TBP Balochi

تربت ءَ ناشناسیں سلاہ بندیں مردمانی تیرگواری ءَ چہ دو مردم بیران بوتگ ءُ ارش کنوکاں یک گاڑی یے ھم ویلجاہ ءَ مانداشتگ-

پولیس ءِ رد ءَ اے وئیل یک شمبے ءِ بیگاہ ءَ سنگانی سر ءَ بوتگ کہ اود ءَ ناشناسیں سلاہ بندیں مردماں منیر مبارکی نامیں مردمے ءِ مھمان جاہ ءَ اتکگ ءُ تیر گواری کتگ ۔ اُرش ءِ آسر ءَ مصیب ء حاجی حاصل ءُ مستی خان ء منیر مبارکی ھما جاہ ءَ بیران بوتگ اَنت۔

چمدیستگیں مردمانی رد ءَ اُرش کنوکاں تیرگواری ءَ پد مھمان جاہ ءِ دیم ءَ اوشتاتگیں گاڑی مانداشتگ ءُ پشت مانداتگ ءُ شتگ انت-

پولیس ءِ بنشون ءَ گشتگ کہ دوئیں لاش پہ اژدری چار ءُ ٹپاس ءَ نادراھجاہ ءَ سر کنگ بوتگ انت۔

دمگی مردمانی رد ءَ بیران بوتگیں مردمانی سیادی گوں سرکاری کمک ءَ بوتگیں سلاہ بندیں گل ڈیتھ اسکواڈ ءَ بوتگ۔

بلے انگت ءَ اے ویل ءِ زمہ واری کس ءَ نہ زرتگ۔

زانگ بہ بیت ڈیتھ اسکواڈ بلوچستان ءِ بازیں جاھاں پرکار انت ءُ اود ءَ بلوچ ورنایاں آوار جنگ ءِ ھواری ءَ آیاں نشانگ کنگ ءُ لوگانی سر ءَ بمب اُرشاں ھوار انت-

دمگی مردمانی گوشگ انت گوستگیں روچ ءَ ڈیتھ سکواڈ ءِ کارندھاں مند ءُ تمپ ءَ تیرگواری کتگ ءُ یکیں روچ ءَ سَے ورنا مرگ ءِ ارجان کتگ انت ءُ چریشی ءَ پد دمگ ءَ مھلوک ءِ برانز ءُ زھر گیش بوتگ انت-

بلوچستان ءَ سیاسی مردمانی گوشگ انت کہ بلوچستان ءِ بازیں جاھاں سرکار ءِ چیریں ادارھاں ڈیتھ اسکواڈ ءَ را مھار گٹ ءَ داتگ انت ءُ چریشی ءِ آسر ءَ مھلوک وتی زندگی ءَ مھپوز نہ انت-

بلوچستان ءَ پاکستانی پوج یکشل ءَ اُرشانی دیمپان انت کہ اود ءَ بلوچستان ءِ آجوئی ءِ واستا جد ءُ جھد کنوکیں سلاہ بندیں گلانی نیمگ ءَ ھمک روچیگیں بنیاد ءَ پوج، آئی ءِ چیک پوسٹ، آئی ءَ ھواریں مردم نشانگ کنگ بوگ ءَ انت-

اھولانی رد ءَ بلوچستان ءِ دمگ کلات ءَ پاکستانی پورسز ءِ یک پوسٹے سلاہ بندیں مردمانی نشانگ جوڑ کتگ-

ھالانی رد ءَ گوستگیں روچ ءَ کلات ءِ دمگ مورگند ءَ پورسز ءِ بنجل ءِ سر ءَ سلاہ بندیں مردماں اُرش کتگ ءُ اود ءَ بازیں وھدے ءَ تیرگواری ءُ تراکانی توار اشکنگ بیتگ انت-

واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

کلات ءَ ھوار دگہ جاھاں ھم بلوچ سلاہ بندیں گل پرکار انت ءُ اود ءَ پاکستانی پوج ءِ سر ءَ اُرشانی ھال یکشل ءَ پیداک انت-

اے ماہ ءِ بندات ءَ پاکستانی لشکر ءَ بلوچستان ءَ ٹوھیں اُرشانی دیمپانی کنگ کپگ انت-

دو روچ پیسر بلوچ لبریشن آرمی ءَ پاکستانی پوج ءِ پرپٹ سواریں دو کارندہ کُشتگ ءُ آیانی سلاہ گوں وت برتگ انت، وھدے کہ زمران ءَ بلوچ لبریشن آرمی ءَ آئی ای ڈی ءِ اُرش ءَ فورسز ءِ گاڑی نشانگ جوڑ کتگ ءُ ھپت کارمند بیران ءُ چار ٹپیگ بوتگ اَنت۔

ھمے پیم ءَ بلوچستان لبریشن فرنٹ ءَ جھاؤ ءَ آئی ای ڈی ءِ اُرش ءَ پورسز ءِ دو کارندہ کشتگ اَنت۔

بلوچستان ءُ پاکستان ءِ آ دگہ شھراں بلوچ ورنا ءَ نودربرانی زورانسری آوار جنی ءِ درچ یکشل ءَ برجاہ ءَ اِنت ھمکروچ زورانسری بیگواھی ءِ کیس نکش بیگ ءَ اَنت ءُ دومی نیمگ ءَ ریاستی پلامرزی ءَ کار کنوکیں ڈیتھ اسکواڈ ءِ کارندھانی بے میاریں مردمانی کوش ءِ تہ ءَ گیشی اَتکگ ءُ اے ریاستی زُلم ءُ زوراکی ءِ ھلاپ ءَ بلوچ یکجھتی کمیٹی ءَ ھر وھد ءَ توار چست کتگ ءُ انگت توار چست کنگ ءَ اِنت ھمشی ءِ پُشدر ءَ ریاستی ادارھاں بی وائی سی ءِ سروک گپتگ ءُ بندیگ کتگ اَنت دانکہ مردم زوراکی ءِ ھلاپ ءَ توار چست مہ کن اَنت ءُ ما وتی زوراکی ءَ گیش بہ کن ایں-

ھمے وڑ مروچی اسلام آباد ءَ بندیگ بی وائی سی سروکانی ءُ بیگواھیں مردمانی کھول ءِ زھرشانی نندانک ءَ پنجاہ سے روچ سرجم بوتگ –

اے زھرشانی نندانک ءِ میان ءَ ریاستی ادارھانی نیمگ ءَ بیھار ءُ تُرسینگ، تُرندیں ھور ءَ اَبید کھولاں وتی نندانک برجاہ داشتگ اَنت-

زھرشانی نندانک ءَ نشتگیں کھولانی لوٹ ھمش اَنت کہ بی وائی سی بندیگ سروک ءُ بیگواہ کنگ بیتگیں مردم یل کنگ بہ بنت ءُ زورانسری آوار جنی بند کنگ بہ بیت ءُ دروگیں میڑاں بیگواھیں مردمانی کُشگ بند بہ بیت –

بلے تنی وھدے ھچ وڑیں سرکاری واکدار آیانی گور ءَ نیتکگ ءُ آیانی لوٹاں بہ منّ اَنت-

ھمے وڑ کراچی پریس کلب ءِ ڈن ءَ زھرشانی نندانک ءَ مروچی سی ءُ سیمی روچ ءَ ھم برجاہ اِنت اے زھرشانی نندانک ءَ بیگواھیں زاھد علی ءِ پت اعبدالحمید ءَ اَبید دگہ بازیں کھول ھوار اِنت –

کھولانی گوشگ اِنت اگاں مئے دوستانکاں چُشیں درکانودی کارے کتگ گُڑا آیاں آمیدگس ءَ پیش بہ کن اِت اگاں آ بے میار اَنت آیاں یل بہ کن اِت چو مارا درد ءُ گمانی تہ ءَ مکن اِت-

آیانی گوشگ اِنت مئے ورنایانی بیگواہ ءَ کنگ پد ما سک دلسیاھیں ءُ ما مالی جاوراں سک نگیگ اِنت پرچاکہ ھمے ورنا کہ شما برتگ اَنت اے مئے لاپ دیوک بوتگ اَنت-

زھرشانی ءَ نشتگیں کھولاں چہ ملیر ءِ جھمنند بیگواھیں میر بالاچ ءَ چہ لیاری کلری ءَ بابا پلین یل کنگ بیتگ ءُ وتی لوگ ءَ سر بوتگ اَنت ءُ اشانی بیگواھیں صادق ھم آجو بیتگ اَنت زھرشانی نندانک ءَ نشتگیں کھولانی تہ ءَ یک اُمیتے ودی بوتگ کہ آیانی اے ورنایانی یل بیگ پہ مارا یک وشیں گپے ما ھمے اُمیت ءَ کن ایں کہ مئے مردم یل کنگ بنت-

دومی نیمگ ءَ بی وائی سی ءِ سروک مروچی شش ستمبر ءَ آمیدگس ءَ آرگ بیتگ اَنت بلے اے میان ءَ آیانی وکیل ءُ کھول ءِ بید ھال دیگ ءَ بندیگجاہ ءِ واکدار ءَ دگہ پنچ روچ ءِ ریمانڈ داتگ اَنت-

کھول ءِ رِد ءَ بلوچ یکجھتی کمیٹی ءِ رھشون ڈاکٹر ماہ رنگ بلوچ، بیبو بلوچ، گلزادی، بیبگر زھری ءُ شاہ جی صبغت اللہ زی پیش کنگی بیتگ اَنت بلے مروچی چیراندری بید کھول ءُ وکیلانی ھال دیگ ءَ آمیدگس ءَ پنچ روچ ریمانڈ زرتگ اے میان ءَ شھر انٹرنیٹ سروس ھم بند کتگ-

ڈاکٹر ماہ رنگ بلوچ ءِ گْھار نادیہ بلوچ ءَ گوشتگ اے گامگیج بے راھبندی یے پرچاکہ راھبند ءِ آرٹیکل A-10 شھریاں مناسبیں ٹرائل ءں ھک ءِ زمانت دنت ءُ آرٹیکل 10 بے سبب ءِ دزگیری ءُ بندیگ کنگ ءِ ھلاپ ءَ پھازی دنت-

بلوچ یکجھتی کمیٹی ءَ آمیدگسی کاروائی ءِ پشدر ءَ گوشتگ کہ اے ھیرانگی گپے کہ اے چیراندری آمیدگسی کاروائی شش ستمبر ( یوم دفاع) ءِ روچ ءَ کنگ بیتگ وھدے سرجمیں ملک ءَ موکل بیتگ ءُ ھچ وکیل آمیدگس ءَ ساڑی نہ بیتگ اَنت-

بی وائی سی ءَ اے جاور ھال سر ءَ تُرندیں دلپدردی درشان کنان ءَ گوشتگ کہ ماہ رنگ بلوچ ءُ دگہ رھشونانی سر ءَ دروگیں ایف آئی آر جوڑ کنگ آیاں نشانگ کنگ ءَ اَنت-

دومی نیمگ ءَ تھکاری وزیر طلال چوھدری ءَ گوشتگ کہ زھرشانی ءِ نام سر ءَ سیاسی مول ءُ مرادانی سرجم کنگ ءَ موکل ندے ایں ءُ اے درگت ءَ ھکومت ھچ وڑیں نرمی نہ کنت-

گوستگیں روچ ءَ راجی اسمبلی ءِ دیوان ءَ وتی ھیالانی درشان کنان ءَ طلال چوھدری ءَ گوشتگ کہ چہ بلوچستان ءَ سیادی داروکیں مردم اسلام آباد پریس کلب ءِ ڈن ءَ زھرشانی کنگ ءَ اَنت چریشی ءِ سبب ءَ پولی کلینک ءَ چہ پریس کلب تاں یک نیمگے دگ بند کنگ کپتگ-

آئی ءَ ٹاہ داتگ کہ ھکومت واھگدار اِیت کہ زھرشانی کنوکاں گوں گپ دیوان بکنت، بلے زھرشانی کنوک ھچ کس ءَ گپ کنگ ءَ جاڑیگ نہ اَنت-

آئی ءِ رِد ءَ ھکومت جتاجتائیں دروشماں چہ انسانی ھکانی رھشوناں گوں ھال کنگ ءِ جُھد ءَ اَنت بلے ھچ وڑیں گامگیج نہ بیتگ-

طلال چودری ءَ گوشتگ کہ زھرشانی کنوکانی لھتے انچیں لوٹ اَنت کہ ھکومت ءِ دائرہ تہ ءَ نیا اَنت ءُ دیمتر ءَ گوشتگ بیگواھیں مردمانی کمیشن اے جیڑہ ءِ سر ءَ کار کنگ اِنت ءُ ھکومت ھم بیگواھیں مردماں چہ ھمگرنچ ءَ گپ کنگ ءَ جاڑیگ اِنت-

کیچ ءِ دمگ مند ءَ ناشناسیں مردمانی تیرگواری ءَ یک مردمے بیران بیتگ – اے ویل مند ءَ مروچی دومی ویل انت کہ پیش آیگ ءَ انت-

دمگی اھوالانی رد ءَ مند کوہ ڈگار ءَ سرکاری پلامرزی ءِ ھستیں ٹولی ءِ تیرگواری ءَ ملا بھرام ء غفور بیران بیتگ-

زانگ بہ بیت ایشی ءَ پیش مند سورو بازار ءَ یک دکانے ءِ سر ءَ تیرگواری ءَ اظھات ء ملا مجیب بیران بیتگ ات-

دمگی مردمانی گوشگ انت کہ ھردوکیں ویلاں سرکاری پلامرزی ءَ ھستین ٹولی کہ لس نام ءَ ڈیتھ اسکواڈ ھوار انت-

زانگ بہ بیت بلوچستان ءِ جتاجتائیں دمگ پنجگور ، تربت، بلیدہ، تمپ، گوادر، دگہ بازیں دمگاں بلوچ ورنا ڈیتھ اسکواڈ ءِ کارندھانی دست ءَ تیرگواری ءِ نشانگ کنگ ءُ کُشگ بیتگ ءُ زورانسری آوار جنگ ءَ پد آیانی تیرسُپتگیں لاش دور داتگ-

دومی نیمگ ءَ بلوچ آجوئی لوٹوکیں سیاسی پارٹی ءُ انسانی ھکانی گلانی بھتام اِنت کہ ڈیتھ اسکواڈ ٹولیاں پاکستانی پوج ءُ آئی ایس آئی ءِ پلامرزی گون اِنت کہ آ بلوچ ورنایانی تیرانی آماچ کنگ ءُ زورانسری آوار جنگ تیرسُپتگیں لاشانی دور دیگ، منشاپ پروشی، دگہ چاگردی سلّکاریاں ھوار اَنت-

بلوچستان ءَ ریاستی پلامرزی ءِ کارکنوکیں ڈیتھ اسکواڈ ءِ کارندہ بے لگام سال ءِ بندات بگر تاں انّو دو درزن ءَ گیش ڈیتھ اسکواڈ ءِ کارندھانی دست ءَ ورنا کُشگ بیتگ اَنت-

بلوچستان ءِ جتاجتائیں دمگ پنجگور ، تربت، بلیدہ، تمپ، گوادر، دگہ بازیں دمگاں ڈیتھ اسکواڈ ءِ کارندھانی دست ءَ تیرگواری ءِ نشانگ کنگ کُشگ بیتگ ءُ زورانسری آوار جنگ ءَ پد آیانی تیرسُپتگیں لاش دور داتگ-

دومی نیمگ ءَ بلوچ آجوئی لوٹوکیں سیاسی پارٹی ءُ انسانی ھکانی گلانی بھتام اِنت کہ ڈیتھ اسکواڈ ٹولیاں پاکستانی پوج ءُ آئی ایس آئی ءِ پلامرزی گون اِنت کہ آ بلوچ ورنایانی تیرانی آماچ کنگ ءُ زورانسری آوار جنگ تیرسُپتگیں لاشانی دور دیگ، منشاپ پروشی، دگہ چاگردی سلّکاریاں ھوار اَنت-

ھمے وڑ مروچی کیچ ءِ تھسیل مند ءَ تیرگواری ءِ وئیل ءَ یک ورنایے بیران بیتگ-

دمگی اِھوالکار ءِ رِد ءَ سورو بازار ءَ بیتگ اود ءَ سلاہ بندیں مردماں یک دکانے ءِ سر ءَ تیرگواری کتگ- اے اُرش ءَ اظھار بلوچ ء ملا مجیب جاہ پہ جاھی بیران بیتگ- اُرشکاراں تیرگواری ءَ پد تتکگ اَنت وھدے کہ وئیل ءِ سبب تنی وھدے دیم ءَ نیتکگ-

دمگی رپورٹس رِد ءَ کشگ بیتگین ءِ سر ءَ اُرش بھتام انچیں ٹولی ءِ سر ءَ جنگ بیگ ءَ اِنت کہ آ ڈیتھ اسکواڈ ءِ نام ءَ زانگ بیت-

یزد ءَ بندیگ جاہ ءَ بلوچ ورنایے دِل ءَ گپتگ ءُ بیران بیتگ ، چھبار ءَ بلوچ ورنایے آوار جنگ ءَ پد کُشگ بیتگ۔

یزد ءَ ایرانی لشکر ءَ پرھاد ء ھُدارَھم ، پیشیگیں ھپتگ ءَ دزگیر کرتگ ءُ زندان ءَ بُرتگ ، یک ھپتگے ءَ بندیگ بوگ ءَ پد پرھاد دِل ءَ گپتگ ءُ نادراہ جاہ برگ ءَ پد بیران بیتگ ۔

اھوالانی رد ءَ پرھاد یزد ءِ دمگ ابر کوہ جھمنند گوشگ بوگ ءَ انت ءُ شھر ءَ وتی سنگت ءِ ھمراھی ءَ پرپٹ ءِ گون ءَ تر ءُ گرد ءَ بوتگ کہ لشکر ءَ پرپٹ دزی ءِ بھتام ءَ دزگیر کرتگ ۔

بیرانی ءَ پد پرھاد ءِ ماس زندان ءَ شتگ ءُ زھرشانی یے کُرتگ ءُ
پرھاد ءِ لاش پہ ھُژدری چار ٹپاس ءَ نادراہ جاہ ایر اِنت-

ھمے وڑ چھبار ءِ دمگ جنگارک ءَ بلوچ ورنایے آوار جنگ ءَ پَد کُشگ بیتگ-

چھبار ءِ دمگ جنگارک ءَ پَرندوشی پجار نہ بوتگیں سلاہ بندیں مردماں “ امان ء امام بَکش جنگارکی “ گاڑی گوماں ٹکر جنگ ءَ پد آوار جتگ ءُ گوں وت برتگ کہ دومی روچ ءَ آئی ءِ تیر سُپتگیں لاش دزکپتگ-

کوش ءِ سبب تنی وھدی زانگ نہ بیتگ –

زانگ بہ بیت روکپتی بلوچستان ءَ اے دابیں ویل ھمک وھد ءَ پیش آیگ ءَ انت ءُ ایشانی گر ءُ دار کنگ ءَ سرکار یکدم بے سوبی ءَ گندگ بیت انت-

بلوچستان ءِ جتاجتائیں دمگاں پاکستانی پوج ءُ آئی ءِ شریکداراں جانی تاوانانی دیمپانی کنگ کپگ ءَ اِنت –

ھمے وڑ مروچی ءَ مند ءَ بیتگیں اُرش زمہ واری بلوچ آجوئی لوٹوکیں گل بلوچ لبریشن آرمی ءَ منّ اِتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ مئے سرمچاراں مند ءَ زورگریں پاکستانی پوج ءِ کارندہ نشانگ کتگ ءُ جانی تاوان ءِ دیمپان کتگ اَنت – سرمچاراں شال، کلات ءُ مستونگ ءَ زورگریں پوج ءُ آئی ءِ کمکاری ءَ ھوار ٹرانسپورٹ شرکت ھم سے جتاجتائیں کاروائیاں نشانگ کتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں مرچی مند ءِ دمگ کوہ پشت گیاب ءَ زورگریں پاکستانی پوج ءِ دو کارندہ ھما وھد ءَ اُرش ءِ نشانگ کتگ ءُ کُشتگ انت وھدیکہ آ پرپٹ ءِ سر ءَ گشت کنگ ءَ بیتگ اَنت ۔ سرمچاراں زورگریں پاکستانی پوج ءِ دوئیں کارندہ سپاھی جمیل احمد ءُ عزیز اللّہ کُشتگ اَنت ءُ آیانی سلاہ دستیگ کتگ اَنت ۔

جارکش ءَ گوشتگ کہ بی ایل اے ءِ سرمچاراں گوستگیں شپ ءَ نیو سریاب تھانہ گوں دستی بمب اُرش ءَ نشانگ کتگ ، چہ اُرش ءِ آسر ءَ زورگریں پاکستانی پولیس ءَ جانی ءُ مالی تاوان رستگ۔

جارکش ءَ گوشتگ کہ سرمچاراں پانزدہ اگست ءَ کلات ءِ ھند منگچر ءِ دمگ چوٹانک ءَ زورگریں پاکستانی پوج ءِ پرپٹ ءُ گاڑیاں سواریں کاروان اُرش ءِ نشانگ کتگ اَنت چہ اُرش ءِ آسر ءَ زورگریں پاکستانی پوج ءَ تاوان رستگ۔

جارکش ءَ گوشتگ کہ بلوچ لبریشن آرمی ءِ سرمچاراں سیزدہ اگست ءَ مستونگ ءِ ھند مروکنڈ ءَ زورگریں پاکستانی پوج ءِ کمکاری ءَ ھواریں ٹرانسپورٹ شرکت ءِ کارگس سوتکگ ۔ اے ٹرانسپورٹ شرکت پہ زورگریں پاکستانی پوج ءَ راشن ءُ دگہ سامان سر کنگ ءَ گون بیتگ چہ اشی ءَ پیسر ھم اے شرکت ءِ واھنند ما کُڈن کتگ بیتگ ۔

جارکش ءَ گُڈی ءَ گوشتگ کہ بلوچ لبریشن آرمی اے اُرشانی زمہ واریاں منّ اِیت ۔

بلوچستان ءَ اَبید اسلام آباد ءُ کراچی ءَ بندیگیں بی وائی سی ءِ رھشون ءُ بیگواھیں مردمانی کھولانی زھرشانی نندانک یکشل ءَ برجاہ ءَ اَنت-

زانگ بہ بیت بلوچستان ءَ چُشیں روچے نہ اِنت کہ پاکستانی پوج ءُ چیریں ادارھانی نیمگ ءَ زوراکی کنگ نہ بیت ھمکروچ مردمانی آوار جنگ میتگاں بیڑبرگ ءُ میتگاں ساڑی کماش ءُ چُک زالبولانی کم شرپ کنگ ءُ لوگانی گرنبھائیں مڈیانی لُٹ ءُ پُل برجاہ اِنت اے ریاستی زوراکیانی ھلاپ ءَ بی وائی سی ءِ نیمگ ءَ وھد وھد ءِ سر ءَ زھرشانی نندانک ءُ روانک کشگ بیت بلے ریاست وتی چیر دیگ ھاتر ءَ بی وائی سی ءِ سروک جتاجتائیں وھداں گپتگ ءُ بندیگ کتگ اَنت پنچ ماہ ءَ گیش اِنت کہ یکو ریمانڈ پہ ریمانڈ دیگ بیگ ءَ اَنت دانکہ آیانی توار ءَ بے توار بہ کن ایں-

ھمے وڑ مروچی کیچ ءِ دمگ ناصرآباد ءِ جھمننداں پاکستانی پوج ءِ نیمگ ءَ چہ لوگانی سر ءَ بیڑ، مردمانی سر ءَ لَٹ ءُ کُٹ ءُ زورانسری آوار جنی ءِ ھلاپ ءَ نندانک داتگ-

گیشیں ھالانی رِد ءَ تربت ءِ دمگ ناصرآباد ءَ پاکستانی پوج ءَ بیڑبرتگ ءُ زورانسری آوار جنی ءِ ھلاپ ءَ دمگی مردماں زھرشانی نندانک، زالبول ءُ چُکانی مزنیں کچے ءَ زبیدہ جلال دگ سر ءَ نندانک داتگ ءُ بُنجاھی شھدگ بند کتگ چریشی ءِ سبب ءَ گاڑیانی روگ ءُ آیگ بند بیتگ-

دمگ مردمانی رِد ءَ گوستگیں شپ ءَ پوج ءَ ناصرآباد ءَ بازیں لوگانی سر ءَ بیڑبرتگ، اے میان ءَ پاکستانی پوج ءَ بازیں ورنایے آوار جتگ ءُ ناشناسیں جاھے ءَ برتگ اَنت-

زھرشانی کنوکانی گوشگ اِنت کہ دزگیریں ورنایانی کھولاں ھچ وڑیں ھال دیگ نہ بیتگ اَنت نانکہ آ دیم ءَ آرگ بیتگ اَنت-

زھرشانی ءَ ھوار زالبولاں بھتام جتگ کہ بیڑ ءِ وھد ءَ لوگاں تُرس ءُ بیم ودی کتگ، مردماں گوں بے ادبی کتگ ءُ کھول سسّائی ازیت داتگ ءُ لَٹ ءُ کُٹانی نشانگ کتگ اَنت-

زھرشانی کنوکاں جار جتگ کہ دانکہ دزگیریں مردم یل کنگ نہ بنت، زھرشانی نندانک برجاہ بیت-

اے میان ءَ زھرشانی کنوکانی دست ءَ پلے کارڈز بیتگ اَنت کہ آیانی سر ءَ بیگواھیں مردمانی یل کنائینگ ءُ بیڑانی درچ ءِ بند لوٹ نکش بیتگ اَنت-

ھمے وڑ اسلام آباد پریس کلب ءِ نزیک ءَ بلوچ یکجھتی کمیٹی ءِ سروکانی دزگیری ءُ چہ بلوچستان ءَ زورانسری آوار جنگ بیتگیں مردمانی یل کنائینگ ءِ لوٹ سر ءَ برجاھیں نندانک ءَ مروچی پنجاہ دو روچ سرجم بیتگ-

نندانک ءَ ھوار زھرشانی کنوکانی سیادی زورانسری آوار جنگ بیتگیں مردمانی کھول ءَ اِنت، آیانی تہ ءَ کماش زالبول مات ءُ چُک ھم ھوار اَنت-

کھول ءَ ھکومت ءَ چہ لوٹ کتگ کہ بلوچ یکجھتی کمیٹی ءِ دزگیریں سروک یل کنگ بہ بنت ءُ بلوچستان ءَ زورانسری آوار جنی ءِ دْرچ بند کنگ بہ بیت زورانسری بیگواھیں مردم دیم ءَ آرگ بہ بنت-

اسلام آباد نندانک ءِ درگت ءَ چہ بلوچ یکجھتی کمیٹی ءَ وتی درشان ءِ تہ ءَ گوشتگ کہ کس اس دو ماہ چہ اے کھول تُرندیں گرم، ھور، تُرسینگ ءُ یکشل ءَ نگرانی ءَ اَبید وتی ھکیں ءُ سادھیں لوٹانی ھمراھی ءَ نندانک ءَ نشتگ اَنت-

درشان ءِ تہ ءَ دیمتر ءَ گوشگ بیتگ کہ دراجکشیں زھرشانی ءَ اَبید پاکستانی واکدار بلوچ کھول ءِ پریس کلب ءَ تاں روگ بند کتگ ءُ آیاں نندانک واستا بُنجل ءِ موکل دیگ بیگ ءَ نہ اِنت ءُ زھرشانی کنوکاں زور ءُ بیھار ءِ دیمپانی اِنت بلے آیانی لوٹانی سر ءَ دلگوش گور کنگ نہ بیگ ءَ اِنت-

دومی نیمگ ءَ کراچی پریس کلب ءِ دیم ءَ ھم زورانسری آوار جنی ءِ نشانگ بیتگیں نودربر زاھد علی ءُ دگرانی یل کنائینگ ءِ ھاتر ءَ سی دومی روچ ءَ پُترتگ-

نندانک ءَ ھوار کھولانی رِد ءَ لھتے روچ ءَ ساری واکدار ءَ دلجمی داتگ کہ آیانی دوستناکانی درگت ءَ سرپدی دیگ بیت بلے تنی وھدے ھچ وڑیں گامگیج زیرگ نہ بیتگ-

اسلام آباد ءُ کراچی ءِ نندانکاں ھوار بلوچ کھولاں ھکومت ءُ پاکستانی رسانکدر ایر جتگ ءُ گوشتگ کہ آ بلوچستان ءَ برجاہ زوراکی سر ءَ بے توار اَنت ءُ دراجکشیں زھرشانی ءَ اَبید آیانی لوٹ دلگوش گور کنگ بیگ ءَ نہ اَنت کہ انسانی ءُ شھری ھکانی سنگین ءِ ھلاپ ورزی اِنت-

زھرشانی کنوکاں انسانی ھکانی ادارہ ءُ میان استمانی گلاں چہ دزبندی کتگ کہ آ بلوچستان ءَ برجاہ ریاستی زوراکی ءِ سر ءَ گامگیج بزور اَنت ءُ پاکستان سر ءَ زور بدے اَنت کہ آ زورانسری بیگواھیں مردمانی یل کنائینگ ءِ دلجمی بدے اَنت-

آزمانک : پاد ءَ انگت سُھب ءَ دو منٹ ھست

نبشتہ کار: سنگت نورک

دی بلوچستان پوسٹ

ھمے کہ منی سر ءَ آزمان بہ کپ اِیت یا چہ زمین جُمبے ءَ زمین بہ ترکّ اِیت ءُ من ترکّے ءَ کپگ ءَ بہ باں سرجمیں جان جھل ءَ ءُ تھنا یک دستے ماں ترکّے ءَ اڑوک بلکیں من وتی زِند ءِ گُڈّی سیمسراں بہ باں بلے ھمے دمان ءَ تو بیا ئے ءُ منی دست ءَ بہ گِر ئے ءُ من ءَ چِکّان بہ کن ئے ءُ وتی نوکتریں آزمانک “ پاد ءَ انگت سُھب ءَ دو منٹ ھست ” ءِ تہ ءَ دور بہ دے ئے ۔۔۔ ھو تو انچوش کُرت ۔ بلے نو من ( بزاں تئی آزمانک ءِ وساچیں کارست ) اے تھاری ءَ پہ تئی آزمانک ءَ چونیں کردے پیلو کرت بہ کناں ۔

تو ، زان ئے من ءَ بہ اشتیں کہ ھمے ترکانی میان ءَ وتی زند ءِ گُڈّی ساھت گوں ھاموشی ءَ بہ گوازینتیناں بلے پد ءَ جیڑاں تئی آزمانک ءِ دوئیں منٹ بے من بوت کنت ناسرجم بہ بان ءُ بھ سُھب مئیت ۔ چو وَ شر نہ اِنت گند ئے پہ دو منٹ ءَ تئی سُھب بہ اوشت اِیت ۔

نو۔۔۔تو بہ گُش پہ تئی آزمانک ءَ ھمے دوئیں منٹاں چتو بہ گوازیناں اگاں اے میان ءَ منی جند کسھے جوڑ بوت گڑا ؟

ھمے دمان ءَ جیڑ اِت گند ئے اگاں من ھمے دیوال ءِ دیم ءِ ٹنگ اتگیں بابو نوروز ءِ ھمے اکس کہ پاھو ءِ گُٹ ءَ اِنت ، ھمے اکس ءَ ایر بہ کنان ءُ بہ زوران ئِے ءُ وتی دپ ءَ سیاھیں پُچّے بہ بنداں پد ءَ۔۔۔ بابو ءِ اکس گوں دوئیں دستاں مُھر داشتگ ءُ دپ ءَ سیاھیں پُچے بستگ بی ایم سی شال ءِ مین گیٹ ءِ دپ ءَ نشتگاں بہ گند ئے درامدے بئیت من ءَ بابو ءِ کسھاں جُست بہ کنت ءُ دوئیں منٹاں بہ گوازین اِیت ۔ بلے دو منٹ ءَ پیسر اگاں پولیس والایے ءَ من ءَ بُرت گڑا پد ءَ تئی دوئیں منٹ ناسرجم بنت گڑا پد ءَ بلکیں تئی آزمانک ھوادگ ھوادگ بہ بیت ۔

من جیڑگ ءَ اتان ءُ پہ تئی آزمانک ءِ دوئیں منٹانی گوازینگ ءِ واستا وڑ وڑیں کسہ سازگ ءَ اتاں تا سما کرت ، من مستانی ءِ ریک ءِ سر ءَ نیم بار گپتگان ءُ ایر آں ، دوئیں منٹانی کانٹہ روان اِنت سِکن کم بوان اَنت ۔ منی کپّے زاھر اِنت ءُ کپّے بار گپتگ بلے زان ئے منی چپّیں نیمگ زاھر اِنت ءُ چپّیں دست ءِ پنجگ ءَ زَھمے بلے سُھر سُھر اِنت نہ زاناں زھم چہ بازیں ایر بوگ ءَ زنگاں گپتگ یا من ٹوھیں جنگے کُرتگ ءُ ھمے سُھری دُژمن ءِ ھون اَنت کہ انگت تازہ اَنت ۔

اے ساھت ءَ یک منٹے گوستگ ۔ منی چاریں آتراپ ءَ مردم جم بوتگ اَنت ، گوں یکے دومی ءَ ھلوت کنگ ءَ اَنت ۔ بہ گند ئے کُل ترسگ ءَ اَنت ، کس نزیک ءَ نئیت منی زھم ءَ چہ منی پنجگ ءَ نہ کش اِیت ءُ نہ زور اِیت بلے کم چہ کم یکے وَ بئیت منی زھم ءِ زنگاں یا ھوناں ھمیشاں وَ ساپ بہ کنت ۔ بلے! تو زان ئے ، من وت نہ زاناں اے منی آتراپ ءِ مردم ترسگ ءَ اَنت یا ھاموشی چارگ ءُ ودار ءَ اَنت کہ کدی دُژمن ءِ سر ءَ توپان ءُ ھیروپے بئیت ۔۔۔ بلے اے نہ زان اَنت کہ اگاں ایشاں منی سُھریں زَھم وتی چپّیں پنجگ ءَ جاگہ دات گڑا اے وت ھم پہ دژمن ءَ توپان ءُ ھیروپے بنت ۔

اے ساھت ءَ دو منٹ ءَ تھنا سِی سِکن بچ اتگ کُلیں مردم یک پہ یک ءَ چیرُکائی روگ ءَ اَنت کہ کس مارا پجا میار اِیت ۔ اگاں روژنائی بوت ما پجا آرگ بئیں گڑا بلّے توری ما ھاموش بہ بئیں واجہ کیت کُش اِیت یا بارت سانکلاں گوں تھاریں کوٹی یے ءَ دور دنت ۔۔۔ تُرس بلاھیں ھَوپے گِند ئے ۔

اے ساھت ءَ دوئیں منٹ سرجم اَنت ، رُوژنائی ءَ وتی پَرّ نوکی پَچ شانتگ اَنت ءُ من ھم مستانی ءِ ریک ءِ دلبند ءَ سرجم ءَ بار گپتگ ءُ واباں یا بہ گند ئے ھو۔۔۔ من پہ تئی آزمانک ءِ دوئیں منٹاں وساچیں کسھے جوڑ بوتگاں ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

ایمنسٹی انٹرنیشنل ءَ بلوچستان ءَ انٹرنیٹ ءِ بندش ءُ پابندی انسانی ھکانی سنگینین لگتمالی انت-

ایمنسٹی انٹرنیشنل ساؤتھ ایشیا ءَ 6 ستمبر ءَ بلوچستان ءَ موبائل انٹرنیٹ سروسز ءِ بند کنگ ءِ حکومت ءِ پیسلہ ءِ سر ءَ سکا پدردی درشان کتگ ءُ گْوشتگ کہ اے گامگیج نہ ایوک ءَ مردمانی ھک ءِ مالومداری ءُ لبز ءِ آجوئی ءِ سر ءَ اُرش اِنت بلکیں بلوچستان ءَ چہ دگنیا ءَ سندگ ءِ کوشستے۔

ایمنسٹی ءَ گشتگ کہ موبائل انٹرنیٹ بلوچستان ءِ مھلوک ءَ را رھوتی ءِ مستریں در انت ءُ ایشی ءَ یکشل ءَ بند کنگ بنکی ھکانی لگتمالی انت-

بیان ءِ تہ ءَ بلوچستان سرکار ءِ سر ءَ بھتام جنگ بوتگ کہ آ اے پندل ءَ پہ زھرشانی ءِ توار ءِ ایرموش کنگ ءُ راستیانی دیم ءَ چیر دیگ ءَ کارمرد کنگ ءَ اِنت ۔

ایمنسٹی ءَ لوٹ کرتگ کہ بلوچستان ءَ زوت انٹرنیٹ سروسز پچ کنگ بہ بیت ءُ شھریاں چہ آزادی ءِ لبز ءُ گشت ءُ آجوئی ءُ پرامنیں زھرشانی ءِ ھک ءَ چہ زبھر کنگ ءِ چکر ھلاس کنگ بہ بیت۔

زانگ بہ بیت گوستگیں ماہ ءِ اگست ءِ بندات ءَ چہ سرجمیں بلوچستان ءَ موبائل انٹرنیٹ سروس بند کنگ بوتگ انت وھدے کہ اے ماہ ءَ لھتے دمگانی تہ ءَ انٹرنیٹ ءِ پچ بوگ ءَ پد پد ءَ بند کنگ بوتگ۔

اُستانی سرکار ءَ بلوچستان ءَ انٹرنیٹ بند کنگ ءِ پرمان داتگ بلے بلوچستان ھائی کورٹ ءِ انٹرنیٹ ءِ پچکنگ ءِ پیسلہ ءَ ابید ھم استان ءِ گیشتریں دمگاں انگت ءَ انٹرنیٹ ءِ آسراتی ءَ چہ زبھر انت۔

دمگی مردماں شکایت کتگ کہ انٹرنیٹ بند بوھگ ءِ سبب ءَ نودربر سک باز وانگ ءُ زانگ ءِ جیڑھانی آماچ اَنت۔ آ نہ ایوک ءَ آن لائن کلاس، داخلہ فارم، اسکالرشپ ءِ درگواست ءُ وانگ ءُ زانگ ءِ ساماناں چہ زبھر انت بلکیں آ دگہ ھاسیں وانگ ءُ زانگ ءِ کارانی تہ ءَ ھم آڑانکانی آماچ انت۔

ھمے رنگ ءَ لس شھری آن لائن بینکنگ، روزگار ءِ درچ ، انفارمیشن درچ ءُ دگہ ھاسیں روچ ءِ کارانی پیلو کنگ ءَ ھم مشکلانی آماچ انت۔

سرکار ءَ انٹرنیٹ ءِ بند بوگ ءِ سوب بلوچستان ءِ ایمنی ءِ جاور لیک اِتگ، البت سیاسی، چاگردی ءُ انسانی ھکانی پڑاں چہ سرکار ءَ لوٹ کرتگ کہ انٹرنیٹ زوت پچ کنگ بہ کنت۔