پولیس ءِ جیڑو، پریس کلب ءِ بندش ءَ ابید ھب ءَ شھریاں بیگواھیانی ھلاپ ءَ زھرشانی کتگ

زرمبشت لَٹ ءُ کُٹ ءُ اڑانکاں چہ دارگ نہ بیت، زورانسری آوار جنی ءِ ھلاپ ءَ گھگیری برجاہ بیتگ- بی وائی سی

بلوچ یکجھتی کمیٹی ءِ نیمگ ءَ چہ سرجمیں بلوچستان ءَ زورانسری آوار جنی گیشیں وئیل ھاسکار بلوچ نودربرانی زورانسری آوار جنی ءِ نشانگ کنگ ءِ پدکرد ءَ ” بے تواری پروشگ، زورانسری آوار جنی ءِ ھلاپ ءَ اوشتگ ” سرھال رِد ءَ زھرشانی ءُ روانک کشگ بیتگ-

بی وائی سی ءِ نیمگ ءَ چہ برجم دارگ بیتگیں زھرشانی ءِ دارگ ھاتر ءَ واکدار ءَ لسبیلہ پریس کلب سر ءَ اڑانک اوشتارینتگ ءُ بند کتگ بلے اشی ءَ اَبید شھری مزنیں کچے ءَ زھرشانی ءَ ھوار بیتگ اَنت-

زھرشانی کنوکاں ھمے میان ءَ محمود آباد دگ ءَ چہ روانک کش اِتگ کہ جتاجتائیں دمکاں روان ءَ بُنجاھی شھدگ سر ءَ موندرہ چوک نزیک ءَ نندانک ءِ دروشم زرتگ – زورانسری آوار جنی ءِ ھلاپ ءُ بیگواھیں مردمانی یل کنائینگ ھک ءَ تُرندیں ناراہ جتگ ءُ بیگواھیں مردمانی یل کنائینگ لوٹ کتگ-

زھرشانی کنوکاں ھمے ماہ ءَ زورانسری آوار جنی ءِ نشانگ کنگ بیتگیں جنید ءُ یاسر حمید ءِ کھول ءَ ھوار زورانسری بیگواہ راشد حسین، عزیز ابراھیم بلوچ ءُ دگہ بیگواھیں مردمانی کھول ءِ ھمراھی ءَ سیاسی ءُ نودربریں گلانی باسکاں مزنیں کچے ءَ بھر زرتگ-

ھمے درگت ءَ چہ بلوچ یکجھتی کمیٹی ءِ گوشگ اِنت کہ سرجمیں اڑاناں ءُ پولیس ءِ مزنیں کچے ءَ کارمنداں اَبید، ھب چوکی شھری لوگاں چہ درتکگ ءُ وتی زھرشانی نکش کنائینتگ – اے زھرشانی مئے سرجمیں بلوچستان ءَ زھرشانی ءِ دْرچ بھر اِنت کہ آئی ءِ مول بلوچ ورنایانی زورانسری آوار جنی ءِ ھلاپ ءُ توار چست کنگ اِنت-

ھمے درگت ءَ گل ءَ گوشتگ کہ زورانسری بیگواہ کنگ بیتگیں مردمانی کھول ھم ھوار بیتگ اَنت، آیانی وتی دردناکیں کسہ درشان کتگ ءُ انساپ لوٹ کتگ-

آیانی گوشگ اِنت اشی ءَ ساری کراچی ءَ بیوکیں زھرشانی ءِ گر ءُ دار ھاتر ءَ پولیس ءَ گوستگیں روچ ءَ مئے سنگتانی سر ءَ لَٹ کُٹ کتگ ءُ پرایمنیں زھرشانی کنوک دزگیر کتگ اَنت مروچی ھم ھب چوکی ءَ پولیس ءَ اڑان اوشتارینتگ دانکہ مئے زھرشانی ءَ بدار اَنت-

بی وائی سی ءَ دیمتر ءَ گوشتگ کہ زورانسری آوار جنی ءِ ھلاپ ءَ مئے زھرشانی ءِ درچ برجاہ بنت, اسرکپتگیں کھولانی تواراں اڑان ءُ لَٹ کُٹاں چہ ایرموش کُت نہ کن اَنت – زورانسری آوار جنی ءِ ھلاپ ءَ زھرشانی ءِ لھر بلوچ چُکچینی ءِ درچ، سرجمیں بلوچستان ءَ برجاہ بیت-