پنجگور ءَ زھرشانی کنوکاں تُرسینگ، ورنا سر ءِ بازار بیگواہ کتگ- ماہ رنگ بلوچ

پنجگور ءَ بلوچ یکجھتی کمیٹی ءِ ھواریں مردماں تُرسینگ ءُ ورنا زورانسری بیگواہ-

بلوچ یکجھتی کمیٹی ءِ آرگنائزر ماہ رنگ بلوچ ءَ وتی چاگردی رسانکدر اکاؤنٹ ایکس ءَ درشان شنگ کتگ گوشتگ کہ بلوچ یکجھتی کمیٹی ءِ نیمگ ءَ چہ سرجمیں بلوچستان ءَ برجاہ زورانسری آوار جنی ءِ ھلاپ زرمبشت ءَ مروچی پنجگور ءَ زھرشانی ئیں روانک کشگ بیتگ ءُ زھرشانی نکش کنائینتگ-

ماہ رنگ بلوچ رِد ءَ اے میان ءَ روانک ءَ ھواریں مردم ریاستی سروکی ءَ برجاھیں ڈیتھ اسکواڈ ءُ پاکستانی چیریں ادارھانی کارمنداں تُرسینتگ ءُ حسیب نامیں یک نودربرے سر بازار ءَ آوار جنی ءِ نشانگ کتگ-

ماہ رنگ بلوچ ءَ دیمتر ءَ گوشتگ کہ وتگڑیں جمھوریت ءِ ٹاہ دیوک بلوچستان ءَ برجاھیں وتی بدماشیں پوج ءِ گُنڈاگردی ءِ میارباری ءَ برابر ھوار اِنت-

زانگ بہ بیت کہ چیزے روچاں بلوچستان ءَ ھوار کراچی دگہ دمگاں چہ بلوچ زورانسری آوار جنیانی تہ ءَ گیشی اتکگ کہ اود ءَ ھمے ماہ اکتوبر ءَ ھشتاد ءَ گیش مردم زورانسری آوار وئیل نکش کنگ بیتگ اَنت-

بلوچ یکجھتی کمیٹی اے زورانسری آوار جنی ءِ ھلاپ ءَ سرجمیں بلوچستان ءَ زھرشانی ءِ جار جتگ کہ اود ءَ اشی ءَ ساری کراچی، ھب چوکی، ھُزدار ءُ تربت ءَ زھرشانی کنگ بیتگ ءُ روانک کشگ بیتگ-

کراچی زھرشانی ءِ میان ءَ سندھ پولیس ءَ بازیں بلوچ زھرشانی کنوکانی سر ءَ لَٹ کُٹ دزگیر کتگ اَنت وھدے کہ ھب چوکی ءَ انتزامیہ ءُ پولیس ءِ نیمگ ءَ چہ لسبیلہ پریس کلب ءَ اڑان اوشتارینتگ بند کتگ تربت ءُ ھُزدار ءُ تربت ءَ زھرشانی ءِ میان ءَ دوئیں شھراں موباھل دامگ بند کتگ اَنت-

دی بلوچستان پوسٹ ءِ پتر ءَ دزکپتگیں ھالانی رِد ءَ گوستگیں روچ ءَ آوار جنگ بیتگیں حسیب ھنی شپ ءَ گوں نگیگیں جاوراں یل کنگ بیتگ ءُ نادُراھجاہ ءَ برگ بیتگ-

وسیلگ ءَ رِد ءَ حسیب پاکستانی پوج ءُ چیریں ادارھانی کارمنداں بے کساس لَٹ کُٹ کتگ ءُ آ اے وھد ءَ نادُراھجاہ ءَ اِنت-