نکشونانی جنگ
ٹی بی پی شونگال
پاکستان ءَ وتی نوکیں سرکاری نکشون دیم ءَ آؤرتگ کہ اِشی ءِ تہ ءَ زیردستیں کشمیر، جونا گڑہ ءُ ماناوڑہ ءَ ھوار سرجمیں سر کریک ءِ دمگ پاکستان ءِ تہ ءَ پیش دارگ بیتگ اَنت۔ گمان انچو دیگ بیگ ءَ اِنت کہ پاکستانی نکشون ءِ تہ ءَ آشوبی بدلی آرگ بتگ بلے چُش نہ اِنت۔ پاکستان 1971 ءَ ھندوستانی اُستان جوناگڑہ ءُ دانکہ حیدرآباد ءَ ھم نکشونانی تہ ءَ وتی بھر پیش داشتگ۔ سرکریک ( سندھ ءُ گجرات ءِ سیمسر) ءِ جیڑہ مدامی ھمد ءَ بیتگ ۔ پاکستان ءَ مدام ٹاہ داتگ کہ آئی ءِ سیمسر سرکریک ءَ داں روبرکتی گُڈ سر ءَ اَنت وھدی کہ انڈیا ءِ گوشگ اِنت کہ سیمسر سرکریک ءِ نیام ءَ اِنت۔ ھمے وڑ ءَ پاکستان زیردستیں کشمیر ءَ ھم نکشون ءِ تہ ءَ ارتیں نشانانی بارگیں لَکیر ءِ دروشم ءَ وتی بھر ءَ پیش داران اِنت ءُ آئی ءِ سر ءَ نبشتہ بیتگ “مانگیشتگیں دمگ” نی مانگیشتگیں دمگ ءِ جاہ ءَ آئی ءِ سر ءَ نبشتہ کَنگ بیتگ “ گیر کانودی پیم ءَ چیردست کُتگیں کشمیر” ءُ ٹِکانی کسانیں کِشک ھلاس کُتگ ءُ کشمیر ءُ گلگت بلتستان یکجاہ پیش دارگ بیتگ اَنت۔ اِشی ءِ چپیں آسر ھم دراتک کنت پرچہ کہ انڈیا ءِ مزنیں مدتی ءَ چہ ھمے لیکہ اِنت گلگت بلتستان ھم، کشمیر اِنت، بزاں انڈیا ءِ یک بھرے۔
چُش کہ نکشون ءِ تہ ءَ اے گپ نبشتہ اِنت کہ “نکشھے ءِ دلجمیں بستار ءِ پیسلہ ءَ ھواریں راجانی گل ءِ سلامتی کونسل ءِ منّگ نامھانی رژنائی ءَ کنگ بیت” بلے اے ھم پاکستان ءِ ھلاپ ءَ شُت کنت پرچہ کہ سلامتی کونسل ءِ منّگ نامہ ءِ تہ ءَ انڈیا ءُ پاکستان ءَ دوئیناں گوشگ بیتگ کہ سرجمیں کشمیر ءَ چہ وتی پوجاں بہ کش اَنت ءُ سلامتی کونسل ءِ رد ءَ مردماں گچین کنگ ءِ ھک دیگ ءَ پد اے پیسلہ کنگ بیت کہ کشمیری گوں پاکستان، انڈیا اگاں آجوئیں بستارے ءَ نندگ لوٹ اَنت۔ پاکستان ءَ کدی وتی پوج نہ کش اِتگ اَنت، مردمانی لوٹ جُست کنگ ھم کدی نہ بیتگ بلے پد ءَ ھم پاکستان ءَ کشمیری مھلوک ءِ پیسلہ ءِ زانگ ءَ ابید کشمیر پاکستان ءِ تہ ءَ ھوار کُتگ ۔ زاھر بیت کہ بس کشمیر ءِ ھیال اِنت، کشمیریانی نہ اِنت۔
ھبناکیں وڑی ءَ نکشونانی اے جنگ تھنا داں کشمیر ءَ بندوک نہ اِنت اے سرجمیں دمگ ءَ شنگ اِتگ۔ سال 2019 ءَ انڈیا ءِ نوکتریں نکشون ءِ آیگ ءَ چین بے وار کُتگ اَت۔ انڈیا ءِ نیمگ ءَ آرٹیکل 370 ءِ ھلاس کنگ ءَ پد کہ آئی ءَ زیردستیں کشمیر انیگیں بستار ءَ ھلاس کُتگ اَت ءُ کہ ھما دو نوکیں یونینانی (لداخ ءُ جموں کشمیر ) ءِ اڈ دیگ ءِ سر ءَ بندوک اَت، اے نوکیں نکشون ءِ تہ ءَ گلگت بلتستان ءَ زیردستیں کشمیر ءِ یونین ءِ بھر پیش دارگ بیتگ اَت، ھمے وڑ لھتیں ھنکین کہ آیانی سر ءَ چین ءِ ٹاہ اِنت، آ لداک یونین ءِ بھر ءَ ھوار کنگ بیتگ اِت اَنت۔ اِشی ءَ پد چین ءَ گوں ھندوستان ءَدیم پہ دیم نہ بیگ ءِ پالیسی ءِ سر ءَ پد ءَ چارگ بندات کُتگ۔ اِشی ءَ پد ھندو چین لائن آف کنٹرول ءِ سر ءَ جنگ بیتگ اِت اَنت ءُ چین ءِ ھواریاں ھندوستان ءِ ھِژم دیگ ءِ ھاتر ءَ نوکیں نکشون دیم ءَ آؤرتگ اَنت ۔
ھمے سال ءَ نیپال ءَ ھم وتی نوکیں نکشون شنگ کُتگ، کہ اِشی ءِ تہ ءَ بازیں انڈین دمگ ھوار کنگ بیتگ اَنت۔ نیپال ءَ اَبید چین ءِ کمک ءُ دلبڈی ءِ چُشیں گام زرت نہ کُتگ اَت۔ دومی نیمگ ءَ پاکستان مدامی چینی پالیسیانی زِیت منوگری ءَ کنت۔ ھمے یکشلی ءَ برجاہ داران ءَ نی پاکستان ءَ انڈین دمگاں ھوار کنان ءَ وتی نوکیں نکشون دیم ءَ آؤرتگ – ھبناکیں پیم ءَ اے نکشون چینی ھنکینانی تہ ءَ ھچ وڑ ءَ دزمانجنی کنگ ءَ گندگ ءَ نئیت۔ پاکستان اے جاورھالانی تہ ءَ پہ وت یک سوب ءِ گندگ ءَ اِنت، نکشون ءِ دیم ءَ آرگ ءَ چہ راستیں جاورانی سر ءَ ھچ وڑیں سان نہ کپ اِیت بلے ھچ کنگ ءَ اَبید پاکستان چین ءُ آئی ءِ مردماں وش کُت کنت۔
الم چُشیں گمان ھست اَنت کہ آؤکیں وھداں پاکستان ءَ اے نکشون ءِ دیم ءَ آرگ ءِ مُز گرگ ءَ اَبید تاوان رس اِت کنت بلے اے وھد ءَ پاکستان آرٹیکل 370 ءِ ھلاسی ءِ یک سالے سرجم بیگ ءِ وھد ءَ چُشیں گام چِست کنگ ءَ گوں وتی لس مردماں دزگٹ کنگ ءَ وتی سوب ءَ گندگ ءَ اِنت۔
نی چُش کہ جوناگڑہ ءِ جیڑہ پد ءَ سر چِست کنگ ءَ اِنت، اے بلوچاں یک موہ ءِ دیگ ءَ اِنت کہ آ وتی راجدپتر ءُ نکشون ءِ سر ءَ گپ بہ کن اَنت، کہ آئی ءَ آ سئے ڈیھانی پاکستان، ایران ءُ افغانستان ءِ تہ ءَ بھر کُتگ اَنت۔ جوناگڑہ ءِ نواب محبت خان سوم ءِ پاکستان ءَ گوں یکجائی ءِ کاگدانی سر ءَ دز نشان جنگ ءَ پد ھم ریاست جوناگڑہ ءَ پاکستان ءِ بھر بیت نہ کُت پرچہ کہ جوناگڑہ ءِ مھلوک ءَ پاکستان ءَ گوں یکجائی نہ لوٹ اِتگ اَت۔ لس مردمانی گوں پاکستان ءَ یکجاہ بیگ ءِ گچین کاری ءِ تہ ءَ تھنا 91 ووٹ پاکستان ءِ ھک ءَ رس اِتگ اَت۔ بلوچ مھلوک ءَ ھم خان قلات احمد یار خان ءِ پاکستان ءَ گوں مانگیشتگیں یکجائی رد کُتگ اَت بلے پد ءَ ھم پاکستان ءَ پوجی زوراکیاں گوں بلوچستان دزگیر کُتگ اَت۔
داں ھد ءِ بلوچستان ءِ سیمسرانی سیادی اِنت گُڑا بلوچاں کدی ھم گولڈ سمت کِشک ءُ ڈیورنڈ کِشک نہ من اِتگ، کہ آ بلوچاں انیگیں افغانستان ءُ ایران ءِ تہ ءَ بھر کن اَنت۔ ڈیورنڈ کِشک ءِ منگ نامہ ءِ سر ءَ نگیگیں جاورانی تہ ءَ افغان امیر عبدالرحمان خان ءُ مارٹیمر ڈیورنڈ ءَ دز نشان کُتگ اَت۔ جھانی سیمسری منگ نامہ ءِ تہ ءَ اے گپ المی اِنت کہ آئی ءِ سر ءَ درستیں بھرانی دز نشان بہ بنت بلے اے منگ نامہ ءِ سر ءَ بلوچانی دز نشان داں روچ مروچی نیست اَنت۔
پاکستان اے سیمسرانی نزوریں کانودی بالاد ءَ سرپد اِنت، ءُ اے گپ ءَ ھم شر زانت کہ اے وتگڑیں سیمسر چوں گوستانکی راجان ءُ ھانوادھاں بھر ءُ بانگ کنگ ءَ اَنت۔پاکستان ڈیورنڈ کِشک ءُ گولڈ سمت کِشک ءِ سر ءَ اڑاند پیداک کنگ ءِ ھاتر ءَ دیوال مِک کنگ ءَ اِنت ءُ بازیں وھداں لس مردماں چہ زور کار گرگ ءَ اِنت۔ پاکستان وتی نکشون ءِ تہ ءَ ھندوستانی دمگانی تہ ءَ وتی سیمسراں کشگ ءَ اِنت بلے اے گپ ءَ بے ھیال اِنت کہ افغانستان ھم ڈیورنڈ کِشک ءَ نہ من اِت۔ اِشی ءَ اَبید بلوچ راجدوست ءُ پاکستان ءِ پشتون راجدوست ھم ڈیورنڈ لائن ءِ بالاد ءَ نہ من اَنت ۔ ھمے وڑ ءَ بلوچ سمت کِشک ءِ منگ ءَ ھم ساڑی نہ اَنت۔ سندی راجدوست ھم وھد پہ وھد سندودیش ءِ نکشون ءَ دیم ءَ کار اَنت۔ اے درستیں دمگ کشگ ءُ چارگ بہ بنت گُڑا پاکستان ءَ تھنا پنجاب پشت کپ اِیت، کہ آئی ءِ دو دمگ ڈیرہ غازی خان ءُ راجن پور ءِ مردم ھم گیشتریں بلوچ اَنت ءُ ایشاں بلوچ راج ٹاہ کن اَنت ۔
