شال: وانگی ادارھاں ملٹرائزیشن ءِ ھلاپ ءَ زھرشانی برجاہ

بولان میڈیکل کالج ءُ ھاسٹلانی بندش ءِ ھلاپ ءَ نودربرانی زھرشانی بنجل ھژدھمی روچ ءَ برجاہ اِنت-

نودربراں گوشتگ داں انگت ءَ کالج انتزامیہ ءُ بلوچستان ءِ سرکار ءِ نیمگ ءَ نودربرانی لوٹاں ڈالچار کنگ ءَ اَنت- گوستگیں روچ ءَ زھرشانی بنجل ءَ بگر داں بلوچستان اسمبلی ءَ یک زھرشانی روانکے کش اتگ کہ اود ءَ نودربراں بازیں کچے ءَ بھر زرتگ-

شال ءَ ترندیں سارتی ءَ ابید نودربراں زھرشانی بنجل ءِ برجاہ دارگ ءِ پیسلہ کتگ- نودربرانی گوشگ اِنت دانکہ آیانی لوٹ منگ نہ بنت ھاسٹل ءُ کالج پچ کنگ نہ بیت اِنت ھمے وڑ ءَ زھرشانی برجاہ بیت اِنت-

نودربراں شکایت کتگ کہ بولان میڈیکل کالج کہ گوستگیں بازیں روچاں بند ءُ ھاسٹلز پولیس ءِ دستیگی ءَ اَنت- بی ایم سی ءِ ھاسٹلاں انتزامیہ ءُ پولیس ءِ نیمگ ءَ نودربرانی ساز ءُ سامانانی دزی برجاہ اَنت ءُ بازیں مردم ھاسٹلاں پترتگ ءُ کوٹی اش پروشتگ انت ءُ گرانھادین ساز ءُ ساماناں برگ ءَ اَنت- ایشی ءَ پیش نودربرانی لیپ ٹاپ، موبائل ءُ دگہ چیز دزی کنگ بیتگ اَنت- نودربرانی سامانانی دزی ءَ پولیس ءُ انتزامیہ ءَ ھوار اَنت-