TBP Balochi

چہ شال ءَ ھالانی رد ءَ ھمے ماہ ءِ 26 اپریل ءَ پاکستانی لشکر ءَ رودراتکی بائی پاس ءِ سر ءَ چہ نائی ءِ دکان ءَ دو ورنا دزگیر کتگ ءُ ناشناسیں جاھے ءَ برتگ اَنت۔

دوئیں ورنایانی پجار عبدالباسط مالی خسن ءُ غلام محمد ء گھور خان ءِ ناماں بوتگ اَنت کہ اسپلنجی مستونگ ءِ نندوک اَنت۔

بلوچ یکجھی کمیٹی ءَ دوئیں مردمانی زورانسری بیگواھی ءِ ھال راست کتگ۔

زانگ بہ بیت کہ بلوچستان ءِ دمگ مستونگ ءِ ھند اسپلنجی ءَ گوستگیں چار روچ ءَ چہ یک فوجی آپریشنے برجاہ اِنت کہ ایشی ءِ تہ ءَ تاں انوگ ءَ پورسز ءَ پنچ مردم دزگیر کتگ ءُ پد ءَ بیگواہ کتگ انت۔

اسپلنجی ءِ وئیل ءِ ھلاپ ءَ دمگی مردماں ایف سی کیمپ ءِ دیم ءَ زھرشانی کتگ ءُ دزگیریں مردمانی یل کنگ ءِ لوٹ کتگ۔

دومی نیمگ ءَ بلوچستان ءِ دمگ آواران ءِ تھسیل مشکے ءَ یک مردمے ھم بندیگ کنگ ءَ پد پاکستانی لشکر ءَ پہ زور بیگواہ کتگ۔

اھوالانی رد ءَ بیگواھیں مردم ءِ پجار مشکے ءِ دمگ کندری ءِ نندوکیں محمد ءِ چُک نصیر احمد ءِ نام ءَ زانگ بیتگ۔ گوشگ بوگ ءَ انت کہ پاکستانی انٹیلی جنس ایجنسیاں دو روچ پیسر آ چہ وتی لوگ ءَ دزگیر کتگ ءُ چہ ایشی ءَ پد آ بیگواہ اِنت۔

دمگی مردمانی گشگ اِنت کہ پاکستانی لشکر ءَ نصیر احمد کیمپ ءَ تلب کتگ بلے آ وتی دزبندی ءِ سبب ءَ اود ءَ شت بوت نہ بوتگ ءُ پد ءَ لشکر ءَ آئی ءِ لوگ ءَ اُرش کتگ ءُ دزگیر کتگ ءُ بیگواہ کتگ۔

مستونگ ءِ دمگ اسپلنجی ءُ آئی ءِ کش ءُ گوراں مرچی چارمی روچ ءَ پوجی کارروائی برجاہ بیتگ انت۔ اے دمگ ءَ مزنیں کساسے ءَ لشکری ءُ ھیلی کاپٹر ءُ نگرانی ڈرون کابوئی، تالخا کاوی ءُ ھمے کش ءُ گور ءِ کوہ ءُ میدانی دمگاں یکشل ءَ بال ءَ گندگ بوتگ انت۔

دمگی ھالانی رد ءَ سھب ءِ اولی بھر ءَ سیکورٹی پورسز ءِ کاروان یک رندے پد ءَ اسپلنجی ءُ نزیکیں دمگاں پترتگ اَنت کہ اود ءَ چیک پوسٹ گیش کنگ بوتگ اَنت ءُ روگ ءُ آیگی راھاں چیک ءُ تان کنگ بوگ ءَ اِنت۔ اے جاورانی سبب ءَ لس مھلوک سکیں مشکلانی آماچ انت۔

اے دمگ ءَ وھد وھد ءِ سر ءَ ٹوہ ءُ تیرگواری ءِ توار ھم اشکنگ بوتگ بلے انگت ءَ سرکاری تکاں ھچ وڑیں تاوان ءِ ھال شنگ نہ بوتگ۔ دمگی ھالانی رد ءَ لشکر ءَ بازیں لوگانی سر ءَ اُرش کتگ ءُ بازیں مردمانی دزگیر کنگ ءِ ھم ھال شنگ بوتگ۔

کابوئی ءُ تالخا کاوی ءِ کوھستانی دمگاں ھیلی کاپٹرانی گیشیں بالانی سبب ءَ اے ترس ءُ بیم گیش بوگ ءَ اِنت کہ اود ءَ پورسز مزنیں آپریشنے ءِ تیاری ءَ کنگ ءَ اَنت۔ ڈرون ءِ مدامیں نگرانی ءَ چہ دمگی مردمانی تہ ءَ گیشیں ترس ءُ بیم شنگ ءُ تالان بوتگ۔

یات بہ بیت کہ اسپلنجی ءَ برجاھیں فوجی آپریشن ءَ چار روچ اِنت کہ ایشی ءِ تہ ءَ زمینی اُرد ءِ ھمراھی ءَ برزی کمک کارمرد کنگ بوگ ءَ اِنت۔ اے وھد ءِ تہ ءَ بازیں شھریانی دزگیر کنگ ءُ زورانسری ءَ بیگواہ کنگ ءِ ھال ھم دیم ءَ اتکگ اَنت۔

آپریشن ءِ بابت ءَ انگت ءَ پاکستانی واکدارانی نیمگ ءَ ھچ وڑیں سرکاری بیان دیم ءَ آرگ نہ بوتگ انت وھدے کہ لھتے بلوچ سلاھبندیں گلاں فورسز ءِ سر ءَ اُرش ءِ زمہ واری زرتگ انت۔

بلوچستان ءِ دمگ پنجگور ءَ پجّار نہ بوتگیں سلاہ بندیں مردماں پاکستانی پوج ءِ سر ءَ اُرش کتگ دو کارندہ کُشتگ اَنت-

اِھوالکار رِد ءَ اُرش مروچی نیمروچ کساس ساھت یک ءَ پنجگور ءِ دمگ چتکان ءَ ھما وھد بیتگ وھدے سیکیورٹی کارندہ سامان برگ واستا دمگ ءَ ساڑی بیتگ اَنت – سلاہ بندیں مردماں کارندہ نشانگ کتگ اَنت ،چریشی ءِ آسر ءَ دوئیں جاہ پہ جاھی بیران بیتگ اَنت-

وئیل ءَ پد سیکیورٹی پوج ءِ مزنیں کچے ءَ دمگ انگیر ءَ کتگ، پٹ ءُ پول تُرند کتگ ءُ سُر پُرانی تہ ءَ گیشی گندگ اَتکگ-

گوستانک ءَ اے وڑیں اُرشانی زمہ واری بلوچ آجوئی لوٹوکیں سلاہ بندیں گلاں زرتگ اَنت بلے اے اُرش زمہ واری انگت ھچ گل ءَ نہ زرتگ-

بلوچستان ءِ دمگ زیارت ءِ ھند چوتیر ءَ یکجائی آپریشن ءِ وھد ءَ انسداد ناشرکاری ءِ محکمہ ءُ دگہ فورسز ءَ ٹاہ داتگ کہ آھاں گوں سلاہ بندیں مردماں تیرگواری ءِ بدلی ءَ 7 مردم کشتگ انت۔

سی ٹی ڈی ءِ رد ءَ انکاؤنٹر ءَ بیران بوتگیں مردمانی سیادی گوں بلوچ لبریشن آرمی ءَ بوتگ ۔

سی ٹی ڈی ءِ بنشون ءَ گشتگ کہ اے آپریشن انٹیلی جنس ءِ ھالکاری ءِ بنیاد ءَ کنگ بوتگ۔ تیرگواری ءَ پد وئیل جاہ ءَ چہ مزنیں کساسے ءَ سلاہ ءُ گولہ بارود ھم دست کپتگ انت۔

سی ٹی ڈی ءِ گشگ انت کہ بیران بوتگیں مردم جتا جتائیں وڑیں وئیلانی تہ ءَ ھوار بوتگ انت ءُُ آہانی کار ءُ کرد ءَ چہ امن ءُُ ایمنی ءِ جاورھالاں را مزنیں بیمناکی بیتگ انت۔

زانگ بہ بیت کہ اے ماہ ءِ 19 اپریل ءَ سی ٹی ڈی ءَ بلوچستان ءِ دمگ دکی ءَ آپریشن ءِ وھد ءَ پنچ مردمانی کشگ ءِ ٹاہ داتگ۔ بلے اے مردم پد ءَ زورانسری ءَ بیگواہ کنگ بوتگ اَنت کہ آھانی تہ ءَ اعجاز ءُ زید ء عابد خان ھم ھوار اَنت۔

اعجاز ءُ زید 12 اپریل 2025 ءَ پاکستانی لشکر ءَ چہ کوئٹہ ءِ شھر سریاب ءَ دزگیر کتگ اَنت ءُ پد ءَ بیگواہ بوتگ اَنت۔ ھمے رنگ ءَ محمد دین مری ھم نزیک ءَ چار ماہ پیسر دزگیر کنگ ءُ بیگواہ کنگ بیتگ۔

دومی نیمگ ءَ سی ٹی ڈی ءَ ھم ٹاہ داتگ کہ گوستگیں روچاں کوئٹہ ءِ دمگ درخشان ءَ بوتگیں مبینہ دیم پہ دیم بوھگ ءَ دو مردم بیران بوتگ اَنت۔

انسانی ھکانی گلاں سی ٹی ڈی ءِ اے گپانی سر ءَ ایراد گپتگ ءُ گْوشتگ کہ سی ٹی ڈی وتی کوشکاری روایت ءَ برجاہ دارگ ءَ اِنت کہ آ دروگیں دیم پہ دیمی جنگانی تہ ءَ بیگواھیں مردمانی کُشگ ءَ اِنت، چو کہ پیسر ءَ بیگواہ کنگ بیتگ انت ۔

بلوچ یکجہتی کمیٹی ءِ مرکزی رھشون ڈاکٹر صبیحہ بلوچ ءَ گْوشتگ اے جنگ ءَ مارا ھمینچُک ٹپ داتگ کہ ھر وھد ءَ ما ایشی ءِ نیمگ ءَ چار ایں گڑا ارسانی بند کنگ ناممکن بیت۔ پد ءَ ھم ما وت ءَ جُست کن ایں : باریں مارا انگت گھگیری کنگ نہ لوٹ اِیت؟ باریں اے ٹپ ءُ ازیتانی میان ءَ زندگی ممکن اِنت؟

آئی ءَ گْوشتگ کہ وکیلاں ھال داتگ ڈاکٹر ماہ رنگ ءِ ھالات سک باز ھراب اِنت، آ سک کمزور اِنت۔ بیبرگ ءِ دو روچ ءَ رند بلڈ پریشر مسلسل کم اِنت، تا ھم آ وکیلانی ملگ ءِ کابل نہ اِنت۔ شاہ جی ءِ ھالات گیشتر ھرابتر بوتگ، ءُ بیبو ءِ دپ ءِ ھون آیگ ءَ اِنت۔

ڈاکٹر صبیحہ بلوچ ءَ گْوشتگ کہ ریاست ءَ ایشانی زندگی ءِ ھچ پرواہ نیست۔ تا ھم بیگواھیں مردمانی کھول وتی رھشونانی درداں مار اَنت ۔ مرچی بیگواھیں مردمانی کھول زندان ءِ دپ ءَ اوشتاتگ اَنت۔ آیاں چہ زندان ءِ انتظامیہ ءَ دزبندی کتگ کہ آیاں ڈاکٹر ءُ گوں اے دگہ ھمراھاں مِلگ ءِ موکل دیگ بہ بیت ، بلے زندان ءِ سپرنٹنڈنٹ ءَ موکل دیگ ءِ منا کتگ۔

مجبوری ءَ کھولاں وتی دل ءِ گپ ویڈیو کلوہ ریکارڈ کتگ ءُ چہ وکیلاں وتی رھشون ءَ سر کتگ اَنت۔ اے کلوہ امیت، مھبت ءُ چہ کُربانی پُر بوتگ اَنت۔ ایشان کلوھاں چہ رند مئے ھمراھاں وتی بھوک ھڑتال ھلاس کتگ ۔

کتاب : میٹامارفوسز

نبشتہ کار : فرانز کافکا

چمشانک : یاسر بلوچ

دی بلوچستان پوسٹ

فرانز کافکا 3 جولائی 1883 ءَ ماں آسٹریا شھر پراگ ءَ ودی بوتگ۔ آئی ءِ سیادی چہ یک وش ھالیں لوگے ءَ بوتگ ءُ آئی ءِ پس یک مزنیں کارجاھے ءِ واھند بوتگ۔ آئی ءِ مات یک جرمنی یے بوتگ ءُ آئی ءِ ماتی زبان ام جرمن بوتگ۔ آئی ءَ کانون ءِ تالیم در بُرتگ پمیشکا آئی ءِ گیشیں نبشتانکانی توک ءَ راستی ءُ اخلاقیات گندگ ءَ کیت ۔ فرانز کافکا ءَ گیشیں نبشتانک وتی پت ءِ ھلاپ ءَ نبشتہ کتگ اَنت پرچا کہ چہ کسانی ءَ آئی ءِ پت ءِ رویہ آئی ءِ گوما سک ترند بوتگ ءُ آئی ءِ لک اِتگیں ھر نبشتانک ءِ توک ءَ تھنا بیوسی ءُ بزگی گِندگ ءَ کیت۔ فرانز کافکا میٹامارفوسز ناول ماں 1912 سرجم کُتگ۔ آئی ءِ گیشیں کتاب آئی ءِ مرگ ءَ پد چاپ ءُ شنگ بوتگ اَنت۔ فرانز کافکا 3جون 1924 ءَ بیران بوتگ۔

میٹامارفوسز ءِ کتاب ءِ کارست گریگر سمسا یک کارجاھے ءَ سیلز مین ءِ کار ءَ کنگ اَت وھد سُھب ءِ سر اَت آ ھمُک روچ وھد ءِ وڑ ءَ پاد کیت تا اجب ھیران بیت کہ آئی ءِ جان ءُ بدن سرجم ءَ مٹ بوتگ اَنت ءُ آ یک لُولُکے جوڑ بوتگ اَت۔ آئی ءَ باز جھد کُتگ کہ آ پاد بئیت بلے آئی ءِ پہ پاد آیگ ءَ گردگ چٹ گران جوڑ بوتگ اَت۔

ھمے گِر ءُ چلی توک ءَ آئی ءِ لوگ ءِ مردم کاینت کہ کار ءِ وھد اِنت بلے گریگر انگت واب اِنت۔ بلے وھدے دراوزگ پچ بیت آ وتی چُک ءَ اے دروشم ءَ گِند اَنت پریشان بنت ھمے ساھت چہ کارجاہ ءِ کلرک ام رس اِیت ءُ گریگر ءَ ھمے ھال ءِ توک ءَ گِند اِیت۔

روچ پہ روچ پہ گریگر ءَ زند گرانتر ءُ بیت ءُ وارتر بوان بیت۔ آئی ءِ لوگ ءَ آئی ءِ مات ءُ پت ءَ ھوار آئی ءَ چہ کستریں یک گوھارے ھم بیت۔

گریگر ءِ ھاندان گوں ھالِتاں گیشتر بیوار بیت ءُ لوگ ءِ ھرچ ءِ کشگ کہ پیسر ءَ گریگر ءِ کوپگ ءَ بوتگ نو آئی ءِ کماش ءِ نزوریں کوپگ ءَ بوتگ اَت ءُ روچ پہ روچ آئی ءِ لوگ ءِ مردم ءَ اے مُسیبت ءِ گیشتر ءُ گرانتر بوان اَت۔

ھما اِنت کہ گریگر اے ویل ءِ شکار بوتگ اَت آئی ءِ کھول ءَ وت ءَ چرائی چہ دور داشتگ ءُ ھچ ھال اِش نہ گپت ءُ وتی چمانی دیم ءَ نہ آؤرت اِش۔ بس آئی ءِ یکیں گوھار ءَ آئی ءَ ورگ دات۔

وھد گْوزان بیت اے جاور پہ گریگر ءُ آئی ءِ ھاندان ءَ گیشتر گران بوان بنت۔ ھمے لوگ ءِ ھرچ ءِ پورو کنگ ءَ پہ آئی ءَ لوگ ءِ مردماں وتی لوگ ءِ یک کمرا یے ڈنی مردماں پہ کرایہ دینت۔

روچ پہ روچ گریگر گوں لولُک ءِ بدن ءَ لوگ ءِ مردم چرائی ءَ بیزار بوان بنت پیسر ءَ آئی ءِ گوھار ءَ آئی ءِ نان ءُ ورگ ءَ آئی ءِ کوٹی ءَ کار اِیت ءُ آئی ءِ سپائی یے ءَ کنت بلے نو آ ھم کم کیت ءُ روت۔ یک روچے گریگر چہ وتی کمرا ءَ در کیت گُڑا کرایہ داریں مردم ایشی ءَ گِند اَنت ءُ پریشان بنت اے چونیں چیزے۔ گُڑا ایشی ءِ گِندگ ءَ رند اے کرایہ دار ایشی ءِ پت ءِ سر ءَ برانز گِر اَنت ءُ لوگ ءَ یلو کن اَنت ءُ رو اَنت۔ گُڑا گریگر ءِ پس گریگر ءِ سر ءَ سک زھر بیت ءُ آئی ءَ ھَکل کنان ءَ آئی ءِ کمرا ءِ توک ءَ دیم دَنت۔

گریگر سرپد بْوان بیت کہ آئی ءِ لوگ ءِ مردم چہ آئی ءَ سک بیزار اَنت ءُ راستی ھمیش اِنت کہ وھدے مردم بیکار بیت گُڑا چرائی چہ کُل مردم بیزار بنت۔ آ وھد ءَ کہ گریگر سلامت ءُ تندرست اَت کُلیں لوگ ءِ مردمانی اُمیت اَت کُل مردماں دوست اَت بلے وھدے کہ گریگر اے جیڑہ ءِ آماچ بوت گُڑا پہ دُرستاں یک سر دردے جوڑ بوتگ۔

گریگر ھیال کنت کہ باید اِنت لوگ ءِ مردم من ءَ پیسری وڑ ءَ دوست بہ دار اَنت۔ پیسر ءَ منی زرورت بوتگ اِش نو من ءَ لوگ ءِ مردمانی کُمک ءِ زرورت اِنت باید منی ھمراہ داری ءَ بہ کَن اَنت۔

بلے وھدے ھمراھی ءِ ھالات ھراب بوان بنت ءُ گریگر ھمے پیسلہ ءَ کنت کہ من وت ءَ کُشاں ءُ بلکیں منی مرگ ءَ پد منی لوگ ءِ ھالت شرتر بنت۔ یک روچے وھدے لوگ ءِ کاردار پہ گریگر ءِ کمرا ءَ سپائی ءَ کیت گِند اِیت کہ گریگر گوں لولُک ءِ جان ءَ نہ سُرگ ءَ اِنت۔

گُڑا آ سرجمیں لوگ ءِ مردماں ھال دنت ءُ درست کاینت چار اَنت کہ اے مُرتگ گُڑا درست گُش اَنت ایشی بر اِت ڈن ءَ دور بدے اِت۔چہ گریگر ءِ مرگ ءَ پد آئی ءِ لوگ ءِ مردم آسودگ بنت ءُ گُش اَنت کہ شُگر اِنت چہ اے لولُک ءَ مئے جان چُٹ اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ یکجھتی کمیٹی ءَ ” زورانسری آوار جنگ بوتگیں مردمانی یل کنائینگ ءُ بلوچ چکچینی ءِ بگیری ءَ گھگیری ” ءِ بنگپ ءَ باندا29 اپریل ءَ سرجمیں بلوچستان ءَ گم ءُ رنجانی دارگ ءِ جار جنگ بوتگ –

بلوچ یکجھتی کمیٹی ءَ 29 اپریل ءَ سرجمیں بلوچستان ءَ گم ءُ رنجیگ ءُ ریاستی زوراکیانی بگیری ءَ گھیری ءِ جار جتگ –

گل ءِ رِد ءَ اے گم ءُ رنجیگی بی وائی سی ءِ رھشونانی پلامرزی ءَ دارگ بوگ ءَ انت کہ اے وھدی ریاست ءِ بندیگ جاہ ءَ بند انت ءُ ھما درسیں بلوچانی یات ءَ کہ آ زورانسری آوارجنگ ءُ ریاستی زوراکیانی آماچ انت – بی وائی سی ءِ رد ءَ بلوچستان ءَ مھلوک ءِ زند پوجی ھاکمی سر ءَ انت – اے ھما دمگ انت کہ یکے ءِ زھگ، یکے ءِ پت کُشگ بیت ءُ یک کھولے ءِ پُرشگ ھمک روچی راستی ءِ جوڑ بوتگ –

گل ءَ گوشتگ کہ بی وائی سی اے زلم ءُ زوراکیانی بگیری ءَ گھگیری دروشم ءَ کرتنی دیم ءَ اتکگ – گل ءَ بلوچ ماتانی پریات، چورھیں زھگانی آہ، ءُ ھما مردمانی درد وتی زھرشانی بھر جوڑ کتگ انت کہ وتی چکچینی اوپار کتگ انت بلے ھچبر سر اش جھل نہ کُتگ –

بی وائی سی ءَ جار جتگ کہ 29 اپریل ءَ ھر یک ڈپٹی کمشنر کارگسے ءِ دیم ءَ ءُ ھر ھما جاہ ءَ کہ زوراکی کنگ بوگ ءَ انت اود ءَ گم ءُ رنجیگی ءِ بیت انت ءُ گھگیری کنگ بیت – ا روچ ءَ پُرایمنیں زھرشانی کنگ بیت کہ اود ءَ زورانسری آوار جنگ بوتگیں مردمانی اکس ءُ دزگیر ءُ کشگ بوتگیں مردمانی نامانی کارڈ چست کنگ بنت –

جار ءِ تہ ءَ گوشگ بوتگ کہ سر ءَ اسپیتیں پوشاک بندگ بیت تاکہ گم ءُ شرپی ءِ نشان زاھر کنگ بہ بیت –

زمزیل دست ءَ کنگ بیت ءُ بندیگی ءِ نشان زاھر کنگ بیت
گھگیری ءِ شئر ءُ شائری ءَ یکجاھی ءَ گم گھگیری درشان کنگ بیت
ازمکار درد، گھگیری ءُ امیت ءِ کسہ ءَ پیش دار انت –

بی وائی سی ءِ رِد ءَ اے رنجیگی مایوسی ءِ نہ انت بلکیں گھیگیری ءِ درشانی انت – ما زندگیں مردمانی ھاتر ءَ گھگیری کن ایں ءُ زورانسری آوار جنگ بوتگیں مردماں یات کن ایں –

گل ءِ رِد ءَ رھشونانی تہ ءَ ماھرنگ بلوچ، بیبرگ بلوچ، شاہ جی، بیبو بلوچ ءُ گلزادی بلوچ ھمے زوتاں زورانسری دزگیر کنگ بوتگ ءُ بندیگ کنگ بوتگ انت کہ اود ءَ سک باز جانی ءُ ماژگی ازیت ءِ آماچ انت -اے رھشونانی بگیری ءَ دروگیں بھتام جنگ بوتگ بندیگ کنگ بوتگ انت کہ ھنگت ریاستی بندیگ انت ءُ گھگیری ءِ برجاہ داشتگ –

بی وائی سی ءَ میان استمان ءَ چہ لوٹ کتگ کہ آ بلوچستان ءَ برجاھیں زورانسری آوار جنی، ریاستی زوراکیاں ھاموش مہ بنت ءُ انسانی ھکانی لگتمالی ءِ ھلاس کنگ ءَ گامگیج بہ زور انت –

گڈسر ءَ بی وائی سی ءَ گوشتگ کہ 29 ءِ زھرشانی بلوچستان ءَ برجاھیں ریاستی زوراکی زورانسری آوارجنی ءِ بگیری ءَ جوانیں گامے، ما جھان ءَ اے کلوہ ءَ دیگ لوٹ ایں کہ بلوچ راج ھاموش نہ بیت ءُ وتی ھکانی ھاتر ءَ گھگیری کنان بیت انت –

بلوچستان ءِ دمگ کیچ ءِ ھند بلیدہ ءَ ناشناسیں سلاہ بندیں مردمانی تیرگواری ءَ چہ یک مردمے بیران ءُ دو ٹپی بیتگ اَنت-

وئیل مگرب ءِ وھد ءَ الندرو ھند سر ءَ بیتگ کہ اود ءَ ناصر کریم ء عبدالکریم نامیں مردمے نشانگ کنگ بیتگ ءُ جاہ پہ جاھی مرتگ- تیرگواری ءِ آسر ءَ زبیر احمد ءُ عابد نامیں دو مردم ٹپی بیتگ اَنت-

اِھوالکار گوشگ اِنت کہ ناصر کریم گوستانک ءَ یک سلاہ بندیں گلے ءَ چہ ھمگرنچ بیتگ بلے لھتے وھد ءَ پیسر پاکستانی پوج دیم ءَ سلاہ چگل داتگ اَنت- اُرش ءِ سبب انگت زانگ نہ بیتگ-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ مئے سرمچاراں پسنی ءَ پاکستانی چیریں ادارھ آئی ایس آئی ءِ یک کارندھے کشتگ، دگہ سَے کاروائیاں زورگریں پاکستانی پوج، پولیس ءُ سیندک پروجیکٹ ءِ گاڑی نشانگ کتگ ءُ بنجاھی شھدگ بستگ-

جارکش ءَ گوشتگ بلوچ لبریشن آرمی ءِ سرمچاراں گوستگیں شپ ءَ گوادر پسنی ءِ شھر ءَ یک انٹیلیجنس بیسڈ اُرشے ءَ زورگریں پاکستانی چیریں ادارھانی انٹر سروسز انٹیلیجنس آئی ایس آئی ءِ آفسر مھمد نواز ء مھمد اعظم جھمنند حکیم والا چورنگی جوھر آباد خوشاب پنجاب ھما وھد ءَ نشانگ کتگ آئی ءَ وتی دروشم مٹ کتگ ءُ وتگڑیں ڈیتھ اسکواٍ ءِ کارندھانی ھمراھی ءَ گاڑی ءَ سپر کنگ ءَ بیتگ – تراک ڈیتھ اسکواڈ ءِ یک کارندھے، سلمان ء منیر اھمد جھمنند ببر شور پسنی مرتگ ءُ ھمے وڑ دگہ کارندھے شاہ نزر زدگ بیتگ ءُ آیانی گاڑی سرجم ءَ تباہ بیتگ-

گیش آئی ءَ گوشتگ آئی ایس آئی ءِ کارندہ گوادر ءَ کار ءَ بیتگ کہ بی ایل اے ءِ انٹیلیجنس ونگ زراب ءَ یکشل ءَ نگاہ ایر کتگ انت – گوستگیں شپ ءَ آ پسنی ءَ سپر کنگ ءَ بیتگ سرمچاراں پسنی ءِ شھر ءَ ساھت ھپت ءَ مسکان چوک کبرستان ءِ نزیک ءَ ریموٹ کنٹرول بمب ءِ نشانگ کتگ – پسنی شھر ءَ اے کارندہ وتگڑیں ڈیتھ اسکواڈ ءِ سروک بالاچ ھال دیگ ءَ بیتگ-

جارکش ءَ گوشتگ بلوچ لبریشن آرمی ءِ سرمچاراں گوستگیں روچ ءَ زامران جمکی تنک ءَ زورگریں پاکستانی پوج اسنائپر ءِ گون ءَ نشانگ کتگ کہ چریشی ءَ دشمن ءِ یک کارندھے مرتگ-

آئی ءَ گوشتگ ھمے وڑ بی ایل اے ءِ سرمچاراں گوستگیں روچ ءَ کلات ءِ دمگ منگچر ءَ ھزینئی ءَ شال کراچی ءِ بنجاھی شھدگ بستگ ءُ اسنیپ چیکنگ کتگ ھمے وھد ءَ سرمچاراں سیندک پروجیکٹ ءِ گاڑی ھم نشانگ کتگ انت-

جیئند بلوچ ءَ گوشتگ یک دگہ کاروائی ءِ بلوچ لبریشن آرمی ءِ سرمچاراں یکشمبے ءُ دو شمبے ءِ میانی شپ ءَ بولان ءِ ھند ڈھاڈر ءَ پولیس لائن ءِ سر ءَ دزبمبے چگل داتگ-

درشان ءِ گڈسر ءَ گوشگ بیتگ کہ بلوچ لبریشن آرمی اے درستیں اُرشانی زمہ واریاں من ایت ءُ زورگریں پاکستانی پوج ءُ آئی ءِ شریدارانی سر ءَ مئے اُرش ترندی ءَ گوں برجاہ بنت اِنت-

بلوچستان ءِ دمگ نوشکی ءَ تیل ءِ ٹرک ءَ اناگہ ءَ آس کپتگ۔ ھمے وھد ءَ کہ آس کُشانی کارندہ وئیل جاہ ءَ سر بوتگ اَنت ءُ آس ءِ توسگ ءِ ءِ کوشست بندات کتگ اَنت ۔ اے درگت ءَ ٹرک ءِ نزیک ءَ شھری ھم مزنیں کساسے ءَ مچ بوتگ اَنت۔

ریسکیو اھوالدار ءِ رد ءَ آس ءِ توسگ ءِ وھد ءَ مزنیں تراکے بوتگ۔ چہ تراک ءَ آس کُش ءِ کارندہ ءُ 25 ءَ چہ گیش لس مردم ٹپیگ بوتگ اَنت۔

ٹپیگ بنداتی کمک ءِ واستا سول ھسپتال نوشکی ءَ سر کنگ بوتگ انت۔ ھسپتال ءَ ایمرجنسی ءِ جار جنگ بوتگ ءُ گیشیں الاج ءِ واستا ٹپیگاں کوئٹہ ءَ دیم دیگ ءِ تیاری بوگ ءَ انت۔

دمگی ھالانی رد ءَ ایمبولینس ءِ سکیں کمی ءِ سبب ءَ سوتکالانی ٹرانسپورٹ ءَ مشکل انت ءُ دمگی مھلوک ءُ کمک کار وتی وس ءَ کمکی کاراں گوں ھوار انت۔