TBP Balochi

شہداے شادی کہور

نبشتانک : سَنگر بلوچ

دی بلوچستان پوسٹ

غلامی ءِ آس ءَ بلوچ نوجوانانی دل ءَ راج دوستی ءٍ جذبہ پیداک کُتگ ءُ ہر وهدءَ بلوچ نوجوان ءَ وتی سر ڈگار ءِ رکینگ ءِ هاترا جدوجہد کُتگ مرچی یک بلاهَیں مُدت ءِ بٍیت کہ بلوچ وتی وت واجہی ءِ واستہ ءَجَنگ کَنگ ءَ اِنت اے جنگ ءِ توکہ هزارنی کساس بلوچ نوجوان ءَ وتی هون پہ بلوچ سرزمین هاترا ریتکگ ءُ پہ مُدامی نمیران بوتگ اَنت۔

مَرچی اگاں بلوچ راجی جُنزے سرا چمشانک بّدیں گڈا ادا ماراه بلوچ نوجوانانی یک بلاهیں کردارے گِندگ کئیت کہ آهاں وتی جُنز یک شرے وڑے ءَ مُنظم کُتگ اے راجی جُنزے توکہ ما راه شرے سیاسی باسک ءُ شرے جنگولیں سنگت هم گِندگ ءَ کئیت لھتیں انگت هست اِنت پہ بلوچ ءِ آجوهی هاترا پاکستان ءَ گوں جنگ کنگ ءَ اَنت لھتیں شہید بُوتگءُ وتی فرض اِش ادا کُتگ آه پہ مُدام بلوچ راج ءِ دل ءَ زندگ ءَ اَنت ۔

همیں رنگ ءَ هرچ آهوکیں روچ ءَ پاکستانءِ زلم بلوچ مخلوق سرا گیش بوان اِنت هرروچ بلوچ ورناه آوار جَنگ بَنت ہر روچ بلوچ نوجوانانی شہادت ءِ هال بٍیت 9مارچ 2018 ءَ پدا بلوچ گُلزمین ءِ سرا چار نرمزارے بلوچ ورناه ءَ وتی هون پہ بلوج راج ءِ ءُ آهوکیں نسل ءِ واستہ ریتک شہید جمیل جان پنام کیّا، شہید سفرخان پنام ساوڑ، شہید رئیس پنام هکیم، شہید مہیم جان پنام یونس جان گوں پاکستانی لشکرا دیم پہ دیمی جنگ ءٍ تہاں شہادت نوش کُن انت ۔

شہید کمانڈر جمیل جان یک سَکیں دلیر ءُ ایماندارے سنگت ءِ اَت شہید جمیل جان مُدام پہ وتی بّزگیں راج ءِ هاترا جیڑیت وتی غلامیں راج ءَ گوں سَک باز مہر اَت ءِ انچو شہید سفر خان هم همیں رنگ ءَ گوں وتی کسان ءِ بالاد ءَ دژمن ءٍ دیما چوه کوه ءِ وڑا مِک اَت دژمن ءَ شہید سفرخان دو برات هم آوار جَت ءُ شہید سفر خان ءِ سرا پیغام راه دات کہ وتی توفک ءَ دور دے مہ تی برات ءَ یل کنیں بلے گُلزمین عاشق چو مُریدے وڑا وتی گُلزمین ءٍ سَرا پَسیتگ اَت شہید سفر خان ءَ هم وتی پیغام دژمن ءِ سرا راه دات ءُ گُشت کہ من توفک پہ دور دیّگ ءِ واستہ بّڈا نہ کُتگ منی بٍرات ءَ هرچ وڑ کنیں بہ کن انچوں شہید رئیس جان هم پہ وتن دیونگ اَت شہید رئیس جان هر وهد ءَ گوں سنگت ءَ دیوان ءِ کُت شہید رئیس جان پہ وتی سرڈگارے هاترا برے یک جاگہ ءِ آں دژمن ءَ گوں جنگ ءَ اَت شہید برے کولواه ءُ برے بالگتر برے شاپُک برے کیلکور ءَ جنگ ءِ میدان ءَ ساڑی اَت انچوں شہید مہیم جان هم همیں رنگ ءَ پہ وتن شیدا اَت شہید مہیم یک دل سپاهیں کامریڈ ءِ اَت ہر وهد ءَ دپ ءِ کَندگ ءَ پُر اَت اُوتاک ءِ توکہ اگاں سنگت ءِ پریشان بُوت شہید مہیم جان آه راه کَندینت ءُ تسلہ دات دانکہ سنگت پریشان مہ بنت۔

مَرچی همیں چارے کامریڈ ءَ وتی هون یکجاهی ءَ ریتک داں آخری ساه ءَ تک بلوچ ءَ گوما دوکہ نہ کُت بلوچ ءِ حفاظت کُت دژمن ءِ دیم ءَ چوه کوه ءِ وڑا مِک اِت اَنت دژمنءَ وڑے وڑے پندل پہ اِشاں سازیت بلے دژمن بے سُوب بُوت مَرچی اے چارے کامریڈ بلوچ راج ءِ دل ءَ اَنگت هَست ءُ زندگ ءَ اَنت مَرچی دژمن هم زانت کہ بلوچءِ زهگ زهگ چو کیّا ءِ وڑا وتی سرے قربان کَنگ ءَ تیار اِنت بلے وتی زمین ءِ سُودا ءَ نہ جنت شہید کمانڈر جمیل گوں وتی سنگت ءَ گورکوپ کولواه پسنی کلانچ شاپُک ءَ دژمن ءَ راه قدم پہ قدم تاوان داتگ دژمن چہ اِشاں تُرسے آماچ بُوتگ دژمن ءِ وشیں واب هراب بُوتگ دژمن چہ اے چارے کامریڈانی تُرس ءَ وتی بُنجل ءَ چہ در نیا اَتکگ۔

مرچی پورهیَں بلوچ راج زانت کہ شہید کمانڈر کیّا جان گوں سنگت ءَ بلوچ راجی آجوهی واستہ وتی جان اِیش قُربان کُتاں مرچی دژمن ءِ دیما وتی سر اِیش جَہل نہ کُت مرچی بلوچ راج شہداےَ شادی کہور ءِ نام ءَ شُمارا توار کَنت۔

شہید اَبدمان اَنت ءُ زندا پیریں شہیدانی قبرانی سرا مُدام بہار اِنت۔
مرچی شُما اَبدمان اِنت مرچی شُما زنده پیر گُشگ بٍئیت پرچاں کہ شُما وتی زاتی خواهشات کُشتگ ءُ پہ وتی راج زندگ بوتگیں سُھریں سلام شہید کیّا جان ترا گوں سنگت ءَ داں بلوچ راج هست اِنت شُما زندگ اِت۔

نفسیاتی جنگ ءُ بلوچ سلاہ بندیں گَل

اکیل مراد

دی بلوچستان پوسٹ 

نفسیاتی جنگ یک مزن ءُ مھکمیں سلاہ ءِ پہ کارمردگ ءَ دنیا ءِ گیشتریں بھراں وتی مھترانی رکینگ ءَ دشمن ءِ پروشی ءَ نفسیاتی جنگ ءِ ھکمت اَملی کارمرد کرتگ اَنت۔ پرچاکہ دنیا ءِ سوبمندیں زانتکار ءُ نفسیاتی ءَ سوھویں مردمانی گوشگ انت کہ نفسیاتی جنگ ءَ یک بامردیں سپاھیگے لگور بیت کنت ءُ یک ازت مندیں شھری ءِ ملک ءِ دشمن ءُ ناشرکار ءُ ھونوار ءِ جوڑ کنگ بیتیں۔

نفسیاتی جنگ ءِ وڑ ءُ پئیم کہ دوھمی مردمانی سر ءَ یا جنزے ءِ ھلاپ ءَ یا ملکے ءِ ھلاپ ءَ وتی ھمسپریں گلے ءِ ھلاپ ءَ دوھمیگے سر ءَ دروگیں پندل جوڑ کنگ، ناجائزیں بھتام جنگ ذہنی وڑ ءُ پئیماں نادراہ کنگ۔
تھی گپاں ڈنی مردماں سر کنگ، زلیل ءُ رزوا کنگ، آئی ءِ مالی ءُ ملکیاتانی برگ ءُ ایمنی ءِ ھلاس کنگ میان اُستمانی تَک ءَ بدنام کنگ، آئی ءِ جزبگ ءَ گوں ملنڈ کنگ ءُ وڑ وڑیں پندلانی ھنر سازگ۔

پہ نفسیاتی جنگ ءَ کاربندگ ءَ وڑ وڑیں راہ ءُ در ھست اَنت کہ آئی ءَ دشمن تی ھلاپ ءَ کاربندیت ءُ تو ھم دشمن ءِ ھلاپ ءَ کارمرد کُت کن ئے ءِ ۔منی مستریں گپ ھمیش انت مئے سلاہ بندیں گل دشمن ءَ را نفسیاتی کنگ ءَ چہ گیش وت ءَ نفسیاتی ءِ نیمگ ءَ بران اَنت وت ءَ تاوان دیان ءَ اَنت وت ءَ پروشی ءُ نیزوری ءِ آماچ کنان اَنت۔

انوں مار ءَ گندگ ءَ کئیتیں بازیں سالاں چہ دشمن ءَ راجی جنز ءِ ھلاپ ءَ سوشل میڈیا ءَ کجام پئیم ءَ نفسیاتی جنگ ءِ چن ءُ لانچ کرتگ اَت چنت مردم پہ بلوچ راجی جنز ءِ بگیری ءَ مست ءُ ملنڈ کتگ ات اَنت ءُ انگت ءَ جاری ءُ ساری اَنت اے مئے بد بھتی اَت ھمے نفسیاتی جنگ ءِ بھر ءَ لھتے مئے دوست ءُ ھمبلاں ھم وت ءَ ھوارینتگ اَت ءُ وت ما وت ءَ جیک پہ جیک ات اَنت۔ من ھمے گپ برز ءَ ھم جت کہ نفسیاتی جنگ بازیں تھراں کنگ بیت سوشل میڈیا، چُشکہ پیس بک، واٹ سیپ، ٹی وی چینل، ھالتاک ءُایندگہ جاھاں پہ نفسیاتی جنگ ءَ ھم مزنیں تاگت ءُ زور ءِ ھستیں کہ آ کارمردگ بیتیں۔

زانتکارانی گوشگ انت کہ سامراجی زور راجانی لگت کنگ ءُ زیردست کنگ ءَ آیاں نفسیاتی جنگ ءِ تہ ءَ مان ھَڑین اِت کہ دروگ ءَ راست گوش اِت ءُ راست ءَ را دروگ گوش اِت دیم پہ دیمی جنگ ءَ وَ ھرکس زانت کہ آئی ءِ سلاھاں آشناہ بیت آئی ءِ توپک ءِ دراتکگیں تیراں گِند ات ۔بَلے! نفسیاتی جنگ ھما جنگ اِنت کہ پیزیکلی جنگ ءِ سر ءَ ھم انسان وت ءَ پروش اِت اِنت دیم پہ دیمی جنگاں چہ انسان سرڈگاراں گِر اَنت ءُ دیم ءَ روان کن اَنت نفسیاتی جنگ ذھن ءُ دماگ ءَ جتائیں گپ پرمائیت ءُ نادراہ کنت ۔

زانتکارانی رِد ءَ دوھمی میان اُستمانی جنگ ءَ پد اے رِپک ءِ جنگ ءَ یک مزنیں نامے ھستیں۔ نی بازیں وھداں چہ بلوچ راجکار وت ماں وت ءَ گِر ءُ چِل اَنت یکے دوھمی ءِ پُچکاں کپتگ ءُ آئی ءَ الکاپ ءَ شودگ ءَ ایں یکے دوھمی ءِ ھلاپ ءَ بیان بازی کنگ ءَ ایں یکے دوھمی ءَ سردار ءُ دوھمی مڈل کلاس گوشگ ءَ ایں ۔

دشمن ھَنچش ما پراموش کرتگ ءُ دیم گوں وت ءَ کرتگ ءُ جنگ ءَ کروسی اِنت چونائیگ ءَ جنگ مئے مستریں مڈی اِنت بلے دشمن ءِ ھلاپ ءَ بہ بیت ناکہ وتی تپنگ وتی دلبند ءَ سک کنگ ءُ یکے دوھمی ءِ روتانی کشگ ءُ دشمن ءِ شاتان کنگ گوستگیں بازیں وھداں چہ بی اَر اے ءُ بی ایل ایف ءِ بیان بازیانی تہ ءَ ھمنکس دوری ءُ گِستاھی آیگ ءَ ایں کہ آ روچ پہ روچ چوں ھما کوھنیں گود ءَ چاک روان اَنت۔

مروچی بلوچ ءِ ازلی دشمن ءَ ھما کَچ ءَ وتی زور ءُ پوست ءِ ترند کرتگ کہ ھمک جاہ ءَ بلوچ مات ءُ گھاراں وتی بنجلاں برگ ءُ اود ءَ آیاں لَٹ شاپ کنگ ءُ اود ءَ آیانی نَنگ ءُ ناموس ءَ ھم پُلگ ءَ ایں۔گڑا جوانتریں کار ھمیش انت درست یک سنگر ءُ وتی توپنگانی دپ ءَ وتی ازلی دشمن ءَ گوں بہ کن اَنت چُش مہ بیت کہ بلوچ نَنگ ءُ ناموس گیش پامال کنگ ءُ دشمن شاتمان بہ بیت۔

تپاکی راج ءِ گڈی سوبمندی انت راج ءُ سلاہ بندیں گلاں ھوار راجکاریں گل تپاک بات اَنت دشمن ءِ پندل ءُ ھُنر نیست ءُ نابود بات اَنت۔

زبان تہلیں شکر گُپتار

حنیف بلوچ

دی بلوچستان پوسٹ

“سادگیں بلوچُک تئی ذکر بیت یا اللہ ھو درست یک حساب ءَ اَنت”
ازگاریں دلانی تماہ نابودیاں ببادات اَنت پشک دِر ءُ درامد کن سِنگ ئے پِرچِن ءُ پَرتگاں کن کَس نہ منتگ۔ لانک بستگیں جنازہ ارواہ ءِ ھوادگیں ھوناں میِچل کُت دمک ءُ دراں درامد بوتاں کشک مکاریں زمانگ ءِ پادانی میار بوت۔مُھتاجیں ھون ءِ ترمپاں کہ سرڈگار ءِ پہازگ ءَ زمین ءِ مسکیں ھاکانی چمّگ بُتک اَنت آپہ کساس بے کساس بوت اَنت جوناں نہاد نیست سَر نہ بیت پرواہ نیست بلے ما کُلاہ ءَ پہازاں۔

بلوچ نہ تُرس اَنت میار جَل اَنت پہ میارانی موکگ ءَ اَچ سراں سرگوزان اَنت ہئو گواچِنی جنگول ہم اَست اَت کہ ھاک موکی، راج پھازی ءُ میار جَلّی ءِ بیرک دار اِت اَنت بلے آسر اِش ہمیش اِنت کہ نئے ترا زور ءُ نئے منا تَوانے بَس وتی باتن ءِ سِپاہ دارنت۔
پہک دلیں مہلوک ءُ سادگیں بلوچاں وتی پیر ءُ کماشانی ھبر داشتگ کہ سر ءَ باہین بلے نامے گیدی ءَ چیدگ کن ءُ واتر تہ ایشاں ھرچیز ببا دات سَرگوں دزمال ءَ کُلا ءِ امانت کُت۔ لوگ ءُ ھنکین پشت دات اَنت ھاک موکیں جونانی یات اوں درآمد کُت اَنت۔

بَلے مروچی کہ جیڑے ھچ نہ بوت آسر گُباران اِنت پرچہ کہ بے رھبندیں جُھد ءَ بَروَرد نہ بیت اگاں شوانگ کہ بےسما بیت گڈا رمگ دیگرانی گُل کِشتیں واباں مان رچیت ءُ ہزّامیں دوار ے ہنکین کنت گُڈا وتی چہ ابرم ءِ ہتم سوادیں زہیراں نہ مہریگ اِنت نہ مہاریگ اِنت!
مروچی گُڈا پہ بتگ عہدیں تماھاں پہ وتی ہست پانی ءِ راھاں کئے اِنت کہ توجیل سازی کنت پہ جُنز ءَ رھبندے ءُ راہدارے بٹاہینیت
چْونائی ءَ انوں بلوچ ءِ جہد یک انچیں نازرکیں دورے ءَ گوْزگ ءَ اِنت اگاں توجیل سازی بوت گڈا رھبندپہ رھشوناں گرانیں اِلتے ودیگ کنت۔ فردانی ھاکمی نمانیت بےسریں کماندارانی سُکسُک ٹکانی تہابھربوتگیں ھمک سنگت رھبند ءِ زد ءَ کپیت پمشکہ بلوچ رھشونانی دیم ءَ چیدگیں بےسریں کماندار کہ دیگرانی کتگیں کار اِش وتی بگل جول ءَ کتگ اَنت ءُ پارسائی ءِ بامرد اِش وت ءَ لیکیتگ ءُ گُڈا آ ہم بے اُرزیں ھرا سوار بنت ۔

چونائی ءَ وھد بدل بوتگ مرچیگیں دورا ھرکس پدر کتگ بلے مہلوک ءِ چم پچ اَنت میم اِش مانیست وھدیکہ جھدکار راستی ءِ شاھیم ءَ تورگ بیت گڈا کے چنچُک ءَ آپ ءَ بیت درائی کنت۔ گر ءُ دار کہ نبیت بلے نوں راستی ءِ منوگراں زبان ءِ تند بوتکگ نوں پہ سُکسُک ھچ جیڈہ نہ گیشیت ھبدہ ھژدہ سال پہ ھنر گوستگ نوں چُش بوت نہ کنت۔
بلوچ رہشون کہ بلوچ ءِ جھد ءَ کامیات گُش اَنت وت ءَ کلاگ زورگ ءَ اَنت ءُ مہلوک ءِ اوپار ءَ بے ھاٹی ءِ رُنگراھاں پِرّینگ ءَ اَنت ۔
چونائی ءَ تچکیں گپ ھمیش اِنت اگاں پہ دل ءُ ستک ھورت چاری بہ کنے گڈابلوچ ءِ جہد ءُ پاکستان ءِ سیاست یکیں شاھیم ءَ تورگ بیت کہ باوست آوار جنگ بوتگ۔ اے بابت ءَ من دگہ باز دلیل دیئگ نہ لوٹاں۔ بلے واجہ عطاشادگشتگ۔

“چمےبہ بیت پہ گندگ ءَ ”
گوش ئے بہ بیت پہ اِش کنگ”

مرچاں بلوچ سیاست ءَ نوکیں دروشمے درآؤرتگ۔ سیاسی سرپدی نہ بوئگ ءِ سبب اِنت کہ ورکر ءُ لیڈر ءِ ارزشت پشت نہ کپتگ ورکر وتی کساس ءَ درکپتگ لیڈر ءَ جہد پہ سُکسُک داشتگ دیم ءَ باریں چون بیت بلے انگت ھدا ھیر ءِ سرا اِنت۔ سرکماشانی بےبُنیں دست سماریاں مہلوک وتی کش ءُ پہناتاں سِنگسار کنان کُتگ ءُ کجام نیمگ ءَ برتگ ءُ سر کُتگ ازابانی کہریں روچانی اوستیگ اِنت۔نہ زاناں وشین باندات ءِ بام شگرب ءَ درا بیت کہ مگرب ءَ ٹِک دنت۔

میر ءُ نواباں وا پیسرا وتی کبر جتگ گوں مہلوک ءَ بلے نوں گریب ءُ گُربگ وت ءَ ساٹان اَنت ھمدا مردم ءِ سرپِر نہ بیت۔بزاں کہ ھُشتر ءَ وت ءَ ھَر ے کُت گام ءِ جُنزیت تہَ سُرمباں ندارگ کنت۔
نسیب نستگیں بلوچ راج ءِ بامردیں پُسگاں راجی جہد ءَ پہ ندر بوتگیں شہید اوں بہر ءُ بانگ کُتگ اَنت چالاکیں مردم اُگدہدار بوتاں سُکسُک بندات بوت تو من ءَ گُت تُک کن من ترا۔

واجہ ارشاد پرواز وتی یک شئیرے ءِ تہا وش گُشتگ،

“تو بگش تئی اِشک ءَ پشت پمّا چے کپتگ ”
توبگُش تئی اِشک ءَ گار چے بہ کنت مردم”

بلوچ ءِ گوالَگ انچو دِر دِر اِنت کہ دوچگ نہ بیت ایں سرے پُچین ئے آ سرا دِریت.راجی جہد کہ ٹکانی سرا بہر بوت دمگ ءُ ھنکین آں سرجنان بوت گڈا بزاں کہ ھبر چہ ھلوت ءَ گوستگ بلےھبرے کنے ملامت نہ ئے ملامت ءِ زبان ءِ موکگ ءُ ریا بادی ءِ دیم ءَ مئے سر گار اِنت بلے جاھے نہ جاھے الم وت ءَ بوجیت مردم چوں بکنت کہ ھچ نہ سھڈیت دل ءِ اوپار ءِ تند ءَ وت ءَ بوتکگ زبان تہلیں شکر گپتار۔

“کسے ءِ دامُن ءَ مُشگ لوٹیت
ملکموت مردمے کُشگ لوٹیت”

دل ما دیر اِنت کہ سِنگ ءِ تَلا داتگ بلے نوں کجام شرم ءَ مہلوک ءِ دیم ءَ ھبر بہ کناں کہ ھبر پشت نہ کپتگ۔

واجہ میر عمرمیر جاھے گُشیت۔

“مہروان پہ ھدا کسی زنگ ءَ مجن
دل گریبیں وتی گِلہاں بار دنت”

ما ہم گِلہ بار داتگ اِتاں ھپدہ ھژدہ سال پہ سُکسُک کنگ ءَ گوْست یک گَلے ءَ شریں دروشمے ءَ درائی نہ کُت کہ مردم کمیں وت ءَ ترھینت بہ کنت۔ پہ ھدا ءَ بہ چار اِت کٹو کٹو ءَ بند کن اِت پہ راجی جُہد ءَ شریں توجیلے ٹاھین اِت۔من گوں واجہ سید ءِ اے شئر ءَ وتی نبشتانک ءَ آسر کنگ لوٹاں۔

“جہہ بجن بے ساری ءَ بے زانتی ءَ شہمات کن
کہ تئی بیگواھی ءِ سامان سرجم بوتگ اَنت”

 بَژن پَہ اِیردستیءَ

نِبشتہ: بابُل لطیف بَلوچ

دی بلوچستان پوسٹ : بلوچی کالم 

آجوئیں راجانی ھَر سُھب گوں ھَزار داب ایں اُمیتءُواھگاں ٹِکّ دَنتءُسَر کش اِیت.رُوچءِبَرانز کہ گُلزمینءِدِلبندءَکَپ اَنت ھَمک دِیما شانتُلءُکَپوت،بُلبُلءُکُلّی گوں وتئی نازینکءُسَؤتاں ھَر چاریں دَراں سَرا زُور اَنتءُزِندمان گُلباگءِچَہرءُشُبینءَسُہرا بیت کہ ھَر یکّے پَہ شاتءُگَل وتئی کاراں گُلائیش بیت.بَلے بَژن پَہ ایردست ایں بَلوچ راجءِاُمیتءُواھگاں کہ نَپتءُبیرانی دیمپان انت..ھَمک سُھب گوں ھَمے اُمیتءُواھگاں پَدّرائی کَنت کہ کُجا؟ کئی جون کَپتگءُکئے بیگواہ کنگ بوتگ ؟.مَرچاں اے نَہ گیگ ایں جاوراں بَلوچ راجءِراجی زَندمان چو زامُریں دَرچکءَپیڑاتگ کہ اے ھَبر داھمی زندءِبَہر جُوڑ بوتگ.

لاشوں پِہ لاش گرے نیند نہ ٹوٹی تیری
حاکمِ وقت تیری مُردہ ضمیری کو سلام
مَرچی اُلفتءِوڑیں پُل بالاد تہاریانی اَندرءَزند بُگوازین آں آ ماتانی دلءَچے گوزیت،اے دردءُھَما زانتءُماریت کہ آ وت ھَمے اِشکریں یاتاں بِریان اِنت.بلے مَرچی ھَر بَلوچ ماتءُگوہارانی زِردءِکٹّور چَہ دردءُدور،زہیرءُتھتالاں چَکارءُسَرکیل اَنت کہ گپ کنگ نہ بیت چو سوچنءَسُمبان اَنت.مُدّتے گوستگ کہ کُچلّیں گم چو بُلبُلءَشیزار اَنت بَلے اَنگت آزگّیں زہیرانی ٹپّ پَہ اُوستانی جمبراں اُوستیگ اَنت کہ بگندئے گواریتءُڈکالّیں کِشاراں سَبزینیت.بَلے پَہ کُجام اُوستءَ؟
چیاکہ چہ دُژمنءَھیرءُھیروائیءِتلبانی اُوتاگ سستگ اَنت بلکیں مارا گوں وتئی توکلءُھاٹیءُاے گیمُرتگیں کِشار آپ دَیگءُسبزینگی اَنت.
مھلبءُسمّی بیگواہ ایں پِتءِشوھازءُکُجام دَر نَہ ٹُک اِتگ،پَرزانہ پہ براتءِپَٹءُپولءَشالءَبگر داں اسلام آبادءَگوں تراولّیں پاداں سپر کتگ،خدیجہ،سیماءُھمیدہءَوتئی براتانی ھکس گون اَنتءُچارراہءِسَرا اُوشتوک اَنت.دگہ ھَزاراں بلوچ ماتءُگوہار پہ وتئی اروھانی شوھازءَسربتگءُچارراھانی پانگ اَنت بلے ھِچ پہ ھِچ.

چیاکہ دُژمن گوں اے داب ایں کارستاں بلوچ راجءَچَہ وتئی آجوئیءِلوٹءَپَدکِنزینگ لوٹ ایت کہ تُرسءُبیمّءَگُنگءُبے توار بِہ بنت.بلوچ ذالبولانی بے شرپی،گوں لَجّءُننگءَلیب کنگ اے کُل ھَمے درور انت کہ بلوچ چہ.آجوئیءِبَدلءَدائمی منی ایردستیءِمنّوگر بِہ بیت.
بَلے دُگنیائے راجدپتر مارا اے درونتءَدنت کہ آجوئی ٹَپّاں ٹاپُلی لیبءِنَہ اِنت کہ ما سَپتءُسَتاہانی ھَلکوہاں ایمن بِہ بَہ اِیں بلکیں پہ ھَر وڑیں کُربانیءِدَیگءَجاڑیگ بُوھگی اِنت.نیدرلینڈءَلَکّانی کِساسءَمَھلوک شہید کنگءُپاھُق دَیگ بیت بلے نیدرلینڈءِتمردءُبَہادریں راج اسپینءِھَرتہریں زوراکیانی دِیما چو کوہءَمِک بیتءُمرچی گیدیءِدلبندءَآجوءُوتئی پَجارءِواھُند اِنت.مارا ھَم اے بے نپیں پاکستانءِدیماچو شاشانءَمک بُوَگ لُوٹ ایتءزُوراکیانی زِر گواز کنگی اِنت داں باندا بلوچ راج وتئی ڈیھءُسرڈگارءِواجہءُپَجارءِواھُند بِہ بیت.چُش کہ نطشے گُش اِیت زندگیءِشاھگانیءَرا دستءَآرگ ارزان نہ اِنت،بلکیں جُہدءُجَپاہ کشی اَژدری اِنت.

مرچی ھَمے نام گِپتیں اسلامی ریاست کہ ذی گوں بنگالی راجءَچے کتگءِھَمے عملءَگوں بلوچ راجءَکنگءَاِنت،بلے اےگپءَپاکستاب شر سرپد اِنت کہ منی چہ انسانی کالبءَدَر زُوراکیاں بنگالی راج پدا نَہ کِنزاِت گُڑا بَلوچ ھَم پدا کِنزوک نَہ اِنت.بگندئے مرچی پہ نام بلوچ لہتے کاسگ چٹ تئی پارلیمنٹءَنِشتگءُبلوچ راجءِہُونانی سوداگر اِنت بلے اے گپءَدلجم بِہ بنت کی بلوچ راج دُژمنءِھَمبرائیءَراجی گدّاراں ماپ نَہ کنت.ھَما روچءُبگر داں مرچی مُلا حسن گوں بَدّیں نامءُیات کنگ بیتءُشہید نیٹو گوں شرپءَگیرآرگ بیت.گُڑا ھِچ کس وتا چہ راجدپترءَرکّینت نَہ کنت ،بلوچ راج الّم آئی دادءُھِسابءَکنت.

بیا اٍت همگرنچی ءَ گٍچین کاری ءَ بے سوب کَنیں

سَنگر بلوچ

دی بلوچستان پوسٹ

مرچی بلوچ قوم یک هنچیں جاورا گوازگ ءَ اَنت اے جاورءَ بلوچ راج وت سَرپد اٍنت کہ چٍکا بلوچ ءٍ گٍس آس دیَگ بُوتگ چٍکا بلوچ ءٍ لوگ ءَ ورناهے بچانی لاش شُتگ چکاں بلوچ چہ وتی جٍندے هنکین ءَ لڈینگ بُوتگ چکاں بلوچ گار بیگواه اٍنت
اے جاور بلوچ ءٍ سرا گوستگ ءُ اَنگت گوزاگ ءَ اَنت اے کُل آں نی زمہ وار پاکستان اٍنت

پاکستان ءَ بلوچ ءٍ واستہ هچ پَشنگیپتگ بلوچ ءٍ دانشور اُستاد نودربر ڈاکٹر کُلیں زانتکار کُشتگ ءُ گار ءُ بیگواه کُتگ اَنت مَرچی بلوچ چہ پاکستان ءَ چے اُوست کَشیت کہ آه را وؤٹ دَنت پہ گٍچین کاری ءَ کُمک کَنت مَرچی بلوچستان
ءٍهرکُنڈا مات ءٍ بَچ گار اٍنت لَتیں همیں بے زمیر پہ ووٹ ءٍ واستہ اُشتاتگ ءَ کہ مہ بلوچ ءٍ جیڑه ءَ توجیل کَنا اَنت همیں بے زمیر یک روچے همیں پُرسیگ ءٍ ماتانی هال ءٍ گٍرگ ءَ شُتگ کہ شُماه چون اٍنت نہ هج وڑا نہ شُتگ ءَ بَلے مرچی همیں گیچین کاری بٍندات بُوتگ ءَ مَرچی همیں بے زمیر گٍس پہ گٍس یلا اَنت کہ مہ راه وؤٹ بٍدی اٍت نوں پہ کجام اُوست ءَ بلوچ راج شُماراه کُمک کَنت

…..َعظیم بلوچ فرزندء

شُماں وت پاکستان ءٍ دروستیں پَندل
ءَسَرپداٍت مَرچی پاکستان مےَ شُمے وانگجاه قبضہ کُتگ اَنت
کہ بلوچ چہ وانگ ءَ هم پَش بہ کَپیت مرچی پاکستان ءَ شُمارا بَدهال ءَ چہ بَذهال کُتگ بلوچ راج یک گیرت مَندے راج ءٍ بلوچ وتی سرا دژمن ءٍدیما هچ وڑا جَہل نہ کَنت
بیا اٍت همگرنچی ءَ مَرچی دُگنیاں ءَ همیں باور کناین ءٍ کہ بلوج هچ وڑا پاکستان ءُ آهی کاسگ چَٹاں پہ هچ وڑا کُمک نہ کَنت مَرچی پاکستان ءَ هم پیش دارے کہ بلوچ هچ وڑا گوتو هوار نہ بَیت بلوچ هچ وڑا تَرا وؤٹ نہ دَنت بلوچ تی غلامی آں هچ وڑا قبول نہ کَنت بلوچ ترا وتی شہیدآنی هساب ءَ ی‍َک پہ یَک ءَ گٍپت بلوچ ترا هچ وڑا ماپ نہ کَنت

پاکستان ءَ بلوچ راه چے داتگ هچ ءٍ نہ داتگ پاکستان بلوچ راه بَس غم داتگ بلوچ ءٍ ورناه بُرتگ ءُ گار ءُ بیگواه کُتگ اَنت بلوچ ءٍ گٍس پہ گٍس ءَ لاش راه داتگ بلوچ سرڈگار ءٍ سرا قبضہ ءٍ کُتگ بلوچ ءٍ وت واجہ ءٍ پُلیتگ بلوچ ءٍ واستہ هچ نٍیشتگ مَرچی کہ گچین کاری بٍندات ءَ پاکستان ءٍ کاسگ چَٹ همیں گُشاں مہ بلوچ ءٍ جیڑاه ءَ توجیل کناں نہ بلوچ جیڑا تو توجیل کُت نہ کنیں بلوچ آجوهی لوٹ اٍت بلوچ مَرچی ترا هچ وڑا قبول نہ کَنت

همیں نیشنل پارٹی یا بی این پی عوامی یا آه دگہ پارلیمنٹ پارٹی کہ هست ءَ وتاراه بلوچ ءٍ راهشون ءُ درد وار گُشاں اَنت همیں نیشنل پارٹی ءٍحکموتی بُوتگ چٍکاں بلوچ آوار جَنگ بُوتگ چٍکاں بلوچ وتی میتگ ءَ چہ لڈینگ بُوتگ چکا وانگ جاه پاکستانی لشکرا وتی بُنجل جوڑ کُتگ مَرچی همیں بے زمیر کاینت کہ مہ را وؤٹ بدی اٍت مہ شُمےجیڑا توجیل کنیں نہ واجہ ڈاکٹر مالک نہ واجہ احسان شاه نہ واج اَختر مینگل تو نوں بلوچ راه هچ وڑا ریپینت نہ کنیں تو بلوچ راه هچ وڑا مزید غلام کُت نہ کنیں بلوچ تی دُرستیں
پندل ءَ سَرپد اٍنت بلوچ ترا وتی راهشون نہ مانیت
نوں کُلیں بلوچ ءَ گوں دزبندی اٍنت کہ شما کُل بلوچ یک حون ءُ یک زات ءُ یک قوم اٍت نو بیا اٍت کُل بلوچ گوں همگرنچی آں پاکستان ءٍ گچین کاری بے سوب کنیں

سَمُّل ءُ مھلب ءِ ودار آسری نہ بیتگ

اکیل مراد

دی بلوچستان پوسٹ : بلوچی کالم 

ھمک اَئید وتی نوک ءَ پِر کن اَنت ھمک گم ءُ وشی وتی رنگاں رج اَنت اَچ جھان ءَ چہ ھمے بیگاھانی مولماں درپشین اَنت بیگواھیں کہولانی تہ ءَ اے گم ءُ وشی نند ءُ نیاد آیانی جھان ءَ سرگوستگ اَنت آ ایوک ءَ وتی دوستگیں مردمانی ودار ءَ نیشتگ اَنت ۔

بلے آیانی اوپار ھنچُش واجہ رب ءِ پاک ءَ مزن کرتگ کہ ھنچیں مردم ھست آ بازیں سالاں چہ وتی دوستگیں مردمانی ودار ءَ نیشتگ اَنت بلے آیاں دم نہ برتگ انگت ءَ ھما ریاست ءِ مکاریں دُز ءُ ڈنگاں ھمے جست ءَ گرگ ءَ اَنت اگاں مئے دوستگیں مردماں جرم ءُ گناہ ءِ کرتگ گڑا آیاں وتی انساپی جاھاں پیش بہ کن اِت تاں جھان ءُ ما درست آئی ءِ بدیں کرداں بہ گندیں مکاریں دزاں تنی وھدی ھچ چشیں بیگواہیں مردمے دیم ءَ نیاھورتگ کہ آ وتی راستگیں گپاں انساپ ءِ پلک ءِ سر ءَ بہ کنت ۔

انسان ءِ یک روچ ءِ ناں یک کلاک ءِ بند کنگ انسانی ھکانی لگتمالی انت ناکہ سالاں سال بلوچستان ءِ رھشون ءُ زانشت بندیگ جاھاں بند اَنت بلوچستان ءَ ھزاراں چک وتی پتانی وداراں نیشتگ اَنت ھزاراں گھار وتی براتانی ودار ءَ نیشتگ اَنت ھزاراں مات چکانی ودار ءَ نیشتگ اَنت ھزاراں زال وتی چکانی پت ءِ ودار ءَ نیشتگ اَنت۔

ھمے چکانی تہ ءَ سمی ءُ مھلب ھم وتی پِت ءِ ودار ءَ نیشتگ اَنت سمی ءُ مھلب ءِ پت دوھزار ءُ نوہ بیست ءُ ھشت جون ءَ پاکستان ءِ چیریں ادارھانی کارندھاں بلوچستان ءِ دمگ ھزدار اورناچ ءَ ھسپتال ءَ سرکاری ڈیوٹی ءِ وھد ءَ آوار جتگ ءُ برتگ اَت۔ کہ تنی وھدی بیگواہ انت سمی ءُ مھلب ءَ وتی زندمان پریس کلبانی دیم ءَ گوازینتگ ءُ انگت ءَ گوازینگ ءَ اَنت ھردوکاں چشیں درے پَش نہ گپتگ اود ءَ وتی پت ءِ شوھازگ ءَ وتی توار سر نہ کرتگ ۔انسانی دراں چہ آیانی اُمیت ھچ وڑ ءَ نہ پروشتگ آیانی لیکو ءُ دیدانک ھمے بیتگ ءُ انگت ءَ ھمیش انت کہ مئے پت ءِ میار ءُ گناہ چی انت؟

چیا اِنچُک وھد ءَ بیگواہ اِنت؟
پرچا زاھر کنگ نہ بیت؟
پرچا تھاریں کوٹیانی تہ ءَ بندیگ اِنت ؟
ھمے ترس ءَ آئی ءَ پدریچ ءِ وشھالی ءَ توار چِست کرتگ ھمے ھاتر ءَ آئی ءَ پدریچ ءِ درتہ پچی دیستگ؟

ھمے ھاتر ءَ بندیگ انت آ بلوچ نیشنل مومنٹ ءِ باسک ءِ بیتگ ھمے ھاتر ءَ آئی ءَ بزگی ءِ سر ءَ ماریتگ ھمے ھاتر ءَ گار ءُ بیگواہ کنگ بیتگ آئی ءَ بلوچستان ءِ کُنڈ کُنڈ گولیتگ اَنت پہ بلوچ ءِ باندات ءُ تپاکی ءَ ۔ ھمے درد تنی وھدی آسر نہ بیتگ گوستگیں اَئید ءِ وھد ءَ سمی گوں مھلب ءَ زگریں روچ ءِ سر ءَ نیشتگ ءُ پہ وتی پت ءِ شوھازگ ءَ جیڑیتگ اِش انسانی ھیش ءُ ھشرت درست یک کِر کنگ بیتگ اَنت ءُ آیانی زندمان ایوک ءَ دگانی سر ءَ گوزگ ءَ اِنت ۔

اناں اے روچ پہ بلوچاں نکش اَنت ءُ جھان ءِ پترانی تہ ءَ چشیں جھداں پِر نہ گوستگ کہ اود ءَ جنزانی رھشون بیگواہ کنگ نہ بیتگ اَنت آیانی آسری ودار یک دلجمیں وھدے ءِ ستک ءَ نہ ایتکگ اَنت آیانی سرجمیں ودار تاں گڈی بیگاہ ءَ ھم آسر بیتگ اَنت ۔ سمی ءُ مھلب ءَ پہ وتی پت ءِ شوھازگ ءَ شال تاں کراچی، کراچی تاں اسلام آباد اے مزن پَٹیں زمین پند جنان کرت ءُ شت اَنت ھمے زمین ءِ سر ءَ کپتگیں سنگ ءُ ھاک ھم پرسان کت اَنت کہ مئے پت ءِ میار ءُ گناہ چی انت کہ بندیگ انت؟

درستاں وت ءَ بے وانک کرتگ اَت ھنچش اے گرم ءُ سردیں مولم ءَ آیانی ھنارکاں ایر کپتگیں اَرس ھمے پسو ءَ دئے اَنت کہ آیانی پت ءِ اگاں میار ءُ گناہ ءِ ھست آ ایوک ءَ آئی ءِ گھبودی ءُ بلوچیت اِنت کہ آ برگ ءُ بندیگ بیتگ۔ ھمے وڑ ءَ درستیں مردمانی میار ءُ گناہ ھمیش انت آیاں وتی گلامی ءِ نہ منّگ ءِ سر ءَ مکاریں دُز ءُ ھُکاں آوار جتگ ءُ برتگ اَنت ۔ سمی ءُ مھلب ءِ ودار انگت ءَ آسری نہ بیتگ ءُ انگت ءَ آیانی اُمیت ھم نہ پُرشتگ اَنت ۔

دین جان زوت آجو بات ئے

ایمنی ءِ پٹ ءُ لوٹ ءَ بیگواہیں دین محمد بلوچ

نوشتہ کار: لیاقت بلوچ

دی بلوچستان پوسٹ 

ایمنی دارگ واستہ المّی اِنت کہ قربانی بدے پرچاکہ مرچی قربانی ءَ ابیت ہچ نبیت اگاں مرچی ماں دنیا ءِ توکا انکس بدلی گِنداں گُڑاں آھانی برجم دارگ ءُ آھانی وجود بوھگ سبب قربانی زانگ بیت. ایمنی یک ہنچیں چیزے ایشی اے وھدا دگنیا اشد المّی اِنت، انچوکہ یک زانتکارے گُشیت کہ ” ایمنی گوں یک بچکندگے ءَ ودی بیت” کازماس ءِ واستہ مرچی دگنیا تہا بازیں مردمے گوں یک شریں کساس ءِ ءَ کار کنگ ءَ اِنت. دگنیا تہا مزن مزنیں اِستاناں مزن جنگ دوئم ءَ پد یک گل جوڈ کُت کہ ءَ دگنیا تہا پہ لس محلوق ءِ ایمنی واستہ کار پِکن. ما گوں شری ءَ بچاریں گُڑاں آرا مرچی مزنیں اِستاناں وتی وتی دست چیر ءَ کُتگ ءُ آرا وتی مفادانی واستہ کارمرز کنگ ءَ اَنت. مرچی آ گل چہ یو این او ءِ نام ءَ زانگ بیت وھدے کہ آئی بُن ھشت ایرکنگ بیت گُڑا دگنیاءِ توکا جنگ ھلاس بیت ءُ ایمنی واستہ کار بیت لس محلوق ءِ حق دیگ بنت ءُ آھانی حقانی واستہ کار ھم کنگ بیت. مرچی اگاں ما بلوچستان ءِ سرا چمشانک ءِ بدیں گُڑاں مارا ہنچیں اڈ ءُ جنجال دیما کئیت ءُ بلوچ لس محلوق ءِ لُوٹوکیں، آئی جنوک ءُ کشوک ھم یو این او یک باسک ءِ پاکستان زانگ بیت.

بلوچستان توکا مرچی ہزارانی کِساس ءَ مردم گار آں، آھاں وتی وت واجہی دارگ ءُ راجی آجوئی رکینگ ءِ واستہ جنگ ھم کنگ ءَ اِنت ہمے میان ءَ مزنیں کِساسۓ ءَ بلوچ ورنا، پیر کماش، زہگ ءُ زالبول پاکستانی اِستان ءِ دست ءَ بیگواہ بوتگ انت بازینے ژانگولیں کُنٹ دست کپتگ انت ءُ بازینے انگت گار ءُ بیگواہ اَنت آھانی تہا مے بازیں راج دوستیں جہدکار ھم گار انت اودا وانندہ ہم ہست مے راہشون ھم اوار انت مرچی ءَ تاں وانندہ ورنا گل ءِ وائس چیرمین ذاکر مجید ءُ چیرمین ذاہد بلوچ ءُ ایدگہ بازیں ورنا ھم بیگواہ انت مرچیا تاں ہمے وڑا بی این ایم ءِ ھم مزنیں باسکے بیگواہ اِنت آھانی تہا ڈاکٹر دین محمد ھم است کہ ءَ وھدے وتی 28 جون 2009 ءِ چہ ڈیوٹی ءَ خضدار ءِ یک علاقہ اورناچ ءَ بیت گُڑاں چموداں پاکستان ءِ چیریں ادارھانی دست ءَچھ بیگواہ کنگ بیت. مرچی آرا نوہ سال اِنت ءَ انگت گار ءُ بیگواہ اِنت۔

سوچیت ہما آس کہ پُر زندگ انت مرچی اگاں ما بچاریں گُڑاں اے نوہ سال ءَ آئی چُکاں ءُ آئی خاندان ءِ مردماں چنچو جہد کُتگ آھانی دلے درد انگت زندگ اِنت آھی خاندانے مردماں وتی کچ ءُ کِساس ءَ مزنیں جہد کُت بلے انگت سوبمند نبوتاں بلے انگت وتی جہد آھاں برجم داشتگ آھاں وتی وشیاں آس ءَ مانداشتگ ءُ جہد کُتگ عیدانی روچاں کراچی ءُ کوئٹہ پریس کلب دیم ءَ بھوک ہڑتال ھم کُتگ. پاکستان ءِ توکا آھانی حبر ھچیں وڑے ءَ گوشدارگ نبوتگ آھاں گوں وتی لوگ ءِ مردوماں گوں ھوار ایدگہ بیگواہیں مردومانی واستہ کوئٹہ تاں کراچی، کراچی تاں اسلام آباد لانگ مرچ کُتگ کس ھم سہی نبوت کہ چے بوہگ ءَ اِنت ایشانی اڑ ءُ جنجال چیو اَنت۔

ہمیشاں گوں ماما قدیر، فرزانہ مجید، سمی، علی حیدر ءُ ایدگہ باز ھم ھوار اتاں۔ ماما قدیر بیگواہیں آزادی رکینگ واستہ یک جہدے کنگ ءَ ات اَنت۔ ماما قدیر ۓ گوں وتی ہمراھاں بر سغیر توکا لانگ مارچ دومی مستریں مثال اِنت. اولی کہ کجام وھدا گاندھی احمد عباس ءِ سابر متی آشرم ءَ چہ 12 مارچ 1930 ءَ 390 کلو میٹر ءِ سفر بِندات کُت گُڑاں کجام وھدا گاندھی گوں وتی ہمراھاں 24می روچ ءَ گُجرات ءَ سر بوت گُڑاں گاندھی مُشتے ھاک دستا کُت گُشتے ما ٹیکس نہ دیاں گُڑاں انگریز سرکار حپا بوت رندا 15 اگست 1947 ءَ انگریز سرکار چہ ھندوستان ءَ چہ رخصت بوت. ماما قدیر گوں وتی ہمراھاں گاندھی ہم ریکارڈ پروشت آھاں 2500 کلومیٹر ءَ چہ گیش پند بُرتگ ءُ انگہ وتی جہد برجم داشتگ ۔ گاندھی غلامیں ھندوستان تہا گاریں آجوئی واستہ جہد ءَ ات، ماما وتی ہمراھاں گوں یک آجوئیں راجے بیگواہیں محلوق ءِ واستہ جہد کُت ءُ انگت کنگ ءَ اِنت۔

اتحاد ءِ سوگات

کاروان بلوچ

دی بلوچستان پوسٹ 

اتحاد بزان یک مشتی ءِ جند ھرابیں چیزے نہ انت بلے بلوچاں اے گپ رد بزان مٹ کُتگ، بلوچ سک دیر انت کہ جنگ ءَ انت اے وڑا مان نہ گیشیت-

بلوچ دژمن ءِ خلاف ءَ جنگ ءَ اَت ءُ اے سُدا ھم نہ اَت کہ ما پُروشت ءُ پُروش انت اناگت ءَ وابیں بلوچ رھشوناں ھوش کُتگ ما شنگ ءُ شانگ انت ءُ مارا اتحاد کنگ لوٹیت، سوشل میڈیا بلوچ ءِ کُلیں رھشوناں ھمے گپ چست کُت کہ اتحاد وھد ءِ ھاسیں لوٹ انت، لھتے وھد ءَ پد بلوچ سلاہ بندیں گَل بلوچستان لبریشن پرنٹ ءِ جارکش گوھرام بلوچ ءَ بیان ءِ جاری کُت کہ بی ایل ایف ءُ بی ایل اے میان ءِ اتحاد ءِ سرا تپاک کنگ بوتگ، ھمے بیان ءَ دیر نہ گَوست بی ایل اے دو جاہ بھر بوت ءُ یکیں گَل ءِ دو جارکش جئیند بلوچ ءُ آزاد ءِ نام ءَ زانگ بنت ءُ سوشل میڈیا ءَ ھم یکیں گَل ئے دو ٹوئیٹر اکاؤنٹ است انت، بی ایل اے دو بھر بوگ پہ راج ءَ اتحاد ءِ اولی سوگات بوت ءُ سوشل میڈیا پروپکنڈہ گیش بوت انت، ھمے اتحاد ءِ گپ انگت ھما وڑا اَت کہ بلوچستان لبریشن فرنٹ ءُ بلوچ ریپبلکن آرمی ءِ میان ءَ دوری بندات بوت ءُ سوشل میڈیا ءَ یکے دومی ءِ خلاف ءَ بیان بازی ایش کُت، اے وھد ءَ بی ایل ایف کمانڈر واحد کمبر ءَ وتی یک نبشانک ءِ تہ گُشت کہ بی این ایم ءُ بی ایل ایف یک ادارہ ءِ شکل ءَ انت ءُ اے دگہ ھرچی کہ سیاسی یا سلاہ بندیں گَل کہ است انت آھانی تہ فردی فیصلہ کنگ بیت ۔

اے گپ ءَ چہ بلوچ ءِ راج ءِ دماگ گڈ ءُ منج بوت انت بلے ھمے میان ءَ بلوچ نیشنل موومنٹ ءِ کارمستر خلیل بلوچ ءَ گُشت کہ سوشل میڈیا ءَ دژمن خلاف ءَ کارمرز بکن اِت بلے اے یک آسر نہ بوؤکیں کِسہ ءِ بندات بوت اَت، وھد گوزّان بوت بی ایل ایف ءِ دگہ کمانڈرے ءَ گُشت کہ براھمدگ پاکستان ءِ گوما گپ ءُ تران ءِ واستہ تیار انت بلے پاکستان زانت کہ براھمدگ ءِ وھد گوست ءَ، اے بُھتام ءُ تژن ایوک ءَ براھمدگ ءِ سرا جنگ نہ بوتگ انت ھیربیار ھم اے وڑیں بازیں تژن ءُ بُھتام ھم سینگ ءَ جاگہ داتگ ءُ مروچی باندا بلوچ رھشون ءُ سوشل میڈیا دژمن خلاف ءَ کارمرز کنگ ءِ جاہ ءَ وت مان وتی تژن ءُ بھتام جنی ءَ گیش نہ انت، منی ھیال ءَ بلوچ سیاسی یا سلاہ بندیں رھشون وت مان وت ءَ انچو دور نہ انت یکے دومی ءَ گون ھال ءُ اھوال کُت مکنت انت بلے ایشان ءَ سوشل میڈیا ءِ سرا گپ نزانان چے واستہ چو وش بیت۔

27 مارچ ءِ درگت ءَ براھمدگ بگٹی ءَ گُشت کہ اے روچ ءَ سرجمیں بلوچستان ءِ سرا قبضہ کنگ نہ بوتگ اے روچ ءَ بس قلات ریاست ءِ سرا زورانسری قبضہ کنگ بوتگ ءُ اے دگہ بلوچستان وتی شوک ءَ گوں پاکستان ءَ ھوار بوتگ ھمے گپ ءِ سرا سوشل میڈیا جنگ ءِ میدان جوڑ بوت، 20 جون ءَ مند ءِ بلو ءَ وھید نامین ورناھے ءِ زمہ واری 22 جون ءَ بی آر اے ءَ قبول کنگ ءَ پد گوَستگیں روچ ءَ بی ایل ایف ءِ جارکش گوھرام بلوچ ءَ وتی جاری کُتگیں بیان ءِ تہ گُشتگ اَت کہ بی آر اے ءَ بی ایل ایف ءِ سرمچارے کُشتگ اے گپ منی سمجھ ءَ اتک بلے اے ھچ ءَ منی دماگ گیش تر چِل کُت انت کہ فرسودہ سرداری سوچ ءَ پدر کنگ ءَ انت، ادا سرداری سوچ گپ نیست اَت آخر اے گپ کجام نیمگ ءَ اشارہ کنگ ءَ انت من ایشی سرا گپ نہ کنان اے بی ایل ایف ءُ بی آر اے ءِ اولی دپ جنگی نہ انت ایشی ءَ چہ پیش جگو ءِ کوش ءِ زمہ واری ءِ سرا ھم یکے دومی ءَ دپ جنگی بوتگ اَت، من مروچی ایوک ءَ نشت ءُ جیڑگ ءَ لَگ اِت اون ءُ وت ءَ وت جُست کُت ما کدیں اتحاد کنیں منی دل ءَ جواب دات کہ بلوچ ءِ اتحاد ھمیش انت ءُ اے دُرست اتحاد ءِ سوگات انت۔