TBP Balochi

بلوچستان ءِ جتاجتائیں دمگاں پاکستانی لشکر ءُ پولیس سر ءَ بیتگیں اُرشانی زمہ واری بی ایل ایپ بی آر جی ءَ منّ اِتگ ا

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ کہ سرمچاراں بیست پنچ ءَ دسمبر بیگاہ ءِ کساس شش ءَ سوراب بازار ءَ فرنٹیئر کور ءُ پولیس ءِ یکجاھی ناکہ بندی سر ءَ اُرش کتگ- اُرش ءِ آسر ءَ دو ایف سی کارندہ کشتگ وھدے کہ سے ٹپی بیتگ اَنت-

جارکش ءَ گوشتگ دگہ کاروائی یے بیست پنچ دسمبر ءِ بیگاہ کساس پنچ ءَ بلوچستان لبریشن فرنٹ ءِ سرمچاراں اسنائپر ٹولی ءَ بُنجل ءِ پھازوکی سنگر سر ءَ اوشتوکیں کارندہ نشانگ کتگ جاہ پہ جاھی مرتگ- پھازوکی سنگر ءِ سر ءَ اوشتوکیں کارندہ ءِ کوش ءَ چہ بُنجل ءِ تہ ءَ ودی بیتگ تچ ءُ تاگ ءُ پوج ءِ کارندھانی سُر ءُ پُر چارتگ ءُ سرمچارانی دگہ یک ٹولی یے ءَ لھتے ملٹ ءَ پد پوج ءِ بُنجل سر ءَ آر پی جی ءُ دگہ مزنیں سلاھاں چہ اُرش کتگ، چریشی ءِ آسر ءَ دگہ سے کارندہ مرتگ ءُ بازین ئِے ٹپی بیتگ اَنت-

جارکش ءَ گوشتگ کہ پسّھی کاروائی ءَ پد چو مدامی وڑ ءَ جتاجتائیں نیمگاں مشین تُپنگاں چہ تیرگواری کتگ ءُ مارٹر گولہ آس داتگ- بلے کاروائی سرجم کنگ ءَ پد سرمچار پہ سلامتی اود ءَ چہ درتکگ اَنت-

جارکش ءَ گوشتگ کہ بلوچستان لبریشن فرنٹ اورماڑہ ءُ سوراب اُرشاں یکجاھی ھساب ءَ شش کارندہ ءِ کوش زمہ واری ءَ منّ اِیت-

بلوچ ریپبلکن گارڈز ءِ جارکش دوستیںن بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں کچھی ءِ دمگ ڈھاڈر شھر ءَ پولیس کارمند دستی بمب اُرش ءَ نشانگ کتگ- اے تراک ءِ آسر ءَ زورگریں پولیس ءَ جانی ءُ مالی تاوان چست کنگ کپتگ-

جارکش ءَ گوشتگ بی آر جی اے اُرش ءِ زمہ واری ءَ منّ اِیت ءُ اے وڑیں اُرش بلوچستان ءِ وتواجھی ءَ تاں برجاہ بنت-

بلوچ اسٹوڈنٹس ایکشن کمیٹی ءَ وتی شنگ کتگیں درشان ءَ گوشتگ نوکیں سال ءِ بندات ءَ بلوچستان ءِ جتاجتائیں ھند ءُ دمگاں “بلوچستان کتاب کاروان” ءِ نام ءَ کتاب میڑہ برجم دارگ بیت۔“گوں کتاباں نزینکی ءُ ھمگرنچی راجانی دیمروئی ءِ مستریں چیدگ انت”-

آئی ءَ گوشتگ میان اُستمانی دیمروئی ءُ استانانی تاکت ءِ مستریں وسیلگ زانت ءُ زانشت اِنت۔ زانت ءُ زانشت ءِ آیگ ءِ تیوکیں وسیلگ کتاب اَنت۔ ھمے راستی دگنیا ءَ مارِ اتگ ءُ ھمے ترز ءَ گام جنان ءَ مرچی دنیا دیمروئی ءِ راہ ءَ سپر کنان اِنت۔ دنیا ءِ کُلیں دیمروئی کتگیں ءُ وانندگیں راج ءُ استانانی روتگ گوں تاکتوریں علم ءُ زانت ءَ بندوک اَنت۔ اگاں مرچیگیں اھد ءِ توک ءَ راجے گوں دگنیا ءِ ھواری ءَ جُنزگ لوٹ ایت گڑا آ راج ءَ کُلاں گیش دلگوشی زانت ءُ زانشت ءُ وانگ ءَ دیگی اِنت۔ بلوچ ھمے دگنیا ءِ توک ءَ یک زندگیں راجے کہ ھزاراں سالی رسم ءُ دودانی واھند اِنت۔ بلے بلوچ ءِ بدبھتی ھمیش اِنت کہ بلوچ راج ھمک پڑ ءَ ایر دست ءُ پد منتگ کنگ بوتگ۔ آئی ءِ مستریں وسیلہ ایش انت کہ بلوچ راج چہ کتاباں دور دارگ بوتگ۔

ھمے درگت ءَ بلوچ اسٹوڈنٹس ایکشن کمیٹی یک نودربر گلے ءِ بستار ءَ ھمے سرپد بیت کہ راجانی دیمروئی ءِ مستریں وسیلگ زانت ءُ زانشت اِنت ءُ زانت ءُ زانشت ءِ تیوگیں وسیلگ کتاب اَنت۔ گل ھمک سال ءِ پیم ءَ اے سال ءَ ھم بلوچستان ءِ جتا جتائیں ھند ءُ دمگاں “بلوچستان کتاب کاروان” ءِ نام ءَ کتاب میڑہ برجم داریت۔ اے کتاب میڑہ بلوچستان ءِ توک ءَ وانگی پڑ ءَ گیشی ءَ ھوار زانت ءُ زانشت ءِ سر ءَ یک گھتری ءُ مٹی آرگ ءِ وسیلگ بوت کن اَنت۔ ما سرپد بہ ایں کہ یک نودربر گلے ءِ بستار ءَ ما بلوچ راجمان ءَ ھمک ھما امل ءَ بہ شوھازیں یاکہ دیم ءَ بیار ایں کہ آ مئے وانگ، الم، زانت ءُ زانشت ءَ گھتر ءُ شوکتر کرت کنت۔ اے درگت ءَ ھمک سیاسی، وانگی ءُ لبزانکی پروگراماں ھوار کتاب میڑہ گل ءِ مستریں پروگرامانی بھر اَنت کہ جتاجتائیں وھداں برجم دارگ بنت۔ بساک نوکیں سال ءِ بندات ءَ بلوچستان ءِ جتاجتائیں ھند ءُ دمگاں کتاب میڑہ برجم دار ایت۔ ما بلوچ راج، مھلوک ءُ ورنایاں چہ لوٹ کنیں کہ آ کتاب میڑھاں گیش ءَ گیش بھر بہ زیر اَنت کہ اود ءَ شُمارا دگنیا ءِ کُلیں لٹریچر بزانکہ لبزانک،گوستانک، سیاست ءُ شَیر ءُ شائری ءَ ھوار فلسفہ ءُ دنیا ءِ ایندگہ سرھالانی سر ءَ کتاب دست کپ اَنت۔

سرجمیں بلوچستان ءَ زَھری ، انسانی ھکانی سنگینیں ھلاپ ورزیانی سر ءَ دلپدردی درشان-

بلوچستان ءَ زالبولانی زورانسری آوار جنی ءِ ھلاپ ءَ بلوچ یکجھتی کمیٹی ءِ نیمگ ءَ چہ بندات بیتگیں پنچ روچی مھم یکشل ءَ برجاہ ءَ اِنت، چریشی ءِ میان ءَ جتاجتائیں پارٹیانی نیمگ ءَ تُرندی گم ءُ زھری ءُ دلپدردی درشان کنگ بیگ ءَ اِنت- انسانی ھکانی کارکنان، سانمندیں کھولاں، نودربر ءُ چاگردی گلانی گوشگ اِنت کہ زورانسری آوار جنی ءِ دْرچ نو بلوچ جنیناں چہ سر بیتگ ءُ یک تُرسناکیں ءُ ناکابلیں کبول اِنت-

زھرشانی کنوکانی رِد ءَ، زورانسری آوار جنی یک پردے نہ اِنت بلکیں سرجمیں کھول ءُ چاگرد ءَ مُچی سزا ءِ دوچار کنت – بلوچ جنیناں نشانگ کنگ ناں تھنا بُنیادی انسانی ھکانی سنگینیں ھلاپ ورزی اِنت بلکیں بلوچ چاگرد ءِ شرپ، پجّار ءُ مُچی ھستی ءِ سر ءَ اُرش کنگ ءِ زانگ بیت-

مھم ءِ میان ءَ شنگ بیتگیں تامُربندیں درشاناں گوشگ بیتگ کہ بلوچ جنین بے توار نہ بیتگ اَنت بلکیں آیاں گھگیری کتگ ءُ جُھد ءِ راہ گچین کتگ- ترانکاراں گوشتگ کہ زورانسری آوار جنیانی تواراں بے توار کُت نہ کن ئے نانکہ راستی ءَ مدام بندیگ کت کن ئے- انساپ ءِ توار ایرموش کنگ نہ بیت ءُ بلوچ جنین وتی ھکانی ھاتر ءَ اوشتاتگ اَنت-

نامی ئیں اِھوالکار منیزہ جھانگیر ءَ مھم ءِ درگت ءَ وتی درشان ءِ تہ ءَ گوشتگ ک زورانسری آوار جنی پاکستان ءَ یک سنگینیں جرمے ءُ اے کار ڈیھی کانود ءُ درانڈیھی انسانی ھکانی مُھادانی تچکی ءَ ھلاپ ورزی اِنت- آئی ءَ تچک کتگ گوشتگ اے وھد ءَ بلوچستان ءَ زالبولانی زورانسری آوار جنی ءِ یک تُرسناکیں وڑے ءَ گیش بیتگ، آیانی تہ ءَ یک بیست ھپت سالی ئیں لاپ پُریں زالبول ءُ یک ھپدہ سالی ئیں جنکے ءِ کیس ھوار اِنت، کہ آیانی کھول تنی وھدے آیانی درگت ءَ سرپدی نیست-

آئی ءِ گوشگ اِنت کہ اے وڑیں وئیل سانمندیں کھولاں سک سسّائی ازیت ءَ دوچار کنت ءُ ریاستی ادارھانی درگت ءَ چہ راج ءِ تہ ءَ بے ستکی گیش بوان اِنت- آیاں زور داتگ کہ اگاں کسے ءِ سر ءَ بھتام ھست گُڑا ریاست ءِ گور ءَ آئینی ءُ کانودی راہ ھست، زورانسری آوار جنی ھچ وڑ جائز نہ اِنت-

مھم ءِ چارمی روچ ءِ درگت ءَ زھرشانی کنوکاں گوشتگ بلوچستان ءَ زورانسری آوار جنی نو دگاں چہ لوگاں سر بیتگ- نودربر، مات ءُ لاپُریں زالبولاں تاں نشانگ کنگ مچی سزا ءِ یک دروشمے – ترانکارانی رِد ءَ یک بلوچ زالبولے ءَ سانکلاں بندیگ کنگ ءَ گندگ یک ھیرانیں گپے نہ اِنت بلکیں ھمکروچے ھساب ءَ جوڑ بیگ ءَ اِنت-

زھرشانی کنوکاں لوٹ کتگ اے سرجمیں بیگواھیں بلوچ زالبولاں زوت ءُ پہ سلامتی یل کنگ بہ بنت، زورانسری آوار جنی ءِ دْرچ بند کنگ بہ بیت میان استمانی انسانی ھکانی گل اے سنگین ءِ جاورانی سر ءَ گامگیج بزور اِیت-

مھم ءَ ھوار مردماں میان استمانی اداراھاں، اکوام متھدہ ءُ انسانی ھکانی گلاں چہ دزبندی کتگ کہ آ بلوچستان ءَ بلوچ زالبولانی زورانسری آوار جنی ءِ سر ءَ دلگوش بدنت ءُ ریاست پاکستان ءَ چہ پسہ بہ لوٹ اِیت-

بلوچستان ءَ ریل ءِ سر ءَ بیتگیں یکشلیں اُرشاں ریل مدام اوشتی ءِ آماچ کہ گوستگیں روچ ءَ ھم ریل ءِ واکداراں ریل ءِ روانی مھتل کتگ بیتگ- ھمے وڑ گوستگیں روچ ءَ ریل ءِ سر ءَ بیتگیں اُرش ءِ زمہ واری بی آر جی ءَ من اتگ-

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں بلوچستان ءِ دمگ نصیرآباد ءِ ھند ڈیرہ مراد جمالی ءَ ریل ٹریک شورو پٹ کتگ ءُ تراک ءَ چہ تباہ کتگ-

جارکش ءَ گوشتگ مئے گل بی آر جی اے اُرش ءِ زمہ واری ءَ منّ اِیت مئے اے وڑیں اُرش بلوچستان ءِ وتواجھی ءَ تاں برجاہ بنت-

اے آئی ٹیکنالوجی ءَ بلوچ زبان ھم ھوار گیجگ بوتگ ۔ اے آئی نوں بلوچی زبان ءَ ھم گپ جت ءُ پھم ایت کنت ۔

سرجمیں جھان ءَ تیزی ءَ گوں تالان ءُ دیمروئی کنوکیں اے آئی ءِ تہ ءَ نوں بلوچی زبان ءَ ھوار گیجگ بوتگ ، اے آئی نوں بلوچی زبان ءِ گرائمر ءَ شری ءَ پھم ایت کنت ءُ جوانیں نکان جوڈ کت کنت ۔

اے اولی «اے آئی» ایجنٹ اِنت کہ بلوچی زبان ءَ گپ کنت، پوہ بیت ءُ بلوچی نبشتہ کنت۔ اے ویب، اینڈرائیڈ ءُ آئی او ایس (iOS) ءِ سر ءَ دست کپ‌ایت۔ اے بلوچی گپ کنوک ءُ نودربراں کمک کنت داں کہ آ یک زانتکار ءُ نوکیں دروشمے ءَ ھال ءُ اھوال، بلوچی زبان ءَ پٹ ءُ پول بہ‌کن اَنت۔بلوچی «اے آئی» چہ سادھیں«لبزبلد» (Dictionary) ءَ گیش اِنت — اے دراھیں جُستانی پسّھاں دنت ۔

چاگردی ترامجاھاں اشی ءِ ستاہ کنگ ءُ ھمے گوشگ بوگ انت کہ ڈیجیٹل جھان ءَ بلوچی ھم زانگ بوگ ءَ انت نوں مئے ورنا اے آئی ءِ کمک ءَ بلوچی ءِ تہ ءَ ھم مواد تیار کت کن انت ۔

آیانی ھمے گوشگ انت کہ اے ایوک ءَ زبان ءِ دیمروئی کمک نہ کنت بلکنہ میاں استمانی تکاں بلوچ دودمانءِ پجار ءَ ھم گیش کنت ۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ کہ ھاران شھر ءَ ریاستی پلامرزی ڈیتھ اسکواڈ ءِ کارندھانی تیرگواری ءَ چہ ھپدہ جولائی 2025 ءَ سرمچار مجاھد بلوچ شھید بیتگ- بی ایل ایف مجاھد بلوچ پنّام ءِ وشّین اے گرانبھائیں راجی ھدمت ءِ سر ءَ سھرچکیں دروت ندر کن ایں-

جارکش ءَ گوشتگ کہ شھید مجاھد بلوچ ءَ 2018 ءَ بلوچستان لبریشن فرنٹ ءِ پلیٹ فارم ءَ چہ شھری گوریلا بستار ءَ جُھد بندات کتگ- آئی ءَ ھاران ءَ بی ایل ایف ءِ نوک لڑ ءِ بُنیاد ءَ گل ءِ مھکم کنگ بلاھیں کردے پیلو کتگ-

جارکش ءَ گوشتگ شھید مھنت، دلیری ءُ شھری گوریلا راھبندانی رِد ءَ جوانیں وڑے ءَ پیلو کتگ ءُ شھری سرمچارانی واستا جنگی راہ ءُ راھبند پندلانی ارزشتی ایں میراث ءَ۔یلہ داتگ- آئی ءِ زند شھری سنگتانی واستا یک پھربندیں مسالے- شھید مجاھد بلوچ ھرچ وڑ گل ءِ زمہ واریانی ھاتر ءَ ھر وھد ءَ جاڑیگ بیتگ-

جارکش ءَ گوشتگ کہ ھاران، واشک، نوشکی ءُ چاگی ءَ گل ءِ پُرکاریاں جوانیں کردے پیلو کتگ- گل ءِ راجی جُھد آجوئی ءَ مجاھد سیاہ پاد پنّام ءِ وشّین بلوچ ءِ ھدمت سر ءَ آئی ءَ سُھرچکیں دروت ندر کنت اے اِھد کنت کہ راجی آجوئی ءِ شھیدانی مشن ءَ سرجم کنگ ءِ ھاتر ءَ جُھد ءَ برجاہ دار اِیت-

تربت: کرکی تجابان ءِ ھند ءَ زالبولاں ھوار یکیں کھول ءِ چار مردمانی پاکستانی پوج ءِ دست ءَ بیگواھی ءِ ھلاپ ءَ سی پیک شھدگ ایم ایٹ ءِ سر ءَ نندانک سیمی روچ ءَ برجاہ انت ءُ شھدگ ءِ بندش ءِ سبب ءَ ھزارانی گاڑیانی دراجیں لین لگ اتگ انت – ءُ تربت، شال ءُ دگہ ھندانی روانی راہ مھتل انت-

زھرشانی ءَ زالبول ءُ زھگ بازیں کچے ءَ ھوار انت چُشکہ ترندین سارتی ءَ ابید نندانک اش داتگ- کھول ءِ رد ءَ ھیر النسا ءُ ھانی دلوش ءَ ھوار چار مردم زورانسری بیگواہ کنگ بیتگ انت – ءُ چاگردی ترامجاھانی سر ءَ آیانی سر ءَ سکیں ناوشین بھتام جنگ بوگ ءَ انت – ءُ آ دیم ءَ آرگ بوگ ءَ نہ انت-

زھرشانی کنوکانی گوشگ انت دانکہ زالبولاں ھوار چاریں مردم یل کنگ نہ بنت اے زھرشانی برجاہ بیت ےُ شھدگ ھچ رنگ ءَ پچ کنگ نہ بیت انت – آیانی گوشگ انت اگاں بھتامے ھست گڑا سانمندیں مردم کانون ءِ درچ ءَ سزا دیگ بہ بنت-

دومی نیمگ ءَ انتزامیہ ءِ نیمگ ءَ اسنٹ کمشنر مھمد ھنیپ کبزئی ءُ دمگی ھاکم شتگ انت ءُ گپ ءُ تران ءِ سر ءَ دگ ءِ پچ کنگ ءِ جھد اش کتگ بلے داں گپتگیں مردمانی یل نپ دیگ ءِ سر ءَ سیمی روچ ءَ ھم گپ ءُ تران بے سوب بیتگ-

بلوچ لبریشن آرمی ءِ گوستگیں سروک جنرل اسلم بلوچ ءُ آئی ءِ ھمراھانی سالروچ ءِ درگت ءَ سیکیورٹی ءِ جاورانی رِد ءَ بلوچستان ءِ جتاجتائیں دمگاں پھزداری ترند کنگ بیتگ ۔

چہ شال ءَ پشاور ءَ روکیں جعفر ایکسپریس سیکورٹی ءِ سبب ءَ ریل ءِ واکداراں بند کتگ۔

ریل ءِ بنشون ءِ رد ءَ باندا بلوچستان ءَ ریل ءِ سروس یک روچے ءِ واستا بند کنگ بیت ۔

بنشون ءَ گیش گشتگ کہ پشاور ءِ واستا جعفر ایکسپریس پنچ شمبے ءِ روچ ءَ نہ روت، کراچی ءِ واستا بولان میل ءُ چمن ءِ واستا چمن ریل ھم باندا بند کنگ بیت۔

ریل ءِ بنشون ءِ رد ءَ باندا چہ پشاور ءَ شال ءَ آیوکیں جعفر ایکسپریس ھم مھتل کنگ بوتگ ۔

اود ءَ لسبیلہ، خضدار، ءُ مکران ءَ فوج ءِ سر ءُ پرانی تہ ءَ گیشی گندگ بوتگ۔

زانگ بہ بیت کہ بلوچ لبریشن آرمی ءِ پیسریگیں سروک جنرل اسلم بلوچ ءُ آئی ءِ ھمراھانی بیرانی ءِ روچ مروچی دارگ بیت۔

2018 ءَ بلوچ سروک جنرل اسلم بلوچ ءُ آئی ءِ پنچ ھمراھ کمانڈر کریم (سگار)، فدائی بابر مجید عرف فرید، اختر بلوچ عرف رستم، تاج محمد مری عرف ءِ سردارو ءُ امان اللہ عرف صادق وت کُشیں اُرش ءِ نشانگ جوڑ کنگ بوتگ اَنت کہ ایشی ءِ تہ ءَ آ نمیران بوتگ اَنت۔

2022 ءَ بلوچ لبریشن آرمی ءَ اے روچ ءَ سرجمیں بلوچستان ءَ بازیں مزنیں کچے ءَ اُرش کتگ ءُ پاکستان آرمی ءِ افسراں ھوار بازیں کارندہ بیران بوتگ اَنت۔

شال بلوچستان ءَ زورانسری ءَ بیگواھیانی ھلاپ ءَ وائس فار بلوچ مسنگ پرسن ءِ نیمگ ءَ جوڑ کتگیں دراج کشیں شدھڑتالی بنجل ءِ سر ءَ ناشناسیں مردماں اُرش کتگ کہ چریشی ءَ بنجل کروجگ بوتگ ءُ تمبو ءَ ھوار بیگواھیں مردمانی اکس تاوان دیگ بوتگ اَنت۔

شال پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل برجاہ اِنت۔

وائس فار بلوچ مسنگ پرسنز ءِ نیمگ ءَ شنگ بوتگیں بیانے ءِ تہ ءَ گْوشگ بیتگ کہ ماما قدیر بلوچ ءِ بیرانی ءَ پد تنظیم ءِ زھرشانی بنجل سئے روچ ءِ پرس ءِ واستا بند کنگ بیتگ۔ مرچی وھدے کہ بنجل ءَ دوبر اتکگیں گڑا بنجل تاوانانی دروشم ءَ گندگ بوتگ-

گل ءِ رد ءَ اے اولی ویل نہ انت۔ اے کیمپ گوستگیں وھداں ھم باز رند ءَ نشانگ جوڑ کنگ بوتگ ءُ سوچگ بوتگ کہ اے انسانی ھکانی مزنیں لگتمالی یے ۔

وائس فار بلوچ مسنگ پرسنز ءُ بیگواھیں مردمانی توار ءِ وائس چیئرمین ماما قدیر بلوچ دیریں نادراھی ءَ پد ھمے زوتاں بیران بوتگ۔ انوں اے کیمپ ءِ سروکی ءَ گل ءِ چیئرمین نصر اللہ بلوچ گوں وتی ھمراھاں کنگ ءَ انت۔

گل ءَ گشتگ کہ ماما قدیر بلوچ ءِ بیرانی ءَ پد لھتے ناشرانی نیمگ ءَ پندل ءُ آن لائن مھم گیش بوتگ انت اے پرامنیں جنز ءِ لپاشگ ءِ کوشست ءَ انت۔ بلے گل ءِ گشگ انت کہ اے درستیں پندل بے سوب بنت۔ انسانی ھلانی توار لپاشگ نہ بیت ءُ داں انساپ ءِ آسراتی مہ بیت اے جھد برجاہ مانیت۔

بیان ءِ گڈسرا گشگ بیتگ کہ امن ءُ ایمنی ءِ زھرشانی ءِ ھک انسانی ھک انت ءُ میان اُستمانی تک ءَ گوں اے دزبندی کنگ بیتگ کہ آ بلوچستان ءَ انسانی ھکانی لگتمالی ءِ نیمگ ءَ دلگوش بہ کن انت۔

سید ھاشمی ریفرنس کتاب جاہ ءِ نیمگ ءَ دلگوشی جار ءِ جنگ بوتگ کہ سید ھاشمی ریفرنس کتاب جاہ بلوچ راج ءِ یک بے بھائیں مڈی یے کہ آئی ءِ بُن ھِشت نمیرانیں واجہ صبا دشتیاری ءَ گوں وتی بیل ءُ ھمبلاں مزنیں جھد ءُ جکانسری ءَ چہ پد ایر کت ، اے آئی ءِ زبان دوستی ءُ راج دوستی ءِ یک مزنیں بروردے ۔ واجہ صبا دشتیاری یک ٹوھیں سرے اَت کہ آ گَل ءُ ادارھانی رھبندانی سر ءَ رؤکیں کَوّاسے اَت ، ھمے سوب اِنت کہ آئی ءَ پہ کتاب جاہ ءَ یک جوانیں رھبندے ٹھینت ۔

جار ءِ تہ ءَ گوشگ بوتگ کہ سید ھاشمی ہاشمی ریفرنس کتاب جاہ داں روچ ء مروچی ھمے رھبند ءِ سر ءَ اوشتاتگ ءُ آئی ءِ مَنوّک اِنت ۔ آئی ءِ گیشیں کار یا اڑ ءُ جنجال گوں ” جنرل باڈی “ یا گچین بوتگیں ” کابینہ “ ءِ ھواریں ءُ گیشیں باسکانی سوڑگ ءَ گوں بندوک بنت ۔

جار ءِ تہ گوشگ بوتگ چوشکہ کتاب جاہ ءِ کَش ءُ گوراں ملیر ایکسپریس وے ( شاہراہِ بھٹو ) جوڑ بوھگ ءَ اِنت ، چریشی ءِ جوڑ بوھگ ءَ کتاب جاہ چنچک تاوان بار بیت کنت ءُ آئی ءِ آسر چے بیت کن اَنت ، کتاب جاہ کابینہ اے چیزاں گوں نزیک ءَ چارگ ءَ اِنت ۔ پہ اے کار ءَ آمید گس ( عدالت )، بازیں ادارہ ءُ گَلانی گوں ما سھل تران ، لس رسانک ءِ گیشیں راہ ءُ رھبند کار مرز کرتگ اَنت ، اے جھد انگت بوھگ ءَ اِنت ۔ چوشکہ کتاب جاہ یک راجی مڈی یے ، پہ اے راجی مڈی ءِ رکینگ ءِ واست ءَ ھر ھمک راہ ءُ رھبند ءُ ھمک واک داراں گوں گپ ءُ تران بوھگ ءَ اِنت ۔

جار ءَ گوشگ بوتگ چوشکہ ادا یک گپے پدر کنگ بیت کہ کتاب جاہ وتی بُن رھبند ( آئین) ءِ منَوّک اِنت ، آ ھچ رنگیں مردمے ءِ گپ یا بے سریں بھتاماں گوں بندوک نہ اِنت ءُ کتاب جاہ اے چیز ءِ موکل ءَ ھجبر نہ دنت کہ دری مردمے کتاب جاہ ءِ کاراں گوں دزمانجی بہ کنت ۔ کتاب جاہ کابینہ گلیں راج ءَ باور کنائینت کہ اے گرانبھائیں راجی مڈی ءِ رکینگ ءِ ھاترا ھر وڑیں سکی ءُ سوری ءِ دیمپان بوھگ ءَ ساڑی اِنت ۔