زاھدان ءِ زندان ءَ 21 سالی ورنایے ءَ پاھو ءِ ھکم

روکپتی بلوچستان ءِ بنجاھی شھر زاھدان ءَ ایرانی آمیدگس ءِ پرمان ءَ یک ورنایے ءَ پاھو دیگ ءِ ھکم دیگ بیتگ-

پہ پاھو ءَ ورنا گوستگیں روچ ءَ جتائیں کوٹی ءَ برگ بیتگ ءُ اود ءَ آئی ءِ پاھو دیگ ءِ چِن ءُ لانچ کنگ بیت اِنت –

پاھو ھکم ءَ دیگ بیتگیں مردم ءِ پجار بیست ءُ یک سالی ئیں ورنا مھدی براھوئی ء جما گل جھمنند ھاش ءِ نام ءَ زانگ بیتگ-

اھوالانی رد ءَ مھدی ءِ گرگ ءِ وھد ءَ آئی ءِ اُمر ھبدہ سال بیتگ ءُ دو سال ءَ داں زھگانی زندانانی کنگ ءَ پد آ کانون ءِ تک ءَ مزنیں زندان ءَ دیم دیگ بیتگ-

اھوالانی رد ءَ مھدی پنچ سال پیش ماں ھاش ءَ اچانگی کوشے ءِ بھتام ءَ گرگ بیتگ کہ آئی ءَ یک زھگے ءَ کارچ جتگ ءُ کشتگ- چریشی ءِ پژدر ءَ آئی ءِ سر ءَ پاھو اتکگ بیتگ-

زانگ بہ بیت روکپتی بلوچستان ءَ بندوکیں مردمانی پاھو دیگ ءِ درچ یکشل ءَ برجاہ اَنت کہ اود ءَ آیاں جتا جتائیں کیسانی بھتام لڈگ ءُ پاھو دیگ بیگ ءَ اَنت –

گوستگیں دو ماھانی میان ءَ روکپتی بلوچستان ءَ کساس دوازدہ مردم پاھو دیگ بیتگ اَنت کہ آ جتا جتائیں زنداناں بندیگ بیتگ اَنت-