TBP Balochi

پاکستانی پوج ءَ گوستگیں شپ ءَ بیڑ برتگ ءُ پت ءُ چک دزگیر کنگ ءَ پد بیگواہ کتگ انت-

چہ شال ءَ اھوال انت کہ گوستگیں شپ ءِ ساھت یک ءَ پاکستانی پوج ءَ شال ءَ جوائنٹ دگ ءَ یک لوگے ءِ سر ءَ بیڑ برتگ ءُ خلیل اھمد بلوچ ءُ آئی ءِ زھگ نوید اھمد دزگیر کتگ ءُ پد ءَ ناشناسیں جاھے ءَ برتگ انت-

پوج ءِ دست ءَ گرگ بیتگین ھردوکین پت ءُ برات دیم ءَ آرگ نہ بیتگ انت-

زانگ بہ بیت گوستگیں روچاں شال ءَ زورانسری بیگواھی ءُ دزگیریانی وئیلانی توک ءَ گیشی گندگ ءَ اتکگ کہ اود ءَ پاکستانی پوج بلوچ یکجھتی کمیٹی ءِ زھرشانیانی دارگ ءِ ھاتر ءَ سرچ آپریشن ءُ مردماں دزگیر کنگ ءَ انت-

ایشی ءَ پیش شال بائی پاس، بروری روڈ ءَ بازیں مردم دزگیر کنگ ءُ ناشناسیں جاھاں برگ بیتگ انت- 35 ءَ گیش مردم بروری تھانہ ءَ بندیگ کنگ بیتگ انت کہ آیاں کس ءَ گوں دُچارکپگ ءَ نیلگ ءَ انت-

بلوچستان ءِ دمگ کلات ءَ آئی ای ڈی ءِ تراک ءَ پاکستانی فوج ءِ گاڑی نشانگ جوڑ کنگ بوتگ۔

مرچی سھب ءَ قلات ءِ ھربوئی ءِ دمگ ءَ ناشناسیں مردمانی نیمگ ءَ پاکستانی اُرد ءِ کاروان ءِ گاڑی ءِ بمب تراکے ءِ نشانگ جوڑ کنگ بوتگ۔

دمگی مردماں ٹی بی پی ءَ گْوشتگ کہ تراک ءَ دہ سیکورٹی کارندہ بیران ءُ ٹپیگ بوتگ اَنت ءُ گاڑی سرجم ءَ تباہ بوتگ۔

واکداراں انگت ءَ اے تاوان ءِ بابت ءَ ھچ وڑیں ھال ءُ اھوال نہ داتگ۔

زانگ بہ بیت گوستگیں روچ ءَ ھمے دمگ ءَ بلوچ لبریشن آرمی ءَ موٹر سائیکل سواریں پاکستانی فورسز ءِ کارندھانی سر بستگ ءُ نشانگ جوڑ کتگ اَنت۔ اے اُرش ءَ چہ چار سیکورٹی کارندہ بیران ءُ کم چہ کم شش ٹپیگ بوتگ اَنت۔

بی ایل اے ءَ گوستگیں روچ ءِ اُرش ءِ ویڈیو شنگ کتگ کہ ایشی ءِ تہ ءَ بیران بوتگیں کارندہ ءُ آھانی دست کپتگیں سلاہ گندگ بنت۔ زانگ بہ بیت کہ گوستگیں روچ ءِ اُرش ءَ بیران بوتگیں مردمانی بابت ءَ انگت ءَ واکداراں بیان شنگ نہ کتگ۔

شال پولیس لوگ لوگ ءَ پٹ ءُ پول کنگ ءَ اِنت شھریاں دزگیری ءَ پد ناشناسیں جاھے برگ ءَ اِنت-

چہ شال ءَ ھالانی رِد ءَ شھر ءَ تنی وھدے پولیس ءُ پوج ءِ مزنیں کچے ءَ ساڑی اَنت وھدے کہ جتاجتائیں دمگاں لشکر کشی کنان ءَ بازیں مردمے آوار جتگ ءُ تھانہ ءَ ھوار ناشناسیں جاھے ءَ برگ ءَ اِنت-

پولیس ءَ مروچی شال بروری دگ بلوچ کالونی ءَ لوگانی سر ءَ بیڑبرتگ لشکر کشی بندات کتگ وھدے کہ لوگ لوگ پٹ پول میان ءَ نوید نیچاری ءَ ھوار بازیں مردمے آوار جتگ ءُ وتی ھمراھی ءَ برتگ اَنت-

ھمے وڑ شال روکپتی بائی پاس سر ءَ ھم پوج ءِ مزنیں کچے ءَ سُر ءُ پُر ءَ گندگ بیگ ءَ اِنت ءُ دمگ سے ورنایانی زورانسری آوار جنی ءِ ھال دزکپتگ-

چہ شال ءَ اِھوالکار رِد ءَ اے دزگیریاں اَبید نندانک میان ءُ پولیس لشکر کشی ءَ دزگیری اے وھد ءَ سی پنچ نزیک ءَ مردم پولیس ءَ بروری تھانہ ءَ برتگ ءُ بند کتگ وھدے کہ تنی وھدے کس ءَ گوں ملّگ اجازت دیگ ءَ نہ اَنت-

زانگ بہ بیت کہ شال ءَ جاور نگیگ اَنت بلوچ یکجھتی کمیٹی ءِ زھرشانی سر ءَ مروچی پد ءَ شال پولیس ءَ جتاجتائیں دمگاں انگیر ءَ کتگ دزگیر کتگ ءُ وھدے کہ تیرگواری ءَ چہ دگہ بازیں زھرشانی کنوکی ٹپی بیتگ اَنت-

ھمے وڑ پولیس ءُ سادھیں پوشکانی تہ ءِ کارندھاں چہ شال کلی کمبرانی ءَ دو کسان سالی ئیں گھار آوار جتگ ءُ ناشناسیں جاھے ءَ برتگ اَنت-

بی وائی سی رِد ءَ اے وھد ءَ چہ شال ءَ سد ءَ گیش کارکنان ءُ لَس شھری ھکومت پرمان سر ءَ پولیس ءَ دزگیر کتگ اَنت وھدے کہ چل نزیک ءَ زھرشانی کنوک پولیس ءَ لَٹ ءُ کُٹ تیرگواری ءَ چہ ٹپی بیتگ اَنت وھدے کہ پوج ءِ کریک ڈاؤن انگت برجاہ ءَ اِنت-

بلے بی وائی سی ءَ پوج ءِ کریک ڈاؤن ءَ اِبید باندا چہ سرجمیں بلوچستان ءَ زھرشانی جار جتگ-

پولیس ءَ لالا وھاب، سمی دین بلوچ ءَ ھوار سیزدہ مردمانی ارزی نبشتہ کتگ –

بلوچستان ءَ درنگاز کنوکانی کوش، آیانی سرا لٹ شاپی ءُ بلوچ یکجھتی کمیٹی ءِ رھشونانی دزگیری ءِ بگیری ءَ کراچی ءَ بوتگیں زھرشانی ءَ کراچی پولیس ءَ بیڑ برتگ ءُ گل ءِ رھشوناں ھوار دگہ بازیں مردمے دزگیر کتگ –

سندھ پولیس ءَ سمی دین بلوچ، لالا وھاب بلوچ، رزاق، شھداد، ءُ سلطان ءَ ھوار 13 سیزدہ درنگاز کنوکانی بگیری ءَ دفعہ 144 ءِردا ارزی نبشتہ کنگ بوتگ –

درنگاز کنوکانی رِد ءَ اے ارزی نان کاگنزیبل ایں، بزاں اشی ءِ رِد ءَ پولیس بید ءِ وارنٹ ءَ ناں کسے ءَ گِپت کنت ناکہ ارزی ءَ نبشتہ ءَ کت کنت چریشی ءَ اے شَر درکانودی ئے –

وکیلانی گوشگ انت کی مزن آمیدگس ءِ کتگیں پیسلہ اے گپ ءِ گواھی ءَ دنت کہ پولیس اے کیس ءَ ھچ کس ءَ دزگیر کت نہ کنت بلے انٹلی جنس ایجنسیانی زور دیگ ءِ سوب ءَ پولیس لاچار ایں –

دومی نیمگ ءَ ھمے ھال آیگ ءَ انت کہ پولیس ءَ دزگیر کتگیں بازیں درنگاز کنوکے یل داتگ بلے پدا ھم بی وائی سی ءِ رھشوناں ھوار سیزدہ مردم ھنگت بندیگ انت –

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشانے ءِ تہ ءَ گوشتگ کہ بی ایل اے ءِ سرمچاراں مروچی کلات ءَ زورگریں پاکستانی پوج ءِ سرا اُرش کتگ ءُ دژمن پوج ءِ چار کارمند کُشتگ انت ءُ شش زدگ کتگ انت –

جارکش ءَ گوشتگ کہ بلوچ لبریشن آرمی ءِ سرمچاراں کلات ءِ دمگ ہربوئی ءَپیسر ءَ سنگر گپتگ ءُ زورگریں پوج ءِ پرپٹ سواریں کارمندانی سر ءَ اُرش کتگ – اُرش ءَ زوگریں پوج ءِ چار کارمند ھما دمان ءَ مُرتگ انت کہ آیانی سلاہ ءُ ایندگہ پوجی سامان سرمچاراں دستیگ کتگ انت –

آئی ءَ گوشتگ کہ سرمچارانی اُرش ءَ شش پوجی کارمند زدگ بوتگ انت کہ آ تتکگ انت، بزدلیں پوجی کارمنداں وتی مرتگیں ھمراہ یل داتگ ءُ تتکگ انت –

جارکش ءَ گوشتگ کہ سرمچاراں اے اُرش ھما وھد ءَ کتگ وھدیکہ آ ہربوئی ءُ کش ءُ گوری ھند ءُ دمگاں لشکر کشی ءَ دلگوش بوتگ، اُرش ءَ دژمب پوج پدکنز اِتگ – بلوچ لبریشن آرمی ھر وھد ءَ راج ءِ پھازگ ءَ ساڑی ایں، دژمن ھر زوراکی ءِ پسو ھمے وڈیِ اُرشانی دروشم ءَ دیگ بیت –

پولیس ءِ دست ءَ دزگیر کنگ بوتگیں درسیں درنگاز کنوک ھنگت یل کنگ نہ بوتگ انت –

مروچی کراچی ءَ زھرشانی میان ءَ سند پولیس ءَ بلوچ یکجھتی کمیٹی ءِ رھشون سمی دین، لالا وھاب، سوشل ایکٹوسٹ پروین ناز ءَ ھوار بازیں جنین ءُ مردین ءِ لٹ شاپ کُتگ ءُ پدا بندیگ جاہ ءَ برتگ انت –

دزگیر کنگ بوتگیں درنگاز کنوک ایئرٹریلی بندیگ جاہ ءَ برگ بوتگ بند کنگ بوتگ انت، وھدیکہ سمی دین بلوچ ءِ وکیل ابیرہ اشفاق آئی ءِ در کنائینگ ءِ ھاتر ءَ پولیس تانہ ءَ شُتگ آ ھم دزگیر کنگ بوتگ –

دزگیر کنگ بوتگیں بلوچ درنگاز کنوکانی یل نہ کنگ ءِ بگیری ءَ بلوچ یکجھتی کمیٹی ءَ ھوار کراچی ءَ سیادی داروکیں بازیں سیاسی ءُ انسانی ھکانی باسک تانہ ءَ ڈن یکجاہ بوتگ انت –

گل ءِ رِد ءَ دزگیر کنگ بوتگیں زالبول تانہ ءَ انت بلے پولیس لالا وھاب ءَ ھوار ایندگہ مردینیں باسکانی درگت ھچ گوشگ ءَ نہ انت –

آئی ءَ گوشتگ اگاں مئے سنگت زوت دیما آرگ نہ بوتاں گڈا ما لاچار بہ ایں کہ دوبر زھرشانی بہ کن ایں ءُ اشی ءِ درسیں زمہ داری پولیس سر ءَ لڑگ بیت –

چہ گوادر ءَ اھوال انت کہ گوستگیں روچ ءَ پاکستانی پوج ءَ باڈری واپار ءَ ھواریں ورنا دزگیر کنگ ءَ پد گون وت برتگ- چریشی ءَ پد آ بیگواہ انت-

گرگ بیتگیں ورنا ءِ پجار کیچ ءِ جھمنندیں نبیل نود ء بشیر ءِ نام ءَ زانگ بیتگ کک بلوچستان یونیورسٹی ءِ نودربر ءُ شائرے-

نبیل نود ءِ زورانسری بیگواھی ءِ اھوال آئی ءِ نزیکیں سنگتاں کرتگ-

وڈھ ءَ سلاہ بندیں مردماں پولیس تھانہ ءِ سر ءَ اُرش کتگ ءُ جنگ ءُ چوپ ترندی ءِ نیمگ ءَ شتگ-

بلوچستان ءِ دمگ ھزدار ءِ ھند وڈھ ءَ سلاہ بندیں مردماں پولیس ءِ سر ءَ ترندیں اُرشے کتگ ءُ چریشی ءِ آسر ءَ دمگ ءَ جاور ناگیگ –

اھوالانی رد ءَ اُرشکاراں پُرسلاھیں درشم ءَ اچانگی پولیس ءِ اسٹیشن ءِ سر ءَ اُرش کتگ- ھمے وھد ءَ تیرگواری بیتگ-

اُرش ءِ ھال ءِ سر بوگ ءَ فرنٹیئر کور ایف سی ءُ لیویز ءِ کارندہ کمک ءَ رھادگ بیتگ انت ءُ پورسز ءِ آیگ ءَ اُرشکاراں پورسز ءِ سر ءَ ھم اُرش کتگ ءُ ترندیں جنگ ءُ چوپ بندات بیتگ-

داں انگت ءَ جانی ءُ مالی تاوانانی اھوال دیم ءَ نیتکگ انت ءُ دمگ ءَ جاورناگیگ انت ءُ سیکیورٹی پورسز کمک ءَ دیم دیگ بوگ ءَ انت-

واکدارانی گوشگ انت کہ اُرشکارانی پجار ءُ اُرش ءِ مول ءُ مراد ءِ پٹ ءُ پول بوگ ءَ انت ءُ دمگ ءَ سیکیورٹی ھائی الرٹ کنگ بیتگ-

وئیل ءَ پد دمگی آبادی ءَ ترس ءُ بیم تالان بیتگ ءُ مھلوک لوگانی توک ءَ در نہ کپگ ءَ انت-

شال گوں ھوناں زِر اِیت

نبشتہ کار: لیاقت کے بی

دی بلوچستان پوسٹ

ھما شال کہ ”شال منی پیر ءُ آجزیں مات اِنت“ اے نام ءِ سر ءَ زانگ بوت کہ ھما شال ھر وھد بہ چارت ئے کہ یک ماتے ءَ اکسے دست ءَ اِنت ماں شال ءِ گَلیانی تہ ءَ زَھرشانی کنگ ءَ اِنت، ءُ وتی راج ءَ گوں ھمے لوٹ کنگ ءَ اِنت کہ بیا اِت مئے راہ ھمیش اِنت اے راہ مارا منزلے ءَ سر کنت۔یاکہ یک کَماشے گوں اَرسیگیں چماں گوں ماما کدیر ءِ گِدان ءَ نشتگ گوں وداراں درد گوازینگ ءَ اِنت۔ اگاں ماتے ءِ زھگ بیگواہ کنگ بوت گڑا مات وتی زھگ ءِ شوھازگ ءِ واستا گڑا بہ چار اِت ماں شال ءَ پریس کلبانی دیم ءَ کپتگ اَنت ۔نوں شال ءَ ماتے اے امید ءَ نہ نند اِیت کہ من ءَ انساپ بہ رس اِیت ، نوں شال ءِ گَلیاں مات بے امید کُرت اَنت۔ یاکہ ھر وھد ءَ نودربرانی چہ زانشتجاہ ءَ موکل بوت اَنت، گڑا وتی موکلانی گوازینگ ءِ واستا ماں شال ءِ زیبداریں موسم ءَ گوازینت اِش۔ بلے مرچی ھمے شال ھم پُرسیگ کنگ بوت۔ نوں نودربر شال ءِ روگ ءَ تُرس اَنت ما گوں تیراں سُمبگ مہ بئیں۔ مرچی شال گوں جنگ جاہ ءَ مٹ بوت۔ مرچی شال پیر ءُ آجزیں ماتے ءَ چہ اَلگ بوت یک کبرستانے جوڑ بوت ھما کبرستان کہ لاش کل کنگ نہ بنت بلکیں بندیگ کنگ بنت۔ مرچی شال گوں ھوناں زِر اِیت۔ دو روچ ءَ پیسر ما دیست کہ سوشل میڈیا ءَ یک ھالے شنگ اَت کہ” من بلوچستان ءِ نودربران آوکسفورڑ یونیورسٹیاں وانین آں“ ھمے ھال ءَ چہ پد مارا جون دست کپت۔ اد ءَ ما سرپد بوت ایں کہ مئے یونیورسٹی دگر اَنت کہ اود ءَ مئے مات گھار ءُ نودربر لٹ ءُ کُٹ کنگ بنت، اد ءَ ھم ما دربرگ ءَ ایں کہ یک زورگیرین ءَ گوں چون دیم پہ دیم بوھگ لوٹ اِیت، ءُ مزلوم راجانی تہ ءَ مزلوماں تئلیم چون دیگ بیت۔ اے تئلیم مرچی بلوچ ءَ دربُرتگ کہ ایشی ءِ بندات چہ شال ءِ گَلیاں بوت ءُ سرجمیں بلوچستان ءَ دربُرت۔ مرچی بلوچستان ءِ تہ ءَ ھما کار بوھگ ءَ اَنت کہ گوں بنگالیاں بوتگ اَنت۔ مرچی بلوچ ءَ ھم اے مار اِتگ کہ مارا لوگ ءَ نندگ ءُ ندارگ کنگی نہ ایں، بلکیں گوں زورگیر ءَ دیم پہ دیم بوھگ لوٹ اِیت۔ اگاں مرچی کجا ھم زھرشانی بیت آئی ءَ مردم کم گندگ کیت، اگاں ھما زھرشانی ءِ سر ءَ اُرش کنگ بوت گڑا ھما زھرشانی وتی رنگ ءَ مٹ کنت ءُ آ داں ترا باز مردم گِندگ ءَ کیت گڑا ھمینچو بہ زان کہ بلوچ ءَ تشدد انگت مھکم کنت۔

اگاں مرچی راج ءِ لیڑرشِپ بند کنگ بوتگ گڑا بلوچ ھم پُشت کنز نہ بوتگ بلکیں گیش ءَ چہ گیش گَھگیری کنگ اِنت، آ لیڑرشِپ ھم زانت کہ منی راج چہ لٹ ءُ کٹ ءَ پُشت کنز نہ بیت،بلکیں مھکم بیت۔

بلے، دوھمی نیمگ ءَ بازیں بیانیاں ھم گَردش کنگ ءَ اَنت۔ اے بیانیانی کاونٹرکنگ شُمئے کار اِنت کہ شُما ھمینکس مھکم بہ اِت، شُما ھمینکس کاونٹر کُرت کن اِت۔

گَھگیری زندگ بوھگ ءِ نام اِنت،
گَھگیری یک مُشت بوھگ ءِ نام اِنت۔
شالا ھست بات اِت، مھکم بات اِت، بلوچ بات اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ کلات ءَ پوجی لشکر کشی ءَ دلگوش پوج کارندھانی سر ءَ اُرش، کُشگ بیتگیں کارندھانی سلاہ اُرشکاراں گوں وت برتگ اَنت-

مروچی سُھب ءَ پاکستانی پوج ءَ کلات ءِ دمگ ھربوئی، اسکلکو ءُ کش گور ءِ دمگ ءَ لشکر کشی بندات کتگ- پاکستانی پوج ءِ کارندہ گاڑی ءُ پرپٹانی سر ءَ کاروان دروشم ءَ پیشکدمی کنگ ءَ بیتگ اَنت-

لشکر کشی ء دلگوشیں کارندہ ھربوئی ءِ دمگ ءَ سنگر گپتگیں سلاہ بندیں مردماں نشانگ کتگ اَنت-

اِھوالکار رِد ءَ پرپٹ ءَ سوار پوج ءِ کارندہ نشانگ کنگ بیتگ اَنت چریشی ءِ آسر ءَ پوج ءَ جانی تاوان چست کنگ کپتگ وھدے کہ اُرشکاراں کُشگ بیتگیں کارندھانی سلاہ ءُ دگہ پوجی سامان گوں وت برتگ اَنت-

واکدار ءَ اے درگت ءَ انگت ھچ درشان شنگ نہ کتگ-

اے دمگ ءَ بلوچ آجوئی لوٹوکیں سلاہ بندیں گل پُرکار اَنت کہ پاکستانی پوج سر ءَ اے وڑیں اُرش ءِ کتگ بلے اے اُرش زمہ واری انگت ھچ گل ءَ نہ زرتگ-