نگدی سِنچ
ندکار: شاھد اھمد
دی بلوچستان پوسٹ
نگدی سِنچ: مئے واست ءَ وانگ پرچا المی اِنت؟ ءُ نگدی سِنچ ءِ زانگ ءِ ھاتر ءَ شرتریں کتاب کجام اَنت؟
مرچیگیں زمانگ ءَ کہ مالومات ھر جاہ ءَ شنگ ءُ تالان اِنت، راستی ءُ دروگ ءِ پرک کنگ ارزان نہ اِنت۔ ما باز براں گلہ ءِ ذھنیت ءِ شکار بَہ اِیں، بزاں ما بے ھیالیں وڑے ءَ دگرانی گپاں منّیں، راست بہ بنت یا اِنّا۔
سوشل میڈیا ءُ ھر روچی زند ءَ مارا انچیں ھال ءُ اھوال یا بے سر ءُ بُنیں ھال گندگ بنت کہ آ باز براں بے پٹ ءُ پول ءَ شِنگ کنگ بنت۔ ھمے رنگ ءَ وھدے مردم یک لیکھے یا باورے ءَ وتی کن اَنت گڑا باز براں نگدی ھیال نہ کن اَنت ءُ بے جُست ءُ پُرس ءَ منّ اَنت۔
ھمے سوب اِنت کہ مرچیگیں زمانگ ءَ نگدی پِگر سک باز المی اِنت۔ نگدی پگر ءِ بزانت ایش انت کہ ما ھر یک زانتکارے یا لیکھے ءِ سر ءَ چمشانک دئیں، آئی ءِ سر ءَ جُست ءُ پُرس کنیں ءُ وت پٹ ءُ پول کنیں کہ اے راست انت یا اِنّا۔ اے ھُنر مارا دَگا ءُ رَد پَھمی ءَ چہ رکّین ایت ءُ زندگی ءِ تہ ءَ شریں سوڑگ ءُ پیسلہ کنگ ءَ مارا کمک کنت۔
اے نگدی پِگر ءِ بابت ءَ مردم من ءَ باز براں جُست کن اَنت کہ آ نگدی پِگر ءَ چوں زانت کن اَنت ءُ کہ آ وتی پَھمگ ءَ شرتر کن اَنت۔ من اے جُست ءِ پسو ءَ نبشتانکانی ءُ کتابانی سر ءَ دے آں پرچا کہ کتاب ھما وسیلہ اِنت کہ مئے سوچ ءَ گھتری ءُ پراہ ءُ شاھگانی دنت۔ اے پوسٹ ءِ تہ ءَ من ترا ھپت شرتریں کتاباں گوں آشنا کناں کہ ترا نگدی پگر ءِ زانگ ءُ شر کنگ ءَ کمک کن انت۔ اے کتابانی تہ ءَ دو یا سئے کتاب وتی وشیں لیکہ ءِ رد ءَ گچین کن ءُ وانگ ءَ پد تو وت گند ئے کہ تئی ھیال ءُ لیکہ ءِ تہ ءَ یک مزنیں پرکے گندگ بیت۔
1: کائنات ءِ سر ءَ شک کنوکیں مردمانی رھشونی: دروگی چیزاں چہ گیش ءُ گیوار بوھوکیں دنیا ءِ تہ ءَ چوں زانگ بہ بیت کہ راستی ءَ چے راست اِنت
اے کتاب ءَ نوکیں دور ءِ تہ ءَ راستی ءِ شوھازگ ءِ سر ءَ یک سرجمیں رھشونی یے داتگ۔ نبشتہ کار سائنس، تجزیاتی پگر، ءُ سبوت ءِ سر ءَ زور دے اَنت۔ کتاب ءِ (فوکس پوائنٹ) ایش اِنت کہ مرچیگیں دنیا ءَ چوں ردیں ھال ءُ اھوالاں چہ رکّگ بہ بیت ءُ راستی ءِ نیمگ ءَ سر بوگ ءِ ھاتر ءَ مارا وتی ھیال ءُ لیکہ ءَ چوں بدل کنگی انت۔ اگاں شما مدام راستی ءِ شوھاز ءَ اِت ءُ دروگیں ھالاں چہ رکّگ لوٹ اِت گڑا اے کتاب پہ شما جوان اِنت۔
2 : پگر، تیز ءُ سست
ڈینیل کاھنمن ءِ اے کلاسکیں کتاب ءَ انسانی مجگ ءِ دو نزام ءِ بارو ءَ گوں ھورتی ءَ بیان کنگ بوتگ: تیزیں پگر ءُ سستیں پگر۔ اے کتاب ءِ تہ ءَ نبشتہ کار ءَ اے گپ ءِ درشانی کتگ کہ ما چوں باز براں اشتاپی ءَ ردیں سوڑگ کنیں ءُ کم کم ءَ جیڑگ ءَ چہ چوں شرتریں آسراتی یے رس ایت۔ اے کتاب ناں ایوک ءَ تئی جیڑگ ءَ مھکم ءُ یکجاہ کنت بلکیں اے ھم وانین ایت کہ ما چوں وت ءَ شرتریں جیڑگ ءِ دربُرت دات کنیں۔
3 : سان گپتیں پگر ءِ 5 رِدی پِڑ
اے کتاب ءِ بُنھشت پنچ بُنکی چیزانی سر ءَ اِنت کہ مئے ھیال ءُ لیکہ ءَ کارآمد جوڑ کن اَنت: ۱:گھتری ءَ سرپد بہ بَہ اِت ۲: ردی کن ۳: جست چست کن ۴: خیالانی روانی ءِ رندگیری ءَ بکن ۵: بدلی کتاب ءِ ھر در ءَ بازیں اَملی ءُ آسانیں راہ ءُ در ھوار انت کہ زند ءِ ھر پڑ ءَ گیشتر کارآمد ءُ سوبمند بوگ ءَ کمک کن انت۔ اے کتاب ءِ ھاسیں گپ ایش انت کہ گَڈ ءُ مُنج بزانت سادھیں زبان ءَ گوں بیان کنگ بوتگ انت۔ اے کتاب وانوک ءَ اے گپ ءِ سر ءَ ھیال کنگ ءِ داوت دنت کہ آ وتی زند ءَ چوں شرتر کن اَنت۔
4: پد ءَ جیڑ اِت: ھما چیز ءِ زانگ ءِ تاکت کہ شما نہ زان اِت
آدم گرانٹ ءِ کتاب ءِ مول ءُ مراد ایش انت کہ مئے زانت ءُ یکین ءَ بار بار چیلنج بہ کنت۔ نبشتہ کار ءِ گشگ اِنت کہ وھدے ما اے گپ ءَ منّیں کہ ما ھرچی زانیں گڑا ما چوناھا بزاں ردی کنیں۔ ایشی ءِ چَپ ما وتی زانت ءَ مدام اپ ڈیٹ بہ کنیں ءُ نوکیں ھیالانی منّگ ءِ ھاتر ءَ تیار بہ بئیں۔ کتاب سک شریں وڑے ءَ پٹ ءُ پول ءُ مجگ ءِ شاھگان دیگ بوتگ ءُ ترا وانین ایت کہ Think againءِ ھُنر مارا چوں گیشتر زانتکار ءُ پچیں ذھن ءِ واھند کنت۔
5 :درستیں جُست کنگ: نگدی ھیال ءِ رھشونی
نگدی پگر ءِ یک ھاسیں تبے ایش اِنت کہ راستیں جُست ءُ پُرس کنگ بہ بیت۔ اے کتاب ھمے بابت ءَ اِنت کہ ما چوں راستیں جُستاں بہ کنیں دانکہ ما شرتریں آسر ءُ پیسلھے زُرت کُت بہ کنیں۔ اے کتاب شمئے زند ءِ ھر تک ءُ پھنات ءَ کارآمد بوت کنت، شمئے پیشہ وارانہ زند بہ بیت یا ذاتی زند۔
6: رولف ڈوبیلی ءِ نبشتانک چہ ھاسیں رنگ ءَ جیڑگ ءِ ھُنر ءَ
رولف ڈوبیلی ءِ اے شنگ ءُ تالانیں کتاب مئے نود ءُ نو زانشتی تعصبانی بابت ءَ اِنت کہ مئے پگر ءُ ھیال ءَ مسخ کنت کتاب ءِ تہ ءَ شما زان اِت کہ ما وتی ھر روچی ھالاں زند ءَ چوں باز براں ردیں پیسلہ کنیں ءُ چہ آیاں چوں بچگ بہ بیت۔ اے کتاب ءِ وانگ ءَ چہ شما سرپد بہ بَہ اِت کہ کسانیں ذھنی ردی مارا چوں مزنیں تاوان ءِ نیمگ ءَ بارت۔ اگاں شما انسانی نپسیات ءِ تہ ءَ ھم دلچسپی دار اِیت گڑا اے کتاب یک المی اِنت کہ وانگ ءُ اے کتاب سک دلکش اِنت۔
7:سپر ءِ پگر: ذھنی ماڈل ءِ مزنیں کتاب
اگاں تو وتی ھیال ءِ راہ ءَ شرتر کنگ لوٹ ئے گڑا اے کتاب پہ تو جوان اِنت۔ اے کتاب ءَ جتا جتائیں ذھنی ماڈلانی بابت ءَ گپ جنگ بوتگ کہ مارا گَڈ ءُ مُنج ءِ جیڑھاں شرتر سرپد بوگ ءُ گیش ءُ گیوار کنگ ءَ کمک کن انت۔ اے کتاب پہ ھما مردماں اِنت کہ آ وتی ھیال ءُ لیکہ ءَ گیش ءُ گیوار کنگ لوٹ اَنت ءُ جیڑھاں چہ جتا جتائیں زاویھاں چارگ ءِ زانت ءَ زان اَنت۔
8.factfulness: دہ سبب کہ ما دنیا ءِ بابت ءَ رد ایں — ءُ پرچا چیز چہ تئی ھیال ءَ شرتر اَنت
اے کتاب منی وانگ ءِ دوست تریں کتاباں چہ یکے ۔ گواچن سازی یک سکیں زانتکاریں کتابے کہ دنیا ءِ بابت ءَ مئے ردیں لیکھاں راست کنت۔ روزلنگ ءِ گشگ اِنت کہ مئے گیشتریں مردمانی دنیا ءِ بابت ءَ سک چَپی(منفی) ءُ (غیر حقیقت) پسندیں لیکہ اَنت۔ نبشتہ کار ءِ گشگ اِنت کہ ما دنیا ءِ تجزیہ ءَ وتی جزبات یا کوھنیں ھیالانی بنیاد ءَ ناں بلکیں ڈیٹا ءُ (حقائق) راستی ءِ بنیاد ءَ بہ کنیں۔ اے کتاب تئی پگر ءَ گوں گواچن ءَ نزیک کنت ءُ ترا اے سکین دنت کہ دنیا اسل ءَ اِنچو ھراب نہ اِنت کہ ما جیڑیں۔
اے گپ ءَ ھم یات بہ دار اِت کہ نگدی پگر ءُ لیکہ ایوک ءَ یک ھُنرے نہ اِنت بلکیں مئے زند ءِ تہ ءَ مزنیں بدلی یے آرگ ءِ وسیلہ اِنت۔ وھدے کہ ما نگدی ھیال بندات کنیں گڑا ما شرتریں پیسلہ کنگ ءِ ھَیل بئیں، راستی ءَ سرپد بئیں ءُ راستیں راہ ءَ روگ ءِ ھَیل بئیں۔ مروچی ئیں زمانگ ءَ کہ ھر نیمگ ءَ ردیں ھال شنگ ءُ تالان اَنت، نگدی سِنچ مارا راستیں راہ ءَ پیش دار اِیت ءُ مارا چہ دُزّی ءَ رکّین اِیت۔
اے کتابانی وانگ ءَ چہ ، تو وتی نگدی ھیال ءِ پھمگ ءَ شر کنگ بندات کن ئے۔ اے درستیں کتاب ترا نوکیں زاویہ ءِ چہ جیڑگ ءُ شریں پیسلہ کنگ ءَ کمک کن اَنت۔ یات بدار اِت کہ جیڑگ ءِ زانگ ءِ بزانت ایش نہ اِنت کہ ما ھر چیز ءَ شک بہ کنیں بلکیں ما راستیں جُستاں بہ کنیں ءُ ھر یک زانتکارے ءَ گوں تجزیاتی چمّے ءَ بہ چاریں دانکہ راستی ءِ نیمگ ءَ سر بہ بئیں۔
اے کتابانی تہ ءَ دو سئے کتاب گچین کن ءُ وتی سپر ءَ بندات کن۔ ھما وھد ءَ کہ تو وانگ ءَ ئے، تو وتی جیڑگ ءِ تہ ءَ یک ھاسیں پرکے گند ئے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-