TBP Balochi

دی بلوچستان پوسٹ

سر کار ءِ کچ ءُ کساسانی رد ءَ سرجمیں ڈیھ ءَ بیست ءُ چار ادارانی تہ ءَ سِی ءُ چار ھزار ءُ پنچ سد ءُ پنجاہ ءُ یک ٹیست کنگ بیتگ اَنت کہ چریشانی تہ ءَ دو ھزار ءُ چار سد ءُ پنجاہ ءُ نُھ مردمانی نادراھی ءِ گورجنگ پدر بیتگ ءُ اے نادراھی ءَ ھپتاد ءُ سَے مردم بیران بیتگ اَنت، بلے کورونا وائرس ءَ یک ھزار ءُ شش سد ءُ چاردہ مردم وش بیتگ اَنت –

پاکستان ءَ داں انیگ ءَ کورونا وائرس ءَ گپتگیں مردمانی کَچ چار لَک ءُ چِل ءُ سَے ھزار ءُ دو سد ءُ چِل ءُ شش ءُ سر بیتگ اَنت ءُ سَے لَک ءُ ھشتاد ءُ شش ھزار ءُ سَے سد ءُ سِی ءُ سَے مردم دراہ بیتگ اَنت وھدےکہ ھشت ھزار ءُ نُھ سد ءُ پنچ مردم بیران –

پاکستان ءِ اُستانی تہ ءَ درستاں گیشتر نادراھی سندھ ءِ تہ ءَ اِنت کہ سرکاری کَچ ءُ کساساں سندھ ءَ بیست ءُ چار ادارانی تہ ءَ یک ھزار ءُ دو سد ءُ شست نادراھانی پدراھی دیم ءَ اتکگ اَنت ءُ سرجمیں نادراھانی کچ یک لَک ءُ نود ءُ شش ھزار ءُ نُھ سد ءُ شست ءُ دو ءَ سر بیتگ اَنت –

سرکاری کچ ءُ کساساں اُستان ءَ جھانی وبا ءَ دگہ شش مردم بیران ءُ اُستان ءَ بیران بیتگیں مردمانی کچ سَے ھزار ءُ یک اد ءُ شست ءُ چار ءَ سر بیتگ اَنت –

پنجاب ءَ بیست ءُ چار ادارانی تہ ءَ پنچ سد ءُ نود ءُ ھپت مردم نادراھی ءَ گور جتگ اَنت سرجمیں نادراھانی کچ یک لَک ءُ بیست ءُ ھشت ھزار ءَ سر بیتگ اَنت –

پنجاب ءَ پنجاہ ءُ ھپت مردم بیست ءُ چار ادارانی تہ ءَ بیران بیتگ اَنت ءُ پنجاب ءَ بیران بیتگیں مردمانی کَچ سَے ھزار ءُ چار سد ءُ بیست ءُ دو ءَ سر بیتگ اَنت –

ھیبرپختونخوا ءَ گوستگیں بیست ءُ چار ادارانی تہ ءَ سَے سد ءُ سِی ھشت مردم نادراھی ءِ آماچ بیتگ اَنت ءُ اشانی ھواری ءَ سرجمیں نادراھانی کَچ پنجاہ ءُ دوھزار ءُ ھپت سد ءُ ھشت مردم ءَ سر بیتگ اَنت –

سرکار ءِ کچ ءُ کساسانی رد ءَ نادراھی ءَ چار نادراہ بیران بیتگ اَنت چریشی ءَ پد وائرس ءَ بیران بیتگیں مردمانی کچ یک ھزار ءُ چار سد ءُ ھپتاد ءُ ھپت ءَ
سر بیتگ اَنت –

بلوچستان ءَ گوستگیں بیست ءُ چار ادارانی تہ ءَ بیست ءُ شش نادراھیں مردم دیم ءَ اتکگ اَنت کہ چریشی ءِ ھواری ءَ سرجمیں نادراھانی کچ ھبدہ ھزار ءُ ھپت سد ءُ ھپتاد ءُ یک ءَ سر بیتگ اَنت –

بلوچستان ءَ دگہ نوکیں بیرانیانی ھال نیتکگ اَنت ءُ سرجمیں بیران بیتگیں مردمانی کَچ یک سد ءُ ھپتاد ءُ پنچ ءَ سر بیتگ اَنت –

پاکستان ءِ بنجاھی شھر اسلام آباد ءَ بیست ءُ چار ادارانی تہ ءَ دو سد ءُ پنچ نادراہ دیم ءَ اتکگ اَنت ءُ چریشی ءِ ھواری ءَ نادراھانی کچ سِی ءُ پنچ ھزار ءُ چِل ءُ پنچ ءَ سر بیتگ اَنت –

اسلام آباد ءَ دگہ شش مردم بیران بیتگ اَنت ءُ سرجمیں بیران بیتگیں مردمانی کَچ سَے سد ءُ ھپتاد ءُ ھپت ءَ سر بیتگ اَنت –

کشمیر ءَ سِی ءُ یک نوکیں نادراہ دیم ءَ اتکگ اَنت ءُ چریشی ءَ پد نادراھانی کچ ھپت ھزار ءُ ھپت سد ءُ پنجاہ ءَ سر بیتگ اَنت –

بیست ءُ چار ادارانی تہ ءَ کشمیر ءَ ھچ نادراہ بیران نہ بیتگ اَنت ءُ گوستگیں بیران بیتگیں مردمانی کچ یک سد ءُ نود ءُ یک ءَ سر بیتگ اَنت –

گلگت بلتستان ءَ دو مردم نادراھی ءِ آماچ بیتگ اَنت ءُ چریشی ءَ پد چار ھزار ءُ ھپت سد ءُ نود ءُ سَے ءَ سر بیتگ اَنت –

گلگت بلتستان ءَ بیست ءُ چار ادارانی تہ ءَ بیرانیانی ھال نیاتکگ اَنت ءُ گوستگیں بیران بیتگیں مردمانی کچ نود ءُ نُھ ءَ سر بیتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ تیابدپی شھر چھبار ءَ ناشناسیں مردماں تیرگواری کرتگ ءُ یک مردمے زدگ کرتگ –

اھوالکار ءِ رد ءَ چھبار ءِ ھند کوچہ جمھوری ءَ ناشناسیں مردماں تیرگواری کرتگ ءُ یک مردمے زدگ کرتگ –

وئیل ءَ پد پولیس سر بیتگ ءُ زدگ بیتگیں مردم چِست کنگ بیتگ ءُ نادراہ جاہ ءَ رسینگ بیتگ –

پولیس ءَ تیرگواری کنوکانی پَٹ ءُ پول بندات کرتگ ءُ گڈی ھالانی تہ ءَ دگہ دزگیریانی ھال نہ بیتگ –

اھوالکار ءِ رد ءَ تیرگواری ءِ سوب زانگ نہ بیتگ ءُ زدگ بیتگیں مردم ءِ نام ھم زانگ نہ بیتگ –

دی بلوچستان پوسٹ

سر بیتگیں ھالانی رد ءَ مروچی کیچ ءِ بنجاھی شھر تربت ءَ ناشناسیں مردمانی تیرگواری ءَ بیران بیتگیں دو نودربرانی کھولاں زھرشانی کرتگ ءُ کوشکارانی دزگیری ءِ لوٹ کرتگ –

زھرشانی ءَ بازیں کچے ءَ چک ءُ زالبولاں ھوار سیول سوسائٹی ءِ مردماں بھر زرتگ ءُ زھرشانی کرتگ ءُ گوشتگ کہ مئے نودربر امیر بخش ء زباد جھمنند تل سر ھوشاب ءُ علیم ء میران جھمنند تجابان سنگ آباد کہ ھشت دسمبر ءَ کیچ ءِ دمگ ھیرونک ءَ پُھل ءِ سر ءَ تیر جتگ ءُ کُشتگ اَنت –

زھرشانی کیچ ءِ سول سوسائٹی ءِ رھشون گلزار دوست تران کنان ءَ گْوشت کہ گوستگیں روچاں تجابان ءَ ناشناسیں مردماں دو نودبر تیر جتگ ءُ کُشتگ اَنت کہ اشانی تہ ءَ یکے ھپتمی تبک ءُ دومی پنچمی تبکے نودربر بیتگ اَنت کہ کورونا وائرس ءِ سوب ءَ وانگ جاھانی بند بوگ ءِ سوب ءَ ھردوکیں نودربر نیزگار بیتگ ءُ وتی لاپ ءِ شوھاز ءَ بیتگ اَنت کہ بیگاہ ءِ موکل ءَ پد ھیرونک ءَ وتی سیادانی گندوک ءَ روگ ےَ بیتگ اَنت ناشناسیں مردماں تیرجتگ ءُ کُشتگ اَنت ءُ آیانی لاش تربت ءَ سرکاری نادراہ جاہ ءَ سر کرتگ ءُ تتکگ اَنت –

دمگی مردمانی رد ءَ ھردوکیں مردم پاکستانی پوج ءُ چیریں ادارھانی جوڑ کرتگیں گل ڈیتھ اسکواڈ ءَ کُشتگ اَنت کہ دمگ ءَ لس مردماں ملام کنگ ءُ دُزی ءُ دگہ چاگردی سلکاریاں ھوار اَنت –

زانگ بہ بیت گوستگیں وھداں تربت ءَ ھواریں ھنداں سَے زالبول ھمے وڑ ءَ تیر جنگ ءُ کُشگ بیتگ اَنت لس مردماں زالبولانی کوشانی دزمانجنی پاکستانی پوج ءُ چیریں ادارھانی نیمگ ءَ جوڑ کرتگیں ڈیتھ اسکواڈ ءِ سر ءَ لڈ اِتگ اَنت –

ھمے وڑ ءَ چاگردی رسانکجاھاں سیاسی مردمانی گوشگ اِنت بلوچستان ءِ جتا جتائیں ھند ءُ دمگاں پاکستانی پوج ءِ نیمگ ءَ جوڑ کرتگیں ڈیتھ اسکواڈ ءِ کارندہ لس مردمانی کُشت ءُ کوش ءُ دُزی ءُ دگہ وئیلاں ھوار اَنت کہ آیانی پُشت ءُ پناھی ءَ سرکار کنگ ءَ اِنت –

نبشتانک: جنرل اسلم ءِ کاروان

نبشتہ کار: اکیل مراد

دومی بھر

دی بلوچستان پوسٹ

جنگی ساز ءُ سازمان جنگانی ریشگ بیت نہ کن اَنت ءُ جنگاں دیم ءَ ھم بُرت نہ کن اَنت ۔ جنگانی تہ ءَ مھکم تِریں ساز ءُ سازمان جنگی رھبندانی سرپد بیگ ءُ مھکمیں پگر ءِ جوان ءُ ھشیمیں سر اَنت –

چوناھیگا جنگ یک تباھی ءُ بربادی ءَ ابید دگہ ھچ پیش داشت نہ کنت وھدیکہ جنگ کیت تئی پجار ءِ سر ءَ سوار بیت گڑا باید آ جنگ بربادی ءُ تباھی ءِ گوشگ مہ بیت بلکیں شری ءُ شرکاری ءِ نیمگ ءَ ھمے جنگ ءِ نام ءَ یک نامے گچین کنگ بیت آ جنگ ءِ گڈی بودشت اِنت ءُ ھمے جنگ ءِ زور ءَ ھمے جنگ ءِ تہ ءَ کُشت ءُ کوشی ءِ زور ءَ وتی گشینگ ءُ پجارینگ ءَ وت ءَ ھمے جنگ ءِ ھونانی تہ ءَ ھوار بہ گیج ایت –

اے جنگانی تہ ءَ ھزار رنگیں انسان، دابو، مال، ھرچ دابیں شَے جنگانی میان ءَ بیران ءُ زوال بنت درچک ءُ دار، لوگ ءُ میتگ درست جنگی جاورانی وڈالاں کپ اَنت ءُ گار بنت-

“افتادگان ھاک ” تاک دیم بیست ءُ ھشت ءَ فرانزفینن نبشتگ کنت ۔ گوستگیں زمانگ ءَ نوک آبادکاری ءَ آجوئی ءِ درچ راجدپتر ءِ برزی ءِ سر ءَ ءُ سیاسی بیسہ ءِ سر ءَ ھم بنکی سنچ ءِ یک زانتی جیڑھے پیداگ کنت آ ایش اِنت کہ آ کجام رنگ ءَ اے جاورھال ءَ راجی آجوئی ءِ زرمبشت ءَ بندات کنگ جوان اِنت؟ گڑا آ جتائیں رنگاں چریشی ءِ سر ءَ نوک آبادیانی نزام ءِ پروشی ءِ دیمپانی گندگ ءَ کیت –

جتائیں رنگاں اے زانگ بیت وتی شورانی بندگ ءَ لرز ایت اِنت اے کجام جاورھالانی پروشی ءِ درایگ ءُ کجام رپک ءُ ھنر اَنت اے وُ پدراھی یے کجام مردم جنگی جاورانی تہ ءَ اِنت آ وتی کار ءُ ھنرانی شور بندگانی سوڑگ سک ءَ جوان بنت آ کجام رنگ ءَ زرمبشت ءِ گل کاری ءُ آئی ءَ چون دیم ءَ برت کنت -اگاں اے رنگیں بودشت نیست اَنت گڑا اشی ءِ مٹ ایش اِنت کہ آجوئی ءِ گرگ ءِ واب ھشکینے چریشی ءِ ھمراھی ءَ ترسناکیں رنگے ءِ مانشانے ءَ ترس بیت اِنت-

نِی جُست اد ءَ کیت آ کجام زور اَنت کہ نوک آبادکارانی نزام ءِ جاڑیگ بیگ ءَ نوک آبادکاری ءِ مھلوک ءِ سر ءَ لَٹ شاپ کنگ ءِ مول ءُ مراد ءُ نوکیں رھبندانی شوھاز؟ درستاں پیسر سیاسی پاٹی ٹولی ءُ تاجر ءُ کواسانی گیشتریں مردماں اے کار کنگ کپ ایت – گیشتر سیاسی پاٹیانی نزام ءِ تہ ءَ شری بیت آ سر زاھری رھبندانی جار ءَ جن اَنت بلے ترندیں گامگیج ءِ زورگ ءَ لرز اَنت ”-

جنرل اسلم ءَ وتی کرد پہ زمین ءِ آجوئی ءَ بندات کرتگ اَت آئی ءِ اولی گامانی تہ ءَ زمین زادگی ءِ پگر ءَ امباز اِتگ ءُ وتی نیمگ ءَ کش اِتگ اَت ، ھمے سوب بیتگ کہ آئی ءَ نوک آبادکارانی گلینگ ءَ سیاسی سنچ ءِ ھمراھی ءَ یک جنگی رھبندے گچین کرتگ اَت –

اے جنگ ءِ پِڑ آئی ءَ شال ءِ دمکانی تہ ءَ بندات کرتگ اَت ءُ بولان ءِ کوھانی تہ ءَ جنان ءُ پروشان اَت –

اے جنگ ءَ آئی ءَ ھمے اُمیت مھکمیں رنگے ءَ دیم ءَ برگ ءِ واستا دشمن ءِ مزن مزنیں پندلانی پروشگ ءَ بلوچ ورنایانی دلاں سما پیداگ کتگ اَت –

اے سپر ءَ آئی ءَ تچک ءَ زانتگ اَت کہ سپر ءِ تہ ءَ بے کساسیں جنگی جھلی ءُ برزی دیم ءَ کاینت بلے مئے زمین ءِ سر ءَ اتکگیں نوک آبادکاری ءِ ھلاس کنگ ءِ راہ ءِ گشینگ ءَ تھنا یکیں چیز ءَ گوں مانا داشت کنت –

دوھزار ءَ آئی ءَ سلاہ بندیں جنگ ءِ جار وتی راج ءِ کوشاں پِرینتگ اَت ءُ ھمے جنگ ءَ ھما وھد بیت کنت کساس ءُ کم کساس مردم بیتگ اَنت بلے آیانی پگر ھما وھد ءَ یک مُچے ءِ دروشم ءَ بیتگ –

“یک گُلگدارے ءِ تہ ءَ آ ھمے گپ ءَ کنت دشمن مئے نیزور کنگ ءَ لوگانی سر ءَ اُرش کنگ، جنین ءُ چُکانی تہ ءَ ناوشی پیداگ کنگ ءُ آیاں برگ ءُ گار کنگ ءِ کاران کنگ ءَ اِنت ما اے کچیں کاراں تنی وھدی دزمانجن بیگ ءَ نہ اِیں ءُ بیت کنت دیم ءِ آؤکیں وھداں دشمن ءِ بیھار ءَ چوشیں گامگیج زورگ بہ بیت” –

آ وتی گُلگِدار ءِ تہ ءَ اے گپ ءِ پدراھی ءَ ھم کنت ما گیش مردم وتی یکجاھیں بنجلاں داشت کُت نہ کن ایں ءُ ھر ھما کمانڈر یا کمان ءِ تہ ءَ سپاھیانی تہ ءَ بس کمے کساس ءَ مردم بنت گڑا چوش اے گپ ءَ زانگ بیت کہ جنرل آ وھد ءَ کم ءِ کچ ءَ بیتگ ءُ بلے آیانی پگر باز ءِ کَچ ءَ بیتگ اَنت –

نِی گوشداروک ءُ سماکار اے چیز ءِ پدر کنگ ءَ زان اَنت ءُ جنگی پِڑاں کجام ھم ڈیھاں بندات بیتگیں زرمبشتانی رنگ ءُ پیم جتا جتا بیتگ اَنت ءُ آیانی بنداتی مھکمیں جنگ ءِ سِلاہ پگر بیتگ اَنت –

جنرل ءَ ھمے پگرانی مھکمی ءَ اے جنز ءَ دشمن ءِ وابانی تہ ءَ پروشگ ءُ وتی سوبمندی ءِ گام دیم ءَ جنگ ءِ سکین گون اِت اَنت ءُ کاروان ءِ زرمبشت ءِ سر سبزینگ ءَ پگری لیکہ ءِ ھمراھی ءِ سنچ داروکیں جنرل جنزان اَت –

“جنگی دپتر سازان اَنت”
“زند ءِ بھراں جنزان اَنت”

“روچ ھشیمیں ٹِک اِت اَنت “
“مھر ء زمین سبز اِت اَنت”

“تاپگ گوردیماں تاپ اِنت “
“اھد ءِ نوبت نوک بیت اِنت “

سپر روان اِنت ماں جنرل اسلم ءِ کاروان ءَ دسمبر –

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ جاورھالاں کجام لس مردم یا اگدودار دزمانجنی ءَ پاکستانی پوج ءُ آئی ءِ چیریں ادارہ اوپاری نہ اَنت – راجدوست ءُ وتن دوستیں بلوچ پُسگاں زورانسری آوار جنگ ءُ چریشاں بازیں وھداں زندانانی تہ ءَ شھید کنگ ءُ آیانی زانگول کرتگیں جونانی دور دیگ زوراکیں ریاستی کاروائیانی درچ یکشلہ برجاہ اَنت – ماما قدیر بلوچ

دی بلوچستان پوسٹ

وائس فار بلوچ مسنگ پرسنز ءِ نیمگ ءَ شال ءِ پریس کلب ءِ دیم ءَ زھرشانی برجاہ، زھرشانی بنجل ءَ مروچی چار ھزار ءُ یک سد ءُ شست روچ سرجم –

نیشنل پاٹی ءِ کلانیں باسک عبدالغفار قمبرانی، سی سی ممبر محمد اسلم بلوچ ءُ دگہ مردماں بنجل ءِ تر ءُ تاب کرتگ ءُ پدری درشان اِتگ –

انسانی ھکانی باسک راشد حسین بلوچ ءِ مات، بیگواھیں سیاسی رھشون ڈاکٹر دین محمد بلوچ ءِ جنک سمی دین بلوچ ءُ بیگواھیں نودربر رھشون شبیر بلوچ ءِ گْوھار سیما بلوچ ءُ دگہ مردماں بنجل ءَ اتکگ ءُ وتی زھرشانی نبشتگ کنائینتگ اَنت –

وائس فار بلوچ مسنگ پرسنز ءِ رھشون ماما قدیر بلوچ ءَ ھمے وھد ءَ گْوشت کہ بلوچستان ءِ جیڑھانی تہ ءَ ھر وڑیں لس ادارہ یا اگدہ دارانی دزمانجنی پاکستانی پوج ءُ چیریں ادارہ آیاں اوپار کُرت نہ کن اَنت- بلوچستان ءِ تہ ءَ راج دوست، وتن دوستیں بلوچ پُسگانی زورانسری آوار جنی ءُ آھانی تہ ءَ بازینے زندانانی تہ ءَ شھید کنگ ءُ آھانی زانگولیں لاشانی دور دیگے رِد یکشلہ برجاہ انت –

ماما قدیر بلوچ ءِ گوشگ ات کہ گُڈسریں پاکستانی پوج ءُ آئی ءِ جھلی ادارہ ایف سی ءُ چیریں ادارہ ھمے پالیسی ءِ زور ءَ راج دوست، وتن دوستیں بلوچانی تاکت ءِ ھلاس کنگ ءُ آھانی تہ ءَ تُرس ءُ بیم ودی کنگ ءِ جھد ءَ انت –

زھرشانی بنجل ءَ ساڈی ئیں راشد حُسین بلوچ مات ءِ گوشگ ات کہ انگت ءَ تاں ھک لوٹوکاں ، کراچی ءُ شال ءَ زھرشانیاں ھوار ما راشد حُسین ءِ درگت ءَ آمیدگس ءَ ھم شُتگ انت وھدیکہ بیگواھیں مردمانی کمیشن ءِ دیم ءَ زاھر بیگ بلے راشد حسین ءِ بارو ءَ ھچ وڑیں گامگیج زورگ بوگ ءَ نہ انت –

آئی ءِ گوشگ ات کہ راشد حُسین ءِ زندگی ءِ درگت ءَ پاکستان ءَ ھوار متحدہ عرب امارات پسہ بہ دے اَنت – انسانی ھکانی گل راشد حُسین بلوچ ءِ زورانسری اوارجنی بگیری گامگیج بہ زوریت دؤئیں ملکاں چہ پسو بہ لوٹ ایت –

دی بلوچستان پوسٹ

شال ءُ چمن ءِ رودراتکی شھدگ ءَ گیس پریشر کمی ءِ سوب ءَ زالبولاں دگ بند کرتگ –

زھرشانی ءِ سوب ءَ چاریں نیمگاں گاڑیانی دراجیں لین لگتگ ءُ زھرشانی کنوکاں سرکار ءِ بگیری ءَ اوگام جتگ –

زھرشانی کنوکانی گوشگ ات کہ سارتی ءِ گیش بوگے ھواری ءَ گیس گار انت چریشی ءَ مردم تکانسر انت – بازیں براں برزی ھاکمانی گور ءَ شکایت ھم برتگ بلے ھچ وڑیں گامگیج زورگ نہ بوتگ –

آھانی گوشگ ات کہ ھزاراں زرے بل ءَ ھم جم کنیں بلے انگت گیس نیست، گیس ءِ لوڈ شیڈنگ ھلاس کنگ بہ بیت اگاں ناں زھرشانی برجاہ دارگ بنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ ھاش ءَ دو گاڑیانی ڈکر ورگ ءَ ھشت مردم بیران بیتگ اَنت ءُ پنچ زدگ بیتگ اَنت –

اھوالکار ءِ رد ءَ ھاش ءِ دمگ گوھرکوہ ءُ کارواندر ءِ میانی دمگ ءَ دو گاڑیاں ڈکر وارتگ کہ چریشی ءِ سوب ءَ ھشت مردم بیران بیتگ اَنت ءُ پنچ زدگ بیتگ اَنت –

بیران بیتگیں مردمانی تہ ءَ یکے ءِ پجار مھمد شلی ء زمان خان ءِ نام ءَ زانگ بیتگ ءُ مھمد شلی وتی کھول ءِ ھمراھی ءَ روگ ءَ بیتگ –

دومی گاڑی ءَ سواریں مردمانی سیادی سارانی ٹک ءَ اِنت کہ آئی ءَ نُھ کس سوار بیتگ ءُ روگ ءَ کہ اناگہ ءَ دوئیں گاڑیاں ڈکر وارتگ ءُ چریشی ءَ گاڑی سُتکگ اَنت ءُ چریشانی تہ ءَ ھشت مردم بیران ءُ پنچ زدگ بیتگ اَنت –

اھوالکار ءِ گوشگ اِنت کہ ھردوکیں گاڑیاں چُک ءُ جنین ھم سوار بیتگ اَنت ءُ آ دگہ بیران ءُ زدگ بیتگیں مردمانی نام زانگ نہ بیتگ اَنت –

روکپتی بلوچستان ءَ ھمک سال بازیں کساسے ءَ دگانی سر ءَ بیتگیں وئیلاں بازیں کچے ءَ مردم بیران ءُ زدگ بیگ ءَ اَنت –

دی بلوچستان پوسٹ

بلوچستان لبریشن فرنٹ ءِ جارکش میجر گْوھرام بلوچ ءَ ناشناسیں جاھے ءَ وتی شنگ کرتگیں درشان ءِ تہ ءَ کیچ ءَ پاکستانی پوج ءِ بند ءُ ساچی شرکت ءِ سر ءَ بیتگیں اُرش ءِ زمہ واری منّ اِتگ ءُ گوشتگ کہ گوستگیں شپ ءَ سرمچاراں کیچ ءِ دمگ ڈی بلوچ ءَ کیچ پُھل ءِ سر ءَ کار کنوکیں کمپنی ءِ مشینری سوتکگ اَنت-

جارکش ءَ گْوشت کمپنی سی پیک بند ءُ ساچی ءِ سر ءَ کار کنگ ءَ اِنت – اے کارندھاں پوجی نگپھانی ءَ سھب ءَ کنسٹرکشن ءِ نیمگ ءَ آرگ بنت ءُ بیگاہ ءَ واتر نگھپانی ءَ برگ بنت – گوستگیں شپ ءَ کرتگیں اُرش ءَ آیاں بازیں کچے ءَ جانی ءُ مالی تاوان بیتگ اَنت –

نبشتانک: بس ھواراں سنگت

نبشتہ کار: سرباز وپا

دی بلوچستان پوسٹ

اے منی ءُ تئی اولی دیدار اَت کہ تو مئے سوج اِش کُتگ اَت ءُ مئے دیم ءَ آتکگ اَت ئے ۔ دْروت ءُ دْرھباتی ءَ چہ پد چاھے وارت ما دیم پہ وتی سپر ءَ رھادگ بوت اِیں ۔ مئے سَپر سک دراجکش اَت ءُ ما روان ات ایں ، مئے سپر گاڑی ءِ سر ءَ ھپت ساھت ءَ چہ گیش ءِ سپر اَت ۔ اے راہ ءَ من ءُ تو دُرستی نہ اَت اِیں ۔ ترا تھنا سنگت اُستاد نور ءِ نام ءَ توار کنگ ءَ اِت اَنت ۔ ھمے وڑ ءَ سپر برجاہ ءُ گوں سنگتاں گپ ءُ تْران اَت ، کندگ ءُ مسکرائی اَت ۔ من ھر وھد ءَ کہ چم چِست کُت اَنت ءُ ترا چار اِت ، تئی لُنٹانی سر ءَ لھمُکیں بچکدگے گِندگ بُوَگ ءَ اَت ءُ سپر جنُزاں اَت۔

وھدے ما وتی منزل ءَ سر بوت اِیں ، شپ ءِ ساھت دہ ءُ یازدہ بوت ۔ سپر ءَ مارا سک ژند ءُ پند کُتگ اَت ، سنگتاں نان آؤرت ، ما نان وارت ءُ دیوان برجاہ اَت کہ سنگتے ءَ منی نام گپت ءُ توار کُت وپا! من گْوشت جی سنگت، آئی ءَ من ءَ جُستے کُت ءُ من آئی ءِ پَسہ دات ۔تو رند ءَ جُست کُت سنگت اے کُجام وپا اِنت ، سنگت ءَ گْوشت کہ اے سرباز وپا اِنت تو بچکندت ءُ من ءَ جُست کُت اے سنگت راست گوش اِیت من ترا پہ بچکند گْوشت ھو راست گْوش اِیت من سرباز وپا آں ، تو پہ مھروانیں گالوارے ءَ گْوشت بِہ بکش ئے سنگت ، من تئی نام اِش کتگ ، بلے من ترا ندیستگ پمیشکا من ترا نہ زانتگ ۔ من درِائینت ءُ گْوشت نا سنگت چوش بیت ، مردُم گِندگ ءَ چہ دُرستی ءُ راستی بیت ۔ چد ءُ پد ما الم یکّے دومی ءَ زان اِیں ۔

ھمے شپ ءَ داں دو بج ءَ ما نیاد کرت ءُ کند اِت ءُ پد ءَ وپت اِیں۔ وھدے کہ من سُھب ءِ سر ءَ چہ واب ءَ پاد آتک آں ، تو ساری ءَ آگھ اَت ئے منی ءُ تئی دیوان پد ءَ برجاہ بوت داں روچ ءِ ساھت یک بج ءَ سنگتاں سُبارگ ءِ نان آؤرت اَنت ءُ ما نان وارت۔ مئے لھتیں سنگت ءِ سپر دیم اَت ءُ مئے ھم روگ ءِ تیاری بوت ، تو پہ بچکند گْوشت وپا! منی ءُ تئی دیوان آسر نہ بوتگ ، شُما دیری روگ ءَ سر گپتگ اِت ۔من گْوشت اُستاد تو بیا گوں مئے نیمگ ءَ رو اِیں ، تو کند اِت ءُ گْوشت ھو من شمئے نیمگ ءَ الّم کایاں ، بلے مرچی من ءَ اِد ءَ کار ھست ۔ یک ءُ دو روچ ءَ چہ پد من شمئے نیمگ ءَ اَلّم کایاں ۔تو وتی ڈسّ ءُ نشان ءَ من ءَ بہ گْوش کہ من ترا در گِپت بکن آں ۔ من ترا سنگتے ءِ نام گْوشت ءُ ترا جُست کُت تو اے سنگت ءِ جند ءَ ، ءُ ایشی جاہ ءَ زان ئے ۔؟ تو کندگ ءِ جُت ءُ گْوشت، ھو ڑے اے سنگت ءَ من شر زاناں اے منی جگری دوستے ۔ من ترا ھمے گْوشت تو ایشی کِرّ ءَ منی نام ءَ بگر اے ترا الّم منی جاہ ءَ سر کنت ۔اگاں دست گٹ بہ بیت من ءَ الّم ہون کنت ءُ تئی ھال دنت، من وت کایاں تئی کِرّ ءَ ۔

منی ءُ تئی نیاد انگت سرجم نہ اَت کہ سنگتاں من ءَ توار کُت بیا اولاک تیار اَنت وتی سپر ءَ سرگر اِیں ۔ من ترا چار اِت ءُ گْوشت ، اُستاد موکل اِنت کہ من بہ رو آں، تئی پَسّہ ھمے بوت شر اِنت دست نہ گراں بس ھوراں سنگت ۔ گڑا ما وتی اولاک ءَ سوار بوت اِیں ءُ دیم پہ سپر ءَ راہ گِپت اِیں۔ تو اُوشتوک اِت ئے ، رَوَگ ءِ ساھت ءَ تو وتی ھردو دست چِست کُتگ اَنت ءُ پہ رُکستی شانگ ءَ لگّ اِت ئے ۔ ھمے گوشگ ءَ اِت ئے بروت اِت پاکیں پروردگار ءِ باھوٹ اِت ۔ تو دُوا کنگ ءَ اَت ئے ءُ ما وتی سپر ءَ جُنزان اِت ایں ۔ من شام ءَ وتی جاہ ءَ سر بوت آں ۔ دو روچ گْوست ، من ھما سنگت ءِ لمبر ءَ پون ءِ سر ءَ ھال ءُ اھوال کُت۔ وھدے من تئی جُست کُُت استاد نور ءِ ھالاں بِہ دے باریں نیاتکگ ؟ سنگت ءِ پسّہ ھمے بوت یار من سھی نہ آں، تو ھالاں بِہ دے استاد نور ءِ زان ءَ نزّیک ءَ آھگ ءِ سوجے ھست ؟ من گْوشت ھو یار من ءُ استاد نور ھوار اتکگ اِیں ، آئی ءَ راہ ءَ سنگتے ءِ کِرّ ءَ داشتگ ۔گْوشتگ ئے من دو روچ ءَ پد کایاں ، من ءَ مرچی دو روچ بیت آ انگہ تئی کِرّ ءَ سر نہ اِنت ۔سنگت ءَ درائینت ءُ گْوشت نہ یار انگت منی کِر ءَ سر نہ اِنت ، بلکیں نوکی کیت پہ وشی ۔

بس تئی ودار برجاہ اَت ءُ ھمے وڑ ءَ روچ روان اِت اَنت کہ یک ھپتگ ءِ گْوست ، نہ تو درا بوت ئے ءُ نہ تئی ھال آتک ۔ من پد ءَ سنگت ءَ را پون کُرت ءُ جُست گِپت یار تو استاد نور ءِ ھالاں بِہ دے ؟ آئی ءَ کندت ءُ گْوشت اے مرد تنیگا گار اِنت ۔ من ءُ سنگت ءَ ٹیٹ کند اِت ھاھاھاھا۔۔۔ءُ تئی بڈّ ءَ کپت اِیں ۔ پد ءَ سنگت ءَ گْوشت نہ یار من ءُ تو مُپت ءَ اے گریبیں مرد ءِ بڈّ ءَ کپتگ ایں، بلے من یک سنگتے ءَ جُست کُت سنگت ءَ گوشت استاد نور ءَ زلوری کارے ءَ گپتگ شُت ءَ دگہ نیمگے ءَ ۔ من گْوشت ھیر ھیر ما سلامت بِہ بہ اِیں الّم دُچار کپ اِیں ۔سنگت ءَ گْوشت جی ھو اول وشی ءُ سلامتی ۔ مردم زندگ بہ بیت گندگ الّم بیت ۔

ھمے وڑ ءَ اے کوڑھیں امروز ءِ روچ روان اِت اَنت وھد دیم ءَ جنزاں اَت ، من سُھب ءِ سر ءَ چہ واب ءَ پاد آتک آں ءُ دیم شُشت ، وتی گوانکو ( موبائل ) پچ کُرت ءُ کلوھاں چارگ ءَ ت آں ءُ رند ءَ اسٹیٹسانی چارگ ءَ دلگوش بوت آں کہ یک سنگتے ءَ اسٹیٹس کُرتگ اَت ۔
اُف گلستان میں بہاروں کا قضا ہوجانا
ہائے راستے میں ہی یاروں کا جُدا ہوجانا

گوں اے لبزانی وانگ ءَ منی زبان ءَ ھمے در اَتک اُپ یار اے کے بوت باریں ۔ من گوں ھمے گپ ءَ ھوار سنگت ءَ را پونے جت ءُ جُست کُت ھالاں بِہ دے تو ناھیریں اسٹیٹسے کُرتگ زان ءَ کَے شھید بوتگ ؟ سنگت ءَ گْوشت ھو یار اِش کنگ ءَ زامُران ءَ جنگے بوتگ ءُ سَے سنگت ءِ شھید بُوَگ ءِ ھال اِنت ،بلے نام پکّا نہ اَنت۔ زانگ بُوَگ ءَ نہ اَنت ، من گْوشت اگاں ترا ھالے رست من ءَ سرپد بکن گوں ، سنگت ءَ گْوشت شر اِنت من رُکست کُت ۔

دمانے ءَ پد سنگت ءَ منی سر ءَ سَے لاش ءِ اکس دیم دات ۔ من چار اِت ، بلے تئی لاش ءِ اکس دُرست نہ کُرت ۔ من پد ءَ سنگت ءَ را پون کُت ءُ گْوشت ھال کن اے سنگت کَے کَے اَنت ۔ سنگت ءَ گْوشت یک سنگتے اُستاد نور اِنت ، آ دوئیں سنگت چاکر جان ءُ آسمی بلوچ اَنت ۔ گوں اے گپ ءِ اِش کنگ ءَ من ھما ترانگ ءَ کپت آں چہ تو موکل کنگ ءِ وھد ءَ تو ھمے گْوشت ، دست نہ گراں بس ھواراں سنگت ۔ تئی گندگ ءِ ودار انگت منی دل ءَ برجاہ اِنت کہ الّم دچار کپ اِیں ۔ اُستاد نور من اے وھدی کہ ھمے لبزاں نبشتہ کنگ آں، منی ھیال ءَ تو منی چمّانی دیم ءَ اُوشتوک ءُ من ترا گْوشگ ءَ آں، ھواراں سنگت۔۔۔۔ھواراں سنگت۔۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔