TBP Balochi

زورانسری بیگواھیانی آماچیں بلوچ سیاسی جھدکارانی یل کنائینگ ءِ ھاترءَ وائس فار بلوچ مسنگ پرسنز ءِ زھرشانی ءَ 4569 روچ سرجم بیتگ اَنت۔

کراچی پریس کلب ءِ دیما برجاھیں زھرشانی بنجل ءَ مروچی سندھ سجاگی فورم ءِ بنجاھی رھشون سارنگ جویو، سیدمسھود شاہ، جان محمد خاصخیلی، یٰسین ءُ دگہ رھشوناں یکجاھی درشان اِتگ۔

اے وھدءَ وی بی ایم پی ءِ وائس چیئرمین ماما قدیر بلوچ ءَ گُشتگ کہ مروچی ھزارانی کچ ءَ بلوچ ءُ سندھی وتی راجی اگبالانی جھد ءِ پُشدرءَ استانی ادارگانی بندیگ جاھاں لٹ ءُ کُٹ سگگ ءَ اَنت۔

ماما قدیر بلوچ ءَ گُشتگ کہ اے مچیانی تہءَ چہ شیرزالیں ماتانی دلیریں بچانی پئیم ءَ لھتیں مردم جتا بنت ءُ یک وشھالیں باندات ءِ ھاترءَ وتی جند ءِ واھشانی دیمھونی دئینت ءُ امل ءِ پِڑءَ ایر کپ اَنت ءُ وتی راج ءِ باندات ءِ سرءَ وتی مرچیگ ءَ ندر کن اَنت۔

ماما قدیر بلوچ ءَ گُشتگ کہ سندھی ءُ بلوچ بیگواھیں مردمانی کھولاں یکجاہ بئیگ ءُ وتی دوستیگیں مردمانی یل کنائینگ ھاترءَ توار چِست کنگ ءُ زھرشانی کنگ لوٹیت۔

آئی ءَ گُشتگ کہ اگں ما یکجاہ زوراکی ءِ ھلاپ توار چِست کنیں گُڑا زیت انساپ رسگءِ واھگ داشت کنیں۔

آئی ءَ گُشتگ کہ اے دمان ءَ بلوچستان ءَ سلتریں استانی زوراکی برجاہ اِنت ءُ ھمک روچی ھساب ءَ مردمانی زورانسری بیگواھی ءِ آماچ کنگ بئیگ ءَ اَنت۔

بلوچستان ءِ بنجاھی شھر شال ءِ جھمنندیں عظمی بلوچ ءَ گُشتگ کہ منی برات گوستگیں سال ءَ اکتوبر ءِ ماہ ءَ بیگواہ کنگ بیتگ۔

آئی ءَ گُشتگ منی برات انجینئر ظھیر بلوچ آئی کارگس “سمارٹ ویز کنسلٹنسی لمیٹڈ ائیرپورٹ روڈ کوئٹہ” ءِ گورءَ چہ بیگواہ کنگ بیتگ۔

آئی ءَ گُشتگ کہ منی برات ءِ سلامتی ءَ یل کنائنگ ءِ ھاترءَ منی کھول ءِ توار جوڑ بہ بئیت۔

زانگ بہ بیت کہ بلوچستان ءَ سیاسی جھدکاراں ھوار زند ءِ ھمک تکءَ سیادی داروکیں مردم ءُ سرکاری کاردارنی ھم زورانسری بیگواھیانی کیس ھم مدام دیما پیداک اَنت۔ بلوچستان ءِ سیاسی پاٹی ءُ انسانی ھقانی گل اے بیگواھیانی بھتام ءَ پاکستانی چیریں ادارگانی ءُ پوج سرءَ جن اَنت۔

بلوچستان ءَ چُشیں بازیں کیس دیما کائنت کہ مردم سالاں اگں بازیں ماھاں چہ بیگواھاں بلے آیانی کھول تُرس ءُ بیم ءِ سوب ءَ وتی کیساں نبشتہ نہ کن اَنت۔

بلوچستان ءَ زورانسری بیگواھیانی بگیری ءَ کارکنوکیں گل وائس فار بلوچ مسنگ پرسنز ءَ چہ ھما درستیں کھولاں دزبندی کُتگ کہ آیانی لوگ ءِ مردم بیگواہ کنگ بیتگ اَنت آ زیت ءَ چہ زیت وتی کیس آں نبشتہ بہ کناں۔

رکشان پھل ءِ سر ءَ برجاھیں پوجی پانگس ءِ سر ءَ اُرش کتگ یک کارمند ءِکُشتگ – مرید بلوچ

بلوچ آجوئی لوٹوکیں سلاہ بندیں گل بلوچ نیشنلسٹ آرمی ءِ جارکش مرید بلوچ ءَ رسانکدراں وتی شنگ کرتگیں درشان ءِ تہ ءَ گوستگیں شپ ءَ پنجگور ءَ پوجی پانگس ءِ سر ءَ بوتگیں دستی بمب ءِ اُرش ءِ زمّہ واری منّ اِتگ –

بی این اے ءِ جارکش مرید بلوچ ءَ گوشتگ کہ گوستگیں شپ ءَ مئے گل بلوچ نیشنلسٹ آرمی ءِ سرمچاراں گرمکان ءِ دمگ رکشان کور ءِ پھل ءِ سر ءَ برجاھیں زورگیریں پاکستانی پوج ءِ پانگس ءِ سر ءَ دستی بمب اُرش ءِ کتگ چریشی ءَ یک پوجی کارمند ءِ مرتگ ءُ یک ءِ زدگ بوتگ –

جارکش ءَ گڈسر ءَ وتی درشان ءِ تہ ءَ گوشتگ کہ مئے اے دابیں اُرش بلوچستان ءِ آجوئی ءَ تاں برجاہ مان انت –

نبشتانک: چہ وتی آجوئی ءَ دل پروش مہ بہ اِت

نبشتہ کار: ناکو راھی بلوچ

دی بلوچستان پوسٹ

دگنیا ءِ تہ ءَ ھرچ راجے کہ مرچی آجو اِنت ءُ وشیں زندے گْوازینگ ءَ اِنت اے ھم یک وھدے گلام بوتگ اَنت دگہ راجانی زونڈانی چیر ءَ بوتگ اَنت بلے مرچی آجو اَنت ءُ یک وشھالیں زندے گوازینگ ءَ اَنت۔

ھرچ راج کہ آجو اِنت ایشاں ھم پہ لوگ ءِ وپسگ ءَ آجوئی نہ رس اِتگ ایشاں ھم جھد کُتگ ایشاں ھم کربانی داتگ ایشاں ھم وتی وشی درست ویل کُتگ اَنت ھزار سکی ءِ دیم ءَ اوشتاتگ اَنت ایشاں ھم وتی ھون ریتکگ اَنت ایشاں ھم وتی سر کربان کُتگ اَنت اے ھم گار ءُ بے گواہ کنگ بوتگ اَنت اے ھم تھاریں بندیگانی تہ ءَ بندیگ کنگ بوتگ اَنت ایشانی چُک ھم چورہ کنگ بوتگ اَنت گھارانی سالونکیں برات چہ آھاں پُلگ بوتگ اَنت پتانی پیری ءِ ھسا برگ ءُ گار ءُ بے گواہ کنگ بوتگ لوگ ءُ جاگہ ماندارگ بوتگ اَنت بلکیں چہ وتی لوگاں لڈ ءُ بار کنگ ءَ لاچار کُتگ اَنت کسانیں جنین برتگ ءُ بندیگانی تہ ءَ بندیگ کتگ اَنت آھانی رھشون کشگ بوتگ اَنت انچوش کہ مرچی گوں بلوچ راج ءَ بوگ ءَ اِنت بلے آ ھاں وتی جھد ءِ تہ ءَ ھچ کمی نیاؤرتگ بلکیں روچ پہ روچ گیش کنان کُتگ مرچی آجو اَنت یک وشھالیں زندے گوازینگ ءَ اَنت درست ءَ آجو اَنت۔

نی من کایاں وتی بلوچ راج ءِ نیمگ ءَ کہ مرچی بلوچ راج ھم گلام اِنت بلوچ راج ءِ مڈی برگ بوگ ءَ اِنت بلوچ راج ءِ ھک ورگ بوگ ءَ اِنت درست بلوچستان ءِ تہ ءَ ھست، انگت بلوچ راج پہ شپ ءِ شامے ءَ در پہ در اِنت بزگ اِنت تیرانی دپ ءَ اِنت لگتانی چیر ءَ اِنت بلکیں پہ وتی لاپ ءِ ھاتر ءَ چم جھلی ھم کنگ ءَ اِنت وتی برات ءَ کوشارینگ ءَ اِنت وتی برات ءَ دستان ء وت کُشگ ءَ اِنت پرچا چوش اِنت گنجانی واجہ اِنت بلے انگت وار ءُ بزگ اِنت چے واستا ایشی ءِ سوب چے اِنت؟ ایشی ءِ مستریں سوب ایش اِنت کہ گلام اِنت گلامی ترا درست پرمائیت پرچاکہ تئی مھار تئی واگ دگرانی دست ءَ اَنت ھرچ نیمگ ءَ مھار ءَ تْرند کنت لاچار ئے ھما نیمگ ءَ بہ روئے۔

بلے ھیرانی گپ ایش اِنت کہ ما انگت وتی گلامی ءَ شری ءِ سر ءَ مارگ ءَ نہ ایں مئے تہ ءَ اے گلامی ءِ سان ءَ انچوش اَسر زرتگ کہ ھمے گلامی ءِ تہ ءَ ملار ایں ھچ ھوش ءَ ھم نہ ایں لھتے انگت ھمے گپ ءَ کنت چونیں آزاتیں ملکے اَت ایشاں گنتر ھراب کُت اے ھچ جاگہ مُلک آزات نہ کن اَنت گنتر ملک اِش ھراب کُت اگاں ایشانی دست ءَ آزات بوتیں گڑا اینچُک ءَ ایشاں آزات کُتگ اَت بژن بیت پہ چوشیں مردم ءِ پکر ءَ آزاتی ءِ واستا ھزارنی سال جھد کنگ لوٹ اِیت ھون ریچگ لوٹ اِیت کربانی دیگ لوٹ اِیت کماش ءَ بگر داں کسانیں زھگ ءَ مات ءَ بگر داں گھار ءُ زالبول ءَ درستاں درایگ لوٹ اِیت درستاں یک مشت ءُ تپاک بوگ لوٹ اِیت درستاں کربانی دیگ لوٹ اِیت نی بلکیں ترا آزاتی رس اِیت آزات بہ بہ ئے آزاتی ءِ واستا بلکیں سد سال لگ اِیت بلکیں گیشتر ھم لگ اِیگ۔

دومی ایش اِیت منی زانگ ءَ ھرچی گیشتر اے جھد بہ دار اِیت وھد بہ لگ اِیت گھتر اِنت پرچاکہ ھرچی کہ اے جنگ دیر ءَ دار اِیت سِل دو پوستیں مردم زاھر بیان بنت داں اے سِل ءُ بوچیں مردم ھلاس مہ بنت آزاتی نرس اِیت اگاں برس اِیت ھم اے پد ءَ وتی ھراب کاری ءَ بندات کن اَنت پرچاکہ یک مچی ھوشے ءِ تہ ءَ یک پپُکے پون بہ بیت درستاں پون کنت داں کہ اے سِلیں پون ھلاس کنگ مہ بنت آزاتی رسگ دروگے ایشانی ھلاس کنگ ءِ واستا بلکیں سالانی سال روت کول ء شھید سربلند ئیگ ءَ اے جنگ ءَ وتی جنگ بہ سمج اِت بیا اِت گوں اے جنگ ءَ ھوار بہ اِت وتی ماتیں گُلزمین ءَ آجو کن اِت وتی سِل ءُ لیگاراں بہ کش اِت اے پر گنجیں بلوچستان ءِ واجہ وت بہ اِت پرچا چوش بزگ ایں دگرانی چمدار ایں دگرانی گلامی ءَ کن ایں۔

راج پہ کُشگ ھلاس نہ بیت بلے راج ھما وھد ءَ ھلاس بیت کہ راج ءِ ورنا وتی پجار ءَ بے ھال کن اَنت گڑا بزاں کہ آراج ھلاس اِنت ترا ماتیں وتن توار ءَ اِنت پادا بلوچ۔

بلوچ بلوچی، بلوچستان سبز ءُ میزران بات اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کیچ ءِ ھند تمپ ءَ دو کس ءُ کولواہ ءَ چار کس پوج ءَ آوار جنگ ءَ پد بیگواہ کرتگ اَنت –

سر بیتگیں ھالانی رد ءَ کیچ ءِ دمگ تمپ ءَ پاکستانی پوج ءَ گوستگیں شپ ءَ دو لوگانی سر ءَ بیڑ برتگ ءُ دو کس آوار جنگ ءَ پد بیگواہ کرتگ اَنت-

دمگی مردمانی رد ءَ گوستگیں شپ ءِ ساھت سَے ءَ پاکستانی پوج ءَ تمپ ءِ ھند گومازی ءِ چیری بازار ءُ سری بازار ءَ دو لوگانی سر ءَ بیڑ برتگ ءُ اود ءَ دو کس آوار جتگ ءُ برتگ اَنت –

چہ تمپ گومازی ءَ آوار جنگ بیتگیں مردمانی پجار محبوب ء شیران ءُ سلیم ء ولی داد ءِ ناماں زانگ بیتگ اَنت –

دمگی مردمانی رد ءَ محبوب یک دکاندارے ءُ سلیم ورنائیں نودربرے کہ پوج ءَ آوار جتگ ءُ برتگ اَنت، اود ءَ پوج ءَ لوگاں جاڑیگیں مردم ترس ءِ آماچ کرتگ اَنت-

ھمے وڑ کیچ ءِ دمگ کولواہ ءَ پوج ءَ بیڑ برتگ ءُ چار کس آوار جتگ ءُ برتگ اَنت –

آوار جنگ بیتگیں مردمانی پجار سدیر ء علی بکش، ندیم ء سلیم، داد رھمان ء عبدالرھمان ءُ کریم بکش ء واجو ءِ ناماں زانگ بیتگ اَنت –

ھالانی تہ ءَ گوشگ بیتگ کہ اے ھرچاریں مردم کولواہ ءِ دمگ سگک تینگ بازار ءِ جھمنند اَنت ءُ اود ءَ پوج ءَ جنین ءُ چک ھم لَٹ ءُ کُٹانی نشانگ کرتگ اَنت-

بلوچستان ءَ پاکستانی پوج ءِ نیمگ ءَ مھلوک ءِ آوار جنیانی درچ یکشل ءَ برجاہ اَنت ءُ اشانی تہ ءَ گیشتریں لڑ نودربرانی گوشگ بیگ ءَ اِنت –

بلوچستان ءِ باپاری شھر ھب ءَ کاٹن کمپنی ءَ گیس ءِ لیکیج ءِ سبب ءَ تراکے بیتگ ءُ چریشی ءَ ھشت مردم زدگ بیتگ اَنت –

دو شمبے ءِ سھب ءَ ھب ءَ نزر چورنگی ءَ کاٹن کمپنی ءِ تہ ءَ گیس ءِ لیکیج ءِ سبب ءَ تراکے بیتگ – تراک ءِ توار دور دور ءَ اشکنگ بیتگ- تراک ءَ پد تچکائی بندات بیتگ اَنت-

ریسکیو ءِ واکدارانی رد ءَ تراک ءَ ھشت مردم ستکگ ءُ زدگ بیتگ اَنت – زدگ بیتگیں مردم سول ھسپتال برنس وارڈ ءَ برگ بیتگ اَنت –

گوستگیں روچ ءَ یکشمبے ءَ اسپینش فٹبال لیگ لالیگا ءَ دہ ٹیمانی میان ءَ گوازی کنگ بوتگ کہ آھانی تہ ءَ أوساسونا ءَ گرانادا دیم ءَ دو، ایٹلیک ءَ راؤ دیم ءَ یکے ءُ بارسلونا ءَ ایلوس دیم ءَ یک گول ءَ گوازی کٹ اِتگ وھدیکہ رئیل میڈریڈ ءُ ایلچی، رئیل سوسائیڈ ءُ گیٹفے دیمیگ بوتگ اَنت –

اسپینش لالیگا فٹبال گوازی ءِ اولی لیب گرانادا ءُ اوساسونا ءِ میان ءَ بوتگ کہ اوساسونا ءَ دو گول ءَ گوازی کٹ اِتگ وھدیکہ گرانادا ءِ نیمگ ءَ چہ ھچ گول اسکور کنگ نہ بوتگ – اوساسونا ءِ نیمگ ءَ چہ یک گولے ءِ ڈیوڈ گارسیا ءَ داتگ ءُ دومی گول کیکے ءَ داتگ –

دومی گوازی رئیل میڈریڈ ءُ ایلچی ءِ میان ءَ بوتگ کہ ھردو ٹیم دو دو گول ءَ دیمیگ بوتگ انت – گوازی ءِ اولی گول ایلچی ءِ لیبی ایل بوئے ءَ داتگ دومی گول ھم ایلچی نیمگ ءَ چہ لیبی فریملا ءَ داتگ -گوازی ءَ ھشتاد ءُ دومی ملٹ ءَ رئیل میڈریڈ ءِ نیمگ ءَ اولی گول اسکور کنگ بوتگ کہ لیبی ایل.مودرِک ءَ داتگ ھمے وڈ نودمی ملٹ ءَ اِی. میلتاو ءَ دومی گول اسکور کتگ ءُ پد ءَ ھر دو ٹیمانی نیمگ ءَ.چہ ھچ گول اسکور کنگ نہ بوتگ –

سیمی گوازی ءَ رئیل سوسائیڈ ءُ گیٹفے ءِ میان ءَ بوتگ کہ ھردو ٹیمانی نیمگ ءَ چہ ھچ گول اسکور کنگ نہ بوتگ ھردو ٹیم دیمیگ بوتگ انت –

چارمی گوازی ءَ ایٹلیٹک ءَ راؤ والکینیو یک گول ءِ بُرتگ – راؤ ءِ نیمگ ءَ چہ ھچ گول اسکور کنگ نہ بوتگ – ایٹلیٹیک ءِ نیمگ ءَ چہ لیبی این.سرانو ءَ گول اسکور کتگ گوازی وتی ٹیم ءِ نام ءَ کتگ –

اسپینش لالیگا گوازی ءِ گوستگیں روچ ءَ پنچمی گوازی بارسا ءُ ایلوس ءِ میان ءَ بوتگ کہ بارسا ءَ ایلوس یک گول ءَ بُرتگ – ایلوس نیمگ ءَ چہ ھچ گول اسکور کنگ نہ بوتگ بارسا ءِ لیبی ایف.ڈی جونگ ءَ دومی ھاپ ءَ ھشتاد ءُ ھپتمی ملٹ ءَ گول اسکور کتگ گوازی وتی ٹیم ءِ نام ءَ کتگ –

دومی نیمگ ءَ یورپئین پریمئیر لیگ فٹبال گوازی ءَ گوستگیں روچ ءَ یکشمبے ءَ ھشت ٹیمانی میان ءَ گوازی کنگ بوتگ کہ آھانی تہ ءَ لیور پول ءُ چیلسیا ءَ دو دو گول ءَ گوازی کٹ اِتگ –

پریمئیر لیگ ءِ اولی گوازی کریسٹال فلیس ءُ لیور پول ءِ میان ءَ کنگ بوتگ کہ لیور پول ءَ سَے پہ یک گول ءَ گوازی کٹ اِتگ – کریسٹال فلیس ءِ نیمگ ءَ چہ یک گول ءِ اسکور کنگ بوتگ ءُ لیور پول ءِ نیمگ ءَ سَے گول اسکور کنگ بوتگ –

دومی گوازی ارسنل ءُ برنلی ءِ میان ءَ بوتگ کہ ھردو ٹیم دیمیگ بوتگ انت ھچ ٹیم ءِ نیمگ ءَ چہ گول اسکور کنگ نہ بوتگ- وھدیکہ سیمی گوازی ءَ برائیٹون ءُ لیسسٹر سٹی یک یک گول ءَ دیمیگ بوتگ انت – گوازی ءِ چِل ءُ ششمی ملٹ ءَ لیسسٹر سٹی ءِ لیبی پی.ڈاکا ءَ یک گول ءِ اسکور کتگ وھدیکہ لیبی ڈی.ویلبیک ءَ برائیٹون ءِ نیمگ ءَ چہ گول موکتگ-

پریمئیر لیگ ءِ چارمی گوازی ءَ چیلسیا ءَ ٹوٹنہم ءَ دیم ءَ دو گول ءَ گوازی کٹ اِتگ – ٹوٹنہم ءِ نیمگ ءَ چہ ھچ گول اسکور کنگ نہ بوتگ وھدیکہ چیلسیا ءِ لیبی ایچ.زئیچ ءُ ٹی.سیلوا ءَ یک یک گول ءِ اسکور کتگ گوازی وتی ٹیم ءِ نام ءَ کتگ –

ھک دے تھریک بلوچستان ءِ اھوالی کمیٹی پنجگور ءِ سروک گوستگیں صوبائی وزیر غلام جان بلوچ ، نائب سروک مولانا نور محمد مدنی ءُ دگراں پنجگور پریس کلب دیم ءَ پریس کانفرنس کنان ءَ گوشتگ کہ سیمسر ءِ کار ءُ بار ضلعی انتزامیہ ءَ دیگ بہ بیت ءُ سیمسر ءَ گیش روگ آھگی راہ پچ کنگ ءِ لوٹ کتگ ءُ گْوشتگ کہ چیدگی پترگ ءِ راہ ءَ مساپراں پترگ آسراتی شپ ءَ چہ روچ ءَ وھد دیگ بہ بنت-

آئی ءَ گْوشتگ کہ راج مولانا ھدایت الرحمان ءِ ھمراہ ءَ اِنت صوبائی ھکومت کتگیں مھادانی سر ءَ چست ایر ءَ باور بہ کنائین اِیت سرجمیں بے مکسدیں چیک پوسٹاں ھلاس بہ کن اَنت-

ھک دے تھریک پنجگور ءِ راھشون ءَ گْوشتگ کہ ھکومت ءُ مولانا ھدایت الرحمان ءِ میان ءَ مھاد بوتگ اَنت ءُ اشانی سر ءُ چست ءُ ایر بہ بیت، مھاد ءَ یک ماھے سرجم بوتگ ءُ آؤکیں روچاں کاراں ھما وڑ مولانا ھدایت گوش اِیت پنجگور راج ھک دے تھریک ھمراھداری ءَ کنت-

آیاں گْوشتگ کہ سیمسر ءَ زوت ضلعی انتزامیہ ءَ دیگ بہ بیت ءُ راج ننگ ءُ ناموس ءِ ھیال داری ءَ بہ کن اَنت-

آیاں گوشتگ کہ انتزامیہ سرجمیں مردماں گوں ازت ءَ سرُ کار ءِ پابند اِنت- مردمانی باپاری ءِ سرجمیں جنجال گار کنگ بہ بنت پنجگور سیمسر ءَ چہ ورگی توژگ ءُ گیس سلنڈر آرگ موکل بدے اَنت-

آیانی گوشگ اِنت کہ سیمسر ءَ جتائیں روگ ءُ آھگ دراں گم ءُ وشی ءَ مردمانی روگ ءُ آھگ ءِ ھاتر ءَ ارزان بہ کن اَنت اے درگت ءَ گر گزبستان ءُ تمپ کرانسگ ءَ پوائنٹ ءَ مردمانی روگ ءُ آھگی ءِ ھاتر ءَ پچ بہ کن اَنت دانکہ مردم وتی مرزی ءَ برو اَنت بیا اَنت پرچاکہ سیمسر ءِ مردمانی یک ءُ دومی ءَ ھونی سیادی ھست اِنت اگاں یک براتے سیمسر ءِ اے نیمگ ءَ اِنت گُڑا گھار یا دومی برات آ سر ءَ اِنت

ھمے ماہ ءَ پاکستانی پوج ءِ دست ءَ آوار جنگ بیتگیں یک ورنایے ءِ لاش مروچی مستونگ ءِ دمگ گھڈ کوچہ ءَ مستونگ انتزامیہ ءَ دزکپتگ –

مستونگ لیویز انتزامیہ ءِ رد ءَ آیان کھڈ کوچہ ءِ کوھی دمگاں لاش ءِ ھال ءِ رس اِتگ چریشی ءَ پد انتزامیہ ءَ لاش چست کرتگ ءُ ڈی ایچ کیو ھسپتال مستونگ ءَ رسینتگ –

ڈاکٹرانی رد ءَ ورنا ءِ لاش دو روچ پیسریگین اِنت کہ تیر جنگ ءُ کُشگ بیتگ لاش مستونگ ءِ جھمنندیں ورنائیگ اِنت –

ٹی بی پی ءِ پٹ ءُ پول ءَ پد سرپدی رس اِتگ انتزامیہ ءَ دزکپتگیں لاش زورانسری آوار جنگ بیتگیں نعمت اللہ ء عرح مھمد ئیگ اِنت کک ھمے سال ءَ پاکستانی پوج فرنٹیئر کور ءِ کارمنداں لکپاس ءَ دزگیر کرتگ ءُ برتگ –

نعمت اللہ ءِ کھول ءِ رد ءَ ھمے سال ءِ ھبدہ جنوری ءَ نعمت اللہ ء عرض مھمد سیکورٹی پورسز ءَ لکپاس مستونگ ءَ دزگیر کنگ ءَ پد ناشناسیں جاھے ءَ برتگ چریشی ءَ پد نعمت اللہ بیگواہ بیتگ – کھول ءَ بیگواھیں مردمانی گل وائس فار بلوچ مسنگ پرسنز ءِ را نعمت اللہ ءِ زورانسری ءِ ھال سر کرتگ –

بیگواھیں مردمانی توار چست کنوکیں گل وائس فار بلوچ مسنگ پرسنز ءِ رد ءَ بلوچستان ءَ ھزارانی کچ ءَ مردم آوار جنگ بیتگ اَنت – گل ءِ گوشگ اِنت اے بیگواھیں مردمانی تہ ءَ بازیں مردم لٹ ءُ کُٹانی نشانگ کنگ بیتگ ءُ کشگ بیتگ اَنت پد ءَ آیانی لاش چگل دیگ بیتگ اَنت –

سربوتگیں ھالانی رِد ءَ بلوچستان ءِ دمگ پنجگور ءَ مروچی یکشمبے روچ ءَ ناشناسیں مردماں پاکستانی پوج ءِ پانگِس ءِ سر ءَ اُرش –

گیشیں ھالانی رِد ءَ ناشناسیں مردماں گرمکان ءِ دمگ رکشان کور ءَ برجاھیں پوجی پانگِس ءِ دستی بمب ءِ چگل داتگ کہ پانگس ءِ تہ ءَ.کپتگ ءُ ترکیتگ – گمان بیت کہ پوج ءَ جانی تاوان ءِ دیمپانی بوتگ بلے تنی وھدی پوج ءِ بنشون ءِ نیمگ ءَ اے درگت ءَ ھچ وڈیں درشان دئیگ نہ بوتگ –

زانگ بہ بیت اے دمگاں پیسر ءَ ھم پاکستانی پوج ءِ سر ءَ اُرش کنگ بوتگ کہ اُرشانی زمہ واری بلوچ راجی آجوئی لوٹوکیں سلاہ بندیں گلاں منّ اِتگ انت بلے تنی وھدی اے اُرش ءِ زمہ واری ھچ گل ءَ نہ منّ اِتگ –