TBP Balochi

بلوچ اسٹوڈنٹس ایکشن کمیٹی ءَ وتی پنتاک ءِ تہءَ راج ءَ کلہو دیان ءَ گُشتگ کہ سرجمیں جہانءَ 21 فروری ماتی زبانانی روچءِ درگتءَ برجم دارگ بیت ءُ وتی ماتی زباناں گوں مہر ءُ دوستی درشانگءَ گوازینگ بیت۔ دنیا ءَ ھزارانی کچءَ راج ءُ آیانی وتی ماتی زُبان است اَنت ءُ ھرچ راجےءِ ماتی زبان یکے ءُ چہ یکےءَ گیش اوں بوت کن اَنت۔ ھمے رنگءَ بلوچ یک راجے ءِ بستارءَ ملٹی لینگوئل راجے گُشگ بیت کہ آئیءِ چہ یک ءُ دو ءَ گیش ماتی زُبان اَنت کہ آیانی تہءَ مستریں زبان بلوچی، براھوئی، کیھترانی، لاسی، جدگالی ءُ آ دگہ ھوار اَنت۔ اے زبان بلوچ راجءِ مڈّی اَنت کہ ایشانی پھازگ ھر بلوچ راجدوستءِ ھاترءَ اژدری انت ءُ زبانانی رکینگ ءُ پہریزگءِ ھاترءَ مستریں راجی زمہ واریانی توکءَ یکے ایش انت کہ ما وتی راجی زباناں بہ وان ایں ءُ آھانی توکءَ نبشتہ بہ کنیں۔

سیادی داروکیں زبانزانتی لیکہءِ (Linguistic Relativity Theory) ردءَ ھر راج وتی ماتی زبانءِ توکءَ وتارا شرتر درانگاز کت کنت، وتی جیڑہاں شرتر گوں وتی ھمزبانیں مردمےءَ درشان کت کنت، پرآئیءَ ھچ وڑیں اڑاند ودی بوت کت نہ کنت پمیشکہ پر آئیءَ پہ المی انت کہ وتی زبانءَ در بہ بارت ءُ نبشتہ بہ کنت۔ اگاں کسے لوٹ ایت کہ وتءَ دگہ زبانےءَ بہ درانگاز ایت گڑا اے عملءِ جند پہ دوئیں زباناں مزنیں زوراکی یے بیت۔

بساک ءِ پنتاک ءِ تہءَ راجی زبان ءُ راجی زباناں پیش آیوکیں جیڑہ ءُ راجی زمہ واریانی درگت ءَ گُشتگ کہ چوشکہ دگنیاءِ تہءَ سیاسی یا حکومتی بنیاتءَ نزوریں راجانی زبان پہ زور ولگوج کنگ بوتگ اَنت ءُ انگت بوہگءَ اَنت۔ ھمے رنگءَ پہ بلوچءِ زبانانی بُرّگ ءُ ورگءَ اردو ءُ فارسی کارمرز بوہگءَ اَنت۔ دومی نیمگءَ بلوچ مہلوکءِ یک مزنیں بہرے دانستہ یا گیر دانستہ بنیاتءَ دری زباناں وت وتی زبانانی بیگواہیءِ ھاترءَ داوت دیگءَ انت، وتی زبانانی جاہءَ دری زباناں وتی ھال ءُ اھوال ءُ نزدیکیءِ زبان جوڑ کنگءَ انت۔ بلوچی،براھوئی ، کیتھرانی، جدگالی ءُ ایدگہ زبانانی بدلءَ مئے میانءِ ھال ءُ اھوالءِ زبان اردو ءُ فارسی اَنت۔ پہ درور اگاں یک بلوچے بلوچی زبانءَ گپ جنت ءُ براھوئی زبانءَ ھبر کنگ نہ زانت گڈا آ گوں وتی ھمبرائیں بلوچءَ اُردوءَ گپ جنت ءُ اے منّانک(دلیل) ءَ دینت ما بلوچی یا براھوئی نہ زان ایں۔ بزانکہ ما وتی جندءِ ماتی زبانءِ ھیل کنگ بدل ءَ اُردو ھیل کُتگ ءُ گوں یکے دومیءَ اُردوءَ گپ جن ایں بلئے بلوچی یا براھوئی ءُ ایدگہ بلوچءِ زباناں وتی میان ءَ ھال ءُ اھوال ءِ زبان جوڑ کُت نہ کن ایں۔ ما اے سرپد نہ بئیں کہ دری زبان بلوچءِ راجی دودمان (تہذیب)ءَ مسخ کنگءَ انت، چیءَ کہ راجی دودمان گوں زباناں بندوک بنت، اگاں بلوچ چہ بلوچیءِ بدلءَ دگہ دری زباناں وتی تہءَ جاہ بہ دنت گڑا ھما دری زبان کم کمّا بلوچءِ جیڑگ ءُ مارشتانی تہءَ انچو جاہ کن انت کہ چرائیءَ بلوچ وتی دودماناں شموش ایت ءُ دری دودماناں وتی تہءَ جاہ دنت، کہ پہ یک زندگیں راجےءِ راجی ھستی ءِ ھاترءَ اے سکیں ترسناکیں جاورے، پمیشکہ بلوچءَ لوٹ ایت کہ اے ڈیھءِ کجام پہناتءَ کہ نشتگ وت ما وتی ھال ءُ اھوال ءِ ھاترءَ دری زباناں ھال ءُ اھوال زبان (Communication Language) جوڑ کنگ ءِ بدل ءَ چہ وتی جندءِ ماتی زباناں یک زبانے ھال ءُ اھوالے زبان جوڑ بکن اَنت۔

نودربراں دلگوش کنان ءَ پنتاک ءِ نبشتگ کہ باسَمائیں نودربراں!

سال 1952 ءَ ھمے روچءَ بنگالی زبانءَ سرکاری تَکءَ راجی زبانےءِ رنگءَ منّارینگءِ ھاترءَ برجم داشتگیں زہرشانیءِ سرءَ (ھما زمانگ ءِ رودراتکی پاکستان) بنگلہ دیش واکداراں تیرگواری کنانءَ بازیں بنگالی ئِے شہید کت۔ ھمے آسر ءَ شہید بوتگیں مردمانی یاتءَ میان استمانی روچ دارگ بیت کہ آھاں پہ وتی ماتی زبانءِ رکینگءَ سُہر سریں تیر وتی دلبندءَ جاہ داتگ اَنت، انسانی گوستانکءِ تہءَ اے وئیل وتی تَبءِ یکیں وئیل زانگ بیت کہ مردم وتی ماتی زبانءِ ھاترءَ شہید بنت، دیمتر ءَ سال 1999 ءَ چہ تپاکیں راجانی گَل (United Nation Organisation) ءِ جہلی ادارہ (یونیسکو) ءِ نیمگءَ اولی براں اے روچءَ ماتی زبانانی میان اُستمانی روچءِ درگتءَ برجم دارگءِ منّگ نامگ شِنگ کنگ بیت۔ اے روچ مارا ھمے سکین ءُ یاتگیریءَ دنت کہ ماتی زبانءِ رکینگءِ ھاترءَ ھر وڑیں تاگتءِ دیمءَ اوشتگ ءُ وتی ماتی زبان ءِ پھازگ ھر مردم ءِ سرءَ الّم اِنت ءُ چوشکہ دْراھیں انسان برابر اَنت گُڑا کس ءَ اے ھک نیست کہ زبانءِ یا راجی دگری ءِ بنیاد ءَ یک راجے ءِ زباناں ڈالچار ءُ ایردست بہ کَنت۔ گوستانک گواہ اِنت ھما راجاں کہ وتی زبانءِ پھازگءَ پہ جُہد نہ کرتگ گڑا آ زبان مرگ آماچ بوتگ، ایشانی توکءَ مستریں درور افریکائی زبان انت کہ مروچی دنیاءِ تہءَ نیست ءُ نابود انت۔ زبانءِ مرگ راجءِ مرگءِ چیدگ انت ۔ پمیشکہ مروچیگیں اہدءَ را زبانانی مرگءِ نامءِ سرءَ توار کنگ بیت پرچہ کہ مزنیں زبان کسانیں زباناں ورگءَ انت، ایردست کنگءَ انت، پمیشکہ اے اہدءَ راجءِ ھمک پرزندےءَ پہ المی انت کہ وتی وس ءُ واکءَ زبانءِ ھزمتءَ پہ وتی بہرءَ ھوار بہ گیج ایت، دانکہ زبان چہ مرگءِ سیمسراں بہ رک ایت۔

یونیسکوءِ ھالتاکےءِ ردءَ چیزے سالاں پد کساس 20ءَ گیش زبان مرگ آماچ بوگءَ انت ایشانی توکءَ براھوئی زبان ھم ھوار انت۔ اگاں بلوچ راجدوست ءُ وانندگیں تبکہ وتی زباناں نبشتہ مہ کن انت تہ گڑا زبان گار بوگءَ دیر نہ کنت نوں وہد ھمیش انت کہ مارا وتی زبان پھازگی انت، مارا ھر وڑیں اڑاندانی دیمءَ اوشتگی انت۔

بلوچ راج ءَ دلگوش کنان ءَ پنتاک ءَ نبشتگ کہ

بلوچ مہلوک!

بلوچ راج ءِ تہ ءَ زبانانی بنیاد ءَ دگری پیداک کنگ ءُ تعصبی مئیل پیداک کنگ نوکیں ھبرے نہ اِت ءُ اے وھداں ھم چہ بازیں بلوچ دژمنیں توانانی نیمگءَ اے وڑیں ھیال اِشکنگءَ پیداک اِنت کہ اے پہ بلوچ یکمُشتی ءَ نیکیں پالے نہ انت، چوشکہ گوستگیں چیزے سالانی میانءَ ما ھمے گند ایں کہ بلوچ راجءِ راجی یکجاہیءِ تاکتءِ نزور کنگءَ جتائیں پندل سازگ بوگءَ انت کہ چہ ھمے پندلانی تہءَ یک مزنیں پندلے بلوچءَ آئیءِ زبان بلوچی ءُ براھوئیءِ بنیاتءَ بہر ءُ بانگ کنگ انت، چوشکہ چہ بلوچ دژمنیں توانانی نیمگءَ بلوچءِ ماتی زبان براھوئی پہ براھوئیءِ ھبر کنوکاں یک جتائیں راجے لیکگ بوگءَ انت ءُ پہ وتی ھمے پندلءِ مہکم کنگءِ ھاترءَ چہ نامی ئیں گل، پارٹی ءُ اکیڈمیانی نیمگءَ وتگڑیں تاریخ جوڑینگ بوگءَ انت، لکّاں زَر ھرچ کنگ ءُ وتگڑیں لٹریچر چاپ ءُ شنگ کنگ بوگءَ انت ءُ پہ زانت بلوچءِ راجی یکجاھیءِ تاکتءَ نزور ءُ ھلاس کنگءِ جہدءَ کنگءَ انت۔ ایشیءَ ھوار ما گند ایں کہ برے سرائیکیءِ رنگءَ، برے جدگالی ءُ کیھترانیءِ دروشمءَ بلوچ راجءَ بہر ءُ تہر کنگءَ انت ءُ برے بلوچی زبانءِ سہیں گالوارانی میانءَ (مکرانی، کوہء سلیمانی ءُ رخشانی) ھم یک دوری یے ودی کنگ بوگءَ انت، اے ڈسکورس باز رندءَ مارا لبزانتانی دروشمءَ گندگءَ کیت (بہ گندئے ڈسکورس غیردانستہ بلوچ لبزانتانی توکءَ ودی بوتگ) اے وڑیں دوری بلوچی زبان ءُ راجءَ پہ سک باز تاوان بار انت۔ دومی نیمگءَ بلوچ لبزانتانی توکءَ ایوکیں مردم عطا شاد بوتگ کہ آئیءِ توکءَ راجی سنچے مان بوتگ کہ آئیءَ نہ تہنا بلوچیءِ سہیں گالوارانی توکءَ نبشتگ بلکیں بلوچ راجی ایدگہ زبان ھم وتی ساچشتانی توکءَ مان کتگ چوشکہ سرائیکی یا براھوئیءِ بازیں لبز ئِے زرتگ بائد انت ھر بلوچ لبزانت ھمے رنگءَ بہ بیت۔ نوں مارا بلوچ راجدوستاں اے زانگی اِنت کہ اے تپاوت تہنا مئے میان ءَ بد دلی ءُ پہ مئے یکمُشتی ءِ پروشگ ءَ آرگ بوگ ءَ اَنت ءُ ھر یک بلوچ راجدوستے ءِ سر ءَ الّم اِنت کہ اے وڑیں لیکہ ءُ عملاں گیش ءَ گیش ایر بہ جن اَنت ءُ اے وڑیں کردارانی دیم ءَ بوشت اَنت ءُ بلوچ یکمُشتی ءَ تاوان دیگ ءِ سر ءَ آیانی گورجیگ ءَ بہ گِر اَنت۔

بساک ءَ وتی پنتاک ءِ گُڈ سرءَ چہ راج ءَ دزبندی کنان ءَ گُشتگ کہ بلوچ راجدوستے ءِ سرءَ بلوچ ءِ کُلیں ماتی زُبانانی پہریزگ الّم اِنت ءُ بلوچ ءِ اے ماتی زُبانانی دیمروئی پہ مُچ بلوچ ءَ نَپ اِنت کہ ایش مئے ھمکوپگی ءُ یکمُشتی ءَ مہکم کَنت۔ ءُ ماتی زبان ھما وھدءَ زندگ بنت ءُ دیمروئی کن انت کہ آ زباناں گپ جنگءَ ھوار وانگ ءُ نبشتہ کنگ بیت، مارا لوٹیت کہ بلوچ ڈیھءِ کجام اوں دمگےءَ کہ نشتگیں دری زباناں وتی روچ روزینی زبان مہ کن ایں، بگندئے وتی زباناں ھبر بہ کن ایں، ءُ دومی وتی ماتی زباناں نبشتہ کنگ ءُ وانگءِ تب ءُ مئیل پیداک کنگءِ ھاترءَ جہد ءُ کوشست بہ کن ایں۔

بلوچ ءُ آئیءِ شہدیں زبان زندگ بات انت۔

اے ھما سرمچار اَنت

نبشتہ کار: میار بلوچ

دی بلوچستان پوسٹ

شپ تھار اَت، کَش ءُ کِراں چِریت ءُ دگہ گُنڈارانی توار ھم نوں گُشے ھاموشی ءَ گُٹگیر کُتگ اِت اَنت، آزمان استال ءَ پُر اَت آ ھما سئیں استالاں چارگ ءَ اَت کہ مدام ھوار بیتگ اَنت، آئی ءَ چم آزمان ءَ ٹِک داتگ اِت اَنت کہ انچوکہ آئی ءَ ھما سئیں استال دِست اَنت۔ اے سئیں استال کجام ھم وھد ءُ جاہ ءَ آئی ءِ چماں کپتگ اَنت سئیں گُشے مدام گیشتر رژناہ ءُ ھوار گندگ بیتگ اَنت ھیر شپ استالانی چارگ ءَ آسر بیت۔

روچ ٹِک اَت آئی ءَ بُرزگیں جاھے شوھاز اِت کہ رواں چاراں کہ انٹرنیٹ ءَ چی نیوز اَنت چی ھال اَنت، ھالانی چارگ ءُ شوھازگ ءَ آئی ءَ بازیں نبشتانک، پوسٹ ءُ ٹوئٹ ھم یکجاہ کُت اَنت بازیں ھما دمان ءَ وانگ نہ بیت اَنت سکرین شاٹ گِپت اَنت کہ پد ءَ وانگ بنت ھیر آئی ءَ بلوچستان ءِ اھوال وانگ بندات کُت اَنت بلیدہ، تُربت، آواران، ھوشاب، بولان، کوھلو، بمبور، شال، کراچی، گوادر، ھب چُشیں یک ھم شھرے پشت نہ کپتگ اَت کہ اود ءَ آس روک نہ اَت۔

پوجی بیڑ، مردمانی بیگواہ کَنگ، زالبولانی سر ءَ زوراکی، گِس ءُ بازارانی ماندارگ، پوجی بیڑانی نیام ءَ زالبولانی کم شرپ کنگ، بلوچ نودربرانی بیگواھیانی یکشل ءَ برجاھیں درچ، ماما کدیر ءُ آئی ءِ سنگتانی سر ءَ نبشتگ کُتگیں ایف آئی آر ءَ ھوار بازیں انچیں زلم ءُ زوراکیانی ھال ءُ مردمانی بزگی واری ءُ لاچاریانی کسھاں گُش ئے چمانی ارساں ریچگ ءَ لاچار کُت۔

آئی ءَ اھوال وانان کُت اَنت داں آئی ءَ دست کہ دژمن ءَ مزنیں دک ھم وارتگ اَنت، نوشکی ءُ پنجگور ءِ ھال چوناھا جھان ءَ سر اَت بلے آئی ءَ دلجمیں ھال نہ رس اتگ اِت اَنت کہ آ ھمے نیام ءَ جُنزگ ءِ تہ ءَ بیتگ اَنت۔ وھدے آئی ءَ جنگے کسہ وانگ بندات کُت کہ شانزدہ مردماں یک ایٹمی مُلکے داں ھپتاد ءُ دو ساھتاں انچو لاچار کُتگ بیتگ کہ آئی ءَ گُڈ سر ءَ وتی کیمپانی سر ءَ وت شیلنگ کُتگ اَت۔ آئی چم پد ءَ ارسیگ اَت اَنت بلے امبری اے ارس گم ءُ زھر ءِ جاہ ءَ پھر ءُ وشیانی درشانی کنگ ءَ اِت اَنت۔

آئی ءَ بازیں سوشل میڈیا پوسٹ ءُ اھوال ھم زرتگ اَت نبشتانک ءُ نگد ھم سکرین شاٹ کُتگ اَت دانکہ لس مھلوک ءُ زانتکارانی لیکہ ءَ بزانت آئی ءَ دِست کہ اولی رند اَت کہ بلوچ سوشل میڈیا، بلوچ اھوالکار، بلوچ راجکار، بلوچ انسانی ھقانی باسک، درستانی زبان یک اِنت ءُ وتی راجی کنگراں نہ تھنا ساڑاھگ ءَ اَنت بلکیں تاکت ور ءَ گُشگ ءَ اَنت ھم کہ اے تئی زوراکی، تئی زورگری ءُ تئی نیمگ ءَ بلوچانی گلام دارگ ءُ آیانی راجی مڈیانی پُلگ ءَ ھوار بلوچ ءِ ننگ ءُ ناموسانی پادمال کنگ ءِ بگیری ءَ بلوچانی ترندیں بگیری اِنت کہ اے گوں تئی زوراکیاں ھلاس نہ بیت بلکیں انگت ود اِیت۔

آ نہ تھنا وت اے درستیں ھال ءُ پوسٹاں وانگ ءَ اَت بلکیں بنجل ءَ ساڑی ئیں نرمزاراں ھم سرپدی دیگ ءَ اَت۔ آ پوسٹ ءُ اھوالاں وانگ ءَ اَت کہ سنگتے ءَ گُشت بالی پرکانی توار اِنت ءُ اھوال اتکگ کہ زمینی پوج ھم مروچی مزنیں کساسے ءَ ھمے کوھانی کش ءُ کِراں آس گوارگ ءَ اِنت آئی ءَ پد ءَ وتی موبائل بُست، توپگ ءُ ایندگہ سامان بڈ ءَ کُت اَنت ءُ دیم پہ رکیتگیں جاھے رھادگ بیت اَنت۔

اے وھد ءَ کہ آ دژمنے مزنیں لشکریانی گن شپ ھیلی کاپٹرانی شیلنگاں چہ وت ءَ وتی سنگتاں رکینگ ءَ اَت ءُ پہ یک آزاتیں بلوچستانے ءَ سراں سرگوزگ ءِ جھد ءَ ھوار اَت یک نیمگے یکے آیاں ءُ وت ءَ جتا کنگ ءَ اَت، یک نیمگے یکے گُشگ ءَ اَت کہ کجام سال ءُ امبر ءَ ءُ چون مردم زیرگ بہ بنت پہ جھدءَ۔

بلے گواروکیں تیر ءُ شیلنگانی نیام ءَ آئی ءَ کمو ھم گلگ نہ کُت کہ کئے چی جیڑگ ءَ اِنت ءُ کئے راست ءُ ردی ءِ کِشک ءَ کَشگ ءَ اِنت آئی ءَ گمان آ دمان ءَ بس ھمیش اَت کہ اے جنگ ءَ یا من وت ءَ نمیران کناں یا دژمن ءَ کُشاں بلے دگہ چُشیں راھے نیست کہ منی ءُ آئی توپگ ءَ دراتکگیں تیراں سرپد کُت بہ کنت اگاں داشت بہ کنت۔

آئی ءَ زانتگ اَت کہ دژمنے توپگ، آئی ءِ تاکت، آئی ءِ لشکر، آئی ءِ آسراتی اَچ مارا سک باز اَنت بلے آئی ءَ اے ھم باور است اَت کہ دژمن لگور اِنت، دژمن پہ زر جنگ کنگ ءَ اِنت، پہ زوراکی اد ءَ اتکگ، اے زمین، سرڈگار ءُ کوہ درست پہ آئی ءَ درآمد اَنت بلے منی وارس اَنت گوں من گپ کن اَنت من ءَ پجا کار اَنت ءُ منی ھمراہ اَنت۔ آ ھمے باور ءُ راستی ءِ ھمراھی ءَ جنگ دیان اَت ءُ جنگے وشی ءُ تھلیاں وتی زندے ھمراہ کن اَنت ءُ جُنزان اَت۔ آ سرمچار اَت، ھما سرمچار کہ برے بالاچ ءُ برے اسلم اَنت، برے ریھان ءُ ازل اَنت، برے شَے حق ءُ برے داکٹریں خالد اَنت، برے شائریں میرل ءُ ورناھیں سربلند اَنت، برے چوں میرین ءِ دروشم ءَ پہ دژمن ءَ آس گوار اَنت۔ اے ھما سرمچار اَنت کہ زند ءِ گُڈی ساہ ءَ وتی سرڈگار ءِ مرید اَنت ءُ پہ سرجمیں ڈیھہ ءُ راجے باندات ءَ وتی ساہ ءَ ندر کنگ ءَ ھم چک ءُ پد نہ بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ بنجاھی شھر تربت ءَ ٹیچنگ ھسپتال ءِ مردہ ھانہ ءَ یک ناپجاریں یک انسانی ھڈ پجار ءِ ھاتر ءَ ایر اَنت-

ھسپتال ءِ رد ءَ چھرگ ءُ سرجمیں جسم ءَ ھچی نیست اِنت ءُ آئی ءِ وارس ھچ تنی وھدی نیتکگ اَنت-

زانگ بہ بیت اے وڑیں لاز گیشتر کوھی دمگاں دزکپتگ اَنت – اے گیشتر سَڑیتگیں ءُ لَٹ ءُ کُٹانی دیمپان اَنت ءُ اشانی پجار ناسرجمی اِنت –

بلوچ راجدوستیں پھنات ءُ انسانی ھکانی گلاں اے لاشانی زمہ وار پاکستانی چیریں ادارہ ءُ سیکورٹی پورسز ءَ گوشگ اَنت-

زانگ بہ بیت گوستگیں دوازدہ سالاں چہ بلوچستان ءِ جتا جتائیں جاھاں سدانی کچ ءَ مردمانی جون دزکپتگ اَنت بے وارس گوشگ بیتگ اَنت-

اے وڑیں لاشانی ناپجاری ھمے وڑ ءَ بلوچستان ءَ ڈی این اے ءِ ھچ آسراتی نیست اِنت چریشی ءِ سبب ءَ زورانسری بیگواھی ءِ آماچیں بلوچانی کھول پدردی درشان کنگ ءَ اَنت-

بلوچستان ءِ دمگ ڈیرہ بگٹی ءُ کوھلو ءِ میانی دمگ بمبور ءَ پاکستانی لشکر یاں زمینی ءُ بالی بیڑانی بندات کُتگ۔

پوجی بیڑ بمبور ءُ کَش ءُ کِری کوھی میتگ ءُ کُچگانی تہ ءَ بئیگ ءَ اِنت وھدیکہ جتاھیں جاھاں گن شپ بالی پرکانی شیلنگ کنگ ءِ ھم اھوال اِنت۔

اے دمگ ءِ مردم پہ وتی گُزران ءَ شپانکی کن اَنت وھدیکہ پوجی آپریشن ءِ تہءَ ھچ پئیم جانی تاوان ءِ ھال دیما نئیتکگ اَنت ءُ نانکہ دزگیری ءِ اھوال اَنت۔

وھدیکہ چہ ڈھاڈر ءَ لشکریانی گاڑیانی کاروان ءُ بالی پرک پیش گامی کنگ ءَ گندگ بیتگ اَنت۔

واکداراں دان انگت بیڑ ءِ درگت ءَ ھچ پئیمیں اھوال ءُ درشان شنگ نہ کُتگ۔

بلوچ ریپبلکن گارڈز ءِ جارکش دوستین بلوچ ءَ رسانکدراں شنگ کُتگیں درشان ءِ تہءَ گُشتگ ھمراھیں گل بلوچ نیشنلسٹ آرمی ءِ گوستگیں روچاں میڑءَ نمیران بیتگیں پاسبان وتن شھید کمانڈر نورسلام نور پنام استال، زبیر اکرم پنام اسد جان، کمبر بلوچ پنام مھروان، صغیر بلوچ پنام طارق، حافظ فراز پنام ملا درویش ءُ رسول جان پنام چراگ ءَ سھریں دروت ءُ ستاشانی پیش کن ایں۔

آئی گُشتگ کہ عظیمیں راجی لوٹ ءِ ھاترءَ ورناھانی اے دیمھونی قابل رشک اَنت زورگیریں ریاست ءِ بگیر ءَ بلوچ وتی راجدپتری گھگیری ءَ دیمپان اَنت، سلاہ بندیں جھد پہ راجی آجوئی ءَ یک پر ارزشت ءُ سوبمندیں جھد ءِ کِشک اِنت۔

جارکش ءَ گُشتگ کہ نمیرانی راجی جُنز ءِ گیشتر تاگت کاریت نمیرانیاں چہ راجی لوٹ نزور نہ بنت بلکیں گیشتر توانا بیت۔

دوشی شپ اسپینش فٹبال لیگ لالیگا ھشت ٹیمانی میان ءَ گوازی کنگ بوتگ کہ آھانی تہ ءَ ویالریال ءَ چار، ایٹلیٹکو میڈریڈ ءَ سَے ءُ رئیل میڈریڈ ءَ سَے گولاں گوازی کٹ اِتگ انت ءُ وھدیکہ کاڈیز ءُ گیٹفے دیمیگ بوتگ انت- ھمے وڈ دومی نیمگ ءَ یورپئین پریمئیر لیگ ءِ فٹ بال گوازی ءِ شانزدہ ٹیمانی میان ءَ گوازی کنگ بوتگ –

دوشی شپ لالیگا ءِ اولی گوازی گرانادا ءُ ویالریال ءِ میان ءَ کنگ بوتگ کہ گرانادا ءِ نیمگ ءَ چہ یک گول ءِ اسکور کنگ بوتگ ءُ ویالریال ءَ چار گولاں چہ گوازی کٹ اِتگ – گرانادا ءِ نیمگ ءَ گول ایل. میلا ءَ داتگ وھدیکہ ویالریال ءِ لیبی ارناؤت دنجما ءَ سَے ءُ ایم.گومس ءَ یک گولے اسکور کتگ گوازی وتی ٹیم ءِ نام ءَ کُتگ –

دومی گوازی ءَ ایٹلیٹکو ءَ اوساسونا ءِ دیم ءَ سَے گولاں چہ گوازی کٹ اِتگ وھدیکہ اوساسونا ءِ نیمگ ءَ چہ ھچ گول اسکور کنگ نہ بوتگ- ایٹلیٹکو میڈریڈ ءِ نیمگ ءَ چہ جے.فیلکس، ایل.سوریز ءُ اے.کوریا ءَ گول اسکور کُتگ انت –

لالیگا ءِ سیمی گوازی ءَ کاڈیز ءُ گیٹفے یک یک گول ءَ دیمیگ بوتگ انت وھدیکہ چارمی گوازی ءَ رئیل میڈریڈ ءَ ایلووز ءِ دیم ءَ سَے گول اسکور کُتگ گوازی کٹ اِتگ – رئیل میڈریڈ نیمگ ءَ چہ اے. اسینسیو، وی.جونئیر، بینزیما ءَ یک یک گولے اسکور کُتگ گوازی وتی ٹیم ءِ نام ءَ کُتگ –

دومی نیمگ ءَ یورپئین پریمئیر لیگ گوازی ءَ شانزدھیں ٹیمانی تہ ءَ نیوکاسٹل ءُ ویسٹ ہام یک یک گول ءَ دیمیگ بوتگ انت – ارسنل ءُ برینٹفورڈ ءِ میان ءَ بوتگیں گوازی ءَ ارسنل ءَ دو پہ یک گول ءَ گوازی کٹ اِتگ – ھمے وڈ برنلی ءَ برائیٹون ءِ دیم ءَ سَے گولاں چہ گوازی کٹ اِتگ –

لیور پول ءُ نارویچ سٹی ءِ میان ءَ بوتگیں گوازی ءَ لیور پول ءَ سَے گولاں گوازی کٹ اِتگ نارویچ ءِ نیمگ ءَ چہ یک گول ءِ اسکور کنگ بوتگ – ساؤتھ ایمپتون ءُ ایورٹون ءِ میان ءَ ساؤتھ ایمپتون ءَ دو گولاں گوازی کٹ اِتگ – ھمے وڈ وٹفورڈ ءَ اسٹون ویلا ءُ چیلسیا ءَ کریسٹال فلیس یک یک گولے ءَ چہ بازی بُرتگ انت –

پریمئیر لیگ ءِ دوشی شپ بوتگیں گڈی گوازی مانچسٹر سٹی ءُ ٹوٹنہم ءِ میان ءَ بوتگ کہ ٹوٹنہم ءِ سَے پہ دول گولاں گوازی کٹ اِتگ –

شمبے ءِ روچ ءَ حق دو تھریک ءِ راھشوناں مولانا ھدایت الرحمان، حسین واڈیلہ ءُ دگراں چیف سیکرٹری بلوچستان مطھر نیاز رانا ءُ دگہ آپیسراں گوں گند ءُ نند کتگ ٹرالرز، سیمسر، بے مکسدیں چیک پوسٹ، بلدیہ کاردارانی جیڑہ، زمینانی واھنداں ھک ءُ فشریز کارداراں دمگی مردمانی دلگوش دیگ ءَ ھوار دگہ کارانی سر ءَ گپ ءُ رپ کتگ-

ھمے درگت ءَ جتائیں کارانی سر ءَ ٹرالرز ءِ گر ءُ دار ءِ ھاتر ءَ چست ایر ءُ گیش تُرندیں گامگیج زورگ ءِ درگت ءَ گپ بوتگ وھدے کہ مکران سیمسر ءَ کانودی کار ءُ بار ءِ ھاتر ءَ دلگوشی بوتگ ءُ سرجمیں مکران سیمسر سر ءَ ایف سی ءِ ھرچ وڑیں دزمانجنی سر ءَ پابندی جنگ، ٹیکھداری ءُ زر گرگ سرجمی ءَ ھلاس کنگ ءِ سر ءَ بُرزی واکداراں گوں وتی لیکہ پیش کتگ اَنت-

حق دو تھریک ءِ راھشوناں مکران ءَ بے مکسدیں چیک پوسٹ، ھاسکار میتگ ءُ بازارانی تہ ءَ، لوگ ، وانگجاہ ءُ دگہ راجی ماڑیانی تہ ءَ ھستیں ایف سی چیک پوسٹاں چہ بلوچ ننگ ءُ ناموس ءِ لگتمالی بہ بیت ، اش سرجمی ءَ ھلاس کنگ ءِ لوٹ کتگ-

مکران ءِ بلدیہ کاردار پکائی ءُ پگار ءِ دیگ ءِ ابید سربندن ءُ کلاچی پاڑہ ءَ ھوار ضلع ءِ سرجمیں دمگ ءِ مردمانی زمینانی ءِ واھننداں ھک دیگ ءِ لوٹ ھم کتگ-

گیش محمکہ فشریز انو جار جنگ بوتگیں روزگار ءِ ضلع گوادر ءِ تنگدست ءُ شریں مردماں دلگوش دیگ ءُ کجام ھما سیاسی سُر پُر نہ منگ ءِ سر ءَ چیف سیکرٹری گوشگ بوتگ-

ضلع کیچ ءِ زمہ واراں ضلع کیچ آس کشوک ” فائربریگیڈ ” ءِ جیڑہ سر ءَ ھم چیف سیکرٹری بلوچستان ھیال پرینتگ ءُ اے لوٹ ھم کتگ کہ سیمسر سر ءَ دمگی مردماں وتی ورگی توژگ ءِ آرگ سر ءَ پابندی ءُ گر ءُ دار مہ بیت، ضلع پنجگور ءِ زمہ واراں پنجگور انتزامیہ ءِ نزوری ءِ شکایت کتگ انوگیں انتزامیہ ضلعی کار ءُ امن ءُ ایمنی ءِ کنگ ءَ سرجمی ءَ بے سوب بوتگ دزبندی اِنت انتزامیہ ءَ بدل کنگ بہ بیت-

دوئیں نیمگ ءَ اے سرجمیں جیڑہ ءِ گیش ءُ گواری ءِ ھاتر ءَ ھیال ءُ لیکہ پیش کتگ ءُ مکینزم جوڑ کنگ ءِ ھاتر ءَ جیڑ اِتگ-

چیف سیکرٹری بلوچستان ءَ حق دو تھریک ءِ اے سرجمیں لوٹانی چست ءُ ایر باورکنائینتگ ءُ گْوشتگ کہ سرجمیں جیڑہ ھک اَنت ءُ ھکومت چست ءُ ایر ءِ ھاتر ءَ الّم گامگیج بزور اِیت-

بلوچستان ءِ بنجاھی شھر شال ءَ پریس کلب ءِ دیم میڈیکل نودربرانی وتی ھکانی لوٹ ءَ زھرشانی برجاہ انت –

بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءِ سرکماش نصراللہ بلوچ، کمک سرکماش ماما قدیر بلوچ ءُ نودربر رھشون ڈاکٹر ماھرنگ بلوچ بنجل ءَ شُتگ آھانی گوم ءَ دلپدری درشان اتگ ات –

ھمے وھد ءَ نصراللہ بلوچ ءَ گوشتگ کہ سرکار ءِ نیمگ ءَ میڈیکل کالج ءِ نودربرانی رجسٹریشن کنگ ءَ وتی کرد پیلو کنگ وشیں گپ یے ھمے امیت ءَ داریں سوبائی سرکار نودربراں ھمراھ داری ءَ یل نہ کنت –

زانگ بہ بیت بلوچستان میڈیکل نودربر گوستگیں بازیں روچاں ریڈ زون ءَ زھرشانی انت ھمے میان ءَ آھاں شُدکشیں زھرشانی ھم کُتگ بلے پد ءَ سوبائی سرکار ءِ گوشگے پد ءَ آھاں شُدکشیں زھرشانی ھلاس کُتگ وتی بنجل پریس کلب ءِ دیم ءَ بُرتگ –

بلوچستان سرکار ءِ جارکش ءِ رِد ءَ وزیر اعلی عبدالقدوس بزنجو سوبہ ءِ سَے میڈیکل کالج ءِ نودربرانی جیڑہ زرتگ ءُ اسلام آباد ءَ شُتگ ءُ ھمے زوتاں جیڑہ گیش ءُ گیوار کنگ بنت –

سربوتگیں ھالانی رِد ءَ بلوچستان ءِ دمگ کیچ ءَ پاکستانی پوج ءَ گِس ءِ سر ءَ بیڑ بُرتگ ءُ یک مردمے زورانسری آوار جتگ ءُ بیگواہ کُتگ –

آوار جنگ بوتگیں مردمے پجار نبیل ء لیاقت جاھمنند گومازی ءِ نام ءَ چہ بوتگ –

اھوالکار رِد ءَ اے مرد پاکستانی پوج ءَ گوستگیں شپ ءَ گِس ءِ سر ءَ بیڑ بُرتگ ءُ زورانسری آوار جتگ –

اھوالکار ءِ رِد ءَ پاکستانی پوج ءَ گِس ءَ ساڑی ئیں چُک ءُ جنین لٹ شاپ کُرتگ انت ءُ زوراکی کنان ءَ گِس ءِ گرانھادیں مڈی ھم گوں وت بُرتگ انت –

بلوچستان ءِ بنجاھی شھر شال ءَ مروچی شمبے ءِ روچ ءَ بلوچ رھشون حاجی لشکری رئیسانی، ماما قدیر بلوچ، نصراللہ بلوچ ءُ دگہ مردمانی نام ءَ ارزی نبشتہ کنگے بگیری ءَ پریس کلب ءِ دیم ءَ زھرشانی کنگ بوتگ –

زھرشانی ءَ بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر ءُ دگہ مردم ھم ھوار بوتگ انت –

زھرشانی کنوکاں پلے کارڈ دست ءَ بوتگ ءُ سرکار ءِ بگیری ءَ نارہ جتگ ءُ لوٹ کتگ کہ ارزی واپس زورگ بہ بیت –

دومی نیمگ ءَ مروچی ایڈیشنل ڈسٹرکٹ سیشن جج ءَ شال ءِ آمیدگس ءَ حاجی لشکری رئیسانی ءُ دگہ مردم بیست شش فروری ءَ تاں آھانی عبوری زمانت بوتگ –

لشکری ءِ آمیدگس ءَ پیش بوھگے میان ءَ مردمانی مزنیں کچ ءَ سیشن کورٹ ءِ نزیک گوراں یکجاہ بوتگ ءُ زھرشانی کُتگ ھمے وھد ءَ لشکری رئیسانی ءَ رسانکدراں گوں تران کنان ءَ گوشتگ کہ اگاں ریاست ءِ دل سارت نہ بوھگ ءَ انت گڈا ارزی ءَ نبشتہ بہ کنت بلے بیگواھیں مردمانی یل کنائینگے ھاتر ءَ جھد ءَ برجاہ داریں –

آئی ءَ گوشتگ کہ مئے سر ءَ کرونا وائرس ءِ شنگ کنگے الزام جنگ بوتگ کہ اے سرکارے بوکھلاہٹ انت –

آئی ءَ گوشتگ اگاں ریاست وتی بے سوبیاں چیر دئیگے ھاتر ءَ مئے سر ءَ دروگیں کیس جنت –

لشکر رئیسانی ءَ گوشتگ کہ بیگواھیں مردمانی کھول ءِ گوم ءَ منی راجی ءُ انسانیت ءِ سیادی ھست اے گپ پدر بوتگ کہ مردمانی آوار جنی ءَ ریاست ءِ دست مان انت –

زانگ بہ بیت گوستگیں روچاں لشکری رئیسانی، ماما قدیر بلوچ، نصراللہ بلوچ ءُ دگہ مردمانی سر ءَ ارزی نبشتہ کنگ بوتگ – ارزی ءَ ھمے نبشتہ انت کہ اے مردماں گوستگیں سال ءَ زھرشانی ءِ میان ءَ کرونا ایس او پیز ءِ بگیری کتگ ءُ ٹی این ٹی چار راھے سر ءَ نندانک جتگ وھدیکہ زھرشانی کنوکاں ڈوٹی سر ءِ پولیس کارمند تیلانک داتگ انت ءُ ریڈ زون ءَ پُترگے کوشتگ کتگ –

ایف آئی آر سول لائن تانہ پولیس ءِ ایس ایچ او محمد شھباز ہاشمی ءَ وائس فار بلوچ مسنگ پرسنز ءِ رھشون ءُ بی این پی مینگل رھشوناں ھوار بیگواھیں مردمانی کھول ءُ زالبولیں باسکانی نام ءَ نبشتہ کُتگ وھدیکہ ارزی ءِ تہ ءَ بی ایس او ءُ پی ٹی ایم ءِ باسکانی نام ھم ھست اِنت –

دومی نیمگ ءَ بلوچستان راجدوستانی نیمگ ءَ بلوچ رھشون ءِ نام ءَ ارزی نبشتہ کنگے ایرجتگ ءُ ھمے گوشگ انت کہ بلوچستان ءَ زورانسری آوار جنیانی بگیری ءَ توار چست کنوک ترسینگ بوھگ انت ءُ اے سرکار ءِ پندل ئے