بلوچستان ءَ رسانکدر ءِ آجوئی ءَ چمشانکے۔جیھند بلوچ

بلوچستان ءَ رسانکدر ءِ آجوئی ءَ چمشانکے

نبشتہ کار: جیھند بلوچ

دی بلوچستان پوسٹ

بلوچستان یک ھساس ءُ تاریکی دمگے کہ چہ زمینی مڈیاں سرریچ انت، اے وھد ءَ سرجم ءَ جار نہ پررینتگیں پوجی ءِ کبزہ ءِ چیر ءَ اِنت۔ پاکستان ءِ بنجاھی سرکار ءُ آئی ءِ زوراکیں لشکر ءَ ناں ایوک ءَ آئی ءِ جگراپیائی ءُ سیاسی وت واجھی ءِ سر ءَ بندش جتگ بلکیں گپ ءُ ھبر کنگ ءِ آجوئی ءِ سر ءَ ھم بے کساس بندش جتگ۔ سر زاھر ءَ جمھوری کانود ءِ پُشت ءَ کپتگیں اے پوجی ھاکمیت ءَ بلوچستان ءِ ھر ادارہ ءِ سر ءَ وتی واک گیش کتگ۔

پوجی اسٹیبلشمنٹ ءُ آئی ءِ چیر دستیں( اندیمین ادارہ) انٹیلی جنس ایجنسی نہ ایوک ءَ ھر پڑ ءَ ھست اِنت، ایشانی تہ ءَ سوبائی ھکومت، بیوروکریسی، ادلیہ ءُ رسانکدر ھم ھوار اِنت بلکیں آیانی سر ءَ املی کنٹرول ھم ھست اِنت۔ گچینکاری اسٹیبلشمنٹ ءِ وپاداراں مھلوکانی سر ءَ ایرماد کنگ ءِ مول ءُ مراد ءَ بس (شو آف) پیش دارگی جوڑ بوتگ اَنت۔ زور، ترس، لب ءُ لالچ ءُ رسانکدر ءِ دستاں کنگ ءِ پندل پہ اکتلاپ داروکیں تواراں بے توار کنگ ءَ کارمرز کنگ بنت۔

ریاستی بیانیہ ءُ رسانکدر ءِ کرد۔

بلوچستان ءَ روایتی ءُ نوکیں رسانکدر ءِ کرد ءِ سر ءَ بژن ءِ گپ ایش اِنت کہ آ ریاستی بیانیہ ءِ دیمروی ءَ گوں بندوک بوتگ۔ الیکٹرانک ءُ پرنٹ میڈیا ءِ گیشتریں بھر سرکاری اشتھارانی سوب ءَ بلوچستان ءِ ھستیں راست ءُ ھکیکتاں چہ چماں شانک دیگ ءُ دیم ءَ آرگ ءِ بجا ءَ تھنا پروپیگنڈا مشین جوڑ بوتگ اَنت۔ رسانکدر ءِ آجوئی ءِ داوا ھست اَنت بلے راستی ءَ اھوالکاری ءِ تھنا کار ھمیش اِنت کہ آ جنگی آپریشن، بلوچ سیاسی گلانی سر ءَ ریاستی بھتام ءُ سرکاری پالیسیانی سر ءَ بے تنکید ءَ لس مھلوک ءِ دیم ءَ پیش بہ کنت۔

پیسر ءَ بلوچ نودربر گل “بی ایس او آزات” ءَ اے رنگیں میڈیا ھاؤسانی ھلاپ ءَ میڈیا بلیک آؤٹ کمپین کتگ اَت کہ ایشی ءِ آسر ءَ چیزے وھد ءَ آیانی شنگ ءُ تالان تانسر ءَ بند بوتگ اَت۔ بلے ریاستی زور ءُ لب ءَ ملامانی سوب ءَ اے مزاھمت داں دیر ءَ نہ جل اِت۔

پرنٹ میڈیا ءِ جاور

بلوچستان ءَ چاپ بوؤکیں لھتیں دمگی روتاک چوش کہ “روزنامہ آزادی کوئٹہ” ءُ “روزنامہ انتکاب ھب” ءَ پیش ءُ گیشاں سیاسی جیڑھانی سر ءَ ھال ءُ اھوال یاکہ گلانی بیان داتگ اَت بلے گوستگیں یک سالے ءَ آیانی آجوئی چہ دست ءَ گرگ بوتگ۔ بلوچستان سرکار ءِ جارکش شاھد رند ءِ نگرانی ءَ اے روتاک اشتھار ءِ بندش ءِ وسیلہ ءَ مجبور کنگ بوتگ اَنت کہ ناں ایوک ءَ بلوچ راجدوستیں گلانی چشکہ بی این پی (مینگل) بی وائی سی، ءُ ڈاکٹر ماہ رنگ ءِ ھالاں چہ رکّینگ بہ بیت بلکیں آ سرجم ءَ بلیک آؤٹ کنگ بہ بنت۔

کوئٹہ ءِ مزنیں اھوالکارے ءَ گوش مالومداری داتگ اَت کہ ڈیلی انتکاب ءُ ڈیلی آزادی ءَ گوستگیں سال ءَ 100 ھزار کلدار ءِ بزاں یک کروڈ ءَ کم و گیش ءِ سرکاری اشتھار دیگ بوتگ اَنت۔ آئی ءِ گشگ ءِ ھساب ءَ 2024 ءَ 8.5 ملین زرّ ادارہ ءِ پالیسی ءِ کنٹرول کنگ ءِ ھاتر ءَ ”ٹولز“ ءِ بستار ءَ کارمرز کنگ بوتگ اَنت۔ اے دوئیں روتاک نوں بی وائی سی، ڈاکٹر ماہ رنگ ءُ بی این پی مینگل ءُ سردار اختر مینگل ءِ بابت ءَ ھم نبشتہ نہ کن اَنت ءُ آیانی بیاناں ھم چاپ نہ کن اَنت، اے گپ ءِ پدرائی (تصدیق) دوئیں روتاکاں گوں ھمگرنچیں دو جتا جتائیں دمگی اھوالکاراں کتگ۔

سوشل میڈیا ءُ ویب چینلانی کرد

روایتی رسانکدر ریاست ءِ دستاں و کارمرز بوتگ ءُ بوگ ءَ اِنت بلے سوشل میڈیا ءُ ویب چینل ءُ اھوالکاری پیج یک نوکیں رنگے ءَ دیم ءَ اتکگ اَنت۔ بلے اد ءَ ھم ریاستی اسر ءُ رسوک ءَ چہ آجوئی ایوک ءَ داوا اِنت۔ اسلام آباد ءُ کوئٹہ ءَ چہ بازیں ویب چینل بندات کنگ بوتگ کہ ائی ایس پی آر ءُ پوج تچک ءَ تچک آیانی کمک ءَ کنگ ءَ اِنت۔ “براق” ویب چینل یک پدریں درورے کہ ایشی ءِ مستریں مول ءُ مراد بی وائی سی ءُ بلوچ سیاسی رھشونی ءِ ھلاپ ءَ منپی پروپیگنڈا ءِ شنگ کنگ اِنت۔ ایشی ءَ ابید گوش اشکنگ ءَ اسلام آباد ءَ چہ دو دگہ ویب چینل ھم بندات بوتگ کہ آ بلوچ زرمبش ءَ کاؤنٹر بکن اَنت ءُ ریاستی وت گڑیں بیانیہ ءَ دیم ءَ بہ بر اَنت۔
اے ویب چینلانی رپورٹراں ماھانہ کم چہ کم سی تا پنجاہ ھزار کلدار ءِ پگار دیگ بیت۔ 50،000 ءَ ابید آیانی دپتر ءِ کرایہ، بجلی، انٹرنیٹ ءُ دگہ ھرچ ءُ درچ ایف سی یا انٹیلی جنس ادارھانی نیمگ ءَ چہ دیگ بنت۔ اے وتگڑیں اھوالکار رپورٹنگ ءِ بھانہ ءَ پہ انٹیلی جنس ایجنسیاں جاسوسی کن اَنت ءُ بازیں مردمے گوں آیاں ایجنٹ ءِ بستار ءَ سرگرم اِنت۔

گیر جانبداری ءِ وھم

لھتیں ویب چینل ءُ سوشل میڈیا ءِ تاک کہ وت ءَ ”غیر جانبدار“ ءُ ”آزات“ ءِ رنگ ءَ پیش دار اَنت آ ھم چہ درور ءَ ریاستی منسوبہ ءِ بھر اَنت۔ دمگی اھوالکارانی رد ءَ اے ویب چینلاں مالی کمک ءِ ھمراھی ءَ نوکیں سامان، کیمرہ ءُ دگہ آسراتی ھم دیگ بنت۔ اے سبب اِنت کہ بلوچستان ءَ ھر ھما اھوالکار کہ راستیں ءُ رھبندیں وڑے ءَ رپورٹنگ کنگ بہ لوٹ اِیت آیاں زور ءُ دھمکیاں ابید برے برے دزگیر کنگ ءُ باز وھد ءَ کوش آماچ کنگ ھم بیت کہ ایشی ءِ مستریوں درور لطیف بلوچ ءِ کوش اِنت۔

بلوچستان اے وھد ءَ آجوئی لبز ءُ لیکہ ءِ بدتریں بُھران ءَ گوزگ ءَ اِنت ۔ سھاپت ءِ مکدسیں پیشہ جنگ ءِ سلاہ ءَ بدل کنگ بوتگ کہ ایشی ءِ وسیلہ ءَ پوجی کارروائی پوشیدگ کنگ بنت ءُ ریاستی پروپیگنڈا دیم ءَ برگ بنت۔ ھندی اھوالکاراں ءُ گپ ءَ اے ھبر سھرا بوتگ کہ سرکار ءَ ھر دمگ ءَ پریس کلباں وتی ایجنٹ داشتگ اَنت کہ آ زاھر ءَ اھوال کار اَنت بلے کار پہ سرکار ءَ کنگ ءَ اَنت، اے وڑیں وپاداریں ویب چینل ءُ اھوالکاراں تاں اے اکتیار دیگ بیت کہ آ بلوچ سیاسی گلانی ھالاں شنگ بہ کن اَنت کہ اے تاسر ءَ بہ دنت کہ رسانکدر آجو اِنت، وھدے کہ درھکیکت اے درست یک داشتگیں منسوبہ بندیں رھبندے ءِ بھر اَنت۔

آسر
بلوچستان ءَ رسانکدر نوں وت واجھیں ادارھے نہ اِنت۔ ایوک ءَ الیکٹرانک ءُ پرنٹ میڈیا ناں بلکیں سوشل میڈیا ھم ریاستی کنٹرول ءَ اِنت۔ چشیں جاوراں بلوچستان ءَ آجو، شَپاپ ءُ زمہ واریں اھوالکاری ءِ ھیال یک وابے جوڑ بوتگ۔

بلوچ راج ءِ توار ءِ چیر دیگ،آئی ءِ رنج ءُ گم، آئی ءِ سیاسی جنز ءُ آئی ءِ سر ءَ بیوکیں زُلم ءُ زوراکیانی سرکپ کنگ ناں ایوک ءَ انسانی ھکانی مزنیں لگتمالی یے بلکیں دمگ ءِ تہ ءَ گیشتر آشوب ءُ کینگ ھم ودی کنت۔ یک شھوری، ذمہ وار ءُ گیر جانبداریں رسانکدرے اے بُھران ءِ یکیں گیشواری بوت کنت، شرت ھمیش اِنت کہ آئی ءَ ریاستی کنٹرول ءَ چہ آجو بوگ ءِ اجازت دیگ بہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-