گوادر: کتاب میڑہ ءِ سر ءَ پولیس ءِ بیڑ، بازیں نودربرے گوں کتاباں تھانہ ءَ برگ بیتگ انت

بلوچستان ءِ تیابدپی شھر گوادر ءَ سَے شمبے ءِ روچ ءَ پولیس ءَ بلوچستان کتاب کاروان ءِ نام ءَ برجمیں یک بک اسٹالے ءِ سر ءَ بیڑ برتگ ءُ نودربر گوں کتاباں پولیس تھانہ ءَ برگ بیتگ اَنت-

بلوچ اسٹوڈنس ایکشن کمیٹی ءَ وئیل ءِ پژدر ءَ گوشتگ کہ اگاں کتابانی وانگ گیر کانونی انت گڑا ڈیھ ءَ دراھیں یونیورسٹی ءُ کالج کبل جنگ ءُ بند کنگ بہ بنت ءُ پارلیمنٹ ءَ بِل منگ بہ بیت مروچیگ ءَ پد اے ڈیھ ءَ کتابانی سر ءَ بندش اِنت درستیں جیڑہ ھلاس-

آئی ءَ گوشتگ بلوچستان ءَ دیمروئی ءَ نام دیوکیں گوادر شھر ءَ کتابانی سر ءَ بندش ءُ وانگ ءِ سر ءَ بندش اِنت سک ءَ بژنیگے یے-

ھمے شھر ءَ منشیات ءُ دگہ چاگردی سلکاری لس بوگ ءَ انت بلے چاگرد ءَ وانگ ءُ زانت ءِ چراگ ءَ روک کنوکیں ورنا بندیگ جاھاں بند کنگ بنت اِنت اے ڈیھ ءُ وتگڑیں ھاکمانی دیم ءَ شھماتے-

بساک ءَ گوشتگ گوادر ءَ ھوار بلوچستان ءِ دگہ جاھاں ھمے ڈول ءَ نودربراں ترسینگ ءِ آماچی انت – اے امل بلوچ ورنایاں وانگ ءَ دور کنگ ءِ پندلے بلے ما چوشیں پندلاں بے سوب کنگ ءَ جد ءُ جھد ءَ یک گامے پشت ءَ نہ کنز ایں ءُ زمہ واراں ترندی ءَ گوں گوش ایں کہ دراھیں نودربراں یل بہ کن ات ءُ بلوچ ورنایانی ترسینگ بند کنگ بہ بیت اِنت-