بی وائی سی ءِ بنجاھی رھشونانی دزگیری ءَ گوادر، ھزدار، کیچ ، ھاران ءُ ھب ءَ زھرشانی، ھزارانی کچ ءَ مردم دگانی سر ءَ در اتکگ انت

بلوچ یکجھتی کمیٹی ءِ رھشون ڈاکٹر مھرنگ بلوچ، سمی دین، بیبو بلوچ، بیبرگ بلوچ ءُ ایندگرانی دزگیری ءُ زالبولانی سرا لٹ شاپی ءُ تیرگواری ءِ بگیری ءَ مروچی ششمی روچ ءَ ھم بلوچستان ءِ گیشتریں ھنداں روانک کشگ بوتگ – کہ اودا زالطولاں مزنیں کچے ءَ بھر زرتگ ءُ ریاستی زوراکی ایرجتگ –

بلوچستان ءِ تیاب دپی دمگ گوادر ءَ بلوچ یکجھتی کمیٹی ءِ رھشون ڈاکٹر مھرنگ بلوچ، سمی دین، بیبو بلوچ، بیبرگ بلوچ ءُ لالا وھاب بلوچ ءُ ایندگہ باسکانی دزگیری ءں بگیری ءَ زھرشانی روانک ءِ کشگ بوتگ – زھرشانی روانک سیرت النبی چار راہ ءَ بندات بوتگ ءُ سید ظہور شاہ ایوینو ءَ بگر تاں شھدائے جیونی ءُ مکی مسیت ءَ آسر بوتگ –

زھرشانی روانک ءَ زھگ ءُ زالبولاں ھوار مزنیں کچے ءَ مردین ھوار بوتگ انت کہ آیانی دست ءَ پلے کارڈ بوتگ انت ءُ آیانی سرا نارہ نبشتہ بوتگ –

زھرشانی ءَ تران کنان ءَ ھق دو تحریک ءِ بنجاھی سرکماش حسین واڈیلا، بنجاھی آرگنائزر حفیظ کیازئی ءُ رخسانہ دوست ءَ گوشتگ کہ سرکار ءَ ہارڈ اسٹیٹ ءِ نام ءَ بلوچستان ءَ لشکر کشی بندات کتگ، بلوچاں ھچ وڈیں در کانودی کارے نہ کتگ –

آیاں گوشتگ کہ ڈاکٹر ماھرنگ بلوچانی توارے، ڈاکٹر ماھرنگ ءُ.سمی دین ءِ جھد ءَ بلوچ یکجاہ کتگ انت – بلوچستان ءِ سروزیر بلوچ یکجھتی کمیٹی ءِ ھلاس کنگ ءِ دمب ءَ انت بلے وت ھلاس بیت بی وائی سی ءَ ھلاس کت نہ کنت – آئی ءِ جھد ءَ سرکار پروش داتگ – بلوچاں ھپتاد ءُ پنچ سالیں کہ وتی سرڈگار ءُ مردمانی ھاتر ءَ جھد ءَ انت –

آیاں گوشتگ کہ سرکار ءَ بلوچ یکجھتی کمیٹی ءِ رھشون ڈاکٹر مھرنگ بلوچ، سمی دین، بیبو بلوچ، بیبرگ بلوچ ءُ لالا وھاب دزگیر نہ کتگ انت بلکنہ سرجمیں بلوچستان دزگیر کتگ گڈا بلوچ پرچا ھچ مہ گُش انت –

ھمے وڈ تربت، ھزدار، ھاران ءُ ھب ءَ ھم مزنیں کچے ءَ مردم دگانی سرا در اتکگ انت ءُ زھرشانی ءِ کتگ –

آیاں گوشتگ کہ پوج ءَ سرفراز بگٹی ھمے واست ءَ وزیر اعلی کتگ کہ آ بلوچ جھد ءَ ھلاس کنت بلے آ چہ واب ءَ بُست بہ کنت ءُ بہ چار ایت کہ مھرنگ مروچی جیل انت بلے ھزارانی کچ ءَ مردم دگانی سر ءَ گھگیری کنگ ءَ انت –

روانک ءَ تران کنان ءَ بی وائی سی ءِ جھالاوان ءِ باسکاں گوشتگ کہ ریاست ءِ نیمگ ءَ ناشرکاری نوکیں گپ ءِ نہ ایں بلکنہ بلوچاں ھپتاد ءُ پنچ سالیں ھمے زوراکیانی دیمپانی ءَ کنگ ءَ انت بلوچ یکجھتی کمیٹی مدامی راج ءِ ھکانی ھاتر ءَ اشتاتگ ءُ دیمتر ءَ ھم اوشت ایت –

آیاں گوشتگ ریاست ءَ لھتے روچ ایں کہ شال ءِ دمگ کوشال ءَ زوراکی ءِ نوکیں درچ ءِ بندات کتگ کہ ما آئ ءَ ترندی ءَ ایر جن ایں – مروچیگیں جاور ھال ایش انت کہ دوازدہ سالی زھگ ھم ریاستی زوراکیاں پھریز نہ انت – رمزان ءِ ماہ ءَ ھم بلوچانی سرا زوراکی کم نہ بوتگ انت – تاں ھما وھد ءَ بلوچ یکجاہ نہ بنت زلم زوراکی برجاہ مان انت – مئے سوبمندی ھمیشی ءِ تہ ءَ انت ما دراہ یکجاہ بوشت ایں –

مھرک بلوچ ءَ تران کنان ءَ گوشتگ کہ مروچی بلوچ ءِ توار ڈاکٹر مھرنگ بلوچ، سمی دین، بیبو بلوچ، بیبرگ بلوچ ریاستی بندیگ جاھاں بند انت – ما اگاں ھچ نگوشت ءُ گڈا پہ مئے راج ءِ ھاتر ءَ گیشتر تاوان ایں – من چہ وتی بلوچ راج ءَ لوٹ کناں کہ ریاستی زوراکیانء بگیری ءَ بہ اوشت انت ءُ وتی ھکانی ھاتر ءَ جھد بہ کن انت –

شفیق ساسولی ءَ گوشتگ کہ ادا ھما کھول ساڑی انت کہ گوستگیں پانزدہ سالاں وتی دوستیگیں مردمانی بیگواھی ءِ درداں سگگ انت – ما اے مات ءُ گھاراں دورت ندر کن ایں – اد ھر یک مردمے برات، پت، یا زھگ بیگواہ انت –

آئی ءَ گوشتگ کہ ما زانیں ما پرچا بیگواہ کنگ بوگ ءَ ایں پرچا مئے زبان بند کنگ بوگ ءَ انت – پرچاکہ ما بیست ءُ ھپت مارچ 1948 ءَ ھما سیاھیں روچ سرپد بہ ایں کہ وھدے ریاست ءَ چکچینی بندات کتگ –

کبیر بلوچ ءِ مات ءَ تران کنان ءَ گوشتگ کی منی چک ءَ شانزدہ سالیں بیگواہ ایں ءُ مناں شانزدہ سالیں ھمے دگانی سر ءَ در پہ دراں – ڈاکٹر ماھرنگ ءَ درسیں بیگواھیں مردمانی ھاتر ءَ توار چست کتگ ا ھم بیگواہ کنگ بوتگ –

بلوچ یکجھتی کمیٹی جھالاوان ءَ اے گپ تچک کتگ کہ بلوچ راج ءِ سرا زلم.ءُ زوراکی گر ءُ دار کنگ بہ بنت، درسیں بیگواھیں مردم یل کنگ بہ بنت ءُ بلوچ راج ءَ آیانی بنکی ءُ انسانی ءُ راجی ھک دیگ بہ بنت – بلوچ یکجھتی کمیٹی وتی راج ءِ ھمکوپگ انت – ما وتی نمیران ءُ بیگواھیں مردمانی کھولانی ھاتر ءَ انساپ ءِ لوٹ ءَ بند نہ کن ایں –