TBP Balochi

نبشتانک: یازدہ اگست ءُ بلوچ راج

نبشتہ کار : ظفر بلوچ

دی بلوچستان پوسٹ

یازدہ اگست پہ بلوچ راج ءَ وش ءُ وشھالیں روچے بوتگ ، اے روچ ءِ بابت ءَ بازیں نبشتہ کار ءُ راجدپتر نویس وتی کلم ءَ چنکس کارمرز بِہ کن اَنت منی ھیال ءَ کم اِنت۔ پرچا کہ پہ ھمے مبارکیں روچ ءِ ھاتر ءَ بلوچ راج ءِ باندات ءُ دیمروی ءِ واستا راج ءِ مزار بیمّیں پُسّگاں وتی سر ندْر کُرتگ اَنت۔ ما وھدے راجدپتر ءَ چمشانکے دے اِیں ءُ چار اِیں گُڑا مارا ھمے گندگ ءَ کَیت کہ اے بے مٹّیں ءُ بے دروریں گُلزمین ءِ سر ءَ جتا جتائیں زُوراکاں وتی زُور جتگ اَنت دانکہ ما اے سرڈگار ءِ سر ءَ وتواجھی بِہ کن اِیں ، بلے اے سرڈگار ءِ کُنگُر ءُ ملّیں پُسّگاں پہ وتی ماتیں ڈیھ ءِ رکّینگ ءَ گوں دَری زوراکاں جنگ ءُ مِڑ کُرتگ گُل ءُ پُلّیں ڈیھ نہ داتگ۔ ھر وھد ءَ گوں دُژمن ءَ جنگ کُرتگ ءُ آرا ھمے کلوہ داتگ کہ اے گُلزمین بلوچستان گْوشگ بیت اے مئے راج ءِ مات اِنت ، اِیشی ءِ پھازگ (حفاظت) مئے راجی زمہ واری انت کہ چہ دُژمن ءَ آئی ءَ بِہ رکّینیں ءُ اے سرزمین ءِ سر ءَ وتواجھی بلوچ راج ءِ ھر زھگ بِہ کنت ، چی ءَ کہ بلوچ گُلزمین ءِ سر ءَ وتواجھی ءِ بنیادی ھکّ بلوچ ئیگ اِنت ۔ وھدے کہ ما راجدپتر ءَ چار اِیں ءُ بہ وان اِیں مارا ھمے گِندگ ءَ کَیت کہ وھدے برطانیہ ءِ پوج بلوچ ڈیھ ءِ سر ءَ اُرش کنت گڑا بلوچ راج ءِ ورنا ، پیر ءُ کماش گون وتی (روایتی) بزاں گوں ڈاڈری سِلاھاں پرنگ ءِ پوج ءِ ھلاپ ءَ جنگ ءَ بندات کنت پہ وتی ڈیھ ءِ رکینگ ءَ ، مروچی راجدپتر ھم اے گپ ءِ گواہ اِنت کہ انگریز پوج بلوچ راج ءِ لشکر ءِ دست ءَ شکست وارت ءُ اے شکست گوک پروش ءِ کنڈگ ءَ بلوچ ھان نوشروانی ءِ جنگ بیت ، یاکہ میر مھراب ھان ءِ سلاھبندیں راجی کنگریں بچّانی جنگ بیت ، اے مڑاھداریں مردانی راجی جُھد ءُ کُربانی ھچ وڑیں توسیپ ءُ ستا ءِ مھتاج نہ اَنت ۔راجدپتری کتابانی تہ ءَ ھمے نبشتگ اِنت کہ انگریز ءِ کبزہ ءِ ھلاپ ءَ میر مھراب ھان گوں وتی سنگت ءُ ھمراھاں کابز پوج ءِ ھلاپ ءَ مزاھمت ءَ بِندات کنت ، ھمے وڑ ءَ 1839 ءَ بِہ گر تاں یازدہ اگست ءُ نوزدہ سد ءُ چِل ءُ ھپت ءَ تاں ھمے جنگ انگریز ءِ ھلاپ ءَ برجم دارگ بیت۔ اے جنگ ءِ ھلاس کنگ ءِ ھاتر مکاریں انگریز بلوج راج ءِ سرمچارانی ھلاپ ءَ وتی کلیں رِپک ءُ ھُنراں کارمرز کنت ، بلے چہ نااُمیتی ءَ ابید دگہ ھچ وڑیں سوب مندی یے نہ رس اِیت ، گُڑا انگریز پوج چہ وتی ناکامی ءَ پد بلوچ ڈیھ ءَ یلہ کنت ءُ روت۔ ھمے وڑ ءَ 11 اگست 1947 ءَ وائسری ھِند آل انڈیا ریڈیو ءِ جارکش ءِ رد ءَ بلوچستان ءِ آجوئی ءِ جار ءَ جنت ، بلوچستان ءِ آجوئی ءِ جار ءَ چہ پد ھان کلات جمعہ روچ ءَ کلات ءِ جامعہ نماز جاہ ءَ بزان (مسجد ءَ )جمعہ ھُتبہ ءِ تہ ءَ بلوچ راج ءَ آزاد بلوچستان ءِ مبارکبادی دنت۔ 250 ءِ روچ ءَ ھان ءِ کلات ءِ سروکی ءَ دو کابینہ اڑ دیگ بیت ، یکّے ایوان زیرین ءُ یکّے ایوان بالا گْوشگ بیت بلے یکبرے پد ءَ انگریز یک نوکین پندلے ساز اِیت ءُ مزن وزیر چوھدری اسلم مھمد الی جناہ ءَ یک نِمدی یے توست ءَ خان قلات ءَ کراچی ءَ لوٹ اِیت بزاں (طلب) کنت۔ میٹنگ ءِ تہ ءَ مھمد اَلی جناہ ءَ گوں تھلیں زبان ءَ گْوش اِیت کہ بلوچستان ءَ جبرا گوں پاکستان ءَ ھوار بِہ کن ، بزاں(الحاق) ءِ گپ ءَ جنت ۔بلے ھان کلات الھاک ءِ ھِلاپ کنت ءُ دوئیں ایوان ءِ یک دیوانے تلب کنت ،وھدے ھان ساھب مزن وزیر اسلم ھان ءِ جناہ ءِ پروگرام اسمبلی ءِ پورم ءَ بیان کنت گُڑا ایوان ءِ تہ ءَ ساڑی ئیں کلیں ممبر نہ ایوک ءَ اے اَمل ءِ مزمت ءَ کن اَنت ، بلکیں یک مزمتی بِلّے ایوان ءِ تہ ءَ پاس کن اَنت ۔ اے اَمل ءِ ھلاپ ءَ میر گَوس بکش بزنجو ، مولانا اَرز محمد ، مولانا محمدعمر ، مولانا پَتھ مھمد ءُ دگہ بازیں پارلیمانی ممبر ھمے گْوش اَنت کہ اے اَمل مئے راج ءُ مئے ڈیھ ءِ سر ءَ یک کِسمیں اُرشے ، اگاں اسلام ءِ نام ءَ ڈیھ ءُ مئے راجی آجوئی پچگرگ بیت ، اے درگت ءَ افغانستان ءُ ایران ھم اسلامی ڈیھ اَنت گڑا اے ڈیھاں ھم گون پاکستان ءَ ھوار بِہ کن اِت ۔ ھمے وڑ ءَ 27 مارچ 1948 ءَ پاکستانی لشکر ءَ رنگروٹ اکبر ھان ءِ سروکی ءَ قلات ءِ سر ءَ اُرش کنت ءُ قلات ءِ شاھی مسجد ھم بمباری ءُ شھید کنگ بیت ۔ ھمے اُرش ءِ تہ ءَ مزین کساسے ءِ بلوچ پسگ شھید کنگ بنت ،گُڑا اے کبزہ ءِ ھلاپ ءَ آگا اَبدلکریم گوں وتی بیل ءُ ھمبلاں مزاھمت کنت ، بابو نوروز ھان گون وتی بچّاں دیم پہ کوہ ءَ درکپ اِیت ، بلے بے مُرادیں دودا ھان زرک زئی گوں پاکستان ءِ پوج ءَ پندل ساز اِیت ءُ بابو نوروز ھان ءَ اللہ ءِ پاکین کُرآن ءِ واستہ ءَ دنت ءُ ھمے گْوش اِیت آزمانی مکدسیں کتاب ءِ نیام ءَ بلوچستان ءِ جیڑہ گون نند ءُ نیاد ءَ گیش ءُ گیوار کنگ بیت۔ بابو نوروز اللہ ءِ مکدسیں کتاب ءِ سر ءَ بیسہ کنت ءُ چہ کوہ ءَ گوں وتی چنگ بروتیں بچاں ماں کوچگ ءَ کیت ۔چمِداں پاکستان ءِ مکاریں پوج بابو نوروز ءَ گوں وتی بچ ءُ ھمراھاں دستگیر کنت ماں ھیدر آباد ءِ سنٹرل جیل ءَ بارت ءُ بندیگ کنت ۔ ھمے زندان ءِ تہ ءَ بابو نوروز ءِ ھتیں بچ ءُ ھمراھاں پاھو دنت ءُ شھید کنت ۔ بابو نوروز ھم ھمے زندان ءَ شھید بیت ، وھدے بلوچ راج ءِ ھما پُسّگاں پہ وتی ماتیں گلزمین ءِ آجوئی ءِ واستا سر ندْر کرتگ اَنت ، چہ کماش شھید سدومری ،شھید ڈاکتر ھالد ، شھید دلجان ءُ شھید نورالھک ءَ بِہ گر شھید نواب اکبر ھان بگٹی ءَ 2009 ءَ شُھدا ء مرگاپ ءِ شھید واجہ گلام مھمد ، شھید لالہ منیر ، شھید شیر مھمد ءَ تانکہ کیت ءُ سربیت ۔اے آجوئی ءِ کاروان گوں کُربانیاں دیم پہ وتی منزل ءَ روان اِنت ، شھید جنرل اسلم بلوچ ءَ کیت ءُ سر بیت ، بلے اے جنز اُوشت ءِ نام ءَ نہ زانت ءُ انگت گوں وتی ترندیں گاماں جُنزان اِنت۔ مروچی بلوچ ورناھاں وتی شھیدانی پکر ءُ لیکہ اِلمی ءُ سیاسی بنیاد ءَ زرتگ ءُ روگ ءَ اَنت۔ انشاءاللہ ھما وشیں روچ دُور نہ اِنت کہ بلوچ ڈیھ دوبر آجو بیت ءُ دگنیا ءِ نکشہ ءِ تہ ءَ آجوئیں ڈیھ ءِ نام ءَ زانگ بیت
آزاد بلوچستان زندگ بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچستان ءِ کارباری شھر ھب ءَ ناشُناسیں مردماں پہ چاردہ اگست ءِ درگت ءَ برجاھیں اسٹال ءِ سر ءَ دز بمب ارُش ءِ کُتگ، اُرش ءِ آسر ءَ اسٹال ءَ تاوان رس اِتگ ءُ تراک ءِ آسر ءَ پرنٹیر کور ءِ کارمنداں ھوار کم چہ کم شش مردم زدگ بوتگ اَنت ـ

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تھا اے اُرش ءِ زمہ واری منّ اِتگ ءُ گُشتگ کہ بی ایل اے سرمچاراں مروچی بلوچستان ءِ شھر ھب ءَ آر سی ڈی دگ ءِ نزیک ءَ چاردہ اگست ءِ درگت ءَ برجاہ داشتگیں یک اسٹالے ءِ سر ءَ دز بمب اُرش ءِ کُتگ پوجیانی سَے کارمنداں ھوار آھانی بازیں ھندی کارمند زدگ کُرتگ انت ـ

آئی ءَ دیمتر ءَ گُشتگ کہ بلوچ سرمچاراں اے اُرش ھما وھد ءَ کُتگ کہ پاکستانی پوج ءِ چیردستی ءَ ھب چوکی ءَ پاکستان ءِ نام گپتیں جشن ء آزادی ءِ دارگ ءِ ھاتر ءَ یک اسٹالے جنگ بوتگ، اے اسٹال ءَ فرنٹئیر کور ءِ کرنل ءِ سروکی ءُ چار ءُ گزار ءَ گلزار نامیں مردمے کنگ ءَ بوتگ ـ

جارکش ءَ گوشتگ کہ پاکستانی پوج بلوچستان ءِ جتا جتائیں دمگاں وتی پوجی تاکت ءِ زور ءَ لس مھلوک ءَ زورانسری پاکستان ءِ نام گپتیں جشن آزادی ءِ دارگ ءَ لاچار کنگ ءَ اِنت- ءُ ھوار نہ بوھگے سوب ءَ مھلوک ءَ بیھار دیگ انت- مھلوک ءَ زورانسری پاکستان ءِ بیرک دست ءَ دیگ بوھگ ءِ انت ءُ آھانی کِسگ ءَ بیج جنگ ءَ انت – پاکستان ءِ پوج ءَ وتی داشتگیں ڈیتھ اسکواڈ ھم یکجاہ کتگ ءُ آھانی زور ءَ مھلوک ءَ بیھار دیگ اِنت کہ چاردہ اگست ءَ ھوار بہ بہ اِت –
پوج توپک ءِ زور ءَ بلوچاں اے وڑیں مُچیاں ھوار کنت ءُ دنیا ءَ وتی ناکامیں ھیال دیگ لوٹ اِیت کہ بلوچ راج آئی ءِ گون ءَ انت ءُ آئی ءِ زوریں بنکی ءَ منّ اِت ـ

جارکش ءَ دیمترا گُشتگ کہ ھمے وڑ بلوچستان ءَ پاکستان ءِ پوج وتی تاکت ءِ کارمرز کنت ءُ چاردہ اگست ءَ دارگ ءَ انت ھمے وڑ بلوچ پاکستان ءِ اے روچ ءَ بے نیاز انت، اے وت مئے راجدپتری لوٹ ءِ منانکی کنت کہ پاکستان ءُ آئی ءِ زوریں آیگ ءَ بلوچ راج ءَ ھچ ھمگرنچی نیست ـ

بی ایل اے ءِ جارکش جئیند بلوچ ءَ گُشتگ کہ ما اشی ءَ سرپد کنگ ءُ گشینگ لوٹیں کہ بلوچستان ءَ زورانسری چاردہ اگست ءِ مراگشانی برجاہ دارگ ءِ مول ءُ مراد بلوچ چاگرد ءَ جھلی ءُ پاکستانی مُھرے جنگ ءُ بلوچ راج ءِ راجدپتری سِنچ، لوٹ ءُ بلوچ رزمبش ءِ نیزور کنگے یک ٹول ءُ مٹولے ءِ بھر اَنت – اے دژمن ءِ “پندل سازی ءِ ” یک بھرے بی ایل اے ایشی ءِ ھچ وڑیں اجازت ءَ نہ دنت ـ بی ایل اے اے وڑیں مراگش ءُ اسٹالانی سر ءَ اُرش کنت ـ

گُڈسر ءَ جارکش ءَ گُشتگ کہ ما بلوچ راج ءَ سرپد کنگ لوٹیں کہ آ اے وڑیں مراگش ءُ اسٹالاں چہ دور بہ بنت تانکہ ھر وڑیں تاواناں چہ بہ رکّ انت ـ

نبشتانک: ما چی ءَ سما نہ کن ایں؟

نبشتہ کار: اتیکہ بلوچ

دی بلوچستان پوسٹ

اگاں ما وانگجاہ ءِ ھر تبکے (کلاس) ءِ کتاب ءَ ھورت بہ چار ایں گُڑا ما گِند ایں کہ ھر کتاب ءِ تہ ءَ گوں رِد ءُ بنداں درونت بنت، لھتیں کتاباں دَہ تا بیست ءُ لھتیں کتاباں سی ءَ نزیک درونت ھم ھست اَنت۔ ما ھر کتاب ءِ درونتانی لَڑ ءَ کتاب ءِ دومی لمبر تاکدیم ءَ ھم گِند ایں کہ رِد ءِ سر ءَ اَنت پمیشکا ما تچک بِہ زان ایں کہ وانگجاہ ءِ ھمُک تبک ءِ نودربراں 1- ریازی،2- ھندی، 3-پارسی، 4-ایشانی بُنرھبند، 5-اسلامی نیکراھی، 6-چاگِردی لبزانک،7- سائنسں، 8- انگریزی، 8-پزکس، 10-کمیسٹری، 11- اَربی، 12- بائیولوجی وڑیں ھر کتاب ءِ درونت وانینگ بنت ءُ پد ءَ چکاس اش گِرگ بنت۔
اگاں ما مرچیگیں گیدی ءِ نامداریں سائنسدادان، انجینئر، ازمکار، ملکار، جنگی کارسر ءُ ڈاکٹراں بِہ گند ایں گُڑا ما زان ایں کہ اے دُراھیں سوبمندیں لس مھلوک ءَ وتی وانگجاہ ءِ ھر تبک ءَ شش تا ھپت سبجیکٹ وانتگ ءُ ھر سبجیکٹ ءَ پانزدہ تا بیست درونت بیتگ اَنت۔ بزاں یک تبک ءِ، چَہ سد ءَ گیشتر درونت بیتگ انت کہ انگت ما نودربر ایشاں وان ایں، پد ءَ تو ھساب کن کہ ھر وانگجاہ ءِ دہ تبک انت بزاں تو دہ تبک ءِ دربرگ ءَ کساس یک ھزار درونت وان ئے۔ پد ءَ تو پہ گیشتر وانگ ءَ شھدربرجاہ ءَ رو ئے ءُ اود ءَ ھم ھمے دابیں وانگی اَنت کہ ھر کتاب ءِ درونت اَنت۔

اگاں تو پہ انجینئرگ ءُ میڈیکل وانگ ءَ مزن شھدربرجاہ ءَ برو ئے گُڑا اود ءَ ھم ھمے وڑ ءَ زنڈیں وانگی اَنت ھر وانگی ءَ چار ھزار تاکدیم ءُ سدانی ھساب ءَ درونت اَنت پمیشکا ما گْوش ایں کہ دربرگ گوں کتاب ءَ، ءُ کتاب گوں درونتاں ھمگرنچ انت پمیشکا باید انت ما اے ٹوھیں راستی ءَ بہ منّ ایں کہ بے درونتانی وانگ ءَ ھچ کس ءَ دیمروی نہ کتگ ءُ نَیکہ کسے بے درونتانی وانگ ءَ بَلد بیت۔ چوناھیگا راستی وَ ھمش انت کہ ما دُراہ بلوچاں پارسی، ھندی ءُ انگریزی چَہ کتابانی درونتانی وانگ ءَ دربُرتگ بلے بژن انت کہ مئے بلوچی زبان وانگجاھاں وانینگ نہ بوتگ چمیشکا ما مرچی وتی راجی زبان ءَ جْوان ونت ءُ نبشتہ کت نہ کن ایں۔
البت پہ راجی زبان ءِ دربرگ ءَ راج ءِ تہ ءَ بے کساس ھُبّ ءُ واھگ ھست انت پمیشکا ما گِندگ ءَ ایں کہ مرچی باھندیں بلوچ راج ماں چاگِردی رسانکدر ءَ وتی جِند ءِ راجی زبان ءَ وانگ ءُ نبشتہ کنگ ءَ انت بلے نبشتہ اش گیشر رد انت۔ البت سک بژن بیت کہ کس کس ءَ راست کنگ ءِ جُھد ھم نہ کنت ءُ ناں کہ کسے وتی نبشتگیناں وت چمشانکے دنت ءُ راست کنت نَیکہ کسے بلوچی ءِ درونتے وان ایت کہ مردم کمیں بلوچی ءِ بُنکی چیزاں انچوشکہ ” ے، یے ئے، ئِے ءَ ، ءِ ءُ اں” وڑیں گالاں راستیں جاھاں کارمرز بہ کنت، منی جِند ءِ ھیال ءُ لیکھانی رِد ءَ اگاں کسے ردیں سْیاھگ ءِ نبشتانکے نبیسّ ایت ءُ شِنگ بہ کنت گُڑا منی نز ءَ آ راجی زبان ءَ دیمروی نہ دیگ ءَ انت بلکیں زبان ءَ زیانی ءُ تاوان دیگ انت انچوشکہ ما گلامیں راج بلوچی ءَ چَہ ھمے چاگِردی رسانکدر ءِ نکان ءُ نبشتانکاں وانگ ءُ دربرگ ءَ ایں۔

اگاں کسے ردیں سْیاھگ ءِ نبشتانکے نبیسّ ایت گُڑا آئی ءِ وانوک رَد نبیسّگ ءَ ھیل کن اَنت پمیشکا ما گوش ایں کہ باید انت بلوچ راج وتی راجی زبان ءِ درونتاں جْوان بہ وان اَنت ءُ بلوچی نبشتہ ءِ سْیاھگ ءَ بزان اَنت پد ءَ نبشتہ بہ کن اَنت بلے بلوچ اے ھم نہ زان اَنت کہ ما پہ ھندی، پارسی ءُ انگریزی ءِ دربرگ ءَ دہ سال جتگ ءُ کساس یک ھزار درونت ونتگ بلے ما پہ وتی جِند ءِ راجی زبان ءِ راست نبیسّگ ءُ دربرگ ءَ پانزدہ گْونڈیں درونت نہ وان ایں البتہ ایشانی سرجمی ءَ وانگ ءَ سَے روچ لگ ایت ءُ چد ءُ پد ما بلوچی ءَ جْوان ونت ءُ نبشتہ کت کن ایں بلے بژن بیت اگاں تو کسے ءَ ھمے سرپدی بہ دے ئے کہ تئی گالِرداں پلان پِلان جاہ ءَ ردی ھست انت کہ تو ایشاں راست بہ کن کہ تئی نبشتانک ءِ وانوک چَہ تئی نبشتانک ءَ چیزے دربر اَنت گُڑا گْوش اَنت کہ نی توری راست انت یا رد انت، نی من راست ئِے کُت نہ کن آں۔
البت اے وڑیں مردماں کَے سرپد بہ کنت کہ بلوچ راج ءِ زھگاں جِند ءِ راجی زبان بلوچی ماں وانگجاھاں وانینگ نہ بوتگ چمیشکا بلوچ راج ءِ مرچیگیں پدریچ وتی جِند ءِ راجی زبان ءِ وانگ ءُ نبیسّگ ءَ زَبھر انت بلے بلوچ راج ءِ زبان دوستاں راجی زبان زندگ داشتگ ءُ مرچیگیں موبائل بلوچی کلیتاک، بزانت بلد پریام، بلوچی وٹس ایپی دیوان ءُ پیسبُک ءِ آسراتی ءَ بلوچ راج وتی راجی زبان وان ایت ءُ نبیسّ ایت البت ما لوٹ ایں کہ وتی ھمے ردیاں شون بہ دے اَنت ءُ راستی وَ ھمیش انت کہ ردیاں ھما وھد ءَ راست بہ بنت وھدیکہ ما بلوچی درونتاں بہ وان این ھر گال ءِ راستیں جاہ ءُ کارمرزی ءَ بہ زان ایں چی ءَ کہ بے درونتانی وانگ ءَ ما مُدام رَد نبیسّ ایں، گُڑا چَہ مئے ردیں سْیاھگ ءِ نبشتانکانی وانگ ءَ مئے وانوک ھم رَدیں سْیاھگے زیر اَنت۔
باید انت ما پیسر ءَ بلوچی درونتاں جْوان بہ وان ایں، بلوچی سْیاھگ ءَ کمیں پھم این ءُ پد ءَ چیزے نبیسّ ایں بزاں بلوچ ءَ وتی راجی زبان ءِ پانزدھیں درونت اَلم ءَ وانگی اَنت ءُ ھمے درونت مرچی پیسبُک ءُ وٹس ایپ ءَ رس اَنت۔ دومی ھمے ھیل کن ایں کہ وتی نبیشتگیناں دو سَے رند ءَ وت چمشانک بہ دے این ءُ ایشانی ردیاں بہ کش ایں انچوشکہ دگنیا ءِ ھر زبان ءِ نبشتہ کار ءُ ندکار وتی نبشتگیناں دو سَے رند وت وان اَنت ءُ راست کن اَنت۔
بلوچ میزران بات اَنت ءُ بلوچی دیمروی کنات۔ شالا انچوش بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

دی بلوچستان پوسٹ

روکپتی بلوچستان ءَ نامی ئیں بلوچ رھشون ھمید اللہ سردار زئی بیران بیتگ –

دمگی مردمانی رد ءَ بازیں وھدے بیتگ کہ بلوچ رھشون ھمید اللہ سردارزئی نادراہ بیتگ کہ آئی ءِ جاندراھی تھران ءَ بیگ ءَ بیتگ ءُ گوستگیں شپ ءَ آئی ءِ جاور گیش نہ گیگ بیتگ اَنت ءُ بیران بیتگ –

سردار ھمید اللہ روکپتی بلوچستان ءِ دمگ چھبار ءَ نندوک بیتگ ءُ گوست ءَ آئی ءِ بنکی ھنکین دشتیاری ءَ بیتگ –

دمگی مردمانی رد ءَ ھمید اللہ وتی ٹک ءَ ھوار دمگ ءِ سردار منّگ بیتگ ءُ آئی ءِ واجھیں کماش میر مولداد ھم دشتیاری ءِ سردار بیتگ –

دمگی مردمانی رد ءَ ھمید اللہ سردارزئی ھمک مردم ءَ پہ یک جوان ءُ نیکیں بامردے بیتگ ءُ مروچی آئی ءِ بیرانی ءَ سرجمیں بلوچستان پُرسیگ کرتگ –

ٹپی بوتگیں مردم پہ جاندراھی ءِ ھاتر ءَ ھسپتال ءَ دیم دیگ بوتگ انت۔ـ

دی بلوچستان پوسٹ

ریل کاردارانی گُشگ انت کہ تنی وھدی 800 ریل کوارٹر پرشت ءُ پروش ءِ آماچ انت ـ
او کاردارانی تنخواھاں ماھے 5 درسد کٹ کنگ بیت ءُ اشی ءَ ابید ھم کوارٹر مرمت کنگ نہ بنت ـ

زدگ بوتگیں مردمانی کھولانی گُشگ انت کہ اپسرانی وتی کر ءَ مال ءُ مڈی ھست بلے گریبیں مردمانی گپ ھچ اش نہ کنت ـ

وھیل ءَ پد ریل ءِ کارداراں چہ سرکار ءَ لوٹ کتگ کہ سرکاری کوارٹرانی مرمت کنگ بہ بیت ـ

زانگ بہ بیت گوستگیں دو روچانی تہ ءَ بلوچستان ءِ ھورانی مولماں بلوچستان ءِ بازیں جاھاں دگ پروشتگ اَنت ءُ توپانی کرتگ بلے سرکاری گام تنی وھدی ءَ گندگ بیگ ءَ نہ اَنت –

مولم شناساں گوستگیں دو روچاں اے جار پِرینتگ ءُ گوشتگ کہ بلوچستان ءَ بشی ترندیں ھور پیداک اَنت مھلوک وتی ھیال ءُ انان ءَ وت بہ کن اَنت –

دی بلوچستان پوسٹ

بلوچستان ءِ مزن شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ شدکشیں زھر شانی ءَ4032 روچ سرجم بوتگ ـ شال ءَ این ڈی پی ءِ ثناء بلوچ ءَ ھوار دگہ مردماں بنجل ءِ تر ءُ تاب کُرتگ ءُ بیگواھیں مردمانی کھولانی گون ءَ دلپدردی درشان اِتگ –

ھمے درگت ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان اِتگ ءُ گُشتگ کہ انسانی رجدپتر چہ ازیمیں شھید ءُ زورانسری آوار جنگ بوتگیں مردمانی دیمونی ءَ سریچیں کہ آھاں کانودی رھبند تیز کُرتگ ءُ ایمنی ءُ چاگردی ھکانی ھاتر ءَ زلم ءُ زوراکیانی بگیری ءَ وتی نگرھیں جان کربان کُرتگ انت ـ

آئی ءَ گْوشت کہ جد ءُ جھد ءُ دیمونیانی اے راجدپتری یک ھاسیں وھد ءُ ھاسیں دمگے ءَ تاں چیر نہ بوتگ انت بلکیں وھدے انسانی چاگردے تھا چاگردی سنچ ودی بوتگ انت ھما وھد ءَ بگر تاں روچ ء مروچی مزلوماں زالم ءِ بگیری ءَ ایردست کنوکیں ھاکمانی بگیری ءَ پُرایمنیں جد ءُ جھدے یک راجدپتری کازے بندات کُرتگ مروچی وھدیکہ مزلوم ءُ ایردستیں راجانی ءُ سنچ ءَ زالم ءُ زوراکیں ھاکمانی بگیری ءَ جد ءُ جھد ءَ سرجمیں جھان ءَ ترندی ءِ گون ءَ برجاہ انت الم مالوم بیت کہ پاکستان ءِ جوڑ بوھگ ءَ بگر تاں روچ ء مروچی بلوچستان ءَ ریاست ءِ زلم ءُ زوراکی ءِ نشانگ جوڑ بوتگیں بلوچ شھیدانی جد ءُ جھد راجدپتری ءَ بیان کنگ بیت ـ

آئی ءَ گْوشت کہ بلوچستان ءَ پوجی کاروائیانی سوب ءَ ھزارانی کچ ءَ بیگواھیں مردم شھید کنگ بوتگ انت، راجی ٹکی زوراکی، نابرابری، اے دراہ پاکستانی ھاسیں ٹولیانی لوٹانی منوکیں زوراکانی پیٹو ءُ ریاستی مشینری ءِ راجدپتر سیاہ تریں تاکاں گوں گندگ بیت –

دی بلوچستان پوسٹ

ٹی بی پی پتر ھال ءَ سربوتگیں ھالانی رِد ءَ سَے سال ءَ تاں زورانسری آوار جنی ءُ گار ءُ بیگواھی ءَ پد یلا بوتگیں جسقم (آریسر) رھشون صابر چانڈیو یک رندے پد ءَ گوستگیں شپ ءَ چہ سندھ ءِ مزن شھر کراچی سچل بلاول میتگ ءَ پاکستانی پوج ءَ آوار جتگ ءُ بیگواہ کُتگ ـ

جسقم ء رھشون ءِ آوار جنی ءُ بیگواھی ءَ پد دنیگت ءَ آئی ءِ ھچ وڑیں ھال ءُ اھوال نیست ـ

اھوالکار ءِ رِد ءَ صابر چانڈیو سَے سال پیش بزاں 25 اپریل 2017 ءَ وتی وارس ابراھیم چانڈیو ءِ ھمراھی ءَ دادو نزیک ءَ ککڑ دگ ءِ سر ءَ ھما وھد ءَ زورانسری آوار جنگ بیگواہ کنگ بوتگ کہ آ 25اپریل ءَ جی ایم سید ءِ سالروچ ءِ مچی ءَ رؤگ ءَ بوتگ ـ

آوار جنی ءَ یک ماھے ءَ پد آئی ءِ وارس ابراھیم چانڈیو یل کنگ بوتگ بلے سابر چانڈیو سَے سال ءَ تاں بیگواہ بوتگ-

وائس فار مسنگ پرسنز آپ سندھ ءِ رِد ءَ سابر چانڈیو پد ءَ رند ءَ دوھزار نوزدہ ءَ لاڈکانہ ءَ اے ٹی ءَ چہ اے ٹی سی ءِ کیس ءَ زاھر کُتگ ءُ اے ٹی سی آمیدگس لاڈکانہ ءَ آرگ بوتگ، کہ اود ءَ گوستگیں دو سال ءَ آئی ءِ سر ءَ اے ٹی سی کیس چلگ ءَ بوتگ اے کیسانی تھا یک کیسے ءِ ھم منانک نہ بوتگ- آکرکار ھمے سال ءَ آمیدگس تچک ءَ یل داتگ ـ

گل ءِ رد ءَ گوستگیں شپ ءَ یک رندے پد ءَ کراچی سچل ایریا ءَ رینجرز ءُ دگہ پاکستانی ادارھاں آ یک سیادے ءِ گس ءَ زورانسری آوار جتگ ءُ بیگواہ کتگ-

وائس فار مسنگ پرسنز آپ سندھ ءَ جسقم ءِ رھشون صابر چانڈیو ءِ زورانسری آوار جنی ءُ بیگواھی ایرجتگ ءُ صابر چانڈیوے ءَ ھوار سرجمیں بیگواھیں مردمانی یل کنائینگے ھاتر ءَ زھرشانیانی جار پرینتگ-

دی بلوچستان پوسٹ

حب ءُ پنجگور ءَ پاکستانی پوج ءِ دست ءَ سَے براتاں ھوار چار مردم آوار جنی ءَ پد بیگواہ ـ

ٹی بی پی پتر ھال ءَ سربوتگیں ھالانی رِد ءَ بلوچستان ءِ کاروباری شھر ھب چوکی ءُ پنجگور ءَ پاکستانی پوج ءَ چار مردم زورانسری آوار جتگ ءُ بیگواہ کتگ اَنت ـ
گیشیں ھالانی رِد ءَ گوستگیں شپ ءَ بلوچستان ءِ کارباری شھر ھب چوکی “اکرم کالونی” ءَ پاکستانی پوج ءَ یک ورنایے زورانسری آوار جتگ ءُ گوں وت برتگ ـ
آوار جنگ بوتگیں ورنایے پجار مقبول ءِ جمعہ جاھمنند کولواہ کنیچی ءِ نام ءَ چہ بوتگ ـ
اھوالکارانی رِد ءَ اے ورناہ بُنکی ءَ کولواہ کنیچی ءِ جاھمنند انت بلے اود ءَ پاکستانی پوج ءِ زلم ءُ زوراکی، مدامی ءِ آپریشناں چہ در پہ دری زند ءِ گوازینگ ءَ لاچار بوتگ ءُ اتکگ ھب چوکی ءَ نشتگ ـ

ھمے وڑ پاکستانی پوج ءَ گوستگیں شپ ءَ پنجگور ءِ دمگ پروم گیشتی ءَ یک لوگے ءَ بیڑ ءُ برتگ زوراکی کنان ءَ سَے برات علی، سرور، ءُ عبدالمالک ءِ سنجر آوار جتگ ءُ گوں وت بُرتگ انت ـ

زانگ بہ بیت اشی ءَ پیش ھم پاکستانی پوج ءَ ھمے مردمانی لوگ ءَ بیڑ بُرتگ ءُ سرور پیش ءَ ھم دو رند ءَ اوار جتگ بُرتگ ءُ پد ءَ یل داتگ ءُ گوستگیں شپ ءَ یک رندے پد ءَ سرور گوں دو براتانی ھواری ءَ آوار جنگ ءُ بیگواہ کنگ بیتگ –

لچہ: زندگی

لچہ کار: طیبہ بلوچ

دی بلوچستان پوسٹ

تو مدام جونے ءَ من ءَ کوپگ ءَ
بئے پہ کّل کنگ ءَ؟
بلکیں تو ودار ءِ آس ءَ ستکگ ئے؟
اگاں ناں،تئی وشی ایر بُک
اِتگاں دردانی زِر ءَ
یا
تو پہ پشکپتگیں منزلے
ءَ وت ءَ چِنگ ءُ نزّ آراگ ءَ ئے؟
اگاں ناں
تو اشکندیں بچکند انگت پہ
لُنٹاں مھتل کتگ اَنت؟؟
زندگی!!
تو تھاری ءِ کندیل کُشتگ
پرچہ تماشا کتگ؟
تو واھگانی ھنکین ءَ بانزل اِشکیل
کُتگاں پہ کَے ؟
پرچہ تو پُلاں پہ کُنٹگاں
وداریگ کن ئے ؟
تو چیا گاریں اُوستانی شوھازگ
ءَ لانک بندے؟
زندگی!!
نو مُرتگیں زند ءَ لڈّ ءُ بارکن بر
کہ مرگ ءِ چیپّاں موریں
دیار ءَ تاھیرے پہ تئی
ودار ءَ زندگ اِنت!

دی بلوچستان پوسٹ

ٹی پی پی ءِ پتر ءَ سربوتگیں ھالانی رِد ءَ بلوچستان ءِ دمگ پنجگور “نیو بازار” ءِ نزیک ءَ ناشناسیں سلاہ بندیں مردماں یک مردمے دزگیر کُتگ گوں وت بُرتگ ـ

آوار جنگ بوتگیں مردم ءِ پجار مدثر ء کلیم اللہ ءِ نام ءَ زانگ بوتگ ـ

آئی ءِ کھول ءِ رِد ءَ ناشُناسیں مردم یک گاڑی ءَ سوار بوتگ انت ءُ آھاں نیو بازار ءِ نزیک ءَ موثر آوار جتگ ءُ گوں وت برتگ ـ

دنیگت ءَ تاں دزگیر کنوکانی پجار نبوتگ ءُ نانکہ ھندی پولیس ءَ ارزی نبشہ کرتگ ـ

زانگ بہ بیت بلوچستان ءَ زورانسری آوار جنیانی جیڑہ روچ پہ روچ گیش بوھان انت- اشانی بگیری ءَ مدامی زھرشانی ھم بوھگ ءَ اَنت ـ بلے آوارجنیانی تھا دنیگت ءَ کمی نیاتکگ ـ بلوچ راج دوستیں گل ، انسانی ھکانی پانکجن اے آوارجنیانی بھتاماں پاکستانی پوج ءُ آئی ءِ چیریں ادارھانی سر ءَ لڈگ ءَ اَنت ـ وھدیکہ پوجی ادارہ اے بھتاماں وتی سر ءَ زورگ ءَ تیار نہ انت ـ

وائس فار بلوچ مسنگ پرسنز ءِ کمک سرکماش ماما قدیر بلوچ ءِ رِد ءَ تنی وھدی سرجمین بلوچستان ءَ کساس چل ھزار ءَ گیش مردم بیگواہ اَنت- آھانی تھا گیشیں کچ بلوچ نودربر ءُ ورنایانی انت ـ ءُ بازیں بیگواھیں مردمانی زانگولیں لاش ھم دست کپتگ ءُ بازینے چہ ریاستی ازیت جاھاں یل بوتگ اَنت بلے آ مردمے ءِ ھساب ءَ نہ اَنت بازیں مازگی ٹارچرانی سوب ءَ مازگی نادراھی گورجتگ اَنت-