TBP Balochi

دی بلوچستان پوسٹ

بلوچستان ءِ شھر تفتان ءِ جاھمنند تاج محمد حسن زئی ءَ لوٹ کُتگ کہ شش روچ پیسر آوار جنگ بوتگیں آئی ءِ برات محمد رضا حسن زئی ءِ یلہ کنگ ءِ دزبندی کتگ ـ

دالبندین پریس کلب ءَ پریس کانفرنس کنان ءَ آئی ءَ گُشت کہ آئی ءِ برات تفتان کلی اسٹیشن ءَ پہ ملام گرگے ھاتر ءَ چست کنگ بوتگ ـ

آئی ءَ گُشت کہ اھاں تفتان لیویز کارگس ءَ ارزی نبشتہ کنائینتگ ءُ سَے آوار جنوکیں مردمانی نشاندھی ھم کُتگ ءُ ارزی ھماھانی نام ءَ کُتگ بلے دنگیت ءَ آ دزگیر کنگ بوھگ ءَ نہ اِنت ـ

آئی ءَ گُشت کہ مالی جاوراں ما نیزور انت ءُ گریبیں کھول ءَ چہ سیادی دار اِنت ءُ آوار جنوک آئی برات یل کنگے ھاتر ءَ چہ آھاں شش کروڈ کلدار لوٹگ ءَ انت ـ ءُ وتی لوٹانی منارینگے ھاتر ءَ آئی ءِ برات لٹ ءَ کُٹ کنگ بیتگ ءُ آئی ءَ آہ ءُ کوکار پون ءِ سر ءَ مارا اشکنائینگ بیتگ اَنت ـ ھمے سوب ءَ مئے کھول سک باز تکانسر انت ناوشیں جیڑھاں گوں دچار انت ـ

آئی ءَ چہ برزی ھاکماں لوٹ کُتگ کہ منی برات ءِ یل کنائینگے ھاتر ءَ گامگیج زورگ بہ بیت ـ آوار جنوک دزگیر کنگ بہ بنت ءُ سزا دیگ بہ بنت ـ

دی بلوچستان پوسٹ

مشکے ءَ پاکستانی پوج ءَ چار روچ پیسر لوگے ءَ بیڑ بُرتگ یک مردمے آوار جتگ ءُ ناشُناسیں جاھے ءَ بندیگ کُتگ ـ

ٹی بی پی پتر ءَ سربوتگیں ھالانی رِد ءَ بلوچستان ءِ دمگ مشکے پروار ءَ چار روچ پیسر پاکستانی پوج ءَ غلام نبی نامی ئیں مردمے ءِ لوگ ءَ بیڑ برتگ ءَ زوراکی کنان ءَ غلام نبی ءِ چُک بیام در آوار جتگ ءُ گوں وت برتگ کہ روچ مروچی انگت ءَ بیگواہ انت ـ

آئی ءِ کھول ءِ مردماں مروچی آئی ءِ آوار جنی ءِ گپ راست کُتگ گُشتگ کہ بیام در پوج ءَ چہ لوگ ءَ چست کُتگ گوں وت بُرتگ ـ

آھاں چہ انسانی ھکانی گلاں چہ لوٹ کُتگ کہ آئی ءِ یل کنگے ھاتر ءَ توار چست بہ کن انت ـ

زانگ بہ بیت مشکے ءَ ھوار بلوچستان ءِ جتا جتائیں جاھاں پاکستانی ریاست ءِ زوراکی یکشل ءَ برجاہ انت ـ تنی وھدی بازیں کساسے ءَ مردم اوار جنگ بیگواہ کنگ بوتگ انت ـ بیگواھیں مردمانی تھا گیشین کچ بلوچ ورنا ءُ نودربرانی ئیگ اِنت ـ

نبشتانک: آزمانک /نہ شُناسیں بیم

نبشتہ کار: کندیل مھر

دی بلوچستان پوسٹ

تھاری ءَ شپ وتی امبازاں زُرتگ اَت۔ واب ءَ من ءَ پھک یل کتگ اَت، گوں من انچوش گِلگ دار اَت کہ ھچبر واتر مہ بیت۔
کساس ماهے ءَ منی چماں واب مان نیست اَت۔ دل ءَ باتن ءِ ندارگ دم بُرتگ اَت۔ گم ءِ دَریگ پہ من کوھنیں بانے ءِ زنگیں دَریگے ءَ یک ھساب ءَ پچ اَت ءُ گوات گماں مانروپگ ءَ اَت، زند ءِ پچیں کتاب ءِ تاکے ءِ سر ءَ اجب گونگیں، ملوریں ءُ بے چاڑیں کسھے نبشتہ اَت۔ وشی ءِ مُرگ ءَ پہ دائم ءَ بال کتگ اَت۔ گم ءِ جمبر سیاه ءُ تهار اَت۔
من ھمے میان ءَ دل ءَ جیڑ اِت کہ زند ءِ سپر کجام کشک ءَ اِنت, داں کدی ھمے ڈول بیت، نہ دل ھمرہ اِنت نہ باتن ھمسپر اِنت۔ بانزُل کسے ءَ سستگ ءُ مانبُریتگ اِت اَنت۔
من کہ چم شانک دات ءُ چارت، اُمیت ءِ بندیک بارگ تر بوان اَت۔
من اے اُمیت ءِ سپر بندات‌ کتگ باریں روچے منزل ءَ سر باں کہ ناں، منی سستگیں بانزُل دوبر رُد اَنت یا ناں، باریں منزل ءَ سر باں یا ناں۔؟
ھمک شپ ءِ وڑ ءَ من ءَ یک کاپی یے ءُ کلمے گون اَت گوں لبزاں سر ءُ چیر اِتاں، اناگہ من مار اِت کسے من ءَ دور ءَ چہ توار دیان ءُ پیداک اِنت۔
دیر نہ بوت اتک ءُ سر بوت۔
آئی ءِ کد نہ برز اَت نہ پٹک۔
آ نہ لاگر اَت نہ زنڈ-
آ انسان ءِ داب ءَ نہ اَت۔
من ءَ پجّا کار ئے؟ آئی ءَ جلّیں توارے ءَ جست کُت۔
من ترا دُرست نکناں، من پسّہ دات۔
آئی ءَ ٹھک دیان ءَ گشت، من ءَ بزان، تی کوھنیں ھمسپر ءُ ھمراہ آں۔
تو زان ئے تی وشّی ءِ مُرگ کَے ءَ بال داتگ اَنت؟
تی ھوش کَے ءَ بُرتگ؟
تئی دل ءَ کے ءَ کتگ اَنت؟ تئی دشمن ءَ کتگ اَنت؟
تئی باتن کَے ءَ ملور کتگ؟
تئی چمّانی پٹّی ‎کے ءَ بستگ؟
تئی بُود کَے ءَ پچ گپتگ؟
من ءَ پجّا بیار هاهاهاهاهاهاها۔
ھمے جُستاں گوں آ ٹھک دیان ءَ گوات ءَ گوں رپت گار بوت۔
من ءَ ترسے چیر کپت۔ ھِیداں منی بالاد سرجم ءَ شُشت۔ من پہ ترس ءُ لارز پاد اتکاں چم شُشت ءُ وتی سھڑینگ ءِ جھد کت، سارتیں گینے کش اِت ءُ جیڑ اِت۔
اے چے بلاھے اَت؟
منی مات ءَ گشتگ کہ من کسانی ءَ بال کتگ دور ماں مُرگانی رمّاں ھوار بوتگ آں۔
بیدے سواری ءَ دور دوریں پند جتگ۔
مستیں گْورماں ھوژناگ کتگ۔
دل گوات ءِ باھوٹ کتگ۔
بلے ھچبر بیم ءِ ارجان نہ بوتگاں۔
گڑا مرچی اے چونیں بیمے منی باتن ءَ ایر اتک؟ –

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ رھگوزی راہ ءَ رؤکیں گاڑی ءِ سر ءَ ایرانی عطلات ءَ تیرگواری کرتگ ءُ یک مردمے کُشتگ –

کُشتگیں مردم ءِ پجار یاسین ھونکزئی ء مھتاج ءِ نام ءَ زانگ بیتگ –

اھوالکار ءِ رد ءَ بیست ءُ ھپت اگست ءَ یاسین سراوان ءُ سوران ءِ میانی دمگ ءَ روگ ءَ بیتگ کہ ایرانی عطلات ءَ دست داتگ چریشی ءَ چہ آ نہ اوشتاتگ ءُ عطلات ءَ تیرگواری کرتگ –

اھوالکار ءِ رد ءَ ایرانی عطلات ءَ گوشتگ کہ ما شکی ءِ سوب ءَ تیرگواری کرتگ کہ ھمے گمان بیتگ کہ گاڑی ءَ بندشی مال مان اِنت بلے جنگ ءَ پد آئی ءِ گاڑی ءَ ھچ وڑیں بندشی مال دز نہ کپتگ –

اھوالکار ءِ گوشگ اِنت کہ ھمک سال چوشیں وئیل بیگ ءَ اَنت بازیں چوشیں وئیلاں تنی وھدی باز مردم ھمے وڑ ءَ تیرانی آماچ کنگ ءُ کُشگ بیتگ اَنت –

کراچی ءَ گوستگیں 90 سالانی تھ ءَ ترند تریں ھور، بازیں مردمے بیران۔

دی بلوچستان پوسٹ

ٹی بی پی اھوالکار ءِ رد ءَ سند ءِ مزن شھر کراچی ءَ گوستگیں لھتیں روچاں چہ ترندیں ھورانی سوب ءَ کم چہ کم 23 مردم مرتگ اَنت۔ کراچی پولیس ءِ سروک غلام نبی میمن ءِ رد ءَ سَے شمبے ءَ چہ بندات بیتگیں اے ھَوراں داں انگت ءَ کم چہ کم 41 مردمانی بیران بیگ ءِ ھال سر بیتگ اَنت ۔

کمکی گلانی رد ءَ کراچی ءِ بازیں ھند ءُ دمگانی تہ ءَ داں انگت ءَ شُت کنگ ءَ نہ اَنت ءُ گمان ھمیش اِنت کہ مرتگینانی کساس گیشتر بیت کنت۔

مولم شناسیں ترامگیج ءِ سند ءِ سروک سردار سرفراز ءِ رد ءَ سال 1931 ءَ پد کراچی ءَ اے ترند تریں ھورانی یکشلی اِنت۔

یات بہ بیت کراچی ءِ تہ ءَ جھمنندیں لس مھلوکانی کساس چہ دو کروڑ ءَ گیشتر اِنت۔ کراچی ءِ بازیں میتگ ءُ ھنکین کچی آبادی ءِ نام ءَ زانگ بنت کہ چُشیں جاورانی تہ ءَ ھمے ھند ءُ دمگانی تہ ءَ نشتگیں مردم گیشتر بزگی ءُ واری ءِ زند گوازینگ ءَ لاچار اَنت ۔

دومی نیمگ ءَ مولم شناساں وتی نوک شنگ کرتگیں مولم شناسی ءِ تہ ءَ گوشتگ کہ جمبری ءُ ھورانی مولم سند ءَ سربنت –

آئی ءَ گوشت کہ نوکیں ھورانی مولم سند ءَ ھوار بلوچستان ءَ ھم ھورانی گمان کنگ بیگ ءَ اِنت –

آئی ءَ سند، کراچی، ھیدر آباد، ٹھٹھہ، بدین ءُ تھر پار ءَ ھوار بازیں جاھاں ھور گوں گرند ءُ گروکانی گون ءَ بیگ ء گمان اِنت –

رسانکدر اھوالکار ءِ رد ءَ ھمے وڑ ءَ مولم بلوچستان ءِ دمگ لسبیلہ، ھزدار ءُ آواران ءَ ھوار بلوچستان ءِ دگہ ھند ءُ دمگاں ھم گپت گوں ھورانی گمان اِنت –

آئی ءَ گوشت کہ ھزدار، کلات، لسبیلہ ءَ کورانی ترندیں آپانی آیگ ءِ گمان اِنت –

دی بلوچستان پوسٹ

تربت ءَ تیرگواری ءَ بیران بیتگیں مردم ءِ پجار مھمد یاسین بلوچ ءِ نام ءَ زانگ بیتگ –

سر بیتگیں ھالانی رد ءَ تربت ءِ دمگ شے تگر ءَ تیرگواری ءَ پاکستان نیشنل پاٹی “عوامی ” ءِ رھشون یاسین بلوچ بیران بیتگ –

دمگی مردمانی رد ءَ کوش ءِ سوب زمین جیڑھے ءِ سر ءَ بیتگ کہ چریشی ءِ آسر ءَ دومی نیمگ ءِ مردماں تیرگواری کرتگ ءُ یاسین بلوچ ء مولابکش بیران بیتگ –

یاسین بلوچ بی این پی عوامی ءِ بنجاھی باسک ءُ گوستگیں اپوزیشن رھشون ءُ دمگی کونسل ھلیل اھمو کٹور ءُ گوستگیں یوسی نازم گنہ گپور اھمد کٹور ءِ زامات اِنت –

دی بلوچستان پوسٹ

سر بیتگیں ھالانی رد ءَ کیچ ءِ دمگ تمپ ءِ کوھی ھند کلبر لگورانی شیپ ءَ لیویز ءِ کارمنداں یک لاشے دزکپتگ –

لیویز ءِ رد ءَ دزکپتگیں لاش ءِ پجار اشرف دادین جھمنند گردانک بلیدہ ءِ نام ءَ بیتگ –

کُشتگیں مرد ءِ اُمر پنجاہ سال ءَ گیش گوشگ بیگ ءَ اِنت ءُ آئی ء جان ءَ تیرانی ٹپ پِر اَنت –

لیویز ءِ رد ءَ لاش چِست کرتگ ءُ پَٹ ءُ پول بندات اِنت ءُ دزکپتگیں لاش ءِ بارو ءَ گیشیں ھال تنی وھدی دیم ءَ نیاتکگ –

دی بلوچستان پوسٹ

دی بلوچستان پوسٹ ءِ رسانکدر اھوالکار ءِ رد ءَ مُچیں آپانی مُچ بوگ ءِ سوب ءَ دو زالبول ءُ چار چکاں ھوار شش لاش کشگ بیتگ اَنت –

وئیل ءَ دگہ چیر تریتگیں مردمانی چیر ءَ بیگ ءِ گمان کنگ بیگ اِنت –

پولیس ءِ رد ءَ مَچیں آپانی جاہ ءَ لوگانی مردم کَشگ بیتگ اَنت ءُ بازیں جاھاں کمکی کار بیگ ءَ اَنت –

کراچی ءَ بیست ءَ چار ادارانی تہ ءَ ھورانی گوارانی ءَ گوستانک ءَ گورانی ءَ گیش گوستگ اَنت ءُ پشمبے ءِ روچ ءَ دوازدہ اداراں گورتگیں ھور ءَ دو سد ءُ بیست ءُ سَے ملی میٹر ءَ سر بیتگ –

اھوالکار ءِ رد ءَ چریشی ءَ پیسر بیست ءُ شش جولائی نوزدہ سد ءُ شست ءُ ھپت ءَ بیست ءُ چار اداراں گیشتریں ھور دو سد ءُ یازدہ مِلی میٹر بیتگ –

مولم شناس ءِ رد ءَ مروچی نیمروچ ءَ ھم ھورانی گوارگ ءِ گمان اِنت ءُ سندھ ءِ سرکار ءَ مروچی سرجمیں استان ءَ موکل دیگ ءِ جار پِرینتگ –

اھوالکار ءِ رد ءَ مولم شناسانی گوشگ اِنت کہ بحیرہ عرب ءَ جمبرانی بندگ ءَ اِنت ءُ مروچی نیمروچ ءَ کراچی ءِ زرباری دمگ کلفٹن، ڈیفنس ءُ آئی ءِ کَش ءُ گوراں ترندیں ھورانی گوارگ ءِ گمان اِنت –

گمان کارانی گوشگ اِنت ترندیں ھور گوں گرند ءُ گروکاں کراچی دمگ کلفٹن، ڈیفنس ءُ کش ءُ گوری دمگاں گمان بیگ ءَ اِنت ءُ شھر ءِ دگہ دمگاں سُبک سبک ءَ ھور گوار اَنت –

ڈائریکٹر مولم شناس سردار سرفراز ءِ گوشگ اِنت کراچی ءُ ٹھٹھہ ء میان ءَ زر ءِ تہ ءَ تروکیں آپ، سرکیوکیشن جاڑیگ اِنت –

سردار سرفراز ءِ گوشگ اِنت کہ گوات ءِ سبک بیگ ءَ سرکیوکیش جاڑیگ اِنت ءُ گمان ھمے کنگ بیگ ءَ اِنت نیمروچ ءَ ھور گوار اِیت –

دی بلوچستان پوسٹ

دی بلوچستان پوسٹ ءِ رسانکدر اھوالکار ءِ رد ءَ پاکستان ءِ اُستان خیبرپخونواہ ءِ دمگ سوات ءُ کوھستان ءَ توپانی ھاراں چہ بیست ءُ سَے مردم آپ بُڈ اِتگ ءُ نُھ مردمانی لاش درکنگ بیتگ اَنت ءُ آ دگہ لاشانی شوھازگ برجاہ اِنت –

ڈپٹی کمشنر سوات ثاقب رضا اسلم ءِ رد ءَ مدین ءَ شاہ گرام ءُ تیرات ءَ لوھڑیں کور آیگ ءَ بازیں لوگ بُڈ اِتگ اَنت، چِل لوگاں ھوار دگ ءِ پُرشت ءُ پروشاں دگہ چیزاں تاوان بیتگ اَنت وھدیکہ ھبدہ مردم آپ ءُ بڈینتگ اَنت –

ڈپٹی کمشنر ءِ رد ءَ شش مردمانی لاش کشگ بیتگ اَنت ءُ دگہ یازدہ لاشانی شوھاز برجاہ اِنت، دمگ ءَ کُمکی کار بیگ ءَ اَنت –

کوھستان ءِ دوریں میتگ لائچی ءَ برزیں لوھڑ کشیں ھاراں دمگ مَل اِتگ ءُ یکیں کھول ءِ ھپت ھار ءَ برتگ اَنت، کوھستان پولیس ءِ رد ءَ داں انیگ ءَ سَے زالبولانی لاش دزکپتگ اَنت وھدیکہ چُکاں ھوار سَے مردم انگت ءَ بیگواہ اَنت –

قراقرم ءِ شھدگ ءَ آپ سرگوستگ ءُ بازیں گاڑیاں تاوان بیتگ ءُ یک ٹنکرے ءِ ڈرائیور بیران بیتگ ءُ قراقرم ءِ دگ ءِ پُرشگ ءَ دو نیمی روگ ءُ آیگ بند بیتگ ءُ بازیں مردم گَٹ اَنت –