TBP Balochi

دی بلوچستان پوسٹ

ٹی بی پی ھال پتر ءَ سر بیتگیں ھالانی رد ءَ ڈرگز فری پسنی ءِ ورکنگ کمیٹی ءِ نیمگ ءَ چہ پسنی ءِ جتا جتائیں دمگاں پمپلٹ شنگ ءُ تالان کنگ ءُ نشہ ءِ بگیری ءَ بینر جنگ بوتگ ـ

بینر ءُ پمپلٹاں چہ لس مھلوک ءَ پنچ ستمبر ءَ نشہ ءِ بگیری ءَ بؤکیں روانک ءَ بھر زورگے لوٹ ءُ دزبندی کنگ بیتگ ـ

جار تاکانی رد ءَ نشہ ءِ بگیری ءَ بؤکیں روانک پنچ ستمبر ءِ بیگاہ ءِ ساھت چار ءَ چہ نیادی سر پسنی ءَ بندات کنگ بیت اِنت ـ

روانک ءِ واکداراں ءَ چہ سیاسی ءُ چاگردی، مزھبی ءُ کارباری ءُ پسنی ایندگے دمگ چربندن، نلینٹ، کپر، کلانچ، گرانی ءِ مردماں چہ لوٹ کنگ بوتگ کہ آ اے نشہ ءِ بگیری ءَ بؤکیں روانک ءَ بھر بزور انت وتی پرز ءَ پیلو بہ کن اَنت ـ

زانگ بہ بیت بلوچستان ءِ تھءَ منشیات چو وبا ء وڑ ءَ تالان بوھان اِنت ـ چریشی ءَ چہ بازیں کھولانی وشی پچ گپتگ انت ـ

دومی نیمگ ءَ پنجگور ءَ ھم چار ستمبر ءَ نشہ ءِ باپاری ءِ بگیری ءَ دیوان کنگ ءِ جار پرینگ بیتگ، دیوان ءِ بارو ءَ گوشگ بیتگ کہ چار ستمبر ءَ آدینگ ءِ روچ ےَ دزپروم مدرسہ ءَ بیگاہ ءِ ساھت پنچ ءَ یک دیوانے کنگ بیت کہ سورین، مکد، دزبازار، ھاجی امان اللہ بازار ءُ مراد بازار ءَ نشہ ءِ بگیری ءَ زیلی کمیٹی جوڑ کنگ بیت اِنت –

ھمے جار ءَ گوشگ بیتگ کہ پنچ ستمبر ءَ جائین مدرسہ ءَ دومی دیوان کنگ بیت ءَ اود ءَ جائین، گواش، کلیری، بندیکین ءَ نشہ ءِ بگیری ءَ کمیٹی جوڑینگ بیت ءُ مھلوک ءَ گوں دزبندی کنگ بیتگ کہ اے نیاداں گوں وت ءَ ھوار بہ کن اَنت –

بلوچستان ءِ تھءَ نشہ بگیری ءَ تنی وھدی یک گامگیجے دیم ءَ اتکگ ـ کہ درساں پیسر اے گامگیج چہ بلیدہ ءَ بندات کنگ بیتگ دشت ءُ پسنی ءُ بلوچستان دگہ دمگاں تالان بوھان انت ـ

لس مھلوک ءِ گوشگ اِنت کہ بلوچستان ءِ جتائیں ھند ءُ دمگاں تنی وھدی ھزارانی ورناہ نشہ ءِ آماچ اَنت ءُ نِی نِشہ ھما کچ ءَ سر بیان اِنت کہ نوک رُستگیں چکاں ھم نِشہ پہ وت ءَ وردنی ءِ سرپد بیگ ءَ اَنت چاگردی مردمانی گوشگ اِنت کہ اگاں اے نِشہ گِر ءُ دار کنگ نہ بیت گڑا چرے نشہ ءِ زور ءَ بلوچ چاگرد یک ٹوھیں جنجالاے ءِ دیمپان بیت کنت –

دی بلوچستان پوسٹ

سر بیتگیں ھالانی رد ءَ مند ءِ دمگ گوبرد ءَ پاکستانی پوج ءَ مروچی سھب ءَ بیڑ برتگ ءُ لشکر کشی کنان ءَ دو مردم آوار جتگ ءُ برتگ –

دمگی مردمانی رد ءَ پاکستانی پوج گوبرد ءِ بازار ءَ مانریتکگ ءُ لوگ لوگ ءَ پَٹ ءُ ھَنڈ کنان بیتگ ھمے میان ءَ پوج ءَ دو مردم آوار جتگ ءُ برتگ –

پوج ءِ دست ءَ آوار جنگ بیتگیں مردمانی پجار جابر ء شریف ءُ نصیر ء پیر مھمد ءِ ناماں زانگ بیتگ اَنت –

اھوالکار ءِ رد ءَ آوار جنگ بیتگیں مردمانی تہ ءَ جابر مگرب ءِ وھد ءَ یلہ داتگ ءُ نصیر تنی وھدی بندیگ اِنت –

اھوالکار ءِ رد ءَ نصیر پاکستانی پوج ءَ مندیگ کور ءَ ھما وھد ءَ آوار جتگ ءُ برتگ کہ آ ٹیکٹر ءِ سر ءَ کار ءَ بیتگ –

زانگ بہ بیت گوستگیں مگرب ءَ مند ڈلسر ءَ ھم پوج ءِ سر ءَ اُرش ءِ ھال بیتگ، بلوچستان ءِ سیاسی ءُ چاگردی مردمانی گوشگ اِنت کہ پاکستانی پوج ءِ سر ءَ ھما وھد ءَ کہ اُرش بیت پد ءَ پوج چریشانی پُشدر ءَ دمگانی سر ءَ بیڑ بارت ءُ لس بے میاریں مردماں لَٹ ءُ کُٹ کنت ءُ بازیں جاھاں جاڑیگیں مردماں آوار ھم جنت –

دی بلوچستان پوسٹ

سر بیتگیں ھالانی رد ءَ گوستگیں روچ ءَ روکپتی بلوچستان ءِ دمگ سراوان ھاش ءَ تیل کشیں گاڑی ءِ چپی بیتگ، چریشی ءِ آسر ءَ یک مردمے بیران ءُ یکے زدگ بیتگ –

اھوالکار ءِ رد ءَ گوستگیں روچ ءَ سراوان ھاش تیل کشیں گاڑی ءِ چپی بیتگ کہ چریشی ءِ آسر ءَ گاڑی ءِ ڈرائیور جلیل شاھوزھی بیران بیتگ ءُ آئی ءِ ھمراہ زدگ بیتگ کہ زدگ بیتگیں مردمے پجار نہ بیتگ –

اھوالکار ءِ گوشگ اِنت کہ ھمک سال چوشیں وئیل بیگ ءَ اَنت کہ مردم وتی لاپ ءِ شوھاز ءَ درکپگ ءُ برے ایرانی پوج ءِ تیرانی آماچ ءُ برے سیمسر ءَ گوزگ ءُ پاکستانی پوج ءِ تیرانی آماچ اَنت –

دی بلوچستان پوسٹ

شال ءِ دمگ ریلوے کالونی ءَ چہ نُھ روچ پیسر آوار جنگ بیتگیں ھشت سالی ئیں لاریب یلہ کنگ بیتگ ءُ آوار جنوک دزگیر کنگ بیتگ –

ایڈیشنل آئی جی پولیس عبدالرزاق چمہ ءَ رسانکدراں گوں گپ کنان ءَ گْوشتگ کہ بیست ءُ چار اگست ءَ لاریب نامی ئیں جنکوے ناشناسیں پرپٹ سواراں لوگ ءِ نزیک ءَ آوار جتگ ءُ برتگ – ارزی نبشتہ کنگ بیتگ ءُ پَٹ ءُ پول بندات کرتگ پد ءَ سرپدی بیتگ کہ دمک ءَ بُٹ پالش کنوکیں مرد ءَ جنکو آوار جتگ –

آئی ءَ ٹاہ داتگ کہ سرپدی کنان ءَ اے مردے لوگ ءَ داں سر بیتگ اِنت ءُ شال ءِ دمگ ھزار گنجی ءِ نزیک ءَ دزگیر کرتگ، آوار جنوک ءَ جنکو یک دگہ لوگے ءَ چیر داتگ –

اے آئی جی پولیس ءَ گْوشت کہ جرمکار دوھزار ءُ پانزدہ ءَ ھمے وڑیں جرمے ءَ دزگیر بیتگ بلے وتی دہ سال ءِ سزایانی سرجم کنگ ءَ ابید پیسرا یلہ کنگ بیتگ –

جنکوے ءِ پت ءَ شال ءِ پریس کلب ءِ دیم ءَ زھرشانی کرتگ –

دی بلوچستان پوسٹ

بلوچستان ءِ بنجاھی شھر شال ءَ وائس فار مسنگ پرسنز ءِ زھرشانی بنجل ءَ 4057 روچ سرجم بیتگ – نال ءَ چہ چاگردی باسک عبدالحق بلوچ، عبدالمالک بلوچ ءُ دگہ مردماں بنجل ءِ تر ءُ تاب کرتگ –

انسانی ھکانی بیگواھیں باسک راشد حسین بلوچ، بیگواھیں امداد اللہ، بلال احمد بلوچ، جمیل سرپردہ ءُ دگہ بیگواھیں مردمانی کھول اتکگ ءُ وتی زھرشانی اِش نبشتہ کنائینتگ –

زھرشانی بنجل ءِ جاڑیگیں بیگواھیں امداد اللہ ءِ پیر ءُ آجزیں مات ءَ وتی چُک ءِ یلہ کنگ ءِ دزبندی کرتگ ءُ گْوشتگ کہ منی چُک شش سالاں چہ بیگواہ اِنت کہ آئی ءِ بارو ءَ پاکستانی سرکار ءَ ابید دگہ ھچ سرپدی نیست کہ البت منی زھگ ءَ یلہ بہ کن اَنت –

مزن ھور ءُ پد ءَ پاکستان ءَ زورانسری ءِ آماچیں انسانی ھکانی باسک راشد حسین بلوچ ءِ مات ءِ گوشگ اِنت کہ چُک ءِ یلہ کنائینگ ءَ زھرشانی ءَ دو سال سرجم بیتگ بلے تنی وھدءَ من ءَ ڈیھی ادارھانی نیمگ ءَ ھچ پسو نہ رس اِتگ –

آئی ءَ گْوشت کہ راشد حسین ءِ دیمدراھی ءِ واستا شال ءُ کراچی ءِ پریس کلبانی دیم ءَ زھرشانی ءَ ھوار بیگواھیں مردمانی واستا ھستیں کمیشن ءَ ھم ھازری دیگ ءَ آں – آئی ءَ گْوشت کہ مزن ھور ءُ پاکستان منی چُک ءِ آوار جنی ءَ یکدست ءَ ھوار اَنت ءُ من انساپ ءِ راہ ءُ رھبندانی تہ ءَ وتی زھرشانیاں برجاہ داراں –

زھرشانی بنجل ءِ سروکی کنوکیں وی بی ایم پی ءِ کسان کمک سرکماش ماما قدیر بلوچ ءَ ھمے وھد ءَ گْوشت کہ اگست ءِ سرجمیں ءَ ماہ ءَ ھما جاھاں پاکستانی پوج ءُ چیریں ادارھاں ڈیتھ اسکواڈ ءِ ھواری ءَ ھوار بیتگ ءُ زوراکی برجاہ داشتگ اَنت ھمایانی واستا وی بی ایم پی ءِ نیمگ ءَ زھرشانی کنگ بیتگ اَنت بلے ریاستی رسانکدر ءُ پاکستان ءِ تھی انسانی ھکانی گلانی گوشاں ھم مورے نہ وارت –

آئی ءَ گوشت کہ انسانی ھکانی گلاں سوگند وارتگ کہ بلوچ نسل کُشی ءِ وتی گوش ءُ چماں بند کن اَنت –

ماما قدیر ءَ گْوشت کہ پُر ایمنیں جد ءُ جھد ءَ الگردیں سیاسی گلانی رھشون، نودربر گل، کارکنوکانی ھمکوپگیں درد ءَ راجدپتر گوش ایت کہ پاکستانی زوراکیں دستاں مارا نشانگ کرتگ – برے پوجی زوراکیانی دروشماِ برے لوگانی سر ءَ اُرش کنگ ءُ دمگی ڈیتھ اسکواڈ ءِ زورانی سر ءَ نشانگ کنگ –

آئی ءَ گْوشت کہ بنگالی آشوبی گل مھلوک ءِ گون ءَ ھوار بیتگ ءُ ریاست ءِ زوراکیانی بگیری ءَ راجدپتر ءِ بھر جوڑ بیتگ اَنت -سندھی، پٹان ءُ بلوچ راج ءِ سر ءَ زوراکی ءُ پُر ایمنیں جد ءُ جھد کنوکیں باسک، رھشونانی آوار جنگ ءُ کوش کسے ءَ چہ چیر نہ اَنت –

بلوچی زبان ءِ اولی آنلائن لبز بلد چہ اپسالہ مزن شھدربرجاہ سوئڈن ءِ نیمگ ءَ چہ شنگ کنگ بیتگ۔

دی بلوچستان پوسٹ

اپسالہ شھدربرجاہ ءِ نیمگ ءَ چہ بلوچی انگلش ءُ انگلش بلوچی لبز بلد پلے اسٹور ءُ ایپ اسٹورءَ ایرگیجگ بیتگ، کہ پہ اینڈروائیڈ ءُ آئی او ایس کارمرز کنوکاں ارزانی ءِ سرا دست کپت کنت۔

‏‎اپسالہ شھدربرجاہ سوئڈن ءِ نیمگ ءَ چہ شنگ بیتگیں لبز بلد داں انگت پنچ سد مردماں گیش ءَ وتی گوانگوانی تھءَ ایر گیتکگ بازیں مردماں ایپلیکشن ریویوزانی تھءَ اے لبز بلد ساڑاتگ ءُ یک جوانیں گامگیج ءِ نامینتگ۔

زانگ بہ بیت اے لبز بلد اپسالہ سوئیڈن ءَ اناگتی بیگواہ ءُ پدا بیران بیتگیں بلوچ اھوالکار ءُ بلوچستان ٹائمز ءِ شونکار ساجد ھسین ءِ یات ءَ اڈ دیگ بیتگ۔

‏‎

دی بلوچستان پوسٹ

سر بیتگیں ھالانی رد ءَ مند ءِ دمگ ڈلسر لدیگ کور ءَ پاکستانی پوج ءِ کاروان ءِ سر ءَ ناشناسیں سلاہ بندیں مردماں اُرش کرتگ –

دمگی مردمانی رد ءَ مروچی مگرب ءِ وھد ءَ پاکستانی پوج روگ ءَ بیتگ کہ لدیگ کور ءَ ناشناسیں سلاہ بندیں ٹوھیں سلاھانی گون ءَ اُرش کرتگ –

دمگی مردمانی رد ءَ اُرش داں یک ادارے ءَ برجاہ بیتگ ءُ تیرانی تواراں دمگ جکسینتگ اَنت –

پاکستانی پوج ءِ گیشتریں اُرشانی زمہ واریاں بلوچستان ءِ آجوئی ءِ لوٹوکیں سلاہ بندیں گل منّگ ءَ اَنت بلے تنی وھدی اے اُرش ءِ زمہ واری ھچ گل ءَ نہ من اِتگ ءُ نانکہ پاکستانی پوج ءِ نیمگ ءَ چوشیں ھال دیم ءَ اَتکگ –

گوستگیں روچ ءَ ریاستی ڈیتھ اسکواڈ ءِ کارمندانی سرا اُرش کنگ بیتگ، اُرش ءِ زمہ واری بی ایل اے ءَ منّ اِتگ۔

دی بلوچستان پوسٹ

ٹی بی پی اھوال پتر ءَ سر بوتگیں ھالانی رِد ءَ کیچ ءِ دمگ تمپ ءُ گومازی ءِ نیام ءَ نھنگ کور ءَ ناشُناسیں سلاہ بندیں مردماں گوستگیں روچ ءَ دوشمبے ءِ ساھت دوازدہ ءَ استانی ڈیتھ اسکواڈ ءِ کارمند نادل ملانٹی ءِ گاڈی ءِ سرا اُرش کُتگ،ـ اُرش ءِ آسر ءَ ریاستی ڈیتھ اسکواڈ ءِ کارمند نادل رکیتگ ءُ آئی ھمراہ ازیم نامی مردمے ٹپی بوتگ ءُ گاڈی ءَ سک باز تاوان رستگ۔

دومی نیمگ ءَ ریاستی ڈیتھ اسکواڈ ءِ گاڈی ءِ سرا بوتگیں اُرش ءِ زمّہ واری بلوچ سلاہ بندیں گل بی ایل اے ءِ ءَ منّ اِتگ۔

بی ایل اے ءِ جارکش جئیند بلوچ ءَ رسانکدراں وتی شنگ کرتگیں درشان ءِ تھءَ گوشتگ کہ بلوچ لبریشن آرمی ءِ سرمچاراں تمپ ءِ دمگ ملانٹ ءَ پاکستانی پوج ءُ چیریں ادارھانی جوڈ کرتگیں نام گپتیں ڈیتھ اسکواڈ ءِ کارمندانی گاڈی ءِ وتی نشانگ کُتگ۔

جارکش ءَ گوشتگ کہ اے اُرش تمپ ءَ ڈیتھ اسکواڈ ءِ مستری کنوکیں نادل پنام نادلوک ء عبدالقادر ءُ آئی نیٹورک ءِ سرا کنگ بوتگ، چریشی آسر ءَ آئی ھمراہ عظیم ء کمالان سک باز ٹپی بوتگ۔

جارکش ءَ گوشتگ کہ اے گروپ ملانٹ ءَ ھوار تمپ ءِ ایندگہ دمگانی تھءَ پاکستانی پوج ءُ چیریں ادارھانی سرپرستی ءَ بازیں سلکاریاں ھوار بوتگ انت۔

گڈسر ءَ جارکش جئیند بلوچ ءَ گوشتگ کہ بی ایل اے یک راجی پوج ءِ بستار ءَ بلوچ راج ءِ پھازگ ءَ وتی پرز لیکیت ءُ راجی مجرم ھچ وڈا پھل کنگ نہ بنت۔

شال ءَ بیگواھیں مردمانی درگیجگ ءِ ھاتر ءَ زھرشانی برجاہ اِنت۔

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ 4056 روچ سرجم بیتگ – نیشنل پاٹی ءِ کلانیں رھشون میر عبدالغفار قمبرانی ءُ دگہ مردماں بنجل ءِ تر ءُ تاب کرتگ ءُ کھولانی گون ءَ پدردی درشان کرتگ –

ھمے وھد ءَ وی بی ایم پی ءِ رھشون ماما قدیر بلوچ ءَ گْوشت کہ ما پاکستان ءُ آئی ءِ ادارھانی سر ءَ اوست نہ داریں پرچاکہ پاکستان ءِ سر ءَ اوست دارگ ھوش ءُ ھیال ءَ چہ سرگوز اِنت –

آئی ءَ گوشت کہ ھما کہ مارا جنگ ءَ اِنت گڑا آ چون مارا انساپ دنت، ما جھان ءِ دودمانیں مھتر ءُ انسانی ھکانی اداراھاں گوں دزبندی کن ایں کہ آ بلوچانی توار ءَ گوش بدار اَنت، بلوچستان ءَ انسانی ھکانی لگتمالیانی سر ءَ گامگیج بہ زور اَنت – انسانیت ءِ واستا وتی کرد ءَ پیلو بہ کن اَنت –

آئی ءَ میان اُستمان ءَ گوں دزبندی کرتگ ءُ گوشتگ کہ آ بیگواھیں بلوچانی واستا وتی کرد ءَ پیلو بہ کن اَنت – دودمانیں جھان ءِ اے وڑیں بے تواری انسانیت ءِ واستا ناوشی ءِ جاوراں ودی کنگ ءَ اَنت اگاں جھان ءَ اے وڑی ءَ بے تواری ءَ گوں نیشت گڑا جھان زوال ءُ تاوانباری ءِ نیمگ ءَ شت کنت ٹ

ماما قدیر ءَ گوشت کہ اے تاوانباری ءُ زوالی ءِ زمہ وار دودمانیں جھان ءُ انسان دوستیں ادارہ بنت – اگاں ھمگرنچیں شام، اوگستان، تیونس، لیبیا، مسر، یمن ءَ شت کنت گڑا بلوچستان ءَ پرچا اتک نہ کنت، بلوچستان ءَ پاکستان ءِ زوراکی سرگوز اَنت –

آئی ءَ گوشت کہ دودمانیں جھان ءِ سر ءَ اے کڈنی بیت کہ ایشی ءِ بگیری ءَ گامگیج بہ زور اِیت – پاکستانی پوج شھری آبادیانی سر ءَ کور ءُ کائی تیرگواری کنت،بیمناکیں زُلم کنگ اِنت تانکہ بلوچ مھلوک ءِ پدریچ ءَ ھلاس بہ کنت

دی بلوچستان پوسٹ

نودربرانی ھاترءَ گیشتر جاہ ءُ فیسانی سرجمی ءَ ھلاسی ءِ ھاترءَ بی ایس او ءُ ایندگہ گلانی پجیگ ءَ زرمبش جنزینگ بیت۔ بی ایس او

بہاؤالدین زکریا مزن شھدربرجاہ ملتان ءَ بلوچستان ءُ پیسرگیں فاٹا ءِ نودربرانی ھاترءَ اسکالرشپانی بند کنگ ءِ ھلاپ ءَ نودربرانی نیمگ ءَ چہ شھدربرجاہ ءِ دیما زھر کنگ بیتگ۔

زھرشانی ءِ رھشونی بلوچ اسٹوڈنٹس کونسل ملتان ءِ رھشوناں کُتگ۔

کونسل ءِ نیمگ ءَ چہ شنگ کُتگیں جار تاک ءِ تھءَ جُنزوکیں زھر شانی ءِ برجم دارگ ءُ زھرشانی بنجل ءِ اڈ دیگ ءِ جار جنگ بیتگ۔

یات بہ بیت چہ ایشی ءَ پیسر شال ءَ گوں رسانک ءَ تران کنان ءَ بلوچ اسٹوڈنٹس کونسل ءِ رھشونانی گوشگ اَت کہ بلوچستان ءِ نودربرانی اسکالر شپ ھلاس کنگ بیت اَنت گُڑا الم چہ ایشی ءَ بزگیانی تھءَ گیشی کئیت۔

دومی نیمگ ءَ بلوچ اسٹوڈنٹس آرگنائیزیشن ءِ بنجاھی جارکش ءَ شنگ کُتگیں درشان ءِ تھءَ گوشتگ کہ بہاؤالدین ملتان ءَ بلوچستان ءُ فاٹا ءِ ھاسیں جاھانی سرا اسکالرشپ شھدربرجاہ ءَ ھلاس کُتگ اَنت ءُ چہ نودربران مزنیں کساس ءَ فیس ءِ لوٹ کنگ ءَ اِنت کہ بزگیں راجانی نودربرانی گوما مزنیں گیشی اِنت ءُ بے انساپی اِنت۔

بی ایس او ءِ بنجاھی جارکش ءَ گوشت کہ بلوچستان ءُ فاٹا ھما دمگ اَنت کہ آودہ سالاں چہ جنزوکیں جنگ و بے ایمنی ءِ سوب ءَ وانگ ءِ تک ءَ ھوار ایندگہ درستیں تک سک باز سانمند بیتگ اَنت کہ چریشی سوب ءَ نودربراں مجبوریں جاورانی تھءَ پاکستانءِ دگہ پرگینگانی تھءَ روگ کپتگ۔ پاکستان ءِ جتاھیں شھدربرجاھانی تھءَ کہ ھما یک ءُ دو جاہ ھمک ڈیپارٹمنٹ ءِ تھءَ نامینگ بیتگ اَنت آ ھچ وڑءَ لوٹءَ سرجم نہ کن اَنت بلے پہ لھتیں نودربراں جوانیں ءُ وشیں موہ ءَ چہ کم ھم نہ اَنت۔ بلے ھمک سال اے ھاسیں جاہ ءُ سکالرشپانی تھءَ کمی گیش ءَ چہ گیش آران ءَ داں ھلاس کنگ بئیگ ءَ اَنت کہ بلوچستان ءُ فاٹا ءِ نودربرانی وانگ ءُ زانگ ءِ درستیں درانی بند کنگ ءِ ھساب ءَ اِنت۔

درشان ءِ تھءَ گیشتر گوشگ بیتگ کہ سکالرشپانی پدا پچ کنائینگ ءُ گیشی ءَ ھوار فیسانی سرجمی ءَ ھلاسی ءِ ھاترءَ بی ایس او ءُ ایدگہ ھم ھیال ءِ وانندہ گلانی پجیگءَ زرمبش ءِ جنزین ایں۔