TBP Balochi

بلوچستان ءِ جتاجتائیں دمگاں پاکستانی پوج ءِ دست ءَ شش مردم آوار جنگ ءُ بیگواہ کنگ بیتگ اَنت ءُ دو آوار جنگ بیتگیں مردم یل کنگ بیتگ ءُ وتی لوگاں سر بیتگ انت-

گیشیں ھالانی رِد ءَ فضل بلوچ ء دوست محمد، اُمر سی سال، جھمنند آواران، کہ یک اُستادے – آ ھپدہ جولائی 2026 ءِ کساس شپ ءِ یک ءَ چہ ھب چوکی ءِ دمگ امیر آباد ءَ ایف سی، سی ٹی ڈی ءُ ایم آئی ءِ کارندھاں آوار جتگ، چریشی ءَ پد آئی ءِ درگت ءَ ھچ وڑیں ھال دیم ءَ نیتکگ-

ھمے وڑ جھانزیب بلوچ ء عبدالصمد، اُمر ھژدہ سال، جھمنند پنجگور کہ یک درزی (ٹیلر ماسٹر) کہ نُھ جولائی 2026 ءِ نیمروچ کساس ساھت دو ءَ چہ پنجگور ءِ دمگ چتکان ءَ آئی ایس آئی ءُ سی ٹی ڈی کارندھاں آوار جتگ ءُ بیگواہ کتگ-

ھمے وڑ محمد ندیم ء رحمت اللہ ،اُمر بیست سال، جھمنند نال، ھُزدار، سیزدہ جولائی 2026 ءِ سُھب دہ ءَ چہ نال ھُزدار ءَ ایف سی ءِ کارندھاں آوار جتگ، چریشی ءَ پد آئی ءِ درگت ءَ ھچ وڑیں ھال دز نہ کپتگ-

دومی نیمگ ءَ سیزدہ جولائی 2026 ءَ سُھب کساس پنچ ءَ شال ءَ ایمان سٹی، سمنگلی دگ ءِ دمگ ءَ یک کاروائی ءِ میان ءَ سے بلوچ ورنا مھکمہ انسداد ناشرکاری(سی ٹی ڈی) کارندھاں وتی ھمراھی ءَ برتگ اَنت-

بیگواہ کنگ بیتگیانی تہ ءَ سلمان بلوچ ء محمد انور، اُمر بیست ءُ ھپت سال، جھمنند پنجگور، زبیر ء اسماعیل، اُمر بیست ءُ ھشت سال ءُ نبیل بلوچ ء نزر، اُمر بیست ءُ چار سال، جھمنند پنجگور ھوار اَنت، سئیں ورنا نودربر گوشگ بیگ ءَ اَنت-

کھول ءِ رِد ءَ اے مردم آوار جنگ ءَ پد آیانی ساڑی بیگ ءُ دگہ سرپدی دیگ نہ بیتگ، چریشی ءِ سوب ءَ کھول ءَ تُرس ودی بیتگ-

ھمے وڑ ءَ دو جولائی ءَ چہ دشت بلنگور ءَ پاکستانی لشکر ءِ دست ءَ آوار جنگ بیتگیں امداد ء بیگ مھمد ءُ حاصل یل کنگ بیتگ ءُ وتی لوگاں سر بیتگ انت

–

ھردوک پاکستانی پوج ءَ دو جولائی ءَ آوار جتگ انت ءُ پد ءَ بازیں روچاں بیگواھی ءَ پد گوستگیں ھپتگ ءَ یل کنگ بیتگ انت-

بلوچ لبریشن آرمی ءِ آفیشل چینل ھکل ءَ 8 جولائی ءَ بلوچستان ءِ شھر بیلہ ءِ بنجاھی شھدگ ءِ سر ءَ پاکستانی لشکر ءِ کاروان ءِ سر ءَ مھکمیں اُرش ءِ تامر شنگ کتگ –

نُھ منٹ ھپت سیکنڈ ءِ ویڈیو ءِ تہ ءَ بی ایل اے ءِ فتح اسکواڈ ءِ سرمچار نوکیں سلاھاں گوں کتار بند انت ءُ ھترناکیں رنگے ءَ پورسز نشانگ جوڑ کنگ ءَ انت۔ ویڈیو ءِ تہ ءَ لس پوشاکانی توک ءَ پاکستانی سپاھیگانی لاش گاڑیانی تہ ءَ ءُ زمین ءِ سر ءَ گندگ بنت ۔

ویڈیو ءِ تہ ءَ گندگ بیت کہ بی ایل اے ءِ سرمچاراں کاروان ءِ سر ءَ انگیری کتگ ءُ تیرگواری کتگ۔ سرمچار ماں بلوچی ءُ براھوی زبان ءَ گوں وت ماں وت گپ کنگ ءَ اَنت ءُ جاوراں یک دومی ءَ سرپد کنگ ءَ اَنت ءُ تیرگواری ءِ وھد ءَ سپاھیگاں نزیک ءَ کاینت ءُ آھاں کُشگ انت ءُ تپنگان اش اَنت۔

بلوچ لبریشن آرمی ءِ رِد ءَ اے اُرش ءَ ھپدہ کارندہ پاکستانی لشکر ءِ مرتگ اَنت۔

ھاران ءَ گوستگیں شپ ءَ بیتگیں دو جتاجتائیں سلاہ بندیں وئیلاں دو مردم بیران ، وھدے کہ دو مردم سلاہ بنداں وتی ھمراھی ءَ برتگ اَنت – دمگی اِھوالکار ءِ رِد ءَ وئیل جتاجتائیں دمگاں بیتگ اَنت-

اِھوالکار ءِ رِد ءَ ھاران ءِ دمگ کلان ءَ سلاہ بندیں مردماں حافظ کبیر لوگ سر ءَ کاروائی کتگ – اے میان ءَ تیرگواری بیتگ، چریشی ءِ آسر ءَ حافظ کبیر ءِ یک چُکے بیران بیتگ، وھدے کہ حافظ کبیر ءُ آئی ءِ دومی چُک آوار جتگ ءُ ناشناسیں جاھے ءَ برتگ اَنت-

اِھوالکار ءِ گوشگ اِنت کہ حافظ کبیر ءُ آئی ءِ چُکانی سر ءَ ریاستی کارندھاں گوں کار کنگ بھتام جنگ بیتگ-

دومی نیمگ ءَ ھاران ءِ دمگ گواش ءَ ناشناسیں سلاہ بندیں مردماں تیرگواری کتگ غمی ساسولی کشتگ-

دمگی اِھوالکار ءِ رِد ءَ غمی ساسولی ڈیتھ اسکواڈ ءِ سروک حافظ ممتاز ھمراہ بیتگ-

تنی وھدے وئیل سوب زانگ نہ بیتگ نانکہ وئیلانی زمہ واری دگہ گلاں زرتگ اَنت-

مستونگ ءِ دمگ کھڈکوچہ، کنڈ عمرانی ءَ مروچی سُھب ءِ کساس شش ءَ گن شپ ھیلی کاپٹرانی شیلنگ ءِ آسر ءَ یک مسیتے ءُ مدرسھے ءَ سک تاوان رس اِتگ-

دمگی اِھوالکار ءِ رِد ءَ شیلنگ کساس یک کلاکے ءَ تاں برجاہ بیتگ ، چریشی ءِ سوب ءَ مسیت ءُ مدرسہ ءِ ماڑی ءَ تاوان رس اِتگ- دمگ مردمانی گوشگ اِنت کہ تیرگواری ءِ میان ءَ مسیت ءَ ھستیں قرآں پاک ھم سانمند بیتگ اَنت-

دمگ مردماں لوٹ کتگ کہ شھری آبادی ، مسیت ءُ مدراسھاں ھرچ وڑیں کاروائی ءَ چہ بہ رکین اِت – آیانی گوشگ اِنت کہ اِبادت جاہ ءُ مزھبی ھندانی تکدس ءِ ھرچ وڑ شرپ کنگی اَنت-

مسیت ءِ مُلا ءَ ھم وئیل بژنی درشان کنان ءَ علماء کرام ءَ چہ دزبندی کتگ کہ آ مسیت ءُ مزھبی ھندانی پھازداری ءِ ھاتر ءَ توار چست بہ کن اَنت- آئی ءِ رِد ءَ آبادت جاہ ءُ قرآن پاک تکدس ءِ پھازداری چاگردی ءِ یکجاھی زمہ واری اِنت

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں نُھ جولائی 2026 ءَ یک مھکم ءُ ٹوھیں کاروائی کنان ءَ سرجمیں چاگی شھر وتی انگیر ءَ کتگ- سرمچارانی دیم ءَ رؤک ءُ پھازوکیں ٹولیاں جوانیں وڑے ءَ چاگی شھر ءِ سرجمیں تھی ءُ ڈنی راھاں ھوار کش ءُ گور ءِ کوھی دْرچ ءُ ھاسیں شھدگانی سر ءَ سنگر گپتگ ءُ کاروائی بندات کتگ- شھر ءِ تھی ءُ ڈنی راھانی سر ءَ سرجمی ءَ دستیگ کنگ ءَ پد ،ناکہ بندی ءَ ساڑی ئیں سرمچارانی ٹولیاں چاگی ءِ ھاسیں شھدگانی سر ءَ اداروکی چوکی جوڑ کتگ ءُ دگانی سر ءَ ھرچ وڑیں شکی ئیں گاڑیانی پٹ ءُ پول بندات کتگ، دانکہ ریاستی کمک، پوج یا چاریگانی سُر ءُ پُراں سرجمی ءَ بند کُت بہ کن ایں-

جارکش ءَ گْوشتگ کہ انگیر ءِ سوبمندی ءَ پد، سرمچاراں جتاجتائیں گوریلہ ٹولیاں چاگی شھر ءِ تہ ءَ پُترتگ اَنت ءُ آیاں اود ءَ برجاہ پولیس ءُ لیویز ءِ تھانہ، بینک ءُ دگہ سرکاری ماڑیانی سر ءَ یکیں وھد ءَ اُرش کتگ- کاروائی ءِ میان ءَ اود ءَ ساڑی سرجمیں پولیس کارندہ دزگیر کنگ ءَ پد جُست ءُ پُرس کتگ اَنت- جُست ءُ پُرس ءَ پد سرجمیں کارندہ راجی زرمبشت آجوئی ھلاپ ءَ زورگریں پوج ءِ چریک بیگ ءِ پھریز کنگ ءُ راج دُژمنیں پُرکاریاں چہ گستا بیگ ءَ تُرندیں کڈن کتگ اَنت- چوناھا پولیس کارمند بلوچ دُژمن پُرکاریاں ھمگرنچ نہ بیتگ اَنت ھمے ھاتر ءَ جنگی راھبند ءُ اکلاکیات ءُ مردمگری ءِ بُنیاد ءَ سرجمیں کارندہ پہ سلامتی یل داتگ اَنت- کاروائی ءِ میان ءَ سرمچاراں پولیس تھانہ ءَ ھستیں سرکاری سلاہ دستیگ کتگ اَنت-

جارکش ءَ گْوشتگ کہ اے آپریشن ءِ میان ءَ وھدے زورگریں پاکستانی پوج ءِ کارندھاں پیشگامی ءِ جُھد کتگ ،گُڑا اود ءَ پیسر ءَ چہ جاڑیگیں سرمچاراں زوت پسھی کاروائی کنان ءَ آیانی سر ءَ مزن ءُ وتکاریں سلاھاں چہ اُرش کتگ- سرمچارانی اُرش ءِ آسر ءَ دُژمن پُشتکنز بیتگ اود ءَ چہ تچگ ءَ لاچار بیتگ اَنت-

جارکش ءَ گوشتگ کہ اے کاروائی ءِ مستریں مول ءُ مراد چاگی وڑیں ھاسیں شھر ءَ وتی دستیگ کنگ جھان ءِ دیم ءَ زورگریں ریاست ءِ وتواجھی ءِ دروگیں ٹاھانی پدر کنگ ءُ اے پیشدارگی بیتگ کہ بلوچستان ءِ سر ءَ دسترسی زورگریں پاکستانی ریاست ءِ نہ اِنت بلکیں سرمچارانیگ اِنت- اے کاروائی ءَ چہ ما ریاستی شریکداراں ءُ ملٹی نیشنل شرکتاں اے تچکیں کلوہ ءَ دیگ لوٹ ایں کہ آ وتی کار ءُ باراں زورگریں پوج ءِ دروگیں ستکانی سر ءَ اد ءَ ایر کنگ ءَ پھریز بہ کن اَنت-

جارکش ءَ گوشتگ بلوچستان ءِ سرڈگار ءَ چہ زورگریں پوج ءِ سرجمی ءَ دراھگ ءُ آجوئی ءِ مول ءُ مراداں تاں سرمچارانی جوانیں اُرش دیمتر ءَ ھم گوں تُرند ءُ یکشل ءَ برجاہ بنت-

بلوچستان ءِ ھستیں جاورھال، سیندک منسوبہ ءِ ھتر ءِ تہ ءَ انت

ٹی بی پی شونگال

بلوچستان ءِ دمگ چاگی ءَ چین ءِ کمک ءَ ھلوکیں تانبہ ءُ سھر ءِ منسوبگ سیندک میٹلز لمیٹڈ ءَ بلوچستان ءَ بگڑتگیں جاورھالانی سر ءَ ترس درشان کتگ ءُ گوشتگ اگاں جاورھال شر نہ بوت انت گڑا کمپنی ءِ پرکاری مھتل کنگ ءَ لاچار بہ ایں –

برتانیہ روتاک ءِ فنانشل ٹائمز ءِ رپورٹ ءِ رد ءَ 29 جون ءَ سیندک میٹلز لمیٹڈ ءِ منیجنگ ڈائریکٹر ءَ وزارت ءِ توانائی ءَ دیم داتگیں نمدی ءَ ھبردار کتگ کہ بلوچستان ءِ ناگیگیں جاورانی سبب ءَ منسوبگ ءِ واستا زلوری سامان ءُ پیداواری موادانی بھر ءُ بانگ سانمند بوگ ءَ انت- نمدی ءَ گوشگ بیتگ کہ اگاں اے جاورھال بوتاں گڑا آیوکیں یک ماھے ءِ توک ءَ منسوبگ ءِ پرکاری مھتل بیت کن انت- پرچاکہ لاجسٹک سپورٹ ءُ زلوری سامانانی سر بیگ یکشل ءَ سانمند بوگ ءَ آں-

اے پیشگامی یک ھنچیں وھدے ءَ دیم ءَ اتکگ وھدیکہ بلوچستان ءِ سیکیورٹی ترس ءُ شھدگانی سر ءَ جاورھال پیش ءَ ملکی ءُ درملکی زرکارانی واستا ترس جوڑ بوتگ- ایشی ءَ پیش مارچ ءَ Barrick Mining Corporation ریکوڈک منسوبگ ءِ بازیں پرکاری ءُ شیڈول دیری ءِ جار پرینتگ انت-

اے پیسلہ ھنچیں وھدے ءَ دیم ءَ اتکگ انت وھدیکہ بلوچستان ءِ گچینی شھدگانی سر ءَ سلاہ بندیں گلانی کنٹرول ءَ انت، بلوچ لبریشن آرمی “ زرکاری ناکہ بندی” ءِ درچ ءَ شھدگانی سر ءَ اُرشانی گیشی آورتگ – بلوچستان ءَ مڈی وسائلانی بارو ءَ منسوبگ ءُ پورسز ءِ سر ءَ بیوکیں اُرشاں گوستگیں وھدانی میان ءَ ترندی ءُ ھترناکی گندگ ءَ اتکگ – ھمے سال ءَ جتا جتائیں وئیلاں مڈی بار ءُ دگہ تجارتی سامان بروکیں سدانی گاڑی سوچگی ءِ اھوال دیم ءَ اتکگ انت، ٹرانسپورٹرز ءَ ھم بازیں براں اے شھدگ بے پھریزی گوشتگ انت ءُ آیانی گوشگ انت سرکار مھکمیں سیکیورٹی ءِ انتزامیہ ءِ ستکی کنگ ءَ بے سوب بیتگ- سیندک کاپر اینڈ گولڈ منسوبگ ءِ نیمگ ءَ گمانی پرکاری مھتل کنگ ءِ سرپدی ءَ اے جاورھال گیشتر نامان کتگ بلوچستان ءِ شھدگ کجام رنگ ءَ درمھکم انت –

شھدگ منسوبگ ءُ تجارت ءِ واستا بنیادی بستار دار انت- بلوچ سلاہ بندیں گلانی نیمگ ءَ شھدگانی سر ءَ ناکہ بندی، گاڑیانی چیکنگ، اُرش ءُ ٹرانسپورٹانی نشانگ کنگ ءِ وئیل اے دراھیں چیزاں دار انت- کھن جنی منسوبگ ءِ سوبمندی نا ایوک ءَ مڈی ءِ مُچیانی توک ءَ سان نہ دنت بلکیں مھکمیں سُر ءُ پر ءُ ستکی سیکیورٹی ءِ جاورھالانی اژدری انت – ءُ بلوچستان ءَ ریاست اے دراھیں چیزاں سرجم کنگ ءَ بے سوبی ءَ گندگ بیت انت-

دومی نیمگ ءَ بلوچستان ءَ پرکاریں سلاہ بندیں گلانی نیمگ ءَ میان اُستمانی زرکاری، گچینی چین ءَ بازیں براں سرپدی اھوال شنگ کتگ بلوچستان ءَ زرکاری ءِ واستا مھکمین جاورھال سر نہ کنت- گوست ءَ چینی شھری، انجینئر ءُ زرکاری ءَ گوں بندوکیں مھلوک ءِ نشانگ کنگ ءِ وئیل پیش آیگ ءَ انت، چرے اُرشانی آسر ءَ جانی تاوان ھم بیتگ انت- بلوچستان ءَ انیگیں جاورھال ءُ پرکاری ءَ بندوکیں مھلوک ءِ ترس ءَ جاورھال گیش نامان کتگ – وھدیکہ بلوچ راجی جیڑھاں سنجیدگی ءَ گیشنگ نہ بیت، بلوچستان ءَ یک در مھکمیں ءُ بے ستکی دمگے بیت انت – اے دابیں جاوراں اد ءَ کجام ھم مزنیں زرکاری کنگ ھوشمندی ءِ پیسلھے نہ بیت انت-

بلوچستان ءِ جتا جتائیں جاھاں پوج ءُ آئی ءَ بندوکیں کارجاھانی سر ءَ سلاہ بندیں مردماں اُرش کتگ انت-

مروچی سھب ءَ بلوچستان ءِ دمگ مستونگ شال ءُ کراچی مین شاھدگ ءِ سر ءَ کھڈ کوچہ ءَ ماشاءاللہ ہوٹل ءِ نزیک ءَ پاکستانی فوج ءِ کاروان ءِ سر ءَ سلاہ بنداں اُرش کتگ۔

دمگی بنشون ءِ رد ءَ سلاہ بندیں مردماں لشکر ءِ سَے گاڑیانی کاروان نشانگ جوڑ کتگ اَنت ءُ جانی تاوانانی ھال دیم ءَ اتکگ انت بلے انگت ءَ سرکاری پتر ھالاں اے ھال پدر نہ بیتگ-

ھمے وڑ ءَ ھوشاپ ءَ سلاہ بندیں مردماں پاکستانی پوج ءِ پوسٹ ءَ چیر کرتگیں کیمرہ سلاہ بندین مردماں نشانگ کتگ انت ءُ تباہ کتگ ءُ ھمے ڈول ءَ ھوشاپ زیروپوائنٹ ءَ پولیس ءِ چوکی ءِ سر ءَ ھستین کیمرہ ھم نشانگ کنگ بیتگ انت-

ھمے ڈول ءَ کلات بدرنگ ءَ سلاہ بندین مردماں پوج ءِ بنجل نشانگ کتگ ءُ اود ءَ ترندیں تراک ءُ تیرگواری کنگ بیتگ انت-

زانگ بہ بیت مستونگ ءِ وئیل ھنچیں وھدے ءَ دیم ءَ اتکگ کہ گوستگیں روچ ءَ مستوبگ کھڈکوچہ ءَ پوجی کارندھانی بروکیں بسانی پھزداری کنوکیں لشکریانی سر ءَ اُرش بوتگ ات ءُ پد ءَ آیوکیں کمک ھم نشانگ کنگ بیتگ انت-

اے اُرش ءِ زمہ واری بلوچ لبریشن آرمی ءَ زرتگ ات کہ آئی ءِ جارکش جیئند بلوچ ءَ گوشتگ ات کہ چِل ءُ پنچ کارندہ کشتگ انت ءُ آپریشن برجاہ انت ءُ سرجمیں اھوال زوت شنگ کنگ بنت-

پشمبے ءِ روچ ءَ مستونگ کھڈکوچہ ءَ پاکستانی پوج ءِ کاروان ءِ سر ءَ اُرش ءَ پد دمگ ءَ جاور ناگیگ گوشگ بیگ ءَ اِنت-

دمگی اِھوالکار ءِ رِد ءَ مروچی کھڈکوچہ ءِ ھند سر ءَ سلاہ بندیں مردم ءُ پاکستانی پوج ءِ میان ءَ برجاھیں میڑاں نزیکیں باگاں کار کنوکیں بگٹی ٹک ءِ دو مردم بیران ءُ پنچ دگہ سک ٹپی بیتگ اَنت-

بیران بیتگینانی تہ ءَ یکے ءِ بچّار ھدے ء ھیران نوثانی بگٹی جھمنند پیرکوہ ڈیرہ بگٹی نام ءَ چہ بیتگ – وھدے کہ دومی بیران بیتگیں ءُ ٹپیانی سیادی بگٹی ٹک جھلی شاک شالوانی ءَ گوشگ بیگ ءَ اِنت-

وھدے کہ چار چُکاں ھوار یازدہ شھری ٹپی بیتگ اَنت- گوں ناگیگ جاور شال ءَ برگ بیتگ اَنت-

زانگ بہ بیت کہ مروچی سھب ءَ مستونگ ءَ پاکستانی پوج ءِ یک مزنیں کاروانے ءِ سر ءَ اُرش بیتگ کہ تاں انو بازیں کارندھے مرتگ ءُ ٹپی بیتگ اَنت-

وئیل ءِ زمہ واری بلوچ لبریشن آرمی ءَ منّ اِتگ کہ گْوشتگ کہ تنی وھدے چل ءُ پنچ کارندہ مرتگ ءُ میڑ برجاہ ءَ اِنت-

یورپی پارلمنٹ ءَ پاکستان ءِ تہ ءَ انسانی ھکانی جاور، ھاسکر بلوچ یکجھتی کمیٹی ءِ رھشونانی دزگیری ، زورانسری آوار جنی ، ءُ سیاسی ھکانی درگت ءَ پدردی درشان اتگ ۔

یورپی پارلیمنٹ ءَ پیش کنگ بوتگیِ کراداد ءِ زرمبش ءَ 95 باسکانی پلامرزی بوتگ کہ پاکستان ءِ سر ءَ زور دیگ بوتگ کہ آ انسانی ھک ، سیاسی آجوئی ءُ شھریانی بنکی ھکانی پھازگ ءِ درگت ءَ میان استمانی کولانی پابند بہ بیت ۔

زرمبش ءَ ھاسکر بلوچ یکجھتی کمیٹی ءِ رھشون ءُ انسانی ھکانی باسکانی بگیرداری ءِ سر ءَ باوست کنان ءَ لوٹ کتگ کہ دزگیر کنگ بوتگیں مردمانی جیڑہ کانودی گیش ءُ گیوار کنگ بہ بیت ءُ سیاسی باسک ءُ انسانی ھکانی نمائندگاںی بگیری ءَ زرتگیں گامگیج ءِ دوبر چہ بندات ءَ چار ءُ ٹپاس کنگ بہ بیت ۔

رپورٹ ءِ رد ءَ زورانسری آوار جنی ءِ وئیل ھاسکر بلوچستان ءُ خیبر پختونخواہ ءِ یکشلیں درچ پدردی ئے ۔ درکانودی کشت ءُ کوش ءِ وئیلانی رپورٹ ھم اتکگ ۔

یورپی کمیشن ءِ رد ءَ زوراناری آوارجنی ءِ درگت ءَ انکوائری کمیشن درگت ءَ کمیشن ءِ سانمندیں کھولاں ھک دیگ یا پسو دات نہ کتگ ءُ تنی وھدی زورانسری آوارجنی ءَ ھواریں ھچ کس سزا دیگ نہ بوتگ ۔

رپورٹ ءِ تہ ءَ انسداد ءِ دھشتگردی ءِ ایکٹ ءُ بازیں سوبائی کانودانی ترامیم ءِ سر ءَ ھم شک کنگ بوگ ءَانت ۔ یورپی کمیشن ءِ رد ءَ اے کانودانی رد ءَ دزگیری ءِ تہ ءَ گیشی اتکگ ۔

یورپی ٹپاس ءَ لٹ شاپی ءُ بندگی ءَ مرگ ءِ ایکٹ ءِ شک جوانیں گامگیج ءِ گوشگ بوتگ بلے اے ھم گوشگ بوتگ کہ کانود ءِ تہ ءَ کمیانی ءَ چار ءُ بچار بہ بیت ۔

رپورٹ ءِ رد ءَ سرکار ءَ کانودی ادارہ ءُ آمیدگی واکدارانی ھیلکاری بندات کتگ ، بلے لٹ شاپی ءِ پٹ ءُ پول ءُ سزا ءِ درگت ءَ تنی وھدی شری ءِ نشاندھی کنگ نہ بوتگ ۔

یورپی کمیشن ءَ گوشتگ کہ آمدگسی کارانی رد کارمرزی ءُ بگیری داروکیں رھشون ءُ باسکاں دزگیری سیاسی جاوراں سانمند کنت ۔ دیمتر ءَ گوشگ بوتگ پوجی آمدگساں شھریانی ارزی ، میان استمانی گچینی ھاسکر شھری ءُ سیاسی باسک ICCPR آرٹیکل 14ءِ رد ءَ نہ انت ۔ کہ آ آجوئیں ءُ بے جانبداریں آمیدگسی ءُ پچیں ٹرائل زمانت ءَ دنت ۔

رسانک ءِ آجوئی ءِ درگت ءَ رپورٹ ءِ تہ ءَ گوشگ بوتگ اگاں اھوالکارانی پھریز ءَ نکد بندی سازی بوتگ بلے پد ءَ ھم اھوالکار ءُ رسانکی ادارہ گیشتر ترس آماچ انت ۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشگگ مستونگ ءِ دمگ کھڈ کوچہ زورگریں پاکستانی پوج ءِ کارندھانی بروکیں بسانی کاروان، پھزداری ءُ پد ءَ جاہ ءَ اتکگیں لشکری کمک ءِ سر ءَ مھکم ءُ ترندیں اُرش ءِ زمہ واری ءَ من ایں – اے اُرش بی ایل اے ءِ تیزگامیں باسک، فتح اسکواڈ ءَ سرجم کتگ ءُ تادم نویشت ءَ اُرش برجاہ انت-

جارکش ءَ گوشتگ داں انگت ءَ سر بیتگیں ھالانی رد ءَ اے کاروائی ءَ پوج ءِ چِل ءُ پنچ کارندہ ءَ گیش مرتگ انت ءُ بازیں کچے ءَ زدگ بیتگ انت – جنگ ءِ میدان ءَ نوکتریں جاوراں مرتگینانی کساس گیشتر بوت کنت-

ایشی ءِ گیشترین اھوال اُرش ءِ ھلاسی ءَ پد درشانگ بنت-