TBP Balochi

بْراس گھارانی آھنیں پَلّ اَنت

ماھکان بلوچ

دی بلوچستان پوسٹ

بْراس (BRAS)ءِ نام ءَ ھم سَنتّی ءُ تِپاکی ءِ نوکیں بْرمش ءُ چیدگے دیم ءَ آتک تَہ پَژمُرتگیں دِلانی بے چاڑیں ھُلّاں گرکے جَت ءُ ھَر پاند ءَ اُوستانی نازینک اَلھان اَت کہ بْراس گھارانی آھنیں پَلّ اَنت.

اے دْمان ءَ من ءَ وتی دزگھار کیگد ءِ ھَبر سک گیر آھگ ءَ اَت کہ آئی مُدام گوں من ھمے گُشت مئے درد ءُ دور ، مَرک ءُ زِند ، نُکس ءُ نَپّ یَک بَلے ما پَرچہ یکمُشت ءُ یَک سَنگر نَہ بَہ اِیں. دُژمن ءَ زانہ کُجام روچی اے گُشتگ کہ شُما وت ماں وت ھمدست ءُ تِپاک نَہ اِت شُمئے لوگ ءُ گِداناں مان نداراں، شُمئے زھگ ءُ پَرزنداں شھید ءُ زِندانی نَہ کن آں. اے آس مارا کُلّاں یَکیں پئیم ءَ سوچان اِنت گُڑا پَرچہ ما پَہ اے آس ءِ توسگ ءَ یَکمُشت نَہ بَہ اِیں.

چَہ اے بْرمش ءِ تالانی ءَ پَد من ءَ ھِچّ وڑا تاھیر آھگ ءَ نَہ اَت، کاردام ھم نیست اَت کہ کیگد ءَ مِستاگی بِہ گِراں بیا تی کَولانی سَر مرچی پْرشتگ. ھمے پئیم روچ مَدان، مَدان ءَ بیگاہ ءِ کُٹ ءَ سر ءَ چَگل دَیان اَت کہ ناگھاں گوانکو ءِ توار ءَ پَچدْرھینت……
من گوانکو چِست کُت چارت داں گُلندامیں کیگد اِنت…. ھاھاھا…… من مِستاگ گیپت نَہ گیپت من ءَ گیپت ئے. من وھدے گوانکو چِست کُت کیگد ءِ بِچکندگاں من ءَ ساری ءَ مِستاگ گیپت ءُ موہ نَہ دات کہ من بِہ گُش آں کیگد ترا ھیر اِنت مرچی تی پُل ریچیں بِچکند نَہ بُر اَنت، چُش کہ کیگد ءَ پیسر ءَ دْراھینت،
ماھو ھال کن تو ھبرے ءَ سرپد ءِ کہ منی ھَمُک روچیں ھَبرانی سر پْرشتگ ءُ ھمدستی ءِ گِروک ءَ شَھم اِتگ. من گُشت اَو کیگد سرپداں ،بَلے بھتاور تو مِستاگ ءِ گِرگ نئیل ئے. گوں اے ھبر ءَ ھَوار کیگد ءِ بچکنداں پَد ءَ چو بَشّی جَمبر ءَ گْرندگ بِنا کُت…… گُشی ماھو! نوں شَپ کَپتگ پَہل کن من باندا کاھاں تی مھر چَکاریں دیوان ءَ گُڑا اے بابت ءَ شَرّیں نِند ءُ نْیادے کن اِیں.
من گُشت شر کیگد جان بیا کہ ترا ھُدا وند پَہ شات ءُ گَل بِیاریت…… شر اللہ تی نِگھپان بات…..
کیگد… تی ھم ماھو……

چَہ کیگد ءِ ھال ءَ پَد من ءَ ھم وشّی آں وتی شار ءَ مانپُوشتگ اَت ءُ دِل ءَ ھَزاراں جُست چُوڑ کشّان اَت. اے نواب ءُ میر، سردار زادگ کہ وت ءَ راجی جُھد ءِ درد وار ءُ کماش گُش اَنت گُڑا پرچہ چہ وتی مَندوستی ءِ دُو سَریں کورچات ءَ دَر نَہ کپ اَنت ءُ راستی ءِ مَنّاک ءَ نَہ دَینت داں بلوچ راج چہ اے مانگیشتگیں جاوراں بِہ تْرھیت ءُ رُژناھیں باندات ءِ مُراداں بِہ بیت.
چیاکہ اے ھبر چہ جنرل اسلم بلوچ ءِ شھادت ءَ پَد مُدام منی بالاد ءَ مان اَڑھتگ ءُ کُنٹگ جَنت کہ اُستاد کئے بوتگ؟
پَہ واجہ بْراھندگ ءُ ھیربیار ءِ نِگاھاں اُستاد پاکستان ءِ بیرکدار بیتگ….. یا نَہ؟
اگاں نَہ ،گُڑا چَہ اے راستی ءَ چَمّانی بَند کنگ پرچہ؟
پمشکا من گوں وتی نابِزانتی ءَ اے ھبر ءَ گُش آں کہ چرئے ھبر ءَ من ءَ بِل، بلکیں سرجمیں راج ءِ دِل ءَ ھَزاراں جُست پَہ پَسّو ءِ ھاترا مَھتل اِنت.
اے ھبر ءَ من بِہ گُش آں یا مَہ گُش آں، واجہ بْراھندگ ءُ ھیربیار مَنّ اَنت شر نَہ مَنّاں اُستاد ءِ کِرد راج ءُ کَوم ءِ دیم ءَ تھارونکیں شپاں چو چاردھی ماہ ءُ لسّھیں روچ ءِ بْرانزاں پَدّر اِنت کہ اُستاد کئے بوتگ ءُ پہ کئے ءَ نْدر بیتگ…….
گُڑا ما پَرچہ؟ وتی زھروریں لیڑھّ ءِ مَھار ءَ نَہ ژَپّیں کہ چہ راستی ءَ سر گْوز مکن. اگاں ما وت ءَ راج ءِ درد وار ءُ کَوم ءِ رھشون گُش اِیں گُڑا اے مئے راجی ڈُبّہ ءُ زمہ واری اَت کہ چہ چِست ءُ اِیرانی ھنکین ءَ دَر پہ اُستاد ءُ آئی مَلّیں سنگتانی نام ءَ کہ دُژمن ءِ دست ءَ شھید بوتگاں وتی راجی جَزبگ ءُ لیکّھی سْیادی دَرنگاز کُت اِیں، بَلے بَژن ھزار بَژن کہ اَنگت مَندوستی ءِ ساھگ مئے سر ءَ ساچان اگاں نَہ پہ اے دابیں کُربانیانی گِندگ ءَ مئے ھِینک نَہ پْرشتگ ءُ دیدوک چو نِزور نَہ اَنت. اَو چُش بوت کنت زاھر ءَ ساپ ءُ باتن ءَ زنگ بَستگ…….. بَلے پد ءَ ھم تَند بَستگیں زنگانی پَلگارگ مَئے کار اِنت کہ چِتور پَلگارگ بنت، اے گْواچِنیں ھبرے کہ پہ ایشی ءَ راجی جزبگ ءُ راجی مھر ھَژدری اِنت، اگاں نہ پہ نام کِسّہ وت ءَ مانا نَہ کنت.

بِہ گِندئے منی اے دوھیں دانک پَہ سرپدی ءِ دَیَگ ءَ ناسرجم اَنت بَلے پہ کسّے ءِ دِل آزاری ءَ ھم نَہ اَنت، چیاکہ راستی وت چو آدینک ءَ پَلگار اِنت. من نہ، بلکیں توامیں راج اے ھبر ءِ پُشدر ءَ جیڑگ ءَ اِنت کہ راستی ءِ بیرکدار کئے اِنت. پمشکا من یکبرے پد ءَ گُش آں بْراس گھارانی آھنیں پَلّ اَنت. اگاں ما وتی مَندوستی ءِ زھرگ آپ نہ کُت باندا گِلگ پہ کسّ ءَ پَشت نَہ کپ اِیت، چیاکہ بلوچی ءَ گُش اَنت “کور ءِ دْپ بَندگ بیت بَلے کَوم ءِ دْپ بَندگ نَہ بیت” پمشکا مارا سرجم ءَ بلوچ بُوّگی اِنت ءُ اے جُھد دیم ءَ بَرّگی اِنت. ایرھت گوں واجہ جی آر مُلا ءِ اے پِربند ءَ
مئے ساہ اِنت بلوچستان مئے جان اِنت بلوچستان
مئے زِرد ءِ ھَمُک درد ءِ، دَرمان اِنت بلوچستان

میراس نہ اِنت میر ءُ، سردار ءُ نوابانی !!
جَھگیر پہ وتی سولیں بَچّان اِنت بلوچستان

نودربر

ھلیل بلوچ

دی بلوچستان پوسٹ

مرچی من کلاس ءَ ریاضی وانینگ ءَ اتاں کہ یک پنچ سالی گونڈو یے اتک ءُ منا سلامے دات ءُ منی دستے دروت گِپت ءُ شُت، من پدا گوں وتی سوال ءَ سر مہ سر بوتاں… من چاراں اے گونڈو پدا اتک ءُ منی دستے دروت گِپت ءُ شُت، پدا واتر اتک گْوشت ئےِ “واجہ من اِدا بہ ننداں بہ واناں؟”

من گْوشت “ھَو بہ نِند.” نِشت وتی کتابے پَچ کُت. من گوں وتی سوال ءَ سر ءُ پیٹال بوتاں… چاراں اے گونڈو پاد اتک شُت، کمّو دیر ءَ پدا اتک دروازگ ءِ دَپ ءَ اوشتات… اے گونڈو چو منا اجب لگ اِت… من جُست کُت “ھاں بَچ تو کئی زھگ ئے؟” پسّو یے نہ دات ءُ شُت… اے گونڈو بار بار ءَ اتک ءُ شُت. من سکّ تکانسر بوتاں، منی ھیال ءِ اَسپ تاچگ ءَ اَت.

مرچی ءَ چہ پیسر من ھِچبر چو تکانسر نہ بیتگاں کہ وتی ھیالاں لگام دات مہ کناں.

اسَل ءَ گَپ ایش اِنت مروچی من نودربراناں یک سوالے داتگ اَت کہ ایشر ءَ ھَلّ بکن اِت، بلے کسّے ءَ اے سوّال شرّ ھلّ نہ کُتگ اَت، نی من وت کوشست کنگ ءَ اِتاں بلے اے سوال سکّ گْران اَت ءُ ایشی چَپ ءُ چوٹ سکّ باز اِتاں… پمشکا منا ھَیدے ءَ سرا زُرتگ اَت کہ اے سوال گوں من ھم گیشینگ بوھگ ءَ نہ اَت.

منی دیم گوں بورڈ ءَ اَت، ساھگے ءَ کوٹی کمّو تہار کُت. من مارت کہ دروازگ ءِ دَپ ءَ کسّے اوشتاتگ بلے من آ نیمگ نہ چارت، ھمے ھیال ءَ کہ ھما گونڈو بیت.

کَسّے ءَ سلام دات گُڑا من دیم وتی ترّینت چاراں دروازگ ءِ دَپ ءَ پرنسپل گوں ھما گونڈو ءَ اوشتاتگ درّائینت ئےِ “سر اے گونڈو پہ وتی برات ءَ اوشتاتگ، وتی نودربراں چُھٹی بِدئے کہ روچ تہار بوتگ.”

مات یاسمین

نِبشتہ کار :کمبر بلوچ

دی بلوچستان پوسٹ

اے دو انچیں اَرپ اَنت کہ ایشاں یک زانتکار ءُ کْواس، دانشمندے بلکیں گیشینت بِہ کنت بلے منی وڑیں یک نابلدیں نِبشتہ کارے ءِ چَہ وس ءُ واک ءَ دریں اَرپ اَنت. پرچہ کہ اے نُگرّھیں اَرپ ءِ اماں، مات، ماس، لُمہ، مادر، mother، کُجام ،کُجام زُبان ءَ کہ دگُنیا ءِ تَہ ءَ اَست اَنت ھر کوم وتئی زُبان ءُ لِلک ءَ اے اَرپءَ را یک جُتائیں ءُ شیرکنیں نامّے ءَ توار پِر جنت ،بلے ھر کس پَہ وتی راجی زُبان ءَ مُدام زَروک ءُ دیوانگ اِنت.

انچوش کہ ما وتی شھدیں زُبان بلوچی ءَ گْوش آں کہ…اماں…..ماس….مات…..لُمہ…..منی دل ءَ چہ دگُنیا ءُ جھان ءِ اے دِگہ زُباناں مئے بلوچی زُبان چو شھد ءُ بینگ ءَ تامدار اِنت .ما یک جْوانیں اَرپے پہ اے مھروانیں سْیادی ءِ واستہ گِچتگ ،بلے پہ ھرکس ءَ وتی راجی زُبان بے دَروَر اِنت.

مات ءِ یک اَنچیں سْیادی ءُ مھرے کہ آئی ءَ کس گوں لَوزاں نویست ءُ بیان کُت نہ کنت، گُڑا من چون اے نیلیں زِرّ ءَ اُوژناگ ءُ گْواز کُت کن آں. اے نیلمبوئیں زِر ءَ ھَمُک اوژناگر وتی بے واگیں اپس ءَ بِہ تاچ اِیت آسر بوت نَہ کنت ، نئیکہ منی وڑیں نابَلدے اے زِرّ ءِ چَولانی کَچ ءُ کساس ءَ کُت کنت. پمشکا یک ماتے چُک ءِ بابتءَ جْوان سرپد بیت ءُ چُک ءِ بابتءَ جوان گُشت کنت، بلے چُک ءِ واکءَ دَر اِنت کہ مات ءِ بابت چیزے گوں چَندے اَرپاں بیان کُت بِہ کنت. مات ءِ مھر ءُ دوستی دگُنیا ءِ تَہ ءَ ھچ رشتہءَ گوں نیست. مات ءِ کدمانی چیرءَ جنت اِنت، مات ءِ پادانی چیر ءِ ھاک مسک ءُ زاپران اَنت. مات ءِ مھرءُ دوستی دُگنیاءُ جھان، امروز ءُ کیامت ءِ وشیءُ ڈولداری ،جلواناکی ءِ نام اِنت. ماسانی دَرگت ءَ دگُنیا ءِ راج دپتر گواہءَ اِنت کہ بلوچ راج دپترءَ ھر وھد چو مات یاسمین ءِ وڑیں مات ءُ گُھار ودی کُتگءُ انگہ ودی کنگءَ اِنت. من وتی راج دْپتر ءُ ایندگہ راجانی راج دْپتراں ماس ءُ گھارانی مزنیں کار کردانی بابت ءَ ونتگ ءُ دیستگ، اِش کُتگ ھم،

بلے چَرے ماتاں من یک مکھیں ماتے ،مات یاسمین ءِ دْروشم ءَ گوں وتی بے بیسّہ ئیں چمّاں دیستگ کہ آئی وتی سالونک ءُ تاسُپیں بَچّ پہ زیبائیں سر ڈگار ءِ پاسپانی ءَ آزات بلوچستان ءِ بیرک مانپُوشت ،دست بَڈ ءَ جَت ءُ راھی کُت کہ بُرو پہ مسکّیں گلزمین ءُ راج ءِ آجوئی ءَ وتی ھَکّ ءَ پیلو بکن. مات یاسمین اے ھبر ءَ سرپد اَت کہ منی ٹھل ءُ سالونکیں بَچّ پدا واتر نہ بیت ءُ نئیت…… گوں من نَہ نِند اِیت مجلسءُ تْران نہ کنت……..ءُمنی پیری ءِ ھَسا نہ بیت. بلے ماتیں گلزمین ءِ مھرانی آس کہ جمبور اَت گُڑا آئی نگاھاں بَس ھما زیبائیں مکسد ءَ اَبید دِگہ ءَ ھِچّ ھکس پَدّر نَہ اَت.انچو گْوش اَنت کہ بچ جگر ءِ ٹُکر ءُ دیدگانی نور ءُ رُژنائی اِنت، بلے ماس یاسمین ءَ دگُنیا ءُ سرجمیں جھان ءَ ھَوار وتی کوم راءَ پیش داشت ءُ گْوشت کہ چہ ماتیں سرڈگارءَ ھچ چیز دوست تر نہ انت.اگاں آ کُجام دوست ءُ دوستناکیں سر ءُ مال، یا گْونگ بالاد ءُ چَنگ بَروتیں بَچّ بِہ یبت، مارا ھچ مَتاہ پہ وتی لَجّ ءُ ننگ ، دود ءُ ربیدگ، ماتیں گُلزمین ءِ رکّینگ ءِ ھاترا دیم ءَ تِر نہ اِنت. ھزار آپرین پہ منی راجی مادرءَ گوں تمردیں توکل ءُ شیریں جگر ءَ کہ پہ راجی آکبت ءِ ھاترا اے دابیں پگرانی واھُند اِنت.

دومی من سندھ سرڈگار ءِ سر ءَ ھم مات ھسینہ گوں وتی چمّاں دیست کہ سندھی جُھد کارافضل پھنورءَ وھدے کہ دژمنیں پاکستان شھید کنت گُڑا مات ھسینہ وتی تِلاہ ءُ تنگوھیں بچّ افضل پھنور گوں وتی مُبارکیں دستاں ماتیں گُلزمین ءِ کُٹ ءَ ایر کنت ءُ پہ وتی راج ءِ ھَمُک ماتاں اے کُلوہ ءَ شِنگینت کہ پہ ڈیھ ءُ منگھیں باندات ءَ ھاترا اے رنگیں ھزاراں گوھریں بچّ مارا کُربان کنئگی اِنت داں اے ھبر ءَ بِہ زانت کہ ماتاں وتی بچّ مُپت ءَ شاگیں گوانزگ ءَ لیلو لیل نہ چَنڈینتگ ءُ نہ نازینتگاں……. بلکیں پہ ھمے روچاں درس داتگ اَنت کہ منی یلیں بچیگ تو مزن بَہ ئے گُڑا لَجّانی پاسپان توئے چو مہ بیت باندا دُژمن تی چمانی دیم منی دامن ءُ جیگ ءَ چاک بِہ دَنت. مرچی ھما سندھودیش ءِ ھر مات چو مات ھسینہ ءِ داب پاد اتکگ کہ ڈیھ ءِ پھازگ ءَ مارا وتی ھچ مال ءُ متاہ دوستر نہ اِنت.

ھمے وڑا جنرل اسلم کہ پہ جی ءُ جان وتی بَچّ ریھان جان ءَ بوسگ دنت ءُ رُکست کنت. پمشکا من گْوش آں اے وڑیں مات ءُپس منی اولی رَند اِنت کہ دُگنیا ءِ راج دپترانی اَندر ءَ دیستگ…. بِہ گندئے اَست بَلے اے منی چم دیستیں راستی اِنت کہ کدی بے ھال ءُ شموشگ نہ بیت.مرچی جنرل اسلم مئے دیواناں ساڑی نہ اِنت بلے وھدے چم کہ مات یاسمین ءَ کپ انت گُڑا جبزگانی کور ھار کنت ءُ اُوستانی کلات مھکم بیت کہ مات ءَ اے کُلیں درد وتی سینگ ءَ جاہ داتگ اَنت ما ھم ھما مات ءِ پَرزندیں پرچہ دُژمن ءَ پیام مہ دئیں کہ زند مارا پہ ھما روچاں دوست اِنت کہ ما وتی سرڈگار ءِ وتواجہ بِہ بَہ ایں. اگاں نہ اے زند زندے گْوشگ نہ بیت کہ تی گُلامی ءَ بِہ گْوز اِیت. بیا اِت گوں اھد ءُ پیمان ءَ مات یاسمین ءِ اے کلوہ ءِ پاسداری ءَ کن اِیں کہ وتی راج ءَ را دیم ءَ جُنزگءٍ سکینءَ دنت، گْوش اِیت دل پٹ مہ بَہ اِت ءُ دیم بُہ جُنز اِت ….شھیدانی پگرءَ منزلءَ سر بِہ کن اِت ،داں کہ شھیدانی ارواہ ءَ تاھیر بِہ رس اِیت. من یک ماتے ءِ بستار ءَ گوں شُما گون آں . دانکہ مئے سرڈگار آجو نہ بیت اے جُہد ءَ دیم ءَ بِہ بَر اِت. من تیوگیں راج ءِ مات ءُ کُل منی پَرزند اَنت
گوں مات ءِ اے گپّاں من ءَ نپولین ءِ ھما گپ گیر اتک کہ واجہ راست گْوش اِیت،”کہ منءَ کسّے یک آشوبی ماتے بِہ دنت من آئرا یک کومے دئے آں. مروچی بلوچ کوم ءٍ وش بھتی اِنت کہ آئرا مات یاسمین ءِ وڑیں زانتکار ءُ چہ آشوبی جوزگاں سر کیل ءُ مزن پگریں ماتے اَست .اے ھبر پمن ٹھلءُشان ءِ گپّے کہ منی مات، مات یاسمین اِنت. منی راج ءَ کس لگتمال کُت نہ کنت. منی سرڈگارءَ کس گُلام داشت کُت نہ کنت.

گُڈّی ءَ گوں ھلی جان داد ءِ اے شعر ءَ

ماننت ھمے نشان اے دنیا ھلاس بیت،
تئی بے ریائیں اوست دلءَ دانکہ برجمیں.

بلوچ راج زندگ بات،آشوب برجاہ بات،بلوچستان سبز بات

گوں شھید چیئرمین گلام مھمد بلوچ ءَ گند ءُ نِند

بلوچی لبزانکءِ پینل گوں شھید چیئرمین  گلام مھمد بلوچءَ  گندءُ نِند، یار جان بادینی  او مبارک علی بلوچ

سیمی بھر

پولکار: ظہور پزل ءُ اصغر وفا

دی بلوچستان پوسٹ 

دومی بھر

مہلوکءَ گوں وتی تعلک داریاں گیش بکنیں ءُ وتی اندرءَ نزمءُ زبت زیات بکنیں نظریاتی بنیادءَ ما ھمے زانیں کہ سوشلزم نظریہ یے حیثیت ءَ ھتم نہ بوتگءُ ننکہ سرمایہ داری یک ھمیشگی نظامےءِ سورتءَ پشت کپیت سماج یک ھرکت کنوکیں چیزے آ ھچبر یک جاگہ نہ اوشتیت سوشلزم چہ سرمایہ داریءَ نوک تریں معاشی رھبندے اگن کسے گشیت کہ سوشلزم بے سوب بوتگ گڑا آئیءِ بدل چے اِنت پمیشا یک نظریہءُ رھبندےءِ حیثیت ءَ سوشلزم موجوداِنت البت بازبراں چو بیت کہ چیزے دیمءَ روت پدا پُشتءَ روت اے وڑیں چیز بنت.

دومی ماں دنیا ءَ کومانی وت واجہی ءُ آزادی ءِ اے نوکیں دیمروی کہ بوتگ اے پہ ما یک جوانیں چیزے چیاکہ مے بنیادی مسلہ ھمیش اِنت المیں ھبرے کہ کومانی جیڑہ کہ دنیاءِ مستریں سوال جوڑ بوتگ تہ چریشی ءَ مے جیڑہ ءَ را ھم کوت رسیت دنیاءِ دیمءَ مے واستا اے ھبر ءِ کنگءِ گیش گنجائش است اِنت کہ ما ھم یک کومی وجودءُ حیثیت یے داریں ءُ مے کومی ھک ھم دیگ بہ بیت اے نوکیں جاوراں بی ایس او ءُ ایدگہ کوم دوستیں گل ءُ کوتانی سرا گیشتر زمہ واری کیت کہ آ بلوچ کومءِ جیڑہءَ دیمءَ بیارنتءُ اے پدمنتگءُ زلم آماچیں مہلوکءِ توار ءَ دنیاءِ دیمءَ چست بکننت .

لبزانک..””  واجہ باز مردمانی گُشگ ایش اِنت کہ ورناھانی تہا ھما نا اُمیتی ءُ بے عملی ءِ مئیلے کہ ودی بوتگ کہ چریشی ءَ آ بازیں راجی گندگیءُ سِلکاریانی تہا ھور بوتگ اَنت ایشی ءِ یک سوبے بی ایس اوءِ تہا آؤکیں پرشتءُ پروشءُ ناتپاکی اِنت شما گوں اے لیکہءَ چہ ھدءَ تپاک اِت ءُ شمے ھیال ءَ نااُمیتی ءُ بے عملی ءِ اتکگیں اے رُجھان چہ وڑا ھلاس بوت کنت ؟

گلام مھمد بلوچ”.. بدکسمتی ءَ مروچی اے ریاست ءِ شرءُھراب ھما کوتانی دستا اِنت کہ منشیات کرپشن ءُ ایدگہ راجی سِلکاریانی  تہا نہ ایوکءَ وت ھور اَنت بلکیں ایشی ءِ دیمءَ بروک ءُ ودینوک اَنت ماں بلوچستانءَ اے راجی گندگی ءَرا مہلوک ھاسیں سورتءَ ورناھانءَ چہ سیاسی کارءُ جہدءَ دور دارگءُ آھاں زہنی سورتءَ کُنٹ ءُ گیش وت کنگءِ ھاترا کارمرز کنگ بوتگ ءُ بوگءَ اِنت . بلوچستانءِ بازیں ھنداں بازیں ریاستی ادارہ چوکہ فرنٹیرکور منشیاتءِ بہاءُ شنگ کنگ ءِ تہا گوں بوتگ اَنت برزتریں ھکومتی عہدہ دار چوکہ جنرل فضل ھک. بلکیں وت جنرل ضیاالھک اے کارانی تہا گوں بوتگ اَنت مروچی ھم بازیں وزیرءُ گزیر اے کار ءِ تہا ھور اَنت ءُ آھانی کاروبار ھرکسی دیمءَ زاہر اَنت بلوچستانءِ ھکومت ءِ جندءِ تہا ءُ اسمبلیءَ بازیں میان استمانی شپک ءُ منشیات ءِ کارندہ نشتگ اَنت نوں چرے مردماں یکے اے اُمیتءَ بداریت کہ آ منشیاتءُ ایدگہ راجی سِلکاریان ءَ گرءُ دار بکننت تہ چرائیءَ دا بہ تریں مردم نہ بیت اے مردم المءَ وتی کاروبارءُ بزنسءَ دیمءَ برنت ءُ پریشی ءَ ھکومتی مشینری ءَ کارمرز کنت.  نوں اے ھبر کہ بی ایس او ءِ کارندہ چہ ھدءَ چریشیءَ اسرمند اَنت منی ھیالءَ اے چیز ساریءَ گیشتر ءُ گندہ تر بوتگ بی ایس او ءِ جہد ءُ جپاہانی سوب ءَ نوں اے چیز کمتر بوتگ اَنت مے ءُ منپی کوتانی نیامءِ یک جنگءِ ھمیش اِنت ما اے راجی سِلکاریان ءَ دارگ لوٹیں ءُ منپی کوت کہ آہانی تہا منشیات پروش ریاستی کوت ءُ ڈرگ ماپیا ھوراَنت آ ایشیءَ را دیمءَ برگءُ شنگ کنگ لوٹنت ما وتی تاکءُ ھوالتاکی بیانءُ جلسہانی ھوالہ ءَ اے چیز پدرکتگ کہ اے دراہیں راجی  سِلکاریانی ودینگ ءِ مکسد بلوچ ورناءَ چہ راجی جہدءَ دور دارگ ءُ آئیءَ را زہنی ءُ جسمانی سورتءَ بے وس کنگ اِنت اے ھبر راست اِنت کہ ماں بلوچستانءَ ورناھانی تہا ترا چشیں مردم رسنت کہ آ اے وڑیں چیزانی تہا گیتراَنت بلے ھوریں سورتءَ ورناھانی کوت چرے سِلکاریان گستا اِنت بلکیں اگن اے ھرابیانی دارگ ءِ واستا جہد ے کہ بوگءَ اِنت آ مے ھوالہءَ بوگءَ اِنت ورناھانی تہا نااُمیتی ءُ بےعملی ءِ یک وکتی مئیلے کہ ودی بوتگ آ زوت ھلاس بیت چیاکہ پرشت ءُ پروش نوں وتی گڈسرا رستگ اَنت ءُ گچتگیں سیاسی کوت ردوم گران اَنت ءُ مہلوک ءِ رہدربری ءِ زمہ واری ءَ پورا کنگءَ اَنت من دلجماں کہ زوت ورناھانی تہا سیاسی بھیسہ ءُ عملءِ جاور ودی بنت ءُ اے راجی گندہ کاری تاں مزنیں ھدیےءَ کمتر بیت۔

لبزانک”” ھنوگاں بلوچستانءِ دوسینئرتریں سروک بازیں سالانی دراں ڈیہیءَ پد ملکءَ واتر بوتگ اَنت شما المءَگوں اے سروکاں گندءُ نند گپءُ تران کتگ شمے ھیالءَ چریشانی واتری ءَ بلوچستانءِ سیاسی جاورانی تہا چہ وڑیں بدلی اتک کنت ؟

گلام مھمد بلوچ”.  ھئو  ما گوستگیں روچاں گوں نواب مریءَ ھالءُ اھوال کت ءُ لوٹ اِت کہ آہانی جیڑہ ءُ مسلہاں بزانیں نواب صاھبءِ گپ ایش اَت کہ ھنچیں جاور پیدا بوتگ اَتنت کہ آہاں آنگو وتا داشت نہ کتءُ دومی آئیءَ گشت کہ گوں وتی سنگتاں شورءُ سلاہ ءَ پد آ یک راھے درگیجیت گوں آئی ءَ دگہ زیاتیں گپءُ تران نہ بوت چیا کہ وھدے کسے وت گشیت کہ من تنی وھدی یک آسرےءَ سرنہ بوتگاں ما جوان نہ زانت کہ گوں آئیءَ زیاتیں بھس بکتیں البت ما چہ نواب صاھبءَ ھمے امیتءَ داریں کہ آئی ءِ ماں بلوچ جہدءَ ھما کردءُ بہر کہ بوتگ آ ایشی ءَ برجم داریت بلکیں دیمءَ بارت بلوچ جہد ءِ ھما لوٹ ءُ زلورت کہ است اَنت آ ایشانی پورا کنگءِ واستا یک جوانیں کردے پیش داریت ءُ وتی سرجمیں کوتءُ وسیلہاں کارمرز کنت
گوں سردار مینگلءَ البت مے دراجیں بھسءُ ترانے بوت چرائیءِ گپاں من ھمے مارت کہ سردار صاھب چہ ورناہاں سک نارزا اَت آئیءِ نارزائی ءِ مستریں سوب اے گندگ بوت کہ ورنا سیاسی پڑا چہ آہاں بے ھاجت ءُ گِسر اَنت ءُ میدان اِش چراہاں پچ گپتگ من اے ھبر پدر کت کہ اگرچہ ما اے میدانءَ بوتگیں بلے  سردار مینگل وڑیں ھما مردم کہ جہدءِ پڑءَ گون بوتگ اَنت ما آھانءَ ھماہانی لائکیں شرپ ءُ ازت داتگ ءُ آہانی رہدربری ءَرا منتگ من گشت کہ ورناھاں مروچی اے جاگہ کہ گپتگ نظریاتی ءُ عملی جہدءِ آسرءُ بے مٹیں کربانیانی رند گپتگ بائدیں کہ اے پیشرپت ءَرا جوانیں چیزے زانگ بہ بیت ءُ ایشی ءَرا ایرجنگ مہ بیت . دگہ یک گپے کہ سردار صاھبءَ کت آ  ایش اَت کہ نوکیں جاورانی، لوٹ ایش اِنت کہ ھما سنگ کہ ما ساریءَ پنجابءَ جتگ آ نوں پشتونءَ جنگ بہ بیت ما گوں اے لیکہءَ تپاک نہ کت چیا کہ مے ھیال پشتون مے بنیادی ءُ مستریں دشمن نہ اِنت اگن پشتون ءِ یک ھاسیں لابی یے بلوچ پشتونءِ نیامءَ جنگ ءُ دشمنی پیدا کنگ لوٹیت تہ ما آھانی اے پندلءَ بے سوب بکنیں ءُ آھاں کلیں پشتونانی نمائندہ مزانیں چیاکہ آ ھکیکتءَ کلیں پشتونانی نمائدہ نہ اَنت مے ھیالءَ مے ھکانی جنوک ءُ پُلوک ھما اِنت کہ ساریءَ بوتگ پمیشا مے سنگ بائد اِنت ھما نیمگءَ بروت  سردار صاھب ءَ پرے واستا ھم ورناھان ءَ ایر جت کہ آھاں بی ایس او داشت نہ کت پرشتءُ پروش ءِ ھرجان بوت من گشت کہ ھئو ایشی ءَ مے ردی گشے یا گناہ ءُ جرم گشے اے بوتگ بلے بائد اِنت ایشی ءِ بنیادی سوب ھم چارگ بہ بنت مارا ھمے واستا پروشگ بوتگ کہ ما سردار مینگل ھیربکش مری ءُ ایدگہ سروکاں ءَ کومی تھریکءِ بہر گشتگ ءُ جہد ءِ دراہیں بہرانی ھوریءُ ھمکاریءِ واستا جارجتگ ھمے ھاترا فدا اھمد ءُ سلیم وڑیں ورناہیں سروکانءَ شہید کنگ بوت۔

بلے اپسوز ءِ ھبر ایش اِنت کہ کشندہ دومی مردماں مروچی کبول اَنت بلے ڈاکٹر حئی کبول نہ اِنت کسے کہ اتھادءُ تپاکیءِ ھبرءَ کنت گڑا دوست ءُ دشمن ءِ پرکءَ بزانت شرءُ گندگءِ پرکءَ بزانت اے چیز نوں ھمے سروکانی دستا اِنت کہ آ چہ ھدءَ اتھاد ءُ ھمکاریءِ عملءَ دیمءَ برنت سردار صاھب ءِ ھیال ایش اَت کہ اگن بی ایس او ءَرا سیاسی تنظیم یےءِ حیثیت دیگ بوت تہ اے پرشیت من گشت کہ بی ایس او چہ شُروءَ سیاسی جماعت یےءِ حیثیتءَ جوڑ بوتگ ءُ ھمے وڑا ھلتگ آئیءِ سیاسی ءُ پکری رھبند بوتگ اَنت آئیءِ بنیادی تنظیمی ڈیل ھمے وڑءَ ایر کنگ بوتگ آچہ سیاسی جیڑہءُ مسلہاں جتا ھچبر نہ بوتگ اے باروا من گشت کہ وھدے ضیا الھک ءِ مارشل لا ءَ پد سردار صاھبءُ ایدگہ دیمی سرپانی سروکاں مہلوک شکست ھوردگیءِ مارشتانی تہا یلہ دات ءُ وت شت اَنت تہ اے بی ایس او اَت کہ گوں مہلوکءَ ھور ءُ ھمراہ اَت اے سرجمیں دورءَ بید گوس بکش بیزنجوءَ دگہ ھچ اولسی سروک نیست اَت بی ایس او ءَ اے سرجمیں دورءَ مارشل لاءِ زلم ءُ زورانی دیمپانی کت کومءِ ھوسلہ ءُ بھیسہ ءَ را برجاہ داشت ءُ آئیءَ را شکست ھوردگی ءِ مارشتانءَ کم کمءَ ھتم کت من گشت کہ وھدے اے سروک اِنچو سالاں ڈنی ملکاں نشت اَنت تہ بلوچ کومءِ پردیے ءِ حیثیتءَ من چرآہاں اے جست ءِ ھکءَ داراں کہ آ کہ ڈنءَ شت اَنت تہ بلوچ کومءِ ھاترا شت اَنت یا وتی جندءِ پہریزءِ ھاترا ءُ کومی سروکانی حیثیت ءَ آھاں اے بازیں سالانی دراں ڈیہی ءِ درگتءَ پہ کومءَ چے کتگ مے ھمے گپ ءُ تران بوتنت.

لبزانک”””  باز وھداِنت کہ گوں بی ایس او سہبءَ شمے نزیکی ءُ ھوری ءِ اھوال شنگ اَنت بلے تنی وھدی عملی سورتءَ ھچ نہ بوتگ ایشی ءِ سوب چے اِنت ؟

لبزانک……  گلام مھمد بلوچ اے مسلہءِ باروا مے مرکزی کونسل ءُ مرکزی کمیٹیانی تہا پیسلہ بوتگ مے مرکزی کونسل ءِ پیسلہ ایش اِنت کہ اگن سہبءِ سنگت گوں ما نزیکی ءُ ھوری لوٹنت تہ ما پرے واستا تیاران بلے شرت ایش اِنت کہ آ وتا چہ ھبیب جالبءِ ٹولیءَ لاتعلک بکننت چیاکہ مے ھیال ءَ اے ٹولی بی ایس اوءِ پروشگءُ ایشی ءِ سروکانی شہید کنگءِ تہا گون بوتگ ءُ پرے واستا آ پہ مے واستا کابل کبول نہ اِنت . بلے سہبءِ سنگتاں بازیں گپءُ تراناں پد ھم ھچ نہ کتگ ماگوں آہاں تچکیں ھبر کتگ ءُ آھانءَ گشتگ کہ ابید چہ ھمے یکیں شرتءَ مارا دگہ ھچ اعتراض نیست ءُ اگن شمارا شرتءِ است تہ بگش اِت بلے آھانی گشگ ایش اِنت کہ بی ایس او ءِ پروشوک ءُ ایشی ءِ سروکانی کشوکان ءَ پہل کنگ بہ بیت نوں اے چیز مے دستءَ نہ بیت ایشی ءِ اختیار نہ منا است اِنت ءُ نہ مرکزی کیمٹیءَ مارا وتی مرکزی کونسل ءِ پیسلہانی سرا روگی اِنت .

روان اِنت

دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت

رَجانک
اِمران ھان ءُ نوشکی ءِ گنوکیں زالبول

نِشتہ کار :پروپیسر گُلام دستگیر سابر

رَجانکار :زِرگْوات بلوچ

دی بلوچستان پوسٹ

شُما چاگردی رَسانکدر ءَ پاکستان ءِ مَزن وزیر Prime minister اِمران ھان ءِ یک تامُر Video ءِ دیستگ کہ آئی تَہ ءَ اِمران ھان چَہ مَزن وزیری ءَ پیسَر وتی تْران ءِ تَہ ءَ ماں کْوزہ جَتگیں بلوچستان ءِ یک واکیہ ءِ سر ءَ ھَیالانی دْرشان ءَ کنت کہ چَرئے درد ءُ اَندوھاں سر باریں واکیہ ءِ اِش کنئگ ءَ پَد ،ھمے مَراگش ءُ جَلسہ ءَ ساڑی اِیں لھتے زالبول گِریت. بَلے بیا اِت من شُمارا ھما گْواچنیں کِسّو Story ءَ گْوش آں کہ چِتور اِنت.

اِمران ھان کہ ھما واکیہ ءُ گنوکیں زالبول Crazy /Mad,Poll,Woman ءِ بابت ءَ گپ کنت، آ کْوزہ جَتگیں بلوچستان نوشکی ءِ واکیہ یے. من ءُ منی ھمراہ، بیل ءُ سنگت اے واکیہ ءِچم دیستیں شاھد اَنت، مرچی چَہ بیست سال ساری ماں نوشکی ءَ دْپتری ڈُکّال Historical Famine, dearth اِنت کہ ڈاک ءَ ھَوار کش ءُ گْور ءِ ھَزاراں مھلوک ءُ مَردُمانی مال ءُ دَلوت (مال مویشیLivestock)مَرگ ءِ دْپار جوڑ بوتگ اَنت، آپ کُٹ اِتگ اَنت، پمشکا اے ھَزاراں مَردُمانی اے گَلگ وتی ءُ وتی زھگانی جان ءُ زِندمان ءِ رکّینگ ءَ دیم پَہ نوشکی ءِ نیمگ ءَ لَڈ ءُ بار Migration کن اَنت. آ گوں تُن ءُ ھُوشام Thirsty ءِ بے کِساس نَہ گیگیں جاور ءُ ھالت ءَ ماں نوشکی ءِ ھِلاکہ Area کسانکوری ءِ نزّیک ءَ سَر بنت، بازیں روچانی تُن ءُ گُژنگی ءِ……. آماچ بنت کہ ایشانی ھالت ءُ جاور ءَ ھَندی ءُ چاگردی وڈیرہ ھدایت اللہ بادینی گِند اِیت پَرایشاں رَھمت ءِ پَرشتگ جوڑ بیت ءُ ھما دْمان ءَ ورگ ءُ وردن ءِ چِنّ ءُ نَزّار ءَ گُلائیش بیت ءُ اِیشانی جان ءُ گْراں بھائیں زِندمان ءَ رَکّین اِیت.

وڈیرہ ساھب ھما ساھت ءَ نوشکی ءِ چاگردی ءُ سیاسی مھلوک ءُ مَردُماں ھال Information دَنت کہ ھَزاراں مَردُم مزنیں مُشکل ءُ جنجالاں پَد وتی بے وسیں زِندمان ءِ رَکّینگ ءَ مئے ھِلاکہ Area سْیاہ کوہ ءِ دامُن ءَ بے آپ ءُ توشگ ءَ سربَتگ کہ مئے شُمئے مَدت ءُ کُمکّ ءِ رھچار ءُ وداریگ اَنت، اگاں ما اے ساھت ءَ آھانی مَدت ءُ کُمک نَہ کُت گُڑا آھانی زِندگ بُوّگ گْران اِنت.
اے ھَبر ءِ اِش کنئگ ءَ ھَوار نوشکی ءِ ورنا، سیاسی ءُ چاگردی مَردُم ھما دْمان ءَ یکجاہ بنت کہ آھانی تَہ ءَ پاروک بلوچ، سردار مھمد بکش مینگل، کامریڈ اسمائیل، کامریڈ ھَمید ایڈووکیٹ، لیاکت مینگل، کاسم شاہ، سادِک جمالدینی، کِپایت کرار، میر بالاچ ھان جمالدینی ءُ دِگہ باز مَردُم ھَوار اَت.

ھما دْمان ءَ گُل ھان نسیر چوک ءَ یک دَزکُمکّی بُنجل Camp یے ٹھینگ بیت کہ منی ڈُبّہ ءُ زمہ واری ھمیش بیت من اے بُنجل Camp ءَ بِہ نِنداں ءُ لاوڈ اسپیکر ءِ سر ءَ جار بِجن آں داں اے ھَند ءُ دْمگانی مھلوک پَہ اے بے وس ءُ لنگڑیں، شُد ءُ گُژن Hunger زَدگّیں مَردُماں چَندہ Donation جَم بکن اَنت.
لھتیں روچانی پِر گْوزگ ءَ پَد ڈُکّال آماچیں مَردُمانی شُمار ھَزارانی تَہ وَدّان بیگ، اے دوران ءَ نوشکی ءِ مھلوک Public ،سیاسی ءُ چاگردی رَزاکاراں Volunteers ھما دْپتری Historical بے دَروَریں کِردار پیلہ کُتگ کہ آھگی مِسال سک کم دَز کپ اِیت.

بی بی سی، سی این این ءُ دِگہ باز اَدارھانی سَوب ءَ اے بُنجل Camp ءِ ھَبر ماں تانسریں دُگنیا ءَ جَکس اِیت، شِنگ ءُ تالان بیت. ھما وھد ءَ پَہ اے بے وسیں مَردُمانی توار ءِ شِنگینگ ءَ نامداریں ھالکار ءُ تاکّکار Journalist مَنزور بلوچ ءِ ھم یک دْپتری Historical کِردارے کہ آئی ءَ پیلو کُتگ.

آ وھد ءَ کْوزہ گیریں پاکستان ءِ کارمستر President پَرویز مُشرِپ، گْوستگیں کارمستر President پاروک لُگاری، بانُک کُلسوم نواز، کازی ھُسین اَھمد ءُ اِمران ھان ءَ ھَوار دِگہ باز سیاسی رھبر ماں نوشکی ءَ کئیت ءُ اے بُنجل Camp ءَ دورہ کنت.

اِمران ھان آ وھد ءَ نوک چَہ کرکٹ ءَ دَز کش بیت ءُ ماں سیاست ءِ پِڑّ ءَ وتی گاماں ایر کنت، پَہ سِتک ءُ باوَر اِمران ھان ءِ ھمبرائی ءَ یک مَزن ءُ پْرشتگیں نام ءِ ھُدا بُند گون نَہ اَت، ءُ بلوچستان ءِ ھر مَردُم چَہ پی ٹی آئی ءِ نام ءَ ھم نا آژناہ اَت.
اے سوچکان May سَن دو ھَزار ءِ واکیہ اِنت کہ اِمران ھان نوشکی ءَ کئیت آ وھد ءَ نوشکی ءَ یک مَردُمے ھم آئی پاٹی ءَ نَہ بیت. یک پَشتونے ءِ بِستار ءَ ھُدامُرزی وزیر ھان دُرانی ءَ ماں کلی بَدل کاریز ءَ ھاجی اَبدالسمد بڑیچ ءِ گِس ءَ پَہ سُبارگ ءِ ھاترا اِمران ءِ بَند ءُ بوج ءَ کنت.
من ءَ منی سنگتاں گْوشت کہ تو اِمران ھان ءَ چَہ ورگ ءَ پَد ڈُکّال ءِ بابتBriefing ،سر ءُ سوج، سرپدی بِہ دَئے ءُ اِمران ھان ءَ بُنجل Camp ءَ ھم بِیار. ما وھدے ورگ وارت، من بُنجل Camp،ڈُکّال، شُد ءُ گُژن ءَ زَدگّیں مھلوک ءِ گریبی ءُ چَہ سرکار ءِ نیمگ ءَ ھَیال، چار ءُ دِلگوش نَہ دَیَگ ءِ سَوب ءَ شَرّیں وڑے ءَ اِمران ھان ءَ پوہ ءُ سَرپد کُت،
باوَر کن اے مَردُمانی گریبی ءُ بے وسیں زِندمان ءِ بابت ءَ کہ سرپد بوت تَہ اِمران ھان ءِ سُھر کُت اِسپیت اِیں دیم زَرد تَرّ اِت، ھما دْمان ءَ گْوش اِیت من ءَ اَنوں، اَنوں ماں بُنجل Camp ءَ بَر……

ما مَردُم گاڑیاں سَوار بوت اِیں ءُ ماں کسانکوری ءَ بے دَز رَسیں مھلوک ءِ بُنجل ءَ شُت اِیں، اِمران ھان ءَ ساڑی اِیں سنگتاں ماں بُنجل Camp ءَ دورہ کنائینت کہ اُود ءَ یک اَجبیں واکیہ ءِ بوت.

بُنجل Camp ءَ یک گنوکیں زالبولے اَست اَت کہ آھگی جود ءِ نام ماسُوم اَت. آھگی جود ءَ گْوشت وھدے مئے آپ کُٹ اِتگ اَنت، ڈُکّال ءِ سَوب ءَ تیوگیں مال ءُ دَلوت مُرتگ اَنت، ما مَردُم وتی جان ءُ زِندمان ءِ رَکّینگ ءِ جُھد ءَ شپ تھارگ ءَ ھُدا وند ءِ نام گیپتگ ءُ دَر کپتگ اِیں. من وتی آ دِگہ دْراھیں زھگ زُرتگ اَنت بَلے منی یک لَنگ ءُ مُنڈیں جَنّکے بوتگ کہ گَشت نَہ کُتگ ئے، من آ ایوک ءُ شپ ءِ تھنائی ءَ یَل داتگ ءُ دَر کپتگ اَنت. منی آ لَنگ ءُ مُنڈیں جَنّک ءَ گریتگ ءُ چیھال جَتگ کہ اَبّا……. ماتی…… من ءَ یَل مَہ دَئے اِت ،اے رَستر من ءَ وَر اَنت……… بَلے ما آئرا اِیوک ءُ تھنا یَل دات دات.
ما وھدے راہ گیپت اِیں گُڈّی ءَ داں آھگی چیولّگ ءُ چیھانٹانی توار اَتکگ………. چوش کہ ما تُن ءُ گُژن ءِ ھالت ءَ پَند بُرّان داں اے بُنجل Camp ءَ اَتکگیں، ھما زار ءُ کتار ءَ گِریوگ، چیولّگ ءُ چیھانٹانی توار کہ منی زال ءِ گُوشاں ژَمبگ ءَ بوتگ، وھدے ما اے بُنجَل Camp ءَ سَر بوتگیں گُڑا ھما اِنت کہ منی لوگبانُک گنوک اِنت.

چَہ اے ھَبر ءِ اِش کنئگ ءَ اِمران ھان ءِ ھَمبرائی ءَ کُلّانی دیم زَرد تَرّ اِتگ، ھمے واکیہ اِمران ھان مُدام وتی گُشتانکانی تَہ ءَ گْوشتگ کہ ھَمُک جَلسہ ءُ مَراگشاں زالبولاں گِریتگ.
مرچی اِمران ھان وت مَزن وزیر اِنت ،مرچی پَد ءَ تانسریں کْوزہ جَتگیں بلوچستان ءَ ڈُکّال اِنت. زی اِمران ھان تھنا یک گنوکیں زالبولے دیستگ، مرچی ھَزاراں زالبول گنوک جوڑ بوتگ. بلوچستان ءَ ڈُکّال ءُ دِگہ بازیں اَڑ ءُ جنجال، جیڑھ ماں درد ءُ اَندوھانی سیمسران اَنت، بَلے کئے اِنت؟ پی ٹی آئی ءِ آ باسک کہ اِمران ھان ءَ گْوشت کنت کہ واجہ بلوچستان ءَ ڈُکّال گوں ھُون ریچّیں کارستانیاں آھن ءِ آس گْوارگ ءَ اِنت، ھَے کن واجھیں مَزن وزیر دیر مکن کہ دِگہ بازیں ماتاں چَہ گنوکی ءَ بِہ رَکّین…… اگاں نَہ جنرل زیا ءُ ذولپکار بھٹو ءَ چے گیش تاکت مَند نَہ ئے، چیاکہ گنوکیں ماتانی اَرز ءُ پِریات، چَہ دُواھاں ترا کس نَہ رَکّین اِیت. واجہ اِمران ھان اے شَؤر ءُ سَلاہ تی دَستان اِنت کہ چے کن ئے.

(دو دانک منی:ما شُما کُل سرپدیں کہ پاکستان ءِ، ءُ مئے سیادی زُوراک ءُ ایردست ئیگ اِنت. پمشکا مئے مکسد ءُ مَنزل آجوئی اِنت.اے نبشتانک رَجانک کنئگ ءِ مَستریں سَوب ھما واکیہ اِنت کہ من ءَ سِکینے دات. بِہ گِندئے بازیں اَنگت سَرپَد نَہ اِنت کہ چوشیں ھَزاراں واکیہ چَہ مئے نِگاھاں اَندیم ءُ وھد ءِ تَند بَستگیں دْنز ءُ مُجانی بار بیٹ آں بیگْواہ بیتگ اَنت. بَلے اے واکیاتاں ھر یَکّے سَرپَد اِنت کہ ناشریں پاکستان ءِ رستریں لشکر ءَ چمّانی دیم ءَ ماتانی لاڑیں بَچّ، گھارانی تنگوھیں بْرات،زالکانی جود زِندانی کُرتگ ءُ ھَزارانی جون ماں ویرانگاں داتگ اَنت کہ چَہ گنوکی ءِ سیمسراں ھما دست کُتگ اَنت،نہ زِندگاں شُمار بنت…. نہ مَردگاں ھِساب. گُڑا اے ھَبر پَھمگ ءُ دِلگوش کَرز اِیت کہ اے نادْراھی ءِ اِلاج چی اِنت…… آجوئی، بیدے آجوئی ءَ دِگہ ھِچّ دارو ءُ دَرمان مئے ایردستی ءِ آزگ ءُ زیمّیں ٹپّانی مالَم نَہ بیت. وھد ھمیش اِنت کہ بلوچ ءِ ھَر زھگ ءُ پُسّگ، بَچّ ءُ جَنّک، پیر ءُ کماش دیم ءَ دَر بیا اَنت، اگاں نَہ تُک چَہ دْپ ءَ کپت پَد ءَ چِنّگ نَہ بیت. من پَد ءَ گْوش آں اے وھد نِندگ ءُ دَست سر ءَ سَمارگ ءِ نَہ اِنت، بلکیں توکل ءِ میڑینگ ءُ گامانی دیم ءَ شَھارگ ءِ وھد اِنت.)

شہید ملا دیدگ بلوچ

سرباز وفا

دی بلوچستان پوسٹ

زاناں زندءَ دستگیر نہ بیت ملا

دانکہ یک تیر ءِ تُپنگ ءِ نلءَ است

(بقول ملا دیدگ)

بلوچ راجی جہُدکاراں دُژمن ءَ را ہنچیں سبک داتگ وہدے دُژمن پہ سرمچارانی پٹ پول ءَ درکیت ہزار رندءَ جیڑیت زانت بلوچ سرمچار ءِ سرا آوار جنگ من ءَ باز نُکس ءُ تاوان انت اگاں ہرجاه ءَ بلوچ سرمچار ءِ شہید ءِ کرتگ گڑاں وتی سنگتانی ڈونڈیں لاش ءِ گون بوتگاں لہتیں چو ٹپی ایں کُچک ءَ واه جناں بوتگ واپس بوتگ اے گپ ءَ شر دلجمیں ایشانی جنگ چو ارزان نہ انت چوش زانت کہ منی همراه کراهداریں لشکر ءِ بلوچ سرمچاراں ءَ هک ءُ انصاف بلوچی گیرت ءِ تُپنگ بڈءَ اِنت اے پہ ارزانی جنگ نباں ؟

من هما سنگت ءِ نام ءَ گراں یک گریبے ءِ گس ءَ ودی بیت وتی قومی فرض ءَ ادا کنت نسیم بلوچ اورماڑه ءَ ودی بیت بازیں وہدے بی ایس او آزاد ءِ باسک بیت نسیم بلوچ وتی تہا ہنچو مُہکم بیت روچ پہ دوچ وتی قومی جُہدا دیم ءَ براں کنت نسیم جان ءِ پنام ملا دیدگ انت وہد ءِ چہ بی ایس او آزاد ءَ پارگ بوت اهت بی ایل ایف ءَ یک جنگی سپائی ءِ جوڑ بوت

اگست 2013 ات ملا دیدگ بی ایل ایف ءِ اوتاک ءَ ات پہ ٹریننگ کنگ ءَ۔هما مہروانیں ءُ دلسپائیں سنگت ات مدام گون وتی سنگتاں پہ مہروانی پیش بوت گپ ءُ هندگ دلوشی، ملا دیدگ هما زمہ داریں سنگت ات آئی ہرکار ءِ تہا وتی زمہ داری پیش کناں کُتاں اولی رندا اوتاک ءَ سر بوت ہشت ماه نشت ہرروچ گوں مزاک ءُ کندگ دلوشی کنگ ءَ ات یک زبان دوستیں شائر ءِ ات مدام شئر ءُ شائری کُت اوتاک اولی رندات آئی ءَ گاٹ ءِ زمہ داری راشن ءِ زمہ داری ٹریننگ ءُ کلاس ءِ زمہ داری سرکل ءِ زمہ داری کُلیں زمہ داریاں پوره کنان ات ہشت ماه ءَ پد چُھٹی ءَ شُت شش ماه ءَ رند اهت اوتاک مردم آئی ءَ تب ءَ سرپد بوت اَنت سنگت ءَ وتی تہا یک بلائیں بدلی ءِ آرتگ گوں وتی سنگتاں مہر کنگ وتی اوتاک ءِ ہر چیز ءِ هیالداری کنگ وہد ءِ کیمپ کمان ءَ آئی زمه داری دیست آں ملا دیدگ اوتاک ءِ زمہ داری دات آں آئی وتی زمہ داری یک شریں وڑے ءَ پوره کُرت آں تاں دوسال ءَ گیش اوتاک ءِ وائس کمان ءِ زمہ داری دیگ بوت۔

20 مئی 2017 سہُب ءِ سرا مہلہ سورگهر ءَ ہیلی کاپٹرانی توار ات پاکستانی فوج ءَ غیرانسانی کار بندات کُتگ ات هفت سنگت سور گهر شش بینٹی ءَ نندوک ات پاکستانی بازیں ہیلی کاپٹر ءِ اهت ات آپریشن کنگ ءَ ات سنگتان گوں جوانمردی ءَ پاکستانی فوج ءَ مقابلہ کُت همئے آپریشن چار سنگت سلیم جان عرف ءِ ٹلوک جاه ءِ آهو کوہڑو ءِ نندوک ءِ ات داد محمد عرف ءِ عاصم بلوچ جاه ءِ آهو کوہڑو ءِ نندوک ءِ ات حکیم جان عرف ءِ کندیل بلوچ جاه ءِ آهو زیلگ ءِ نندوک ءِ ات نسیم جان عرف ءِ ملا دیدگ شہید بوت سئے سنگت دراهت من یک سنگت ءِ را جست گپت هالاں بہ دے اے آپریشن چون بوتگ تو همودا بوتگ ءِ سنگت ءَ گُشت ما نندوک بوتگاں بندات ءَ چار هیلی کاپٹر اهتگ آپریشن بندات بوتگ دو هیلی کاپٹر ءَ گاٹ ءِ سرا تیرگواری کُتگ دو ہیلی کاپٹر مئے جاه ءِ سرا شیلنگ کنگ ءَ بوتگ ٹلوک جان ہمئے گُشتگ سنگتاں یک یک بوان کنیں ہیلی کاپٹراں آپریشن کنگ ءَ انت اے وڑا ما کلیں شہید کنگ باں سنگتانی نزیک ءَ ہیلی کاپٹر کمانڈو دور دیاں کنت ملا دیدگ ہیلی کاپٹرا کلاشن ءِ سرا جنت دومی ہیلی پُشت ءِ نیمگ ءَ چہ تیر گواری کنت ملا دیدگ شہید بیت آدگیں سنگت وتا کور دیاں کناں داں مزنیں جاهے ءَ روان کناں پاکستانی فوج ءِ بازیں کمانڈو ءِ جنگ بیت پاکستانی فوج وت حیران بیت اگاں من اے آپریشن کُتگ گیشتر ما نقصان وارتگ، راست کہ ملا دیدگ وتی قول پورا کُرت نمیران انت۔

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔

آزمانک داس

هسابجار

دی بلوچستان پوسٹ

” انتے سکران ؟ -”
” لا انا لا سکران شو مشکل ؟ – ”
” مشکل مافی انتے سکران گواد -”
” هان چے بوت ”
” هچ نبوت اے گُشگ ءَ انت کہ تو نشہ ئے-”
وسرا نشہ ئے ؟ -”
” ترا کارنیست ، من وت اشی ءَ راہ ءِ روان گوں، واجہ زاهد ءَ بید ءِ منی پیروک ءَ ورگ نہ وارتگ اے پوک منا پجارگ ءَ نہ انت -”
” تی پیروک زاناں چی ئے بوتگ ادا ؟ -”
” منی پیروک واجہ زاهد ءِ هاس ءُ ناس بوتگ ، واجہ ءِ کاواه دیوک بوتگ ، ہر جاه شتگ بُرتگے گوں ، اے آڈالیں سپائیوک انگت منا زانگ ءَ نہ انت -“

” هسا تو مارا گار دیاینئے -”
“هچ پگر مکن اے مئے لمپاں اوں گپت نہ کنت -”
” کلام ءَ شرجت تی همراهی مارا گران ءَ کپت شر شر ءَ وتی چُکے لاپ دیگ ءَ اتیں ، تو مئے مات بند کُت سوچے بریں -”
” کجا بریں مارا گپتگے ، بلے پریشان مہ بو -“

” گپتگے ؟ ”
” هو ناں -”
” چتو گپتگے ؟… اے و شر شر ءَ تمیز ءِ سرا گوں تو هبر ءَ انت نہ لٹے گون انت ئے نہ هتکڑی -”
” اے پاکستان وَ نہ انت ءُ نہ اے ایف سی انت ، گرگ وَ همیش انت ، زاه وَ زرئے دیگ ءَ انت تو کہ سرپد نہ بے بیچارگ -” آئی ءَ دل ءِ تہا گُشت – پدا گوں ترندئی ءَ گُشتے
” اناں یار هچ پریشان مہ بو ، من انی پونے کناں اشی ءِ تِرّ درکایاں ، اگاں پہلی نہ لوٹ اتے گُڑا بُگش -”
” هسا اشی ءِ تِرّ درکایاں یا نا اے مئے تِرّاں الم کش ایت -“

” گِر گِر مافی رو سیّاره اجلس -”
” هاں چے گُشیت کمبہتیں ٹیلُک گوں وتی دمانگاں -”
” پوکے اڑے اے منا زانگ ءَ نہ انت ، گُشی بریں گاڑی ءَ نند -”
” هان تو مئے کار کتان شوم ، ترا اے ٹیروک وسرا سرا انت -”
” یکے تو مارا کُشت ایر کُت -”
” بابا تی پیروک ءِ دور داس ءِ بیتگ نی اشان داسی کار نیست مُپت ءَ مارا گار مدیائین ، انگت ایردستی بہ من ، بُگشے ما نشہ نہ انت ترا من گُشت شوم ڈبوک مہ ور مئے سپر دوریں راہ ءَ مارا شُرطہ ئے گیپت -”
” اناں اے مارا بند کُت کنت -”
” هرچی کنئے همدا وتا چوٹین تو وَ زانے کہ اگاں اے مارا تانها بہ بارت ، پدا مارا پاکستان ءِ دست ءَ بہ دنت پما هچی پشت نہ کپیت -”
” اڑے گوہے وارتگ ، تو کمو سبر کن من انی اشی ءِ هوش ءَ کاراں ، منا کمو موہ بہ دنت پونے کناں -“

” یاالله رو باکستانی گواد -”
” هاں ؟” –
” مَرگ ء هان ! چے هاں ؟ … یکے تو مئے هوش وَ بُرتگ بریں سوار بی ہرچی بیت تانها -”
” ترا گوں وتی گوالگ ءُ ٹیروکاں کلام ءَ جت تو مارا گار دات شوم -”
” هچ مُگش مئے جند ءَ جن انت ” –
” هاں اول سرا تو وتا مِکے کتگ ات وَ نو گُشے هچ مہ گش تو گو دبی منی پیروک ئیگ انت نی گُشے جند ءَ جنت ، من بہ رساں من تچک ءَ گُشانے کہ من هچ نہ کتگ ءُ نہ وارتگ تو وتی ءَ وزانے “-

” تو منا گپ ءَ مہ داشتیں آ وهدی کہ اے گوں وتی ساهب ءَ گپ ءَ ات من وڑے کتگ ات ، بلے درست تی کار بوتاں ، بلے پریشان مہ بو ، تانها رویں من اشی ءِ کار ءَ کناں -”
” ترا وَ پیر ءَ بُرتگ ات ، بلے تو مئے چُک چورو کتاں -“

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔

پچیں چم
نبشتہ،منشایاد

رجانک،حنیف بلوچ

دی بلوچستان پوسٹ

آ سرپد بوئگ ءَ نہ اَت کہ من مُرتگاں یاکہ زندگاں۔
کموکیں مِرَگ آئی وتی زندگی ءَ باز رند ءَ دیستگ اَت. بِہ گندئے بوت کنت آ مرچی پَکّ ءَ مُرتگ اَت ،بلئے چون ءُ چے پیم؟
آئی ءَ ھچ گپ یاد آھگ ءَ نہ اَت۔آ اے بابت ءَ اُوں سرپد اَت کہ اے وھد ءَ چون اِنت ءُ کُجا اِنت، چونیں اُولاکے ءَ سوار اِنت. کجا روگ ءَ اِنت ءُ اے بابت ءَ اُوں سرپد نہ اَت کہ کُنٹ آئی ھمراہ اِنت یاکہ نوں بس ساہ پشت کپتگ ءُ گوات ءِ دست ءَ اِدا ءُ اُود ءَ بال ءَ اِنت۔
آئی وتی دست ءُ پادانی سُرینگ ءِ جُہد کُت اَنت بلئے پاد ءُ دست بے ھاٹیگ اِتاں۔
پرچہ نہ سُر اَنت؟
آ ھمے سرپد بوت کہ آئی سرجمیں کُنٹ بےھاٹیگ اِنت۔بس آئی ھستی انوں ھمے دوئیں چم اَنت کہ آزمان ءِ نیمگ ءَ درگُڈیتگ اَنت۔بلئے اِنا، چمّاں چہ گیش دیگہ چیزے الم ھست اَت اگاں نہ گُڑا آ چوں پگرمند اَت ءُ آزمان ءِ دْرپشوکیں اِستاراں ءُ کمبھانی روکیں لیٹاں چوں گیشینگ ءَ اَت۔
آئی ءَ گمان بوت کہ من لانچے ءِ سر ءَ وپتگاں ءُ منی دست ءُ پاد ساد ءِ گون ءَ بستگ اَنت ءُ لانچ زِر ءِ جُہلانکی ءَ ماندیان اِنت۔پدا آئی چم بُرزیں ماڈیاں کپت اَنت گڈا دلجم بوت کہ من زِر ءِ تہا نہ اُوں۔اے لانچے نہ اِنت دیگہ اولاکے ءَ سوار اُوں۔ دیگہ وڈیں سواری ءِ یات کنگ ءَ گوں لرزگ ءَ گپت۔اے وڑیں سواری جنازہ ءَ چہ ابید دیگہ چے بوت کنت۔
آ اے وھد ءَ سرجم ءَ نہ مُرتگ۔گُڑا پرچہ آئی ءِ کَل کنگ ءَ مردم چو اِشتاپی اِتاں؟بوت کنت آ ھیالانی تہا مُرتگ بلئے راستی ءَ انگت نہ مُرتگ یاکہ گِندگ ءَ مُرتگ۔
آئی ءَ اےگپ ءِ سرپدی نیست اَت کہ زندگیں مَردُم ءِ ھساب ءُ کتاب چون بیت مُنکر نکیرانی ھیال ءَ کنگ ءَ اَت کہ آئی ءَ بیمّ اَتک۔
آئی دل ءَ لوٹ اِت کہ ایشاں بُہ گُش اِیت کہ من انگت زندگاں بلئےآئی ءِ توار چہ گُٹ ءَ در نیتک۔آئی دست سُرینگ ءِ جُہد کُت اَنت بلئے بوت کنت آ نوں پہ شاھدی دَیَگ ءَ پشت کپتگ اَت۔جان ءِ سرجمیں ھڈ ءُ گوشت درامد بوتگ اِتاں۔۔۔۔بس چم۔
ھئو آئی چم گندگ ءَ اِت اَنت،بلئے یک نیمگے بُرزی نیمگ ءَ۔
چمانی کش آں دوئیں نیمگاں بُرزیں ماڈیانی ھُشکیں اکس گندگ بوتاں،مزنیں ماڈیانی گندگ ءَ چہ آ زوت سرپد بوت کہ اے دَگ آئی ءَ پجّاہ کار اِیت۔پدا آئی وت زانت کہ اے من ءَ کجام گورستان ءَ کل کن اَنت۔آئی ءَ انگت اُمیت ءِ شہم گِندگ پیداک اَت۔کبر ءَ ایر کنگ ءَ پیسر گُڈی دیدار ءِ درگت ءَ آھانی چم منی رُژنائیں چمان کپت اَنت چماں کہ گند اَنت گُڑا وت زان اَنت کہ انگت زندگ اِنت۔کبرستان ءَ چہ واترگ ءِ ھیال ءَ یادداشت ءِ کساں کسانیں پُل آئی چمانی دیم ءَ تِج بُوان اِتاں۔پدا یک گاڈی ءِ ھارن ءِ توارے اِش کُت۔ اے بنداتی توار اَت کہ آئی اِش کُت توار ءِ اِش کنگ ءَ گوں گوشانی ریم رھادگ بوت اَنت۔
پدا آئی دیست کہ آئی ءِ جنازہ یک سینمائیءِ نزدیک ءَ اتکگ آئی ءَ یک جنینے ءِ اکس دیست کہ آئی لاپ زاھر اَت۔پُل دُرشُم ایں ناپگ ءَ گُش ءِ چمُک جنت۔اکس پُشت ءَ پشت کپت بلئے پُل درشُمیں ناپگ چمے بوت ءُ ھمراھی ءَ راہ کپت، آئی ھمے پگر کُت شر اِنت کہ اے گڈی وھد ءَ چارگ ءِ واست ءَ چیزے ھمراہ اِنت۔
بلئےپدا اُوں آ پگر کنگ ءَ اَت وھدیکہ شہر ءِ تہا ایشی ءَ چہ مستریں چیز چارگ ءُ پیشدارگ ءِ دود اِنت آ گریوگ ءَ اَت زانگ نہ بوت آ تاں کدین ءَ گریوگ ءَ اَت۔آھمے سرپد بوت کہ آئی جان کِرم کپتگ جاھے جاھے ٹُنگ اِنت۔یادداشت ءِ یک پُلے رُست آئی کند اِت۔دیم ءَ دُکانے اَت کہ اِد ءَ زُرتگیں چیز پدا بَرگشت نہ بَنت۔آئی ءَ یاد اتک کہ یکبرے آئی پُراَرزشت اِیں چیزے زُرتگ اَت۔ ھمے چیز ءِ یاد آھگ ءَ چے آئی ءَ وتی زھگ ءُ جنین یاد اتک اَنت۔
پدا آئی ءَ یاد اتک کہ جنین ءَ مدام کہ جانشود ءَ جانشُشتگ گُڑا آئی جان ءِ وش ءُ سارتیں بوہ سرجمیں گِس ءَ شنگ بوتگ۔
جنازہ کمّے دیم ءَ شُت تاں آئی ءَ سُہریں رنگے ءِ ماڈی ءَ چم کپت اَنت آئی دیست بلئےاےبابت ءَ آئی گُمان ءَ بسانی اِسٹاپ آھگ اَت اُود ءَ یک کسانیں جنکے اُوشتاتگ اَت سرجمیں ھپت سال ءَ رند یکدم گِندگ ءَ گوں آ پرپٹ ءَ چہ کپگی بوت ءُ پدا نہ کپت۔پدا پرپٹ یک نیمگے ءَ اُوشتارینت ءُ آئی نزیک ءَ اتک ءُ جُستے کُت۔
ھُدائےشُگر اِنت کہ تو اتکگ ءِ ناکو۔۔۔۔چم گریوگ ءَ اِتاں
جنک ءَ آئی گپ گُڈ اِت پونزے لگاشت ءُ گُشت ئے۔
کئے اےتو ۔۔۔۔۔۔برو دور بو
آئی گُمان ءَ مدام ھمیش اَت کہ جہان ءَ چہ مدامی ءِ واست ءَ گار بوئگی اِنت۔دور رؤگ ءُ مِرگی اِنت بلئے آ نہ مُرت آئی تہا انچیں چیزے مُرتگ اَت اجب ایں کش ءُ چیلّے اَت آ ھمے پگر کنگ ءَ اَت مردم مِرگ لوٹ اَنت بلئے مُرت نہ کن اَنت۔ بس مردم پہ کل کنگ ءِ واست ءَ تچ اَنت۔
چار راہ ءَ یک پِنڈوکے ءَ توار کُت۔
بِدئےاللہ ءِ نام ءَ کہ ترا گیشتر دنت
آ وتئ گوست ءَ یاد کنگ ءَ اَت۔بلئے چہ کامپول ءَ یاداشت گُش ئے پِٹ پِٹ ءَ آپ بوئگ ءَ اِتاں ءُ چمانی دیم ءَ تہاری ءِ مانشانگ ءَ اَت۔
مزنین ءَ چہ کسانیں دَگّ ءِ نیمگ ءَ تاب کنگ ءَ گوں جہان پدا رُشناہ بوت۔ ابدالکریم ءِ لوگ زاھر بوت اَنت۔چیزے سال پیسر کہ آئی کیسگ ءِ زر دُزی بوتگ اِتاں ءُ داخلہ ءُ امتخان ءِ واست ءَ آئی کِرا ھچ نیست اَت گُڑا ھمے ابدلکریم ءَ آئی چمانی ارس پہک کُتگ اَنت۔
ابدالکریم ءَ مردم سِل گُش اَنت بلئے آ ایشی ءَ دوست بوتگ، بوت کنت آ تہا شر بہ بیت زاھر ءَ سِل گندگ بیت۔آ ابدالکریم ءِ بابت ءَ کمو باز جیڑگ لوٹگ ءَ اَت بلئے یاداشت ءِ در وتسر ءَ وت بند بوت۔
پدا کہ دروازگ پچ بوت آئی ءَ وتی گس یاد اتک۔
آئی ءَ یاد اتک۔
آئی ایشانی دیم ءَ سئےرند ءَ کلمہ ونتگ۔آئی جنین ءَ اُوں ونتگ۔مسترین زھگ ءَ اُوں ونتگ بس کسترین مات ءِ پستان آں میچگ ءَ اَت۔
پدا آئی ءَ ھمایاد اتک اَنت یکّے نوراَلی شیر والا بوتگ،یکّے ابدلھمید بوتگ ایشاں مسیت ءِ ساھت(گڑیال)دُز اِتگ۔یکّے اللہ دتہ بوتگ کہ مدام آئی لوگ ءِ دیم ءَ گاڈیانی مُچی یے بوتگ، یکّے ھادم ھسین بوتگ،یکّے اَلی مھمد بوتگ۔
آئی ءَ چنچو نام یاد اتک بلئےوتی نام یاد نہ یتک۔آئی ھمنچُک یاد اتک کہ آئی وتی نام گُشتگ اَت ،بلئے دلجم نہ اَت۔آ سوگند ورگ ءَ اَت بلئے آئی سوگندانی سرا کس ایمان آرگ ءَ نہ اَت۔
آ وتی نام ءَ یاد کنگ ءَ اَت۔۔۔۔نورالدین۔۔۔۔۔رھیم بکش۔۔۔۔لتیپ۔۔۔۔۔دُرا درامدیں نام اِتاں۔۔۔۔۔دُرستیں نامانی سرا دیگرانی سردستی اَت۔بگند اُوں آئی نام کسے ءَ زُرتگ ءُ آ بےنام بوتگ اَت۔
آ ھمئےوڈ سرپد بوت کہ باز پگرمنی ءِ سوْب ءَ کامپول ءِ ٹُنگ گیش پراہ بوتگ۔ آ کُنٹ ءَ ایدیم ءُ آدیم ءَ پٹگ ءُ چارگ ءَ اِت۔ اَنت
بوت کنت آئی ءَ کبر ءَ ایر دَیَگ ءَ بنت۔۔۔ آئی گُشت۔
کور اگلاں۔۔۔۔منی چماں بچار اِت۔۔۔۔من زندگاں۔۔۔۔۔من انو مِرگ نہ لوٹ آں، من انگت پُل چم ءُ اے وڑیں ناپگ والا تامُر نہ چار اِتگ۔
بلئے آئی گپ کس ءَ اِش نہ کُرت۔یکے ءَ گُشت
شُما سک دیر کُتگ
دُومی ءَ گُشت،
ما دیر نہ کُتگ۔۔۔۔پیسر ءَ مزنیں نادراہ جاہ ءَ آؤرت آئی گُشت۔اے پولیس کیس یے کسانیں نادراہ جاہ ءَ برو۔۔۔۔۔ما اِد ءَ اَتکیں
شُگر اِنت کہ ایشاں نادراہ جاہ ءِ بابت ءَ جیڑ اِتگ کبرستان نہ۔اوست ءِ کندیل آئی درگُڑیتگیں چمانی دیم ءَ کسانیں مُدتّے ءِ واست ءَ شہم دات ءُ پدا گوں دوتاں آڈھور بوت۔ڈاکٹر گُشگ ءَ اَت
شُما اگاں کمے پیسر ءَ بیایتکین اِت بِہ گندئے پشت بہ کپتیں، نوں ایشی ءِ سرجمیں ھون درآتکگ اَنت ھچ بوت نہ کنت۔
ھچ بوت نہ کنت۔
آ لرزگ ءَ لگ اِت۔پدا آئی ءَ ایشانی سرا۔۔۔۔۔ ءُ ٹوھیں نادُراہ جاہ دُکترانی سرا سک بَدّ اتک۔۔۔۔ھمے وڈا پدا آئی چمانی دیم تہار بُوان بوت آئی زوت زوت کلمہ وانگ لوٹ اِت بلئے آئی زُبان ءَ دیگہ چیزے دراتک۔۔۔۔۔۔۔

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔

گوں شھید چیئرمین گلام مھمد بلوچ ءَ گند ءُ نِند

بلوچی لبزانکءِ پینل گوں شھید چیئرمین  گلام مھمد بلوچءَ  گندءُ نِند، یار جان بادینی  او مبارک علی بلوچ

دومی بھر

پولکار ظہور فضل ءُ اصغر وپا  

اولی بھر

چیزے بدکردیں مردمانی درآھگءَ چہ بی ایس او نزور ءُ کم تاگت بوت نہ کنت اے کوت روچ پہ روچ دیمءَ روان ءُ مھکم بُوان اِنت۔

لبزانک””. شما چہ بلوچستانءِ سیاسی آکبتءُ ادءِ اولسءِ وشھالیءُ دیمرویءِ ردءَ چے ھدءَ دل ایمن ئے ؟

گلام مھمد بلوچ””” بلوچ کومءِ وجود است اِنت آ تاریخی سورتءَ یک سرزمینءُ کومی ڈیھے واھند اِنت بلے مے حیثیت گلامانہ حیثیت یے ما نہ ایوکءَ چہ وتی کومی ھکاں زبہران بلکیں چہ انسانی ھکاں ھم مھروم اِیں اے پسماندگی گلامی ءُ مھرومی وت مے کومءَ را تھریک دئیگا اِنت کہ آ وتی کومی بکاہ ءُ سلامتیءُ وت واجہیءِ واستا جہد بکنت۔

اے سیاسی جہد تاریخی سورتءَ جاری اِنت ایشی ءِ تہا پیش رپت ھم اتکگ ءُ پدمنتگی ھم تیزی ھم اتکگ ءُ سستی ھم بلے ایشیءِ تہا اوشت ھچبر نیتکگ اے یک پیمءَ جاری اِنت اے جہد ءِ اھساسءُ زلورت ھتم نہ بوتگ بلکیں روچ پہ روچ گوں ترندیءَ دیمءَ روگءَ اِنت پمیشا من اے ھبرءَ دلجماں کہ بلوچ کوم ءِ اے جہد الم ءَ سوب مند بیت آ ماں دنیاءَ یک زندگءُ با اختیاریں کومیےءِ حیثیتءَ پشت کپیت ءُ ایدگہ زندگیں کومانی سرپءَ اوشتیت بلے پریشی ءَ ھما سیاسی کوتاں کہ بلوچ کومءَ را متحرک کنگءِ زمہ اِش زرتگ بائد اِنت کہ بلوچ کوم ئے سیاسی جہدءَ را یک جاہ ءُ مھکم کنگءُ ایشیءِ تہا مہلوکءِ شرکتءَ گیش چہ گیش کنگءِ واستا زیات جہد بکننت ۔

لبزانک”” ماں بلوچستانءَ دراہیں گل ھوریءُ تپاکی ءِ جارءَ جنگءَ اَنت بلے عملی سورتءَ پرشتءُ پروش ءُ پولارائزیشن روچ پہ روچ ودان اِنت شمے ھیال ءَ ایشی سوب چے اِنت ؟

گلام مھمد بلوچ “”. بلوچستانءِ تہا ھرچ گروہ ءُ پارٹی کہ است اَنت دراہ وتی ھاسیں مپادانی متابکءَ سپ بندی کنگءَ اَنت بلے ما نہ ایوکءَ اتھادءُ ھم آہنگیءِ واستا جارجتگ بلکیں پریشی ءَ عملی سورتءَ جہد کتگ ءُ کربانی داتگ فدا شہید ءِ کوش کجام بنیادءَ بوت بی ایس او ءِ پروشگ کجام بنیادءَ بوت ھمے واستا کہ ما گشت کہ بلوچستان ءِ تہا اگن کسے کومی جہدءِ گپءَ جنت تہ بائد اِنت ھورءُ یکجاہ بہ بنت ھیربکش مری، عطااللہ مینگل ءُ ایدگہ کوم پرست کوت بائد کہ وتی جہدانی مرکزءَ یکے بکننت ھمے جہدانی بنیادءَ مے جوانتریں سروکے ءَرا شہید کنگ بوت مے سرپانی تہا ناتپاکی پیدا کنگ ءِ جہد کنگ بوت مروچی ما گندگاہیں کہ ھما گپ ءِ سرا کہ مارا پروشگ بوت مے سروکانءَ شہید کنگ بوت مروچی ھمے کُشندھانی سرا دست ایرکنگ بوگءَ اِنت ماھروھد ءَ پہ نیک نیتیءُ دل سپائی ھرکس ءَرا کہ کوم اولسءِ ھبرےءِ کتگ ازت داتگ ءُ گوں آئیءَ ھور کار کنگءِ واستا ھر وھدءَ تیار بوتگیں ءُ مروچی ھم تیار اِیں بلے بنیادی شرت ھمیش اِنت کہ آ وتارا وتی پروگرامءَ وتی معاشی ءُ سیاسی رھبند ءُ پالیسیاں جوانیءَ پدر بکننت مروچی اے ھبر ءَ کہ بلوچستانءَ ھک رسگءَ نہ اِنت  میر تاج مھمد جمالی ھم جنت زبانی ھمدردی دگہ چیزے ءُ عملی جہد دگہ چیزے اگن کسے عملی سورتءَ جہد بکنت ءُ بلوچستان ءِ اولس ءِ نپءُ پائدگانی واستا کار بکنت تہ اگں ما بلوٹیں ھم تہ چرائیءَ وتارا دور داشت نہ کنیں پرچہ وھدے عملی اشتراک ءِ گنجائش کہ پیدا بیت گڑا کس کسءَ چہ سست نہ کنت.

لبزانک”” واجہ شمے ھیالءَ بلوچستان ءِ مستریں سیاسی جیڑہ چے اِنت ؟

گلام مھمد بلوچ”” بلوچستانءِ مستریں سیاسی جیڑہ ھمیش اِنت کہ بلوچ کومءِ مھکومیت ءُ گلامی ءَرا ھتم کنگ ءُ ایشی ءَ وتی سرزمین ءُ ایشیءِ سرا ھستیں وسیلہانی مسترءُ واھند جوڑ کنگ مے جیڑہ کہ گوں ریاستءَ است اِنت تہ آ کومی وت واجہی ءُ کومی ھکانی جیڑہ اِنت تانکہ مے کومی حیثیتءُ وجود ءَ را منّگ ءُ مے کومی ھکانءَ دیگ مہ بیت بلوچ کوم دلجم نہ بیت ءُ ننکہ ادءَ سیاسی کوت دلجم بنت.

لبزانک”” واجہ باز مردمانی ھیالءَ بلوچستانءِ سیاسی آکبت ءِ تہا ادءِ کبائلی ءُ روایتی سروکانی کرد باز زلوری اِنت ءُ چریشانی ھوریءُ ھمکاریءَ ابید ھچ پارٹی سوب مند بوت نہ کنت شمے ھیال چی اِنت ؟

گلام مھمد بلوچ””  اے ھبر راست اِنت کہ ماں بلوچستانءَ کبائلی رھبند تنی وھدی موجود اَنت بلے سوال ایش اِنت کہ بلوچ کوم ءِجہد ءِ دیمءَ برگءِ واستا مارا کجام راہءُ رھبند زورگی اِنت جیڑہ کہ کومی اِنت مسلہ کہ بلوچ کوم ئیگ اِنت گڑا ایشی ءَ را پرچہ کومی سورتءَ زورگ نہ بیت کسے وتی کدءُ حیثیتءَ کبائلی رنگ ءَ پرچہ پیش دارگ لوٹیت مروچی کومی تعمیرءُ دیمروی ءِ دیمءَ کبائلیت وت مستریں رکاوٹ اِنت ما اگں کبائلی یا ھاندانی بہرءُ بانگانی ھوالہ ءَ دیمءَ برواں تہ کومی تعمیر ءِ منزل ءَ ھچبر سرنباں کومی تعمیرءِ واستا کومی پکر ءُ کومی رھبند پکار اِنت آ کبائلی سروکاں کہ کومی پکرے داشتگ ءُ وتارا گوں ھمے پکرءَ ھور ءُ ھمگرنچ اِش کتگ آ ھچ سورتءَ نزر انداز کنگ نہ بنت نواب مری، سردار مینگل ءُ ایدگہ سروکاں کہ کومی جہدءِ ھوالہءَ کردے پیش داشتگ آ ماں بلوچستانءِ سیاسی تاریخءَ نمیران اَنت منی گُشگ ایش اِنت کہ بلوچستانءِ سیاسی مسلہانی دیمءَ برگءِ واستا مارا سیاسی رھبند کاربندکنگ لوٹیت ننکہ کبائلی اگں ما کبائلی رھبنداں بزوریں تہ ھچ پیشرپت نہ بیت کبائلی مردماں الما حیثیت است بلے آھانی حیثیت ءِ کچءُ کساس ھمے بنیادءَ بیت کہ سیاسی جہدءِ پڑا آہانی سیاسی کرد چے اِنت . بلوچستانءِ سیاسی معاشی ءُ کومی مسلہانی باروا آہانی پکر ءُ لیکہ چے اَنت عملی میدانءَ آہانی بہر چے اِنت اگں چشیں جوانیں پکر داروکیں کبائلی سروکے بیت تہ آئی ءَ را کس نزر انداز کت نہ کنت بلکیں کومی مکسدانی دستا آرگ ءِ واستا اے وڑیں کوتانی نیامءَ ھوری ءُ اتھاد مستریں زلورت اِنت بلے اے ھبرءَ ھرکس بزانت کہ کبائلیت یک کوھنیں ءُ پرسودہں رھبندے ءُ  پسماندگی ءِ علامت اِنت ءُ کومی دیمرویءِ  دیمءَ مستریں رکاوٹ اِنت کبائلی سروکاں بائداِنت کہ اے کوھنیں رھبندءِ بُن گوج ءِ واستا آ گوں ایدگہ سیاسی کوتاں کمک بکننت.
بلوچستانءِ تہا بازیں شخصیت است اَنت کہ آ اے کوھنگیں رھبندءَ برکرار دارگ لوٹنت ءُ روایتی اندازءِ سیاستءَ برجم دارگ لوٹنت آ ھر وھد ءَ چہ سیاسی جہدتنظیم کاری ءُ مہلوکءِ شعورءَ ترس اَنت چیا کہ وھدے شعوری جہد بیت تہ روایت پشت نہ کپنت کوھن ءُ پرسودہیں تعلک داری نہ ماننت ءُ مہلوک نوکیں سیاسی رشتہانی تہا کاینت ھر کس کہ باشعور بیت آ جہالتءُ نزانتکاریءَ نہ منّیت چیاکہ وھدے شعور کیت تہ جہالت روت بلوچستانءِ کبائلی سروکانی ھوالہ ءَ یک مھکمیں سیاسی رھبندے ءِ شرو نہ بوگ ءِ مستریں سوب منی ھیالءَ ھمیش اِنت کہ آ چہ تنظیم کاریءَ ترس اَنت آ ترس اَنت کہ چرے سیاسی تنظیم کاریءِ آسرءَ مہلوک چرآہانی روایتی گرپتءَ در مئیت آ ڈنءَ کوم پرست اَنت بلے وتی مہلوکءِ تہا کہ روت تہ کوم پرستی ءِ باروا نپرتے پیدا کنت آ مہلوکءَ کومی تعمیرءِ نیمگءَ برگءِ بدلءَ کبائلیت ءِ ھدانی تہا کید داریت وھدے کبائلی ھد کہ دارگ بنت گڑا کوم پشت نہ کپیت چیا کہ مری ءِ ھد جتا بنت مینگلءِ ھد جتا ھمے وڑا بیزنجو، بگٹی، زھری، مھمد ھسنی ھرکس وتی ھدانی تہا کید بیت وھدے مہلوک وتی وشھالیءُ نجاتءَ کبائلی رشتہانی تہا بزانت تہ کوم بہر بانگ بیت اے ھما شکل اِنت کہ ایشی ءَ مروچگیں ریاستی کوت دیمءَ برگ لوٹیت ھرگروہ ءُ کوتے کہ آ کوم پرستیءِ داواءَ کنت آ ھچبر اے وڑیں رشتہءُ تعلک داریاں دیمءَ نبارت .

لبزانک”” بازیں مردمانی گُشگ ایش اِنت کہ اگرچہ بی ایس او بنیادی سورتءَ تالبانی گل ءِ بلے ایشیءَ چہ تالبانی جیڑھاں  زیات ایدگہ مستریں اولسی جیڑہانءَ دستا گپتگ چریشیءِ سوبءَ ایشی ءَ وتی سرا چہ وتی کوتءَ گیش بار ءُ زمہ واری زرتگ شما گوں اے لیکہءَ چہ ھدءَ تپاک اِت ؟

گلام مھمد بلوچ”” اے ھبر کہ بی ایس او بنیادءَ تالبانی گل ئے ءُ آئیءِ باسکانی تعلک گوں تعلیمی ادارہاں است اِنت پمیشا آ وتا چہ کومی مپاداں دور ءُ گستا بکنت ءُ وتی کاراں بس تعلیمی مسلہاں مھدود بداریت من نزاناں کہ یک پدمنتگیں کومے ءِ ورنا کہ آ علمءِ میدانءَ کمے دیمءَ شتگ اَنت ءُ چہ راجءَ ایدگہ تکاں باشعور ترانت ءُ وتی کومی جیڑہاں شرتر مارنت چہ وڑا وتارا چہ سیاسی عملءُ کومی مسلہاں دور داشت کننت وھدے ھمے ورنا وتی لوگ چپءُ چاگرد ءُ راجءِ تکءُ پہناتاں چاریت تہ آ مسلہانی امبارءَ گندیت آ کومءِ پسماندگی مھکومیت گریبی ءُ ایدگہ جنجالاں گندیت تہ مجبور بیت کہ آہانی باروا پکر بکنت اے ھمے مسلہ ءُ جنجال اَنت کہ بلوچ ورناءَ را متحرک کنت کہ چہ وتی بارءَ گیش زمہ واری بزوریت بلوچستان ءِ تہا چشیں دگہ ھلکہ یے موجود نہ بوتگ کہ اے زمہ واریءَ بزوریت پمیشا بی ایس او ءِ ورناھاں اے زمہ واری زرتگ اے زمہ واری آہاں پہ کسے ھدایتءُ گشتنانی پدا ناں بلکیں وتی کومءِ باشعوریں پردے حیثیتءَ زرتگ  بی ایس او وتی ھدوداں زانت پمیشا آئیءِ جہد ھمے بوتگ کہ ھنچیں کیڈر جوڑ بکنت کہ آ تالبی ءِ دورءَ پد ھم وتی کردءَ یلہ مدنت ءُ راج ءِ جوانیں پردے ءِ حیثیتءَ وتی کومی زمہ واریاں پورا بکنت .

لبزانک”” سوویت یونینءِ پرشگءَ رند ھما نظریاتی ڈسپلن  یے کہ ساریءَ است اَت آ پشت نہ کپتگ بی ایس او نوکیں جاورانی تہا وتی اندرءَ چونیں بدلی مارگءَ اِنت؟

گلام مھمد بلوچ””” ادا اے ھبر چارگی اِنت کہ دنیا ءِ تہا آؤکیں بدلیانی اسرءَ مے زندمان ءِ سرا چونیں بدلی اتکگ آیا بلوچ کومءِ مھکومیت ءُ آئی تنگ دستی ءُ پدمنتگی ھتم بوتگ آیا ادءِ ریاستی کوتانی بالادستی ھتم بوتگ آیا ملکءِ تہا چشیں بدلی یے گنجائش است کہ چریشی ءَ مے زندمان بدل بہ بیت منی ھیالءَ چرے چیزاں  تنی وھدی ھچ نہ بوتگ پمیشا مے کارءُ زمہ واری ھما اَنت کہ ساریءَ بوتگ اَنت چیاکہ مے جہد گوں بلوچ کومءِ جیڑہءَ ھم گرنچ اِنت تانکہ اے جیڑہ نہ ٹہیت مے جہد ھما وڑا جاری بنت البت نوکیں جاورانی تہا ما یک چیزے ھمے دیتگ کہ مارا گیش چہ گیش وتی جندءِ کوت ءُ وسیلہانی سرا بھیسہ کنگ لوٹیت دگرانی چم چاریءَ یلہ بدہیں .
روان اِنت

دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت

اے منی جون اِنت، بے کَس نہ اِنت

نبشتکار۔ لطیف بلوچ

رجانک ۔ حنیف بلوچ

دی بلوچستان پوسٹ

ماں چاگرد ءُ چاپ کاریں رَسانکدراں چہ مدام اے ھبر پہ وانگءَ دیمءَ کئیت کہ گُلامیں (مقبوضہ)بلوچستان ئے پِلاں دمگءَ چہ یک جونے دست کپتگ، جون ماں نادراہ جاہ ءَ برگ بوتگ کہ آئیءَ سرءَ، دلبندءَ یا کہ ماں بالادءِ دگہ جاھےءَ تیر جتگءُ کشتگ، ءُ لہتے روچانی گوزگءَ پد پدا ماں رسانکدرءَ اے ھال کئیت کہ ایدھی ئے واکداراں بلوچستان ءِ جتائیں دمگانی دست کپتگیں بے کَسانی جون کلّ ءُ کَسارت کتگ اَنت۔ جیڑگی گپے کہ اے جون چے پیم ءَ بے کس بوت اَنت؟ اے کئےءَ گُشتگ کہ اے جوناں پہ کسے نیست اِنت؟ اشاں هنچو پہ دیم یک گورستانےءَ کَسارت بہ کن اِت۔

چے اے دست کپتگیں جُونانی بابتءَ یک ھالتاکےءَ جارے چیزے پرّینگ بوت؟ ھما دمگاں کہ اے جون دست کپت اَنت چے پہ آھانی پجارگءَ آؤدئے بیگواهیں ورناھانی مہلوک ئے کہول لوٹائینگ بوت انت؟ اگاں دست کپتگیں جونءِ مردم چہ آ دمگءَ در کپت اَنت کہ جون دست کپتگ گڑا چے بلوچستانءِ دگہ دمگاں چہ بیگواھیں مہلوکانی کہول پہ آھانی پجارگءَ لوٹائینگ بنت؟ چے پہ جون ئے زانگ ئے ھاترا ڈی این اے یا دگہ آسراتیانی سرا ٹپّاسگ ئے جہد کنگ بوت؟ چے جون ئے اکس ماں چاگردی رسانکدر ءُ چاپکار ءُ الیکٹرانک رسانکدر ءَ دیگ بنت؟

جنوکءَ جتءُ آئیءِ جون چگل دات، سپاھیگاں(پولیس) جون درگِپت ءُ نادراہ جاہءَ سرکت ءُ ھال رسانےءَ چہ وتءَ ھال شنگ کت، چاپکاریں رسانکدرءَ وتی ھالتاکے یک کنجے ءَ ھمے گُشتگیں ھبر چاپ کت کہ یک جونے دست کپتگ، ھر یکےءَ وتی وتی زمہ واری پیلو کُت اَنت۔

بلے اے یک جونے نئے، اے یک کہولے ئے ارمان اِنت، واھشت اِنت، زندمان ءُ وشی اِنت، دست کپتگیں جون بس یک جونے نئے بگندئے کسے ئے برات، کسے ئے چُک، کسے ئے پت ءُ کسے ءِ لوگ واجہ اِنت، اے جونءَ گوں یک ماتے ئے وشی، گوھارے ئے واھشت، براتے ئے اوست، جنینے ئے زندمان ءُ چکّانی وشیانی واھشت پلگ بنت۔

مات، گوھار، جنین بے کس بنت ءُ چک چورہ کنگ بنت ،یک سرجمیں کہولے ئے واھشت، ارمان ءُ وشی کُشگ بنت۔

راجانی یکجہتی گل(اقوام متحدہ) انسانی ھکّانی میان اُستمانیں گَل، انسان دوستیں مہذب ملک بلوچستان چہ درکپتگیں دُراھیں جونانی سرا گامگیج بہ زور اَنت ءُ دراھیں کل کرتیں جونانی ڈی این اے ئے سراچار ءُ ٹپّاسءَ بکن اَنت۔ چیریں اداراھانی دستءَ بازیں بلوچ ورنا ءُ پیرمرد ماں ازیتانی وھدءَ شہید بوتگ اَنت، کہ آھانی جونانءَ بے کسے ءِ نام داتگ ءُ کل کتگ اَنت۔

2014ءَ پہ انسانیتءَ شرمندگیں وئیلے دیمءَ اتک، وھدے کہ بلوچستان ئے دمگ توتکءَ چہ 187 جون یکجاہ چہ یک مانشے ءَ دست کپت، بلے ابید ئے چار ءُ بچارءُ ڈی این اے ءَ جون پدا بار دیگ بوت اَنت، بلوچستان ئے سرڈگار دگہ وسائلانی ھوارےءَ جون ھم ودیگ کنت۔

بلوچستان ءِ مردم گوْستگیں ھپتاد سالاں چہ دردناکیں بزّگی ءُ درد ءُ رنجانی جاوراں گوں گوزگءَ انت۔ ازیت سگگءَ اَنت، چہ بلوچستانءَ ھزارانی کساسءَ مردم گارءُ بیگواہ اَنت،ھمک گس گمیگ ءُ پرسیگ اَنت، چہ کجا کہ جونے کہ دست کپیت اے گسانی تہا مہشر پاد کئیت۔
ھماهانی کہ جگرئے کپ بیگواہ اَنت آھاں زندمان ئے دراھیں وشیانی رنگ شموشتگ اَنت، آشپ ءُ روچ بس ھمے وداریگ اَنت کہ آھانی ساہ ءُ نپس کجام وھداں سلامت ءَ واتر کئیت یا جونے بیت ءُ لوگءَ کئیت۔آ مردم ھم وتءَ وش بہت سرپد بنت کہ آھانی چُکانی جون دست کپتگ اَنت، بلے ھما مردم یا کہول ھمک ساھتاں نیم مردگ اَنت کہ آھانی چُکانی ھچ ھال ءُ سوجے نیست اِنت باریں زندگ اَنت کہ کشگ بوتگ اَنت؟ ودارئے ھمک دمان پہ آھاں درد ءُ ازیتاں چہ کم نہ اِنت بلے پما دست کپتگیں جون یک بے کسےءِ جون بیت۔
جون چے پیم بے کس بوت کنت؟ آ الم ھمے سرڈگارءِ یک زہگے، بد کسمتیں ماتے ءِ جگرءِ ٹُکّر بیت، کہ آئیءَ ماں زوراکی ئے وھداں، دگ، شہرءُ میتگےءَ چہ ھون واریں رستراں آوار جتگ، بے نامیں تہاریں کوٹی ءَ ازیت داتگ، چیلّینتگ ءُ کُشتگ، پدا یک گیابانےءَ بے کسےءِ نامءَ چگل داتگ ءُ ایدھی والہانی میار کتگ۔

جون وتی شکمءَ چہ وت وتی پجارءَ، وتی دمگ، راج ءُ ٹکے ءِ نشانءَ دنت، بلے وکشی ءُ ھون واریں رستراں اے کہولانءَ گیش دردیگ کنگءَ چہ وشی کئیت۔ جنوک ءَ جون ءِ پجارآئیءِ دمگءُ کہول ءِ سرپدی الم بیت اِنت، بلے آ وتی رستریءِ پیش دارگ ءِ ھاترا اے پیمیں گیر انسانی زمین جُمبیں کار کنت، ھچ بنی آدم، ھچ جون بے کس نہ اِنت، آ همے سرڑگارءِ بچ اِنت، آیک بلوچے ئے یاکہ پشتون ءُ سندھی ءِ جون اِنت کہ آھانءَ زوراک بے دردیءَ چہ کشیت ءُ بے کسے ءِ نام ئے دنت۔

او ڈُنڑواراں،او وکشیءُ ھون واریں رستراں شما یک زندگیں مردمے آوار جت، تہاریں کوٹی یے ءِ تہا آئیءِ شکم ئے گوشت چُنڑ چُنڑ کت اَنت، دردناکیں ازیت دات ءُ کشت انگت شمے زہر ھلاس نہ بوت اَنت۔ زانگولیں جون ماں گیابانےءَ چگل داتءُ آئی ءَ بے کسےءِ نام دات۔
چے ھمے پیم وتی کینگ ءُ زوراکی ءِ سوْب ءَ چہ بلوچستانءِ مردمانی دلانی تہا بیم پیداک کن اِت؟ آھانءَ بے توار کن اِت ءُ وتی ایردستیءَ منّارین اِت، ھچ پیمءَ کت نہ کن اِت۔

تو ھمے سرپد بئے کہ جونانی چگل دیگ ءَ پہ مردم چہ آجوئی ءِ لوٹءَ دست کش بنت۔ بلے اے گپ ءَ یات بِدار کہ ھمک جون بلوچانءَ آھانی مِنزلءَ داں نزدیک تِر کنان اِنت۔ تو پہ ترسینگءِ جہدئے بنگالیانی بازیں لاش دور دات بلے لاگریں بنگالی چہ ترا وتی آجوئی ئے گرگءَ پہ سوبین بوت اَنت۔ مرچی آ آجوئیءِ سارتیں ساھگءَ دم کشگءَ اَنت،بلوچ ھم وتی آجوئی ءَ چہ تو پہ زور گیپت۔
ءُ ھؤ دلگوش ۔اے بے کسیں جونے نئے اے منی جون اِنت، منءَ جن ئے ءُ بے کسے ءِ نامءَ کل کن ئے، بلے منی جونءَ چہ منی پجارءَ دور کت نہ کن ئے، منءَ چہ منی پیداگ کتگیں ماتءَ سِندئے ءُ کجا کہ کل کن ئے، من ھر کُجا وتی مات ءِ امبازاں آسودگے ءَ گوں ھاک باں، چےءَ کہ اے زمین منی ماتیں وتن اِنت، اے زمین منی مات اِنت۔

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔