TBP Balochi

ندر پہ مجید برگیڈ ءِ سپایانی نام ءَ

شائر:سلیم ناز

دی بلوچستان پوسٹ

سنگراں نشتگیں سپایاں
لشکر ءَ پروش دات پدایاں

سُهرچکیں دروت بِبات جنگولاں
راج ءِ بامردیں سر متایاں

هاک ءِ وارس زمین ءِ پرزنداں
دژمناں دائم پہ تبایاں

داتگیں داداں تئی مجید برگیڈ
کل بلوچ منزل ءَ پہ راهیاں

گڈی جنگ اِنت توکل ءَ دار اِیت
در کپ اِت چہ شپانی سیاهیاں

مارا شهیدانی هون ءِ سوگند اِنت
جنرل ءِ راهے من وپایاں

زورانسری آوار جنی ءِ بگیری ءَ وائس فار بلوچ مسنگ پرسنز ءِ شُدکشیں ھڑتالی بُنجل ءَ 4582 ءَ روچ سرجم بیتگ، سندھ سجاگی فروم ءِ بُنجاھی راھشون سارنگ جویو ، فرحان سید مسعود ، شاہ سوینی ، مریم سندھی ءُ دگراں دلپدردی درشانی کتگ-

ھمے درگت ءَ گل ءِ وائس چیئرمین ماما قدیر بلوچ ءَ گْوشتگ کہ مزن ھور ڈیھ متھدہ ارب امارات ءَ دگہ یک دگہ بلوچے عبدالحفیظ زھری گوستگیں ماہ ءَ لوگ ءَ چہ زورانسری آوار جتگ ءُ گوستگیں روچاں بے کانودی ءُ بید پاسپورٹ ءَ پاکستانی چیریں ادارھانی دست ءَ داتگ-

آئی ءَ گوشتگ کہ انسانی ھکانی ادارہ متھدہ ارب امارات ءَ جُست بہ کنت ءُ عبدالحفیظ زھری ءِ پت ، برات ءُ کھول ءِ بازیں مردمے ریاستی ڈیتھ اسکواڈ ءِ کارندھانی دست ءَ کُشگ بوتگ اَنت مارا آئی ءِ زند درگت ءَ تُرس اِنت-

آئی ءِ گوشگ اِنت کہ انسانی ھکانی گل بلوچستان، پشتونخوا ءُ سندھ ءَ ریاستی ادارھانی زوراکی ءِ بگیری ءَ توار چست کنگ الّمی اِنت-

آئی ءَ دیمتر ءَ گوشتگ کہ زیک آ جاور بلوچستان ءَ بوتگ اَنت نو آ سندھ ءَ ھم بوگ ءَ اَنت-

آئی ءَ گوشتگ کہ ریاست ءَ بلوچستان ءَ جاوراں چہ سبک سکگ لوٹ اِیت تاکت ءِ زور ءَ ھچ وڑیں جیڑہ شر نہ بنت-

دی بلوچستان پتر ءَ سربوتگیں ھالانی رِد ءَ بلوچستان ءِ بنجاھی شھر شال ءَ پاکستانی پوج ءَ ورنایے زورانسری آوار جتگ ءُ بیگواہ کُتگ –

گیشیں ھالانی رِد ءَ گوستگیں شپ ءَ پاکستانی پوج ءُ چیریں ادارھانی کارمنداں شال ءِ دمگ مینگل اسٹریٹ ءَ حاجی نثار احمد ءِ گِس ءَ بیڑ برتگ ءُ زوراکی کنان ءَ لوگ ءِ مردم لٹ شاپ کُرتگ انت ءُ یک ورناھے زورانسری آوار جتگ ءُ گون وت برتگ – وھدیکہ پوج ءَ گِس ءِ تہ ءَ پٹ پول کُتگ پُروشت پروش ھم کُتگ –

زورانسری آوار جنگ بوتگیں ورناہ ءِ پجار ہارون ء حاجی نثار احمد نام ءَ چہ بوتگ –

دمگی اھوالکار ءَ آوار جنی ءِ ھال راست کُتگ گوشتگ کہ اے وئیل دوشی شپ بوتگ ءُ پوج ءُ چیریں ادارھانی لٹ شاپ کنگ ءَ گِس ءِ اندگہ مردم ٹپی بوتگ انت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ کیچ ءِ دمگ گیبن ءَ یوفون ٹاور ءِ ماندارگ ءِ زمّہ واری منّ اِتگ –

جارکش ءَ گوشتگ کہ کیچ ءِ دمگ گیبن ءَ مئے سرمچاراں پاکستانی ٹیلی کمیونیکیشن ءِ یوفون ٹاور ءِ سر ءَ اُرش کتگ ءُ آئی ءِ ٹاور ءُ مشینری مانداشتگ اَنت-

بلوچ نیشنلسٹ آرمی ءِ جارکش مرید بلوچ ءَ رسانکدراں وتی شنگ کرتگیں درشان ءِ تہ ءَ نوشکی ءُ پنجگور ءَ زورگیریں پاکستانی پوج ءِ ھیڈکوارٹرانی سر ءَ پدائی اُرشاں بھر زورکیں پُسگ یونٹ کماندار حامد رحیم پنام زبیر، یونٹ کمانڈر بادل بلوچ پنام ریاست،جمال پنام چاچا، میرین جمالدینی پنام زگرین، ناسر امام پنام ھمل، انیل بلوچ پنام بالاچ،سمیع سمیر پنام شعیب، عزیز زہری پنام بارگ،الیاس بلوچ پنام قادر،یاسر نور پنام سیف،اسد واھگ پنام سبزو، مُراد آجو پنام بابا،ضمیر بلوچ پنام فراز، ابراھیم پنام کبیر، بلال بلوچ پنام واھد جان، دیدگ بہار پنام رؤف دروت ندر کتگ ءُ آھانی ستاشانی کُتگ –

آئی ءَ گوشتگ کہ یک گوستانکی جنگ ءِ تہ ءَ بلوچ سرڈگار ءِ پدائیاں راجی جنگ ءَ نوکیں داب ءِ داتگ، بلوچ پرزند ھما جزبگ ءِ گوم ءَ زورگیریں پوج ءِ گوم ءَ جنگ دیگ انت – دژمن ءَ بلوچ سرڈگار ءَ چہ درکنگ ءِ ھاتر ءُ راجی جنگ ءِ تہ ءَ پدائی اُرش یک جوانیں جنگے لیکیت ءُ بلوچ نیشنلسٹ آرمی بی ایل اے مجید برگیڈ پلامرزی ءُ آئی ءِ کمک کنگ ءَ برجاہ داریت –

دومی نیمگ ءَ کلانیں رھشون عبدالنبی بنگلزئی ءَ چاگردی ترامجاہ ٹوئیٹر ءَ وتی درشان ءِ تہ ءَ گوشتگ کہ بلوچستان ءَ چہ پاکستانی ایردستی ءَ رکینگے ھاتر ءَ درسیں جھدکار، سرمچار ءُ شھید ءُ پدائیاں سھرچکیں دروت –

آئی ءَ بلوچ راج ءُ سرڈگار ءِ سر نشتگیں درسیں مھلوکاں چہ لوٹ کتگ گوشتگ کہ آجوئی ءِ ھاتر ءَ زرمبشت ءِ بھر جوڈ بہ بئے ءُ پاکستان ءَ لاچار بہ کنیت کہ ایردستیں راج سندی، بلوچ ءُ پشتونانی آجوئی ءَ بہ منّ ایت ءُ در بئیت ءُ بروت –

ھمے وڑ بی این اے ءِ رھشون سرفراز بنگلزئی ءَ چاگردی ترامجاہ ٹویٹر ءِ تہ ءَ نبشتگ کہ نوشکی ءُ پنجگور ءِ شھیداں سھر چکیں دروت – آئی ءَ گوشتگ کہ مجید برگیڈ ءِ سرمچاراں ماتیں سرڈگار ءِ ھاتر ءَ وتی جان کربان کُتگ ءُ راجدپترے نبیستگ وتی دلیری ءُ جوانمردی ءَ سرجمیں راج ءِ سر بُرز بالا کُتگ-

بلوچستان ءِ دمگ چہ پنجگور ءَ سر بیتگیں ھالانی رد ءَ یک ورنایے ءَ وتکشی کتگ ءُ ھمے وڑ پنجگور ءَ یک لاشے دزکپتگ-

سر بیتگیں ھالانی رد ءَ وشبود ءُ چتکان ءَ دو لاش دزکپتگ اَنت – دزکپتگیں لاشانی تہ ءَ مھتشم کہ وشبود ءِ جھمنند اِنت آئی ءَ ساد گُٹ ءَ کتگ ءُ وتی زندگی آسر کتگ-

تنی وھدی وتکشی ءِ سبب زانگ نہ بیتگ-

دومی نیمگ ءَ چہ چتکان ءَ ندیم ابدال نامیں مردمے ءِ لاش دزکپتگ-

کُشگ بیتگیں ندیم ابدال نیمساریں مردمے بیتگ دمگی مردمانی رد ءَ اے نیمساریں مردم گوستگیں روچ ءَ پوج ےَ تیرجتگ ءُ کشتگ-

بلوچ لبریشن آرمی ءَ پنجگور ءُ نوشکی ءِ اُرشانی ھال شنگ کنان ءَ گوشتگ 2 فروری 2022 ءِ شپ ءِ 8 بج ءَ آپریشن گنجل بندات بیتگ کہ اشی ءَ بی ایل اے مجید بریگیڈ ءَ 72 اداراں دراجیں جنگ ءَ پد وتی دراھیں مول ءُ مراد سوبمندی ءِ نیمگ ءَ آورتگ اَنت-

جارکش ءَ گشتگ آپریشن گنجل ءَ مجید بریگیڈ ءِ شانزدہ پدائیاں بھر زرتگ، چریشانی تہ ءَ نُھ پدائیاں نوشکی ءُ ھپت ءَ پنجگور ءَ بھر زرتگ – پدائیاں ھپتاد ءُ دو ادارانی جنگ ءَ دشمن ءِ دو جتا-یں بنجل دستیگ کتگ اَنت، اے وھداں دشمن ءِ سَے آفسراں ھوار یک سد ءُ نود ءُ پنچ پوجی کارمند کشتگ اَنت، اشانی تہ ءَ نود ءَ گیش نوشکی ءَ کشگ بیتگ اَنت، نوشکی ءَ کُشگ بیتگینانی تہ ءَ ایف سی ءِ پنجاہ ءُ پنچ کارمند، چہ شال لوٹارینگ بیتگیں ھژدہ ایس ایس جی کمانڈور ءُ ھپت فائیو لائٹ کمانڈوز ھوار اَنت ءُ پنجگور ءَ کساس کم چہ کم یک سد ءُ پنچ کارمند مرتگ اَنت ءُ اشانی تہ ءَ ھشتاد ءُ پنچ ایف سی ءِ کارمند، بیست ایس ایس جی کمانڈوز ھوار اَنت، اے وھداں یک پوجی ڈرونت جتگ ءُ دور داتگ، یک ھیلی کاپٹرے نشانگ کرتگ کہ آئی ءِ کپگ ءِ راستی نہ بیتگ، دو بکتر بند گاڑی تباہ کتگ اَنت ءُ ھمے وڑ ھردوکیں بنجلاں تاوانباری داتگ –

جارکش ءَ گُشتگ ات آپریشن گنجل ءِ نام بلوچ لبریشن آرمی ءِ کلات بنجل ءِ کماندار “کمانڈر گنجل پنام ءِ کامریڈ مزسر ء لکا سکونت لیاری کراچی ” ءِ نام ءَ ایر کتگ – کمانڈر گنجل مجید بریگیڈ ءِ یک پدائی ءِ بیتگ ءُ نوشکی ءُ پنجگور ءَ بیوکیں اُرشانی نا ایوک ءَ بھر مند بیوک بیتگ بلکیں آپریشنل کمانڈر ھم بیتگ، بلے اے آپریشن ءَ پیسر بیست ءُ چار ستمبر ءَ وتی پنچ ھمراھانی ھمراھی ءَ کلات بنجل ءِ پھریزگ ءَ دشمن ءِ ترندیں بیڑ ءَ شھید بیتگ-

جارکش ءَ گوشتگ کہ آپریشن گنجل ءِ مول ءُ مراد ایوک ءَ ناں زورگریں پاکستان بلکیں سرجمیں دنیا ءِ دیم ءَ یک منّانکے ایر بیتگ بلوچ زرمبشت کجام ترندیں اُرش کُت کنت- آپریشن گنجل اے واستا درشان اِنت مروچی بلوچ ورنا آجوئی ءِ پدریچ ءَ کجام ھم کچ ءَ شت کن اَنت ءُ واک ءَ داشت کن اَنت – بلوچ زرمبشت ءِ آجوئی ءَ وتی سرڈگار ءَ گوں بندوک اَنت ءُ بلوچ زرمبشت ءِ زور بلوچ مھلوک اِنت- اے دراھیں پدائی بلوچستان ءِ وانندگیں ورنا بیتگ اَنت ءُ درست ھمے ڈگار ءَ ودی کتگ اَنت ءُ رھبر ء کاروان شھید جنرل اسلم بلوچ ءِ رندپداں روگ ءُ ڈیھ ءِ پھریزگ ءَ نمیران بیتگ اَنت – اے گپ زانگ لوٹ ایت کہ اے زرمبشت ھمساھگیں ڈیھانی جاورھانی مٹ بیگ ءَ ھلاس بیت نہ کنت ءُ ناکہ دشمن ءِ گواتیں پندلانی سر ءَ آسر کپت کنت – ما انسانی جانانی نھاد ءَ سرپد اِنت ءُ کوش تُری کجامی ءِ بہ بیت آئی ءِ سر ءَ وشی درشان کت نہ کن ایں اگاں پاکستان ھون ءِ دریا ءَ ھونریچی ءَ ابید امن لوٹ ایت گڑا ما کجام رنگ ءَ میان اُستمانی پتر ءَ پاکستان ءَ گپ ءُ تران ءِ داوت ءَ دے ایں چریشی ءَ پاکستان ءِ پوج سرجم ءَ بلوچستان ءَ درایگ ءُ بلوچستان ءِ آجوئی ءِ بنگپ ءِ سر ءَ گپ ءُ تران ءَ جاڑیگ اِنت-

اگاں پاکستانی آرمی اے وڑیں کُشت ءُ ھون ءَ یل دات نہ کنت گڑا ما آئی ءَ بیھار دے ایں کہ مئے آوکیں اُرش اشی ءَ گیش ترندتر بنت ءُ ما وتی ڈیھ ءِ پھازگ ءَ اے جنگ ءَ پاکستان ءِ کجام کُنڈ ءَ کُرت کن ایں ءُ اشی ءِ زور ءُ توانی ھم ھست اِنت، ما پنجاپ ءَ اے کلوہ ءَ دیگ لوٹ ایں آ وتی زھگاں جنرلانی دیمپانی ءَ میل اَنت ءُ وتی پوج ءَ بلوچستان ءِ درایگ ءَ زور ءَ بہ دے اَنت ءُ شمئے پوج وتی زورگری ءَ مھکم کنگ ءِ واستا بنگلہ دیش ءِ وڑ ءَ بلوچ نسل کشی، ھرابکاری ءُ لوٹ ءُ پل ءَ دزبند اِنت-

بی ایل اے چین ءَ یک رندے پد ءَ اے بیھار ءَ دنت کہ آ بلوچستان ءِ مڈیانی پَلپھانچی ءُ بلوچستان ءِ سر ءَ پاکستان ءِ زورگری ءِ مھکم کنگ ءَ وتی پالیساں پشکنز بہ بیت اگاں ناں گڑا مئے نشانگ ءِ تہ ءَ بیت اِنت-

آپریشن گنجل ءِ بندات دو فروری ءِ شپ ءِ ساھت ھشت ءَ بلوچ لبریشن آرمی ءِ مجید بریگیڈ ءَ ھما وھد ءَ کتگ کہ بریگیڈ ءِ دو یونٹاں نوشکی ءُ پنجگور ءَ فرنٹیئر کور ھیڈ کواٹرزانی سر ءَ یکبرا اُرش کتگ – اُرش ءِ بندات نوشکی ھیڈکواٹرز ءِ بنجاھی دروازگ ءِ سر ءَ پدائی میرین جمالدینی پنام ءِ زگرین جھمنند نوشکی ءَ باروداں پُریں گاڑی تراکینتگ، چریشی ءَ بنجل ءِ بنجاھی گیٹ پروشتگ ءُ پھزاری پوجی درست مرتگ اَنت چریشی ءَ پد یونٹ ءِ کمانڈر پدائی بادِل بلوچ ء ابراھیم پنام ءِ ریاست جھمنند ھوشاپ ءِ سروکی ءَ دراھیں پدائی تہ ءَ پترتگ اَنت – اے پدائینانی تہ ءَ عزیر زھری پنام ءِ بارگ ء عارف جھمنند ھزدار، انیل بلوچ پنام ءِ بالاچ ء عیسیٰ جھمنند دشت تربت، مراد آجو پنام بابا ء آدم جھمنند بالگتر پنجگور، یاسر نور پنام ءِ سیف ء ھاجی نور بخش جھمنند الندور بلیدہ، ابراھیم بلوچ پنام ءِ کبیر ء رسول بخش جھمنند گچک، دیدگ بھار پنام ءِ رؤف ء گنگزار جھمنند شاپک تربت،بلال بلوچ پنام ءِ واھد ء دلمراد جھمنند کیچ تجابان ھوار بیتگ اَنت-

مجید بریگیڈ ءِ پدائیاں بنجل ءَ پھزاداری ءَ دراھیں سیکورٹیانی کُشگ ءَ پد منندی جاھاں سر بیگ ءَ سوبمند بیتگ اَنت ءُ بیست اداراں داں دشمن ءِ گون ءَ دیم پہ دیم بیتگ اَنت – اے وھداں پدائیاں دو پوجی آفسراں ھوار نود ءَ گیش کارندہ کُشتگ اَنت ءُ بنجل ءِ یک بھرے ءِ تباہ کنگ ءَ سوبمند بیتگ اَنت – اے وھداں بازیں کچے ءَ کارندہ زدگ بیتگ اَنت مروکانی کچ ءِ گیش گوشگ نہ بیتگ –

ھمے وڑ ءَ دو فروری ءِ شپ ءِ ھشت ءَ دومی نیمگ ءَ مجید بریگیڈ ءِ پدائی جمال بلوچ پنام ءِ چاچا ء رھمت اللہ جھمنند تربت ءَ باروداں پُریں گاڑی ایف سی ءِ بنجل پنجگور ءَ بنجاھی دروازگ ءَ ٹکرینتگ، چریشی ءَ بنجل ءِ دیمی نیمگ سرجم ءَ تباہ بیتگ ءُ پھزاداری ءَ دراھیں کارندہ ھما جاہ ءَ مرتگ اَنت – چریشی ءَ پد یونٹ ءِ کمانڈر حامد رحیم پنام ءِ زبیر ء رحءم بخش جھمنند چتکان پنجگور ءِ سروکی ءَ پدائی سمیع سمیر پنام ءِ شعیب ء استاد الاھی بخش جھمنند پنجگور گرامکان، الیاس بلوچ پنام ءِ قادر ء اسلم جھمنند گرامکان پنجگور، اسد واھگ پنام ءِ سبزو ء صادق جھمنند کیلکور،ناصر امام پنام ءِ ھمل ء امام جھمنند پروم، ضمیر بلوچ پنام ءِ فراز ء مھمد حسن جھمنند ھوشاپ ڈنڈار بنجل ءَ پتریتگ ءُ بنجل ءَ جاڑیگیں پوجی اش کشتگ اَنت ءُ دشمن ءِ بچیتگیں کارمند پدائیانی دیمپانی کنگ ءَ ابید بنجل اش یلو کرتگ ءُ تتکگ اَنت-

پنجگور یونٹ ءِ لوٹ بنجل ءَ دستیگ کنگ ءُ آئی ءَ گیش ءَ چہ گیش وتی دستیگ کنگی بیتگ – دشمن ءِ تچگ ءَ پد سرجمیں بنجل پدائیاں دستیگ کتگ – چریشی ءَ پد پدائیانی دست ءَ بنجل ءَ چٹینگ ءِ واستا ایس ایس جی کمانڈوز، آرمی ءُ جنگی ھیلی کاپٹر لوٹارینگ بیتگ اَنت – بلوچ پدائیاں اے وھداں جنگی ھیلی کاپٹر ءُ بکتر بندیں گاڑیانی کمک ءَ ایس ایس جی کمانڈوزانی سر ءَ پنچ ٹوھیں اُرش کتگ اَنت، پدائیاں ھمک اُرش ءَ دشمن ءَ را بازیں کچے ءَ جانی تاوان اش داتگ ءُ پشتکنزی کتگ اَنت – پدائیاں ھپتاد ءُ دو اداراں داں دشمن ءِ ایلٹ پوجی یونٹاں گوں جنگ دیان ءَ بنجل ءِ اش پھاز اِتگ – زمینی اُرشانی بے سوبی ءَ پد مروچی نیمروچ ءَ پدائیانی سر ءَ جنگی ھیلی کاپٹراں ترندیں تیرگواری کرتگ ءُ چریشی ءَ پدائیانی دراجکشیں گھگیری ءَ پد شھید بیتگ اَنت-

بلوچ لبریشن آرمی مجید بریگیڈ ءِ آپریشن گنجل ءَ براس ھمسنتی گل ءِ سرجمی ءَ کمک گون بیتگ – اے ترند ءُ دراجکشیں اُرش نا ایوک ءَ اے اشی ءِ پدراھی کنت بلکیں بلوچ کجام ھم رنگیں اُرش کنگ ءِ واک ءَ دار اَنت ءُ بلکیں بلوچ جنگولیں ھمسنتی ءِ سنچ ءُ تاکت ءِ درشان ءَ کنت-

بی ایل اے آئی ایس پی آر ءِ درشان ءَ رد کنت ءُ دروگانی پندل سر بیت اِنت – پاکستانی پوج وتی پروشی ءُ لاشاں میان اُستمانی بدنامی ءُ تھی زور ءِ ترس ءَ چیر دیگ ءَ اِنت-

مجید بریگیڈ ءِ اے شانزدھیں پدائیاں وت ءَ باز گیش تاکتورین پوج ءَ چہ نوکیں بلوچ راجدپتر ءَ دراجکشتریں جنگ داشتگ ءُ راجدپتر ءَ وت ءَ ابدمان کتگ – بلوچ راج، راجدپتر ءُ بلوچ لبریشن آرمی اے بامردیں پدائیاں ھچ رنگ ءَ بے ھیال کت نہ کنت – شھیدانی ھون ےخ بلوچ گھگیری ءِ تہ ءَ یک نوکیں روچے ٹک دنت کہ آ بلوچ راجی آجوئی ءِ مانزمان بیت اِنت-

بلوچستان ءِ دمگ میچ ءِ بنجاھی شھر تُربت ءِ ھنکین گیبن ءَ شمبے ءِ شپ ءَ ناشناسیں مردماں ٹیلی کام کمپنی یوفون ءِ ٹاور مانداشتگ۔

ٹاور ءِ ماندارگ ءَ پد کیچ دمگ ءَ یوفون ءِ رھوت بند بیتگ اَنت، وھدیکہ واکداراں سرجمیں بازارءَ انگیر کنگ ءَ پد پَٹ ءُ پول بندات کُتگ۔

زانگ بہ بیت کیچ ءُ کش گوری دمگاں اِشی ءَ پیسر ھم جتاھیں ٹیلی کام کمپنیانی ٹاور آماچ کُتگ اَنت۔ کہ اِشانی زمہ واری بلوچ آجوئی لوٹوکیں سلاہ بندیں گلاں من اِتگ اَنت۔ بلے داں انگت مروچی وئیل ءِ درگت ءَ گیشتریں اھوال نہ رستگ اَنت ۔

پسنی پریس کلب ءِ نیمگ ءَ شنگ بوتگیں درشان ءِ تہ ءَ گوشگ بوتگ کہ ھروھد ءَ کہ حق دو تحریک ءِ مچی یا مراگش ءِ بوتگ گڈا پسنی ءِ اھوالکاراں جوانی ءَ ھبر شنگ تالان کُتگ انت ءُ سرجمین ملک ءِ رسانکدراں اے دیم ءَ آؤرتگ –

جارکش ءَ گوشتگ کہ پسنی زیرو پوائینٹ ءُ پسنی جیٹی سر ءِ مچی جوانی کوریج دئیگ بوتگ بلے اشی ءَ ابید ھم حق دو تحریک ءِ پسنی ءِ تلو سر ءَ دمگی اھوالکارانی نام گرگ ءُ آھانی کرد ءَ ایرجنگ پدردی یے –

پسنی پریس کلب ءِ اھوالکاراں حق دو تحریک ءِ سرکماش ہدایت الرحمن ءَ چہ لوٹ کُتگ گوشتگ کہ آ وتی پوزیشن ءَ پیش بہ داریت اگاں ناں پسنی ءِ اھوالکار وتی دیمتری کارانی جار ءَ زوت جنت –