ھُزدار ءَ زورانسری آوار جنی ھلاپ ءَ زھرشانی. ،شھر ءَ موباھل نیٹورک بند

بلوچ یکجھتی کمیٹی ءِ زھرشانی ءِ درچ رِد ءَ ھُزدار ءُ شھریاں زھرشانی نکش کنائینتگ-

بلوچ یکجھتی کمیٹی ءِ نیمگ ءَ برجم بلوچ زورانسری آوار جنی ءِ ھلاپ ءَ ھُزدار ءَ زھرشانی ئیں روانک کش اِتگ ءُ زھرشانی کتگ، چریشی ءَ بلوچ یکجھتی کمیٹی ءِ باسک، بیگواھیں مردمانی کھول ءُ شھریاں مزنیں کچے ءَ بھر زرتگ-

ھمے میان ءَ زھرشانی کنوکاں شھید رزاق چوک ءَ چہ آزادی چوک ءَ تاں روانک کش اِتگ ءُ نندانک داتگ، زھرشانی ئیں روانک ءَ نال، وڈھ، سوراب ءَ ھوار دگہ دمگاں چہ مردماں بھر زرتگ-

بلوچ یکجھتی کمیٹی ءَ زھرشانی درگت ءَ سرپدی دیان ءَ گوشتگ کہ ریاستی فورس ءَ چو مدامی وڑ ءَ مئے زھرشانی کنوک تُرسینتگ اَنت، نیٹ ورک بند کتگ اَنت ، ھزارانی کچ ءَ پوج ءِ کارمند اوشتارینتگ اَنت، مئے زھرشانی کنوکانی سر ءَ لٹ کُٹ ءُ مئے زھرشانی کنوکانی دزگیر کنگ ھمراھی ءَ زھرشانی ھلاس کنگ جھد کتگ بلے زھرشانی کنوکاں ریاستی پندل بے سوب کتگ ءُ زھرشانی ئیں روانک سوبمند کتگ-

بلوچ یکجھتی کمیٹی ءِ مھم ” بے تواری پروش : زورانسری آوار جنی ءِ ھلاپ ءَ اوشتگ ” ءِ سرھال ءَ چہ بلوچستان ءِ جتاجتائیں دمگاں زھرشانیانی دْرچ یکشل ءَ برجاہ ءَ اِنت اود ءَ اشی ءَ ساری کراچی، ھب چوکی ءُ ھُزدار ءَ مروچی زھرشانی نکش کنائینتگ-

بلوچ یکجھتی کمیٹی ءَ اے درگت ءَ گوشتگ کہ اے پُرایمنیں زھرشانیانی گر ءُ دار ریاست نیمگ ءَ چہ یکشل ءَ بیھار ءُ زوراکی ءَ اَبید، انساپ ءُ رکینگ جنگ مئے جزبگ مھکم اَنت – ما راج ءَ را ھاسکار بیگواھیں مردمانی کھولاں چہ دزبندی کن ایں کہ آ زھرشانی ءَ ھوار بہ بنت ءُ وتی بیگواھیں مردمانی ڈیٹ ءَ مچ بکن اَنت-