِنت – واکدار ءَ تنی وھدے اے درگت ءَ ھچ وڑیں درشان شنگ نہ کتگ-

ھمے وڑ گوادر ءِ دمگ جیونی ءَ ھم تُرندیں تراکے بیتگ بلے تنی وھدے زانگ بیگ ءَ نہ اِنت چی سر ءَ بیتگ-

دومی نیمگ ءَ واشک ءِ ھند بیسمہ ءَ پتک ءَ بُنجاھی شھدگ سلاہ بندیں مردماں ناکہ بندی کتگ ءُ رؤکیں ءُ آؤکیں گاڑی پٹ ءُ پول کتگ اَنت-

تنی وھدے اے وئیلانی زمہ واری ھچ گل ءَ نہ زرتگ اَنت-

بلوچ یکجھتی کمیٹی ءِ رھشون سید بی بی شریف یک رندے پد ءَ 3 ایم پی او ءِ چیر دستی ءَ دزگیر کنگ بیتگ۔

بنشون ءِ رد ءَ سید بی بی مروچی سھب ءَ پیشی ءَ سی ٹی ڈی تھانہ تربت ءَ شتگ، چہ اود ءَ آ دزگیر کنگ بوتگ ءُ ڈسٹرکٹ جیل تربت ءَ دیم دیگ بوتگ۔

ایشی ءَ چہ پیسر مرچی سھب ءِ یازدہ بج ءَ تربت پریس کلب ءَ گشادی پریس کانفرنس ءِ وھد ءَ سید بی بی ءَ گْوشتگ اَت کہ سی ٹی ڈی ءَ گْوستگیں شپ ءَ آئی ءِ گس ءَ سئے رند ءَ چھاپہ جتگ کہ آئی ءَ دزگیری بہ کنت، بلے آئی ءِ اود ءَ جاڑیگ نہ بوگ ءِ سوب ءَ آ دزگیر کنگ نہ بوتگ۔

زانگ بہ بیت کہ چار شمبے ءِ شپ ءَ سید بی بی آئی ءِ گس ءَ بیڑ ءِ وھد ءَ دزگیر کنگ بوتگ ، ایشی ءَ پد پنچ شمبے ءِ شپ ءَ آ یلہ کنگ بوتگ ۔

ایشی ءَ ابید کیچ ءِ بنجاھی شگر چہ تربت ءَ رس اتگیں ھالانی رد ءَ گوستگیں روچ ءَ بی وائی سی ءِ زھرشانی ءَ پد پاکستانی لشکر ءَ ھپت بلوچ زالبول، لھتیں زھگ ءُ سئے ورنا دزگیر کتگ اَنت۔ اے رد ءَ نسرت منیر، نادیہ، عائشہ، لال بی بی، محمد، طارق ءُ ارشاد ھوار اَنت ءُ دگہ مردمانی پجار انگت ءَ زانگ نہ بوتگ انت۔

دزگیریں جنین ءُ دگہ مردم انگت ءَ دیم ءَ آرگ نہ بوتگ اَنت۔

زانگ بہ بیت ڈاکٹر ماہرنگ ءُ شاہجی ءِ اُمر کید ءِ سزا ءِ ھلاپ ءَ بلوچ یکجھتی کمیٹی ءِ گوانک ءِ سر ءَ گوستگیں روچ ءَ تربت ءَ پرامنیں زھرشانی یے کنگ بوتگ بلے زھرشانی ءَ پیسر انتزامیہ ءَ دفعہ 144 ءِ شھر ءَ ایر کتگ ءُ شپ ءَ بازیں مردمے بندیگ کتگ انت۔ زھرشانی ءِ روچ ءَ شھر ءَ کرفیو بوتگ ءُ بازیں کچے ءَ لشکرے شھر ءَ دارگ بیتگ ءُ زھرشانی ءِ بند کنگ ءِ کوشست کنگ بوتگ۔ ھمے وھد ءَ جنین ءُ چُک ھم دزگیر کنگ بیتگ اَنت۔

بلوچستان ءِ دمگ کیچ ءِ ھند گومازی نھنگ کور ءَ پاکستانی پوج ءِ نیمگ ءَ چہ مزنیں کچے ءَ آپریشن بندات کنگ ھال اِنت-

دمگی اِھوالکار ءِ رِد ءَ آپریشن ءِ میان ءَ یک ورنایے آوار جتگ، کہ آئی ءِ پجّار یحییٰ ء عبدالکریم نام ءَ چہ بیتگ-

اِھوالکار ءِ رِد ءَ گوستگیں روچ ءَ پاکستانی پوج ءِ نھنگ کور ءِ جتاجتائیں دمگاں کاروائی کتگ، کہ اے میان ءَ سے جتاجتائیں ھندانی سر ءَ کواڈ کاپٹر ءَ چہ بمب دور داتگ- دمگی ھالانی رِد ءَ بمباری ءَ پد پوج ءَ دمگ انگیر ءَ کتگ جھلی آپریشن بندات کتگ-

ھالانی رِد ءَ آپریشن ءِ میان ءَ تھی ءُ ڈنی راھانی سر ءَ سیکیورٹی گیش کتگ، وھدے کہ دمگ ءَ پوج ءِ گیشی کارندہ آورتگ-

تنی وھدے پاکستانی پوج یا ھمگرنچیں ادارہ نیمگ ءَ چہ اے آپریشن یا دزگیری ءِ درگت ءَ ھچ وڑیں درشان نیتکگ-