TBP Balochi

شال ءِ پریس کلب ءِ دیم ءَ بیگواھیں مردمانی واستا زھرشانی برجاہ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی گدان ءَ 4023 روچ سرجم بیتگ – دالبندین ءَ چہ میر داد کریم، داد مھمد ءُ دگہ مردماں بنجل ءِ تر ءُ تاب کرتگ – ھمے وھد ءَ بیگواھیں ڈاکٹر دین مھمد بلوچ ءِ جنک سمی بلوچ، بیگواھیں شبیر بلوچ ءِ گوھار سیما بلوچ، بیگواھیں راشد ھسین ءِ مات ءُ دگہ بیگواھیں مردمانی کھول جاڑیگ بیتگ اَنت –

وی بی ایم پی ءِ رھشون ماما قدیر بلوچ ءَ ھمے وھد ءَ وتی ھیال ءُ لیکہ درشان کنان ءَ گْوشتگ کہ راستی ایش اِنت پُرایمنیں جد ءُ جھد اے وھد ءَ سوبمند نہ بیتگ اَت کہ ھما وھدی زالبولانی کُمک وتی چُک، برات، پتانی گون ءَ مہ بیت، زالبولانی کرد ءَ اے پُرایمنیں جد ءُ جھد چکار اِنت – بلوچ راج ایشی ءَ دلجمی ءَ بزانت کہ اگاں راج ءَ راجدپتر ءِ تاکاں وت ءَ زندگ دارگی اِنت گڑا شھیدانی ھون آیاں زندگ دار اَنت –

ماما قدیر بلوچ ءَ گْوشت کہ لھتے راجدوست بیگواھیں مردمانی گریواسنکاں گریو اَنت ءُ وتی راجداری ءِ جڑکینگ ءِ جھد ءَ اَنت راستی ءَ زورانسری ءَ گار ءُ بیگواہ کرتگیں آ ورناہ راجدار اَنت، لھتے مردم پاکستان ءِ پارلیمنٹ ءَ نشتگ ءُ بلوچانی کُشت ءُ ھوناں دست اش ھونین اَنت – دلگوشی ایش اِنت بلوچ پُسگ وتی گڈسری جد ءُ جھد ءَ کنگ ءَ اَنت –

آئی ءَ گْوشت کہ ھمک تک وتی بستار ءِ کساس ءَ وتی کرد ءَ پیلو بہ کنت – راستگیں پَٹ ءُ پول ھمک تک ءَ نادلگوش کت نہ کنت پرچاکہ اے پٹ ءُ پول اِنت کہ راجاں تچک ءُ مادنیں کِشکانی پِرین اِت ءُ راجاناں زندگ داریت –

زانگ بہ بیت وائس فار بلوچ مسنگ پرسنز ءِ جار ءِ پد ءَ باندا شمبے ءَ ائید ءِ روچ ءَ شال ءِ پریس کلب ءِ دیم ءَ بیگواھیں بلوچانی واستا کھولانی ھمراھی ءَ زھرشانی کنگ بیت اِنت – بیگواھیں بلوچانی کھول ءُ وی بی ایم پی ءِ نیمگ ءَ ھمک ائیدانی روچاں زھرشانی کنگ بیتگ اَنت –

ھمے وڑ ءَ انسانی ھکانی بیگواھیں باسک راشد ھسین بلوچ ءِ زورانسری گار ءُ بیگواہ کنگ ءِ ھلاپ ءَ چاگردی رسانک جاھاِ کمپئین کامرد بیگ ءَ اِنت –

کمپئین مزن ھوری ڈیھانی ائید ءِ اولی روچ ءَ ایر کنگ بیتگ – بیگواھیں راشد ھسین بلوچ ءِ کھول ءِ رد ءَ آ متھدہ ارب امارات ءَ چیریں ادارھانی کارمنداں آوار جتگ ءُ شش ماہ ءَ پد بے رھبندیں رنگے ءَ پاکستان ءِ دست ءَ داتگ چریشی ءَ پد آ پاکستان ءَ ھم بیگواہ اِنت –

بیگواھیں راشد ھسین ءِ گوھار پریدہ بلوچ ءَ یک ٹوئیٹے ءَ نبشتگ کرتگ ءُ گْوشتگ اربانی ڈیھ انسانی ھکانی باسکانی واستا بیمناک جوڑ بیتگ اَنت، منی برات پاکستان ءَ چہ یک انسانی ھکانی باسکے کہ آ متھدہ ارب امارات ءَ آوار جتگ ءُ بے رھبندیں رنگے ءَ پاکستان ءِ دست ءَ داتگ –

زانگ بہ بیت ریلیز راشد ھسین کمیٹی ءِ نیمگ ءَ یک جارے گوستگیں روچاں شنگ کنگ بیتگ کہ آئی ءِ رد ءَ اگست ءِ ماہ ءَ جرمنی، نیدر لینڈ، جنوبی کوریا ءَ ھوار ڈیھاں زھرشانی ءُ جھمنندی مھلوک سرپد کنگ بنت –

ھمے وڑ ءَ بیگواھیں شئیب بلوچ ءِ کھول ءَ آئی ءِ یلہ کنگ ءِ دزبندی کرتگ – آیانی رد ءَ شئیب ء ابراھیم جھمنند مند بیست ءُ دو مئی دوھزار ءُ چاردہ ءَ پاکستانی پوج ءَ مند ریدیگ ءَ آوار جتگ کہ چریشی ءَ پد آ بیگواہ اِنت –

نمدی یے کلیں سنگت ءُ بیلانی نام ءَ ، ائید ءِ درگت ءَ

نبشتہ کار: گُلزمان بلوچ

دروت ءُ دراھبات منی کلیں راج ءِ یلیں سنگت ءُ بیلاں ، من امیت کن آں کہ شما درست وش ءُ سلامت اِت، ءُ سلامتی دائمی شمئے ھمراہ بات۔
دروت ءُ دراھبات ءَ پد من نہ زاناں گپ ءَ چہ کجا بندات بہ کن آں ، بلے مروچیگیں گپ ائید ءِ درگت ءَ اِنت ءُ منی لوٹ اِنت کہ وتی دل ءِ زنگاں بہ ریچاں ۔
مروچی سی ءُ یک جَلکشان (جولائی) دوھزار ءُ بیست اِنت کہ مزنیں ائید ءِ روچ اِنت، مرچیگیں روچ ءَ دراھیں دنیا ءِ راج شات ءُ شاتکامی ءَ اَنت، پس کشگ ءُ ھک پھلی اِنت، نوکیں گد ءُ نوکیں پازوار ھرکس ءَ گور ءَ ءُ پاد ءَ اِنت، بلے پمن گش ئے ائید نہ اِنت، پرچا کہ من کپتگاں دراڈیھ اد ءَ ھرکس پمن درامد ، اد ءَ من کجا برواں گوں کے ءَ ھک پھلی بہ کن آں ، گوں کے ءَ شات ءُ شاتکامی بہ کن آں ،۔؟؟
من ءَ مرچیگیں روچ ءَ وتی گوست سک یاد پیداک اِنت، منی گلیں سنگتاں شمئے یات وَ بے کساس پیداک اِنت ، یار آ دگہ وھدے اَت ائیدانی روچ ءَ ما ءُ شما ھور ءُ تور اِت ایں، زندگی ءِ وشیں لزّت چش اِت اَنت، ما وتی ھند ءِ سرجمیں لوگاں یک پہ یک ءَ گرد ات ایں ءُ یک پہ یک ءَ دراھیں مردم ھک پھلی کت اَنت، پد ءَ دومی ءُ سیمی روچ ءَ کوہ ءُ جنگلاں پکنک ءَ شت ایں ، دگہ ھند ءُ بازاراں سنگت ءُ دوستانی گور ءَ شت اِیں ، آ دور وش اِت اَنت، بلے کجا شت اَنت آ دور ءُ باریگ،؟؟
چے ءَ دور یکپارگی بدل بوت ، پرچا ما مرچی ائید ءَ پہ شاتکامی گوازینت نہ کن ایں ،؟؟
اِے جستانی پسو چش آدینک ءَ منی دیم ءَ ساپ زاھر اَنت، اے دراھیں وجہ مئے پد منتگی اِنت، اِے درست گلامی ءِ برود اَنت۔ ما کجا لوٹ اِت کہ ما در پہ در بہ اِیں ، وتی ھند ءُ دمگاں یل بہ کن ایں دراں ڈیھ بہ بہ ایں ۔؟؟
پد ءَ اوں مارا اِے درد نہ اِنت کہ ما پرچا در پہ در اِیں ، پرچا مئے نسیب ءَ ائید ءِ وشی نیست، پرچا کہ گلامیں راج واست ءَ اِے دائمی ھست اَنت-

منی سنگت ءُ دوستاں شما نشتگ اِت وتی ھند ءَ بلے شمئے ائید ھم نوں پیسری رنگ ءَ نہ بنت، اِے گپ بیت کنت کہ شمئے ائید کمے چہ مئے ائید ءَ بھتر بیت ، پرچا کہ شما وتی لوگ ءُ جاگہ ، ڈگار ءُ کوھاں نشتگ اِت ، ءُ وتی بنگی بازار ءُ میتگان اِت، شمئے دل ءَ بہ گند اِت شرتر تاھیر بہ رس اِیت۔
بلے چشیں وشی ھم نیست کہ سرجمیں ھنداں لشکر نشتگ ءُ چم ئِے مارا سک اَنت، مئے مردماں ھمک روچ بیگْواہ کنگ ءَ اَنت، مئے ھزار برات شھید ئِے کتگ ، ءُ ھزار بندیان بندیگ اَنت، ھزار لوگ ءُ گدان آس ءِ میار اَنت، ھر دیم ءَ آسے جمبور اِنت،کجام امیت ءَ ائید مئے شادان بیت کنت۔ شادانی وَ ھچ رنگ ءَ بیت نہ کنت، بلے منی سنگتاں شما وتی ھلک ءَ نشتگ اِت اِے گنجے –
منی ڈیھ ءِ نشتگیں سنگتاں دراں ڈیھی مردماں مہ شموش اِت، دشمن ءِ گوما ھوری ءَ شات ءُ شاتکامی مہ کن اِت، وتی شھیداں چہ پراموش مہ بہ اِت، شما ھم بلوچ اِت، اِے ناشریں لشکر کسی نہ بیت، اِے ھر بلوچ ءِ سر ءَ دنتان درش اِیت۔ اِے گیش جھد کنت کہ بلوچ ءِ نام ءُ توار گار بہ بیت،
منی پر مھریں سنگتاں چشیں ھزاراں ارسیگیں ائید گوستگ ءُ بہ گند اِت انگت گوز اِیت، بلے اِے ائید بلوچ راج ءِ واست ءَ ھچ وشی ءِ رنگ ءَ نہ جنت، مئے امیت انت کہ پما وشیں ائید زوت کاینت ءُ کل راج وش ءُ شادانی دوبر وتی ھلک ءُ دمگاں ائید کنت ، پد ءَ ھما پیشی داب ءَ تر ءُ تاب نند ءُ نیاد، کس جست اِش نہ کنت کہ کجا چہ پیداک ئے ءُ کجا رو ئے۔؟
منی اِے نمدی ءِ مول اِے نہ اِنت کہ ما ائید مہ کن اِیں ، ائید وَ یک ھدا ءِ داتگیں روچے ، ائید ءِ نماز ءُ ائید سنت ءُ پرز مئے سر ءَ وَ ھست اَنت، کل مسلمان ءِ سر ءَ ھست اَنت، بلے گلامیں راج ءِ واست ءَ ائید ءِ وشی نہ بنت، ، انچش کہ مئے ائید ارس ءُ ھوناں گوں گوزگ ءَ اِنت۔۔، منی مستریں مول ایش اِنت کہ ائید ءِ وشی کنگ ءَ پیسر مارا کل راج چارگی اِنت کہ کجام جاورانی تہ ءَ گوزگ ءَ اِنت، ما اِے شمیں لشکر ءِ گوما ھمنیاد مہ بہ اِین ءُ راج ءَ چہ شمشکار مہ بہ اِیں، منی دائمی ھمے امیت اِنت کہ شما وتی راج ءَ چہ شمشکار نہ بہ اِت۔۔
گڈی ءَ منی دائمی دوا اِنت کہ پما زوت وشیں ائید بیایات اَنت ءُ بلوچستان آجو بات ، پد ءَ گوں شمارا کلیں سنگتاں گوں ائید ءِ وشیاں بہ گوازینات ایں ۔
انچش بات ، پد ءَ انچش بات۔

شمئے وتی کستر :۔۔ گلزمان بلوچ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دو اُرشاں پاکستانی پوج ءِ ھپت کارمند کُشتگ – بی ایل ایف

دی بلوچستان پوسٹ

بلوچستان لبریشن فرنٹ ءِ جارکش میجر گوھرام بلوچ جائو ءُ مشکہ ءَ پاکستانی پوج ءِ کارمندانی سر ءَ بیتگیں اُرشانی زمہ واری منّ اِتگ اَنت –

میجر گوھرام بلوچ ءَ ناشناسیں جاھے ءَ رسانکدراں شنگ کرتگیں بیان ءِ تہ ءَ گْوشت کہ گوستگیں شپ ءَ سرمچاراں وادی مشکہ ءَ منگلی چیک پوسٹ ءِ سر ءَ اسنائپر ءُ مزنیں سلاھانی گون ءَ اُرش کرتگ، چریشی ءَ چَہ سَے کارمند مرتگ ءُ یکے زدگ بیتگ –

یک دگہ اُرشے ءِ زمہ واری میجر گوھرام بلوچ ءَ منّ اِتگ ءُ گوشتگ کہ مروچی سھب ءِ ساھت ھشت ءَ جائو ءِ دمگ نوندڑہ ءَ پاکستانی پوج ءِ گشتی ٹولی ءِ سر ءَ سرمچاراں وتکار ءُ مزنیں سلاھانی گون ءَ اُرش کرتگ – اُرش ھما وھد ءَ کنگ بیتگ زورگریں پوج ءِ دَہ کارمند پادانی ءَ دستہ دراج کور ءِ نیمگ ءَ پیش گامی بیان بیتگ – پیسر ءَ چَہ سنگر گپتگیں سرمچاراں دشمن ءِ سر ءَ اُرش کرتگ – چریشی ءَ چہ چار کارمند ھما دمان ءَ مرتگ ءُ دو زدگ بیتگ اَنت –

میجر گوھرام بلوچ ءَ گْوشت کہ اے اُرش زورگپتیں بلوچستان ءِ آجوئی ءَ برجاہ مان اَنت –

نبشتانک: چتور من ائید بکناں

نبشتہ کار: زهیر بلوچ

دی بلوچستان پوسٹ

دوشی سَرجمیں شَپ گوں اِستالانی چارگ ءَ گْوستگ ات بگِند ئے بانگواه ءَ دمانے چَم نَز بوتگ انت-
سَبا ءِ سر ءَ گونڈوانی کُوکار ءُ جاکاں من ءَ چہ واب ءَ جھ سَرینت روچ ءَ ٹِک کُتگ ات.
من وتی پُروشتگیں بالاد ءِ ٹکُراناں چِت ءُ نَز آؤرت ءُ ژند ءُ پندیں چماں لَتاران ءَ سَر چہ کمبل ءَ ڈن کَش اِت ءُ پاد اتکاں تّهت ءِ سر ءَ نِشتاں-

لوگ ءِ مردین مَسیت ءَ روگ اَنت وت ءَ نماز ءَ ساڑی کنگ ءِ جُھد ءَ انت. گونڈو ءُ چوریگ وت ءَ شُوک ءُ سینگارگ ءِ چِن ءُ لانچ ءَ دلگوش انت-
من همے ندارگاں چارگ ءُ وت ءَ مُلما کنگ ءَ اتاں کہ اناگہ ءَ کپوتے اتک ءُ پیژگاه ءِ شِریش ءِ شاه ءِ سر ءَ نِشت-
کپوت ءَ نندگ ءَ گوں نالَگ بِنا کُت. کپوت ءِ نالَگاں منی دلگوش گوں وت بُرت چونی ءَ من ءَ کپوت ءِ نالَگ سک دوست بیت بلے مرچی گُش ئے من ءَ کپوت ءِ نالَگ گیشتر بے تاهیر کنگ ءَ اِت اِنت. انچو سَما بوت کہ کپوت مرچی مُوتک آرگ ءَ اِنت-
من کپوت ءِ نالَگاں انچو مارَگ ءَ اتوں کہ بیگواهیں جھانزیب جمالدینی ءِ مات منی دیم ءَ نِشتگ ءُ گریوگ ءَ اِنت – زاکر جان ءِ مات ءَ زاکر جان ءِ اَکس گون اِنت ءُ زاکر جان ءَ توار ءَ اِنت. من گیشر بے تاهیر بوتاں گُش ئے آسے منی رگ ءُ بندانی تہ ءَ تَچگ ءَ اَت-
همے دمان ءَ کپوت ءَ بال کُت ءُ منی هیال پُرشت بلے منی بے تاهیری کم نہ بوت اے سرجمیں ندارگانی چارگ ءَ گوں پد ءَ کمبل پِر دات وپت اوں-

همے دمان ءَ مات اتک منی سَرون ءَ نِشت- منی سر ءَ وتی دست ءَ سَماران ءَ گُشت ئے پاد ءَ کُربانوں دُرست روگ ءَ اَنت ائید ءِ نماز ءَ تئی پِت اوں شُتگ پاد ءَ وت ءَ ساجو کَن پَشت کپ ئے نماز ءَ. من کمبل لیٹینت ءُ سر ڈن ءَ کَش اِت-
مات ءَ منی چمانی تہ ءَ چاران ءَ گُشت تئی چم سَک سُهر انت تو زاناں دوشی نہ وپتگ ئے ..؟
مات ءَ مار اِت کہ منی تہ ءَ گُش ئے زِرے پُرشتگ ءُ منی بالاد تیاب ءَ پادون ءَ لیپگ اِنت ءُ منی اندر ءَ چولانی اومال تُستگ اَنت-

من مات ءِ چمانی تہ ءَ چاران ءَ گُشت مرچی پد ءَ ائیدے اتکَگ ….؟
بلے مئے بیگواهیں برات انگت واتر نہ بوتگ اَنت-
اما جان گهار سیما ءُ زرینہ پد ءَ مرچی شال ءَ شال ءَ گوں شبیر جان ءِ اکس ءَ نِشتگ اَنت شبیر جان انگت نہ یتکگ-
چِتور من ائید کناں ….. مِهلب ءُ سَمّی ءَ یازده سال اِنت کہ ائید اِش نہ کُتگ وتی پِت ڈاکٹر دین جان ءِ ودار ءَ نِشتگ انت ءُ چہ اے وشیاں زِبهر اَنت-
اما جان …… منی گُهار هسیبہ ءِ لَپرزتگیں لُنٹ لرزاتگیں دست ءُ ارسیگیں چم منی دیم ءَ زاهر اَنت کہ اهسان ءُ هزب الله ءِ هچ هال نیست گُڑا کُجا من ائید کُت کناں…..؟

من مات ءِ چمانی تہ ءَ چاران ءَ گپ دیم ءَ بران کُت اَنت-
منی اما جان … زاهد جان ءِ چُک اوں لوٹ اَنت کہ مرچی اے شادمانی روچ ءَ نوکیں پُچ گور ءَ بکن انت ءُ گوں وتی پِت ءِ همبراھی ءَ ائید ءِ نماز ءَ بُرو اَنت.
منی مات …. منی دل ءَ نَسرین بلوچ منی چمانی دیم ءَ نِشتگ من ءَ گُشگ ءَ انت کہ منی یک براتے پیسر ءَ اے بدواھاں بُرت ءُ شهید کُت اَچ من سِست ءُ جُتا کُت نوں اے برات ابدالھی کُرد اوں بُرتگ اِش نزاناں چون اِنت کُجا اِنت منی دل اوں لوٹ اِیت کہ گوں وتی برات ءَ ائید بکناں-

همے دمان ءَ منی چماں چہ ترمپ ترمپ ءَ ارس شیپ گران ءَ منی انارکانی سر ءَ جھلاد بوت انت. چتور من ائید بکناں کہ هزارانی کِساس ءَ منی برات بیگواه انت آهانی کھول ءِ مردم مرچی اے وشیں روچ ءَ چہ آهانی دیدار ءَ تلوس اَنت- مرچی چے گوز اِیت هما مات ءُ گهارانی دل ءَ کہ وتی مهروانانی مهراں چہ اے وشیں نوبت ءَ زِبهر اَنت- نزان انت کُجا انت چون انت سالانی سال بدواه ءِ زنداناں بندیگ انت-
اے گپانی اِشکنگ ءُ منی چمانی ارساں گِندگ ءَ مات ءِ چمانی ارس اوں در اتک انت گوں بے تواری ءَ پاد اَتک ءُ دُوا کنان ءَ گُشت ئِے الله پاک دُرستیں مات ءُ گهارانی دل ءَ سارت بکنت ءُ رھادگ بوت شُت پہ وتی کار ءُ چلوپگاں-
من پد ءَ کمبل پِر دات وپتاں بلے نوں روچ منی بالاد ءَ سَک سوچگ ءَ اَت من زانت نوں وپسَگ ءِ وهد نہ اِنت-

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: مئے ائید ءُ بیگواھیں مردمانی کھول

نبشتہ کار: ھدایت بلوچ

دی بلوچستان پوسٹ

دگنیا ءِ کلیں راجاں دود ءُ ربیدگی یا نیکراھی تک ءَ گچینی ءِ شات ءُ شاتکامی کنگ ءِ گچینی ءِ روچ ھست انت کہ لس مھلونک مُچی ءُ میڑہ کن اَنت ھمے روچاں پہ شات ءُ گل دارنت مئے نیکراھی شادھاں چے یک شادھے ائید اِنت کہ مئے نیزگاریں مھلونک سجھیں سال ءِ جپا کشی ءَ پہ وت ءُ پہ وتی کسانیں چکاں جوڈھے گُد ءُ جپتے چمپل پرے سالے ءُ پرا سالے زور اِیت بلے چُش کہ ما گلامیں راج اِنت گلامی ءِ چامپٹ ءَ ءُ زورگریں استان ءِ زلم ءُ زوراکیاں اچ مئے دود ءُ ربیدگی شادھاں گوں ھوار مئے نیکراھی شادہ ھم اچ ما پُل اِتگ اَنت ائید بزاں وشیانی روچ ۔۔ائید بزاں گَل ءُ شاتکامیانی روچ ۔ ائید آجوئیں راجانی واستا ھمک سال کیت۔ھما راج کہ آھان ءَ ھاکمانی چامپٹ سر ءَ نہ لگ اتگ ۔ھما راج کہ ھچ نزان اَنت گُژن چی ایت ۔ ھما راج کہ ھچ بزّگی ءُ بیوسی نزان انت ائید ھماھانی واست ءَ اَنت۔ بزاں ائیدانی شادھیں روچاں مردم وتی کار ءُ باراں موکل کن انت۔ دور ءُ دَریں مساپر واتر وتی ڈیھاں کاینت۔ وتی لوگ ءِ مردمانی گوما ھوار شاتکامی کن انت۔نوکین گُد گورا کن انت۔ وتی مرمانی لوگاں رونت گِندُک ءُ ھک پھلّی کن انت ۔ کوہ ءُ دیاراں پکنک ءُ سیل ءَ رَو انت۔ وتی زند ءِ وشیاں گوں ھم گرنچ بنت-
بلے بلوچ
بلوچ راج دگنیا ءِ تھا ھما راجاں چہ شمار بیت کہ آ سک بّزگ ءُ بیچارگ انت ۔ آھانی سر ءَ ھر وڑیں زلم کنگ بیت۔
آھانی سر ءَ زوراکانی شھمات لگ اِتگ ۔ بلوچ راج ھما اندازہ بزگی ءَ رَس اِتگ کہ ھمُک بلوچ ءِ گدان پرسیگ انت ۔ ھمُک لوگ کبرستان جوڑ انت ۔ھمک ھنکیں بے سروگ انت ھمُک ماتانی تنسُکین بچ گار ءُ بیگواہ اَنت۔شھید کنگ بوتگ انت ۔ گھارانی برات ماں تھاریں کوٹیاں بندیگ انت گھار ءُ مات پہ آھانی پٹ ءُ پول ءَ زگریں روچ ءِ سر ءَ ھمک در ءُ دروازگانی دپ ءَ اوشتاتگ انت ماتاناں وتی شُد لاپیں نُنکیں چُک بڈ ءُ سر انت گون سِستگیں سواساں دراج دراجیں روانک کشّ انت وتی گار ءُ بیگواھیں مردمانی واستا پہ بزّگی ءُ بیچارگی سالانی سال وداریگی ءِ آسر ءَ نشتگ انت۔ کدی بیت مئے برات مئے چک مئے پِت ءُ مئے چمّانی روک آجو بنت۔ بلوچ ءِ بزگیں راج ءَ پہ ھچ وشی ءُ شاتکامی پشت نہ کپتگ۔
گڑا اے بیوسیں راج چتور ائید بہ کنت۔گوں کے ءَ شاتکامی بکنت۔ مئے ائید ھمیش انت ھر کہ وھد ءَ گوں گار ءُ بیگواھیں مردمانی گم ءُ رنجاں ھوار بہ بہ ایں شھیدانی جنوزام ءُ چوروانی گُد ءُ سواسانی پگر ءَ بہ بہ ایں۔ وتی بیوس ءُ بزگانی لنٹانی سر ءَ بچکندے بہ سماریں مئے ائید بیت۔
اگاں ھمے راج ءِ تھا کسے کہ وتارا آجو گوش اِیت۔شھیدانی بیوس ءُ جنوزامیں جنیناں شھیدانی بیچارگین چورھیں چُکان ءُ گار ءُ بیگواھیں مردمانی گھارءُ ماتاں پیریں پتاں بے سما بہ بیت ءُ راج بّزگی ءَ ھچ کمار مہ کنت ۔ وتی سر ءَ جھل بہ کنت ءُ وتارا کور ءُ کّر بہ کنت ۔ائید ءَ شاتکامی بہ کنت ۔ گڑا آ مردم سکیں بے سنچے گُشگ بیت۔
پرچاکہ بلوچ راج گلام انت ءُ گلام ءَ شاتکامی ھچ زیب نہ دنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: دروگیں تسلہ

نبشتہ کار: راشد جان بلوچ

دی بلوچستان پوسٹ

ناسرھسین ء گلام ھسین جھاؤ لنجار ءِ جاھمنند اِنت کہ آئی ءِ بیگواھی ءَ دو سال ءَ چہ گیش وھد گوستگ انگت ءَ ھچ وڑیں ھال نیست، بیست ءُ شش جُلکان ءَ دو ھزار ءُ ھژدہ ءَ چہ ھب چوکی ءَ امیدگس ءِ دگ ءَ بلوچ کالونی ءَ اِستان ءِ لشکر ءُ چیریں گل ءِ کارمند نیم شپ ءَ آتکگ اَنت ءُ لوگ اِش انگیر ءَ کرتگ ءُ کھول ءِ ایدگہ مردم ءُ جَن ءُ چُک تیوگ ءَ یکجاہ کرتگ ءُ لَٹ داتگ اَنت، پہ زورانسری” ناسرھسین آوار جتگ ءُ گوں وت ءَ بُرتگ ھمے گوشتگ اِش زوت یل ءَ ئِے دئیں، نوں آئی ءِ بیگواہ بوگ ءَ را دو سال ءُ دوماہ گوستگ انگت ءَ ھچ وڑیں ھال نیست اِنت ئِےـ

آئی ءِ تپلیں چُک مدام وتی مات ءَ را ءُ بلُک ءَ را جُست کن اَنت “اما مئے پت کجا شتگ بُگش بیا نوں اَما باز زھیر کنگ ءَ اِنت، ھرچ وھد ءَ مات ءَ چُکاناں ھمے دروگیں تسلہ داتگ اَنت، شمئے پِت ائید ءَ کیت چُک سک ءَ وش اَنت، گڑا نند اَنت ءَ جُست کن اَنت ،ائید کدی بیت …..؟ ابا” ائید ءِ روچاں کیت پہ تئی ساھت ءُ دمانیں جُست گرگ ءَ نہ بیت ….چُک ھاموش بنت ایوک ائید ءِ روچ ءِ ودار ءَ اَنت، وھدیکہ ائید نزدیک بوھان اِنت، چُک گُل ءَ بال اَنت مئے پِت کیت مات ءُ بَلُک بے تاھیر بوگ ءَ اَنت نوں دگہ چونیں دروگیں تسلہ اِش بہ دیان ئے ائید اتکگ ءُ سر ءَ اوشتاتگ چی بُگوشاں چُکاناں ـ

بیگواھیں” ناسرھسین ءِ ھر سئیں چُک ” سگارجان ،ابدرھمان جان ءُ کستریں دو نیم سالگیں شوھاز جان گُل ءُ شاداں اَنت مئے پِت ائید ءَ کیت اِنت ءُ مارا بازار ءَ گردگ ءَ بارت ءُ پُچ ءُ چمپل گپت ءُ دنت ،چُک سرپد نہ اَنت کہ مئے واجھیں پِت یزیدی لشکر ءَ بُرتگ ءُ بیگواہ کتگ، انچیں جاھے ءَ بندیگ کرتگ ھال ءُ اھوالے ھم ھچ کس نیار اِیت باریں چون اِنت …..؟

انچو گوشت اَنت، پِت ءُ مات بے بدل اَنت ءُ اللہ ءِ داتگیں سوگات اَنت،
پِتی مھراں کسے زھگاں دات نہ کنت …. پِت ءِ اے دنیا ءِ سر ءَ پہ زھگاں پاکیں بھشت زانگ بیت، بے مات ءُ پِت ءَ زند کھریں جھنم ءِ رنگ ءَ گندگ بیت، مرچی بلوچ ءِ باز چُک گوں ھمے رنگیں گرانیں جاوراں گوں دُچار کنگ بوتگ اَنت ، مات ، گُھار ، برات ، پِت ، ھر روچ ماں دگاّنی سر ءَ زھرشانی کنگ ءَ اَنت گُھار سیما ءُ ھسیبہ کمبرانی گوں ارسگیں چَمّاں ودار ءِ رھسراں نشتگ انت ھنچو ڈاکٹر دین جان ءِ دُتگ سمَی جان ءُ مھلب دین جان ءَ یازدہ سال گوں جگر بُریں گماں گوازینتگ کدی مئے لوگانی چرِاگ واتر کاہ اَنت.
؟

زندمان ءِ دراھیں ندارگ اے وھد ءَ ھچ مانا نہ دار اَنت تاں وھدیکہ بیگواھیں چُکانی پِت، گُھارانی برات، ماتانی بچّ لوگاں واتر نہ بوتگ اَنت دوا اِنت ناسرھسین بلوچ ءَ ھور گار ءُ بیگواھیں بندیگ آجو بات اَنت ـ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ ویلاگر ءُ ازمکار انیتا جلیل ءِ نوکتریں لکیں تامر شنگ بیتگ۔

دی بلوچستان پوسٹ

گوستگیں روچ ءَ ڈھوریہ آرٹ اکیڈمی گوادر ءِ یوٹیوب چینل ءَ شنگ بیتگیں لُکیں تامر ارسیگیں ائید تامر داں انگت ءَ سئے ھزار ءُ سئے سد مردماں چار اِتگ۔

فیصل مراد ءِ نبشتگیں ءُ ڈائرکشن ءَ جوڑ بیتگیں تامر ءِ تھ ءَ مستریں کارست انیتا جلیل ئیگ اِنت کہ دو چکانی مات ءِ کرد ءَ پیش دارگ ءَ اِنت کہ آئی ءِ لوگ واجہ ءَ آ یل کُتگ اَنت۔

دہ منٹ ءِ اے تامر یک تھنائیں ماتی ءِ بزگی ءُ ائید ءِ وڑیں وشیانی وھد ءَ بزگیں مردمانی کسہ ءَ پیش دارگ ءَ اِنت۔

اے تامر ءِ تھ ءَ انیتا جلیل ءَ ھوار دگہ دو کسانیں ازمکاراں ھم جوانیں وڑے ءَ وتی ازم پیش داشتگ کہ آ انیتا جلیل ءِ چکانی کرد ءَ پیش دارگ ءَ اَنت۔

پہ تامر ءِ چارگ ءِھاترءَ لنک ءَ کلک کن اِت۔

زانگ بہ بیت انیتا جلیل چہ ایشی ءَ پیسر ھم بازیں تامرانی تھ ءَ گون بیتگ کہ آیانی تھ ءَ یکے ھمے زیتاں شنگ بیتگ اَت بلوچ آباد ءِ نام ءَ اَت ۔

پسنی ءَ پوج ءِ دست ءَ یک مردمے بیگواہ

دی بلوچستان پوسٹ

سر بیتگیں ھالانی رد ءَ بلوچستان ءِ تیابدپی شھر پسنی ءَ پوج ءُ چیریں ادارھانی کارمنداں بنجاھی بازار ءَ بیڑ برتگ ءُ یک مردمے آوار جتگ ءُ برتگ –

دمگی مردمانی رد ءَ آوار جنگ بیتگیں مردم ءِ پجار ایاز بلوچ ءِ نام ءَ چَہ بیتگ ءُ کیچ پیدارک ءِ جھمنند اِنت –

زانگ بہ بیت پیدارک ءَ نیکراھی ناشرکاریں گل لشکر ء طیبہ ھم پُرزور اِنت ءُ بازیں وھداں لشکر ء طیبہ ءِ دست ءَ مردمانی آوار جنیانی ھال ھم پیداک اَنت –

دومی نیمگ ءَ گوستگیں روچ ءَ بلوچستان ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءِ چیئرمین نسر اُللہ بلوچ ءَ چہ پاکستان ءِ سرکار ءَ لوٹ کرتگ ءُ گوشتگ کہ ائید ءَ پیسر دراھیں بیگواھیں مردماں سرکار یلہ بہ کنت –

زانگ بہ بیت بلوچستان ءَ ھمک جاہ ءَ مردمانی بیگواھیانی درچ یکشل ءَ برجاہ اَنت گوستگیں دَہ سالاں چہ شال ءَ بیگواھیں مردمانی درگیجگ ءَ وائس فار بلوچ مسنگ پرسنز ءَ شدکشیں ھرتالی بنجل جتگ ءُ نشتگ کہ آئی ءِ لوٹ اِنت ھر مردمے کہ گرگ بیتگ آ آمیدگساں پیش کنگ بہ بیت –