سیائیں شلوار
آزمانک: سادت ھسن منٹو | رجانک: داد بلوچ شاشانی
دی بلوچستان پوسٹ
دھلی ءَ چَہ آیگ ءَ ساری آئی انبالہ ءِ بُنجل ءَ اَت اود ءَ بازیں انگریز آئی گِراک اِت اَنت ھما انگریزانی نند ءُ نیاد ءَ چَہ دہ گالرد زانت ءُ در بُرت ۔ اے گالردان ءَ آئی ھر جاگہ کار مرز نہ کُت ۔ بلے آ دھلی ءَ اَتک گُڑا آئی کار ءُ روزگار شَر نہ اَت پمیشکا یک روچے آئی وتی ھمساھگ تمنچہ جان ءَ گْوشت ۔ ( دِس لیف…. ویری بیڈ۔ ) بزان اے زندمان باز ھراب اِنت ۔ اِد ءَ نان مَردُم ءَ نہ رست اِیت ۔
انبالہ ءِ بُنجل ءَ آئی کار ءُ روز گار باز شَریں گوں وڑے ءَ بوتگ اَت ۔ بُنجل ءِ انگریزاں شراب وارت آئی کِر ءَ آتک اَنت ۔ آئی سے چار ساھت ءَ ھشت دہ انگریز ءَ وش کُت ءُ بیست سی کلدار گپت ۔ اے انگریز آئی جند ءِ مُلک ءِ مَردُماں چَہ شَر اِت اَنت ۔ اے گپ ءَ ھچ شک نیست کہ آیاں انچیں زُبانے ءَ گپ کُت سلتانہ سرپد نہ بوت بلے آیانی زُبان ءَ سرپد نہ بُوَگ پہ سلتانہ سیت ءُ نَپ اَت ۔ اگاں آیاں گوں سلتانہ باز مِھر بُلوٹ اِتیں گُڑا سلتانہ گْوشتگ واجہ تئی گپ ءَ من سرپد نہ باں ۔ یا آیاں سلتانہ باز تنگ کُتیں گُڑا سلتانہ وتی زُبان ءَ زہ ءُ بد کُتگ انگریزان ءَ ۔ اگاں آیاں سلتانہ گوں ھیرانی ءَ بچار اِتیں گُڑا سُلتانہ گْوشتگ واجہ تو بلاھیں گنوکے ئے ، ھرامے ئے ۔ گوں مِھروانیں وڑے ءَ گْوشتگ ئِے آ سرپد بوت اَنت کہ زاناں شَریں گپے گْوشگ ءَ اِنت انگریزاں کند اِت ۔ کندگ ءِ وھد ءَ سلتانہ ءَ چو گنوک ءَ گندگ بوت اَنت ۔
بلے اِد ءَ دھلی ءَ ھما اِنت اَتکگ آئی کِر ءَ یک انگریزے نہ اَتکّگ سے ماہ سرجم بوتگ آ را ھندوستان ءِ اے میتگ ءَ اِد ءَ آئی اِش کُتگ کہ بلاھیں زر داریں واجہ نشتگ اَنت ۔ بلے شش مَردُم آئی کِر ءَ آتک اگاں من رد مہ باں ماھے آرا ھَژدہ ءُ نیم کلدار رس اِت بس پرچاکہ ھر کس ءَ سے کلدار ءَ چَہ گیش نہ دات ۔ سلتانہ ایشان چَہ پنچ مَردُم ءَ را وتی نھاد دہ کلدار گْوشت ۔ بلے ارمانیں گپ اِیش اِنت کہ ھر کس ءَ ھمے گوں من سے کلدار ءَ چَہ گیش یک ٹَکّایے نہ دے آں ۔ نہ زان آں کُجام نزوری اَت کہ ایشان ھر یکے ءَ سے کلدار ءَ دیم ءَ آرا دیّگ ءَ تیار نہ اَت اَنت ۔ وھدے کہ ششُمی گِراک اَتک آئی وت آرا گْوش بچار من سے کلدار یک وھدے ءِ گِراں ۔ اگاں دے گُڑا شَر نہ دے ئے گُڑا بُرو نوں وتی ءَ وت زان ئے ۔ ششُمی گِراک ءَ اے اِش کُت ھچ نہ گْوشت دومی کوٹی ءَ شُت وتی کوٹی در کنگ ءَ بندات بوت ۔ گُڑا سلتانہ گو بیا یک کلدارے شِیر بیت آئی یک کلدارے نہ دات وتی کیتّو ءَ چَہ دست کَش اِت یک ٹکّایے در کُت سلتانہ انچو چپ جَت زُرت ۔ گْوشت ئِے دُژمن ءِ گُڈ اِنت دگہ۔
ھَژدہ ءُ نیم کلدار ماھے رسِ اِت ۔۔۔۔ بیست کلدار ماھے کوٹی ءِ باڑ ءَ اَت۔۔۔ آ کوٹی ءَ را کوٹی مالک ءَ انگریزی زُبان ءَ ( فلیٹ )گْوش ۔ اے تَبکّ ( فلیٹ ) ءَ انچیں پوئی( پاخانہ ) اِت کہ زمّزیلانی دارگ ءَ آپ ءِ زُور ءَ گوں سرجمیں گَٹر زمین ءَ جَھل ءَ شُت اَنت گار بوت اَنت بلاھیں توارے چِست بوتگ اَت بندات ءَ اے توار ءَ سک تُرس اِت سلتانہ اَولی روچ ءَ آ اے پوہ ءَ شُت آئی سِرین ءَ سک درد بوت ھالی (فارغ) بوت گُڑا پاد آیگ ءِ وھد ءَ ھمے زمزیلّ ءَ وت ءَ داشت ءُ چِست بوت آئی ھیال ءَ اَتک اے گِس پہ مئے وڑیں مردُمانی ھاتر ءَ اَڈ کنگ بوتگ ، اے زمزِیل پمیشکا اَڈ کنگ بوتگ اَنت کہ پاد آیگ ءَ مَردُم تنگ مہ بیت۔ بلے اے وڈ نہ اَت آئی زمزِیل ءَ دست دَور دات کہ پاد بیا آں بُرز ءَ گَڈ گَڈ بندات بوت ءُ آپ ءِ توار بندات بوت آپ در روَگ ءَ بوت آ بے ھیال بوت بلاھیں کوکار ئِے کُت ۔
ھُدا بکش دومی کوٹی ءَ وتی اکس کَشیں ازبابانی (فوٹو گرافی ) نز آرگ ءَ اَت یک ڈبی یے تہ ءَ ( ھائیڈرو کونین ) مان کنگ ءَ اَت کہ ھُدابکش سلتانہ ءِ توار اِش کُت یک دم ڈن ءَ در اَتک سلتانہ ءَ گْوشت ئِے چے بوت ؟ اے توار تئیگ اَت ؟
سلتانہ ءِ دل لَرزگ ءَ اَت ۔ گْوش ئے اے مُردگانی ءَ پوہ اِنت ؟ میان ءَ زمزیلّ پرچا در آتکگ چو ریلّ لاری ءِ وڈ ءَ منی سِرین ءَ درد کُتگ من لوٹ اِتگ کہ زمزیلّانی گوں مدت ءَ پاد کایاں انچیں توارے چِست بوتگ من ترا چے بُگْوش آں ۔
اے گپ ءَ گوں ھُدابکش ءَ سک کند اِت ءُ سلتانہ ءَ سرپد کُت ئِے اے نوکیں گوں دابے ءَ اَڈ کنگ بوتگ اَنت اے زمزیلّانی چَنڈینگ ءَ گوں سرجمیں گَسڑ زمین ءَ جَھل ءَ رَو اَنت ۔
ھُدابکش ءُ سلتانہ ءِ چون وت ماں وت پجاروک بوتگ اَنت اے وت یک کسھے بلاھیں۔ ھُدابکش راولپنڈی ءِ اَت دھمی چکاس ءَ سوبمند بوگ ءَ گوں لاری ھلائینگ ھیل کُتگ چوناھا آئی باز وھد راولپنڈی ءُ کشمیر ءِ میان ءَ لاری ھلائینتگ ۔ ھمے وھد ءَ ھُدابکش ءَ مِھر گوں جنکے ءَ بوتگ آ جنک ءَ را تچائینتگ لاھور ءَ آرتگ لاھور ءَ ھُدا بکش ءَ کار ءُ روزگار نہ رَس اِت پمیشکا ھُدابکش ھما جنک پہ کلدار ءِ ھاتر ءَ ردیں کار گیپت انچوش چیز وھد گْوست یک روچے جنک گوں دگہ یکے ءَ جِست ھُدابکش ءَ ھال سر بوت کہ جنک انبالہ ءَ اِنت ھُدابکش انبالہ ءَ پَہ ھما جنکے شوھاز ءَ شُت ۔ اود ءَ ھُدابکش ءَ سلتانہ دست کَپت سلتانہ ھُدابکش ءَ دوست داشت انچوش ایشانی دوستی بوت۔
گوں ھُدابکش ءِ آیگ ءَ سلتانہ کار ءَ گیشی اَتک ۔ پمیشکا سلتانہ سرپد بوت کہ ھُدابکش گوں دوستی ءَ باز سیت ءُ نپ ھست ۔ چَہ ھُدابکش ءِ آیگ ءَ انچوش سیت ءُ نَپ رَس اِتگ من ءَ ۔ پمیشکا ھُدابکش ءَ سلتانہ باز مِھر دات ۔
ھُدابکش باز جُھد کاریں مَردُمے اَت۔ ھُدابکش سرجمیں روچ ءَ ھُشکیں نندگ ءُ وھد گْوزینگ نہ لوٹ اِت ۔ ھُدابکش ءِ دوستی گوں یک اکس کَشّے ءَ بوت آ ریلّ ءِ بند جاگہ (ریلوے اسٹیشن ) نشت اکس کَشی کُت ۔ ھُدابکش اکس کَشّی ھیل کُت گوں ۔ ھُدابکش چَہ سلتانہ ءَ ھَپت کلدار گپت پَہ وت یک ( کیمرہے ) گَپت ۔ کم کم ءَ یک پردہ پوشے اَڈ کُت ءُ دو کرسی گَپت اکس شودوکیں ازباب گَپت اَنت ۔ ھُدابکش وت کار بندات کُت۔
کار شَر بوت گُڑا ھُدابکش کمیں وَھد ءَ پد وتی بُنجل انبالہ ءِ بُنجل ءَ کُت۔ اِد ءَ آئی انگریزانی اکس کَش اِت اَنت ۔ یک ماھے تہ ءَ آئی گوں بازیں مردُماں پجاروکی بوت انچو آئی سلتانہ ءَ گوں وتی کِر ءَ بُرت اود ءَ ھُدابکش ءِ برکت ءَ بازیں انگریز سلتانہ گِراک بوت اَنت ۔ گُڑا سلتانہ کلدار دو ھمینچُک زیادہ بوت اَنت ۔
سلتانہ ءَ گوشانی واستا کُنّل گِپت پنچ ءُ نیم تول ءَ منگلیک اَڈ کنائینت ۔ دہ پازدہ شَریں شوکین گُد یک جاہ کُت گِس ءَ پَہ چیر گیج ۔۔ دگہ دگہ بازیں انچیں ازباب۔ کسہ کسان کنگی اِنت ۔ انبالہ ءِ بُنجل ءَ آ باز وش ھال اَت ۔ ناگھان نہ زان آں پرچا ھُدابکش ءَ پَہ دھلی ءَ روگ ءَ اومان کُت ۔ سلتانہ ءَ چون نَہ کنت کہ ھُدابکش پَہ سلتانہ یک بلاھیں اُمیتے ۔ سلتانہ پَہ گَل ءُ شات دھلی ءَ روگ ءَ ساڈی بوت پد ءَ سلتانہ ھمے ھیال کُت انچو بلاھیں بازارے اود ءَ شَر شَر زر والا مَردُم نشتگ اَنت ۔ منی کار بلکیں انگت شَر تر بوت وتی دزگُھارانی کِر ءَ سلتانہ دھلی ءِ توسیپ باز اِش کُتگ اَت پد ءَ اود ءَ ھزرت نزام الدین اولیا ءِ درگاہ اَت ۔ پد ءَ آرا سک سِتک ءُ باور اَت درگاہ ءِ سر ءَ ۔۔ گُڑا سلتانہ ءَ وتی گِس ءِ ازباب بھا کُت اَنت گوں ھُدابکش دھلی ءَ اَتک دھلی ءَ سر بوت اَنت پَہ بیست کلدار ءَ باڑاہ ءِ سر ءَ ھُدابکش یک تَبکے ( فلیٹ ) ءِ زُرت ھر دوئیں ھمے یکیں تَبک ءَ بوت اَنت ۔
یک رنگیں نوکیں ماڈی دگہ کش ءَ کتار اَت اَنت (میونسپل کمیٹی) ءَ میتگ ءِ اے کَپ تھنا پَہ کسبیانی( رنڈی ) ھاتر ءَ اَڈ کُتگ اَت آنت ۔دانکے دگہ جاگہ بُنجل مَہ کن اَنت ۔۔ جھل ءَ دُکّان اَت اَنت بُرز ءَ باڑ ءَ والا گِس اَت اَنت سرجمیں ماڈی یکیں داب ءَ اَت ۔ بندات ءَ پمیشکا پَہ سلتانہ ءَ یک بلاھیں جیڑھے اَت وتی کوٹی ءِ در گیجگ ۔ پد ءَ جھل ءَ گُد شودوک ءَ وتی دُکّان ءِ دیم ءَ نشانے درتک ( بورڈ ) گُڑا یک شَریں نشانے رَس اِیت۔ اود ءَ نبشتگ اَت ۔۔ اِد ءَ لیگاریں گُد شودگ بنت۔۔۔
گُڑا ھمے نشان ءِ وانگ ءَ پد آئی وتی تَبکّ شوھاز کُت ءُ درگپت۔
انچو آئی دگہ بازیں ٹک ءُ نشان یات کُتگ اَت درور ۔۔ زنڈیں گال گوں نبشتہ کُتگ اِشکرانی دُکان ءِ دیم ءَ یا آئی دزگُھار ھیر ءَ بالی نشتگ اَت کدی کدی ریڈُو گوش داشت ۔ اود ءَ ش رپا ورگ ءِ بلاھیں جاگہ نبشتگ اَت ۔ دگہ آئی دومی دزگھار مکتار نشتگ اَت گُدانی کار جاگہ اَت بُرز ءَ انوری نشتگ اَت اے کار جاگہ ءِ سیٹ ءِ پوریاگِر اَت۔ انچو سیٹ ءَ را شپ ءَ اے کار جاگہ ءِ نگھبانی کنگی اَت پمیشکا سیٹ انوری نزدینگ ءَ نشتگ اَت ۔
دُکان پچ کُت گِراک کمیں آتکّگ چوناھا یک ماھے ءَ سلتانہ بے روزگار اَنت ھمے ھیال کُت وت ءَ وت سِکین داتگ کہ دیم ءَ بلکیں شَر بیت انچو دومی ماہ گْوست بلے کسے سلتانہ ءِ کوٹی ءَ سرے نہ جَت۔ گُڑا سلتانہ ءَ سک درد بوت ۔ سلتانہ ءَ ھُدابکش ءَ گْوشت چے گپے ھُدابکش۔۔۔ سرجمیں دو ماہ مرچی سرجم بوتگ مارا اد ءَ آیگ ءَ بلے کسے مارا جُستے نہ کنت ۔ من منّ آں مرچی باندا بازار سک باز نزور اِنت ۔ بلے انچو نزور نہ اِنت کہ ماھانی ماہ کسے پَہ چارگ ءَ مئیت ۔۔۔ ھُدابکش ءَ اے گپ دیر اِنت درد بوتگ اَت بلے چُپ بوتگ مرچی سلتانہ ءَ وت گپ بندات کُت ۔ من ءَ چنچو روچ اِنت ھمے جیڑگ ءَ آں ھمے گپ منی مجگ ءَ نہ نند ایت کہ جنگ ءِ سَبَب ءَ مَردُم تَتکَگ اَنت کاراں گُلائیش اَنت اے کار ءِ راہ بے ھال کُت ۔
یا اے ھم بوت کنت کہ۔۔۔۔
انچوش سما بوت کہ ھُدابکش اے گپ ءِ سر ءَ انگت گپ کنگ لوٹ اِیت۔ بلے چَہ پدانکاں یکّے ءِ پادانی توار بوت ۔ ھُدابکش ءُ سلتانہ ھر دو ھمے توار ءِ نیمگ ءَ ھیال داری کُت کمُکے رند ءَ در ءَ توار کُت ھُدابکش پَہ ھَبک ءَ در پچ کُت یک مَردُمے در ءَ پُترت اے اُولی گِراک اَت ایشی ءَ سے کلدار ءَ ٹھینت ۔۔ چَہ ایشی ءَ پد دگہ پنچ اَتک ۔۔ چَہ اِیشان سلتانہ ھَژدہ ءُ نیم کلدار گِپت ۔
بیست کلدار ماھے تبکّے ( فلیٹ ) باڑ ءَ اَت ۔ آپ ءِ زر لین ءِ زر انگت جُدا اَت اَنت پد ءَ گِس ءِ ورگ چَرگ گُد ءُ پُچ گَسی رزان نادْراھی ھَکیم دارو درمان دگہ دگہ۔ یک ماھے گِس ءَ ھَژدہ ءُ نیم کلدار اَتک بس ۔۔ سلتانہ سک پریشان اَت اے گپ ءَ ۔ پنچ ءُ نیم تولا ھَشت منگلیک آئی کہ انبالہ ءَ اَڈ کُتگ اَت ایشان چہ یکے ھست اَت بس نوں ھمے یکیں منگلیک بھا کنگی اَت ۔ سلتانہ ءَ ھُدابکش ءَ گوش منی گپ ءَ زُور اے یکیں منگلیک ءَ بھا کن ایں پد ءَ انبالہ ءَ رو ایں اِد ءَ چِہ دَر کَپگی اِنت۔ اود ءَ تئی کار ھم شَر بوتگ بر ایں ھمود ءَ رو ایں ھرچی کہ تاوان بوتگ ایشان وتی سر ءِ ھیرات منّ ایں اے منگلیک ءَ بھا کن بیا من دانکہ چیزاں بند آں مرچی شپ ءِ لاری ءَ اِد ءَ چَہ دَر کا ایں رو ایں۔۔۔ ھُدابکش چہ سلتانہ ءِ دست ءَ منگلیک گَپت پد ءَ گْوشت ئِے ۔ اِنّا دل ءِ بند انبالہ ءَ نہ رو ایں ھمد ءَ دھلی ءَ نند ایں کار شوھاز کن ایں ھمد ءَ تئی منگلیکاں پد ءَ اَڈ کنائین ایں ھُدا ءِ سر ءَ باور کن آ بلاھیں بادشاھے۔ ھمد ءَ آ یک نہ یک دَرے پچ کنت پَم ءَ۔۔ ۔
سلتانہ بے توار بوت۔ گُڈی منگلیک اَت چَہ دست ءَ شُت۔ وتی ھیالیگیں دست چار اِت ئِے سک دل رنج بوت بلے چے بکنت لاپ ورگی اِنت۔۔۔
وھدے کہ پنچ ماہ گْوست بلے گِس ءِ ھَرچ ءُ دَرچ چَہ کَٹّ کماہ ءَ چارِک گیش ات ۔
سلتانہ ءِ پریشان انگت گِیش بوت اَنت ۔ نوں ھُدابکش سرجمیں روچ ءَ بے سُدّ سما گِس ءَ وَپتگ اَت۔۔۔۔ ۔
سلتانہ اے گپ ءَ سک پدّرد بوت ۔ دومی ھمساھِگانی کِر ءَ ساری ءَ شُتگ وتی وھد گْوزینتگ نوں اود ءَ روگ بند کُت وتی ۔۔۔ھمساھگ سلتانہ کِر ءَ آتک اَنت نشت گپ ءُ دیوان کُتگ اَنت ۔ سلتانہ ءَ اے ایشان گوں نند ءُ نیاد دوست نہ بوت۔ بس سرجمیں روچ ءَ تھنا گِس ءَ نشتگ جیڑ اِتگ برے برے سوپاڈی ( چھالیہ ) چُپت برے وتی دِرتگیں گُدان ءَ اگّڈی دات ۔ کدی بالکنی ءَ آتک اُوشتاتگ جنگل ءَ را چار اِتگ دیم ءَ ریلّ ءِ پٹیانی نیمگ ءَ اود ءَ ھلائینتگیں انجنان ءَ بے پائدگ ءَ ساھتانی ساھت چار اِتگ ۔۔
دگہ دومی نیمگ ءَ مال امبار اَت اے دیم داں آدیم ءَ ازباب اِیر اَت اَنت راستیں دست ءَ بلاہ بلاھیں ڈیر گَپتگ اَت اَنت ھر رنگیں ازباب ءُ سامان اَت اَنت چپین دست ءَ ھیالی ئیں پٹ اِیت اود ءَ سک باز ریلّ ءِ دگ اَت اَنت۔ روچ ءِ بِرانزاں ریلّ ءِ آھین پَٹی ترْپگ ءَ اَت اَنت سلتانہ ءَ وتی دستان ءَ چارگ ءَ بوت دستانی رگ زرد زرد اَت اَنت چو ریلّ ءِ پَٹی ءَ دْرپشگ ءَ اَت اَنت اے وھد ءَ ھالیگیں پَٹ ءَ لاری ءُ انجنانی رو آیگ اَت ھِژو ھاژ اَت۔ کدی اے دیم ءَ کدی آ دیم ءَ بس لاریانی ٹرّ ءُ ٹپر اَت۔ سُھب ءِ سر ءَ پاد اَتک( بالکونی ) ءَ اَتک ھیران بوت۔ مُج ءُ گرد ءِ تہ ءَ انجنانی سر ءَ پاپے چِست اَت آسمان ءَ دَنز اَت مَردُمانی دپ ءَ پاپ در آیگ ءَ اِت ریلّ ءِ پٹیانی سر ءَ پیداک اَت چو جمبر ءَ چِست بُوان اَت اَنت ۔ ھَکل ءُ توار ۔۔ سارتیں گوات ءَ گوں ھور بوت اَنت آسمان ءَ گار بوت اَنت ۔ آر ءَ کدی کدی انچوش سما بوت کہ اے لاریان ءَ کسے ءَ دِکہ داتگ ءُ یل داتگ ۔
وت ءَ را ریلّ ءِ پَٹیانی سر ءَ روگ ءَ دیست ئِے انچو گُمان بوت من ءَ گوں کسے ءَ زندمان ءِ پَٹیانی سر ءَ دِکہ داتگ ءُ یل داتگ وت سر ءَ وت روگ ءَ آں ۔ آدگہ مردُم وڑے ناں وڑے ءَ روگ ءَ اَت اَنت …. نہ زان آں کُجا روگ ءَ اَنت بلے یک نہ یک روچے الم اُوشت اَنت انچیں جاگھے ءَ کہ اود ءَ پد ءَ دِکہ دیوک نہ بیت ۔۔
وت بے پائدگ ءَ ساھتانی ساھت ریلّ ءِ پَٹیانی سر ءَ روگ ءَ اَت آدیم ءُ آدیم ءَ چاران اَت ھیالانی زر ءَ گار اَت انجنانی نیمگ ءَ چارگ ءَ اَت پد ءَ وڑ وڑیں ھیال پیداک اَت۔ آ انبالہ بُنجل ءَ اَت آئی کوٹی اسٹیشن ءِ کِرّ ءَ اَت بلے اود ءَ آئی اے چیزان ءَ اے وڑ نہ مار اِت۔ نوں کدی کدی آئی مجگ ءُ ھیالاں اے ھم اَتک دیم ءَ ریلّ ءِ پَٹیّانی دام تالان اِنت یا جاگہ جاگہ پیداک ءُ نود دوت چَست بُوَگ ءَ اَت اَنت آرا یک بلاھیں ناچی ءُ سوتی بُنجل ءَ چو گندگ بوت اَنت۔ بازیں لاری اَت انت کہ آیان ءَ زنڈ ءُ بلاھیں انجن سَک اَت آنگر آنگُر دِکہ دیگ ءَ اَت اَنت۔ سلتانہ ءَ باز بَر ءَ اے انجن سیٹ ءِ وڑ گندگ بوت اَنت اود ءَ انبالہ ءَ کدی کدی سلتانہ ءِ کوٹی ءَ اَتکگ اَنت ۔ کدی کدی وھدے انچیں انجن لَھم لَھم ءَ کتاریں لاریانی کِر ءَ روگ ءَ بہ دیستیں آر ءَ انچوش سما بوت کہ مَردُمے ناچی سوتی بُنجل ءَ چَہ بُرز ءَ کوٹیانی نیمگ ءَ چارگ ءَ اِنت روگ ءَ اِنت ۔
سلتانہ انچوش سرپد بوت اے وڑیں ھیال آیگ پَہ مجگ ءَ ھراب اِنت پمیشکا سلتانہ ءَ بالکونی روگ یل دات ۔۔ ھُدابکش ءَ گْوشت ئِے منی پَہ کمو ارمان بکن من سرجمیں روچ ءَ اد ءَ چو نادراھانی وڑ ءَ کَپتگ آں تو گِس ءَ نہ نند ئے ۔ ھُدابکش مُدام سلتانہ ءَ گو منی جگر من رواں کارے شوھاز ءَ اگاں نوں مارا کار نہ بوت گُڑا بزاں کمیں روچ ءَ پد مارا گُژن کُش اِیت۔
پوریں پنچ ماہ گْوست بلے نہ سلتانہ ءَ گُژن ءَ کُشت نہ ھُدابکش ءَ ۔( محرّم) ءِ ماہ نزدینک اَت سلتانہ ءَ سیائیں گُدے دوچائینگ ءَ زر نیست اَنت ۔ مکتار زالبُولی( ہیملٹن) ءِ یک نوکیں کمیسے اَڈ کُتگ آستونکّ ءِ سیاھیں ( جارجٹ ) ءِ اَت اَنت پہ بْرھداری ءَ آئی کِر ءَ سیاھیں شلوارے گوں ھست اَت چو کنجل ءَ دْرپش دات ئِے انوری ءَ ریشُمی ( جارجٹ ) ءِ یک گِران بھائیں ( ساڑھی ) کہ جھل ءَ اسپیتیں بوسکی کوٹ پادا کُت کہ اے یک نوکیں دْروشمے اَت۔ گوں ساڑائیاں ھور انوری یک سیاھیں جُپتے شَریں بوٹ آرتگ اَت۔ سلتانہ ءَ ایشان ءَ دیست سک باز دردیگ بوت کہ من( محرّم ) ءَ چون بُرو آں کہ من ءَ ھچ نیست ۔۔۔ ۔
انوری ءُ مکتار ءِ کِر ءَ اے گُد دیست اَنت گُڑا وتی گِس ءَ اَتک سلتانہ ءِ دل ءَ آسے روک اَت گِس ءَ ھچ نیست اَت ھُدابکش ڈن ءَ شُتگ اَت۔ آ باز دیر ءَ داں دری ءِ سر ءَ سرجاہ ءِ سر ءَ وتی سر ایر کُت ءُ وَپت وھدے کہ باز سر ءِ بُرزی ءَ گوں آئی گردن ءَ درد بنا کُت گُڑا آ پاد اَتک ( بالکونی ) ءَ شُت دانکہ وتی ھیال ءَ چَہ درد ءُ گمان آجو بہ کنت۔۔۔۔
دیم ءَ پٹیانی سر ءَ لاریانی کتار اَت بلے انجن نیست اَت دانکہ شپ بوت ھر نیمگ ءَ تھاری ءَ وتی چادر مان پوش اِتگ اَت بازار ءَ چَہ مَردُم در اَتکگ اَت اَنت بے توار ءَ وتی گِساں روگ ءَ اَت اَنت ژند ءُ پَند اَت اَنت ۔۔ یک مَردُمے ءَ وتی سر چِست کُت سلتانہ ءَ را چار اِت ۔۔۔
سلتانہ ءَ کمو بچکند اِت ۔۔
دیم ءَ یک انجنے دراہ بوت سلتانہ گوں ھیرانی ءَ چارگ ءَ بوت کم کم ءَ ھمے گپ ءَ را بے ھیال کنگ لوٹ اِت سلتانہ ءَ پد ءَ دگہ نیمگ ءَ چارگ ءَ بوت ھما مردُم چم ءَ کَپت یک بیل لاری ءِ کِر ءَ اُشتاتگ اَت کہ سلتانہ ءَ ساری ءَ چار اِت ءُ کند اِت ئِے ۔ سلتانہ ءَ دست ءِ سر ءَ توار کُت آ مَردُم ءَ اے دیم ءُ آ دیم ءَ چار اِت ۔ دست ءِ سر ءَ جُست ئِے کُت کُجا چَہ بیا آں سلتانہ ءَ راہ گْوش آ مَردُم ءَ کم ءُ ودار کُت پد ءَ چَہ سنگانی سر ءَ اے دیم بوت اَتک۔۔
سلتانہ ءَ آرا دری ءِ سر ءَ نادینت گپ بندات کنگ ءں واستا جُست ئِے کُت تو بالا بُوَگ ءَ پَہ سک تُرس ءِ آماچ بوتگ ئِے چے ءَ اے گپ آئی اِش کُت ءُ بچکند اِت پد ءَ گْوشت ئِے تو چوں سرپد بوتگ ئے۔۔۔
سلتانہ ءَ پد ءَ جُست کُت ترسگ ءَ ئے چے ءَ۔۔۔
من ترا پمیشکا جُست کُت کہ تو داں دیر ءَ اود ءَ نشتگ ئے پد ءَ اَتکّگ ئے۔۔
آئی گپ اِش کُت پد ءَ بچکند اِت ئِے پد ءَ گْوشت ئِے تو کم ءُ رد ئے من تئی بُرز والا تبک ءِ چارگ ءَ بوتگ آں ۔
اود ءَ یک زالبولے اوشتوک بوتگ یک مردے نیمگ ءَ چارگ ءَ بوتگ من ءَ کم ءُ ندارہ دوست بوتگ پد ءَ بالکونی سبزیں چِراگ روگ بوتگ۔ سبزیں روشن من ءَ سک دوست بیت۔ چمانی واستا شَر اِنت۔ اے گْوشت ئِے آئی پد ءَ کوٹی کمو ندارہ کُت پد ءَ پاد اَتک۔۔۔
سلتانہ ءَ جُست کُت تو روگ ءَ ئے ۔ آئی گوش اِنّا من تئی کوٹی ءَ چارگ لوٹ آں بیا من ءَ پیش دار وتی کوٹی ءَ ۔۔۔
سلتانہ ءَ سے ئیں کوٹی پیش داشت اَنت آئی بے توار ءَ کوٹیاں چار اِت ۔ پد ءَ ھما کوٹی ءَ اَتک اَنت کہ ساری ءَ نشتگ اَت اَنت ۔
آئی گوں منی نام شنکر اِت۔۔۔
سلتانہ اَولی سر ءَ شنکر گوں ھیرانی ءَ چار اِت
شنکر باز بُرز ءُ باز پَٹکیں مردُمے نہ اَت بس درمیان بالاد ئِے باز وش رنگ ءُ باز بد رنگ نہ اَت ۔ بلے آئی چم ساپ ءُ پَلگار اَت اَنت کدی کدی آئی تہ ءَ یک جلواناکی یے دراہ بوت۔
باز تَمرد کنگ بوت ۔ گوشانی بُن ءَ مود ئِے اسپیت اَت اَنت ۔ ھاکی رنگیں بَزین شلوارے پاد ءَ اَت ئِے تَنکیں جامگے گْوراہ اَت کالر چَہ گردن ءَ بُرز اَت اَنت ۔
شنکر انچو نشتگ اَت دری ءِ سر ءَ کہ مردُم سرپد بوت شنکر گِراک نہ اِنت سلتانہ ءَ اِنت۔۔ سلتانہ ءَ کمو پریشان بوت اے وڑ نندگ ءَ ۔۔۔ گُڑا سلتانہ ءَ شنکر ءَ گو دگہ بُگْوش۔۔
شنکر نشتگ اَت اے گپ ئِے اِش کُت وَپت ءُ گْوشت ئِے من چے بُگْوش آں تو بُگْوش توار تو کُتگ من ءَ ۔
سلتانہ ھچ نہ گوشت۔ شنکر چِست بوت پد ءَ نشت۔ گْوشت ئِے گوش دار ۔ چو کہ تو سرپد بوتگ ئے رد ئے۔۔ من آ رنگیں مَردُمے نہ آں کہ زر دیاں رواں ۔ من ءَ چو تَبّیبانی وڑ ءَ زر دیگ لوٹ ایت تو من ءَ توار کُتگ من انچوش نہ رواں دانکہ ترا منی پیس دیگ کَپ اِیت ۔
سلتانہ ءَ اے اِش کُت ھَبکہ بوت بلے انگت کندگ ءَ بوت ۔
جُست ئِے کُت تو چے کار کن ئے۔۔۔
شنکر پَسّو دات ھما کار ءَ کہ شُما کن اِت
سلتانہ ءَ۔۔۔۔ من ۔۔۔۔ من۔۔۔ من ھچ نہ کن آں ۔
شنکر ۔۔ من ھم ھچ نہ کن آں۔۔۔۔
سلتانہ ءَ گوں ھَبکّی ءَ گْوشت۔۔۔ اے وڑ نہ بیت تو الم کارے ناں کارے کن ئے۔۔
شنکر۔۔۔ گوں دلجمی ءَ گوشت تو ھم کارے ناں کارے الم کن ئے
سلتانہ ۔۔۔۔ بے پائدگیں گپ کن ئے۔۔۔۔
شنکر۔۔۔ من بے پائدگیں گپ کن آں۔۔
سلتانہ ۔۔بیا دوئیں بے پائدگیں گپ کن ایں۔
شنکر۔۔ من ساڑی آں بلے بے پائدگیں گپ نہ کن آں۔
سلتانہ ۔۔ وتی ھوش ءَ بو اے ھیرات ءِ جاگھے نہ اِنت۔۔
من ھم گنوکے نہ آں ھو۔۔
سلتانہ ءَ ھمد ءَ بے توار بوت۔۔
شنکر۔۔ اے گنوک کَے بیتگ۔۔
او گنوک من ھم گنوکے نہ آں۔۔۔
بلے آ مَردُم ھُدابکش کہ تئی گوں یکجاہ اِنت آ الم گنوکے ۔۔
سلتانہ ۔۔۔ پرچا زاناں۔۔۔۔
شنکر۔۔۔ پمیشکا کہ آ چنچو روچ اِنت یک انچیں پکیرے کِر ءَ روگ ءَ اِنت وتی نسیب ءَ پچ کنگ لوٹ اِیت کہ آئی وتی نسیب چو زنگی ئیں کُبل ءَ بند اِنت۔ اے گپ گوشت شنکر سک کند اِت۔۔۔۔
اے گپ ءَ سلتانہ ءَ گوشت تو ھندوے ئے پمیشکا مئے بُزرگانی سر ءَ کند ئے ۔
شنکر ۔۔ بچکند اِت ۔ اد ءَ ھندو ءُ مُسلمانانی گپ نَہ اِنت بلا بلاھیں مُلا اد ءَ بیا اَنت آ ھم ھانوادہ بنت ۔۔۔
سلتانہ۔۔۔ زان ئے تو چونیں بے سر ءُ پادیں گپ کنگ ءَ ئے۔۔۔ بُگْوش نندئے۔
شنکر۔۔۔۔ ھمے گپ ءَ منّ ئے کہ من ساری ءَ گْوشتگ۔۔۔۔
سلتانہ ءَ پاد اَتک اُوشتات گْوشت ئِے بُرو تئی راہ پچ اِنت۔۔۔
شنکر مِیزّان ءَ پاد اَتک وتی شلوار ءِ دوئیں کیتّوانی تہ ءَ دست مان کُت اَنت ۔ گْوشت ئِے من کدی کدی اے میتگ ءَ کایاں اگاں ترا منی پَہ کار بوت گُڑا توار بہ کن ۔۔ من سک کار دیِوکیں مَردُمے آں۔۔
شنکر شُت سلتانہ ءَ سیاھیں گُدان ءَ بے ھال کُت دیر داں شنکر ءِ سر ءَ جیڑگ ءَ بوت ۔۔ اے مَرد ءِ گپاں۔ سلتانہ ءِ درد ءُ گم کم کُت اَنت ھیال کُت ئِے اگاں اے انبالہ ءَ بہ اَتکیں کہ اود ءَ باز وش ھال اَت سلتانہ ءَ۔۔ ایشی ءَ دگہ وڑے ءَ گوں چار اِتگ اَت ئِے ۔ اود ءَ بوتیں پک ءَ ایشی ءَ را گِرّان کُتگ ڈن ءَ در کُتگ اَت ئِے بلے اد ءَ سلتانہ ءَ وت سک بے وس اَت پمیشکا شنکر ءِ گپ دوست بوت اَنت۔۔۔۔
شپ بوت وھدے ھُدابکش اَتک سلتانہ جُست کُت تو سرجمیں روچ ءَ کُجا روئے گار ئے۔۔۔
ھُدابکش دَمبُرتگ اَت ژند ءُ پند اَت ۔گْوشت ئِے پیش ءِ جاگہ ءَ چَہ پیداک آں اود ءَ یک پکیرے چیزے روچ اِنت کہ اتَکگ ۔ ھمائی کِر ءَ رو آں وتی روچ ءَ تیلانک دیان آں۔۔
سلتانہ ۔۔ چیزے نہ چیزے ترا گْوشت ئِے آئی۔۔۔
ھُدابکش۔۔ اِنا انگت ھچ نہ گْوشتگ ئِے۔۔
پد ءَ من سلتانہ۔۔ آئی دست رومانی ءَ کنگ ءَ آں بلکیں بے بھر نہ بوت آں ۔۔ من ءَ دست
ھالی ءَ دیم نہ دَنت۔۔۔۔
سلتانہ ءِ مجگ ءُ ھیال ءَ مھرم ءِ آس روک اَت۔ گوں ھُدابکش گَلوتگیں توارے ءَ گْوشت ئِے تو سرجمیں روچ ءَ گار ئے من اَد ءَ چو جیلی ءَ بند آں نہ ڈن ءَ در کایاں ۔۔ مھرم سر ءَ آتک رَس اِتگ ۔۔ ترا ھچے سما نیست ۔۔ من ءَ سیاھیں گُد لوٹ اِیت گِس ءَ ھچ نیست منگلیک اَت اَنت یک یک ءَ بھا کُت اَنت نوں تو بُگْوش چے بیت….
تو پکیرانی رند ءَ داں کد کَپ ئے ۔ من انچوش سرپد باں کہ اِد ءَ دھلی ءَ ھُدا ھم مارا بے ھال کُتگ ۔۔ منی گپ ءَ گوش دار تو وتی کار ءَ بندات کن چیزے نہ چیزے بیت ۔۔
ھُدابکش دری ءِ سر ءَ وَپت گْوشت ئِے اے کار ءِ بندات کنگ ءَ ھم چیزے زر لوٹ اِیت ۔ ھُدا یا بچار اے وڑیں درد ناکیں گَپ ءَ مہ کن من سَگ اِت نہ کن آں ۔۔ من راستے کہ انبالہ یل کنگ ءُ اِد ءَ آیگ ءَ سک بلاھیں ردی یے کُتگ ۔۔ بلے ھرچی کنت ھُدا کنت پد ءَ مئے شَری ءِ واستا کنت ۔ چے سما اِنت کہ چیزے انگت اَزابی ھم سَگّگ لوٹ اِیت۔۔۔
سلتانہ ءَ گپ ءِ تَہ ءَ دَور دات گْوشت ئِے۔۔
تو ھُدایے ءَ نام ءَ چیزے نہ چیزے بکن ۔ چے کہ کن ئے دُزّی کن ئے مَردُماں پُلے چے کن ئے بکن ۔ بلے من ءَ سیاھیں شلوارے لوٹ اِیت۔۔ منی کِر ءَ یک اسپیتیں بوسکے ءِ کَمیسے ھست ایشی ءَ من سیاھیں رنگ دیان ئِے اسپیتیں گُشانے ھم ھست ھما اِنت کہ تو دیوالے ءَ آرت من ءَ دات اِیشی ءَ گوں کَمیس ءَ ھور رنگ کنائین آں یک شَلوارے لوٹ اِیت آ ترا الم آرگ لوٹ اِیت چون کہ کن ئے بکن بیار من ءَ بدئے …. منی مَرگ ءِ ورگاں ور اگاں تو نَہ گِپت نہ دات۔۔۔
ھُدابکش پاد اَتک نشت۔۔ نوں تو مُپت ءُ ناھکّ ءَ زیادھی کنگ ءَ ئے من کُجا چَہ بیار آں ترا بدیاں ۔
من ءَ تَریاک ءِ زر نیست۔۔
سلتانہ ۔۔ھر چون کن ئے بکن من ءَ چار ءُ نیم وال سیاھیں ساٹن بدئے۔۔
دوا بہ کن اِنشپی ھُدا دو سے مَردُم بیار اِیت۔۔۔
بلے تو ھچ نہ کن ئے تو کُتیں الم اِنکس زر وڑ کُتگ ۔
جنگ ءَ ساری ساٹن۔۔ دوازدہ ۔ چاردہ ٹکاہ ءَ گَز رَس اِیت۔۔ نوں پازدہ کم کلدار ءَ رَس اِیت گَز ءِ اساب ءَ چار ءُ نیم گَز ءِ چنچُک زر لوٹ اِیت اساب کن۔۔۔
نوں تو گْوش ئے من بلدلی کن آں۔ ھُدابکش انچو گْوشت وت پاد اَتک ۔ من رو آں ھوٹل ءَ ورگ گِر آں کار آں ۔ تو نوں اے گپاں بے ھال کن۔۔۔۔۔۔
ھوٹل ءَ چَہ ورگ آرت ھر دو نشت اَنت لاپ ءِ سِیر ءَ وارت ءُ وَپت اَنت۔
سُھب بوت ۔ ھُدابکش پد ءَ ھما پکیر ءِ کِر ءَ شُت۔
سلتانہ تھنا بوت ۔ کمیں وپَت کمیں تَچِک بوت ۔ اِد ءَ اود ءَ کوٹیانی تہ ءَ گَشت ۔ سُوارگ ءِ ورگ ءَ پد آئی وتی جامگ ءُ گُشان زُرت ءُ جھل ءَ گُد شودوک ءُ رنگ کنوک ءَ را دات اَنت کہ شود ءُ سیاھیں رنگ بکنت گُداں۔۔۔
پد ءَ آتک تامُرانی وانگی وانگ ءَ بنا بوت اے وانگیاں باز تامُر ءُ زیمرانی کسہ گپ مان اَت اَنت۔ وانگی وَنت اَنت ءُ واب کَپت۔۔
وھدے کہ آئی سما کُت چَہ واب ءَ ساھت چار بوتگ اَت روشن ءَ سر جھلگ کُتگ اَت۔ جان شُشت ءُ وت ءَ پلگار کُت ءُ بزین چادر وت ءَ ماں پوش کُت دیم پَہ بالکونی ءَ شُت اود ءَ انچوش یک ادارُکے اُشتات ءُ سیل ءُ ندارہ کُت ۔ نوں تھاری بوت کندیل روک بوت اَنت ۔ جھل ءَ دَگ ءِ سر ساپ اَت سردی کمو گیش بُوَان اَت ۔ بلے سلتانہ ءَ اے سما نہ بوَگ ءَ اَت۔ آ دَگ ءِ سر ءَ رؤکیں پادان ءُ پَرپٹانی چارگ ءَ گوں گُلائیش اَت داں دیر ءَ ۔۔۔ ناگھان آرا شنکر چم ءَ کَپت
گِس ءِ چیر ءَ اَتک سر ئِے چِست کُت ءُ سلتانہ ءِ نیمگ ءَ چار اِت ئِے کمو بچکند اِت ئِے۔۔سلتانہ بے سمائیں وڑی ءَ دست ءِ سر ءَ توار کُت بُرز ءَ بیا۔۔۔۔
وھدے شنکر بُرز ءَ اتک سلتانہ ءَ سک بلاھیں جیڑھے ءَ کَپت چے بُگْوش آں ایشی ءَ ۔
چوناھا سلتانہ بے جیڑگ ءَ مارگ ءَ توار کُت۔ شنکر باز گوں دلجمیں وڑے ءَ اَتک نشت انچوش وتی جند ءِ گِس اِنت دگہ۔ انچو ساری ءِ روچ ءِ وڑ ءَ سرجاہ زُرت ءُ سر ءِ چیر ءَ کُت تَچِک بوت۔ سلتانہ ءَ داں دیر ءَ ھچ نہ گوشت بے توار اَت۔۔
شنکر۔۔۔ وت گپ ءَ بندات کُت۔۔ گْوشت ئِے تو من ءَ سد بر ءَ توار کن ئے بیا پد ءَ سد بَر ءَ گْوش ئے بُرو چِدان چے …. من چُشیں گپ ءَ ھچ بر دلگران نہ باں ۔
سلتانہ ءَ شش ءُ پنچ تَہ ءَ بوت ۔ گْوشت ئِے اِنا نند ترا کَے گوشت بُرو ۔
شنکر کمو بچکند اِت گّوشت ئِے گُڑاں ترا منی ھما گپ کبول اَنت۔۔۔
کُجام گَپ ۔۔؟، سلتانہ ءَ کند اِت ءُ گْوشت ئِے زاناں تو من ءَ گوں سور کنگ ءَ ئے ۔۔
شنکر گوشت ۔۔۔سور آروس من گوں کس ءَ نہ کن آں وتی زند ءَ۔۔۔ناں کہ من منّ آں اے وڑیں دود ءُ رَبیدگاں ۔بل اے وڑیں گپ ءَ بل بے پائدگیں دگہ شَریں گپے بکن۔
سلتانہ۔۔گُڑا چے بکن آں۔
شنکر۔۔ تو زالبولی یے ئے انچیں گپ بکن کہ دو دل یک بِہ بیت۔ اے زندمان یکیں دُکانداری بس دُکانداری نہ اِنت دگہ باز ھم لوٹ اِیت ۔
سلتانہ ءَ وتی دل ءَ کبول کُتگ اَت شنکر ءَ۔۔ گْوشت ئِے ۔۔ تو بُگْوش تو چے لوٹ ئے من ءَ چے۔۔۔
شنکر پاد اَتک نشت ءُ گْوشت ئِے ھما کہ آ دگہ لوٹ اَنت ۔۔
تئی ءُ منی تَہ ءَ ھچ تپاوت نیست ۔۔۔ آھانی ءُ منی تَہ ءَ زمین ءُ آسمان ءِ تپاوت ھست ۔۔ انچیں بازیں گپ ھست کہ جُست نَہ لوٹ اَنت سرپد بُوگ لوٹ اِیت۔
سلتانہ ءَ داں دیر ءَ جیڑ اِت شنکر ءِ گپانی سر ءَ پد ءَ گْوشت ئِے من سرپد بوت آں ۔
تو بُگْوش چون بکن آں۔۔
تو باج بُرت من بے سوب بوت آں ۔ پد ءَ من ھم اے گْوش آں مرچی ئیں روچ ءَ داں کس ءَ اے وڑیں گپ نہ منّ اِتگ ۔
شنکر۔۔۔ تو رد ئے…. انچین چالاکیں زالبول ترا ھمے میتگ ءَ دست کَپ اِیت ۔ بلے باور نہ بیت کہ زالبول چُشیں واری منّ اِیت چو کہ تو بے ارزانی ءَ منّ ئے بلے آھانی باور نہ کنگ ءَ چَہ پد تو ھزارانی اساب ءَ ئے۔۔۔۔۔ تئی نام سلتانہ اِنت ناں ۔؟
ھو سلتانہ اِنت۔۔۔۔
شنکر پاد اَتک اوشتات کندگ ءَ بوت۔
منی نام شنکر اِنت۔۔۔۔
اے نام بے پائدگیں چیز اَنت۔ بر ایں توک ءَ رو ایں شنکر ءُ سلتانہ ءَ دری والا کوٹی ءَ پد ءَ اَتک اَنت۔سک کندگ ءَ اَت اَنت باریں چے گپے ءَ ۔وھدے شنکر روگ ءَ بوت ۔ گُڑا سلتانہ ءَ گو تو منی یک گپے منّ ئے۔۔۔ ؟
شنکر پسو دات اول گپ ءَ گْوش ۔
سلتانہ کمو اوشت ءِ آماچ بوت۔ تو لوٹ ئے کہ من بلکیں زر لوٹ آں ۔۔
شنکر۔۔۔۔۔۔ بُگْوش بے توار چے ءَ بوت ئے۔۔
سلتانہ ءَ گوں شَریں وڑے گْوشت ۔ گپ ایش اِنت کہ مھرم ۔۔ پیداک اِنت منی کِر ءَ زر نیست کہ من سیاھیں شلوار ءِ بگراں۔ اِد ءِ کسہ ترا سما اِنت ۔ کَمیس ءُ گُشان منی کِر ءَ ھست اَت مرچی من رنگ کنگ ءَ دات اَنت۔۔۔
شنکر اے اِش کُت گْوشت ئِے تو لوٹ ئے من ترا زر بدیاں۔ تو سیاھیں شلوارے دوچائین ئے۔۔
سلتانہ ءَ گوشت اِنا منی مُراد اے نہ اِنت اگاں گوں تو بوت گُڑا منی واستا یک سیاھیں شلوارے اَڈ بکنائین ۔
شنکر کند اِت ءُ گْوشت منی کیتّو ءَ ھچ نیست من جُھد کن آں کہ ترا مھرم ءِ اولی رمس ءَ سیاھیں شلوار سر بہ بیت نوں تو وش ئے۔۔
سلتانہ کُنّلانی نیمگ ءَ چار اِت ءُ گوشت شنکر اے کُنّل ءَ تو من ءَ دات کن ئے۔۔
سلتانہ کند اِت ءُ گوشت تو ایشی ءَ چون کن ئے چاندی ءِ کسانیں کُنّل اَنت گیش ءَ چَہ گیش پنچ کلدار اَنت۔۔۔
شنکر۔۔ کند اِت ءُ گْوشت من چَہ تو کُنّل لوٹ اِت اَنت نھاد جُست نَہ کُتگ۔۔۔ بُگْوش دے اِش ۔۔
سلتانہ ءَ کُنّل در کُت اَنت دات اَنت گْوشت ئِے بُزور اِیش اِنت۔۔۔
پد ءَ سک درد بوت سلتانہ ءَ کہ پرچا داتگ اَنت۔ بلے شنکر اے وھد ءَ شُتگ اَت۔۔
سلتانہ ءَ ھچ باور نہ بوت کہ شنکر وتی اکرار ءَ اوشت اِیت ۔۔ بلے ھشت روچ ءَ پد مھرم ءِ اولی رمس ءَ سُھب ءِ ساھت نُھ ءَ دَر ءَ توار کُت سلتانہ دَر پچ کُت شنکر دَر ءِ دپ ءَ اوشتوک اَت۔ھال تاک ءَ پَتاتگیں گْرنچے سلتانہ ءَ شھار اِت ءُ گْوشت ئِے ساٹن ءِ سیاھیں شلوار اِنت بچار ئِے بلکیں دَراج بوت۔۔۔ نوں من رو آں ۔۔۔۔
شنکر شلوار دات ءُ شُت دگہ ھچ نہ گْوشت ئِے سلتانہ ءَ۔۔۔
شنکر ءَ گُد لیگاریں گْور ءَ اَت سر ءِ مود شنگ شانگ اَت اَنت انچو سما بوت نوں واب ءَ پاد اَتکگ دیم ئِے ھمد ءَ اَتکگ۔۔۔۔
سلتانہ ءَ ھال تاک پچ کُت ساٹن ءِ سیاھیں شلوار اَت ۔ پورہ مکتار ءِ شلوار ءِ وڑ ءَ اَت سلتانہ سک وش بوت۔ کُنّلانی دیگ سک درد بوتگ اَت پد ءَ شنکر ءِ سر ءَ بے باوری سرجم ءَ دور بوت اَنت ۔۔۔
سُبارِگ ءِ وھد بوت جھل ءَ شُت وتی رنگی ئیں جامگ ءُ گشان آرت اَنت سے ئیں سیاہ اَت اَنت ۔ وھدے گُد گْور ءَ کُت اَنت سلتانہ ءَ ۔۔۔ دَر ءَ توار کُت سلتانہ دَر پچ کُت مکتار تہ ءَ پُترت سلتانہ سیاھیں گُدانی نیمگ ءَ چار اِت ءُ گْوشت ئِے ۔ جامگ ءُ گُشان رنگ کنوکیں گندگ بنت بلے شلوار نوکینے گندگ بیت۔ کدی دوچائینتگ۔۔۔
سلتانہ ءَ پسو کُت مرچی چَہ دچوک ءِ کِر ءَ آرتگ۔ اے گْوشت ئِے۔۔۔چمے مکتار ءِ گوشان کَپت دیست ئِے کہ منی ھما کُنّل اَنت مکتار ءِ گوش ءَ اَنت۔
جُست ئِے کُت اے کُنّل تو چَہ کُجا آرتگ اَنت۔مکتار پسو کُت کہ مرچی من بھا پَہ گِپتگ اَنت ۔۔
پد ءَ ھر دوئیں بے توار بوت اَنت۔۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
