TBP Balochi

مروچی شمبے ءِ روچ ءَ بلوچستان ءِ بنجاھی شھر شال ءَ یک دگہ بیگواھیں مردمے ءِ کھول ءَ پریس کانفرنس ءَ اتکگ ءُ اھوالکاراں گوں تران کنان ءَ وتی دوستیگیں مردمانی یل کنگے لوٹ کتگ –

بلوچستان دمگ مچ ءَ چہ سیادی داروکیں زالبول بی بی نور ءَ گوشتگ کہ من راشد علی ءُ ارشد علی ء محمد علی جاھمنند مچ ءِ ماتاں –

آئی ءَ گوشتگ کہ منی دو ورنائیں زھگ ریاستی کارمنداں زورانسری آوار جتگ ءُ بیگواہ کتگ انت – گوستگیں سال ءِ چاردہ ستمبر ءِ ادار ھپت ءِ وھد ءَ نیو اڈہ مچ ءَ چہ سی ٹی ڈی کارمنداں منی چمانی دیم ءَ منی چُک دزگیر کتگ ءُ گوں وت برتگ انت ءُ تنی وھدی بیگواہ انت – آئی گوشتگ کہ آ وھد ءل من ڈاکٹر نصیب اللہ ءِ گور ءَ شتگ بوتگ انت ءَ اے وئیل پیش کتگ –

بی بی نور ءَ گوشتگ کہ من یک جنوزامیں زالبول آں پہ واری ءُ ازابی کش اِتگ ءُ وتی چُک لاپ داتگ انت، گریبی ءِ سوب ءَ من وتی مستریں چُک ھشت تبک ءَ گیش وانینت نہ کرتگ –

آئی ءِ گوشگ ات کہ منی زھگ ءَ شش تبک ءَ پد وتی وانگ برجاہ داشت کرت نہ کرتگ ءُ بزگری کتگ ءُ لوگ چلائینتگ اشی ءَ پد آئی ءَ دکان ءَ وتی کار بندات کتگ وھدیکہ دومی زھگ ارشد علی کہ آئی ءِ اُمر پانزدہ سال انت ھشتمی کلاس ءِ نودربرے وانگ جاہ ءَ پد مدامی وتی برات گور ءَ شتگ ءُ دکان ءَ کار کتگ گوں –

آئی ءَ گوشتگ کہ منی زھگ سی ٹی ڈی ءَ آوار جتگ ءُ گوں وت برتگ انت – بی بی نور ءَ گوشتگ کہ مناں دل ءِ نادراھی گون انت ءُ منی پیری ءِ اسا منی زھگ انت کہ بید جرم ءَ شش ماہ انت کہ زنداناں بندیگ انت – من مچ ءَ بید مردین ءَ وتی سیادانی نزیک ءَ کرایہ ءِ لوگ ءَ نشتگاں –

آئی ءِ گوشگ ات کہ ھردو زھگانی زورانسری آوار جنی ءَ پد من در پہ دری زند گوازینگایاں من یک ءُ تھنائیں زالبول آں کجا اے ماسوماں شوھاز بہ کناں؟ آئی ءِ گوشگ ات کہ دو روچ ساری وتی کسانیں جنکویں زھگ ڈاکٹرے گور ءَ بُرتگ آئی ءَ پتری ءِ نادراھی انت نون من اے نادراھ ءَ کجا بہ براں؟ ھدایا بچارے منی ھردو زھگاں یل بہ کن ایت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ شش سد ءُ سَے روچ سرجم بوتگ- بی ایس او ھنکینی سرکماش شکور بلوچ گوں ھمراھاں، این ڈی پی ءِ بنجاھی رھشون رشید بلوچ، عبدالغنی بلوچ ءُ انسانی ھکانی ایکٹوسٹ حمیدہ نور ءَ بنجل ءَ اتکگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وی بی ایم پی ءِ رھشون ماما قدیر بلوچ ءَ گوشتگ کہ بلوچ راجی سوال گوستانکی گیش گیواری جیڑھے ءُ بیگواھیں بلوچ پرزندانی جیڈہ ھم گوں ھمے سوال ءَ ھمگرنچ انت – جبری الحاق ءُ کبزہ کنگ ءَ پد اے ریاست ءَ بلوچ راج ءِ زند ازاب تہ ءَ رسینتگ پرچاکہ بلوچ راج ءَ اے زورانسری کبزہ ءِ بگیری ءَ مدامی جھد کرتگ ءُ بلوچ پرزندانی زورانسری آوار جنی ءِ درچ چہ ھما روچ ءَ بندات بوتگ ءُ پدا سال نوزدہ سد ءُ ھپتاد ءُ ھپت ءَ پاکستانی ریاست ءَ پوجی لشکر کشی کُرتگ ءُ ھزارانی کچ ءَ بلوچ آوار جتگ ءُ بیگواہ کتگ انت- ھستیں وھدے جاورھال سال دوھزار ءَ چہ بندات بوتگ ءُ ھنگت برجاہ انت –

آئی گوشتگ کہ بلوچستان ءِ چپ ءُ چاگرداں بمبگواری ءُ لشکر کشیاں چہ تنی وھدی ھزارانی کچ ءَ بلوچ شھید کنگ بوتگ انت ءُ کساس دو لک ءُ نیم مردم بلوچستان ءِ جتا جتائیں ھند ءُ دمگاں ھمے زوراکیانی سوب ءَ لاچار بوتگ انت ءُ وتی جاہ ءُ دوار ءِ یل داتگ انت کہ ھنو سند ءُ دگہ دمگاں درپہ دری زند گوازینگ انت –

ماما قدیر بلوچ ءَ گوشتگ کہ پاکستانی ریاست ءَ آئی ایجنسیانی گوم ءَ بلوچ راج ءِ کینگ ءِ اشی ءَ چہ مستریں سبوت ھچ جاہ دست نہ کپیت پاکستان ءِ ھاکم ءُ پاکستان ءِ ریاستی ادارہ ءُ ایجنسی ھپتاد ءُ دوسالاں بلوچ راج ءِ زانت توھین ءَ کنگ ءَ انت ءُ بلوچ راج ءِ چکچینی درچ یکشل ءَ برجاہ انت –

نبشتانک تئی اکس ءِ چارگ ءَ پد

نبشتہ کار : جلال اهمد

دی بلوچستان پوسٹ

وهدیکہ تو منی هلک ءَ چہ گِسر بُوت ءُ شُتے وتی میتگ ءَ گُڑا منی زندگی ءِ گْوازینگ سک مُشکل بیت ، چی ءَ ؟ کہ من تهنا بُوت آں پیسرا من ءُ تو دائم هُور اَت اِیں ءُ من مُدام گمی ءُ پریشان بُوت آں تو گْوش ئے زان آں من وتی سرجمیں اُمیتاں چہ نہ اُمیت بُوت آں ، بلے یک گپے دائم منی دل ءَ تہ ءَ اَت کہ تو گْوشتگ اَت کہ من اَلّم واتر پہ تو کایاں ـ

گُڑا من وتی دل ءِ ساڑینگ ءِ هاتر ءَ مُدام همے گپ جیڑ اتگ اَت کہ آئی ءَ گوں من سوگند کُتگ اَلّم روچے نہ روچے آ کیت پہ من ءَ ، وهد گْوزان بُوت آ نَیَتک من باز جُهد کُت کہ بَرداشت بِہ کن آں ، بلکیں ماهے ءَ پد کیت ، بلکیں سالے پد کیت ، بلے آئی ءَ را سالے هم گْوست آ واتر نَہ بُوت ءُ نَیَتک ، گُڑا من وتی بے وسی ءَ مُدام گِندگ ءَ اَت آں ءُ من گِیش ءَ چہ گِیش کُوشِست کُت کہ بِہ گندے آ ئ۰ک کرنے ءَ رند واتر کنت ءُ کیت ، من دائم وتی دل ءِ ساڑینگ ءُ جْوانیں موسماں دل ءِ تسّلا دِیگ ءِ باز جُهد کُت ءُ بلے اے سرجمیں رِپکاں ابید کدی کدی کہ دِیگر بُوتگ اَت ءُ کَوش ءِ کہ سَارت شِیکتگ اَت گُڑا من ءَ واتر آئی ءِ یات ءُ زهیراں پیڑاتگ اَت ءُ برے برے شپ ءِ لُنجیں سْیاه ءُ تهاری ءَ کہ من واب ءَ بُست کُتگ اَت گُڑا من ءَ انچو سَما بُوتگ اَت کہ من چہ وت ءَ شِزاراں ءُ کدی چُوش هم سما بُوتگ اَت کہ من اندر ءَ چہ تهنا آیان ءُ پْروشتگ آں ـ

یک سالے ءِ سرجم بُوت کہ آ نَیَتک ءُ پد ءَ دُو بَر منی رنج ءُ گم گیشتِر بُوان بُوت اَنت، بلے من وت ءَ را سک باز مُهکم کنگ ءِ جُهد کُت ، من وت ءَ را انچیں هاٹیگ مان کُت کہ منی رنج ءُ گم چہ من بِہ سِد اَنت گار بِہ بنت ـ

گُڑا من وتی دل ڈڈ کُت ءُ وت ءَ را مُدام شات کُت ءُ انچیں سنگتاں گوں وت ءَ را مُشکول کُت کہ آیان مُدام مسکرائی کُتگ اَت ءُ مارا کندگ اتکگ اَت ، هر وهد من روچ پہ روچ شرتر بُوان بُوت اَنت ءُ دانکہ چار سال سرجم بُوت کہ آ واتر نَیَتک ـ

همے پئیم ءَ من یک شپے واب اَت آں ءُ گْوش ئے زان آں اناگت ءَ یک توارے بُوت گُڑا من هجّکہ بُوت آں چم پَچ کُت اَنت داں تهار مائی اِنت ءُ سرجمیں میتگ ءَ هاموشی اِنت گِس ءِ تَہ ءَ تهنا من ءَ ، همے دمان ءَ من یَک بلاهیں جیڑگی ءَ کپتاں ءُ دان سِے ساهت ءَ من ءَ واب نَہ یَتک ءُ جیڑان جیڑان ءَ من پریشان بُوان بُوت آں ءُ من ءَ آئی ءِ یات ءُ زهیراں پد ءَ پیسری ئیں ڈول ءَ پیڑات ، گُڑا سُهب کہ بُوت من وانگجاه ءَ شُت آں ءُ آئی ءِ دَزگْوهار ءِ اَتک منی گْور ءَ ءُ گْوشت ئِے کہ لهتے روچ اِنت کہ تو سک باز پریشان گِندگ پیداکے من ترا انچیں مردمے ءِ اکس ءَ پِیشداراں کہ تو شات بہ ئے ، من گْوشت بس شر اِنت من ءَ پیش ءِ بِہ دارے آئی ءِ دَزگْوهار هم سرپد اَت کہ پلانی اِیشی ءَ را باز دوست بیت ـ

انچو کہ آئی ءِ دَزگْوهار ءَ وتی گْوانگو در کُت ءُ اکس من ءَ پیش داشت ساهتے ءَ پد منی چمّانی اَرس هم در اَتک اَنت ءُ من دیست دان نوں آ پیسری ءَ چہ رُستگ ءُ مزن اِنت ءُ نوں آ بے کساس ڈولدار اِنت، گُڑا همے روچ ءَ چہ رند گْوش ئے زاناں منی گم ءُ رنج سد در سد گِیشتر بُوت اَنت ءُ منی دْراهیں ءُ وش بُوتگ اِیں رِیش ءَ پد ءَ جاه جت ءُ هازگ بُوت ءُ من تہ ءَ چہ سرجم ءَ پْروشت آں ـ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پتر ءَ سربوتگیں ھالانی رِد ءَ بلوچستان ءِ دمگ نوشکی ءِ جھمنند ہارون بادینی ء شاھنواز خان بادینی ءُ سلال بادینی ء حاجی عبدالباقی بادینی چہ لاھور ءَ آوار جنگ بوتگ انت –

کھول ءِ رِد ءَ ھردو ورناہ پہ تبلیغ ءَ در اتکگ بوتگ انت آھانی جوڑ پنجاپ ءِ شھر لاھور ءَ بوتگ –

کھول ءِ رِد ءَ ھردو پاکستانی پوج ءُ چیریں ادارھانی کارمنداں مسیت ءِ تہ ءَ زورانسری کَشان کُتگ گوں وت برتگ انت –

ھمود ءَ ساڑی ئیں مردمانی رِد ءَ تبلیغی جماعت ءِ امیر ءَ دارگ ءِ کوشست کُتگ انت ءُ کُران ءِ واستہ ھم داتگ انت کہ اشاں آوار مہ جن ات-

آھانی کھول ءَ پاکستان ءِ سرکار، پاکستان ءِ سپریم کورٹ ءَ چہ لوٹ کتگ کہ اے وڑیں املانی سر ءَ ترندیں گامگیج بہ زور انت اشی ءَ ھوار ھوار ملاھاں چہ ھم لوٹ کتگ کہ اللہ ءِ راہ ءَ در اتکگیں دین ءِ تبلیغ ءَ کن انت اگاں آ مسیت ءِ تہ ءَ آوار جنگ ءُ بیگواہ کنگ بنت گڑا اے ملک کجام دین ءِ ھاتر ءَ جوڑ بوتگ – پدردی گپ ءِ کہ اے ملک ءَ اللہ ءِ راہ ءَ در اتکیں مردم پھریز نہ انت –

آھاں چہ سرکار ءُ ریاستی ادارھاں چہ لوٹ کتگ کہ ہارون بادینی ءُ سلال بادینی یل کنگ بہ بنت –

منی لانڈرنگ ءُ ناشرکارانی مالی کمک ءِ داروکیں میان اُستمانی ادارہ فائنینشل ایکشن ٹاسک فورس (ایف اے ٹی ایف) ءَ متحدہ عرب امارات (یو اے ای) گرے لسٹ ءَ ھوار کتگ ءُ ھمے وڑ پاکستان داں انگت ءَ گرے لسٹ ءَ برجم دارگیں سوڑگ بیتگ-

درملکی خبر رساں ادارہ ءِ رپورٹ ءِ رد ءَ ایف اے ٹی ایف ءَ متحدہ عرب امارات ءَ را وتی نزام ءُ بنکی مٹی ءِ ارگ ءِ موہ دیگ بیتگ –

ایف اے ٹی ایف ءَ پیرس ءَ برجم داشتگیں نیاد ءَ امارات ءِ کسمت ءِ پیسلہ کرتگ-

آدینگ ءِ شپ ءَ داں دیر ءَ ایف اے ٹی ایف ءِ نیمگ ءَ شنگ بیتگیں درشان ءَ گوشگ بیتگ پاکستان ءِ نام یکشل ءَ گرے لسٹ ءَ ھوار بیت اِنت – ایف اے ٹی ایف ءِ رد ءَ پاکستان سال دوھزار ءُ ھژدہ ءَ نیشنل ایکشن پلان ءِ بیست ءُ ھپت ءُ بیست ءُ شش نکات ءِ سر ءَ ٹپاس کنان ءُ منّگ بیتگ-

ایف اے ٹی ایف ءِ نیاد یک مارچ ءَ داں چار مارچ ءَ برجاہ بیتگ –

ایف اے ٹی ایف ءِ گوشگ اَت پاکستان ءَ جون دوھزار ءُ بیست ءُ یک ءَ منی لانڈرنگ ءُ ناشرکاراں مالی کمک ءِ دارگ ءِ پژدر ءَ کنگ بیتگ داں انگت ءَ اشی ءَ گیش گھتری ارگ ءِ درکار اِنت-

درشان ءِ رد ءَ پاکستان دوھزار ءُ بیست ءُ یک ءَ ایکشن پلان ءِ پشکپتگیں یکیں ٹک ءَ کار کنگ اژدری اِنت پاکستان جون دوھزار ءُ ھژدہ ءَ گرے لسٹ ءَ ھوار گیجگ بیتگ-

زانگ بہ بیت گرے لسٹ ءَ ھواریں ڈیھ ایف اے ٹی ایف ءِ گیشیں چار ءُ ٹپاسی، بنھشت ءَ تاوان دیگ، میان اُستمانی لڑاں نیزور کنگ، سرجمیں دنیا ءَ زرکاری ءِ رھبندانی باپاری ءِ جنجالانی دیمپانی کنگ کپ اِت اِنت-

شال ءِ ھنکین نواں کلی ءَ آدینگ ءِ شپ ءَ دو لوگانی تہ ءَ تیر گواری ءِ سوب ءَ سَے جنین آدماں ھوار پنچ مردم بیران وھدیکہ دو زھگ ٹپی بیتگ اَنت۔

ریسکیو ءِ اھوالانی رد ءَ تیر گواری ءِ وئیل نواں کلی ءَ پشتونستان چوک ءِ نزیک ءَ ٹیچر کالونی ءَ دیما اتکگ۔

ھال ءِ رسگ ءَ پد پولیس ءُ ریسکیو ءِ ٹیم وئیل جاہ ءَ سربیتگ اَنت کہ اود ءَ یک لوگے ءَ چہ سَے لاش ءُ دو ٹپی ءُ دومی لوگءَ چہ دو لاش سول ھسپتال ءَ برگ بیتگ اَنت۔

ھسپتال ءِ اھوالانی رد ءَ بیران بیتگیں مردمانی تہ ءَ محمد رفیق آئی لوگ بانک ءُ آئی 18 سالی جِنِک ھوار اِنت وھدیکہ شش سالیگیں جِنِک ءُ پانزدہ سالی ئیں بَچ ٹپی بیتگ اَنت دویں زھگ بیران بیتگینانی اَنت۔

ریسکیو اھوالانی رد ءَ کمو دیر دگہ لوگے ءَ چہ دگہ دو لاش دزکپتگ اَنت کہ یک مردین ءُ جنین یے بیتگ اَنت کہ ھسپتال ءَ سر کنگ بیتگ اَنت کہ اِشانی پجار داں انگت نہ بیتگ بلے گُشگ بئیگ ءَ اِنت کہ اے دویں وئیلانی سوب یک اِنت پولیس ءِ رد ءَ بنداتی پَٹ ءُ پول ءَ چہ زانگ بیت کہ وئیل لوگی جیڑھانی سر ءَ دیما اتکگ۔

تیر گواری کنوک گمانی اِنت کہ بیران بیتگیں مردینے زامات اِنت۔ کوشکار ءَ وسیگ ناکو ءُ وتی دشتار کُشتگ ءُ پد ءَ دومی لوگ ءَ شُتگ ءُ دگہ دو مردم ھم کُشتگ اَنت ءُ وت تتکگ داں انگت وئیل ءِ درگت ءَ گیشتر پَٹ پول برجاہ اِنت۔

نبشتانک: بلوچی نبشتہ ءِ ھیل

نبشتہ کار: پاتما بلوچ

دی بلوچستان پوسٹ

بلوچی مئے وتی راجی زبان اِنت ءُ ما بلوچ ابرمی وتی ماتی ءُ راجی زبان ءَ گپ کُت کن ایں، بلوچی گپتاری ءَ ھم جْوان سرپد بَہ ایں بلے بازیں بلوچ نودربرے وتی جِند ءِ راجی زُبان ءِ وانگ ءُ نبیسّگ ءَ ھیل نہ اِنت اگاں ما وتی راجی زُبان ءِ وانگ ءَ ھیل نہ ایں گُڑا باید انت ما اشتاپ مہ کن ایں بلکیں کم کم ءَ بلوچی نبشتانک ءُ آزمانکاں وانان ءَ وتی راجی زُبان ءِ بلوچی وانگ ءَ ھیل بہ کن ایں کہ بے بلوچی وانگ ءُ زانگ ءَ ما وت ءَ راجدوست گْوشت نہ کن ایں چوناھا ماں روایرشُتی ءُ رودرآتکی ایردستیں بلوچستان ءِ وانگجاہ، کالج ءُ یونیورسٹیاں بلوچ نودربر ھِندی ءُ پارسی ءَ ماں اَربی سْیاھگ ءَ وانگ ءَ اَنت ءُ بلوچی زُبان ءِ نبشتہ رھبند ھم ماں اَربی سْیاھگ ءَ اِنت پمیشکا باید انت ھچ بلوچ ءَ بلوچی وانگ ءَ وَ ھچ وڑیں تکانسری یے مہ بیت بزاں ما وتی راجی زُبان ونت ھم کن ایں۔

البت پد ءَ ھم لھتیں نودربر ھست اَنت کہ آ بلوچی وانگ ءَ مُشکل ءِ آماچ بنت گُڑا ما آیاں گْوش ایں کہ بلوچی وانگ ءَ ھچبر اشتاپ مہ کن اِت ءُ ناں کہ دلپْروش بہ بَہ اِت کہ من کسانی ءَ بلوچی نہ ونتگ پمیشکا انی من دربُرت نہ کن آں، یا منی نبشتہ سھی نہ اِنت! بلکیں شُما ھمے سرپد بوگ ءِ جُھد بہ کن اِت کہ ما گلامیں راج ءِ ھچ وانِندگ ءَ بلوچی چہ وانگجاھاں ھیل نہ گپتگ ءُ ناں کہ اے گلامی ءِ تھاریں ساھگاں بلوچی بلوچ راج ءَ ما وانگجاھاں وانینگ بیت انت۔ گِند ئے ما دْراہ بلوچی ءَ وتی دزھُورکی ءَ وانان ءَ دربرگ ءَ ایں پمیشکا ھر کس سرپد بوگ لوٹ ایت کہ بلوچی وانگ ءُ نبشتہ ئِے دربرگ ءَ مارا چے کنگ لوٹ ایت وھدے کہ شُما اے چیزاں سرپد بَہ اِت ءُ آیانی سر ءَ کار ءَ بُنگیج بہ کن اِت گُڑا شُما زیت وتی راجی زبان ءِ نبشتہ چَہ وتی ھُب، واھگ ءُ جُھداں بَلد ءُ زبر بہ اِت۔ بزاں سد در سد بے اُستادی ءَ-

تھنا مارا وت ءَ راجی زُبان ءِ سرمچار منّ ایں، اول ما وت ءَ راجی زُبان ءِ مُھمکیں جُھدکار بہ مار ایں کہ من ءَ ھرچ ھال ءَ بلوچی وانگ ءُ دربرگی اِنت ستر منی جُھد ءِ منزل گران بہ بیت، من بلوچی نبشتہ دربر آن ءُ بلوچی نبشتہ کارے جوڑ بہ آں پد ءَ وتی راج ءُ سرڈگار ءِ دردانی کسہ نبشتہ کنان ءُ راج ءِ دیم ءَ کار آں۔ وھدے کہ راج ءِ چاگِرد ءَ اے وڑیں مارشت ودی بنت گُڑا ما ھر یک وتی راجی زُبان ءِ نبشتہ ءَ وت زبر بَہ ایں۔ بلے اے درگت ءَ مارا رِد ءِ سر ءَ وتی جھد برجاہ دارگی انت۔ چہ دْرستاں پیش مارا وتی راجی زبان ءِ نبشتہ بُنکی آسراتی بلوچی آبینکدار (کیبورڈ) وتی گوانکو ءَ ایرگیجگی انت انچوشکہ اَربی، روسی، جاپانی، سندھی، بنگالی، پارسی ءُ دگہ ھر راجے ماں گْوانکواں وتی زبان ءِ آبینکداراں کارمرز کن اَنت۔ دومی مارا سیدگنج بزانت بلد(ڈکشنری) ھم ایرگیج کن لوٹ ایت کہ نبشتانک ءُ آزمانک وڑیں چیزے وانگ ءَ گِرانیں گالانی بزانتاں بہ زان ایں۔

دومی ایش انت کہ ما چہ بندات ءَ بلوچی دَروَنتاں ھورت بہ وان ایں ءُ زان ایں کہ بلوچی نبشتہ رھبند ءِ بُندری رِد ءُ بند چے اَنت؟ بلوچی نبشتہ رھبند چے یے؟ نبشتہ ءِ بُندری لوٹ چے اَنت انچوشکہ ھر زُبانے ءَ کارگال، کُمکّار گال ءُ ستاگالانی بارہ ءَ سرپدی زانگ لوٹ ایت کہ اے کجام جاگھاں کارمرز بنت۔ مارا سرپد بوگ لوٹ ایت کہ دُنیا ءِ تیوگیں زُبانانی نبشتانک ءُ آزمانکانی رِد یک اَنت پمیشکا مارا نبشتاری ءِ ٹِک ءُ نشان(، ” ! ; : – ) ءُ بھرگ (Paragraph ) ءِ وڑیں چیز ھم زانگی اَنت کہ اے کُجام جاہ ءُ چون سنج دیگ بنت۔

بلے اول مارا درونت وانگی اَنت ءُ وھدے کہ ما بلوچی درونت یا کورس سرجم ءَ ونتگ اَنت گُڑا باید انت ما بلوچی ءِ راجدوستی نبشتانک ءُ آزمانکاں یک انچیں درشاندابے ءَ وان ایں کہ من وت بلوچی ءِ اُستادے آں۔ بزاں توری بلوچی ءِ ھر وڑیں نبشتھے بہ بیت، توری نبشتانک ءُ آزمانکے بہ بیت، توری سرگْوست ءُ تب ھروھدے ءِ بارہ ءَ نبشتھے بہ بیت، گوں انچیں دابے ءَ وانینگ بہ بیت کہ تو وت یک اُستادے ئے ءُ تو پہ ایشی ءِ راست کنگ ءَ چمشانکے دیگ ءَ ئے گُڑا تو زیت راجی زبان ءَ دربر ئے پمیشکا یک رندے پد ءَ گْوش آں کہ ما اشتاپ مہ کن ایں بلکیں چہ درستاں پیش بلوچی درونتاں بہ وان ایں۔ ما وَ نہ گْوش ایں کہ شُما یکپارگی بلوچی نبشتہ بندات بہ کن اِت یا رَد نبیسّ اِت بلکیں ما گْوش ایں کہ بندات ءَ ھر روچ بیست دمان پہ بلوچی درونتانی وانگ ءَ بہ دے اِت پد ءَ کم کم ءَ بلوچی نبشتانک ءُ آزمانکاں نبشتہ بہ کن اِت، اشتاپ مہ بہ اِت وتی نبشتگیں گالرِداں دو رند وت چمشانک دیان ءَ وتی ردیاں وت راست بہ کن اِت۔

ما دلگوش بِہ بَہ ایں کہ مارا مرچی پہ بلوچی وانگ ءُ دربرگ ءَ بازیں بلوچی تندجاہ، بلوچی وٹس ایپی وانگجاہ ءُ پیسبُکی تاکدیم ءُ گل ھست انت کہ چہ اود ءَ مارا بے کساس بلوچی دربرگی درونت ءُ نکان ھم رس اَنت گُڑا باید انت ما چہ دامگی آسراتیاں وتی راجی زُبان ءِ نبشتہ دربر ایں کہ زُبان مئے راجی پجّار ءُ راجدوستی ءِ بُنھِشت اِنت۔

وھدیکہ ما بلوچی نبشتہ ءُ رھبند ءَ بہ زان ایں گُڑا باید انت ما وت بلوچی نبیسّگ ءَ کم کم ءَ ھیل بہ گر ایں۔ گوں راج ءَ اے ھم دزبندی اِنت کہ شُما نبیسّگ ءِ وھد ءَ راجی زبان ءِ کْوھن ءُ زگریں گالاں ھچبر ڈالچار مہ کن اِت بلکیں مُدام گْوں زگریں بلوچی گالاں نبشتہ بہ کن اِت۔ مُدام ھمے کوشست بہ کن اِت کہ نبیسّگ ءِ وھد ءَ ھِندی ءُ پارسی ءِ گال کارمرز مہ بنت بلکیں وتی راجی زبان ءِ زگریں گال کارمرز بنت گُڑا بلوچی زبان دیمروئی کنت وھد گْوزان بیت ءُ اگاں راج ھمے رنگ ءَ راجی زبان ءِ نبشتہ دربارت گُڑا ما دلجمی ءَ گْوش ایں کہ راجی زبان دیمروی کنت۔ بلوچی مئے وتی شھدیں زبان اِنت ءُ بلوچ راجی پجّار انت پمیشکا راجی زبان ءِ ھاٹیگ بلوچ راج ءِ ھاٹیگ انت۔

شالا سوبین بات اِت ءُ اے پنت ءَ دیم ءَ ھم روان بہ کن اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔