بلوچستان ءُ کراچی ءَ چار مردم پاکستانی پوج دست ءَ زورانسری آوار جنگ بیتگ اَنت

بلوچستان ءِ دو جتاجتائیں دمگ کیچ ءُ سبی ءَ سے مردم وھدے کہ کراچی ءَ یک مردمے پاکستانی پوج ءِ دست ءَ بیگواہ کنگ بیتگ اَنت-

گیشیں ھالانی رِد ءَ چہ بلوچستان ءِ دمگ کیچ ءَ دزکپتگیں ھالانی رِد ءَ زی سھب ءَ پاکستانی پوج ءَ چہ تربت کرکی ءَ بخشل نامیں ڈرائیورے دزگیر کتگ ناشناسیں جاھے ءَ برتگ-

وئیل ءِ ھلاپ ءَ زورانسری آوار جنی نشانگ کنگ بیتگیں مردم ءِ کھول ءَ کرکی ھند سر ءَ زھرشانی کنان ءَ سی پیک دگ بند کتگ زھرشانی ءِ سبب ءَ سی پیک شھدگ سر ءَ گاڑیانی دراجیں لین لگ اِتگ-

زھرشانی کنوکاں لوٹ کتگ کہ تربت انتزامیہ پاکستانی پوج ءِ دست ءَ بخشل زوت یل بہ کن اِت اگاں ناں ما وتی زھرشانی ئیں نندانک ءَ سی پیک دگ سر ءَ برجاہ دار ایں-

ھمے وڑ کیچ ءِ دمگ چہ کیکن ءَ ھال اِنت ھژدہ اکتوبر ءَ لوگ ءَ روگ وھد ءَ بیبگر ء عطاء محمد نامیں مردمے پاکستانی پوج ءَ آوار جتگ ءُ بیگواہ کتگ کہ چریشی ءَ پد آ بیگواہ اِنت-

ھمے وڑ چہ سبی ءَ پاکستانی پوج ءُ جاور ء دلاور آوار جتگ ءُ بیگواہ کتگ چریشی ءَ پد اشی ءِ درگت ءَ ھچ وڑیں ھال نیست-

دومی نیمگ ءَ چہ کراچی ءِ بلوچانی گیشتریں دمگ ءَ پاکستانی پوج ءَ گوستگیں شپ سے ءَ بیڑبرتگ یک مردمے آوار جتگ-

گیشیں ھالانی رِد ءَ کراچی ءِ دمگ چہ لیاری کلری سرگوات ھند سر ءَ گوستگیں شپ ءِ ساھت سے ءَ پاکستانی پوج ءَ بیڑبرتگ یک مردمے آوار جنگ ءَ پد بیگواہ کتگ-

بیگواہ کنگ بیتگیں مردم ءِ پجّار محبت ء اشرف نام ءَ چہ بیتگ-

زانگ بہ بیت اے مرد اشی ءَ ساری ھم ھژدہ فروری دوھزار بیست یک ءَ زورانسری آوار جنی ءِ نشانگ کنگ بیتگ اَت بازیں مدتے ءَ بیگواھی ءَ پد یل کنگ بیتگ ءُ یکرندے پد ءَ بیگواہ کنگ بیتگ-