استان ھیبر پکتونواہ ءِ دمگ ھیبر ءَ یازدہ اکتوبر ءَ برجاہ بیوکیں پشتون جرگہ ءِ سر ءَ سیمی رند ءَ پولیس ءَ بیڑ برتگ-
سر بیتگیں اھوالانی رد ءَ گوستگیں شپ ءَ ھم پولیس ءَ بیڑ برتگ ءُ جتا جتائیں ھنداں مُچ بیتگین مردم لٹ ءُ کٹ کتگ اَنت ءُ تمبو مانداشتگ اَنت-
مروچی سیمی رند ءَ پولیس ءَ بیڑ برتگ ءُ اود ءَ جرگہ ءِ جاگہ انگیر کتگ-
ھمے درگت ءَ پشتون تھپز مومنٹ ءِ سروک منزور پشتین ءَ چاگردی ترمجاہ ایکس ءَ پوسٹ کنان ءَ گوشتگ بازیں کچے ءَ پولیس ھیبر جرگہ گراونڈ ءَ بیڑ برگ ءَ پیش گامی کنگ ءَ اِنت-
گیش آئی ءَ دمانے ءَ پد پوسٹ کتگ کہ جرگہ ءِ سر ءَ پولیس ءَ بیڑ برتگ ءُ دمگ ءَ موبائل سینگل ءُ انٹرنیٹ بند کنگ بیتگ اَنت –
گوستگیں روچ ءَ استان ءِ وزیر علی امین گنڈاپور ءُ منزور پشتین ءِ میان ءَ گپ ءُ تران بوتگ ءُ سروزیر ءَ پھزداری ءِ سدکی داتگ انت بلے مروچی شپ ءَ پد ءَ اود ءَ اُرش کنگ بیتگ-
گوستگیں شپ ءَ اود ءَ جرگہ جاہ ءِ سر ءَ اُرش کنگ ءُ مردم لٹ ءُ کٹ ءُ زدگ کنگ بیتگ اَنت-
زانگ بہ بیت یازدہ اکتوبر ءَ ھیبر ءَ پشتون جرگہ برجاہ دارگ بوگ ءَ اِنت کہ اود ءَ پشتونانی ھکانی ءُ اود ءَ زوراکیانی ھلاپ ءَ مسامدری ءِ جرگہ برجم دارگ بوگ ءَ اِنت-