TBP Balochi

بلوچستان ءِ بنجاھی شھر شال ءَ بلوچ وؤمن فارم ءِ نیمگ نمیرانیں لمہ ءِ وتن بانک کریمہ ءِ پنچمی نمیرانی ءِ سالروچ ءِ درگت ءَ مراگش ءِ برجم دارگ بوتگ ۔ مراگش ءَ مزنیں کچے ءَ زالبولاں ھوار ھر تک ءُ پھناتاں سیادی داروکیں مردماں بھر زرتگءُ اے مراگش سوبمندی ءَ گوں آسر بوتگ ۔

لمہ ءِ وتن ءِ پنچمی سالروچ ءِ درگت ءَ برجم داشتگیں مراگش دو بھرانی تہ ءَ بوتگ کہ اولی بھر ءَ راجی سوت ، ڈاکیومنٹری ، تران ءُ بلوچ وومن فورم ءِ اولی تاک “برمش” ءِ دیمدرائی بوتگ ءُ دومی بھر ءَ آرٹس ایگزیبیشن ءُ بُک سٹال جنگ بوتگ۔

مراگش ءِ بندات چہ ماما قدیر ءُ آ دگہ نمیران بوتگیں بلوچ پُسگانی یات ءَ دو ساھت ءِ بے تواری ءَ پد بوتگ۔

مراگش ءَ کریمہ: “بلوچستان ءِ شیرزال “ ٹائیٹل ءِ سر ءَ بلوچ وومن فورم ءِ نیمگ ءَ یک ڈاکومنٹری تامرے کریمہ ءِ سیاسی ءُ گھگیری ءِ کارانی سر ءَ جوڑ کنگ بوتگ ءُ مراگش ءَ پیش دارگ بوتگ۔

مراگش ءَ بی ڈبلیو ایف ءِ بنجاھی سروک ڈاکٹر شلی بلوچ ءَ تران کنان ءَ گُوشتگ کہ مروچی اے نگیگیں جاورانی تہ ءَ ادا نندوکیں مردمانی آیگ ءُ بانک ءِ یات ءَ برجم داشتگیں مراگش ءَ بھر زورگ پہ ما یک شرپے، اے جاورانی تہ ءَ استان ءِ نیمگ ءَ پنچ یا شش مردمے یکجاہ بوگ ءِ سر ءَ بندش اِنت بلے اے جاوراں مئے ءُ شمے اد ءَ آیگ ءُ مچ بوگ ءُ سیاسی مراگشے ءِ برجم دارگ تھنا بی ڈبلیو ایف ءِ نا بلکیں بلوچ ءِ سوبمندی اِنت۔

آئی ءَ دیمترا تران کنان ءَ گوشتگ کہ جھان ءِ تہ ءَ انسان ءِ آبادی بے کساس باز اِنت بلے ما تھنا چہ ھسابی مردماں آشنا ایں، اے ھما مردماں یک سرکلے ءَ چہ در اتکگ اَنت ءُ پہ یک منگھیں مولے ءِ ھاتر ءَ زندگی کتگ، مرچی ما اد ءَ مچ ایں ھما کردار ءُ ھما بلوچ کارست ءَ (کریمہ) ءَ یات کنگ ءَ ایں کہ آ چہ وتی زاتی سرکل ءَ در کپتگ ءُ بلوچستان ءِ باؤنڈریز ءُ بلوچ راج وتی مکسد ءِ جوڑ کتگ ءُ پہ ھما منگھیں مکسد ءَ داں گُڈی ساہ ءَ آئی کمنٹمنٹ گوں بلوچ جھد ءَ مھکم اَت۔ ھمے مھکمیں کمنٹمنٹ ءِ برورد ءَ کریمہ چہ یک لس مردمے ءَ در کپتگ ءُ پرمنگھیں کردارے ءِ واھند بوتگ۔

مراگش ءِ گڈی بھر آرٹس ایگزیبیشن ءُ بُک سٹال ءِ بوتگ اَنت، کہ آرٹس ایگزیبشن ءِ تہ ءَ بلوچ آرٹسٹاں کریمہ ءَ ھوار ءُ بلوچستان ءِ جاور وتی کنوس ءِ تہ ءَ جاہ داتگ انت ءُ پیش داشتگ انت ۔

بلوچستان ءِ جتاجتائیں دمگ کولواہ، نصیر آباد ءَ ریل، ڈیتھ اسکواڈ کارندہ ءِ کوش ءُ پاکستانی پوج ءِ سر ءَ بیتگیں اُرشانی زمہ واری بی ایل ایف ءُ بی آر جی ءَ منّ اِتگ اَنت-

بلوچستان لبریشن فرنٹ ءَ شنگ کتگیں درشان ءِ تہ ءَ گوشتگ کہ بیست سے دسمبر ءِ بیگاہ ءِ پنچ نیم ءَ مئے سرمچاراں کولواہ ءِ دمگ کنیچی ءَ پاکستانی پوج ھما وھد ءَ نشانگ کتگ وھدے آ نزیکیں دمگاں لشکر کشی ءَ پد وتی بُنجاھی بُنجل نیمگ ءَ واتر سر بیتگ اَنت- سرمچاراں دُژمن ءِ سر ءَ مزنیں سلاھانی گوم ءَ اُرش کتگ چریشی ءِ آسر ءَ پوج ءُ آئی ءِ گاڑیاں سک تاوان رس اِتگ- سرمچارانی اُرش کساس نیم کلاک ءَ تاں برجاہ بیتگ-

جارکش ءَ گوشتگ کہ دوازدہ نومبر 2025 ءَ بلوچستان لبریشن فرنٹ ءِ سرمچاراں گل ءِ چیریں بھرگ ءِ ھالانی سر ءَ کاروائی کنان ءَ زاھد ء نودی، جھمنند سنڈم، گیشکور ھور ھند ءَ چہ دزگیر کتگ، پد ءَ گل ءِ جُست پُرس کنوکیں ٹولی آئی ءَ چہ جُست پُرس کتگ-

جارکش ءَ گوشتگ جُست ءُ پُرس ءِ میان ءَ زاھد نودی ءَ منّ اِتگ کہ آ اگست 2024 ءَ چہ تچکی پوج ءِ واستا چاریگی کنگ ءَ بیتگ- آئی ءَ اے ھم گوشتگ کہ آ پنچ رند ءَ سرمچارانی ھلاپ ءَ جتاجتائیں ھندانی سر ءَ ناکہ بندیاں ھوار بیتگ-

جارکش ءَ گوشتگ ک زاھد نودی ءِ ھلاپ بھتام پدر بیگ ءَ گل ءِ ادارہ ءَ انساپ ءَ آ سزا مرگ ءِ پرمان داتگ، چریشی ءِ کارکنان ءَ 22 دسمبر ءِ بیگاہ ءَ کساس شش نیم ءَ گیشکور ءِ دمگ گراڈی ءَ زاھد نودی کُشتگ-

جارکش ءَ گوشتگ بلوچستان لبریشن فرنٹ زاھد نودی ءَ چہ دزکپتگیں سرپدیانی بُنیاد سر ءَ دگہ راجی دُژمنیں مردمانی ھلاپ ءَ گیش کاروائی کنگ بیت-

جارکش ءَ گوشتگ اے دمگ ءَ بلوچ آجوئی بگیریں پُرکاریاں مردماں چاریگ ءُ ڈیتھ اسکواڈ ءَ دار اَنت، آیاں مھکم کنگ ءُ تچکی زمہ داری دیگ جیئند ساجدی ءِ چیردستی ءَ چہ برجاہ ءَ اِنت-

ھمے وڑ بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گوشتگ کہ گوستگیں شپ ءَ مئے سرمچاراں بلوچستان ءِ دمگ نصیر آباد ءِ ھند نوتال ءَ ریل ٹریک شورو پٹ کتگ ءُ تراکینتگ-

درشانانی گُڈی دوئیں اُرشانی زمہ واری منّ اِتگ اَنت گوشتگ کہ مئے اُرش بلوچستان ءِ وتواجھی ءَ تاں برجاہ بنت-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ زندان ءَ وتی شنگ کتگیں کلوہ ءِ توک ءَ ماما قدیر بلوچ ءَ را ستاشانی ندر کنان ءَ گوشتگ منی پت کہ زورانسری آوار جنگ ءُ بیگواہ کنگ بوتگ گڑا نواب اکبر خان بگٹی ءِ نمیرانی ھال ھالتاک ءِ تلا داتگیں ھشکیں نگنگ ءِ سر ءَ دیگ بوتگ ۔آئی ءَ مدام گوشتگ کہ اے ھال ءَ من ءَ سک باز دلپدرد کتگ ۔ ھمے وڑ ےَ گوستگیں نھ ماھانی میان ءَ مارا ھم ھمے وڑ ءَ بلوچستان ءِ یکشلیں زورانسری آوار جنی ءُ درکانودی کشت ءُ کوشانی ھال رس ایت ۔ گند ءُ نند ءَ اتکگیں مردمانی گون ءَ منی اولی جست ھمیش انت کہ مرچی ھم دگہ بیگناھے کشگ بوتگ ؟ ءُ منی وڑیں دگہ چینکس ورنا، زھگ ءُ زالبول اے بے رھمیں ریاست ءِ دست ءَ بیگواہ کنگ بوتگ انت ؟

آئی ءَ گوشتگ 20 دسمبر ءَ اتکگیں ھالتاک ءَ پہ منی ھاتر ءَ یک دگہ پدردی داستانے گون ات ۔ اے روچ ءَ بلوچ سیاسی باسک بانک کریمہ ءِ پنچمی نمیرانی سالروچ ات ، من گوں گلزادی ءُ بیبو ءَ کراچی ءُ داں تمپ ءَ آئی ءِ جون ءِ برگ ءِ سپر ءِ جاوراں درشان کنگ ءَ ات آں کہ ھمے میان ءَ ماما قدیر ءِ بیرانی ءِ ھال اتک ۔

آئی ءَ گوشتگ ماما قدیر بلوچ راجی زرمبش ءِ مھکم ءُ دورچاریں سیاسی باسکے بوتگ ۔ آئی ءَ شانزدہ سالاں بیگواھیں مردمانی یل کنگ ءِ ھاتر ءَ یکشل ءَ جھد کتگ ۔ ماما قدیر ءِ جوڑ کتگیں گدان ءَ من ءَ ھوار بلوچستان ءِ ھر یک سیاسی باسکے ءَ بنکی سیاسی ھیلکاری ءَ جوانیں کرد پیلو کتگ ۔ اے گدان ءِ اکساں دو دھکاں بلوچ چکچینی بیمناکیں اکس جھان ءِ دیم ءَ ایر کتگ کہ یک ھنچیں وھدے ءَ وھدیکہ پاکستانی رسانکدر بلوچستان ءَ انسانی ھکانی لگتمالی ءَ ھچ گوشگ ءَ نہ بوتگ انت ءُ بے زمیریں سیاست دان وتگڑیں دیمروئی ءِ دروگیں درشان دابی کنگ ءَ انت اے گدان ءَ بلوچستان ءَ برجاھیں ریاستی ھونریچی پدر کتگ ۔

آئی ءَ گوشتگ وھدیکہ بلوچ سرڈگار جون شانگ ءَ بوتگ ءُ بلوچ ھکانی ھاتر ءَ جھد کنوکیں درسیں سیاسی گلانی رھشون اگاں زورانسری آوار جنگ بوتگ انت یا نمیران کنگ بوتگ انت ۔ اے نمیرانیں سرانی تہ ءَ ماما قدیر ءِ زھگ جلیل ریکی ھم ھوار ات ۔ بلے ماما وتی زھگ ءِ نمیرانی ءِ درد وتی سینگ ءِ تہ ءَ نہ داشتگ بلکیں آئی ءِ سنگتانی یل کنگ ءِ زمہ داری وتی کوپگاں لڈ اتگ ۔ آ ھر ھما کھول ءِ ھاتر ءَ ھمتے ءِ چیدگ جوڑ بوتگ کہ آیاں ریاستی زوراکیانی سوب ءَ وتی دوستیگیں مردم گار کتگ انت ۔

آئی ءَ گوشتگ منی پت ءَ مدام گوشتگ کہ ھر ھما وھد ءَ کہ منی بندیگی ءَ گمزدگ بہ ئے گڑا ماما قدیر ءِ گدان ءَ جتگیں ھما اکساں بہ چار ۔ اے اکس گواھی دے انت کہ مردماں بازیں وھدے بیت کہ گار انت ۔ منی پت ءِ نمیرانی ءَ پد ھمے گدان ءِ جتگیں اکساں من ءَ مولے بکشات ، یک ھنچیں نیمگے کہ آئی ءَ منی زند ءِ راہ مٹ کت ۔

ڈاکٹر ماہ رنگ ءَ گوشتگ ماما قدیر ءِ بے مٹیں جپاکشی نزیک ءَ دیستگ ۔ من آ بابا خیر بخش مری ءِ بیرانی ءَ پد آئی ءِ زھگ ءں ھمراھی ءَ پت ءِ جون ءِ پچ گرگ ءِ گھگیری ءَ دیستگ ۔ بلوچستان ءَ ھنچیں وھدے ھم اتکگ ات کہ بازیں کھولے ترس ءِ سوب ءَ ھچ گوشگ ءَ نہ ات ، ماما قدیر پہ بیگواھیں زھگاں شمشکار نہ بوتگ ، آئی ءَ آھانی سرجمیں ڈٹیل یکجاہ کت انت آیانی نام ءُ اکس تالان کت انت وھدیکہ ریاست زورانسری آوار جنی ءَ انکار کنگ ءَ ات ماما ءِ گدان ءَ آ درسیں دروگیں پروپیگنڈیانی دیمپانی کت ۔

آئی ءَ گوشتگ وھدیکہ زورانسری آوار جنیانی تہ ءَ گیشی اتکگ گڑا گدان ءَ ھر ماہ پوسٹر گیش بوان بوتگ انت ۔ اے ھما گدان ات کہ بندات ءَ زاکر مجید بلوچ ، جلیل ریکی ءُ علی اضغر بنگلزئی ءِ وڑیں لھتے سیاسی باسکانی یل کنگ ءِ ھاتر ءَ برجم کنگ بوتگ ات ءُ پد ءَ رند ءَ اے بلوچستان ءِ سرجمیں بیگواھیں مردمانی یل کنگ ءِ یک مھکمیں زرمبشتےجوڑ بوت ۔ گدان ءِ ھر چاریں نیمگاں ھما دلیریں ورنایانی اکس ات انت کہ آ پاکستانی پوج ءَ بیگواہ کت ات انت ۔

آئی ءَ گوشتگ پد ءَ رند ءَ کہ زورانسری آوار جنگ بوتگیں مردمانی درکانودی کشت ءُ کوش ءِ تہ ءَ گیشی اتک گڑا گدان ءِ یک نیمگے ءَ زورانسری آوار جنگ بوتگیں ورنایانی اکسانی جاہ نمیرانیں ورنایانی اکساں گپت ۔ بلوچ چکچینی ءِ تہ ءَ گیشی آیگ ءَ ماما قدیر ءَ نوکیں اکس جوڑ کنگ کم کت ءُ نوں ھما اکسانی سر ءَ بس یل ، یا نمیران نبشتہ کت ۔

آئی ءَ گوشتگ اے شانزدہ سالانی تہ ءَ ماما قدیر ءَ وت ءَ سرجمی ءَ گوں جھد ءَ ھمگرنچ کت ، بلے پد ءَ ھم ھر ھما وھد ءَ آئی ءَ اگاں گوں اھوالکار یا سیاسی باسکے ءَ گوں بیگواھیں مردمانی ھاتر ءَ باوست کت گڑا وتی نمیرانیں زھگ جلیل ریکی ءِ نام گرگ ءِ وھد ءَ آئی ءِ دیم بدل بوتگ ۔ ھمے وھد ءَ آئی ءِ چمانی تہ ءِ درد ءُ بیم زاھر بوتگ ۔ آئی ءَ گوں من گوشتگ کہ من جلیل ءِ زھگ ءَ زوراں ءُ آئی ءِ مانش ءِ سر ءَ رواں ءُ آئی ءِ ھمے گوشاں کہ تئی پت ریاست ءَ بے رھمی ءَ جتگ ءُ پد ءَ کشتگ ءُ آئی ءِ پت ءِ کشندہ ریاست انت ۔ تانکہ آ من ءَ پد بلوچ راجی زرمبش ءِ بھر جوڑ بہ بیت ۔

آئی ءَ گوشتگ ماماقدیر بلوچ راجی زرمبشت ءِ بے دروریں سیاسی کارستے ءِ دروشم ءَ مدامی یات کنگ بیت ۔ آئی ءِ دیمھونی ، جزبگ ءُ یکشلیں جھد بلوچ راجی زرمبشت ءَ بندوکیں درسیں باسکانی ھاتر ءَ رژناھیں چراگے ءِ دروشم ءَ رژنا بیت انت.

بلوچستان ءِ دمگ کیچ ءِ ھند کرکی تجابان ءَ یکیں کھول ءِ چار مردمانی دزگیر کنگ ءِ ھلاپ ءَ زھرشانی نندانک، سی پیک دگ بند-

کھول ءِ رد ءَ بیگواھیں مردمانی تہ ءَ فرید اعجاز، ثناء اللہ دلوش، ھانی دلوش ءُ گل نساء واحد ھوار اَنت۔

ایشانی تہ ءَ ھانی ءُ ھیر نیسا چہ واپاری شھر حب چوکی ءَ پاکستانی لشکر ءَ دزگیر کتگ اَنت ءُ دگہ چہ کیچ ءَ دزگیر کنگ بیتگ اَنت۔

ھاندان ءِ گشگ ءِ رد ءَ ھیر نسا17 سالی ئیں نودربرے وتی گرماگی چھٹیانی وھد ءَ حب چوکی ءَ شتگ ۔ وھدے کہ ھانی ھشت ماہ ءِ لاپریں زالبولے-

پاکستانی پوج ءِ دست ءَ بلوچ زالبولانی زورانسری آوار جنی ءِ ھلاپ ءَ بلوچ یکجھتی کمیٹی ءِ رھشون ڈاکٹر صبیحہ بلوچ ءَ وتی یک تامُر بندیں کلوھے ءَ بلوچ راج ءَ چہ دزبندی کتگ کہ آ زورانسری آوار جنینانی ھلاپ ءَ لوگاں چہ در بیا اَنت ءُ وتی توار ءَ چست بکن اَنت-

انّگیں روچاں بلوچستان ءَ بازیں بلوچ زالبول پاکستانی پوج، سی ٹی ڈی ءُ چیریں ادارھانی دست ءَ زورانسری آوار جنی ءِ نشانگ کنگ بیتگ اَنت، آیانی تہ ءَ یک لاپ پُریں زالبولے ءَ ھوار دو نادُراھیں ورنا مات چُک ھوار اَنت-

وتی شنگ کتگیں تامُر بندیں کلوہ ءَ بی وائی سی ءِ زالبولیں رھشون ڈاکٹر صبیحہ بلوچ ءَ گوشتگ کہ بلوچستان ءَ زورانسری آوار جنی نو ورنا ءُ مردیناں ءَ چہ دیم ءَ گوستگیں بلوچ زالبولاں تاں تالان بیتگ-

آئی ءَ گوشتگ کہ سانمندیں زالبولانی تہ ءَ یک ھشت ماھے لاپ پُریں زالبولے ھم ھوار اِنت، ناں تھنا سنگین ءِ نا انساپی اِنت بلکیں انسانیت ءِ ھلاپ ءَ تچکی ءَ جرم اِنت-

آئی ءَ جار جتگ کہ اے زورانسری آوار جنینانی ھلاپ ءَ بی وائی سی ءِ نیمگ ءَ چہ پہ پنچ روچی مھمے بندات کنگ بیگ ءَ اِنت-

آئی ءَ گوشتگ کہ پنچ روچی مھم ءَ سرپدی دیان ءَ ڈاکٹر صبیحہ بلوچ ءَ گوشتگ کہ انساپ ءُ بلوچ زالبول ءِ زورانسری آوار جنی ءِ ھلاس کنگ لوٹ سر ءَ ھمگرنچیں یک آن لائن پٹیشن بندات کنگ بیتگ، چریشی ءَ سانمند، کارکنان، نودربر، نبشتہ کار بیگواھیں مردمانی کھول وتی کسّھاں، شھیدی ءُ مھم ءَ ھمگرنچیں مواد شنگ بہ کن اِت کہ رسانکدر ءَ چہ جھان ءِ دیم ءَ آرگ بیت-

آئی ءَ گوشتگ کہ زورانسری آوار جنی ءِ دروشم ءَ پاکستانی پوج ءِ زوراکی ءُ ریاستی زوراکی ءِ آرٹ، شائری، نبشتانک، ساز ءُ زیملی ءُ دگہ ازمانی سر ءَ دیم ءَ آرگ ءُ میان اُستمانی ھساب ءَ تالان کنگ بیت-

ڈاکٹر صبیحہ بلوچ ءِ رِد ءَ بلوچ زالبولانی دلسیاھیاں دیم ءَ آرگ ءُ ھساب ءِ لوٹ کنگ ءِ الکاپیں گامگیج ءُ پُرایمنیں زھرشانی برجم دارگ بیت ، وھدے کہ مھم ءِ گُڈی سر ءَ یک آسری ویبنارے ءِ برجم دارگ بیت، چریشی ءَ کارکنان، بیگواھیں مردمانی کھول ءُ سرجمیں بلوچستان ءَ چہ جتاجتائیں توار ھوار بہ بنت-

گُڈی ءَ بلوچ آئی ءَ گوشتگ کہ ھرچ توار ءَ بستار ھست بے تواری زُلم ءَ ردوم دنت-

آئی ءَ گوشتگ کہ بلوچ راج ءُ چہ دزبندی کتگ کہ آ بہ اوشت اَنت ءُ اے زُلم ءِ ھلاپ ءَ یکجاہ بہ بنت ءُ وتی توار ءَ چست بہ کن اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل ایف ءِ سرمچاراں بیست سے اکتوبر 2025 ءَ نال ءِ دمگ کلیڑی ءَ یک پُلپنانچیں منسوبہ ءِ سر ءَ کارکنوکیں بند ساچی شرکت ءِ بُنجل سر ءَ اُرش کتگ اود ءَ ساڑی مزنیں مشینری تاوان داتگ اَنت ءُ کنسٹرکشن شرکت ءِ 19 کارندہ دزگیر کتگ اَنت-

جارکش ءَ گوشتگ اے میان ءَ زورگریں پاکستانی پوج ءَ جتاجتائیں وھداں اے دمگ ءَ تُرندیں بُرزی ءُ جھلی لشکر کشی کتگ، آئی ءِ مول ءُ مراد گل ءِ دزگیریں مردماں تاوان بدیاں، بلے سرمچاراں دُژمن ءِ سرجمیں زوراکی ءِ جُھد بے سوب کنان ءَ ناگیگیں جاوراں اَبید سرجمیں دزگیریں مردم گوں شریں وڑے ءَ پھاز اِتگ اَنت-

جارکش ءَ گوشتگ کہ دزگیریں کارندھانی گیشتریں سیادی ھمساھگ ءُ براتیں سندھی راج ءَ چہ بیتگ اَنت- ھمے ھاتر ءَ سندھی آجوئی لوٹوکیں گل ایس آر اے ءَ ھوار جتاجتائیں راجدوست ءُ انسان دوستیں پارٹی ءُ مردمانی نیمگ ءَ آیانی یل کنگ ءِ لوٹ کتگ-

جارکش ءِ رِد ءَ راجدوستیں گل، ھاسکار براس ءَ ھوار ایس آر اے ءِ سروک ءِ دزبندی ءُ سندھی راجدپتری ءِ شرپ ءِ ھیال داشتگ ءُ گل ءَ دزگیریں سندھی کارندہ پہ شرپ ءُ سلامتی یل داتگ اَنت کہ آ وتی کھول ءِ گور ءَ سر بیتگ اَنت-

جارکش ءَ دیمتر ءَ گوشتگ کہ ھمے وڑ دوازدہ دسمبر ءَ بیسمہ ءِ دمگ ءَ ناکہ بندی ءِ میان ءَ بی ایل ایف ءِ سرمچاراں پاکستانی تک کسٹمز ءَ چہ ھمگرنچیں دو کارندہ دزگیر کتگ اَنت، سیاسی مردمانی دزبندی ءُ انسانی ہمدردی ءِ بُنیاد ءَ دزگیریں مردم ھیال داشتگ ءُ پٹ ءُ پول ءِ سرجم کنگ ءَ پد دوئیں پہ سلامتی یل داتگ اَنت-

جارکش ءَ گوشتگ کہ بلوچستان لبریشن فرنٹ وتی دزگیریں سرجمیں مردم پہ سلامتی یل داتگ اَنت، یک زمہ واریں گل ءِ بستارے ءَ چہ ھچ پرد تاوان نداتگ کہ بلوچ راج دُژمنی ءَ ھمگرنچ مہ بیت-

جارکش ءَ گوشتگ کہ ما ھمساھگیں راج، ھاسکار سندھی، پشتون راج ءَ چہ دزبندی کن ایں کہ آ سرجمیں بلوچستان ءَ زورگریں پاکستانی ءِ پُلپنانچیں منسوبھاں کار کنگ ءُ پاکستانی پوج ءِ کاردارے ءَ چہ پھریز بہ کن اَنت-

جارکش دگہ یک درشانے ءِ تہ ءَ گوشتگ کپ مئے سرمچاراں بیست یک دسمبر بیگاہ ءِ وھد ءَ بولان ءِ دمگ سراج آباد ءَ شال سبی بُنجاھی شھدگ سر ءَ ناکہ بندی کتگ گاڑی پٹ ءُ پول کتگ اَنت یک کلاکے ءَ گیش برجاہ بیتگ- اے میان ءَ نزیکیں پوجی بُنجل ءِ نیمگ ءَ چہ سرمچارانی سُر ءُ پُرانی سر ءَ نگاہ داشتگ ءُ آیاں نشانگ ءِ کنگ ھاتر ءَ کواڈ کاپٹر کارمرز کتگ، کہ آ کوھاں سنگر گپتگیں سرمچاراں نشانگ کتگ، نزیکیں دُژمن ءِ جھلی پوج ءَ ھم سرمچارانی ناکہ بندی نیمگ ءَ پیشگانی کنگ ءِ جُھد کتگ کہ آیانی سر ءَ پیسر ءَ چہ سنگر گپتگیں سرمچارانی ٹولیاں اُرش کتگ چریشی ءِ سوب ءَ دُژمن پُشتکنز بیتگ-

جارکش ءَ گوشتگ ناکہ بندی ءِ میان ھچ وڑیں ریاستی ادارہ ءَ چہ ھمگرنچیں کارندہ یا چاریگ ءِ پجّار نہ بیتگ، وھدے سرمچاراں لس بلوچ ءِ گوم ءَ شرپ ءُ شریں رویشگ ءَ گوں پیش اَتکگ اَنت-

جارکش ءَ گوشتگ کہ ھمے روچ بیست یک دسمبر ءَ مند ءِ دمگ آزیان ءُ دوکوپ ءِ میان ءُ برت ءِ ھند سر ءَ برجاہ زورگریں پاکستانی پوج ءِ چوکی ءِ سر ءَ بی ایل ایف ءِ سرمچاراں نیمروچ ءِ دو نیم ءِ وھد ءَ اُرش کتگ جتاجتائیں دروشمیں مزنیں سلاھاں چہ چوکی نشانگ کتگ، اُرش کساس نیم کلاک ءَ تاں برجاہ بیتگ-

جارکش ءَ گوشتگ اے اُرش ءِ میان ءَ زورگریں پوج ءِ نیمگ ءَ چہ سرمچارانی سنگرانی چارگ ءُ آیاں تاوان دیگ ءِ نیئت ءَ چہ دو کواڈ کاپٹر بال داتگ اَنت، وھدے کہ دومی واتری ءَ رؤگ ءَ لاچار بیتگ-اے کاروائی ءِ آسر ءَ چوکی ءِ سر ءَ پٹّیں چاریگی ءُ سسٹم ھم تاوان داتگ-

جارکش ءَ گوشتگ اے کاروائیانی میان ءَ پوج ءَ جانی تاوان چست کنگ کپتگ-

گُڈی ءَ بلوچستان ءَ لبریشن فرنٹ ءَ بیتگیں سرجمیں اُرشانی زمہ واری منّ اِتگ اَنت-

نوشکی ءَ دو ٹک ءِ میان ءَ تیرگواری ءَ سئے برات بابو عالم خان، بیبرگ خان ذوالقرنین ء دینار خان بادینی ءُ دومی ٹک سھیل احمد ء محمد ایوب بادینی ءِ بیران بوتگ اَنت۔

بنشون ءِ رد ءَ ٹکانی نیام ءَ جنگ ءِ سبب ھالیگیں دکان ءِ کرائے ءَ دیگ بوتگ۔

ایشی ءَ ھوار کھول ءَ سئے براتانی کوش ءِ ھلاپ ءَ زھرشانی کتگ، نوشکی، تپان ءِ شھدگ ءَ دگ بند گاڑیانی دراجیں لین لگ اتگ انت ءُ نوشکی ءَ کھولاں کوشکارانی دزگیری ءِ لوٹ کتگ-

یک اَھدے ءِ سپر آسر

ٹی بی پی شونگال

وائس فار بلوچ مسنگ پرسن ءِ وائس چیئرمین ماما قدیر بلوچ ءِ بیرانی ءَ یک اَھدے ءِ آسر بیتگ- ماما قدیر ءُ آئی ءِ ھمراھاں پانزدہ سال پیش بلوچستان ءِ سیاسی باسکانی زورانسری بیگواھی ءُ درکانودی کوشانی ریاستی پالیسیانی ھلاپ ءَ پُر ایمنیں جد ءُ جھد ءِ بنھشت ءِ سرجم کنگ ءُ انسانی ھکانی پادمالی ءِ ھلاپ ءَ یک دراج ءُ راجدپتری جد ءُ جھدئے ءِ بندات کتگ – ماما قدیر ءِ اوپاری جد ءُ جھد ءَ ترند ءُ نا دیدیں جاوراں ھم زورانسری بیگواھیں مردمانی یل کنائینگ ءِ ھاتر ءَ اُمیت زندگ داشتگ ءُ تچکیں گھگیری دومی نسل ءَ داں سر کتگ، چوشکہ مروچی یک مھکمیں زرمبشتے ءِ دروشم ءَ برجاہ انت-

ماما قدیر، فرزانہ مجید، نصر اللہ بلوچ ءُ آئی ءِ ھمراھاں وھدیکہ دوھزار ءُ نُھ ءَ وائس فار بلوچ مسنگ پرسن ءِ بنھشت ایر کتگ گڑا آ وھد ءَ بلوچستان ءَ ریاستی زوراکی سربرز بیتگ انت – سیاسی باسکانی زورانسری بیگواہ کنگ ءِ یک نہ اوشتوکیں درچے بندات بیتگ ءُ ماما قدیر ءِ زھگ جلیل ریکی ھم ھمے سانمندیں مردماں ھوار بیتگ- زورانسری آوار جنی ءَ پد درکانودی کشگ ءُ ژانگولیں لاشاں ما سڑکانی کش، ویرانگ ءُ جنگلاں دزکپگ بندات بیتگ کہ چوشکہ مروچی دروگیں میڑ ءِ نام ءَ برجاہ انت- 24 نومبر 2011 ءَ ماما قدیر ءِ زھگ جلیل ریکی ءِ تیر سپتگیں لاش کیچ ءِ دمگ مند ءَ دزکپتگ ات- زھگ ءِ شھیدی ءَ پد ھم ماما قدیر ءَ جد ءُ جھد ءَ دزکش بوگ ءَ امید دومی مردمانی کوپگ جوڑ بوگ ءِ پیسلہ کتگ ءُ زورانسری بیگواھیں مردمانی یل کنگ ءِ واستا زرمبشت ءِ مھکم کنگ ءَ جوانیں کرد پیلو کتگ انت-

بلوچستان ءِ ناگیگیں جاورھاں ماما قدیر ءُ زورانسری بیگواھیں مردمانی کھولاں ریاستی بیھار، زوراکی ءُ اڑانکاں ابید دوھزار ءُ سیزدہ ءَ چہ شال ءَ داں کراچی ءُ پد ءَ اسلام آباد ءَ داں دوھزار کلو میٹر ءَ ھواریں یک راجدپتری پندی روانکے بُر اتگ – اے پُر ایمنی گھگیری ءِ درچ ءَ دنیا ءَ بلوچستان ءِ ناگیگیں جاورھال پاشک کتگ انت- انساپ ءِ واستا لانگ مارچ، زھرشانی ءُ نندانکانی درچ ءَ بازیں سالاں برجاہ بیتگ- شال پریس کلب ءِ دیم ءَ ھستیں زورانسری بیگواھیں مردمانی زھرشانی بنجل ھمک وھد ءَ سوچگ بیتگ، ماما قدیر ءَ کوش ءِ بیھار دیگ بیتگ – آئی ءِ لوگ ءِ سر ءَ اُرش کنگ بیتگ ءُ نزیکیں مردم زورانسری بیگواھی ءِ آماچ کنگ بیتگ انت – ایشی ءَ ابید ھم ماما قدیر ءُ ھچبر ھمت ھلاس نہ کتگ ءُ پیرسالی ءُ نادراھی ءُ ابید پانزدہ سالاں داں زورانسری بیگواھیں مردمانی یل کنائینگ ءِ ھاتر ءَ اُمیت ءِ چیراگ بالینتگ –

ماما قدیر ءِ پُرایمنیں گھگیری، دراج کشیں لانگ مارچ ءُ یکشل ءَ اوشتانکی بلوچ راجدپتر ءَ ھروھد ءَ زنگ بیت انت – آ انساپ ءُ انسانی ھکانی رھبندانی درچ ءُ جد ءُ جھد ءُ گڈی ساہ ءَ داں اوشتاتگ، آئی ءِ دیمونی، ھوسلہ ءُ اوپار ءِ جد ءُ جھد ستاہ شانی انت – یک سرجمیں نسلے ماما قدیر ءِ ساھگ ءَ رُستگ ءُ مروچی ھما گھگیری ءِ راہ ءَ جنزگ ءَ انت – ماما قدیر ءِ سپر کنگ ءَ بلوچستان ءِ سیاسی گھگیری رزمبشت ءِ یک کنڈے ھالیگ بیت انت بلے جد ءُ جھد ءِ زمہ واریں مردم آئی ءِ مشن ءَ نوکیں رنگے ءَ الم جنزین انت-

کریمہ ھمت، جزبگ، سیاسی جرت دلیری ءُ ترندیں جاوراں مایوس نہ بوگ ءِ نام اِنت

بنجاھی کماش بی ایس او آزاد: زرّین بلوچ

دی بلوچستان پوسٹ

بلوچ راج بزاراں سال کوھنیں راج دپترے ءِ واھند اِنت۔ اے کرن ءُ وھد ءَ بلوچ ڈیھ ءِ رکینگ ءِ ھاتر ءَ ھزاراں گمنامیں جھدکار یاتانی، لبزانک ءُ مارشتانی تہ ءَ مارگ بنت بلے لمہ کریمہ گوست ءِ کَلیں سرجمیں کارست ءُ انوگیں پدریچ ءِ میان ءَ یک bridge یے کہ گوست ئِے سرجم ءَ وتی اندر ءَ جاہ داتگ ءُ یک ھست ءَ یک منزلے ءَ سر کنگ ءِ جھد ءَ بوتگ دانکہ راجی جنز وتی مکسد ءَ سر بہ بیت۔ گوست ءِ کارست ما وتی سیاسی لٹریچر ءِ تہ ءَ ونتگ اَنت بلے کریمہ مئے اھد ءِ املی کردار اِنت کہ بلوچ ءِ ھزاراں سالی جنگی، گھگیری پڑ ءَ ابدمان اِنت۔ ما کریمہ ءَ وان ایں، گڑا مارا وتی گوست ءِ ھما کارست کہ جھد ءِ مساپر بوتگ اَنت آ زندگ گندگ ءَ کاینت۔ بلوچ راج ءِ مھکمیں گوستانکی یات ءَ جنزان ءَ انچیں جھدے ءَ پہ ساڑی بوت کہ اود ءَ کریمہ ءِ دابیں کردے ءِ لوٹ اَت۔

انسانی گوستانک ءَ کریمہ ھما کرداں چہ یکے کہ آئی ءَ زالبولانی جتائیں پرنٹ، زالبولانی ھکانی ھاتر ءَ جنگ ءِ جاہ ءَ ھالی ئیں اسپیس ءَ ھلاس کنگ ءَ جھد ءِ بھر بوت۔ کریمہ جنس ءِ بنیات ءَ جنگی گھگیری ءِ بھر بوگ ءَ چہ گیش وتی ماتیں وتن ءُ آجوئی ءِ لوٹ ءَ ھوار بوت۔ زالبول بلوچ راج ءِ شرپ، گیرت اَنت بلے وھدے کبزہ گیر راج ءَ سرجم ءَ ولگوج کنگ ءَ بندات کنت گڑا جنس ءِ ارزشت پشت نہ کپ اِیت۔ جنس ءَ چہ دیمتر گلزمین ءِ لٹ ءُ پُل، بزگی ءُ توھین بوگ ءَ اِنت گڑا ھمے گلامی ءِ مارشت گچین داتگ ءُ یک جھدکارے ءِ بستار ءَ جھد ءَ ھوار کپتگ۔
ھمے راستی پدر بیت کہ درست گلام اَنت پمیشکا بلوچ راج ءِ گھگیری پلسپہ ءِ سر ءَ امل گلزمین ءِ پرزندانی پرز بیت۔ کلیں جنس تھنا وتی راجی شرپ ءَ چہ زورگیر ءَ پچ گرگ ءِ واستا کربانی ءِ یک درچے بندات بیت۔ اے درچ ءَ چہ یک گھگیری ربیدگے جوڈ بیت کہ ایشاں ما پگر ء کریمہ گش ایں۔

بلوچ راج ءَ مدامی مردگ پرست ءِ تنز ءُ شگانی کنگ مئے بے المی اِنت بابا ھیر بکش مری، لمہ کریمہ ءِ کرد ءُ کربانیاں مزنیں شرپ رس اِتگ۔ بانک کریمہ ءَ بلوچ راج ءِ نیمگ ءَ چہ وتی زند ءَ ھما شرپ رس اِتگ کہ درستاں لمہ ءِ نام ءَ توار پر جتگ۔کریمہ ءِ زند کربانی ءِ انچیں درورے کہ آ بلوچ راج ءَ مردگ پرستی ءِ لیبل ءَ چہ درکنت۔اے مئے راج ءِ زندگ دلی ءِ درستاں چہ مستریں درور اِنت کہ کریمہ وتی زند ءَ کربانی، جرت ءِ سَوب ءَ زالبول بوگ ءَ پد ھم یک گھگیری راھشونے اَت۔

دگنیا ءِ جُنزاں چہ دربرگ، روایاتاں مٹ کنگ، دومیاں چہ سان زورگ ءِ جاہ ءَ بلوچ راجی جنز ءَ نیشنل نیٹورک ءَ گوں جوڑینوک لمہ ءَ اسل ءَ مئے آشوبی موٹیویشن اِنت۔ چوناھا آشوبی کرد چاگرد ءِ تہ ءَ وت موٹیویشنل کردار بنت پمیشکا کریمہ مئے ھما موٹیویشنل کردار اَنت کہ آئی ءَ چہ مارا ھاٹیگ، سبر، ھوسلہ، مستقل مزاجی، کاروان ءَ گوں جنزگ ءُ ایدگہ آشوبی سپت مارا دربرگ ءَ رس اِتگ اَنت۔کریمہ ھمت، جزبگ، گل ساز، گل ءِ اندری جھد ءِ دیمپانی، ترندیں جاورھال ءَ مایوس نہ بوگ، جیڑھاں تاکت ءِ تہ ءَ مٹ کنگ، دم نہ برگ، جھد ءِ مسلسل، لیکھی پھتگی ءُ آشوبی تب ءَ چہ سرچکاریں کردارے۔

کریمہ بلوچ راج ءُ بلوچ جنز ءِ ھما ایمان اِنت کہ وتی مچانکی پلسپہ ءِ بنیات ءَ دژمن ءِ ناپاکیں گام ءِ ھلاپ ءَ گھگیری تاکتے ءِ دروشم ءَ مرچی گھگیری کنگ ءَ اِنت۔ کریمہ کلچرل روایات ءُ گھگیری امل ءِ وینگارڈ اِنت پرچاکہ لمہ ھمے ھیال ءِ سر ءَ بیسہ دار اِیت کہ پرسودگین ءُ گلامیں زینیت ءِ دارگ یک مزنیں آشوبی بے سوبی یے۔ لمہ ءِ پیسلہ سازی ءِ تہ ءَ جرت، نترسی، مزن پگری، رھشونی، گل ءِ اندری جیڑہ ءَ گوں بودناکی ءَ گیش ءُ گیوار کنگ ءَ ھوار بی ایس او ءَ یک رندے پد ءَ وتی راستیں دروشم ءَ آرگ لمہ ءِ کرتگیں مستریں کاراں چہ یکے۔

بلوچ راجی جھد اِنت تا استاد اسلم ءَ اے شرپ گون اِنت کہ بلوچ راج ءَ ادارہ جاتی ھیال، نوکیت یا آشوبی ٹرانسفارمیشن ءِ نیمگ ءَ بارت البت بی ایس او ھم 2013 ءَ بگرداں 2015 کرائسز ءِ آماچ بیت۔ اے وھد ءَ تحریکی چست ءُ ایری، کانسٹیوٹیشنل بلاک ءِ جوڑ بوگ، لیڈرشپ ءِ بیگواھی ءَ پد ھم بی ایس او ءَ وتی ٹریک ءَ آرگ لمہ کریمہ ءِ کرد ءِ برورد اِنت۔ بلوچ جھد ءِ تہ ءَ ادارہ جاتی بنیات ءَ یک گلے ءَ کرائسز ءَ چہ کشک ءُ پد ءَ ھمے گل ءَ تاکتور کنگ ءِ جھد وانگ ءُ پھمگ کرز اِیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں ھژدہ دسمبر ءَ بیگاہ ءِ کساس ساھت چار ءَ نوشکی ءِ دمگ زرین جنگل ءَ زورگریں پاکستانی پوج ءِ کاروان ءَ ھوار یک گاڑی یے آئی ای ڈی بمب اُرش ءَ نشانگ کتگ چریشی ءَ زورگریں پوھلج ءِ سے کارندہ مرتگ ءُ دو ٹپی بیتگ اَنت، وھدے کہ گاڑی سرجمی ءَ تباہ بیتگ-

جارکش ءَ گوشتگ بلوچستان لبریشن فرنٹ ءِ سرمچاراں 19 دسمبر ءَ تمپ ءِ دمگ ملانٹ ءَ یک گشتے ءَ بیتگ اَنت کہ راہ ءَ زورگریں پاکستانی پوج ءِ یک کواڈ کاپٹرے ءَ آیانی رندگیری کتگ – سرمچاراں پسّھی کاروائی کنان ءَ کواڈ کاپٹر نشانگ کتگ دور داتگ-

جارکش ءَ گوشتگ کہ دگہ یک کاروائی ءَ بیست دسمبر ءَ سرمچاراں ملانٹ ءَ برجاہ زورگریں پاکستانی پوج ءِ بُنجل نشانگ کتگ- سرمچاراں بُنجل سر ءَ گرنیڈ لانچر ءِ بازیں گولھے آس داتگ کہ بُنجل ءِ تہ ءَ کپتگ اَنت چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گوشتگ نوزدہ دسمبر ءَ بلوچستان لبریشن پرنٹ ءِ سرمچاراں دشت ءِ دمگ شئے زنگی ءَ چاریگی ءِ واستا جتگیں یوپون موباھل ٹاور ءِ مشینری مانداشتگ ءُ ناکاراہ کتگ-

جارکش ءَ گوشتگ بی ایل ایف نوشکی، تمپ ءُ دشت ءَ سے جتاجتائیں کاروائیاں سے پوج ءِ کارندہ ءِ کوش ءُ یک کواڈ کاپٹرے ءِ دور دیگ یک یوپون ٹاورے ءِ تباہ کنگ زمہ واری ءَ منّ اِیت-