TBP Balochi

مولم شناسانی رد ءَ بلوچستان ءِ تیابدپی دمگ ءَ زمین چنڈ ءُ زری توپان ءِ ترس ھست اِنت، مولم شناسنانی رد ءَ زمین چنڈ ءِ وھد زانگ نہ بیت اے لڑ ءَ سونامی ءِ ترس ھست اِنت –

ڈائریکٹر جنرل پاکستان میٹرولوجیکل ڈپارٹمنٹ ءِ گوشگ اِنت مکران ءِ تیابدپی دمگاں زمین چنڈ کجام ھم وھد ءَ اتک کنت اشی ءِ راستیں وھد گوشگ نہ بیت اِنت بلے مکران ءَ سبڈکشن زون ءَ فالٹ لائن ءَ ھمینکس انرجی یکجا بیتگ کجام ھم وھد ءَ زمین چنڈ اتک کنت یک سونامی ءِ آورت کنت-

آئی ءَ گُشتگ کہ سونامی ءِ ترس ھم ھست اِنت ءُ مکران ءِ تیابدپی دمگاں سبڈکشن زون ءَ ھشت یا اشی ءَ گیش زمین چنڈ اتک کنت کہ چریشی ءَ کراچی ءُ بلوچستان ءِ تیابدپی دمگ اسرمند بیت کن اَنت –

زانگ بہ بیت مکران ءِ تیابدپی دمگاں سال نوزدہ سد ءُ چِل ءُ چار ءُ زمین چنڈ ءَ پد سونامی اتکگ بیتگ کہ چریشی ءِ آسرا چار ھزار مردم بیران بیتگ اَنت اے فالٹ لائن ءُ وتی کدرتی وھد ءِ اسکیل سرجم کتگ ءُ مکران ءِ زر ءَ ھستیں سبڈکشن زون یکدم پُر اِنت ترندی ءَ گیش بیگ اِنت چریشی ءِ سبب ءَ اود ءَ کجام ھم وھد ءَ زمین چنڈ اتک کنت ءُ اشی ءِ سبب ءَ سونامی ھم اتک کنت-

ڈائریکٹر جنرل پاکستان میٹرولوجیکل ڈپارٹمنٹ مھمد ریاض ءَ گوشتگ کپ گیشتر سندھ ءُ مکران ءِ تیابدپی دمگ ترس ءِ تہ ءَ اَنت ءُ کجام ھم وھد ءَ اے پُر بوت اَنت گڑا اشی ءِ سبب ءَ تاوانانی گمان کنگ بیت اِنت اے دمگ جتا جتائیں توپان ءُ کھرانی دیمپان اَنت اد ءَ سائیکلون کیت اِنت ترندیں ھور ھم بنت ھنچش کہ انی گوادر ءُ مکران ءَ بیتگ اَنت –

ڈائریکٹر جنرل پاکستان میٹرولوجیکل ڈپارٹمنٹ ءَ گوشتگ کہ اد ءَ ھشت ءَ گیش ترندی زمین چنڈ اتک کنت چریشی ءِ سبب ءَ دَہ یا پانزدہ فٹ ءَ برزیں چول ودی بیت کن اَنت ملیر فالٹ لائن ءَ کسان ءُ میانی جاھاں زمین چنڈ اتک کنت پیسر ءَ اتکگ اَنت انگت دیم ءَ ھم کاینت –

پاکستان میٹرولوجیکل ڈپارٹمنٹ ءِ پژدر ءَ ڈائریکٹر جنرل پاکستان ڈیزسٹر منیجمنٹ اتھارتی سندھ سید سلمان شاہ ءُ گوشتگ مکران ءِ تیابدپی دمگاض دو ٹیکٹونک پلیٹس ھوار بنت ءاپ گوادر ءِ زربار ءَ کساس چِل ناٹیکل مائلز ءِ دوری ءَ آ پوائنٹ اَنت اود ءَ یوریشین ءُ انڈین پلیسٹ ھوار بنت چشکہ سبڈکشن زون گوشگ بنت سبڈکشن زون سر ءُ مانسراں لگ ایت گڑا پلیٹس سُر ایت چریشی ءِ سبب ءَ زمین چنڈ اتک کنت اے اگاں زر ءَ بہ بیت گڑا اشی ءِ آسر زر ءَ کپ اَنت سونامی کیت ءُ اگاں زمین ءَ بہ بیت گڑا تاوان زمین ءَ کاینت –

سبی ءَ اسنائپر گون ءَ یک کارندھے نشانگ کتگ ءُ کشتگ – جیئند بلوچ

بلوچ لبریشن آرمی ءِ جارکش جیئند بلوچ ءَ گْوشتگ کہ مئے سرمچاراں گوستگیں روچ ءَ سبی ءِ دمگ تندوری ءَ پاکستانی پوج ءِ پوسٹ ءَ ساڑی ئیں کارندہ گوں اسنائپر توپک ءَ نشانگ کتگ ءُ چریشی ءِ آسر ءَ کارندہ ھما دمان ءَ مرتگ ءُ آئی ءِ پجّار اسد علی ءِ نام ءَ چہ بوتگ-

جارکش ءَ گوشتگ کہ اے اُرش ءِ زمہ واری ءَ بلوچ لبریشن آرمی منّ اِیت ءُ بلوچ لبریشن آرمی اے اھد ءَ کنت داں بلوچستان ءِ آجوئی ءَ اُرش برجاہ بنت-

سربوتگیں ھالانی رِد ءَ بلوچستان ءِ باپاری شھر ھب چوکی ءُ کراچی نادرن بائی پاس ءَ پولیس ءَ دو مردمانی جون دست کپتگ اَنت –

ریسکیو ءِ کارمنداں جون دست گپتگ ءُ نادراہ جاہ ءَ سرکتگ انت –

ریسکیو بنشون ءِ رِد ءَ جوناں ماھے ءَ گیش اِنت کہ کپتگ انت جونانی پجار تنی وھدی نبوتگ بلے آھانی اُمر بیست ءُ پنچ ءُ سِی سال بیت اِنت –

پولیس ءِ رِد ءَ آھانی جون پٹ ءُ پول کتگ انت بلے آھانی کیسگاں ھم چشیں پجار کاڈ ءُ دگہ چیز دست نہ کپتگ –

نودربرگل بلوچ اسٹودنٹس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ لیاری ءَ لبزانکی ءُ راجکاری ءِ مراگشے ءِ برجم دارگ ءِ جار جتگ ءُ گوشتگ کہ ھمے سال ءِ بیست ءُ سَے جنوری بلوچ اسٹوڈنٹس ایکشن کمیٹی ءِ نیمگ ءَ چہ لیاری ءَ مزنیں لبزانکی ءُ راجکاری مراگشے برجم دارگ بیت اِتنت – کہ آئی ءِ تہ ءَ راجداری، لبزانک ءُ کراچی ءِ جیڑہ ءُ جنجالاں ھوار دگہ بنگپانی سر ءَ بلوچ زانتکار، راجداریں پاٹیانی رھشون ءُ نودربرگلانی اگدو دار ھوار بنت – اشی ءَ ابید مراگش ءَ بلوچستان کتاب کاروان ءِ نام ءَ کتب میلہ ءِ ھم برجم دارگ بیت اِنت ءُ ساز ءُ زیملی مراگشے ھم برجم دارگ بیت اِنت –

آئی ءِ گوشگ ات کہ ھر وڑیں چاگرد ءِ دیمروئی ءَ نودربرانی مزنیں کردے بوتگ کہ نودربر نوکیں سوچ ءُ پگر ءِ رِد ءَ چاگرد ءَ راہ ءَ پیش دارین انت ءُ دومی نیمگ ءَ چاگرد ءِ تہ ءَ دیمروئی لوٹگ ءِ باوست کنگ ءں درچ ءِ بندات کنان آھاں یکجاھی امل ءِ نیمگ ءَ دلگوش کن انت – بلوچ اسٹوڈنس ایکشن کمیٹی بلوچ نودربرانی نمائندگی کنان ءَ بلوچستان ءَ ھوار بلوچ ءِ گیشتریں ھند ءُ دمگاں بازیں مراگش اڈ داتگ اَنت – اے وڑیں مراگش ءُ دیوانانی اڈ دیگ ءِ مول ءُ مراد نودربراں ھوار چاگرد ءِ ھر تک ءُ پھناتاں سیادی داروکیں دیمروئی لوٹوکیں پگر ءَ دیم ءَ برگ ءُ آھانی تہ ءَ راجداری ءُ لبزانکی ءُ زانشتی زانت دیم ءَ برگ انت تانکہ ورنایاں ھوار درسیں تک ءُ پھناتاں سیادی داروکیں مردم یکجاھیں املے بھر بہ بنت –

آئی ءِ گوشگ ات کہ بلوچ اسٹوڈنس ایکشن کمیٹی ءِ نیمگ ءَ شال، ھب چوکی ءُ تونسہ شریف ءَ مراگش اڈ دیگ بوتگ انت ءُ ھمے درچ ءِ برجاہ داران ءَ لیاری ءَ لبزانکی ءُ راج داری ءِ مراگش اڈ دیگ ءِ جار جتگ – اے مراگش ءَ درسیں راجداریں پاٹیاں سیادی داروکیں بلوچ راجداریں رھشون گوشگ بیت کہ آ بلوچ گوستانک ءِ پژدر ءُ ھستیں وھدے راجداری پیچ تاباں ھوار کراچی راجداری درگت ءَ وتی ھیالاں درشان بہ کن انت – بازیں مھلوک ءِ درگت ءَ بلوچانی مستریں شھر کراچی ءَ بلوچاں بازیں جیڑہ جنجالانی دیمپانی انت اے درگت ءَ کراچی ءَ سیادی داروکیں بلوچ ایکٹوسٹ ءُ دگہ راجکاری ءَ چاگردی گلانی رھشون وتی ھیالاں درشان بہ کن انت – بلوچ نودربر راجکاری پینل ڈسکیشن ھم کنگ بیت اتنت کہ گوستگیں نودربر رھشوناں ھوار گل ءِ ھستیں اگدہ دار پینلسٹ دروشم ءَ ھوار بنت –

آئی ءَ گوشتگ کتاب چاگرد چاگرد ءِ دیمروئی مزنیں کردے پلو کن انت بلوچ اسٹوڈنس ایکشن کمیٹی نودربر گل ءِ بستار ءَ اشی ءِ سر ءَ باور کنت کہ بلوچ چاگرد ءِ دیمروئی چہ زانت ءُ زانشت ءَ بیت اِنت ءُ کتاب زانت ءُ زانشت دے اَنے کہ پھمگ ءُ زانگ ءِ امل کنگ ءِ راہ ءَ گچین کن انت ھمے ھاتر ءَ بلوچ چاگرد ءِ تہ ءَ کتاب ماھول ءَ دیم ءَ آرگ ءُ گل ءِ نیمگ ءَ بلوچستان کتاب کاروان ءِ نام ءَ بلوچستان ءِ کنڈ کنڈ ءَ کتب میلہ ءِ جنگ بنت ھمے درچ ءِ برجاہ داران ءَ لیاری ءِ لبزانکی ءَ راجداری مراگش ءَ ھم کتاب میلہ ءِ اڈ دیگ بیت اِنت کہ بازیں شنگ کنگ بوتگیں کتاب ایر کنگ بنت اشی ءَ ابید بلوچ ازمکارانی ازم ھاتر ءَ آرٹ ایگزیبشن ھوار ساز ءُ زیملی مراگش برجم کنگ بیت انت –

وتی درشان ءِ گڈسر ءَ آئی اے وڑیں مراگشانی درچ ءِ برجاہ دارگ ءِ بنکی مول چاگرد ءِ ھاتر ءَ نوکتریں دیمروئی لوٹگ ءں راھانی پچ کنگ اِنت- لیاری ءِ لٹریری ءُ راجداری مراگش ھمے درچ ءِ بھرے کہ لیاری ءَ ھوار کراچی درسیں جاھاں نشتگیں بلوچ راج گوشگ بیت کہ اے لبزانکی ءَ راجداری مراگش ءَ بھر بہ زور انت –

بلوچستان لبریشن فرنٹ ءَ بلیدہ ءَ ریاستی چاریگ رحیم بخش کوش زمہ واری منّ اِتگ-

بی ایپ ایف ءِ جارکش میجر گْوھرام بلوچ ناشناسیں ھندے ءَ رسانکدر ءَ شنگ کتگیں درشان ءِ تہ ءَ گْوشتگ کہ ریاستی چاریگ جاوید ء رحیم بخش جھمنند میتاپ کہ اے وھد ءَ بلیدہ میناز ءَ نندوک بوتگ آ یک ھپتگے ءَ ساری آ سرمچاراں ھما وھد ءَ دزگیر کتگ کہ وھدے آ ٹریکٹر ءُ ٹینکیانی ھمراھی ءَ پاکستانی پوج ءَ آپ پُجارینگ ءَ بوتگ- آئی ءَ پوج ءَ ھم توژگ پُجارینتگ-

اے ریاستی چاریگ بلوچ سرمچارانی چاریگی کنگ ءِ ھمراھی ءَ بلیدہ ءِ جتائیں دمگاں لشکر کشی ءِ وھد ءَ پاکستانی پوج ءِ ھمراھداری کتگ- چُست ءُ پُرس ءِ میان ءَ ریاستی چاریگ ءَ وتی دراھیں گناہ منّ اِتگ اَنت- گناھانی منّگ ءَ پد اے مرگ ءِ پرمان دیگ بوتگ-

ما راج ءَ گوں دزبندی کن ایں آ ریاستی چاریگاں ، ڈیتھ اسکواڑ ءُ پوج چوکی ءُ کارواناں چہ دور بہ بنت- سرمچاراں آھاں کجام وھد ءُ کجام جاگہ ءَ نشانگ کُت کن اَنت- راج ءَ گوں دزبندی کن ایں کہ کسانیں لوٹانی ھاتر ءَ پاکستانی پوج ءِ ھمراھداری مہ کن اَنت اگاں ناں آ وتی سرجمیں تاوانانی زمہ وار وت بنت-

بلوچستان ءِ بُنجاھی شھر شال ءَ چارشمبے ءِ روچ ءَ ینگ ڈاکٹراں وتی لوٹانی ھک ءَ زھرشانی کتگ ءُ ریڈ زون ءَ روگ ءِ جُھد کتگ چریشی ءَ پولیس ءَ آیانی لَٹ ءُ کُٹ کتگ اَنت بیست ڈاکٹر دزگیر کتگ ءُ وھدے کہ دست ءُ پادانی چست کنگ ءَ شش پولیس کارندہ ٹپی بوتگ اَنت-

ینگ ڈاکٹراں مروچی لوٹانی ھک ءَ ریڈزون ءَ وزیراعلیٰ لوگ دیم ءَ زھرشانی ءِ جار جتگ-

ینگ ڈاکٹرانی لوٹانی ھک ءَ گوستگیں یک ماھے ءَ گیش اِنت ھڑتال ءُ زھرشانی ءَ اَنت-

ینگ ڈاکٹر ءِ سنڈیمن نادُراھجاہ چہ انسکمب دگ ءِ سر ءَ زھرشانی روانک ءَ ینگ داکٹراں ابید پیرا میڈیکل اسٹاف ءُ نرسز ءِ باسک ھم ھوار اَنت-

ینگ ڈاکٹرز ءِ روانک ءِ سر ءَ پولیس ءِ مزنیں کارندہ اوشتارینتگ ءُ وھدے کہ ریڈزون ءَ رؤکیں راہ ءَ کُنٹگیں تار جتگ ءُ بند کتگ-

جارکش وائی ڈی اے ءِ رِد ءَ پولیس ءِ لَٹ ءُ کٹاں چہ دہ ءَ گیش ینگ ڈاکٹرز ءُ پیرامیڈیکل ءِ کارگُشادانی باسک ٹپی بوتگ اَنت –

شال ءِ سرکاری نادُرھجاہ ءَ ینگ ڈاکٹرانی ھڑتال ءِ سبب ءَ ان ڈور سروسز ءُ او پی ڈیز بند اَنت-

ینگ ڈاکٹرز ءِ ھڑتال ءِ سبب ءَ نادُراھاں پریشانی ءِ دیمپان کپگ ءَ اَنت-

نادُراھانی گوشگ اِنت کہ صوبائی ھکومت ءُ مھکمہ سِھت ینگ ڈاکٹرز ھڑتال ءَ اَنت بے توجھی ءُ بے وسی ءِ نشانگ اِنت – آھاں راج ءِ ھچ وڑیں جیڑاھانی سر ءَ سما نسیت-

آیاں لوٹ کتگ کہ ھکومت ینگ ڈاکٹرز ءِ ھڑتال ءِ گامگیج بزور اِیت اشی ءَ زوت ءَ زوت ھلاس بہ کنت دانکہ راج ءَ آسراتی دست بہ کپ اِیت-

زانگ بہ بیت ینگ ڈاکٹرزاں گوستگیں سال ءَ 22 نومبر ءَ وتی لوٹانی ھک ءَ شال ءَ ریڈزون ءَ نندانک جتگ چریشی ءَ چہ تھنا شال شھر ءِ روگ آھگ ءِ نزام درھم برھم بوتگ بلکیں وانگی ادارھاں رؤکیں جنک ءُ بچکیں نودربر ھم بازیں روچاں سکّیانی دیمپان بنت-

بلوچستان ءَ ینگ ڈاکٹرز ءُ پیرامیڈیکس ءِ زھرشانی نو ھمکروچی جوڑ بوتگ اے زھرشانی چار ماہ ءَ ساری بندات بوتگ اَت-

ینگ ڈاکٹرز ایسوسی ایشن ءِ نیمگ ءَ چی ھکومت ءَ لوٹانی لسٹ دیگ بوتگ آ 24 نکتھانی تہ ءَ اِنت-

ینگ ڈاکٹرز ایسوسی ایشن بلوچستان سپریم کونسل ءِ باسک ڈاکٹر ارسلان ءِ رِد ءَ 24 لوٹانی تہ ءَ دو سے ءَ اَبید آ سرجمیں لوٹ نادُراھانی شری ءِ واست ءَ اَنت ھکومت بے توجھی ءِ سبب ءَ چہ بلوچستان ءَ سرکاری نادُراھجاہ پروشت ءُ پروش اَنت ءُ اشانی تہ ءَ الاج ھاتر ءَ آسراتی نہ بوگ ءِ ھساب ءَ اَنت وھدے نادُراہ نادُراھجاہ ءَ کاینت گُڑا دوا ءُ درمان دگہ آسراتیانی نہ بوگ ءَ وتی دراھیں زھری ءَ ڈاکٹر ءُ نادُراھجاہ ءِ کارگُشادانی سر ءَ کش اَنت-

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ پنج سد ءُ پنجاہ ءُ شش روچ سرجم بیتگ – پشتونخوا میپ ءِ امیر مھمد کاکڑ، نواب سید بونیری، نقیب اللہ ءُ طور جان اچکزئی اتکگ ءُ ھمدردی اش درشان کتگ –

وی بی ایم پی ءِ رھشون ماما قدیر بلوچ ءَ گشتگ اے وھد ءَ بلوچ، پشتون ءُ سندھیاں کسے ءَ گوں اوست دارگی نہ اِنت وت وتی زانگولیں لاشانی توار جوڑ بیگ ءُ دنیا ءَ را وتی زیردستی ءُ بزگی ءِ کلوہ دیگی اِنت – زیردستیں توار ءِ جد ءُ جھد اِنت، زالم ءَ چہ رکگ ءِ یکیں راہ اِنت آ ھمسنتی اِنت پرایمنیں جد ءُ جھد ءِ ترندی اِنت-

ماما قدیر بلوچ ءَ گشتگ ھاکماں زُلم ءُ زوراکی ءِ یک درچے بناہ کرتگ بلوچانی پُر ایمنیں جد ءُ جھد ءِ دیم ءَ مِک کنگ ءِ جھد ءَ اِنت اشی ءِ پروش دیگ ءِ یکیں راہ ایش اِنت بلوچ، پشتون ءُ سندھیانی ھمسنتی ءِ مانزمان اِنت، دوری پروشت ءُ پروش دے اَنت اے پروش ءُ پروش دشمن ءَ جنگی جاوراں کمک کن اَنت جاورھال چارگ ءُ ٹپاسگ بہ بنت ءُ یک پرزانتیں رنگے ءَ یک ھمسنتی ءِ اژدری اِنت –

آئی ءَ گشتگ نِی بلوچستان ءَ ایف سی ایوک ءَ پھزداری ءَ بس نہ اِنت ریاست ءَ شوربندی ءَ نِی سی ٹی ڈی دوبر بلوچستان ءَ آرمی ءِ کمک ءَ سیکورٹی ءِ نام ءَ کارمرد بیگ ءَ اِنت ھرکس ءَ سرپد بیگی اِنت آرمی ءُ ایف سی ءِ کارمند ایوک ءَ پورسز نہ اِنت بلکیں پولیس سی ٹی ڈی ھم پاکستانی پوج ءِ بھر اَنت اشی ءِ دیم ءَ آرگ ءَ ریاست ھرچ رنگیں داب ساز اِت کنت پرچاکہ بلوچانی پُر امنی اُرش ءَ پد ریاست گیش وتی چالاکیانی تہ ءَ ایر کپ ایت اے وھد ءَ سی ٹی ڈی پُر ایمنیں جد ءُ جھد ءِ دیم ءَ اوشتوک اِنت چنکس بلوچ آئی ءِ تیراں سپتگ ءُ شھید بیتگ اَنت چنکس زدگ بیتگ اَنت –

بلوچ نیشنل لیگ ءِ پولٹ بیورو ءَ وتی شنگ کرتگیں درشان ءِ تہ ءُ گشتگ بلوچ سرڈگار ءِ پھازگ ءَ پرکاریں سلاہ بندیں جھدکارانی یکجاھی نوکیں گل بی این اے ءِ دیم ءُ آیگ جوانیں گامگیجے –

درشان ءَ گوشگ بیتگ بلوچ نیشنل لیگ ءَ ھمے اُمیت داشتگ، یکشل ءَ داروکیں بلوچ جھدکار واجہ گلزار امام ءُ واجہ سرفراز بلوچ راجی جنز ءِ آجوئی ءَ شاہزانتی لیکھانی سر ءَ انساپ ءِ بروبری ءُ درو چاریں رھبندانی رد ءَ راجی آجوئی ءِ جنز ءَ یک نوکیں چراگے بالین اَنت ءُ درسیں بلوچ راج ءِ سر ءَ المی اِنت وتی راجی جھدکارانی گون ءَ ھر تکاں کمک بہ کن اَنت-

درشان ءَ گشگ بیتگ بی این اے نوک جوڑ بیتگیں گل ءَ کڈن کنت میان اُستمانی جھد ءِ آجوئی ءِ رھبندانی رد ےَ وتی جھد ءَ برجاہ بہ دار اَنت ءُ بلوچ راجی جھد ءِ لوٹانی پد ءَ بلوچستان ءِ آجوئی ءِ واستا جوانیں کرد ءَ پیلو بہ کن اَنت ءُ بلوچ راج ءِ کمک ءِ تالان کنگ ءَ جوانیں کرد پیلو بہ کن اَنت-

ماھم ءِ ماھیگ

نبشتہ کار: ش، پ

رجانک: میرین بلوچ

دی بلوچستان پوسٹ

گرماگی شپے اَت، داں آکاش نورھان ءِ جلوناکیں توار ءَ مبارک کازی باتیل ءِ وڑیں ءُ اتاشاد ءِ ساہ کند ءِ لچہ ءَ نہ وان ایت واب نہ کپ ایت ءُ کسے کہ اتاشاد ءِ ساہ کندن ءَ شپ ءَ بوان ایت گڑا واب کجا کیت! گڑا آ انچُش بےکرار بیت کہ باتیل ءِ کوہ ءِ سر ءَ سر بہ کپ ایت ءُ داں وھدے اتا ءِ یک شیئرے مہ وان ایت دل ءِ کرار نئیت-

“کوھساروں کی اتا رسم نہیں خاموشی”
“رات سوجائےتو بہتا ہوا چشمہ بولے”

وھدے آکاش چہ باتیل ءِ سر ءَ واتر بیت گڑا آزاد ءُ دیدگ ءَ مات ھمل ءُ جیھند ءِ کسہ آرگ ءَ بیت۔ آکاش گوں آیاں دلگوش ءَ گْور کنت ءُ گْوش ایت کہ بہ وپس اِت کہ سُھب ءَ یدار زورگ ءُ زِر ءَ روگی اِنت پہ ماھیگ ءِ شکار ءَ چونائی ءَ گرماگی شپ کسان اَنت واب سرجم نہ بیت۔دُرس وپت اَنت۔ سُھب ءَ وھدے گوں کروسانی بانگ ءَ آکاش چہ واب ءَ پاد کیت گڑا پہ نادلکشی گْوش ایت کہ چہ ملا لیاکت ءِ بانگ ءَ دیدو ءِ مُرگ ءِ بانگ وشتر اِنت کہ مردم ءَ چہ وپتگیں واب ءَ پاد کنت۔

وھدے آکاش پادکیت گڑا آزاد ءُ دیدو ءَ پادکنت ءُ آئی ءِ لوگبانُک گُلناز زھگاں زور ایت ءُ میتگ ءِ نزیک ءَ دارُک ءِ چِنگ ءَ روت داں زھگ ءُ زھگانی پِس ءَ سیاہ چاھے اڈ بہ کنت ءُ گوں شپ ءِ سِرتگیں ناناں بہ وارین ایت۔

وھدئے آ زِر ءَ سر بیت، ھرروچی پیم ءَ دُرستیں ناھدا ءُ جانشُو سر بیتگ اَت اَنت ءُ کُل گوں وتی ٹیٹلیں یدار ءَ ھور دیم پہ زِر ءِ نیمگ ءَ روان اِت اَنت ءُ زِر ءِ چولانی نرمیں تابانی تھ ءَ گوازی کنان ءَ شکار کنگ ءَ ات اَنت ءُ چہ ھمے گیپتگیں ماھیگاں پہ وتی زھگانی لاپ ئِے سیر کنگ ءَ پہ گنتِرین ءُ پہ بھا کنگ ءَ گھتریں ماھیگ آں گشینگ ءَ ات اَنت مھلوک سر ات گوں وتی روزگار ءُ ھُمکروچی ئیں کاراں دِلگوش ات۔

بلے مروچی ءِ روچ چو ھمُک روچ ءِ وڑ ءَ نہ ات باتیل ءَ وتی رنگ مٹینتگ ات باتیل ءِ دامُن لھتیں لُکّ پونزیں ءُ زرد رنگیں مردُم گوں بلا بوٹیں درآمد آں گردگ ءَ ات اَنت۔

چہ ھمیشاں لھتیں ماں گِس ءُ میتگاں مانریتکگ ات اَنت ءُ لھتیں ماں زِر ءَ کُلیں ماھیگیراں پہ زوری چہ زِر ءَ کشگ ءَ ات اَنت ءُ ناکو رھیم بکش ءِ لوگ ءَ ھم بیڑ اِش بُرتگ ات ءُ ناکو رھیم بکش ءَ چہ گِس ءَ در کنگ ئِے بیھار ءَ دیگ ءَ ات۔

اِے درآمد ات اَنت کس اِشانی ابرم ءَ سرپد نہ ات کس اِشانی زُبان، نیندگ ءُ پاد آیگ ءَ پو نہ بوگ ءَ ات ءُ ھرکس اچ اِشاں بیزار ات۔ ھرکسی چم وداریگ ات اَنت کہ کدی موسٰی ءِ کیت ءُ اِے ناشِرّیں پِرھون ءَ چہ مارا آجو کنت۔

مات گُل ناز ماروک ءُ ماھم ءِ ھمرائی ءَ گس ءَ پریشان ات چیاکہ مرچی آ اجبیں ھار ءَ گوں دوچار ات اَنت ءُ آ وتی مستریں بچ سر بُلند ءِ ترانگ ءَ ات ءُ جیڑگ ءَ ات کہ مروچی باتیل ڈُنگانی باھوٹ اِنت بائدیں سربلند بیتکین ءُ باتیل ءِ چہ پرنگی آں بہ رکین اِت آئی ءَ وتی بچ ھمل اوں یاد پیداک ات۔

چُش کہ سر بُلند آکاش ءِ مستریں بچ ات ءُ آ باز وھد ءَ آزاد ءُ دیدو ءِ جُست ءُ پُرس ءَ پد کہ کماش اے سر بُلند کے انت تو ءُ مات ھر وھد ءَ یات کن ئے ءُ اے گُشگ ءَ بے توار بئے کہ آ زِر پھازگ ات باتیل ءُ گوادر ءِ ، نوں ھمل نیست انت ۔باھدیں بولان ءِ ٹُلانی سر ءِ سنگر تھ ءِ سربُلند بئیت تئی رکینگ ءَ ءُ اگاں تو یک گوانکے بہ جنے آ تئی پیشگاہ ءَ سر بیت۔

آکاش ھمے دمان ءَ تچان تچان ءَ باتیل ءِ نیمگ ءَ روگ ءَ اَت وھدے آ باتیل ءِ سر ءَ سر کپ ایت گوں اسرافیل ءِ سور ءِ ردیپ ءَ سر بُلند سر بُلند گوانک جنت بلے سر بُلند! سربلند زِرپھاز اِنت آ ھما وھد ءَ ساڑی ات کہ لگوریں دُشمن ءَ وتی پلیتیں پاد ماں باتیل ئِے سینگ ءَ ایر کُتگ ات اَنت-

بیست ساچان ءِ روچ ات ءُ باتیل ءِ دیوانگ سر بُلند پہ باتیل ءِ سربلندی ءِ ھاتِر ءَ وتی ھانُل ءِ واستا شے مرید ءِ وڑ ءَ کُربان بیگ ءَ روگ ءَ ات۔انچُش کہ مرید بلوچ بلوچستان ءَ وتی ھانُل گُش ایت ءُ آئی ءِ اشک ءَ سوت نبشتہ کنت-

مروچی زِر ءِ دگہ بچے گوں باروداں پُریں جیکِٹ ءِ وتی جان ءَ بستگ ءُ پہ باتیل ءِ رکینگ ءِ ھاتِر ءَ دگہ دروشُمے ءَ دُژمِن ءِ دیم ءَ روگ ءَ ات ءُ ھمے باتیل ءِ دامُن ءَ گوں بارود ءَ چکاریں جیکِٹ ءَ دُشمن ءَ تراکین اِت ءُ تباہ کنت –

باتیل مروچی نازان ات چہ پھر ءَ سر ئِے چِست ات سینگ ئِے مِک ات گُشے دُشمن ءَ سِنگ سار کنگ ءُ گُشگ ءَ ات کہ بہ چار! بہ چار مرچی منی بچاں تئی سر ءِ ھوش بُرتگ ترا لاچار کُتگ اِش ءُ اِے نہ اولی سربلند بیتگ نہ گُڈی، انگت ھزاراں بچ پہ منی رکینگ ءِ ھاتِر ءَ کپن اِش سر ءَ بستگ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔