کراچی: بلوچ یکجھتی کمیٹی ءِ رھشون سمی دین یل دیگ بیتگ

تھری ایم پی او ءِ درچ ءَ بندیگیں سمی دین بلوچ یل دیگ بیتگ-

سمی دین ءِ گوھار مھلب بلوچ ءَ ھال راست کنان ءَ گوشتگ منی گوھار سمی دین آکر کار یل دیگ بیتگ-

مھلب دین ءَ گوشتگ من ایڈوکیٹ جبران ناصر، ءُ دراھیں انسانی ھکانی باسک، سول سوسائٹی ءِ باسک، ءُ ھمک ھما مردم ءِ دل ءِ جھلانکی ءَ منت ءَ گراں کہ آیاں مئے ھمراھداری کتگ ءُ انساپ ءِ ھاتر ءَ جد ءُ جھد کتگ-

سمی دین ءِ وکیل جبران ناصر ءَ اے گپ راست کنان ءَ گوشتگ سندھ سرکار ءَ سمی نام ایم پی او ءَ واتر زرتگ ءُ آ یل دیگ بیتگ ءُ آ اے وھد ءَ وتی کھول ءِ گور ءَ انت-

آئی ءَ گوشتگ سمی ءِ یل دیگ ءِ کرد مھلوک ءِ زور ءُ میڈیا ءِ زور بیتگ بلے داں انگت ءَ لالا وھاب، شھداد، رازق ءُ سلطان کہ انگت ءَ نابالگ انت انگت ءَ ایم پی او ءَ انت-

آئی ءَ گوشتگ ما لوٹ کن ایں کہ بی وائی سی ءِ دراھیں باسکانی ھلاپ ءَ ایم پی او ءَ ھلاس بہ کنت کہ پُر ایمنیں زھرشانی ءُ جمھوری ءِ ھک ءَ دار انت-

آئی ءَ گوشتگ سمی ءِ یل دیگ ریاست ءِ نیمگ ءَ جوانیں گامگیجے ءِ بنداتی گام انت ما ماہ رنگ ءُ بلوچستان ءِ سرکار ءِ بندیگیں دراھیں بی وائی سی ءِ باسکانی یل دیگ ءِ لوٹ ءَ کن ایں-