TBP Balochi

بلوچستان لبریشن فرنٹ ءِ جارکش میجر گْوھرام ءَ وتی شنگ کتگیں سے جتاجتائیں درشانانی تہ ءَ بلیدہ ءَ دگ ءِ پھازوکی کارندھانی سر ءَ اُرش ءُ ھاران ءَ چیک پوسٹ سر ءَ گرینیڈ لانچر ءِ اُرش زمہ واری ءُ شھید سرمچار زاھد سمالانی سُھرچکیں دروت ندر کتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں یک درشانے ءِ تہ ءَ گْوشتگ کہ مئے سرمچاراں 21 مئی 2025 ءِ نیمروچ ساھت یک ءِ نزیک ءَ مئے سرمچاراں بلیدہ – زمران دگ بند ساچی ءِ پھاز کنوکیں زورگریں پوج ءِ کاروان ءَ دو پرپٹ آئی ای ڈی بمب اُرش ءَ نشانگ کتگ – اُرش ءِ آسر ءَ یک پرپٹے تباہ بیتگ ءُ دو کارندہ جاہ پہ جاھی مرتگ اَنت-

جارکش ءَ گْوشتگ بی ایل ایف زورگریں پاکستانی پوج ءِ سر ءَ بمب اُرش زمہ واری ءَ منّ اِیت ءُ بلیدہ تاں زامران دگ جور کنوکیں ٹھیکیداراں کڈن کن ایں کہ آ سُر ءُ پُرانی ارزان کنگ نیت ءَ چہ جوڑ بوکیں اے پُلپانچیں دگ ءِ جوڑ کنگ ء بند بہ کن اَنت اگاں ناں دگہ بندساچی مشینری ءُ کار کنوکیں کارندھاں نشانگ کن ایں-

جارکش میجر گْوھرام بلوچ ءَ دگہ یک درشانے ءِ تہ ءَ گْوشتگ کہ بیست دو مئی نیمروچ ساھت دو ءِ نزیک ءَ بلوچستان لبریشن فرنٹ ءِ سرمچاراں ھاران شھر ءَ سدرن بائی پاس ءِ نزیک ءَ لتاڈ دگ سر ءَ برجاھیں پاکستانی پوج ءِ چیک پوسٹ سر ءَ گرینیڈ لانچر ءِ بازیں گولھے آس داتگ کہ بُنجل تہ ءَ نشانگ ءَ کپتگ اَنت چریشی ءِ آسر ءَ دُژمن ءَ جانی ءُ مالی تاوان چست کنگ کپتگ-

جارکش ءَ گوشتگ بلوچستان لبریشن فرنٹ زورگریں پاکستانی پوج سر ءَ بیتگیں اُرش زمہ واری ءَ منّ اِیت-

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں سیمی درشان ءِ تہ ءَ گوشتگ کہ شانزدہ مئی دوھزار بیست پنچ بی ایل ایف ءِ سرمچاراں گلی مراگشی ءِ ھاتر ءَ ھاران ءِ دمگ جورکین یک مزنیں مشنے ءِ سپر ءَ بیتگ کہ ھمے میان ءَ آئی ءِ دیم پہ دیم ریاستی چیردستی ءَ پُرکاریں سلاہ بندیں ڈیتھ اسکواڈ ءِ باسکاں چہ بیتگ-

جارکش رِد سرمچارانی ءُ دُژمنیں وتگڑیں ڈیتھ اسکواڈ کارندھانی میان ءَ یک دراجیں میڑے بیتگ میڑ میان ءَ گل ءِ یک ھاسیں سنگت زاھد سمالانی بلوچ ء حاجی غلام نبی سمالانی جھمنند نال کوڑاسک گوں جوانمردی ءَ دُژمن ءِ ھلاپ ءَ جنگ کنان ءَ ٹپی بیتگ ءُ ٹپی جاوراں جنگ برجاہ داشتگ ڈیتھ اسکواڈ ءِ کارندہ بازیں کلاں تاں داشتگ ءُ وتی سنگت پہ سلامتی دراھگ ءَ سوبمند بیتگ بلے آ گُڈی تیر فلسفہ ءِ راہ گچین کتگ ءُ نمیران بیتگ-

جارکش میجر گْوھرام بلوچ رِد ءَ شھید زاھد سمالانی بلوچ مارچ دوھزار بیست دو ءَ بلوچستان ءِ آجوئی ءِ جُھد ءَ بلوچستان لبریشن فرنٹ ءِ پلیٹ فارم گچین کتگ اے کسانیں مدتے ءَ آ مشکے، جھاؤ، آواران، گچک ءُ ھاران ءَ ھوار جتاجتائیں دمگاں دُژمن ءِ ھلاپ جنگی پڑ ءَ بھر زرتگ-

جارکش ءَ دیمتر ءَ گْوشتگ کہ بلوچستان لبریشن فرنٹ ءِ سنگت شھیدیں شرمچار زاھد سمالانی جوانیں ءُ شرپ ءِ گوم ءَ سھرچکیں دروت ندر کن ایں ءُ شھید زاھد سمالانی بلوچ ءَ ھوار بلوچ ڈیھ ءِ آجوئی ءِ دیمونی دیوکیں پُسگانی لیکہ ءُ فلسفہ ءُ مشن ءَ سرجم کنگ واستا جُھد ءَ برجاہ دار ایں-

بلوچ یکجھتی کمیٹی ءَ چہ بلوچستان مزن آمیدگس ءِ نیمگ ءَ 3 ایم پی او ءِ چیر دستی ءَ سروکانی کیس ءِ رد کنگ ءِ بابت ءَ وتی بیان ءَ گْوشتگ کہ بلوچستان ھائی کورٹ ءِ دو باسکی بنچ ءَ کہ ایشی ءِ تہ ءَ جسٹس محمد آمر نواز رانا ءُ جسٹس محمد اجاز سواتی ءِ ءُ کمیٹی ءِ جسٹس محمد اجاز سواتی ءَ ھوار کیس رد کتگ۔ بلوچ یکجھتی کمیٹی ءِ بنجاھی باسک بیبگر بلوچ، سبگت اللہ شاھجی، بیبو بلوچ، گلزادی بلوچ ءُ ماما غفار، ریاستی چیریں ادارھانی، پوج ءُ وتگڑیں ھکومت ءِ پرمان ءِ سر ءَ کیس رد کُتگ

گل ءِ رد ءَ گوستگیں دو ماہ ءِ تہ ءَ بوتگیں بنچ ءَ اے کیس ءِ بازیں گوشدارگ بوتگ اَنت۔ گوشدارگ ءِ وھد ءَ ریاستی وکیل ءَ ھچ وڑیں منّگ، بوتگیں دلیل یا سبوت پیش کنگ ءَ ناکام بوتگ بلے اے دوئیں کازی ءَ کانون ءُ آئین ءِ رد ءَ پیسلہ کنگ ءِ بدل ءَ دیر کنگ ءِ پندل کارمرز کتگ ءُ کیس ءَ بے وسی ءَ دیر کنگ ءَ برجاہ داشتگ۔

بی وائی سی ءِ رد ءَ اے کیس ءِ پیسلہ دہ روچ پیسر ریزرو بوتگ بلے مدام ھلاسی ءَ پد مرچی پیسلہ ءِ دیم دیگ ءِ وھد ءَ کیس رد کنگ بوتگ۔

آئی ءَ گْوشت کہ مئے ھیال ءَ اے آمیدگسی ءِ ذمہ واری انت کہ آ آئین ءُ کانود ءِ رد ءَ بید ءِ ھچ وڑیں زور ءُ لالچ ءَ پیسلہ بہ کنت ۔ آمیدگس ءِ کار رازداریں ادارگ ءُ پوج ءِ رندگیری نہ انت بلکیں مھلوک ءَ انساپ دیگ انت ۔ بلے اے گپ ءِ گشگ بژن اِنت کہ اے بنچ ءِ دوئیں ججاں آمیدگس ءِ رھبند ءُ معیار بلوچستان ءِ رازداریں ادارہ، پوج ءُ وتگڑیں سرکار ءِ دست ءَ بے شرپ داتگ اَنت۔

آئی ءَ دیمتر ءَ گْوشتگ کہ ما اے زُلم ءُ انساپی ءِ ھلاپ ءَ ھاموش نہ بَہ اِیں بلکیں پیسر ءَ چہ گیش بلوچ راج ءَ یکجاہ ءُ مُچّ کن ایں ءُ مردمانی زور ءِ وسیلہ ءَ اے زالمیں رھبند ءِ ھلاپ ءَ جنگ کن ایں ءُ آئی ءَ بے سوب کن ایں ۔

پاکستانی پوج ءَ یک مردمے آوار جنگ ءَ پد ناشناسیں جاھے ءَ برتگ-

چہ کراچی ءَ ھالانی رِد ءَ پاکستانی پوج ءَ کلیری ءَ بیڑبرتگ نُھمی کلاس ءِ نودربر پانزدہ سالی ئیں شایان میر آوار جنگ ءَ پد وتی ھمراھی ءَ برتگ-

پوج ءِ دست ءَ دزگیری ءَ پد ورنا انگت دیم ءَ آرگ نہ بیتگ-

زانگ بہ بیت کہ کراچی ءَ گوستگیں روچ ءَ پاکستانی پوج ءَ دگہ یک ورنایے ءُ بی وائی سی ءِ باسک بالاچ بلوچ چہ ملیر ءَ آوار جنگ ءَ پد وتی ھمراھی ءَ برتگ کہ انگت بیگواہ ءَ اِنت-

کراچی ءَ بلوچیں دمگاں گوستگیں دو ماھاں چہ یکشل ءَ بیڑ ءُ آوار جنی درچ برجاہ ءَ اِنت-

بلوچستان ءِ دمگ کولواہ ءَ سلاہ بندیں مردماں پاکستانی پوج ءِ نیمگ ءَ پٹ کتگیں چاروگی کیمرہ نشانگ کتگ ءُ تباہ کتگ اَنت-

اِھوالکار رِد ءَ اُرشکاراں کیمرہ نشانگ کتگ اَنت، چریشی ءِ آسر ءَ بازیں کیمرھے سرجمی ءَ تباہ بیتگ اَنت-

تنی وھدے واکدار نیمگ ءَ اے وئیل ءِ ھچ وڑیں درشان دیم ءَ نیتکگ-

زانگ بہ بیت کہ بلوچستان ءِ جتاجتائیں دمگاں پوج نیمگ ءَ چہ پِٹ کنگ بیتگیں کیمرہ دانکہ مردمانی سُر ءُ پُراں چار اِنت بہ کن اَنت – بلے اے وھد ءَ بازیں کیمرھانی سر ءَ اُرش کنگ بیتگ اَنت-

بلوچستان ءِ دمگ کیچ ءِ ھند بلیدہ ءَ ریاستی پلامرزی سلاہ بندیں ٹولی کہ آ ” ڈیتھ اسکواڈ ” نام ءَ چہ زانگ بنت، ءُ بلوچ سرمچارانی میان ءَ میڑ بیتگ دو سرمچارانی بیرانی ءِ ھال اِنت-

وئیل چارشمے ءِ بیگاہ ءَ بلیدہ ءِ دمگ گردانک بلو کوئی گز ءَ بیتگ، اود ءَ دوئیں نیمگاں تُرندیں تیرگواری رِد برجاہ بیتگ-

دمگی اِھوالکار رِد ءَ میڑ میان ءَ دو بلوچ سرمچار جنگ بیتگ اَنت کہ آیانی پجّار فقیر بلوچ ء غلام رسول جھمنند گردانک ءُ جابر جھمنند زیردان نام ءَ چہ بیتگ اَنت-

اِھوالکار گوشگ اِنت کہ میڑ ءَ دو “ڈیتھ اسکواڈ ” کارندھاں ھم جانی تاوان چست کنگ کپتگ، بلے اے درگت ءَ تنی وھدے سرکاری نیمگ ءَ ھچ وڑیں درشان شنگ کنگ نہ بیتگ-

بلوچستان ءَ ” ڈیتھ اسکواڈ ” ھما سلاہ بندیں ٹولیانی واستا کارمرز بیت کہ آیانی سر ءَ بھتام ھست آ ریاستی چیردستی ءَ کار کن اَنت ءُ بلوچ آجوئی لوٹوکیں سلاہ بندیں گلانی لوٹوکیں مردماں نشانگ کنت-

تنی وھدے میڑ ءِ سرجمیں ھال دیم ءَ نیتکگ، ءُ نانکہ واکدار ءَ اے درگت ءَ درشان شنگ کتگ-

بلوچستان ءِ دمگ ھزدار نال ءَ ریاست ءِ جوڑ کتگیں کُشندہ ٹولی ءِ کارمنداں ھندی مردمے سک باز لٹ شاپ کُتگ – لٹ شاپ کنگ بوتگیں مرد ءِ پجار محمد عارف ء حاجی محمد صادق شاہ جھمنند حری نال ءِ نام ءَ چہ بوتگ –

دمگی اھوالکارانی رِد ءَ اے مرد ریاست ءِ کُشندہ ٹولی ءِ کارمند شاہ میر بزنجو ءِ کارمنداں جتگ، کہ اے مردم ریاست ءِ چیردستی ءَ ایمنی ءِ نام ءَ کار انت بلے دمگی مردمانی گوشگ انت اے مردم دمگی جیڑواں درکانودی دزمانجنی کنگ ءَ انت –

بازیں لٹ شاپی ءِ سوب ءَ مرد سک باز ٹپی بوتگ وھدیکہ دمگی مردماں اے کار ترندی ءَ گوں ایرجتگ –

نال حری ءِ جھمننداں ھمے الزام جتگ کہ اے ٹولی وت ءَ ایمنی ءِ منوگر گوش انت بلے راستی ءَ اے ٹولی لس مھلوک ءِ زاتی ءُ گسی جیڑواں دزمانجنی کنگ ءَ انت کہ ایوک ءَ درکانودی کار ءِ نہ انت بلکیں انسانی ھکانی لگتمالی یے –

دمگی مردماں کُشندہ ٹولی ءِ سروک چیلنج کتگ کہ اگاں راستی ءَ آ ایمنی ءِ منوگرے گڈا بائدیں وتی کاراں کانودی ءُ رھبندی بہ کنت اگاں ناں آئی ءِ اے گامگیج زلم ءُ زوراکی ءِ گوشگ بنت ءُ اشی ءِ بگیری ءَ راج توار چست کنت –

زانگ بہ بیت بلوچستان ءَ بازیں وھدے بیت کہ اے وڈیں مردم ءُ ٹولیاں ریاستی پوج کمک کنگ ءَ انت کہ بازیں ناشریاں دست ءِ مان انت، اے مردم کُشت ءُ کوش، آوارجنی، دُزی ءُ دگہ چاگردی سلکاریاں دست ءِ مان انت –

ریاست ءِ سروکی ءَ کار کنوکیں اے ٹولی ایوک ءَ ھندی مردمانی ھاتر ءَ ترسناک نہ انت بلکنہ آیانی ٹارگٹ بلوچ آجوئی لوٹوکیں کاراں دارگ ءُ آیاں نشانگ کنگ انت –

بلوچ سلاہ بندیں گلانی نیمگ ءَ اے ریاستی پلامرزیں ٹولی مدامی بیھار دیگ بوتگ انت ءُ ھستیں وھد ءَ اے ٹولیانی سرا اُرش ھم کنگ بوتگ – سلاہ بندیں گل اے ٹولی ریاستی ایجنڈے ءِ بھر گوشتگ انت ءُ اشانی بگیری ءَ کار کنگ ءِ جار جتگ –

چہ بی وائی سی ءِ نیمگ ءَ بلوچستان ءِ جتائیں شھراں زھرشانی ریلی یکشل ءَ برجاہ انت۔

چہ بلوچ یکجھتی کمیٹی ءِ نیمگ ءَ زورانسری بیگواھیانی ءُ گل ءِ رھدربرانی دزگیری ءِ ھلاپ ءَ زھرشانی ریلی کَشّگ بوتگ ءُ نوشکی پریس کلب ءِ دیم ءَ زھرشانی کنگ بیتگ، ریلی ءَ پاکستانی لشکرانی دستاں زورانسری بیگواھانی مردم ءُ بی وائی سی ءِ دزگیریں رھشونانی اکس کھولاں داشتگ ءُ جار پرّینتگ۔

ریلی ءِ بندات چہ پریس کلب ءِ دیم ءَ بگر داں جتائیں شھراں چہ گوزتگ انت ءُ واتر چہ پریس کلب ءِ دیم ءَ ھلاس کتگ۔

چہ زھرشانی ءَ بیگواھیں نسیب اللہ بلوچ، مزمل جمالدینی ءُ سمیع بلوچ ءِ گوھار درشان کُتگ ءُ گُشتگ کہ
بلوچستان ءَ زورانسری بیگواھی یکشل ءَ برجا انت ءُ چُشیں روچے نیست کہ بلوچ ورناھاں بیگواہ کنگ ءَ پد آیانی جون دور دیگ ءِ جاور دیم ءَ گندگ بوگ ءَ انت۔

کھولاں گُشتگ کہ بی وائی سی ءِ رھشوناں
انسانی ھکّانی ءِ پادمالی ءِ ھلاپ ءَ توار چست کنگ ءَ سزا دیگ بوگ ءَ انت ءُ آیاناں در کانودی داب ءَ زندان ءَ بندیگ کُتگ انت۔

آیاں بُھتام جَتگ ءُ گوشتگ کہ اِستان وت وتی کانون ءُ رھبندانی ھلاپ ورزی ءَ کنگ ءَ انت انچُش یک در انسانی در کانونی ءُ در راجکاری اَملے۔

زھرشان کنوکاں لوٹ کُرتگ کہ بیگواھیں مردماں زوت ءَ چہ زوت یل کنائینگ بہ بنت ءُ بی وائی سی ءِ رھشوناں یل دیگ بہ بنت، ھمے موہ ءِ سر ءَ زھرشان کنوکاں ھمے داب ءَ سرشان کُتگ ءُ گُشتگ کہ وتی دوستیگینانی یل کنائینگ ءُ انسانی ھکّانی پھازگ ءِ ھاتر ءَ جُھد ءُ جپا ءَ برجا داریں۔

چہ بلوچ یکجھتی کمیٹی ءِ نیمگ ءَ بلوچستان ءَ برجا زورانسری بیگواھانی، بلوچ چُکچینی ءُ گل ءِ دزگیر باسکانی یل کنائینگ ءِ ھاتر ءَ جتائیں شھراں زھرشانی ءُ ریلی کشگ بوگ ءَ انت۔

چہ بی وائی سی نیمگ ءَ چہ ایشی ءَ پیش مستونگ، شال، ھاران, ھب ءِ جتائیں شھراں ریلی کشگ بوتگ وھدے کہ اے زھرشانی بی وائی سی ءِ زھرشانی جُنز ءِ ھساب ءَ ٹھینگ بوتگ۔

بلوچستان ءِ دمگ بولان ءِ ھند ڈھاڈر ءَ لیویز تھانہ اُرش ءِ نشانگ کنگ بیتگ- ناشناسیں اُرشکاراں تھانہ ءِ ڈن ءَ ھینڈ گرنیڈے چگل داتگ ءُ بلے وئیل ءَ ھچ وڑیں جانی تاوان نہ بیتگ- لیویز ءَ راست کتگ تراک تھانہ ءِ بُنجاھی دروازگ ءِ نزیک ءَ بیتگ-

تراک ءَ پد لیویز کارندھاں پسھی کاروائی کتگ، چریشی ءِ میان ءَ اُرشکارانی گوم ءَ تیرگواری رد برجاہ بیتگ- بلے اُرشکاراں شپ ءِ وھد ءَ پائدگ چست کتگ ءُ جاہ پہ جاھی تچگ ءَ سوبمند بیتگ اَنت-

وئیل ءَ پد لیویز فورس ءَ دمگ انگیر ءَ کتگ ءُ شھر ءِ تھی ءُ ڈنی راھانی سر ءَ ناکہ بندی کنان ءَ اُرشکارانی پٹ ءُ پول بندت کتگ- ایس ایچ او لیویز ڈھاڈر رِد ءَ سیکیورٹی شیواری کتگ ءُ وئیل پٹ ءُ پول برجاہ ءَ اِنت-

پاکستانی رینجرز ٹوھیں کساسے ءَ گوستگیں شپ ءَ کراچی ءَ بلوچ ھندانی دمگ لیاری ءَ شُتگ ءُ لوگانی سر ءَ اُرش کنگ ءُ نندوکیں مردماں دزگیر کنگ ءِ جھدے کتگ۔

ھمے وھد ءَ زالبولاں ھوار دمگ ءِ مردماں گھگیری کتگ ءُ رینجرز چہ دمگ ءَ درکُتگ اَنت۔

ھمے وڑ شھریاں اے وئیل ءِ ھلاپ ءَ زھرشانی کنگ ءِ جھد کتگ گڑا رینجرز ءَ گیشیں کارندہ لوٹارینتگ ءُ دمگی مردمانی زھرشانی داشتگ-

شھریاں گوشتگ کہ ھر روچ پورسز دمگ ءَ کاینت ءُ ورنایاں دزگیر کن انت ءُ بیگواہ کن انت ءُ پد ءَ دروگیں کیس جوڑ کن انت کہ آ دزگیر کنگ بوتگ انت ءُ اے کار نی ھمک روچیگیں کار جوڑ بوگ ءَ انت۔

مزنیں کساسے ءَ فورسز ءِ کارندہ سول بس ءُ گاڑیانی تہ ءَ شھر ءَ سر بوتگ انت۔ دگ سرجمی ءَ بند کنگ بوتگ اَنت، دمگی مردمانی سر ءَ زوراکی کنگ بیتگ-

بلوچستان ءِ دمگ کیچ ءِ بنجاھی شھر تربت ءَ پاکستانی پوج ءِ کاروان سر بوتگ۔ کاروان ءِ تہ ءَ بازیں بس ھوار بوتگ اَنت ءُ سیکورٹی ءِ واستا گاڑی ھم ھوار بوتگ اَنت۔

کاروان ءِ آیگ ءِ وھد ءَ فورسز ءَ شگر ءِ جتا جتائیں راہ ءُ دَر سرجم ءَ بند کتگ اَنت ءُ دگابی سر ءَ دمگی مردمانی سر ءَ زوراکی ءُ گاڑیانی شیشگ ءِ پروشگ ءِ وئیلانی ھال دیم ءَ اتکگ اَنت۔

پاکستانی لشکر وتی کارندھانی برگ ءِ ھاترا بساں کارمرز کنت کہ آ تربت، نوشکی ءُ ھزدار ءَ اُرشانی آماچ بوتگ اَنت۔ گوستگیں روچ ءَ ھزدار زیرو پوائنٹ ءَ پاکستانی فوج ءِ یک بسے نشانگ جوڑ کنگ بوتگ ات۔

پاکستانی فوج ءِ جارکش ءَ ٹاپار داتگ کہ تراک ءَ اسکول ءِ بس نشانگ جوڑ کنگ بوتگ بلے اے گپ ءِ آزاتیں دراں اے گپ ءِ پدرائی نہ کتگ۔ تراک ءِ تہ ءَ نشانگ جوڑ بوتگیں بس ءُ بیران بوتگیں مردمانی کساس ءِ بابت ءَ مان گش اتگیں بیان دیم ءَ آیگ ءَ اَنت۔

سیاسی تکانی گشگ انت کہ بلوچستان ءَ پاکستانی فوج بے ایمنی ءِ سما کنگ ءَ انت ھمے سبب انت کہ گوستگیں روچ ءَ تربت ءَ لس مردمانی سر ءَ زوراکیانی وئیل دیم ءَ اتکگ انت۔