ظریف ءِ بلوچ کوش، مئے چاگرد ءَ شنگ ءُ تالان بیتگیں بے وسی ءِ پدراھی ءَ کنت- شال ءِ زھرشانی

بلوچستان ءِ بُنجاھی شھر شال ءَ بلوچ یکجھتی کمیٹی ءِ نیمگ ءَ چہ یک زھرشانی یے برجم دارگ بیتگ چریشی ءَ مزنیں کچے ءَ مردماں ظریف بلوچ ءِ کوش ءُ بلوچ راج ءَ دیمپان برجاھیں زوراکی ءِ ھلاپ زھرشانی کتگ-

زھرشانی ءَ چہ بی وائی سی ءِ راھشون ماہ رنگ بلوچ، صبغت اللہ بلوچ، ءُ بیگواھیں مردمانی کھولاں تران کتگ، چریشی ءَ ترانکاراں اے دردناکیں وئیل ایر جتگ-

ترانکاراں دیمتر ءَ گْوشتگ کہ ظریف بلوچ ءِ کوش وئیل مئے چاگرد ءَ شنگ ءُ تلان بیتگیں بے وسی ءِ پدراھی ءَ کنت، ایشی ءِ گر ءُ دار کنگ مئے درستانی پرز اِنت – بی وائی سی ءِ راھشوناں ھاسکار اے گپ ءِ سر ءَ زور داتگ کہ گیش بے توار انسانی جاناں واستا ھترہ بیت کنت – راج ءَ لوٹ اِیت کہ آ اے زوراکیانی ھلاپ ءَ یکجاہ بہ بنت توار چست بہ کن اَنت انسانی ھکانی پادمالی ءِ ھلاپ ءَ وتی جُھد ءَ برجاہ بدار اَنت-

زھرشانی کنوکاں انسانی ھکانی گیش بیوکیں ھلاپ ورزیانی جُست ءَ ریاستی لَٹ ءُ کُٹاں سانمندیناں انساپ دیگ ءِ لوٹ کتگ-

زھرشانی کنوکاں گْوشتگ کہ جاور یکشل ءَ ترسناک اَنت پرچاکہ ظریف بلوچ ءِ گمجتیں کھول ءِ گون ءَ یکجاھی درشان کنگ ءِ ھاتر ءَ تھتگ بندیں ھڑتال برجاہ ءَ اِنت – فرنٹیئر کور ( ایف سی) ءَ جتاجتائیں ھنداں زھرشانی کنوک تُرسینتگ ءُ کرفیو جتگ-

زھرشانی کنوکاں گْوشتگ کہ مروچی تربت ءُ ھب ءَ پاکستانی پوج ءِ کارمنداں زھرشانی کنوک تُرسینگ ءُ بے توار کنگ ءِ واستا آیانی موباھل پچ گپتگ ءُ لَٹ کُٹانی نشانگ کتگ اَنت-

آیاں گوشتگ کہ ھب چوکی ءَ پولیس ءُ پوج ءَ پُرایمنیں زھرشانی کنوکانی ھلاپ ءَ آنسو گیس ءُ تچکی ءَ گولہ بارود کارمر کتگ چریشی ءَ چہ بازیں مردمے ٹپی بیتگ انت- اے جاورھالاں زھرشانی کنوک پھازی ءِ یک تُرسے ودی کتگ کہ آیانی تہ ءَ زالبول، زھگ ءُ کماشیں مردم ھوار اَنت-

زھرشانی کنوکانی لوٹ اِنت کہ ظریف ءِ آوار جنگ ءُ کوش ءَ ھمگرنچیں ایف سی کارمندانی ھلاپ ءَ ایف آئی آر نکش بہ کن اَنت، ظریف ءِ آوار جنگ ءَ کوش ءِ شریں وڑے ءَ پٹ ءُ پول ءَ بہ کن اِت-

دیمتر ءَ لوٹ کنگ بیت کہ ریاستی پوج ءِ دست ءَ کُشگ بیتگیں بلیدہ ءِ جھمنند نوید بلوچ ءِ واستا انساپ ءُ کوش ءِ زمہ واری جُست کنگ بہ بنت-

زھرشانی کنوکاں جار جتگ کہ اگاں لوٹ زوت سرجم کنگ نہ بیت اَنت گُڑا سرجمیں بلوچستان ءَ زھرشانی ءَ گیش دراجکش کن ایں – گل ءَ انسانی ھکانی سرجمیں گل، سول سوسائٹی ءُ شرپمندیں شھریاں چہ لوٹ کتگ کہ آ سانمندانی گون ءَ بہ اوشت اَنت ءُ انساپ لوٹ ءَ بہ کن اَنت-