TBP Balochi

بلوچستان ءِ دمگ کیچ ءَ پاکستانی پوج ءَ سَے براتاں ھوار چار مردم زورانسری آوار جتگ ءُ بیگواہ کُتگ –

اے مردم پاکستانی پوج ءَ کیچ ءِ دمگ بلیدہ ءَ آوار جتگ ءُ بیگواہ کتگ انت –

آوار جنگ بوتگیں مردمانی پجار داد شاہ ء دین محمد ھُدّین ء عبدالرحمان، امیر بخش ء عبدالرحمان ءُ عبید ء عبدالرحمان ناماں چہ بوتگ انت-

آوار جنگ بوتگیں مردم بلیدہ ءِ دمگ زیردان ءَ پاکستانی پوج ءَ گِس ءَ بیڑ برتگ ءُ زورانسری آوار جتگ انت اھوالکار ءِ رِد ءَ پوج ءَ اودا ساڑی ایں چُک ءُ زالبول ھم لٹ شاپ کُرتگ سنت –

سر بیتگیں ھالانی رد ءَ ایرانی لشکر ءَ بندر کلاھی ءَ یک لوگے ءِ سر ءَ بیڑ برتگ ءُ اود ءَ لشکر ءَ تیرگواری کرتگ ءُ چریشی ءَ یک مردمے زدگ کنگ ءَ پد دزگیر اش کرتگ ءُ گون وت اش برتگ-

گیشیں ھالانی رد ءَ بندر کلاھی ءَ ایرانی لشکر ءَ نشہ باپاری ءِ بھتام ءَ خرم ملاحی ءِ لوگ ءِ سر ءَ بیڑ برتگ ءُ اود ءَ لشکر ءَ تیرگواری کرتگ ءُ خرم ملاحی زدگ کرتگ ءُ دزگیر کرتگ ءُ گوں وت برتگ –

ھالانی تہ ءَ گوشگ بیتگ ایرانی لشکر ءَ خرم ءِ لوگ ءِ ساز ءُ سامان پرشت ءُ پروش کرتگ ءُ آئی ءِ لوگ بانک ھم جتگ ءُ ٹپیگ کرتگ –

اے وئیل ایران ءِ اُستان ھرمزگان ءِ بنجاھی شھر میناب ءِ ھند بندر کلاھی ءَ پیش اتکگ کہ اود ءَ بیڑ بروکیں لشکر ءَ یک مردمے ءِ لوگ ءِ سر ءَ بیڑ برتگ –

ھالانی تہ ءَ گوشگ بیتگ لوگ ءِ بیڑ برگ ءِ سبب ءَ اود ءَ جھمنندیں مردماں زھرشانی کنان ءَ دگانی سر ءَ سر کپتگ اَنت ءُ چرے زھرشانی ھلاس کنگ ءَ ایرانی پولیس ءَ زھرشانی کنوکانی سر ءَ آنسو گیس ھم جتگ ءُ زھرشانی کنوکانی زدگ بیگ ءِ ھال ھم بیتگ اَنت –

اے وئیل ءِ درگت ءَ ایرانی واکدارانی نیمگ ءَ انگت ءَ دگہ چوشیں گپ دیم ءَ نیتکگ اَنت بلے شنگ بیتگیں اکساں گندگ بیت اِنت لوگ ءِ دیوالاں تیرانی ٹپ پِر اَنت –

سندھ ءِ مزن شھر کراچی ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ پنچ سد ءَ شست ءُ ھشت روچ سرجم بیتگ – بی ایس او کراچی ھنکین ءِ باسکان بنجل ءَ اتکگ ءُ کھولانی گون ءَ پدردی درشان کتگ-

اے وھد ءَ بیگواھیں عامر اکبر ءِ گوھار ءُ دگہ مردمان وتی زھرشانی یاداشت کنائینتگ اَنت – آئی ءِ گوشگ اَت منی برات عامر اکبر ءِ بیگواھی ءَ مروچی دو ماہ سرجم بیتگ، من وتی گوھارانی ھمراھی ءَ مروچی یکرندے پد ءَ کراچی پریس کلب ءِ دیم ءَ وائس فار بلوچ مسنگ پرسنز ءِ بنجل ءَ اتکگ ءُ انساپ ءِ لوٹ ءَ کنگ ءَ آں دانکہ واک ءُ نشتگیں مردم مئے توار ءَ اِش بہ کن اَنت ءُ مئے برات ءِ یل کنگ ءَ وتی کرد ءَ پیلو بہ کن اَنت-

آئی ءَ دیمتر ءَ گوشتگ منی برات عامر اکبر بیست ءُ سَے نومبر ءِ شپ ءَ گڈانی کراس ءَ پٹرول پمپ ءَ ڈیوٹی ءِ وھد ءَ ھب ءِ پولیس ءِ کارمنداں دزگیر کرتگ ءُ ریاستی ادارھانی دست ءَ داتگ مروچی دو ماہ ءِ گوزگ ءَ پد مارا مئے برات ءِ بارو ءَ ھچ سرپدی دیگ نہ بیتگ-

عامر اکبر ءِ یل نہ کنگ ءِ ھلاپ ءَ مروچی چاگردی رسانکجاھاں یک مھمے برجم دارگ بیگ ءَ اِنت – عامر اکبر ءِ گوھار ءَ دزبندی کرتگ کہ مروچی چاگردی رسانکار مئے ھمراھداری ءَ بہ کن اَنت ءُ مئے توار جوڑ بہ بنت-

وی بی ایم پی ءِ وائس چیئرمین ماما قدیر بلوچ ءَ اتکگیں مردمانی دیم ءَ گپ کنان ءخ گوشتگ ھر درد ءَ وتی ٹپی ئیں جسم ءِ گون ءَ امباز کنگی اِنت ءُ نہ دمبروک ءُ نہ پروشوک، مرگ ءَ امباز کنوک ھُشکیں گوزانگانی لیل ءُ تہ ءَ ھالیگیں کوکریں سیاسی سیاھیگ ءُ بُتانی کار نہ اِنت بلکیں اے گچینی سرانی کارست اِنت ھر وھد ءَ برزیں سساھاں گوں وتمانی، واھشتی تلباں گستا بیگ ءُ وتی زمہ واریاان سرجم کنگ ءَ شپ ءُ روچ اش یک اش کرتگ اَنت –

نبشتانک: بلوچستان ءِ زیبائیں کارست بیگواہ انت

نبشتہ کار: ظفر بزنجو

دی بلوچستان پوسٹ

دنیا ءِ دود انت ھر ہما نیگوئی ءِ درچک بر بیت سنگ جنگ بیت،بلوچاں گوشتگ “کُنر بیت لٹّاں ما سر ءَ وارت”ھر ہما کارست کہ آیاں پہ بلوچانی آؤکیں نسل ءَ را ایمنی ءُ وشیں زندئے ءِ بابت ءَ جیڑ اتگ بیگواہ کنگ بیتگ انت ،ھر ھما کارست کہ آیاں درتہ پچیں گونڈوانی زند پہ بزّگی دیست نہ کُتگ آ بیگواہ کنگ بیتگ اَنت،ھر ھما کارست کہ آیاں جنوزامیں زالانی ھڈیسکگ دیستگ ءُ ایمنی نشت کُرت نہ کَتگ آ بیگواہ کنگ بیتگ انت،زیبائیں کارست مدام ریاست ءِ چمّاں چار چار کانٹانی واھند بیتگ انت کہ آ آیاں زانتگ بزِگی چی یے۔

زندگی گوزان انت سپر برجاہ انت،ھر ھما کارست کہ پہ تئیءُ منی ھاتر ءَ زند ءَ ہم سر گوستگ انت ،پہ منی ءُ تئی وشھالی ءَ پہ منی ءُ تئی توار جوڑ بوگ ءَ آیاں وتی زند تھاریں کوٹیانی نگھبان کُرتگ-

ہما زیبائیں کارست کہ آیانی کسانیں چک پہ ایمنی زند ءِ گوازینگ ءَ بیتگ انت مرچی روڑانی سر ءَ انت،ھما کارستانی پیرزالیں ماتانی چمّانی ارس نہ بدنت، ہما کارستانی لاڑکیں جنکانی رنگ کس ءَ نہ دیستگ اَنت مرچی مزن شھرانی چار راہ ءُ پریس کلبانی دپ ءَ شپاں پہ بے چادری گوازین انت
منی ءُ تئی راجی پرز انت کہ کھولاناں اے سکین ءَ بہ دئیں کہ شما تھنا نہ ات-

اے آس کہ مرچی ہمساہگ ءِ لوگ ءَ روک انت بوت کنت باندا تئی لوگ ءَ مان بہ پتائیت،اے درد ءَ وتی لوگ ءَ سر بوگ ءَ ساری ھمود ءَ آسر بوگ ءِ جُھدے ،اے آس ءِ توسگ ءَ وتی گوھار ءِ کمک ءَ بکن بلوچستان ہما بدبھتیں جاہ انت کہ اد ءَ ہرگِس ءَ اے آس روک انت،کسے ءِ برات ءُ کسے ءِ پت بیگواہ کنگ بیتگ ءُ چشیں بازیں گس ھست اَنت کہ آیانی ٹپّ ءُ ٹوریں لاش آیاں پہ سوگات دیگ بوتگ انت،آکر !اے آس پرچا مِرگ نزانت؟ پرچا بلوچ ءِ زندمان چو وڑالیگ کنگ بیتگ؟ بیا ات ہم دست بہ ایں ہم نیاد بہ ایں اے آس ءِ توسگ ءَ وتی وس ءُ واک ءَ کسانیں جُھدے کن ایں۔ ءُ ھما کھولانی ارسانی سپاہ کنوک جوڑ بیں دانکہ آ بزان انت ما تھنا نہ اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: بے ھُدائیں وتکُشی بالگیگ

دی سوئیسائیڈ ڈرون

نبشتہ کار : ڈاکٹر ابدلتیپ بلوچ

دی بلوچستان پوسٹ

یک کارے ءِ ٹھینگ گِران اِنت، بزان کہ کار ءِ پیلو کنگ ءَ جُھدے لوٹ ایت بلے کار ءِ ھراب کنگ سک آسان اِنت یک ماڑی یے بہ بیت یا توری یک کسانیں گِسے ھم بہ بیت آئی ءِ بندگ ءَ پنچ یا شش ماھے لگ ایت بلے ھمے ماڑی ءُ گِس ءِ تباہ کنگ ءَ یک ساھتے ھم نہ لگ ایت تھنا آس بہ دئے گُڑا آ ماڑی وت سُچ ایت ءُ پُر بیت یا بمب ئِے بہ جن پد ءَ وت تباہ بیت گِند ئے ماڑی ءُ گِسے ءِ بندگ ءَ لکھانی ھساب ءَ کلدار ھم ھرچ بنت بلے پہ آئی ءِ تباہ ءُ ھمپُسگ ءَ یک بمبے ءِ بھا لوٹ ایت ھمے داب ءَ پہ یک زورگِرے ءَ نزوریں ھمساھِگیں مُلکانی سر ءَ اُرش کنگ ءُ آ نزوریں راج ءِ ڈیھ ءِ سر ءَ کبزا کنگ وَ آسان انت بلے ھمے زورانسری ئیں کبزا ءِ برجاہ دارگ ءُ یک گیرتمندین ءُ زِندگیں راجے ءِ ایردست کنگ سک گِران اِنت وھدیکہ یک زِندگیں راجے یکمُشت بہ بیت ءُ پہ وتی بنی آدم بُندری لوٹ ، بزاں پہ وتی آزاتی ءُ راجی آجوئی ءِ جُھد ءَ سِلاھبندیں گھگیری بہ کنت گُڑا زورگِر توری ھر وڑ ءَ زوراک بہ بیت یک روچے الم پْروش وارت، یک روچے لازُم کیت ھمے ایردستیں راج آجو بیت بلے بَے ایش انت کہ راج وتی گلامی ءَ بہ مار ایت، راج ءِ تہ ءَ رجدوستی ءُ ڈیھ دوستی ءِ مارشت بہ بنت راج ءِ نودربر، کواس ءُ زانتکار بزگیں راج ءَ یکمُشت کنان ءَ راجی آجوئی ءِ سِلاھبندیں گھگیری گلاں کُمک بہ کن اَنت راج ءِ لس مھلوک ءَ ڈیھ ءِ سر ءَ بدیں دُژمن ءِ زورگِری، دود ءُ رواجانی لگتمالی ءُ گُلامی ءِ بابت ءَ سرپدی دیان ءَ آجوئی ءِ آشوب ءَ مھکم ءُ آجوئی ءِ جُھد ءَ برجاہ بہ دار اَنت گُڑا یک گلامیں راجے ءَ وتی جُھد ءِ برورد ءَ آجوئی الم رس ایت۔

چوناھا ماں چیرجنگاں مُدام زورگراں پْروش وارتگ چے ءَ کہ زورگر ایردستیں چاگِرد ءِ تہ ءَ کُشت ءُ کوش ءِ بدیں تُرسے دیان ءَ وتگڑیں ایمنی ودی کنگ ءِ جُھد کنت بلے اے زورانسری گلامیں راج ءِ تہ ءَ دُژمن ءِ ھلاپ ءَ گیشتر نپرت ودی کنت ءُ گھگیر دژمن ءِ ھمے وتگڑیں ایمنی ءَ کانچ ءِ داب ءَ پْروشین اَنت چوشکہ یک دو ھزار کلدار ءِ بمبے دو کروڈ کلدار ءِ ماڑی ءَ تباہ بنت بزاں ماں چیرجنگ ءَ دُژمن ءَ مُدام اناگتیں اُرشانی تُرس، بے آرامی ءُ تکانسری رس ایت۔

ھمے جنگی تاوان، کبزاگیری ءِ برجاہ دارگ ءِ ھرچ ءُ راجدوستانی سِلاھبندیں جُھدانی آسر ءَ 1955-75 ءَ امریکہ ماں ویتنام، 1979-89 ءَ سوت روس ءُ پد ءَ 2001-21 ءَ امریکہ ءَ ماں اوگانستان ءِ چیر جنگ ءَ پْروش وارتگ ءُ ھمے وڑ ءَ ھستیں وھد ءَ سھودی اَرب ءِ سروگانی ءَ چِل ءُ سے باسکیں مُلکانی گل کہ ارب تپاکی لشکر ءِ نام ءَ زانگ بیت ماں یمن ءَ چہ 2015 ءَ پْروش ورگ ءَ اِنت اگاں ما چیر جنگ ءِ بابت ءَ چیزے وان ایں یا پٹ ءُ پول بہ کن ایں گُڑا ما سرپد بہ بَہ ایں کہ زورگِر ءَ پہ وتی کبزا ءِ مُھکم کنگ ءَ یکشل ءَ جنگی ھرچ، پہ وتگڑیں دیمرویاں زر زیانی، راجدْروھانی زر ءِ لوٹ ءُ بلاھیں آسراتیانی پیلو کنگ ءَ ھوار پہ لس مھلوک ءِ نااُمّیتیں مھر ءَ ھم چیزے کنگ لوٹ ایت کہ ایردستیں راج نپرت ودی مہ کنت ءُ وت ءَ ایردست ھم مہ پھم ایت، دلیریں ورناہ گھگیری ءِ سِلاھبندیں گلاں ھوار مہ بنت۔

بزان چیرجنگ پیل ءُ شاپی کُروس ءِ میان ءَ جنگ اِنت کہ ھما آسراتی کہ شاپی کُروس ءَ ھست اَنت آ پیل ءِ کِر ءَ ھما داب ءَ نہ اَنت کہ جنّگ ءُ تچگ گْوش اَنت ئِے! بزاں چیرجنگ ءِ جنگی ھرچاں امریکہ ءُ روس ءِ وڑ ءَ دِگہ بازیں آسودگیں مُلکاں پْروش داتگ۔

اگاں ما مرچیگیں زمانگ ءَ گِند ایں کہ دُنیا ءَ سِلاہ ءِ پِڑ ءَ سک دیمروئی کُتگ امریکہ، روس، چین ءُ پرانس ءَ S-500 ، Supersonic Brahmos Cruise Missile ، H-777 ، Attack Drone، Rafale Fighter Jet ءُ دِگہ وڑ وڑیں سِلاہ جوڑ کُتگ اَنت کہ اے تھنا دو ملکانی میان ءِ جنگاں پہ دِژمنے ءِ کارجاہ، بالی پِٹ، ملیٹری انسٹالیشن، شھر ءُ دگہ سٹرائیکِنگ آسراتیانی تباہ کنگ ءَ کارمرز بنت بلے ایشاں چیرجنگ ءِ ھلاسی ءَ شریں سِلاہ انگت جوڑ نہ کُتگ اَنت بلکیں ایشی ءِ چپ ءَ پہ چیرجنگولاں وڑ وڑیں دِگہ کسان کسانیں سِلاہ ودی بوتگ اَنت کہ آ پہ یک زورگِرے ءِ تباہ کنگ ءَ چیرجنگولاں آسانی ءَ دزکپ اَنت انچوشکہ وتکُشی بالیگ اَنت کہ انگریزی ءَ سوئیسائیڈ ڈرون گْوش اَنت ئِے۔

چوناھا مرچیگیں جنگی زمانگاں تھنا بے ناھدائیں جنگی ڈرونانی سر باز کار بوگ ءَ انت امریکہ، روس، اسرائیل، تُرکی، ھندوستان، ایران ءُ چین ءِ وڑ ءَ دگہ بازیں دیمروئی کتگیں مُلکاں وڑ وڑیں آئی رینج سرویلینس ءُ اٹیک ڈرون تیار کُتگ اَنت کہ اے بے ناھُدائیں ڈرون چہ رَنوے ءَ بالگِر اَنت ءُ رنوے ءِ سر ءَ ایرکپ اَنت، اے ناھُدائیں بالیگاں میزائیل سنج کنگ بنت پمیشکا اے بالیگ پہ گْوریلہ گلاں بھا زُورگ ءَ سک گران اَنت، ایشانی زیرگ ءُ بڈ ءَ کنگ ھم بلاھیں آسراتی لوٹ اَنت البت نی روس ءَ لھتیں انچیں کسانیں جنگی ڈرون تیار کُتگ اَنت کہ آ وت میزائیل اَنت اے نوکیں کسانیں جنگی ڈرون ناں بالی پٹے لوٹ ایت ناکہ میزائیل ءُ دگہ بمبے ءُ آسراتی یے لوٹ ایت بس چہ سُند ءَ کش ءُ وتی ٹارگٹ ءِ نیمگ ءَ بال ئِے دئے۔

روس ءِ اے سوئیسائیڈ ڈرون ءِ نام Coyote-1 اِنت کہ نی آئی ءَ نوکیں ماڈل Coyote-2 ھم ھست کہ یک مردمے ایشی ءَ بڈ ءَ کنت، بال ئِے دنت ءُ نشانگ ءَ زُوران ءَ دُژمن ءِ ھر وڑیں بیس ءُ کیمپے تباہ کُت کنت چین ءَ ایشی ءِ مَٹ “CH-901” تیار کُتگ ءُ انی دگہ بازیں مُلک اے کسانیں وتکشی بمب ءَ گوں مزنیں شُمارے ءَ تیار کنگ ءَ انت۔
وھدے کہ 18 جنوری 2022 ءَ یمن ءِ ھوسی جنگولاں یو اے ای ءِ دبی شھر ءِ سر ءَ کسانیں وتکُشی ڈرونے ءِ اُرش کُت ءُ دبی بالی پٹّ ءَ بیرانی یے ودی کُت گُڑا تھنا دُنیا ءِ ھما مُلک تُرس آماچ بیتگ اَنت آیاں دِگہ راج ایردست کُتگ اَنت یا ایردستیں راجے ءِ گھگیری ءِ آماچ اَنت چے ءَ کہ اے وڑیں ارزان بھائیں ڈرونے چہ دیر ءَ بال کنت ءُ دُژمن ءِ بلاھیں ماڑی، کارجاہ، ملٹری بیس ءُ دگہ ملٹی بلین ڈالر ءِ آسراتیاں آسانی ءَ تباہ کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

جانسلامتی ءِ واکدارانی رد ءَ بیران بیتگیں مردمانی تہ ءَ کم چہ کم چار زالبول ھوار اَنت –

اوگانستان ءِ اُستان ھرات ءِ بنجاہ ءَ PD12 ءَ شمبے ءِ بیگاہ ءَ بیتگیں یک تراکے ءَ کم چہ کم ھپت مردم بیران ءُ نُھ زدگ بیتگ اَنت –

واکدارانی رد ءَ تراکی شورو یک وینے ءَ مان کنگ بیتگ ءُ شھر ءَ تراکینگ بیتگ –

اُستان ءِ جانسلامتی ءِ واکدارانی رد ءَ جانسلامتی ءِ نادراہ جاھاں اے راست کنگ بیتگ اے وئیل ھپت مردم بیران ءُ نُھ زدگ بیتگ اَنت- بیران بیتگیں مردمانی تہ ءَ کم چہ کم چار زالبول ھوار اَنت –

پھزدارانی گوشگ اِنت وئیل ءِ پَٹ ءُ پول بیگ ءَ اِنت –

سر بیتگیں اھوالانی رد ءَ روکپتی بلوچستان ءِ دمگ سوران ءَ ایرانی چیریں ادارھاں یک مردمے لوٹائینگ ءَ پد بیگواہ کرتگ –

آوار جنگ بیتگیں مردم ءِ پجار خورشید دھانی ء در مھمد جھمنند سوران ءِ نام ءَ زانگ بیتگ –

دمگی مردمانی رد ءَ خورشید آوار جنگ ءَ پد چیریں ادارھاں روکپتی بلوچستان ءِ دمگ سراوان ءَ برتگ، ھالانی تہ ءَ اے ھم گوشگ بیتگ کہ خورشید آدینگ ءِ روچ ءَ علی خامنہ ای ءِ بگیری ءَ گپ جتگ ءُ اھل ءِ سنت ءَ گوں بندوکے مردمے بیتگ-

ھالانی رد ءَ مولانا عبدالحمید جھاندیدہ امام جمعہ سوران ءَ بگیر داری نمائندگ خامنہ ای ءِ استان ءَ مردم مچ کرتگ ءُ بگیری ءِ سکین اش داتگ –

دومی نیمگ ءَ بلوچ کمپئن فعالین ءِ رد ءَ روکپتی بلوچستان ءَ سال دوھزار ءُ بیست ءُ یک سد ءُ سِی ءُ نُھ کس گرگ بیتگ اَنت کہ چریشانی تہ ءَ ھپتاد ءُ نُھ کسانی پکاھیں ھال بلوچ کمپئن فعالین ءِ گور ءَ ھست اَنت کہ اشانی تہ ءَ سِی ءُ چار کس ھنچش شھری رنگ ءَ گرگ، سیزدہ نیکری بگیری دسری، سَے کس سیاسی بندوکی، پنچ نشہ باپاری ءِ سر ءَ گرگ بیتگ اَنت-

مروچی شمبے ءِ روچ ءَ کراچی پریس کلب ءِ دیم ءَ بلوچستان ءِ دمگ ھزادار ءِ جھمنند آصف بلوچ ءُ رشید بلوچ ءِ زورانسری آوار جنی ءِ بگیری ءَ زھرشانی کنگ بوتگ –

زھرشانی کنوکاں زورانسری آوار جنگ بوتگیں مردمانی اکس، پلے کارڈ ءُ بینر دست ءَ بوتگ انت زھرشانی کنوکاں زورانسری آوار جنیانی بگیری ءَ اوگام اش جتگ بیگواھیں مردمانی یل ءِ کنگ ءں لوٹ اش کتگ –

زھرشانی ءَ وائس فار بلوچ مسنگ پرسنز ءِ کمک سرکماش ماما قدیر بلوچ، سمی دین بلوچ، بلوچ یکجھتی کمیٹی کراچی ءِ رھشوناں ھوار بیگواھیں راشد حسین مات ءُ بارتزتک ماھزیب ءَ دگہ بیگواھیں مردمانی کھولاں بھر زرتگ –

ھمے وھد ءَ بیگواھیں رشید ءُ آصف بلوچ ءِ گوھار سائرہ بلوچ ءَ گوشتگ منی برات ءُ وارس سِی ءُ یک اگست دوھزار ءُ ھژدہ ءَ پاکستان ءِ پوج ءُ انٹیلیجنس ایجنسی ءَ نوشکی ءَ سیل ءُ سواد ءِ جاہ زنگی ناوڑ ءَ چہ دگہ نُھ سنگتاں ھواری ءَ دزگیر کتگ اَنت –

آھاں گوشتگ کہ دزگیری ءَ پد پاکستان ءِ ایف سی ءَ آیانی لٹ شاپ کنگ بوتگیں اکس ترامجاھاں ءُ رسانکدراں شنگ کرتگ انت اے ٹاہ ھم داتگ کہ منی برات، وارس آئی ءِ دگہ سنگت پوج ءَ گپتگ انت بلے دزگیری ءَ پد آھانی بگیری ءَ ارزی ھم نبشتہ کنگ نہ بوتگ ناکہ یل کنگ بوتگ انت ناکہ مئے کھول گوں دچار کپگ ءَ اشتگ ناکہ آمیدگس ءَ آرگ بوتگ اَنت -.

آھاں گوشتگ کہ مروچی سَے سال ءَ گیش اِنت منی برات ءُ وارس ءِ درگت ءَ ھچ سرپدی دیگ بوگ ءَ نہ انت گوستگیں سال ءَ آئی ءِ سَے سنگت یل کنگ بوتگ بلے منی برات ءُ وارس ناکہ یل کنگ بوتگ انت ناکہ آھانی درگت ءَ مارا سرپدی دیگ بوگ ءَ انت اشی ءَ ابید واکدار مارا چہ جست انت کہ منی برات ءُ وارس نوشکی ءَ پرچا شتگ انت نوں ما چوں زانیں کہ نوشکی ءَ چی ءَ شُتگ انت؟ بلے ھو انچو گوشت کناں آھاں وتی شھر بازار ءَ ڈن بلوچستان ھردمگ ءَ پاسپورٹ ءُ ویزہ زلورت نہ انت –

آئی ءَ گوشتگ کہ پنجاپ ءُ کشمیر ءُ دگہ دمگانی جھمنند بید ء گر ءُ دار ءَ بلوچستان ءں تر ءُ تاب کن اَنت بلے بلوچ وتی شھر ءُ بازاراں ڈن رؤگ ءِ سوب جست کنگ بیت منی برات وارس بید ء سوب ءَ سَے سال ءُ پنچ ماہ انت ایف سی ءُ چیریں ادارھانی گور انت گڑا ما زانگ لوٹ ایں کہ اے سیکورٹی ادارہ داوت ورگ ءَ چیریں جاھاں داشتگ اَنت – من نزاناں منی براتانی گوم ءَ چون کنگ بوگ ءَ اِنت بلے انچو زاناں ھمود ءَ چہ یلا بوتگیں مردم کہ کسھاں کار انت کہ جان ءِ پُٹ پاد کائنت بلکہ انسانیت ھم سر ءَ پہ شرم جھل کنت سَے سال ءَ ازیت جاھاں دارگ ءَ پد اگاں منی برات کتکار نہ انت اگاں آھانی ھچ سبوت نیست گڑا پرچا انچوک ءَ دارگ بوتگ انت یل کنگ بوگ ءَ نہ انت –

آئی ءِ گوشگ ات کہ دودمانیں چاگرداں شک ءِ بنیاد ءَ انسان ءَ انچوک ءَ دارگ ءِ گنجائش نیست – پولیس گیشتر ارزی نبشتہ نہ کنت راستیں پٹ ءُ پول نہ کن انت – بیگواھیں مردمانی کمیشن ءَ ما وتی درخواست داتگ بلے آھانی ھم ھچ گندگ نہ بیت زانگ نہ بیت کہ آھاں انچوکیں واک نیست یا ارادہ نیست؟ من چہ وتی نیمگ ءَ لوٹ کن آں منی برات محمد آصف ء محمد پناہ ءُ ھاپز عبدالرشید ء عبدالرزاق ءَ ھوار درسیں بیگواھیں مردم یل کنگ بہ بنت –

دومی نیمگ ءَ بلوچ سوشل میڈیا ایکٹوسٹسانی نیمگ ءَ چاگردی ترامجاہ ٹویٹر ھیش ٹیگ
ReleaseAsifAndRasheed
ھم چلائینگ بوتگ –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ گوستگیں دو روچ اِنت کہ پاکستان ءِ پندل سازاں گل ءِ سنگت علو پنام ءِ چڑنگ مری ءِ درگت ءَ دروگیں ھبر تالان کنگ ءَ انت کہ بی ایل اے ءِ پتر ءَ علو مری مرگ ءِ سزا داتگ –

جارکش ءَ گوشتگ کہ بی ایل اے اے دروگیں ھبراں رَد کنت اے وڑیں ھال پاکستان ءِ پندل سازانی نیمگ ءَ چہ شِنگ کنگ بنت اے بلوچ راج ءِ تہ ءَ نااُمیتی ءُ دلپروشی تالان کنگ ءِ بے سوبیں کوشست ئِے –

جارکش ءَ گوشتگ کہ ما بلوچ راج، اھوالکار ءَ رسانکدراں گوشگ لوٹیں کہ تاں ھما وھد ءَ بی ایل اے ءِ وتی جندے آفیشل میڈیا چینل ءَ ھال شنگ کنگ نہ بوت گڑا دگہ جاھاں شنگ بوتگیں بی ایل اے نام ءِ ھچ درشان ءِ سر ءَ باور مہ کن اِت –
جارکش ءَ بی ایل اے چینلانی لنک داتگ ءُ گوشتگ کہ بی ایل اے ھر چیزے شنگ کنت چہ اے جاھاں شنگ کنگ بنت –