TBP Balochi

بلوچستان ءِ دمگ زیارت ءِ ھند ءَ مساپر بریں بس ءِ سر ءَ تیرگواری ءِ وئیل ءَ دو مردم بیران ءُ وھدے کہ دو ٹپی بوتگ اَنت-

دمگی مردمانی رِد ءَ زیارت زندرہ ءِ ھند سر ءَ بس ءِ تہ ءَ سواریں مردمے ءَ تیرگواری کتگ ءُ دو مردم کُشتگ اَنت ءُ وھدے کہ دو ٹپی بوتگ اَنت-

بیران بوتگیں مردمانی تہ ءَ بس ءِ ڈرائیور ءُ منشی ھوار اَنت وھدے کہ دگہ مساپر ٹپی بوتگ اَنت-

دمگی واکدار وئیل جاہ ءَ سر بوتگ اَنت لاش دستیگ کتگ ءُ ٹپی نادُراھجاہ ءَ سر کتگ اَنت-

دمگی واکدار ءِ رِد ءَ اُرشکارانی پٹ ءُ پول برجاہ ءَ اِنت ءُ وئیل سوب انگت زانگ نہ بوتگ-

دمگی واکدار ءِ رِد ءَ مساپر بریں بس چہ شال ءَ ملتان ءَ روگ ءَ بوتگ-

بلوچستان ءِ دمگ کیچ ءِ بنجاھی شھر تربت ءَ سر بیتگیں ھالانی رد ءَ چاگردی باسک ندیم حسرت گوں وتی ھمراہ ءَ بیگواہ کنگ بیتگ –

چاگردی باسک ندیم حسرت احساس دسترخوان ءِ کک مصطفیٰ پاکستانی پوج ءُ چیریں ادارھاں آوار جتگ ءُ بیگواہ کرتگ اَنت-

احساس ویلفیئر ٹرسٹ ءَ ھردوکیں باسکانی بیگواھی ءِ ھال راست کرتگ-

زانگ بہ بیت گوستگیں سال ءَ اوست ویلفیئر آرگنائزیشن ءِ سَے باسک مھمد جان دشتی، قیوم وفا بلوچ، ملا لیاقت ولی ھم آوار جنگ بیتگ اِت اَنت پد ءَ سیکورٹی ادارھاں یل کتگ اِت اَنت-

بلوچ لبریشن آرمی ءِ جارکش جیئند بلوچ ءَ وتی نوکیں درشانے ءَ آپریشن گنجل ءِ آسری ءِ جار جتگ-

جارکش ءِ گوشگ اِنت کہ پنجگور ءُ نوشکی ءَ بلوچ لبریشن آرمی ءِ مجید بریگیڈ بندات بوتگیں آپریشن گنجل ھپتاد ادار ءِ برجاھی ءَ پد پنجگور ایف سی بنجل ءَ ساڑی ئیں ھپتیں پدائی پہ سرڈگار ءَ پد ءَ بوتگ اَنت-

آپریشن گنجل ءَ مجید بریگیڈ ءِ شانزدہ پدائی ھوار بوتگ اَنت ءُ اشانی تہ ءَ نُھ نوشکی ءِ ایف سی ءِ بنجل ءُ ھپت ءَ پنجگور ءِ بنجل ءَ اُرش ءَ بھر زرتگ-

جیئند بلوچ ءَ گُڈسر ءَ گوشتگ کہ کمو رند ءَ سرجمیں ھال شنگ کنگ بنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ بالگتر ءَ پاکستانی پوج ءِ گوم ءَ میڑ ءَ شھید بوتگیں سمیر بلوچ ءَ را دروت ندر کُتگ ءُ گوشتگ کہ چار فروری ءَ پنجگور ءِ دمگ بالگتر لوپ ءَ مئے سرمچار تر ءُ تاب ءَ دراتکگ بوتگ انت کہ پاکستانی پوج ءُ دمگی ڈیت اسکواڈ ءِ گون ڈیک کپتگ انت – دو ادار ءِ میڑ ءَ سرمچار سیکنڈ لیفٹینٹ سمیر پنام نصیب ء جان محمد جھمنند شاپک ڈنڈال تمردی ءَ گوں دژمنیں پوج ءِ گوم ءَ جنگ دیان ءَ شھید بوتگ ءُ وتی سنگت پہ وشی جنگ جاہ ءَ در کُتگ انت – اے میڑ ءَ دژمنیں پوج ءِ بازیں کارمندے مُرتگ ءُ زدگ بوتگ اَنت –

جارکش ءَ دیمتر ءَ گوشتگ کہ لیفٹنٹ سمیر بلوچ سال دوھزار ءُ سینزدہ ءَ گوں گل ءَ ھمگرنچ بوتگ آئی ءِ وتی جنگی رپک ءُ ھنراں چہ آ لیفٹینٹ ءِ اگدھے سر ءَ بوتگ – شھید سمیر یک کابل ءُ چیریں جنگی زانتکاریں سنگتے بوتگ آئی ءَ بازیں جنگانی تہ ءَ دژمن پوج بے سوب کُتگ –

جارکش میجر گوھرام بلوچ ءَ گوشتگ کہ ھمے میان ءَ پاکستانی پوج ءَ یک روچ ءِ ساری الطاف ء جاڑو چہ تجابان ءَ زورانسری آوار جتگ پد ءَ کُشتگ ءُ آئی ءَ سرمچار ءِ زاھر کنگ ءَ اِنت –

بلوچستان ءِ بنجاھی شھر شال ءَ زھرناکیں گیس ءِ پُر بیگ ءِ اشکرانی کاریزءَ تراک ءِ سوب ءَ پنچ کاریزکار بیران ءُ سَے ٹپی بیتگ اَنت۔

پولیس ءِ ردءَ وئیل پرائیوٹ کوئل مائن ءَ دوشی شپ ءَ بیتگ کہ آودہ زھرناکیں گیس پُر بیگ ءِ سوب ءَ تراک بیتگ وھدیکہ دو کاریزکار سلامتی ءَ گوں رکینگ بیتگ اَنت۔

بیران بیتگیں کاریزکارانی جون ءُ ٹپیگ سول ھسپتال شال ءَ برگ بیتگ اَنت کہ آودہ ھژدری کارانی کنگ ءَ پد جون سیادانی دستءَ دیگ بنت۔

ڈیرہ بگٹی ءَ چہ سر بیتگیں ھالانی ردءَ 28 جنوری ءَ بلوچستان ءِ دمگ ڈیرہ بگٹی ءِ سوئی ھنکین ءَ بمب تراک ءَ ٹپی بیتگیں لیویز کارمند نواب دین بگٹی علاج ءِ نیام ءَ مُرتگ۔

اے تراک مُرتگیں مردمانی کساس نواب دین بگٹی ءَ ھوار پنچ بیتگ۔

زانگ بہ بیت کہ 28 جنوری ءَ یک بمب تراک یے سوب ءَ ھپت مردم کُشگ ءُ ٹپی بیتگ اِت اَنت اُرش ءِ آماچ بیتگیں مردمانی سیادی گوں سرکاری پُشت پدءَ کار کنوکیں ٹولی ءَ گوں گُشگ بیتگ اَت۔

مروچی مُرتگیں نواب دین بگٹی یکیں چہ ھما مردماں بیتگ کہ آ بلوچ ریپبلکن پارٹی ءِ سروک براھمدگ بگٹی ءِ زنڈیں مخالف اَنت۔ نواب دین بگٹی ءِ مزنیں کساس ءَ براھمدگ بگٹی ءِ ھلاپ ءَ کشتگیں تامر چاگردی رسانکدراں گندگ بنت۔

بلوچستان ءِ دمگ چہ نوشکی ءَ پاکستانی پوج ءَ دو مردم دزگیر کنگ ءَ پد بیگواہ کرتگ اَنت-

ھردوکیں مردم نوشکی ءِ دمگ کلی جمالدینی ءَ آوار جنگ بیتگ اَنت، ورنایانی پجار عاصم ءُ وحید ءِ ناماں زانگ بیتگ اَنت-

زانگ بہ بیت نوشکی ءَ گوستگیں سَے روچاں دامگی ھال بند اَنت ءُ چریشی ءَ گیشیں سرپدیانی گرگ ءَ جنجالانی دیمپانی اِنت-

بلوچ لبریشن آرمی ءِ جارکش جیئند بلوچ ءَ وتی آفیشیل چینل ھکّل ءَ شنگ کرتگیں نوکتریں درشان ءِ تہ ءَ گوشتگ کہ پنجگور ءَ ایف سی ءِ بنجل ءِ سر ءَ شست ادار ءَ گیش انت کہ بی ایل اے مجید بریگیڈ ءِ دستیگ انت ءُ بلوچ پدائیاں انگت بنجل ءِ سر ءَ دستیگی مھکمی ءَ گوں برجاہ داشتگ –

آئی ءَ گوشتگ کہ زورگیریں پاکستانی آرمی ءِ ایس ایس جی کمانڈراں کساس پنچ ادار ءَ پیسر یکرندے پد ءَ بنجل ءِ تہ ءَ پُترگ ءِ کوشست کُتگ کہ بلوچ پدائیاں تمردی ءَ گوں آھاں جنگ داتگ ءُ بے سوب کُتگ انت ءُ دژمن چد ءُ گیشتر جانی تاوان داتگ – تنی وھدی بس پنجگور ءِ تہ ءَ پدائیاں کساس ھشتاد پوجی کارمند کُشتگ اَنت –

جارکش ءَ گوشتگ کہ دو فروری ءِ بیگاہ ءِ ادار ھشت ءَ پنجگور ءِ بنجل ءِ سر ءَ دستیگی بندات کنگ بوتگ کہ مروچی پنچ فروری ءِ سھب ءِ ادار ھپت ءَ مھکمی ءَ گوں برجاہ انت – اے درگت ءَ گیشیں ھال زوت شنگ کنگ بنت –