TBP Balochi

یزد ءَ بندیگ جاہ ءَ بلوچ ورنایے دِل ءَ گپتگ ءُ بیران بیتگ ، چھبار ءَ بلوچ ورنایے آوار جنگ ءَ پد کُشگ بیتگ۔

یزد ءَ ایرانی لشکر ءَ پرھاد ء ھُدارَھم ، پیشیگیں ھپتگ ءَ دزگیر کرتگ ءُ زندان ءَ بُرتگ ، یک ھپتگے ءَ بندیگ بوگ ءَ پد پرھاد دِل ءَ گپتگ ءُ نادراہ جاہ برگ ءَ پد بیران بیتگ ۔

اھوالانی رد ءَ پرھاد یزد ءِ دمگ ابر کوہ جھمنند گوشگ بوگ ءَ انت ءُ شھر ءَ وتی سنگت ءِ ھمراھی ءَ پرپٹ ءِ گون ءَ تر ءُ گرد ءَ بوتگ کہ لشکر ءَ پرپٹ دزی ءِ بھتام ءَ دزگیر کرتگ ۔

بیرانی ءَ پد پرھاد ءِ ماس زندان ءَ شتگ ءُ زھرشانی یے کُرتگ ءُ
پرھاد ءِ لاش پہ ھُژدری چار ٹپاس ءَ نادراہ جاہ ایر اِنت-

ھمے وڑ چھبار ءِ دمگ جنگارک ءَ بلوچ ورنایے آوار جنگ ءَ پَد کُشگ بیتگ-

چھبار ءِ دمگ جنگارک ءَ پَرندوشی پجار نہ بوتگیں سلاہ بندیں مردماں “ امان ء امام بَکش جنگارکی “ گاڑی گوماں ٹکر جنگ ءَ پد آوار جتگ ءُ گوں وت برتگ کہ دومی روچ ءَ آئی ءِ تیر سُپتگیں لاش دزکپتگ-

کوش ءِ سبب تنی وھدی زانگ نہ بیتگ –

زانگ بہ بیت روکپتی بلوچستان ءَ اے دابیں ویل ھمک وھد ءَ پیش آیگ ءَ انت ءُ ایشانی گر ءُ دار کنگ ءَ سرکار یکدم بے سوبی ءَ گندگ بیت انت-

بلوچستان ءِ جتاجتائیں دمگاں پاکستانی پوج ءُ آئی ءِ شریکداراں جانی تاوانانی دیمپانی کنگ کپگ ءَ اِنت –

ھمے وڑ مروچی ءَ مند ءَ بیتگیں اُرش زمہ واری بلوچ آجوئی لوٹوکیں گل بلوچ لبریشن آرمی ءَ منّ اِتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ مئے سرمچاراں مند ءَ زورگریں پاکستانی پوج ءِ کارندہ نشانگ کتگ ءُ جانی تاوان ءِ دیمپان کتگ اَنت – سرمچاراں شال، کلات ءُ مستونگ ءَ زورگریں پوج ءُ آئی ءِ کمکاری ءَ ھوار ٹرانسپورٹ شرکت ھم سے جتاجتائیں کاروائیاں نشانگ کتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں مرچی مند ءِ دمگ کوہ پشت گیاب ءَ زورگریں پاکستانی پوج ءِ دو کارندہ ھما وھد ءَ اُرش ءِ نشانگ کتگ ءُ کُشتگ انت وھدیکہ آ پرپٹ ءِ سر ءَ گشت کنگ ءَ بیتگ اَنت ۔ سرمچاراں زورگریں پاکستانی پوج ءِ دوئیں کارندہ سپاھی جمیل احمد ءُ عزیز اللّہ کُشتگ اَنت ءُ آیانی سلاہ دستیگ کتگ اَنت ۔

جارکش ءَ گوشتگ کہ بی ایل اے ءِ سرمچاراں گوستگیں شپ ءَ نیو سریاب تھانہ گوں دستی بمب اُرش ءَ نشانگ کتگ ، چہ اُرش ءِ آسر ءَ زورگریں پاکستانی پولیس ءَ جانی ءُ مالی تاوان رستگ۔

جارکش ءَ گوشتگ کہ سرمچاراں پانزدہ اگست ءَ کلات ءِ ھند منگچر ءِ دمگ چوٹانک ءَ زورگریں پاکستانی پوج ءِ پرپٹ ءُ گاڑیاں سواریں کاروان اُرش ءِ نشانگ کتگ اَنت چہ اُرش ءِ آسر ءَ زورگریں پاکستانی پوج ءَ تاوان رستگ۔

جارکش ءَ گوشتگ کہ بلوچ لبریشن آرمی ءِ سرمچاراں سیزدہ اگست ءَ مستونگ ءِ ھند مروکنڈ ءَ زورگریں پاکستانی پوج ءِ کمکاری ءَ ھواریں ٹرانسپورٹ شرکت ءِ کارگس سوتکگ ۔ اے ٹرانسپورٹ شرکت پہ زورگریں پاکستانی پوج ءَ راشن ءُ دگہ سامان سر کنگ ءَ گون بیتگ چہ اشی ءَ پیسر ھم اے شرکت ءِ واھنند ما کُڈن کتگ بیتگ ۔

جارکش ءَ گُڈی ءَ گوشتگ کہ بلوچ لبریشن آرمی اے اُرشانی زمہ واریاں منّ اِیت ۔

بلوچستان ءَ اَبید اسلام آباد ءُ کراچی ءَ بندیگیں بی وائی سی ءِ رھشون ءُ بیگواھیں مردمانی کھولانی زھرشانی نندانک یکشل ءَ برجاہ ءَ اَنت-

زانگ بہ بیت بلوچستان ءَ چُشیں روچے نہ اِنت کہ پاکستانی پوج ءُ چیریں ادارھانی نیمگ ءَ زوراکی کنگ نہ بیت ھمکروچ مردمانی آوار جنگ میتگاں بیڑبرگ ءُ میتگاں ساڑی کماش ءُ چُک زالبولانی کم شرپ کنگ ءُ لوگانی گرنبھائیں مڈیانی لُٹ ءُ پُل برجاہ اِنت اے ریاستی زوراکیانی ھلاپ ءَ بی وائی سی ءِ نیمگ ءَ وھد وھد ءِ سر ءَ زھرشانی نندانک ءُ روانک کشگ بیت بلے ریاست وتی چیر دیگ ھاتر ءَ بی وائی سی ءِ سروک جتاجتائیں وھداں گپتگ ءُ بندیگ کتگ اَنت پنچ ماہ ءَ گیش اِنت کہ یکو ریمانڈ پہ ریمانڈ دیگ بیگ ءَ اَنت دانکہ آیانی توار ءَ بے توار بہ کن ایں-

ھمے وڑ مروچی کیچ ءِ دمگ ناصرآباد ءِ جھمننداں پاکستانی پوج ءِ نیمگ ءَ چہ لوگانی سر ءَ بیڑ، مردمانی سر ءَ لَٹ ءُ کُٹ ءُ زورانسری آوار جنی ءِ ھلاپ ءَ نندانک داتگ-

گیشیں ھالانی رِد ءَ تربت ءِ دمگ ناصرآباد ءَ پاکستانی پوج ءَ بیڑبرتگ ءُ زورانسری آوار جنی ءِ ھلاپ ءَ دمگی مردماں زھرشانی نندانک، زالبول ءُ چُکانی مزنیں کچے ءَ زبیدہ جلال دگ سر ءَ نندانک داتگ ءُ بُنجاھی شھدگ بند کتگ چریشی ءِ سبب ءَ گاڑیانی روگ ءُ آیگ بند بیتگ-

دمگ مردمانی رِد ءَ گوستگیں شپ ءَ پوج ءَ ناصرآباد ءَ بازیں لوگانی سر ءَ بیڑبرتگ، اے میان ءَ پاکستانی پوج ءَ بازیں ورنایے آوار جتگ ءُ ناشناسیں جاھے ءَ برتگ اَنت-

زھرشانی کنوکانی گوشگ اِنت کہ دزگیریں ورنایانی کھولاں ھچ وڑیں ھال دیگ نہ بیتگ اَنت نانکہ آ دیم ءَ آرگ بیتگ اَنت-

زھرشانی ءَ ھوار زالبولاں بھتام جتگ کہ بیڑ ءِ وھد ءَ لوگاں تُرس ءُ بیم ودی کتگ، مردماں گوں بے ادبی کتگ ءُ کھول سسّائی ازیت داتگ ءُ لَٹ ءُ کُٹانی نشانگ کتگ اَنت-

زھرشانی کنوکاں جار جتگ کہ دانکہ دزگیریں مردم یل کنگ نہ بنت، زھرشانی نندانک برجاہ بیت-

اے میان ءَ زھرشانی کنوکانی دست ءَ پلے کارڈز بیتگ اَنت کہ آیانی سر ءَ بیگواھیں مردمانی یل کنائینگ ءُ بیڑانی درچ ءِ بند لوٹ نکش بیتگ اَنت-

ھمے وڑ اسلام آباد پریس کلب ءِ نزیک ءَ بلوچ یکجھتی کمیٹی ءِ سروکانی دزگیری ءُ چہ بلوچستان ءَ زورانسری آوار جنگ بیتگیں مردمانی یل کنائینگ ءِ لوٹ سر ءَ برجاھیں نندانک ءَ مروچی پنجاہ دو روچ سرجم بیتگ-

نندانک ءَ ھوار زھرشانی کنوکانی سیادی زورانسری آوار جنگ بیتگیں مردمانی کھول ءَ اِنت، آیانی تہ ءَ کماش زالبول مات ءُ چُک ھم ھوار اَنت-

کھول ءَ ھکومت ءَ چہ لوٹ کتگ کہ بلوچ یکجھتی کمیٹی ءِ دزگیریں سروک یل کنگ بہ بنت ءُ بلوچستان ءَ زورانسری آوار جنی ءِ دْرچ بند کنگ بہ بیت زورانسری بیگواھیں مردم دیم ءَ آرگ بہ بنت-

اسلام آباد نندانک ءِ درگت ءَ چہ بلوچ یکجھتی کمیٹی ءَ وتی درشان ءِ تہ ءَ گوشتگ کہ کس اس دو ماہ چہ اے کھول تُرندیں گرم، ھور، تُرسینگ ءُ یکشل ءَ نگرانی ءَ اَبید وتی ھکیں ءُ سادھیں لوٹانی ھمراھی ءَ نندانک ءَ نشتگ اَنت-

درشان ءِ تہ ءَ دیمتر ءَ گوشگ بیتگ کہ دراجکشیں زھرشانی ءَ اَبید پاکستانی واکدار بلوچ کھول ءِ پریس کلب ءَ تاں روگ بند کتگ ءُ آیاں نندانک واستا بُنجل ءِ موکل دیگ بیگ ءَ نہ اِنت ءُ زھرشانی کنوکاں زور ءُ بیھار ءِ دیمپانی اِنت بلے آیانی لوٹانی سر ءَ دلگوش گور کنگ نہ بیگ ءَ اِنت-

دومی نیمگ ءَ کراچی پریس کلب ءِ دیم ءَ ھم زورانسری آوار جنی ءِ نشانگ بیتگیں نودربر زاھد علی ءُ دگرانی یل کنائینگ ءِ ھاتر ءَ سی دومی روچ ءَ پُترتگ-

نندانک ءَ ھوار کھولانی رِد ءَ لھتے روچ ءَ ساری واکدار ءَ دلجمی داتگ کہ آیانی دوستناکانی درگت ءَ سرپدی دیگ بیت بلے تنی وھدے ھچ وڑیں گامگیج زیرگ نہ بیتگ-

اسلام آباد ءُ کراچی ءِ نندانکاں ھوار بلوچ کھولاں ھکومت ءُ پاکستانی رسانکدر ایر جتگ ءُ گوشتگ کہ آ بلوچستان ءَ برجاہ زوراکی سر ءَ بے توار اَنت ءُ دراجکشیں زھرشانی ءَ اَبید آیانی لوٹ دلگوش گور کنگ بیگ ءَ نہ اَنت کہ انسانی ءُ شھری ھکانی سنگین ءِ ھلاپ ورزی اِنت-

زھرشانی کنوکاں انسانی ھکانی ادارہ ءُ میان استمانی گلاں چہ دزبندی کتگ کہ آ بلوچستان ءَ برجاہ ریاستی زوراکی ءِ سر ءَ گامگیج بزور اَنت ءُ پاکستان سر ءَ زور بدے اَنت کہ آ زورانسری بیگواھیں مردمانی یل کنائینگ ءِ دلجمی بدے اَنت-

آزمانک : پاد ءَ انگت سُھب ءَ دو منٹ ھست

نبشتہ کار: سنگت نورک

دی بلوچستان پوسٹ

ھمے کہ منی سر ءَ آزمان بہ کپ اِیت یا چہ زمین جُمبے ءَ زمین بہ ترکّ اِیت ءُ من ترکّے ءَ کپگ ءَ بہ باں سرجمیں جان جھل ءَ ءُ تھنا یک دستے ماں ترکّے ءَ اڑوک بلکیں من وتی زِند ءِ گُڈّی سیمسراں بہ باں بلے ھمے دمان ءَ تو بیا ئے ءُ منی دست ءَ بہ گِر ئے ءُ من ءَ چِکّان بہ کن ئے ءُ وتی نوکتریں آزمانک “ پاد ءَ انگت سُھب ءَ دو منٹ ھست ” ءِ تہ ءَ دور بہ دے ئے ۔۔۔ ھو تو انچوش کُرت ۔ بلے نو من ( بزاں تئی آزمانک ءِ وساچیں کارست ) اے تھاری ءَ پہ تئی آزمانک ءَ چونیں کردے پیلو کرت بہ کناں ۔

تو ، زان ئے من ءَ بہ اشتیں کہ ھمے ترکانی میان ءَ وتی زند ءِ گُڈّی ساھت گوں ھاموشی ءَ بہ گوازینتیناں بلے پد ءَ جیڑاں تئی آزمانک ءِ دوئیں منٹ بے من بوت کنت ناسرجم بہ بان ءُ بھ سُھب مئیت ۔ چو وَ شر نہ اِنت گند ئے پہ دو منٹ ءَ تئی سُھب بہ اوشت اِیت ۔

نو۔۔۔تو بہ گُش پہ تئی آزمانک ءَ ھمے دوئیں منٹاں چتو بہ گوازیناں اگاں اے میان ءَ منی جند کسھے جوڑ بوت گڑا ؟

ھمے دمان ءَ جیڑ اِت گند ئے اگاں من ھمے دیوال ءِ دیم ءِ ٹنگ اتگیں بابو نوروز ءِ ھمے اکس کہ پاھو ءِ گُٹ ءَ اِنت ، ھمے اکس ءَ ایر بہ کنان ءُ بہ زوران ئِے ءُ وتی دپ ءَ سیاھیں پُچّے بہ بنداں پد ءَ۔۔۔ بابو ءِ اکس گوں دوئیں دستاں مُھر داشتگ ءُ دپ ءَ سیاھیں پُچے بستگ بی ایم سی شال ءِ مین گیٹ ءِ دپ ءَ نشتگاں بہ گند ئے درامدے بئیت من ءَ بابو ءِ کسھاں جُست بہ کنت ءُ دوئیں منٹاں بہ گوازین اِیت ۔ بلے دو منٹ ءَ پیسر اگاں پولیس والایے ءَ من ءَ بُرت گڑا پد ءَ تئی دوئیں منٹ ناسرجم بنت گڑا پد ءَ بلکیں تئی آزمانک ھوادگ ھوادگ بہ بیت ۔

من جیڑگ ءَ اتان ءُ پہ تئی آزمانک ءِ دوئیں منٹانی گوازینگ ءِ واستا وڑ وڑیں کسہ سازگ ءَ اتاں تا سما کرت ، من مستانی ءِ ریک ءِ سر ءَ نیم بار گپتگان ءُ ایر آں ، دوئیں منٹانی کانٹہ روان اِنت سِکن کم بوان اَنت ۔ منی کپّے زاھر اِنت ءُ کپّے بار گپتگ بلے زان ئے منی چپّیں نیمگ زاھر اِنت ءُ چپّیں دست ءِ پنجگ ءَ زَھمے بلے سُھر سُھر اِنت نہ زاناں زھم چہ بازیں ایر بوگ ءَ زنگاں گپتگ یا من ٹوھیں جنگے کُرتگ ءُ ھمے سُھری دُژمن ءِ ھون اَنت کہ انگت تازہ اَنت ۔

اے ساھت ءَ یک منٹے گوستگ ۔ منی چاریں آتراپ ءَ مردم جم بوتگ اَنت ، گوں یکے دومی ءَ ھلوت کنگ ءَ اَنت ۔ بہ گند ئے کُل ترسگ ءَ اَنت ، کس نزیک ءَ نئیت منی زھم ءَ چہ منی پنجگ ءَ نہ کش اِیت ءُ نہ زور اِیت بلے کم چہ کم یکے وَ بئیت منی زھم ءِ زنگاں یا ھوناں ھمیشاں وَ ساپ بہ کنت ۔ بلے! تو زان ئے ، من وت نہ زاناں اے منی آتراپ ءِ مردم ترسگ ءَ اَنت یا ھاموشی چارگ ءُ ودار ءَ اَنت کہ کدی دُژمن ءِ سر ءَ توپان ءُ ھیروپے بئیت ۔۔۔ بلے اے نہ زان اَنت کہ اگاں ایشاں منی سُھریں زَھم وتی چپّیں پنجگ ءَ جاگہ دات گڑا اے وت ھم پہ دژمن ءَ توپان ءُ ھیروپے بنت ۔

اے ساھت ءَ دو منٹ ءَ تھنا سِی سِکن بچ اتگ کُلیں مردم یک پہ یک ءَ چیرُکائی روگ ءَ اَنت کہ کس مارا پجا میار اِیت ۔ اگاں روژنائی بوت ما پجا آرگ بئیں گڑا بلّے توری ما ھاموش بہ بئیں واجہ کیت کُش اِیت یا بارت سانکلاں گوں تھاریں کوٹی یے ءَ دور دنت ۔۔۔ تُرس بلاھیں ھَوپے گِند ئے ۔

اے ساھت ءَ دوئیں منٹ سرجم اَنت ، رُوژنائی ءَ وتی پَرّ نوکی پَچ شانتگ اَنت ءُ من ھم مستانی ءِ ریک ءِ دلبند ءَ سرجم ءَ بار گپتگ ءُ واباں یا بہ گند ئے ھو۔۔۔ من پہ تئی آزمانک ءِ دوئیں منٹاں وساچیں کسھے جوڑ بوتگاں ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

ایمنسٹی انٹرنیشنل ءَ بلوچستان ءَ انٹرنیٹ ءِ بندش ءُ پابندی انسانی ھکانی سنگینین لگتمالی انت-

ایمنسٹی انٹرنیشنل ساؤتھ ایشیا ءَ 6 ستمبر ءَ بلوچستان ءَ موبائل انٹرنیٹ سروسز ءِ بند کنگ ءِ حکومت ءِ پیسلہ ءِ سر ءَ سکا پدردی درشان کتگ ءُ گْوشتگ کہ اے گامگیج نہ ایوک ءَ مردمانی ھک ءِ مالومداری ءُ لبز ءِ آجوئی ءِ سر ءَ اُرش اِنت بلکیں بلوچستان ءَ چہ دگنیا ءَ سندگ ءِ کوشستے۔

ایمنسٹی ءَ گشتگ کہ موبائل انٹرنیٹ بلوچستان ءِ مھلوک ءَ را رھوتی ءِ مستریں در انت ءُ ایشی ءَ یکشل ءَ بند کنگ بنکی ھکانی لگتمالی انت-

بیان ءِ تہ ءَ بلوچستان سرکار ءِ سر ءَ بھتام جنگ بوتگ کہ آ اے پندل ءَ پہ زھرشانی ءِ توار ءِ ایرموش کنگ ءُ راستیانی دیم ءَ چیر دیگ ءَ کارمرد کنگ ءَ اِنت ۔

ایمنسٹی ءَ لوٹ کرتگ کہ بلوچستان ءَ زوت انٹرنیٹ سروسز پچ کنگ بہ بیت ءُ شھریاں چہ آزادی ءِ لبز ءُ گشت ءُ آجوئی ءُ پرامنیں زھرشانی ءِ ھک ءَ چہ زبھر کنگ ءِ چکر ھلاس کنگ بہ بیت۔

زانگ بہ بیت گوستگیں ماہ ءِ اگست ءِ بندات ءَ چہ سرجمیں بلوچستان ءَ موبائل انٹرنیٹ سروس بند کنگ بوتگ انت وھدے کہ اے ماہ ءَ لھتے دمگانی تہ ءَ انٹرنیٹ ءِ پچ بوگ ءَ پد پد ءَ بند کنگ بوتگ۔

اُستانی سرکار ءَ بلوچستان ءَ انٹرنیٹ بند کنگ ءِ پرمان داتگ بلے بلوچستان ھائی کورٹ ءِ انٹرنیٹ ءِ پچکنگ ءِ پیسلہ ءَ ابید ھم استان ءِ گیشتریں دمگاں انگت ءَ انٹرنیٹ ءِ آسراتی ءَ چہ زبھر انت۔

دمگی مردماں شکایت کتگ کہ انٹرنیٹ بند بوھگ ءِ سبب ءَ نودربر سک باز وانگ ءُ زانگ ءِ جیڑھانی آماچ اَنت۔ آ نہ ایوک ءَ آن لائن کلاس، داخلہ فارم، اسکالرشپ ءِ درگواست ءُ وانگ ءُ زانگ ءِ ساماناں چہ زبھر انت بلکیں آ دگہ ھاسیں وانگ ءُ زانگ ءِ کارانی تہ ءَ ھم آڑانکانی آماچ انت۔

ھمے رنگ ءَ لس شھری آن لائن بینکنگ، روزگار ءِ درچ ، انفارمیشن درچ ءُ دگہ ھاسیں روچ ءِ کارانی پیلو کنگ ءَ ھم مشکلانی آماچ انت۔

سرکار ءَ انٹرنیٹ ءِ بند بوگ ءِ سوب بلوچستان ءِ ایمنی ءِ جاور لیک اِتگ، البت سیاسی، چاگردی ءُ انسانی ھکانی پڑاں چہ سرکار ءَ لوٹ کرتگ کہ انٹرنیٹ زوت پچ کنگ بہ کنت۔

روکپتی بلوچستان ءِ دمگ ایرندگان ، دشتیاری ءُ میرجاوہ ءَ تیرگواری ، شورھانی تراک ءُ دگ ویلاں شش مردم بیران بیتگ انت-

ھاش ءِ دمگ ایرندگان ءَ زی پجار نہ بوتگیں سلاہ بندیں مردماں تیرگواری کرتگ ءُ مردمے کشتگ ۔

بیران بیتگیں مردم ءِ پجار شریپ ء نُکود جھمنند ایرانشھر دامن ءِ نام ءَ زانگ بیتگ-

اھوالانی رد ءَ شریپ زی ھاش۔ایراندگان شھدگ ءَ پجار نہ بوتگیں سلاہ بندیں مردماں نشانگ کرتگ ءُ کشتگ کوش ءِ سوب زانگ نبیتگ-

ھمے وڑ دشتیاری ءِ دمگ دیول ءَ زی پجار نہ بوتگیں سلاہ بندیں مردماں تیرگواری کرتگ ءُ سابر جدگال نامیں مردمے کُشتگ – بنشون ءِ رد ءَ سابر لاش سُھبی شُوانگے ءَ دیستگ کہ آئی گاڑی ھم ویل جاہ ءَ کپتگ اَت ، سابر چھبار جھمنند انت ءُ وتی سنگتانی ھَمراھی ءَ پہ تر ءُ گرد ءَ دشتیاری ءَ شتگ ات کوش ءِ سوب زانگ نہ بیتگ-

ھمے وڑ میرجاوہ ءِ دمگ تھلاب ءَ کَلیں شوروانی تراک ءَ دو برات بیران بیتگ انت-

بنشون ءِ رد ءَ بیران بیتگیں مردمانی نام شکراللہ ءُ مھراللہ دو 15\16 سالگیں برات انت کہ گل مھمد چُک انت ءُ تھلاب جھمنند انت۔

اھولانی رد ءَ اے دوئیں براس سیمسر ءَ وتی ڈگارانی سر ءَ کار ءَ روگ ءَ بوتگ انت کہ شورھاں تراک کرتگ ءُ بیران بیتگ انت ۔

دمگی مردمانی رد ءَ سپاہ ءِ نیمگ ءَ شورو کل کنگ بیتگ انت ءُ چریشی ءَ اے زھگاں شورو لگت داتگ انت ءُ چریشی ءَ ھردوک بیران بیتگ انت-

دمگی مردمانی گوشگ انت کہ سَے سال ءِ تھ ءَ سپاہ ءِ چیر کرتگیں شورھانی تراک ءَ چہ 52 مردم ءَ گیش بیران بیتگ انت کہ اھانی تہ ءَ دمگی مردم زالبول شوانگ ءُ تیل کش ھوار انت ۔

میرجاوہ ءِ دمگ تھلاب شھدگ ءَ زی تیل کش ءُ سواری گاڑی ءِ نیام ءَ ڈک ورگ ءَ گاڑی اتکگ انت کہ چریشی ءَ دو مردم بیران بیتگ ۔

بیران بیتگیں تیل کش ڈریورے پجار ھلیل ء امیر مھمد میرجاوہ ءِ دمگ ریگ ملک جھمنند زانگ بیتگ ءُ
دومی بیران بیتگیں مردم ءِ پجار زانگ نہ بیتگ-

بلوچستان ءِ دمگ کیچ ءِ ھند مند ءَ ناشناسیں سلاہ بندیں مردمانی تیرگواری ءَ چہ فرنٹیئر کور ءِ دو کارندہ بیران بوتگ انت۔

سرکاری بنشون ءِ رد ءَ اے وئیل آدینگ ءِ روچ ءَ سھب ءَ مند ءِ کوہ پشت گیاب ءِ دمگ ءَ بوتگ کہ اود ءَ ایف سی ءِ کارندہ ھمک روچیگیں رنگ ءَ گشت ءَ بوتگ اَنت۔ سلاہ بندیں مردماں آھانی سر ءَ تیر گواری کتگ ءُ سپاہی جمیل احمد ءُ عزیز اللہ ھما جاہ ءَ بیران بوتگ اَنت۔

بنشون ءِ رد ءَ دوئیں کارندہ موٹر سائیکل ءِ سر ءَ سوار بوتگ انت کہ آ نشانگ جوڑ کنگ بوتگ انت۔ تیرگواری ءَ پد اُرش کنوکاں کارندھانی سلاہ ھم گوں وت برتگ ءُ پشت مانداتگ ءُ شتگ اَنت۔

پولیس اُرشجاہ ءَ سر بیتگ ءُ لاش اش چِست کتگ ءُ گون وت اش برتگ انت-

بلوچستان ءِ دمگ کیچ پاکستانی لشکر ءُ سلاہ بندانی میان ءَ جنگ ءُ چوپانی سبب ءَ نامانی جاھاں زانگ بیت انت ءُ ایشی ءَ پیش ھم ایف سی ءِ سر ءَ اُرش بیتگ انت-

گوستگ ءَ ھم کیچ ءِ جتا جتائیں دمگاں چیک پوسٹ، گشت ٹیم ءُ سرکاری کاروانانی سر ءَ اُرش بیتگ کہ ایشی ءِ تہ ءَ درجناں کارندہ بیران یا ٹپیگ بیتگ اَنت۔

داں انیگ ءَ مروچی بیتگیں اُرش ءِ زمہ واری انگت ءَ کس ءَ پہ وت ءَ نہ زرتگ-

بلوچستان ءَ یک ماھے ءَ سیکیورٹی ءِ بنیاد ءَ نیٹورک بند کنگ بیتگ انت بلے اے دابیں بندشاں ابید ھم اود ءَ اُرشانی گر ءُ داری نہ بیتگ انت ءُ ھمک روچ اُرشانی ھال دیم ءَ آیگ ءَ انت-

نمدی یے پہ زاھد جان ءَ

نبشتہ کار: ابرار بلوچ

دی بلوچستان پوسٹ

‏‎سلام ءُ دْروت منی ھمبل ھر کجا ئے وش ءُ سلامت بات ئے ‏‎

زاھو من زانت نہ کناں کہ تو زور آور ءِ زندان ءَ کجام جاورانی دیمپان ئے من بازیں روچے جیڑگ ءَ آں پہ ترا نمدی یے نبشتہ بکناں بلے نبشتہ کت نہ کُتگ۔ من وھدے نمدی ءِ نبشتہ کنگ بندات کتگ گڑا منی دستاں ھمراھداری یل کتگ گوں ھمے جیڑگ ءُ وس وساں مروچی یک ماھے ءَ پَد پہ ترا نمدی یے نبشتہ کنگ ءَ آں۔

‏‎منی ھمبل، انوں اے ساھت ءَ شپ ءِ 4 بج انت من پہ تو نمدی یے نبشتہ کنگ ءَ آں، من چوناھا بھِ نمدی نبشتہ نہ کتگ من نزاناں نمدی ءَ کجا چہ بندات کن اَنت ءُ کجا آسر بلے کام ناکام گوں تو ترانے کنگ ءِ جھد ءَ آں۔

زاھد جان ما زانین ءُ سرپدیں کہ تو یک انچیں تھاریں کوٹّی یے ءَ بَند ئے بِگند ئے ترا ھِچ سما نیست کہ ڈن ءَ جاور چون اَنت ءُ چے بوگ ءَ اِنت، ما ھم زانت نہ کنیں کہ تو ھزابانی کوٹی ءِ تہ ءَ تو چون ئے ءُ چے پیمیں ازیت ءَ چہ سگگ ءَ ئے، اے رستر انسانی کٹ ءَ چہ در کپتگ من بازیں جاھاں ٹارچر سیلانی کسہ ونتگ من جیڑاں اے گوں تو ھم انچو کن اَنت تو وتی اے لاگریں بالاد ءَ اِشانی لٹ ءُ کُٹاں باریں برداشت کت کن ئے یا ناں بلے زاھو چون کن ئے اِے ازیت ءُ جنجال تئی بھر ءَ کپتگ اَنت ترا برداشت کنگی اَنت۔زاھو زورانسری گار ءُ بیگواھی ءِ دِرچ روچ پہ روچ ودان اِنت ءُ ھمے زوراکی ءِ گیشی مئے مارشت ءُ سسؔاں ھم مدان مدان ءَ سرد ءُ بے جان ( normalise) کنان اِنت۔

ھمک روچ جتائیں ھندان ءَ چہ ورناہ برگ بوگ ءَ اَنت نوں زالبول ھم زورانسری آوار جنگ بوگ ءَ اَنت ‎”مئے میار بس بلوچ بُوگ اِنت” ما زانت ھم نہ کن ایں اِے گار ءُ بیگواھی ءِ کسّہ کدی ھلاس بیت نوں اَنچو سما بیت ھدا ھم زور آور ءِ ھمراہ اِنت بلے ھیر گوں ھدا ءَ گلگ کنگ نہ بیت ھدا ھم بگند ئے زور آور ءِ دیم ءَ بے وس اِنت-

‏‎زاھو ھما روچ ءَ زور آور ءَ ترا آوار جَتگ اَت من سرپد نہ اِتاں ترا اِیشاں برتگ” 17 تاریک شپ ءِ سھت 9 بج اَت، من سنگتانی ھمراھی ءَ نشتگ اِتاں سنگتے ءَ من ءَ کلوے دات ‎کہ تو اڑے کجا ئے گوں زاھد ءَ ھال مکن تو بیا منی کر ءَ زوت کن من زانت کہ ترا رستراں آوار جتگ من تچان تچان ءَ وت ءَ گوں گپ کنان اِتاں ترا جیڑگ ءَ اِتان ءُ وت ءَ گوں وڑیں وڑیں گپ کنگ ءَ اِتاں من نزانت کہ من آ سنگت ءِ گور ءَ چون سر بوتاں، من سنگت جُست کت۔

ھاں اڑے ھالاں بِدے چے بوتگ؟ سنگت ءَ گوں ملوری ءَ جواب دات، زاھد اِش برتگ ۔۔ چہ کجا؟ ‏‎نزاناں من ءَ انوں ھال رس اِت کہ برتگ اِش.کمو وھد ءَ رند ھال رس اِت ترا بیگاہ ءِ وھد ءَ رکشہ ءِ ھمراھی ءَ ھوار جتگ اش من ھیران بوتاں پد ءَ وت ءَ گوں گپ کنان اِتاں جیڑگ ءَ اتاں کہ ترا ایشاں کجا چہ برتگ ءُ چوں برتگ ھما روچ ءَ چہ زور آور ءَ ترا اَچ ما جُتا کُت مروچی ترا 44 روچ سرجم اِنت کہ تئی ھچ وڑیں اھوال نیست-

‏‎اِد ءَ ابید ء تئی ءَ ھِچ وش نہ اِنت ملوری ءُ ابیتکی اِنت ‏‎زاھو ترا ھال دیگ لوٹاں تئی بَرگ بوگ ءَ چہ رند تئی تمردیں کمّاش ءُ مات تئی آجوئی ءِ واستا کراچی پریس کلب ءِ دیم ءَ کیمپ اِش جَتگ ءُ نِشتگ اَنت مروچی 27 روچ اِنت ءُ تئی ماتی ھمک روچ گوں مُلوریں چماں تئی اکس ءَ چارگ ءَ اِنت۔ تئی گونڈلیں براس شاھد ھم کیمپ ءَ نشتگ ءُ تئی راھچار اِنت ۔ لھتیں روچ بیت کہ دگہ زورانسری آورجتگیں مردمانی کھول ھم پریس کلب ءِ دیم ءَ وتی ورنائی بچؔانی پد جنگ ءَ نشتگ ءُ زھرشانی کنگ ءَ اَنت۔

‏‎زاھو پہ ترا سک زھیر کنت منی ھر گور ءَ تو ئے تئی اکس اِنت تئی کَندگ ءُ مسکرا اَنت یک ماھے ءَ چہ گیش اِنت تئی توار منی گوشاں نہ کپتگ من ترا ھبر کنگ ءَ نہ دیستگ من وھدے کہ سنگتانی ھمراھی ءَ ھوٹل ءَ رواں من ءَ ھمے گمان بیت تو گوں من ھمگام ئے بلے پد ءَ سما کناں تو گوں من گون نہ ئے تھنا تئی ترانگ ءِ چاڑ اِنت کہ گوں من ھمراہ اِنت ۔ من ھردیں وپسگ ءَ باں منی چمؔانی دیم ءَ تئی دروشم زاھر اِنت ءُ تو کندگ ءَ ئے گون من مسکرائی کنگ ءَ ئے ۔

‏‎تو گوشتگ اَت زر وڑ کن اگست ءَ رَواں ھُزدار ءَ ملا چُٹک ءَ ءُ تو گوشتگ اَت ما ھما وھد ءَ رواں کہ شپ چاردہ بہ بیت، چوھانا ترا ماھیکانی سک دوست بیت ھرچ وھد ءَ ماہ چاردہ ءُ پانزدہ نزدیک بوتگ تو گُشتگ اڑے ترتیبے جوڑ کن شپ ءَ تیاب دپ ءَ رواں گوازیناں ءُ ما لھتیں وھد ءَ شُتگیں ھم شپ گوازینتگ من نزاناں ترا ماہ ءِ چاردہ ءِ شَپ پرچا دوست بیت من باز براں ترا جست ھم کُتگ بلے تئی جواب ھمے بوتگ بس من ءَ دوست بیت زاھو لھتیں روچ ءَ پد ماہ چاردہ بیت تو زوت واتر کن کہ تیاب دپ ءَ رواں ننداں دیوان کناں اگاں موہ رس اِت ھُزدار ءَ ھم رواں تو بس واتر بکن ۔

‏‎ما درست تئی وشبویں
‏‎مھرانی وداریگ-

‏‎تاریخ: 4 ستمبر 2025

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ زورانسری آوار جنی ءِ دْرچ ءِ برجاھی ءِ ھمراھی ءَ کراچی ءُ اسلام آباد ءَ بیگواھیں مردمانی کھول ءِ نندانک ھم برجاہ اَنت-

زانگ بہ بیت بلوچستان ءَ چُشیں روچے نہ اِنت کہ مردم بیگواہ کنگ نہ بیگ ءَ اِنت ھمکروچ زورانسری آوار جنی ءِ کیس دیم ءَ آیگ ءَ اَنت پاکستانی پوج ءُ آئی ایس آئی، سی ٹی ڈی ءُ دومی نیمگ ءَ پاکستانی پوج ءِ چیردستی ءَ کارکنوکیں ڈیتھ اسکواڈ ءِ ٹولی کارندہ مردماں آوار جنگ ءُ بیگواہ کنگ ءَ اَنت ءُ ھمے میان بازیں بیگواھیں مردمے ءِ تیرسُپتگیں لاش دزکپتگ اَنت-

ھالانی رِد ءَ بلوچستان ءِ دمگ ڈیرہ بگٹی ءَ کاؤنٹر ٹیررازم ڈپارنمنٹ ءُ چیریں ادارھانی کارندھاں علی حسن ء حاجی بگٹی ءُ کلیرو ء لیوی بگٹی آوار جنگ ءَ پد بیگواہ کتگ اَنت-

پاکستانی پوج ءَ آوار جنگ ءَ پد دوئیں مردم انگت دیم ءَ آرگ نہ بیتگ اَنت-

ھمے وڑ چہ کراچی ءِ دمگ ملیر کلا بورڈ صدیق ویلیج ءَ کاؤنٹر ٹیررازم ڈپارنمنٹ ءِ دست ءَ دزگیری ءَ پد زورانسری آوار جنی ءِ نشانگ بیتگیں صادق مروچی یل کنگ بیتگ-

زانگ بہ بیت صادق مراد گوستگیں ماہ ءَ بیست سے اگست ءَ زورانسری آوار جنی ءِ نشانگ کنگ بیتگ اَت ءُ کھول ءَ پریس کلب دیم زھرشانی کتگ ءُ آئی ءِ یل کنائینگ ءِ لوٹ کتگ اَت-

ھمے وڑ کراچی ءَ پریس کلب ءِ ڈن زورانسری بیگواھی ءِ ھلاپ ءَ جتگیں زھرشانی بُنجل سی یکمروچی ءَ پُترتگ، تُرندیں گرم ، ھکومت یکو دلجمی دیگ ءُ بے کساس دلسیاھی ءَ اَبید بیگواھیں مردمانی کھول وتی دوستانکانی یل کنائینگ ءِ لوٹ ءِ سر ءَ اوشتاتگ اَنت-

اے میان ءَ چہ ملیر ءَ زورانسری آوار جنی ءِ نشانگ بیتگیں صادق مراد ءِ یل بیگ ءُ لوگ ءَ واتری ءِ گپ زھرشانی بُنجل ءَ ھواریں کھولانی واستا یک ھدے ءَ چہ اُمیت ءِ سبب جوڑ بیتگ-

آئی ءِ یل بیگ بلوچ نودربر زاھد بلوچ ءِ پت عبدالحمید بلوچ ءِ وشی درشان کنان ءَ گوشتگ کہ صادق مراد ءِ یل بیگ مارا ھوسلہ دنت آ دگہ ورنا ھم بے میار اَنت یکروچے الّم واتر کاینت-

عبدالحمید بلوچ ءِ گوشگ اِنت کہ مئے سرجمیں بیگواھیں مردم بے میار اَنت ءُ آ بے سبب ءَ آزار جاھاں بندیگ کتگ اَنت-

آئی ءَ ھکومت ءُ ریاستی ادارھاں چہ لوٹ کتگ کہ سرجمیں بیگواھیں ورنایاں زوت یل کنگ آمیدگس ءَ پیش بہ کن اِت دانکہ آیانی سر ءَ جتگیں بھتام پدر بہ بنت-

زانگ بہ بیت کراچی ءِ جتاجتائیں دمگاں چہ بازیں بلوچ ورنایے زورانسری آوار جنی ءِ نشانگ کنگ بیتگ اَنت، آیانی تہ ءَ کلری لیاری، ماری پور ءُ لال بکھر ھاکس ءَ سیادی داروکیں زاھد بلوچ، شیراز بلوچ، سیلان بلوچ، سرفراز بلوچ، رمیز بلوچ، رحیم بخش بلوچ ءُ رحمان بلوچ ھوار اَنت-

ھمے وڑ چہ ملیر ءِ دمگ ءَ میر بالاچ بلوچ ھم بازیں ماھاں چہ بیگواہ ءَ اِنت-

دومی نیمگ ءَ اسلام آباد ءَ بلوچ بیگواھیں مردمانی کھول ءُ بلوچ یکجھتی کمیٹی ءِ دزگیریں سروکانی کھول ءِ نندانک مروچی پنجاہ یکمروچ ءَ پُترتگ-

اے درگت ءَ کھول ءُ بلوچ یکجھتی کمیٹی ءِ نیمگ ءَ چہ یک روانکے کشگ بیتگ، اود ءَ بیگواھیں مردمانی کھول، نودربر، سول سوسائیٹی ءِ باسک ءُ جتاجتائیں پڑ ءَ سیادی داروکیں مردماں بھر زرتگ-

تُرندیں ھور ءَ اَبید زالبول، کماش ءُ چُکاں ھوار زھرشانی کنوکاں اسلام آباد ءِ دگانی سر ءَ پُرایمنیں روانکے کش اِتگ-

زھرشانی کنوکانی دست ءَ پلے کارڈز بیتگ آیانی سر ءَ چہ بلوچستان ءَ دزگیریں سیاسی رھشونانی یل کنائینگ، سیاسی ایف آئی آر ءِ ھلاس کنگ ءُ زورانسری آوار جنی بیتگیں مردمانی یل کنائینگ لوٹ نکش بیتگ اَنت-

اے درگت ءَ بلوچ بیگواھیں مردمانی کھولاں تران کنان ءَ گوشتگ کہ ھپت ھپتگ ءَ چہ گش اِیت ما ھور ، روچ ، گرم ، بیھار ءُ تُرسینگ ءَ اوپار کنگ ءَ ایں وتی دوستناکانی یل کنائینگ ءِ ھاتر ءَ توار چست کنگ ءَ ایں بلے ریاستی ادارھاں مئے لوٹانی سر ءَ دلگوشی دیگ جاہ ءَ مارا نیشنل پریس کلب ءَ روگ ءَ نہ اشتگ-

آیاں گلہ کتگ اے میان ءَ آیاں پجّاری رویشگی دیمپانی، سُر ءُ پُرانی دارگ، ءُ زھرشانی ءَ ھواریں مردماں یکشل ءَ چارگ ءُ تُرسینگ ءَ اَنت-

نندانک ءَ ھوار بیگواھیں مردمانی کھولاں اسلام آباد ءِ سول سوسائٹی ءُ دگہ پڑ مردماں چہ دزبندی کتگ کہ آ اے جُھد ءَ مئے ھمراھداری بہ کن اَنت ءُ رسانکدر ءِ بے تواری ءُ ھمکرانی نہ دلگوشی ءِ ھلاپ ءَ توار چست بہ کن اِت دانکہ آیانی دراجکشیں زھرشانی بے مانا بہ بیت-

روکپتی بلوچستان ءِ بنجاھی شھر زاھدان ءَ ھوار شیراز، تربت، ھیدریہ ءُ ایرانشھر ءَ پنچ مردم آوار جنگ ، دہ سال ءَ چہ گیش بندیگیں دو مردم یل بیتگ انت-

گوستگیں یک شمبے ءِ روچ ءَ زاھدان ءِ میتگ شیر آباد ءِ باکری کوچگ ءَ ایرانی لشکر ءِ چیریں ادارھانی کارمنداں بلوچ ورنایے آوار جتگ ، ھالانی رد ءَ ایرانی چیریں ادارھانی کارمنداں ابید کانونی ھُکم یا آئی ءِ میارداری ءِ پدر کنگ ءَ ، گوں زھر ءُ زوراکی ءَ آوار جتگ ءُ گوں وت برتگ۔

آوار جنگ بیتگیں مردم ءِ پجار زانگ نہ بیتگ-

ھمے وڑ شیراز ءَ چہ دیم پہ چھبار ءَ روکیں یک مردمے بیگواہ کنگ بیتگ-

آوار جنگ بیتگیں مردم ءِ پجار فاروق ء باسط پرھانی ءِ نام ءَ زانگ بیتگ –

کھول ءِ گوشگ انت فاروق نُھ روچ انت کہ گار انت ءُ آئی ءِ بارو ءَ تنی وھدی ھچ اھوال دیم ءَ نیتکگ انت-

ھمے وڑ تربت ھیدریہ ءِ دمگ کَواپ ءَ ایرانی لشکر ءِ چیریں ادارھاں مردمے لوٹارینگ ءَ پد آوار جتگ ءُ تربت ھیدریہ ءِ زندان ءَ بندیگ کرتگ۔

آوار جنگ بوتگیں مردم ءِ پجار اسامہ پرکانی مولوی زیاالھَک ءِ نام ءَ زانگ بیتگ-

ھالکارانی رد ءَ کواپ ءِ ایمنی ٹولی پولیس آں دو ھپتگ پیش آئی ءِ لوٹ کرتگ بلے اسامہ آ وھداں پولیس ءِ گور ءَ نہ شتگ ءُ دو ھپتگ ءَ پد گوں وتی وکیل ءَ ھوار کورٹ ءَ شتگ ، کورٹ ءَ آئی ءِ سر ءَ ایرانی حکومت ءِ ھلاپ ءَ ناشریں تنزیمانی سپورٹ کنگ الزام جتگ ءُ زندان ءَ روان داتگ۔ گوشگ بوگ ءَ انت اسامہ اِزمکارے بوتگ ءُ آئی ءَ رسانکدر ءَ تامر جوڑ کرتگ-

زاھدان زندان ءَ دَہ سالاں بندیگیں دو مردم یل کنگ بیتگ انت-

زاھدان زندان ءَ یل بیتگیں مردمانی پجار ملا امان اللہ ءُ ملا ابدالرھیم ءِ ناماں زانگ بیتگ انت ءُ ھردوک دہ سال بند بوگ ءَ پد گوں دہ میلیارد زر زِمہ ایر کنگ ءَ پد یل کنگ بوتگ انت ۔

اشانی کھولاں ایرانی کورٹ ءُ ججانی گور ءَ مدام آھانی آجوئی لوٹ کرتگ بلے ایرانی ریاست ءِ نیمگ ءَ چہ آھاں پسہ دیگ نہ بوتگ ۔ دوئیں ملا سرباز ءِ دمگ کوہ ون ءَ ایرانی لشکر ءِ چیریں ادارھاں دہ سال پیسرا آوار جتگ انت ءُ اھانی سر ءَ ناشرکاریں گلانی گوماں ھوار بوگ ءِ الزام جتگ بیتگ کہ سرجم ایرانی رسانکدر ءَ اے ھال شنگ کنگ بوتگ ات ۔ چریشی ءَ پد ھردوک بیگواہ بیتگ انت چیریں ادارھاں آھانی نام ھچ جاگہ نگپتگ ءُ آھانی کھولاناں ملاکات کنگ ءِ موکل ھم دیگ نہ بوتگ اھانی لوگ ءِ مردماں 5 سال پیسر ءَ 5 میلیارد تومان پہ اھانی آجوئی ءَ داتگ ات بلے ریاست ءَ پد ءَ آھانی سر ءَ کوش ءِ بھتام ، ملک ءَ چہ گیر کانونی ڈنا روگ بھتام ، ءُ دگہ لھتے بھتام جتگ ءُ پہ دوئینانی اجوئی ءَ 30 میلیارد تومان لوٹ کرتگ ات ، چیریں ادارھاں آں مدام چہ زندان ءَ در کتگ ءُ وتی ادارھاں برتگ انت ءُ لٹ ءُ کٹ کرتگ ءُ جست پرس کرتگ انت ، ریاست ءَ چار سال پیسر ءَ آھانی آجو کنگ ءِ واستا دو ایرانی ھکومت ءِ ھلاپ ءَ کار کنگ ءِ مردمے لوٹ کرتگ کہ آں بندیگہ ملائانی سیاد بوتگ انت ، آں دوئیں مردم ، ابداللہ پارسا، ابدالھی جلبی ” دوئیناں وت ءَ ریاست دستا داتگ بلے پد ءَ ھم امان الل ہءُ ابدالرھیم ریاست ءَ آجو نہ کرتگ انت ۔

ھمے وڑ گوستگیں آدینگ ءِ روچ ءَ ایرانشھر ءَ ایرانی لشکر ءَ یک مردمے آوار جتگ ءُ برتگ-

آوار جنگ بیتگیں مردم ءِ پجار موسیٰ ء عیسیٰ ءِ نام ءَ زانگ بیتگ کہ آ آھوران ءِ جھمنند گوشگ بوگ ءَ انت-