TBP Balochi

بلوچ راجداریں باسکانی زورانسری آوار بگیری ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ پنچ سد ءُ نود ءُ شش روچ سرجم بوتگ –

وائس فار بلوچ مسنگ پرسنز ءِ کمک سرکماش ماما قدیر بلوچ ساڈی نبوھگ ءَ بلوچ یکجھتی کمیٹی کراچی ءِ ڈپٹی آرگنائزر عبدالوہاب بیگواھیں مردمانی کھول ءِ ھمراھی ءَ بنجل ءَ نشتگ انت –

زانگ بہ بیت ماما قدیر بلوچ گوستگیں دوازدہ سالاں چہ ھمک روچ بیگواھیں مردمانی کھول ءِ ھمراھی ءَ زھرشانی بنجل ءَ نشتگ بوتگ بلے مروچی ساڈی نہ بوتگ کہ بیگواھیں مردمانی یل کنائینگے ھاتر ءَ زھرشانی کنگ ءَ آئی نام ءَ ارزی نبشتہ کنگ بوتگ ھمے ھاتر ءَ مروچی آ بلوچ رھشون لشکری رئیسانی، نصراللہ بلوچ ءِ ھمراھی ءَ شال ءِ سیشن کورٹ ءَ پیش بوتگ –

مروچی پیپلز پاٹی کراچی ءُ جئے سند قومی مومنٹ باسکاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ عبدالوہاب بلوچ ءَ گوشتگ کہ پنجگور ءُ نوشکی ءَ ایف سی ءِ بنجلانی سر ءَ اُرش ءَ پد بلوچستان ءَ ھوار سرجمیں ملک ءَ بلوچ نودربر ءُ سیاسی باسک مزنیں کچ ءَ آوار جنگ ءُ بیگواہ کنگ بوھگ ءَ انت ءُ بازیں ورناھے تیرباران کنگ ءُ شھید کنگ بوتگ –

آئی ءَ گوشتگ کہ ما انسانی ھکانی گل، اقوام متحدہ ءُ انسانی ھکانی کونسل ءَ چہ لوٹ کنیں کہ بلوچستان انسانی ھکانی لگتمالی ءِ دارگے ھاتر ءَ پاکستان سرکار ءِ سر ءَ زور بہ دئینت ءُ درسیں بیگواھیں مردم یل کنگ بہ بنت –

آپسر ابدروک ءِ پوجی پانگس ءِ سر ءَ دزبمب اُرش ءِ کُتگ ءُ پوجی کارمند ءِ کُشتگ – میجر گوھرام

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ مئے سرمچاراں گوستگیں شپ ءِ ادار نُھ ءُ بیست ءَ تربت ءِ بازار ءَ آپسر ابدروک پوجی پانگس ءِ سر ءَ دز بمب اُرش ءِ کُتگ –

جارکش ءَ گوشتگ کہ اُرش ءِ آسر ءَ یک پوجی کارمندے مُرتگ ءُ یکے زدگ بوتگ –

گڈسر ءَ جارکش ءَ وتی درشان ءِ تہ ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –

نبشتانک: مروچاں مئے میتگاں بچکیں زهگ نیست

نبشتہ کار : سیپ بلوچ

دی بلوچستان پوسٹ

اے ساهت ءَ من اے گالاں نوْیسگ ءَ آں منی کوهیں جبین ءَ آس پوره روْک اِنت لهتیں سوچوکیں درد اَنت کہ گریوگی چمے ءَ نویسگ ءَ اَنت اِش بلے گپ ایش اِنت کہ وهد مردم گْوش اَنت هنچش اِنت ، زان ئے گپ چے اِنت ، گپ ایش اِنت یک زمانگے هست اَت ءُ مارا مردماں پُرین میتگے هست اَت ما وتی میتگ ءَ سک باز بچک اِت ایں همکدّین کسانیں مزنین ، بلے اے گپ هچ نہ جیڑ اِت کہ کے کسان اِنت ءُ کے مزن اِنت بس ما دْرست یک برابر اِت ایں ، کے دومی ءَ گٌوں گَشت ایں لیب گْوازی کُرت هور وانگ ءَ شُت ایں ، هور کْوچگ ءُ جنگل ءُ کْوهاں کردگ ءُ چکّرگ ءَ ، همے کہ شپ بوت ما دْرست یک لوگے ءَ یکجاه بوتین کنَدگ اِت مسکراهی ءُ لیب ءُ یکے دومی ءَ کَلاگ گرگ ءُ مسکراه کنگ اے مئے زندمان اَت هچ کس ءَ را نشہ کنگ ءُ جیڑگ ءِ موه نیست اَت لوگ آباد اِت اَنت وانگ جاه آباد اِت اَنت ءُ هنچو میتگ ءِ زگر هانہ ءُ مسیت چنچو وش اِت اَنت-

همے کہ جوپاگ ءُ لابانی موسم اتک روچ ءَ وانگ جاه ءِ آیگ ءَ پد کس میتگ ءَ کس نیست اَت ما دْرست کْوچگ ءَ دُرچکانی شکار ءُ شانتلانی پیم ءَ کْوچگ ءُ ڈگاراں ویل اِنت نہ کہ گژنے هاجت هست اَت نہ کہ تُنے هنچو گوں زمین ءِ مهروانیں گْواڑگاں مُلما اِت اِیں-

چنچو وش اَت زمین ءِ اَرزشتیں بهار ، همے کہ هور ءُ جمبر ءَ بوت ما دْرست آپینکی ءَ ڈگارانی سر ءَ شت ایں زندمان هنچو گْوزگ ءَ اَت کہ شپ ءِ جِناّنی ترس اوں مارشتے اَت ما یک هلکے پہ دومی هلک ءَ شپ ءَ جی ءُ چمان چیرئی ءَ شت ایں ، مئے سواری هر اَت اَنت ءُ هشتر ، هر ءُ هشتر همے واستا کہ گورباماں دْراج کّش ایں چاهاں ما دور ءَ چہ آپ کش اِتگ ءُ آؤرتگ اَنت پہ هلک ءَ بلے اے کُمار اوں نہ کُرتگ پرچا کہ مئے زندمان بوتگ هچ کس ءَ گوں گلگ نہ بوتگ ، یکشمبهانی روچاں وانگ جاه ءَ کہ موکل بوتگ گڑا ما هرانی سر ءَ شتگیں دار ءُ پیش چہ کْوهاں آؤرتگ ، آ ساهتاں مارا چہ کس گسر نہ بیتگ نہ کہ کسے دور ءُ درملکاں بیتگ ءُ نہ کہ جنگ ءُ شهید کنگ ءُ دور دیگ ءُ نہ کہ زنداناں بندیگ بیتگ-

هنچو داں لھتے سال گوزگ ءَ رند مرچی سر همے میتگ ءَ کپتگ کس نیست اَت سنگت ءُ همسروکاں یکے ءُ نہ گنداں کہ مسیت ءِ دیم ءِ لیب جاه ءَ بچک لیب ءَ اَنت ، بلے مسیت ءِ دیم ءِ لیب جاه ساری ءَ دو سے کبر اِت انت بلے اے کبرستان ءِ نوں سک مزن اِنت ، اے لوگانی دیم ءِ کور ءُ کوچگ اوں ویران اِنت مَچکدگ درست هشک اَنت تری ماهل ءِ مادگانی واڑ کرو اتکگ بلے جندے باریں چون اِنت-

بلے اے درست کسهاں من سرپداں کہ مئے میتگ ءِ پُرین مردم کجا اَنت بلے چون بوت اَنت من چے ءَ جست ءَ آں بلے اے جست ءَ من ءَ میتگ کنگ ءَ اِنت کہ کجا اَنت هما سوهوکیں ورناه کجا اَنت هما سرشپانی مهروانیں دیوان ءُ مجلس کجا اَنت ، شپانی لیب ءُ گوازی کہ شپ چاهے تهار بوتگ یا ماهکان بلے هچ کس ءَ سماه نہ بوتگ ، کہ میتگے جنینان وتی میتگ ءِ مردمانی دیم ءَ نکاب بستگ؟ بلے کجا شت اَنت-

اے پرمهریں میتگ ءَ یک همسروکے نیست کہ مردم بہ گند ایت همے ایش کنگ ءَ کیت کہ لھتے گار اِنت لھتے دور ءُ درملک ءَ انت ءُ لھتے تهاریں کوٹیاں بند اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بنجاھی شھر شال ءَ کسان سالیں جنکوے ءِ گونی بندیں لاش دزکپتگ-

لاش شال ءِ دمگ سبزی دگ ءَ نورزئی چوک ءِ نزیک ءَ دزکپتگ – لاش پجار کنگ ءِ ھاتر ءَ ھسپتال ءَ برگ بیتگ –

زانگ بہ بیت بلوچستان ءَ لاشانی دزکپگ یکشل ءَ برجاہ اَنت ءُ گوستگیں روچ ءَ ایدھی ءِ واکدارانی نیمگ ءَ شھر ءَ دزکپتگیں شش نا پجاریں لاش دشت ءِ مانشجاہ ءَ کل کنگ بیتگ اَنت-

بلوچستان ءَ باز اے وڑیں لاش دزکپتگ اَنت کہ زانگول بیتگ اَنت ءَ آیانی پجار نہ بیتگ اَنت بلے ڈی این اے ٹیسٹ ءِ وڑیں جاھاں ھم لاشانی پجار نہ کنگ ءُ بے وارس گوشگ ءُ کل کنگ بیگ ءَ اَنت ءُ چریشی ءَ گمان ھمے بیت اِنت اے لاش بیگواھیں مردمانی ئیگ اَنت –

یک دھکے ءَ پیسر بلوچستان ءِ دمگ ھزدار توتک ءَ مُچیں گور دزکپتگ اَنت کہ آیانی تہ ءَ بیگواھیں مردم زانگ بیتگ اَنت اشی ءَ ابید پنجگور، ڈیرہ بگٹی ءُ بلوچستان ءِ دگہ جاھاں وھد وھد ءِ سر ءَ مُچیں گور دزکپگ ءَ اَنت-

نبشتانک: زمین زادگیں وتن آشک

نبشتہ کار: گنی ھیات

دی بلوچستان پوسٹ

اے زالمیں ریاست پاکستان چے زانت کہ چنچو واھگاں گوں زَھگ ورناہ بنت ءُ آیاں چیزے دمان نہ لَگ اِیت چہ واھگاں ایر موش کنگ بنت ءُ اے زلم ءُ زُوراکی ءَ ھپتاد سال اِنت کہ بلوچستان ءَ برجاہ اِنت –

چمّاں چہ کور، گوشاں چہ کر، ھیال کنگ ءَ چہ زبھریں مھلوک نوں سرپد اِنت کہ ما گُلام اِیں پہ بلوچاں چے پشکپتگ پاکستان ءِ یزیدی لشکر ءِ کارندہ گِسانی تہ ءَ شپانی نیم ءَ انسرتگیں لَس مھلوک ءَ چہ واب ءَ پاد کنت ءُ سرجمیں مردماں گِساں چہ کَش اِیت ءُ شرو بیت لٹ ءُ کُٹ ءَ ھرچے کہ دِل ئِے لوٹ اِیت ھما وڑ کنت لھتے زمین ءِ سر ءَ دیم پہ چیر واپین اِیت ءُ بٹّانی سر ءَ لگتاں دلبند ءَ جنان کنت ءُ کماشاں کم شرپ کنت آیانی پادانی دیم ءَ تیر جنت ھزاراں چشیں جگر بْریجیں ندارگ ما گوں وتی چمّاں دیستگ کہ مئے راج ءِ نامداریں کماش ءُ بی بی ئیں مات ءُ ورنائیں برات ءُ بانکیں گھار ھکّل ءُ پیرمرد بیھار دیگ بیتگ اَنت ءُ ھبر ماں دپ ءَ چوپگ بیتگ اَنت ۔

اے تپتگیں آس کہ جمبور اِنت کَس ءَ نہ بکش اِیت ءُ کَس ءَ پھل نہ کنت بلوچ ءُ بلوچستان ءِ نشتگیں مھلوک ھچ روچ ایمن نہ اِنت نہ آ وشھال اِنت نے کہ وشھالیں زندے ءِ واھند اِنت
ھمک روچ بلوچانی تیر سُپتگیں کُنٹ پہ آیاں سوگات بنت ۔

اِد ءَ نے کہ بلوچ پوریاگر ایمن اَنت نے کہ بلوچ نودربر پہ ایمنی ونت کن اَنت نودربر بلوچ ءِ باندات ءِ ھستی اَنت پمیشکا ریاست ء پاکستان بلوچ نودربراں چست کنت ءُ ٹاچر اِش کنت لھتیں ھمود ءَ شھید بیت ءُ لھتے چو ھیات بلوچ ءَ سر ء بازار ماتانی دیم ءَ شِل سریں تیرانی آماچ بیت مئے میار ھمیش اِنت کہ ما بلوچ اِین ءُ بلوچستان ءِ نشتگیں کُدرتی مڈّیانی واھند ایں بلوچ راج ءِ سرڈگار کوہ ، کُدرتی مڈّی ءُ گْواچناں چہ سرریچ اِنت بلے انگت بلوچ راج تُن ءُ گُژن ءِ نام ءَ در پہ در ءُ ھاک پہ سر اِنت یا وتی گلزمین ءِ سر ءَ گژن ءِ سانکلانی چیر ءَ ساہ کش اِیت ، بلوچستان ءِ ٹیل ، گیس ، آسن ءُ دگہ کُدرتی داد پہ پنجاب ءِ دیمروئی ءَ رو اَنت بلے بلوچ راج چہ دگنیا ءِ ھمُک آسراتیاں زبھر اِنت ءُ پَد ءَ ھم بلوچ لَٹانی دیمپان اِنت ۔

اے ریاست ء پاکستان کلم ءِ زبان ءَ سرپد کنگ نہ بیت بلکیں اشی ءَ را تُپنگ ءِ زبان ءَ پمیشکا ورناہ سرپد کنگ ءَ اَنت کہ اے پاکستان ھما مناپکیں ریاست اِنت کہ اشی ءِ تہ ءَ دروگبند ءُ بے ایمانیں رستریں لشکرے نندوک اِنت ءُ دروگ بندیں رسانکدر ساڑی اَنت اگاں بلوچ راج ءِ یک زَھگے وتی گِس ءَ یک کلمے ایر بہ کنت پہ وانگ ءِ ھاتر ءَ گڑا آئی ءَ دھشتگرد ءُ ناشرکار ءِ نام ءَ توار جنت آئی ءَ را چست کنت ءُ بیگواہ کنت ٹارچر سیلانی تہ ءَ ازیت ئِے دنت ۔

اے گریب ءُ بے کسیں نودربرانی توار ھما تمردیں ورناہ جوڑ بنت کہ آیاں وتی زمین ءُ زمین ءِ نشتگیں مھلوک ءِ پگر اِنت آ ورناہ چو تپتگیں آسن ءَ سُھر بنت ءُ دژمن ءِ سر ءَ کھر جوڑ بنت زالم ءُ ایردست ءِ سیادی ءَ پدر کن اَنت ھمک پٹوکیں ھون ءِ یک ترمپے ءِ ھساب گِر اَنت انسان ءِ جان ءُ انسان ءِ ساہ کیمتی اَنت بلے نہ تُرسُکیں دلیریں ورناہ وتی جان ءُ ساہ ءِ پرواہ ءَ نہ کن اَنت گوں وتی گُڈی تیر ءَ وتی ارواہ ءَ پہ بلوچستان ءِ باندات ءَ بکشاینت –

آجوئی الّم مئے نسیب ءَ بیت لھتے انچیں ورناہ کہ وتی سراں ڈیھ ءِ آجوئی ءِ ھاتر ءَ کربان کن اَنت ، اشاں ناں زاتی سیادی ھست ءُ نانکہ چُشیں نزیکی کہ اے راہ ءَ سر ءَ جھل کنگ ءَ لاچار کنت بلکیں اد ءَ آ انچیں سیادی ءَ گوں بندوک انت کہ آئی ءَ ھرچ وڑیں زند ءِ سبک ءَ دنت آ سیادی لَس انسانانی دسرس ءَ چہ دور اِنت آ انکلابیانی سیادی اِنت، مھر ءُ جُھد ءِ سیادی اِنت، اے ھما سیادی اِنت کہ اود ءَ انساناں جوان ھیالی ، ایمانداری ءُ جوانیں راھشون بوگ ءِ درونت ءَ دربرائین اِیت-

مروچی بلوچ ءَ اے پیش داشتگ کہ آئی ءِ مزھب ، جنت ءُ مات آئی ءِ پاکیں زمین اِنت کہ اود ءَ مزھب ءَ یک کر کنگ ءُ آجوئی ءِ ھاتر ءَ ھزارانی ورناہ پدائی بوگ ءَ ساڑی اِنت راجی گھگیریں ورناہ کہ بمب ءُ ٹوپان ءُ شورھاں بند اَنت ءُ دیم ءَ رو اَنت آیاں پہ مردی وتی ھکّ ءِ پد جنگ ءَ اے کِشّک گچین کُتگ چہ وتی جان ءُ مال ءُ ورد ءُ وراک ءُ سارتیں منّھاں دست اِش کَش اِتگ ، مروچی پہ ڈیھ ءُ گلزمین ءِ وتواجھی ءَ زند ءِ دراھیں وشّیاں چہ وت ءَ دسکش اِش کُتگ پہ بلوچ ءَ دگہ هچ چُشیں راھے پشت نہ کپتگ ءُ نیست کہ پھریزگ بہ بیت بلوچ ھر وڑ ءَ گوں اے جنگ ءَ بندوک اِنت اے بلوچ ءِ گُڈی جنگ اِنت اے جنگ دراج کَشّان اِنت اِد ءَ ورناہ پہ زمین ءِ نشتگیں مھلوک ءَ ھون ریچگ ءَ اَنت۔

ھرچ مردمے پَہ وت ءَ را زندگ بہ بیت آئی ءِ اُمر زِیت ھلاس بیت ، ءُ ھرچ مردمے پہ زمین ءَ زندگ بہ بیت آ مدامی ءَ زندگ مان اِیت ءُ نمیران بیت کَسے کہ پہ زمین ءَ وتی زند ءَ بکشا اِیت گڑا آئی ءَ زمین ءِ نشتگیں لَس مھلوک ھچبر پراموش ءُ شمُشکار نہ بیت زمین ءِ مھر ھنچیں مھرے کہ آ ترا وت زندگ بوگ ءِ سکین ءَ دنت اے جنگ بلوچ ءِ زندگ بوگ ءِ گُڈی منزل اِنت ۔

نوشکی ءُ پنجگور ءِ پدائی(جاننَدری ءِ ) کُنگریں ورنا سے شپ ءُ سے روچی جنگ ءَ مرگ ءَ گوں مڑاھے گون کن اَنت یاں مزن بند ءُ شادی کور ءِ شیواریں بالاچ ءِ کمان بنت یا بلیدہ ءِ درپشوکیں اِستال اَنت کہ نُگرھیں ساھاں پہ جُھد ءَ رُژنے بالین اَت ءُ ماں تھاریں باتن ءَ جاگہ کن اَنت ۔

گلزمین پھرِ بند اِیت وتی ھما پُسّگاں کہ پہ گلزمین ءِ بانور کنگ ءَ گلزمین ءِ پاکیں دلبند ءَ پہ نمیرانی واب کپتگ اَنت مئے مَکسد مئے شھیدانی ءُ مئے وتن ءِ کُنگریں ورنایانی ھما پشکپتگیں کار اَنت کہ آیاں مروچی یک یک ءَ ساہ پہ زمین ءَ کربان کتگ ءُ آیانی پشکپتگیں کار آجوئی اِنت ھما وتن ءِ آجوئی اِنت کہ آیاں وتی ھیشیں سر مروچی گوں بچکنداں کربان کتگ اَنت اے بھادری مئے ورنایاں ھمے زمین ءَ داتگ کہ گوں وتی ھون ءَ زمین ءِ گواڑگاں سبز کنان انت۔

کُل شھید ابدمان اَنت کہ آیاں وتی زند ءِ ھر وڑیں چکاس پاس کتگ ءُ دیم ءَ شتگ اَنت پہ بلوچ باندات ءِ ھاتر ءَ بازیں نوجوان وتی نگرھیں جان ءِ کربانی ءُ وتی سرانی کربان کنگ ءَ ھچ چک پَد نہ بیتگ انت، ‏آ بلوچ گلزمین ءِ کنگریں پدائی اَنت آ مھر ءِ زندگیں کوھنگ ءِ ، ھستمان اَنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گھرام بلوچ ءَ پاکستانی پوج ءِ سرءَ اُرشانی زمہ واری زرتگ ءُ گُشتگ کہ شمبے ءِ روچ ءَ سرمچاراں پنجگور ءِ چتکان بازار ءَ پوجی ھیڈکوارٹر ءِ سنگر ءِ سرءَ دستی بمب ءِ دار داتگ کہ سنگر ءِ تہءَ ترکیتگ کہ اِشی سوب ءَ یک کارمند ءِ مُرتگ ءُ یکے ٹپی بیتگ۔

ھمے پئیم ءَ آدینگ ءِ بیگاہ ءِ ادار ھپت ءُ چل ءَ گوادر ءِ چِپ ریکانی بستگیں پوجی کیمپ ءِ بنجاھی دروازگ ءِ سیما پھازگ ءّ ھاترءَ اوشتاتگیں کارمندانی سرءَ وتکاریں سلاھاں گوں اُرش کُتگ، کہ اِشی سوب ءَ یک کارمندے مُرتگ۔

جارکش ءَ گُڈسرءَ گُشتگ کہ اے اُرش داں زیردستیں بلوچستان ءِ آجوئی ءَ برجاہ مان اَنت۔

گوستگیں روچ ءَ بزاں 18 فروری ءَ آدینگ( جمعہ) ءِ روچ ءَ بلوچ اسٹوڈنس ایجوکیشنل آرگنائیزیشن ءَ وتی ھپتگی دیوان (ویکلی لیکچر سیریز) برجم دارگ بیتگ، ‏‎اے دیوان ءِ سرھال “کیپٹل ازم ءُ ریسک سوسائیٹی تیوری ” بیتگ – اے دیوان ءِ تران کنوک عادل نادل بوتگ-

دیوان ءَ تران کنان ءَ آئی ءِ گشگ ات کہ پد نوکیت ءَ چہ جھگیرداری نظام یورپ ءِ تہ ءَ شنگ اتگ وھدیکہ جون کیلون کہ یک ایسائی زانتکارے بیتگ آئی ءَ جھگیرداری نظام ءِ لیکہ دیم ءَ آورت ءُ آئی ءِ منوکاں کار ءُ بار بندات کتگ ءُ پد ءَ مدان مدان ءَ یورپ ءِ تہ ءَ پہ جوانی ءَ شنگ اتگ –

آئی ءَ نیاد ءَ تران کنان ءَ گوشتگ کہ ھبدہ سد ءُ ھپتاد ءُ شش ءَ انڈسٹریل آشوب ءَ پد ھمے لیکہ آزمان سر بیت چیاکہ جتا جتائیں پیکٹری پچ بوان بوت اَنت ماں جتا جتائیں یورپ ءِ ملکانی تھ ءَ ھمے سبب ءَ جھگیر داراں جھگیر داری نظام دیم ءَ برت ءُ گیش چیز جوڑ کت ءُ پہ بھا زوروکاں-

آئی ءَ چرنوبل ءِ اڑ ءُ جنجال روس ءِ تہ ءَ چہ پد مسٹر ھلرچ بِک کہ آئی ءَ ریسک سوسائیٹی تیوری پیش کت چیاکہ اے یک مزنیں اڑ ءُ جنجالے ءَ اَت کہ آئی ءَ اوں برلن اثرمند کت ءُ آئی ءِ اٹومِک پلانٹ ریڈیایشن یورپ ءِ تہ ءَ شنگ ءُ تالان بوتگ اَنت-

نادل عادل ءَ گوشت دومی نیمگ ءَ آئی ءَ گشت کہ انڈسٹریل آشوب ءَ چہ پد جھان یک ٹوھیں توانی ءِ تہ ءَ شتگ چیاکہ جھان یک مزنیں بدلی ءِ دیمپان بوتگ چشکہ موسمی بدلی ، اٹومک اٹیک جاپان ءِ سر ءَ پلاسٹک پلوشن اے پہ مئے جھان ءَ واستا توانی انت-

بلوچستان ءِ جتاجتائیں دمگاں جتائیں وئیلانی آسر ءَ چار مردم بیران نُھ ٹپی بوتگ اَنت –

گیشیں ھالانی رِد ءَ بلوچستان ءِ دمگ ھرنائی ءِ ھند شاھرگ ءَ دو ٹکانی میان ءَ جنگ ءُ چوپ بوتگ چریشی ءِ آسر ءَ یک راھگوازے بیران ءُ ھشت ٹپی بوتگ اَنت-

لیویز واکدار ءِ رِد ءَ گوستگیں روچ ءَ شاھرگ ءَ دو ٹکانی میان ءَ جنگ ءُ چوپ تیرگواری ءِ آسر ءَ یک راھگوزے بیران وھدے کہ ھشت مردم ٹپی بوتگ اَنت، ٹپی ئیں مردم رورل ھیلتھ سنٹر شاھرگ ءَ دوا درمان کنگ ءَ پد شال ءَ برگ بوتگ اَنت-

دومی نیمگ ءَ پشین ءِ دمگ یارو ءَ دو گاڑیاں وت ماں وت ءَ ڈک وارتگ ءُ ڈک ورگ ءِ آسر ءَ گاڑی ءَ سوار سے مردم ھما دمان ءَ بیران بیتگ اَنت وھدے کہ ٹپیانی درد ءِ نہ سگگ ءَ بیران بوتگ-

واشک ءِ تحصیل ماشکیل ءَ ناشناسیں مردمانی تیرگواری ءَ چہ مجیب الرحمان نامیں مردمے ٹپی بوتگ پولیس ءَ ٹپی بوتگیں مردم آر ایچ سی نادُراھجاہ ماشکیل ءَ برتگ-

پہ گرانکدریں دیمونیانی گل نور سلام نور ءُ آئی ءِ ھمراھاں “پاسپان ء وتن” ءِ ستاھی نام ءَ شکسائیت ۔ مرید بلوچ

16 فروری ءِ سھب ءِ سر ءَ زورگیریں پاکستان ءِ زمینی لشکر ءَ گوں بُرزی لشکر ءِ کُمک ءَ تمپ کُلبر ءِ کوھی دمگ ءَ گَل ءِ یک بنجلے ءِ سر ءَ اُرش کتگ۔ بنجل ءَ ساڑی ئیں سرمچاراں گوں ترندی ءَ دژمن ءِ سر ءَ پَسّھی اُرش کتگ ءُ داں دیراں ھمے دیم پہ دیمی میڑ برجاہ بوتگ۔ سھب ءِ ساھت شش ءَ بندات بوتگیں میڑ بیگاہ ءِ ساھت پنچ ءَ برجاہ بوتگ۔ کہ بلوچ سرمچاراں بازیں کساسے ءَ دژمن ءِ کمانڈو جتگ ءُ کشتگ اَنت ءُ دو جنگی بالگرد اوں کسانیں کچّے ءَ تاوان بار کتگ اَنت۔ اے دراجکشیں میڑ ءَ گَل ءِ دمگی کماندار ءُ بلوچی زبان ءِ ورنائیں شائر سنگت نور سلام نور پنام اِستال ء باھڑ بلوچ جھمنند زامران دشتُک ،زبیر اکرم پنام اسد جان ء اکرم بلوچ جھمنند ھوت آباد زامران میتگ، کمبر بلوچ پنام مھروان ء تارک جھمنند کلاھو، سگیر بلوچ پنام تارک ء نوربکش جھمنند بیسیمہ، رسول جان پنام چراگ ء الی جان جھمنند سرنکن ، ھاپز پراز پنام ملا درویش ء ابدل گنی جھمنند سرنکن نمیران بوتگ اَنت۔

گل ءِ دمگی کماندار نور سلام نور چہ 2010ءَ بلوچ سلاہ بندیں جھد ءَ ھمگرنچ بوتگ۔ 2014 ءَ وھدے گل ءِ کماندار ورنائیں اکیل جان گوں پنچ ھمبلاں شھید بیت گڑا آئی ءِ جاہ ءَ نور سلام نور ءَ تربت دمگ ءِ کماندار نامینگ بوتگ اَت۔

بے مُلیں سِنچ ءُ زانت ءِ سَوَب ءَ ماں 2018 ءَ آئی ءَ را گل ءِ مکران ریجن ءِ آپریشنل کمانڈ نامینگ بوتگ اَت ءُ ھمے دْرچ ءَ آئی ءَ پہ گل ءِ مھکمی ءَ جوانیں کردے پیلو کتگ اَت ءُ دژمن ءِ بگیری ءَ راجدپتری گھگیری ءَ یک کتہ کاریں کماندارے ءِ بستار ءَ وتی زمہ واریاں پیلو کنگ ءَ بوتگ۔ آئی ءَ بلوچ راجی آجوئی سنگر (براس) ءِ اُرش ءُ بیڑاں ءُ براس ءِ مھکم کنگ ءَ گل ءِ جھگیری کنان ءَ بے مَٹّیں کردے پیلو کتگ اَت۔ نور سلام ءَ گوں وتی آشوبی لچھکاری ءَ اوں ماں راجی گھگیری ءَ یک جوانیں کردے پیلو کتگ ءُ آ لچھکاری ءِ رِد ءَ یک وانگی یے ءِ اوں واھند اِنت۔

گل ءِ نمیرانیں سرمچاریں ھمبل زبیر ، کمبر ،ھاپز پراز، رسول جان ءُ سگیر جان کساس چہ یک سالے ءَ گوں گَل ءَ بندوک بوتگ اَنت۔ دراھیں ھمبل بے مَٹّیں کِردانی واھند ءُ سرڈگار ءِ گواچنی ئیں شیدابوتگ اَنت۔ گل چہ آھانی دلیری ءُ راجدپتری کردے ءِ سَوَب ءَ پہ آھاں “پاسپان وتن” ءِ ستاھی نام ءَ نامینیت۔ گل بلوچ راج ءُ ھاس گوں ورنائیں پدریچ ءَ گشگ لوٹ ایت کہ راجی آجوئی ءُ زورگیر ءِ بگیری ءَ برجائیں سلاہ بندیں جھد ءِ بھر بہ بنت ءُ زورگیر ءَ نِزور بہ کن اَنت ءُ پہ زر داشتگیں لشکر ءِ بگیری ءَ وتی کِرد ءَ پیلو بہ کن اَنت۔

دیمونیانی دْرچ داں بلوچستان ءِ آجوئی ءَ برجاہ مان ایت-

سربوتگیں ھالانی رِد ءَ بلوچستان ءِ دمگ کیچ مند ءَ پاکستانی پوج ءَ یوٹیوبرے زورانسری آوار جتگ ءُ بیگواہ کُتگ –

آوار جنگ بوتگیں مردم ءِ پجار وارس وپا ءِ نام ءَ چہ بوتگ کہ پاکستانی پوج ءَ مند ءِ دمگ ھوزئی ءَ آوار جتگ ءُ گوں وت بُرتگ –

اھوالکار ءِ رِد ءَ اے مرد یک ازمکارے کہ یوٹیوب ءِ تہ ءَ کسانیں تامر جوڑ کُتگ شنگ کُرتگ اَنت –

زانگ بہ بیت بلوچستان ءِ جتا جتائیں دمگاں مردمانی زورانسری آوار جنی ءِ درچ یکشل ءَ برجا اَنت ءُ چیزے روچ ءِ تہ ءَ اشی ءِ تہ ءَ گیشی آرگ بوتگ کہ ھر تک ءُ پھناتاں سیادی داروکیں مردماں ھوار ازمکار ھم بیگواہ کنگ بوتگ انت –

گوستگیں روچ ءَ پوج ءَ چہ پنجگور ءَ ھم ازمکار مسرور عمر آوار جتگ ءُ بیگواہ کُتگ اَت بلے پد ءَ رند ءَ یل کنگ بوتگ وھدیکہ نوشکی ءَ گُشندہ عاصم بلوچ گوستگیں روچاں آوار جنگ بیگواہ کنگ بوتگ کہ انگت بیگواہ انت –

ناسرجمیں ھالانی رِد ءَ گوستگیں روچ ءَ پاکستانی پوج ءَ مند ءِ دمگ بلو ءَ ھم بیڑ بُرتگ ءُ دو مردم زورانسری آوار جتگ ءُ بیگواہ کُتگ اَنت بلے تنی وھدی آھانی پجار نہ بوتگ ءُ سرجمیں راستی دیم ءَ نہ اتکگ آھانی کھول ءِ نیمگ ءَ چہ ھم ھچ وڑیں ھال شنگ کنگ نہ بوتگ اَنت –