فیفا ورلڈ کپ 2026 ءِ راؤنڈ آف 32 ءَ مروچی سے گوازی کنگ بوتگ انت کہ آیانی تہ ءَ اسپین ءَ آسٹریا ءِ دیم ءَ سے ، پرتگال ءَ کروشیا ءِ دیم ءَ 2-1 ءُ سویزرلینڈ ءَ الجیریا ءِ دیم ءَ دو گول ءَ باج برتگ ءُ وت ءَ پری کوارٹر فائنل ءَ سرکتگ ۔
مروچی راؤنڈ آف 32 ءِ اولی گوازی اسپین ءُ آسٹریا ءِ میان ءَ بوتگ کہ اسپین ءَ سے گول ءَ گوازی کٹ اتگ ۔ مروچی اسپین ءِ لیبیاں جوانیں گوازی پیش داشتگ گوازی ءِ اولسر ءَ بگر داں گڈی ءَ آسٹریا ءِ لیبیانی دیم داشتگ ۔ اسپین نیمگ ءَ اولی گول نیکو ولیمز داتگ دومی فیران ٹوریس ءُ سیمی گول لامین یامال ءَ داتگ ءُ وتی ٹیم راۆنڈ آف 16 سر کتگ ۔
مروچی بوتگیں دومی گوازی پرتگال ءُ کروشیا ءِ میانءَ بوتگ کہ پرتگال ءَ 2-1 گولے ءِ گوازی کٹ اتگ ۔ کروشیا ءِ نیمگ ءَ آندری کراماریچ یک گولے داتگ وھدیکہ پرتگال ءِ نیمگ برونو فرنینڈیز، گونزالو راموس یک یک گولے داتگ ءُ گوازی کٹ اتگ ۔
پرتگال ءِ اے باج بری ءَ پد راؤنڈ آف 16 ءَ آ اسپین ءِ دیم انت ۔
مروچی بوتگیں سیمی گوازی سویزرلینڈ ءُ الجیریا میان ءَ بوتگ کہ سویزر لینڈ ءَ دو گول ءَ گوازی کٹ اتگ ءُ 16 می راؤنڈ ءَ روگ ءَ سوبمند بوتگ ۔
مروچی بوتگیں گوازی ءِ بندات ءَ الجیریا ءَ سویزرلینڈ ءِ دیم جوانی ءَ داشتگ ات بلے ھما زوتاں ءَ سویزر لینڈ ءَ گوازی وتی کابو ءَ کت ۔ سویزرلینڈ ءِ دفائی لائن باز مھکم ات چریشی ءَ الجیریا ءِ لیبی گول دئیگ ءَ بے سوب بوت انت ۔ سویزر لینڈ ءِ نیمگ ءَ اولی گول بریل ایمبولو داتگ ءُ دومی دان ندویے داتگ ءُ گوازی کٹ اتگ ۔