بساک ءِ نیمگ ءَ ماں تُربت ءَ سباء دشتیاری ءِ نام ءَ برجم داشتگیں فیسٹیول دومی روچ ءَ آسر

بساک ءَ سباء لیٹریری فیسٹیول ءِ نام ءَ تُربَت ءَ 30 نومبر ءَ داں 1 دسمبر ءَ، دو روچی مراگشے اَڑ داتگ ھمے درگت ءَ مراگش ءِ دو بھرانی تہ ءَ اولی بھر ءَ بندات ءَ راجی سوت، تران، پینل ڈسکشن، ڈاکومنٹری، سلائیڈز پریزنٹیشن، گشتانک، ٹیبلو، کسمان ءُ اھدی ساز ءُ زیمل ءَ گوں بندوک بوتگ۔

چہ ایشی ءَ ابید مراگش ءِ دومی بھر ءِ تہ ءَ پد ءَ راجی سوت، شھید سباء دشتیاری ءِ پنتاک، راجی جُنز ءُ دانشورانی کِرد، گام پریزینٹیشن، ھستیں وھد ءَ بلوچی لبزانک، تامری تران میڈیا ءُ جرنلزم، رسانکدر ءُ بلوچ مھلوک، جھان ءِ مٹ بوھوکیں سیاست، گشتانک ڈاکٹر زھیر شیران، ڈاکیومیٹری کمرشل ایجوکیشن، بلوچ چاگرد ءِ ھستیں جیڑہ، کسمانک جند ءَ سمبال، بلوچستان ءِ سیاسی جاورال ءُ گڈسر ءَ ساز ءُ زیملی دیوان برجم دارگ بوتگ۔

مراگش ءَ بساک ءِ گوستگیں سروک ڈاکٹر صبیحہ بلوچ ءَ گوشت کہ ما اگاں بلوچ ءِ ماھیگر ءَ جست بہ گراں کہ تئی جیڑہ چی اَنت گڑا آ گوش ایت مئے ماھیگانی نسل کشی بوگ ءَ اِنت ءُ روزگار جنگ بوگ ءَ اِنت، ما اگاں نودربرے ءَ جست بہ گراں گڑا آ گوش ایت وانگجاھاں بلوچ ءِ چاگرد ءُ آئی ءِ ترز ءُ رنگاں آ وانینگ بوگ ءَ نہ اِنت ءُ مارا زیردستی ءِ دروشم ءُ زبان ءَ وانینگ بوگ ءَ اَنت-

ڈاکٹر صبیحہ بلوچ ءَ گوشت کہ ما اگاں آواران ءُ کوھلو ءِ مھلوک ءَ جست بہ گراں کہ بلوچ ءِ مستریں جیڑہ چی اِنت گڑا آ گوش ایت بلوچ آپریشنانی زد ءَ لڈ ءُ بار کنگ ءُ وتی لوگ ءُ جاگھانی یل کنگ –

آئی ءَ سوشیز پولیجسٹے انتر پوجسٹ ءَ جست کنت کہ بلوچ ءِ مستریں جیڑہ چی اِنت گڑا آ گوش ایت بلوچ ءَ زبان ءُ دودمان یل داتگ-

آئی ءَ گوشت ما اگاں سوشلسٹے ءَ جست گریں گڑا آ گوش ایت بلوچ ءِ مستریں جیڑہ گلامی اِنت- آئی ءَ گوشت بلوچ ءِ مستریں جیڑہ گلامی اِنت کہ بلوچ مروچی گلام اِنت-

بساک ءِ سروک شبیر بلوچ ءَ گوشت زیرگپتگیں راجے کہ زورگرے ءِ دست ءَ بیت اِنت گڑا آئی ءِ وانگ، سوشل آرڈر، زرکاری ءُ زند ءِ گوازینگ ءِ دراھیں ھک زروگر ءِ دست ءَ الگار بنت اِنت-

آئی ءَ گوشت کہ دنیا ءِ دوداں ما وان ایں گڑا مارا گندگ ءَ کیت اِنت کہ ری ایجوکیشن ءِ یک پروسززے دیم ءَ اورتگ کہ چراھی ءِ تک ءَ دنیا ءَ زیرستانی وانگ نیزور کتگ ءُ آیانی چاگردی سنچ پچ گپتگ اَنت-

آئی ءَ گوشت ما ھمے چیزانی پروش دیگ ءَ وتی وسیلگ ءَ وتی ورنایاں اے چیز ءَ دیم ءَ بران کن ایں ءُ ھما چیزاں کہ مارا دیم ءَ روگی اِنت ھماھیانی سر ءَ کار کنگی اِنت-

آئی ءَ گوشت بساک ھمک بلوچ نودربر ءِ رھشونی ءِ پتر اِنت کہ بساک ھما وھد ءَ سوبمند بیت آئی ءَ را ھمک بلوچ کماش یا استاد یا بساک ءَ ابید بندوکیں ورنا ھمے بہ جیڑ ایت کہ بساک راجی امانتے-

مراگش ءَ تربت یونیورسٹی ءِ بلوچی ءِ پروپیسر بالاچ بالی بلوچ ءَ شھید سباء ءِ زند ءُ ادب ءِ بابت ءَ گپ ءُ تران کُتگ۔ آئی ءَ گُشتگ کہ شھید سباء بلوچ مار اِتگ ءُ بلوچی زبان ءِ رھبندانی سر ءَ پہ وتی کاراں مُھکم ءُ دلجم بوتگ۔ آئی ءَ گُشتگ کہ سباء بلوچے بوتگ چمیشکا آئی ءَ پہ بلوچ ءَ مار اِتگ چمیشکا مرچی بلوچ راج آئی ءَ کندیل ءِ نام ءَ زانت۔

بساک ءِ مراگش ءِ بھرانی تہ ءَ جاوید ایم بی بلوچ ءَ اھوالکاری ءِ سر ءَ جوانیں وتی درنگازی پیش کتگ، آئی ءَ ھوالکاری ءَ پہ بلوچ نودراں جوانیں سرپدی داتگ۔ آئی ءَ گْوشتگ کہ ابید سوشل میڈیا ءَ بلوچ راج جیڑھاں درامدے نئیت پہ تئی راج ءِ راستیاں پدر کُت نہ بلکیں راستیاں شما بلوچ وت بکن اِت، آئی ءَ گوشتگ اَت پاکستانی میڈیا پہ بلوچ ءِ واست ءَ مدام توار چست نہ کتگ ءُ مدام بلوچ ءِ جیڑہ چیر داتگ ءُ سرداری ءِ نام بلوچ راج بھا کُتگ ءُ مدام ایردست ئِے کُتگ۔

فیسٹول ءَ بساک ءِ نیمگ ءَ بک اسٹال ھم برجم دارگ بیتگ کہ اود ءَ جتا جتائیں کتاب زیرگ بیتگ اَنت-

دیوان ءِ یک بھرے ساز ءُ زیملی بیتگ کہ آئی ءِ توک ءَ بلوچی ءُ براھوئی گشندہ حالق فرھاد، نوشین کمبرانی ءُ وھاب بلوچ ءَ دیوان ءَ ساز ءُ زیملی ءَ مھلوک وتی نیمگ ءَ دلگوش کتگ –

دیوان ءَ کسمانکی رنگ ءُ دروشم ھم پیش دارگ بیتگ اَنت کہ اود ءَ کسمانکاراں چاروکانی ھیال وتی نیمگ ءَ ترینتگ اَنت-

دیوان ءِ گڈسر ءَ پہ مھماناں بلوچی چاردر سوگات دیگ بیت اَنت ءُ دیوان آسر بیتگ- اے دیوان بساک ءِ نیمگ ءَ عطاء شاد ڈگری کالج ءَ سباء دشتیاری ءِ یات ءَ دو روچی ءِ برجم دارگ بیتگ کہ جتا جتائیں ھنداں مھلوک اتکگ ءُ بھر اش زرتگ-