ناروے: PEN ناروے ءِ دو گچینی پترانی ھاتر ءَ بلوچ اھوالکار کیّا بلوچ گچین کنگ بوتگ

نامداریں بلوچ اھوالکار کیّا بلوچ PEN ناروے ءِ Imprisoned Writers Committee ءُ Young Writers Committee ءِ باسک گچین کنگ بوتگ –

نوں کیّا بلوچ PEN ناروے ءِ سروکی کنت ءُ PEN انٹرنیشنل ءَ گوں ھوار بیت ءُ کار کنت تانکہ سرجمیں جھان ءَ ورنائیں نبشتہ کاراں وتی آزاتیں ھیالانی درشانی ءِ موہ دیگ بہ بیت – ورنائیں نبشتہ کارانی پتر ءِ مُول ءُ مراد نوکباھندیں نبشتہ کاراں چیلنجانی دیمپانی کنگ ءَ آیانی کمک کنگ ءُ آیاں یک مھکمیں پلیٹ فارمے ءِ دیگ انت –

اشی ءَ ابید Imprisoned Writers Committee ءِ رِد ءَ بندیگیں نبشتہ کار ءُ اھوالکارانی ھاتر ءَ ھم کیّا بلوچ کار کنت کہ آئی ءِ تہ ءَ ھاسکر ایران، انڈیا ءُ بیلاروس ءَ بندیگیں نبشتہ کارانی ھکانی ھاتر ءَ کار کنگ بیت انت –

زانگ بہ بیت PEN یک میان استمانی گل ئے کہ سرجمیں جھان ءَ ادیب، اھوالکار ءُ زانتکارانی ھکانی پھازگ ءَ پہ کار کنت، اے گل آزاتی ءَ وتی ھیالانی درشانی، لبزانکی بدلی ءُ نبشتہ کارانی ھکانی دیمروئی ءَ پہ کار کنگ ءَ انت – PEN انٹرنیشنل جتا جتائیں ڈیھاں زلم زوراکیانی آماچ بوتگیں ادیب ءُ اھوالکارانی ھاتر ءَ توار چست کنت ءُ بندیگیں نبشتہ کارانی یل کنائینگے ھاتر ےَ کار کنت ءُ اشی ءَ ابید آجوئی ءَ گوں وتی ھیالانی درشانی ءُ سنسرشپ ءِ بگیری ءَ ھم کار کنت –

اشی ءَ ابید اے گل ورنائیں نبشتہ کاراں دلبڈی دنت ءُ آیاں ھنچیں پلیٹ فارم دنت کہ اودا آ وتی ساچشتی کاراں بید تُرس ءَ دیما بیار ایت –