ھُزدار ءُ مشکے ءَ دو بیگواھیں مردمانی لاش دور دیگ بوتگ اَنت، ڈیرہ بگٹی ، نوشکی ءُ کیچ ءَ سے مردم زورانسری بیگواہ کنگ بیتگ اَنت

بلوچستان ءِ دمگ آواران ءِ تھسیل مشکے ءَ پاکستانی پوج ءِ دست ءَ آوار جنگ بیتگیں مردمے کُشتگ ءُ لاش دور داتگ-

اِھوالکار رِد ءَ کُشگ بیتگیں مردم ءِ پجّار قادر بخش ء ھرزی نام ءَ چہ بیتگ کہ مشکے ءِ دمگ کھنڈری ءِ جھمنند بیتگ- آ گوستگیں شپ ءَ کساس ساھت دو ءَ پاکستانی پوج ءُ سرکاری پلامرزی ٹولی ءِ کارندھاں آئی ءِ لوگ ءَ چہ زورانسری آوار جتگ، چریشی ءَ پد مروچی آئی ءِ لاش دزکپتگ-

دمگی اِھوالکار گْوشگ اِنت کہ قادربخش نادُراہ بیتگ – پوج ءَ آ آوار جنگ ءَ پد بازار نیمگ ءَ برتگ کمو دیر ءَ پد کُشتگ-

ھمے وڑ ھُزدار ءِ دمگ چہ زیدی ءَ زورانسری بیگواھیں ورنایے لاش دزکپتگ-

گیشیں ھالانی رِد ءَ، خالد ء صالح محمد زھری بیست سے مارچ دوھزار بیست پنچ ءِ شپ یازدہ ءَ پاکستانی پوج ءِ کارندھاں آئی ءِ برجاھیں لوگ چہ زیدی ءَ آوار جتگ اَت – گوستگیں سے ماہ ءَ چہ آئی ءِ درگت ءَ ھچ وڑیں ھال دز نہ کپتگ – بلے گوستگیں روچ ءَ خالد زھری ءِ لاش چہ کھوڑی زیدی ءَ دزکپتگ- اِھوالکار رِد ءَ آ بندیگجاہ ءَ کُشگ ءَ پد لاش ویرانگ ءَ دور دیگ بیتگ-

ھمے وڑ بلوچستان ءِ دمگ ڈیرہ بگٹی ءِ تھسیل سوئی ءُ کیچ ءِ دمگ گومازی ءَ دو جتاجتائیں وئیلاں دو مردم بیگواہ کنگ بیتگ اَنت-

گیشیں ھالانی رِد ءَ بلوچستان ءِ دمگ ڈیرہ بگٹی ءِ تھسیل چہ سوئی ءَ شاہ میر ء شاہ بیگ بگٹی پاکستانی لشکر ءُ چیریں ادارھانی کارندھاں زورانسری بیگواہ کتگ-

اِھوالکار رِد ءَ شاہ میر شال ءَ چہ سوئی ءَ وتی مردمے ءِ پُرساں اتکگ بیتگ، اود ءَ لشکر ءَ آوار جتگ ءُ بیگواہ کتگ کہ انگت بیگواہ ءَ اِنت-

ھمے گوشگ بیگ ءَ اِنت کہ شاہ میر ءَ شال ءَ کار ءُ بار ھست آئی ءِ بیگواھی ءَ پد ایف سی ءُ آئی ایس آئی نیمگ ءَ چہ مزنیں کلداری لوٹ کنگ بیگ ءَ اِنت-

زانگ بہ بیت چیزے روچ تہ ءَ چہ سوئی ءَ کم چہ کم پنچ مردم زورانسری آوار جنی ءِ نشانگ کنگ بیتگ اَنت-

یک مردمے بیست لک کلدار دیگ ءَ پد یل کنگ بیتگ – دو دگہ مردم یل کنائینگ ءِ ھاتر ءَ یک کروڑے کلدار لوٹ کنگ بیگ ءَ اِنت کہ تنی وھدے چیریں ادارھانی دست ءَ اَنت-

انچش سی جون مگرب وھد ءَ نوشکی ءِ دمگ چہ مل محمد خان ءَ چہ سیادی داروکیں پُٹبالر عزیز احمد پنّام ءِ میر اے ء غلام فاروق پاکستانی پوج ءَ ناکہ بندی ءِ وھد ءَ آوار جتگ ءُ ناشناسیں جاھے ءَ برتگ – کھول ءَ آئی ءِ پہ سلامتی یل کنائینگ لوٹ کتگ-

دومی نیمگ ءَ بلوچستان ءِ دمگ کیچ ءِ تھسیل تمپ ءِ دمگ گومازی ءَ ھم یک ورنایے ءِ آوار جنی ءِ ھال اِنت-

دمگی اِھوالکار رِد ءَ محمد رحیم ء حیدر ناشناسیں مردماں مگرب وھد ءَ آوار جتگ کہ چریشی ءَ پد آ بیگواہ ءَ اِنت-