TBP Balochi

گوستگیں شپ ءَ سلاہ بندیں مردماں ڈیرہ بگٹی ءَ ٹرک ءِ سرءَ تیرگواری کُتگ ءُ یک مردمے کُشتگ۔

تیرگواری ءِ وئیل سوئی کشمور ءِ بنجاھی دگ ءِ سرءَ سوئی ڈیرہ بگٹی ءِ حد ءَ بیتگ۔ اھوالانی ردءَ تیر گواری ءَ ٹرک کنڈکٹر ھما دمان ءَ بیران بیتگ وھدے کہ ڈرائیور داں انگت بیگواہ اِنت۔

اھوالانی گُشگ اِنت کہ اے ٹرک ریک بروکیں ٹرک ءِ بیتگ بلے داں انگت وئیل پُشدر زانگ بئیگ ءَ نہ اَنت نانکہ واکدارانی لیکہ اے درگت ءَ دیما اتکگ۔

یوکرینی فوجی کیف ءِ نیمگ ءَ جنزوکیں روسی فوجیانی دیمپانی ءَ کنگ ءَ اَنت، آدینگ ءِ روچ ءَ یوکرین ءِ سروک ولودیمر زیلینسکی ءَ کیف ءَ نندگ ءِ پرمان کرتگ-

ھالکاری ترامگیج روئٹرز ءِ رد ءَ روس ءَ یوکرین ءِ سر ءَ زمین، آسمان ءُ زر ءَ چہ مُچیں اُرش کجام ھم اُرشاں یورپی ڈیھاں دومی جھانی جنگ ” جنگِ عظیم” ءَ پد بیوکیں درستاں مستریں جنگ اِنت-

تراک ءُ بیڑانی سبب ءَ بازیں مردمے ءَ یوکرین یلو کرتگ ءُ دگہ نزیکیں ڈیھاِ وتی رکینگ ءَ جنزگ ءَ اَنت-

زانگ بہ بیت گوستگیں روچ ءَ امریکہ سروک جوبائیڈن ءَ روسی ءَ جنگ ءِ بند کنگ ءِ پرمان کتگ –

وائٹ ھاؤس ءَ تران کنان ءَ جوبائیڈن ءَ گوشتگ کہ ’ صدر پوتن ءَ سپارتکاری ءِ زور ءَ ھمسنتی ءِ جھد نہ منّ اِتگ-‘

امریکی سروک جوبائیڈن ءَ گوشتگ کہ روس ءِ سر ءَ مزنیں پابندی جنگ بنت ءُ روسی بینک ءَ 250 ملین ڈالر بند کنگ بنت روس ءِ گیس کمپنی ءِ نھادانی برز بیگ ءَ نیلیں -‘

امریکی سروک ءَ گوشتگ کہ ’اگاں روس ءَ سائبر اُرشانی مھم بندات کرتگ گڑا آئی ءَ ھما رنگ ءَ پسو دیگ بیت اِنت ‘-

’اگاں مئے لھتے گامگیج سک ترند بنت وھد ءِ ھمراھی ءَ پدر بنت-، آئی ءَ گوشتگ ’ ماسکو ءَ میان اُستمانی نھاد جاھاں روگ ءِ نشانگ کن ایں -‘

امریکہ ءَ واشنگٹن ءَ ھستیں روس ءِ مزنیں سپارتکاری ملک ءَ درایگ ءَ کپتگ –

آئی ءَ گوشتگ ’ نیٹو اتحادی ءِ ھواریں سیکورٹی ءِ زمہ واری ءَ سرجمی ءَ کنت نیٹو ءِ مھکم کنگ ءَ امریکہ ءَ گیشیں پوجی جرمنی ءَ کڈن کتگ اَنت-

دومی نیمگ ءَ یورپی یونین ءِ رھشوناں روس ءِ ھلاپ ءَ بازیں کچے ءَ پابندی ءَ دلجم اَنت-

اے ایف پی ءِ رد ءَ یورپی یونین ءِ نیمگ ءَ روس ءِ ٹرانسپورٹ، توانائی ءُ مالی تکاں پابندی جنگ ءَ اَنت-

برتانیہ ءَ بازیں کچے ءَ روسی بینکانی کارباری ادارھ ءُ مردمانی سر ءَ پابندی جنگ ءِ جار جنگ بیتگ اَنت ءُ روسی راجی بالیگ ایروفلوٹ ڈیھ ءَ بال ءَ گوزگ ءِ پابندی جنگ بیتگ –

نیشنل ڈیموکریٹک پارٹی ءِ بُنجاھی جارکش ءَ پارٹی ءِ بُنجاھی کمیٹی ءِ باسک ڈاکٹر جمیل بلوچ ءِ زورانسری آوار جنی ءَ ایر جتگ ءُ گْوشتگ کہ زیک بزانکہ 23 فروری ءِ نیم روچ ساھت دو ءَ پارٹی ءِ بُنجاھی آرگنائزنگ کمیٹی ءِ باسک جمیل بلوچ ناشناسیں سلاہ بندیں مردماں ویٹرنری کلینک ءَ چہ چست کتگ ءُ برتگ- دمگی مردمانی رِد ءَ چست کنوکانی سیادی ڈیھی ادارھاں چہ گوشگ بوگ ءَ اِنت کہ روچ رھم ءَ سیاہ کانچیں گاڑیاں گوں اَتکگ اَنت-

جارکش ءَ گْوشتگ کہ راھبندی وڑ ءُ پیم کارمرز کتگ ءُ تھانہ ایف آئی آر نکش کتگ ءُ پارٹی ءِ بُنجاھی راھشون ءَ پہ سلامتی یل کنائینگ ءِ ھاتر ءَ پارٹی ءِ نیمگ ءَ آؤکیں روچاں زھرشانی ءِ شیڈول جار جنگ بیت-

جارکش ءَ گْوشتگ کہ انّگیں بارکھان بوگس لوکل ڈومیسئل ءِ جیڑہ سر ءَ گوں تُرندی ءَ زھرشانی کنگ بوتگ چریشی ءَ ڈاکٹر جمیل بلوچ ءَ پارٹی ءِ راھشونی کتگ ءُ جوانیں وڑے ءَ کرد پیلو کتگ- اے زھرشانی ءِ سبب ءَ دمگی انتزامیہ ھزاراں بوگس ڈومیسائل دارگ کنگ کپتگ چریشی ءِ سوب ءَ چہ اکتدار ءَ اَتکگیں مردمانی تہ ءَ زھری ودی بوگ ءَ بوتگ-

جارکش ءَ دیمتر ءَ گْوشتگ کہ بلوچستان ءَ سیاسی باسک بے مھری ءِ نشانگ اَنت بلے نیشنل ڈیموکریٹک پارٹی اے ھال ءَ راجی زمہ واری پیلو کنگ ءَ سیاسی جُھد ءِ راہ گچین کتگ ءُ مروچی ھم اے ارادگ درشانی کنت ءُ پارٹی سیاسی جُھد ءَ ھچبر دستکش نہ بیت بلکیں بلوچ راج ءِ راھشونی ءَ پارٹی جوڑ بیت راجی ھکانی پھازگ ءِ ھاتر ءَ ھرچ وڑیں دیمونی ءَ چک ءُ پد نہ بیت-

یورپی ڈیھ یوکرین ءُ روس ءَ شپ ءَ بندات بوتگیں میڑ برجاہ ءَ اِنت وھدے کہ روسی پوج یوکرین دارلھکومت “کیو” دستیگ کنگ ءِ ھاتر ءَ جتائیں جاھاں بمبگواری کنگ ءَ اِنت-

روسی رسانکدری ادارہ آر ٹی ءَ شنگ بوتگیں تامُر رِد ءَ روسی پوج یوکرینین دارالھکومت کیو ءَ جوھری پلانٹ ءِ نزیک ءَ بمبگواری کنگ ءَ اِنت ءُ بلے آر ٹی ءَ تامُر راستی پدر نہ کتگ-

دومی نیمگ ءَ یوکرینن شھری جتائیں دمگاں لڑ ءُ بار کنگ ءَ اَنت نزیکیں ڈیھاں ھوار شھراں میار بوگ ءَ اَنت وھدے کہ یوکرینن صدر ودلودومیر اولیکسیندرویچ زیلینسکی ءَ وتی درشان ءِ تہ ءَ جھان ءَ روسی دستیگ درگت ءَ مکن کتگ ءُ کُمک ءِ دزبندی کتگ-

زانگ بہ بیت گوستگیں چیزے روچ ءَ چہ روس ءُ یوکرینن جیڑہ ءَ درشانانی دْرچ برجاہ بوتگ پد ءَ شپ ءِ وھد ءَ روسی پوج ءَ یوکرین یاگی دمگاں پیشگامی بندات کتگ ، جھانی رسانکدر دوئیں نیمگ ءَ بیرانی پدری کتگ-

یوکرینن صدر ولودومیر اولیکسیندرویچ زیلینسکی ءَ پورپ ءَ ھوار نیٹو مکن کتگ ءُ گوشتگ کہ روسی میڑ ءِ دارگ ءِ ھاتر ءَ یوکرین پوج ءِ کُمک ءَ بہ کن اَنت اگاں گُڑا روسی اے زوراکی سرجمیں یورپ ءَ ھم گوں وت پیچ اِیت تنی وھدے یورپی یونین نیمگ ءَ چہ روس سر ءَ پابندیاں چہ اَبید دگہ ھچ وڑیں پوجی چست ایر دیم ءَ نیتکگ-

اقوام متھدہ ، امریکہ ءَ ھوار دگہ یورپی ڈیھاں روس ءَ یوکرین ءَ زوت پوجی لشکر کشی ءِ دارگ ءَ گوشتگ ءُ دومی نیمگ ءَ روسی ھکومت یوکرین ءِ دمگاں ایمنی ءَ پوج پُترگ ءِ ٹاہ جتگ ءُ گوشتگ “کیو” بمبگواری ء ٹاہ وتگڑ اَنت-

بلوچستان ءِ دو جتائیں جاھاں دگ ءِ وئیلانی آسر ءَ چُکے ءَ ھوار دو مردم بیران ءُ ھپدہ ٹپی بوتگ اَنت-

سربوتگیں ھالانی رِد ءَ بسیمہ ءَ مساپر کوچ ءُ پک اپ گاڑی ءَ ڈک وارتگ ءُ چریشی ءِ آسر ءَ یک مردمے بیران ءُ سے ٹپی بوتگ اَنت-

بسیمہ وئیل ءَ بیران بوتگیں مردم ءِ پجّار نجیب اللہ ء فتح محمد نام ءَ چہ بوتگ وھدے کہ ٹپیانی تہ ءَ پیر محمد، علاالدین ، عبدل ھوار اَنت کہ آ گوں نگیگیں جاوراں شال ءَ برگ بوتگ اَنت-

ھمے وڑ دالبندین بائی پاس ءَ تُرند رؤکیں گاڑی ءِ چپ بوگ ءَ چہ چُکے بیران بوتگ ءُ یکیں کھول چاردہ مردم ٹپی بوتگ اَنت-

دالبندین ریسکیو واکداراں چُک ءِ لاش ءُ وئیل جاہ ٹپی بوتگیں مردم نادُراھجاہ ءَ برتگ اَنت اود ءَ دوا درمان کنگ ءَ پد شال ءَ برتگ اَنت-

گیش خضدار ءِ نندوک علی بخش باجوئی سندھ ءِ دمگ شھداد گوٹھ ءَ یک دگ وئیلے ءَ بیران بوتگ-

بسیمہ وئیل ٹپی ءُ بیران بوتگیں مردمانی کھول ءَ وئیل بگیری ءَ سی پیک دگ ءِ سر نندانک جتگ ءُ دگ رؤک ءُ آؤکی ءَ مھتل کنائینتگ انتزامیہ ءُ وئیل ءِ دیمپان بوتگیں مردمانی کھول ءِ میان نند ءُ نیاد سوبمندی ءَ پد دگ پچ کنگ بوتگ-

بلوچستان ءِ تیاب دپی شھر گوادر ءَ آر سی ڈی گوادر ءَ برجم دارگ بوتگیں زانشتی ادبی ءُ کتابانی میلہ بندات گوستگیں صوبائی وزیر عبدالغفور کلمتی ءَ پٹ چِتگ-

ھمے درگت ءَ سینیٹر کھدہ بابر ، صوبائی وزیرپلانینگ اینڈ ڈیولپمنٹ ظہور احمد بلیدی ، ڈپٹی کمشنر گوادر جمیل احمد بلوچ، وائس چانسلر پروفیسر عبدالرزاق صابر ءُ دگہ ساڑی بوتگ اَنت-

کتب میلہ بنداتی ءِ مراگش ءَ سلیم کرد، چیمبر آف کامرس اینڈ انڈسٹری کوئٹہ ءِ ایگزیکٹو باسک احد آغا اے این پی ءِ بُنجاھی کمیٹی ءِ ڈاکٹر عسیی خان چوگیزی ھوار بوتگ اَنت-

کتاب میلہ ءَ بلوچستان ءَ ھوار دگہ دمگاں چہ مزنیں کچے ءَ زالبول ءُ مردیناں بھر زرتگ-

اے کتاب میلہ 2022 ءَ جتائیں پبلیشنز وتی وتی کتابانی اسٹالز جتگ اَنت- کتاب میلہ زانشتی ءُ ادبی ، لسانی سیاسی ءُ چاگردی، ربیدگی ءُ زالبولانی زندمان ءَ ھوار جتائیں درگت ءَ گپ ءُ تران کنگ بوتگ-

ھالانی رِد ءَ کتاب میلہ سرجمیں ڈیھ ءَ چہ شائر ، ادیب، ازمکار ءُ کتابانی نبشتہ کاراں بھر زرتگ، وھدیکہ ازم بھا کنگ ءِ ھاتر ءَ سرجمیں بلوچستان ءَ جتائیں ازمکارانی شاھکاراں کتاب میلہ گوادر ءَ پیشدارگ بنت-

بنداتی مراگش ءَ چہ تران کنان ءَ گوشتگ کہ کتاب ءِ اھمیت چہ رُژن ودی کتگ – آئی ءَ گْوشتگ کہ آ راج کہ کتاب ءَ اھمیت دنت آ راج ھچبر ھلاس نہ بنت کتاباں گوں مھر کنگی اِنت-

آئی ءِ گْوشگ اِنت کہ کتاب انسانی زھن ورگ دنت چریشی ءَ چہ انسان وتی چاگرد ءِ سرپدی ھاتر ءَ کابلیت دنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ کیچ ءِ دمگ تجابان ءَ ریاستی ڈیتھ اسکواڈ ءِ اُرش ءَ بے سوب کنگ ءُ آھانی یک کارمندے ءِ کوش، بالگتر ءَ پوجی پانگس ءِ سر ءَ بوتگیں اُرش ءِ زمہ واری من اِتگ اَنت –

بی ایل ایف ءِ جارکش میجر گوھرام بلوچ ءَ وتی درشان ءِ تہ ءَ گوشتگ کہ چار شمبے ءِ روچ ءَ زورگیریں پوج ءِ دمگی ڈیتھ اسکواڈ ءِ کارمنداں کیچ ءِ دمگ تجابان کرکی ءَ زرباری
زنگ دپ ءِ ھند ءَ سرمچارانی سر ءَ اُرش کرتگ- سرمچاراں گوں جوانیں جنگی رپک ءُ ھنراں پاکستانی پوج ءِ کارمندانی اُرش بے سوب کرتگ- اے میان ءَ ڈیتھ اسکواڈ ءِ کارمند پلان ء مکسد مُرتگ ءُ آئی ءِ یک ھمراھے زدگ بوتگ-

جارکش ءَ گوشتگ چریشی ءَ پد پاکستانی پوج ایمبولینس ھمراھی ءَ وتی ڈیتھ اسکواڈ ءِ کمک ءَ سر بوتگ انت ءُ آھاں ٹپی ءُ مرتگیں کارمند گوں وت برتگ اَنت- چشیں مردم کہ گوں پاکستان ءَ ھمراہ داری ءَ کنگ ءَ اَنت مئے نشانگ اَنت-

میجر گھرام ءَ دیمتر ءَ وتی درشان ءِ تہ ءَ گوشتگ کہ مئے سرمچاراں پنچ شمبے ءَ کیچ ءِ دمگ بالگتر آسانک ءَ برجاھیں زورگریں پوج ءِ پانگس ءِ سر ءَ مزنیں سلاھاں گوں اُرش کرتگ چریشی ءَ یک پوجی کارمندے مرتگ ءُ یکے زدگ بوتگ –

جارکش ءَ گڈسر ءَ وتی درشان ءِ تہ ءَ گوشتگ کہ بلوچستان ءِ آجوئی ءَ تاں مئے اُرش زورگیریں پوج ءِ سر ءَ برجاہ مان انت –

بلوچستان ءِ دمگ کیچ ءِ بنجاھی شھر تربت ءَ پنچ شمبے روچ ءَ تربت سول سوسائیٹی رھشون گلزار دوست ءُ دگہ مردماں پریس کانفرنس کنان ءَ تربت تاں شال ءَ پیادگ روانک کشگ ءِ جار جتگ –

آھاں گوشتگ کہ بیگواھیں مردمانی یل کنائینگ، نشہ ءِ ھلاسی ءُ دگہ لوٹانی ھک ءَ روانک کشگ بوھگ ءَ انت –

آھاں گوشتگ کہ بیست ءُ ھپت فروری ءَ یکشمبے ءِ روچ ءَ تربت تاں شال رؤگے بندات ءَ کنیں –

رھشونانی گوشگ ات کہ انسرجنسی ءِ نام ءَ مئے زانشجاہ ءُ نادراھجاہ پوجی بنجل جوڈ کنگ بوتگ انت –

آھانی گوشگ ات کہ سند ءُ بلوچستان ءَ ھوار دگہ ھما جاھاں کہ بلوچ جاھمنند انت اودا نشہ عام کنگ بوھگ انت ءُ مھلوک ءِ زمین کبزہ کنگ بوھگ ءَ انت –

آھانی گوشگ ات کہ باند ءَ چہ دو روچ ءَ شھید پدا چار راھے سر ءَ سرپدی دئیگے بنجل ءِ جنگ بیت اتنت – وھدیکہ پدا یکشمبے ءِ روچ ءَ ھمدا چہ شال رؤگ بندات کنگ بیت اتنت –

آھاں درسیں تک پھناتاں سیادی داروکیں مردماں چہ لوٹ کتگ کہ پیدل روانک ءَ بھر بہ زور انت –

دی بلوچستان پتر ءَ سربوتگیں ھالانی رِد ءَ چمن ءَ سیمسر ءِ سر ءَ تالبان پوج پاکستانی میان ءَ سک باز تیرگواری بوتگ ھردو نیمگ ءَ مزنیں سلاہ کارمرز کنگ بوتگ ءُ سیمسراں رؤگ ءُ آھگے سر ءَ بندش جنگ بوتگ –

دمگی اھوالکار ءِ رِد ءَ مروچی پنچ شمبے روچ ءَ سیمسر ءِ سر ءَ نشتگیں ھردو ملکانی کارمندانی میان ءَ تیرگواری کنگ بوتگ بلے تنی وھدی ھردو نیمگ ءَ ھچ وڈیں جانی تاوان ءِ ھال نیست –

دومی نیمگ ءَ اوگانستان چاگردی ترامجاھاں شنگ بوتگیں تامر ءِ تہ ءَ گوشگ بوتگ تیرگواری ءَ پد اوگان تالبان ءِ پوج ءَ یک مزنیں سیمسر ءِ سر ءَ وتی پوج آؤرتگ بلے ھردو نیمگانی سرکار ءِ نیمگ ءَ اے درگت ءَ سرجمیں ھال شنگ کنگ نہ بوتگ –

زانگ بہ بیت پاکستان ءُ اوگان پوج ءِ سیمسر ءِ سرا مدامی اے بوتگ انت ھردو نیمگاں سیمسر ءِ بگیری دارگے الزام جنگ بوت اتنت –

وھدیکہ اوگان پوج ءِ نیمگ سیمسراں ٹٹ کنگے جیڑہ ھم ھست انت کہ اوگانستان ایشی ءِ منوک نہ انت کہ چریشی ءَ مدامی ھردو نیمگاں اررشانی درچ برجاہ انت –