کراچی اُرش : ایف آئی آر بلوچ لبریشن آرمی ءِ سروک بشیر زیب بلوچ ءُ دگرانی سر ءَ نکش کنگ بیتگ اَنت

کراچی پولیس ءَ ھمے ھپتگ ءَ کراچی ءَ ایئرپورٹ نزیک ءَ چینیانی کاروان سر ءَ وتکش تراک اُرش ءِ رپورٹ نکش کنان ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ سروک سر ءَ ایف آئی آر نکش کنگ بیتگ-

ایف آئی آر ءِ متن رِد ءَ اُرش مول بیجنگ ءِ گوم ءَ اسلام آباد سیادی ءِ تاوان دیگی بیتگ-

کراچی ءِ جناح انٹرنیشنل ایئرپورٹ نزیک ءَ یکشمبے ءِ شپ ءَ بیتگیں بمب تراک ءَ سرکاری ھساب ءَ دو چینی شھریاں ھوار سے مردم مرگ وھدے کہ دہ ٹپی بیگ راست کتگ

بی ایل اے اے اُرش زمہ واری منّ اِتگ گْوشتگ کہ آئی ءَ چینی شھری نشانگ جوڑ کنگ ھاتر ءَ گاڑی ءَ تہ ءَ شورو ( VBIED) کارمرز کنگ بیتگ ءُ گل ءَ اے اُرش ءَ پنچ ءَ گیش چینی انجینئرز ءُ سرمایہ کارانی کُشگ ءُ دوازدہ ءَ چہ گیش ٹپی کنگ ءُ چینی ٹولی ءَ سیکورٹی ءَ ساڑی ئیں کم چہ کم پانزدہ پاکستانی پوج ءِ کارمند ءُ چیریں ادارھانی کارمندانی کوش زمہ واری منّ اِتگ اَت-

ایئرپورٹ پولیس اسٹیشن ءِ انسپکٹر کلیم خان موسیٰ ءِ نیمگ ءَ آیف آئی آر نکش کنگ بیتگ- پولیس رِد ءَ اے اُرش ءِ سروک کماندار بشیر احمد بلوچ پنّام ءِ بشیر زیب ءُ عبدالرحمان پنّام ءِ رحمان گل ءُ وتی دگہ ھمراھانی ھمراھی ءَ ھوار اِنت-

پولیس گوشگ رِد ءَ بی ایل اے ءِ سروک بشیر زیب بلوچ ءُ گل ءِ راھشوناں چین ءِ گوم ءَ پاکستان ءِ سیادی ءِ ھراب کنگ ھاتر ءَ اُرش ءِ شوربندی کتگ – ایف آئی آر ءَ راست کنگ بیتگ کہ چینی شھریاں نشانگ جوڑ کنگ واستا وی بی آئی ای ڈی کارمرز کنگ بیتگ-

پولیس رپورٹ رِد ءَ اُرش ءِ میان یک ناشناسیں مردمے ءَ وتی ٹویوٹا ھلکس گاڑی کاروان ءِ نزیک ءَ آورتگ ءُ تراکینتگ چریشی ءِ آسر ءَ درانڈیھی چینی ءُ دگہ سیکورٹی کارمنداں بروکیں کاروان ءِ گاڑی رینجرز ، پولیس ءُ دگہ نزیکیں گاڑی تباہ بیتگ اَنت، چریشی ءِ آسر ءَ بیران ءُ ٹپی بیتگ اَنت-

ایف آئی آر ناشرکاری ءِ ایکٹ، تراکناکیں شوروانی ایکٹ ءُ پاکستان پینل کوڈ ءِ بازیں ایف آئی آر ھوار کنگ بیتگ اَنت ءُ گوشگ بیتگ بی ایل اے سروک ءَ شوبندی رد ءَ وتی ناشرکاری ءِ گیش کنگ ھاتر ءَ اے اُرش کتگ-

پولیس رِد ءَ تراک ءَ کارمرز بیوکیں گاڑی بی ایل اے وتکش تراکّار شاہ فھد وتی جند نام ءَ رجسٹر بیتگ-