بلوچستان ءِ تیابدپی شھر گوادر ءَ 7 مئی 2024 ءَ پاکستان ءِ چیریں ادارھاں شھر ءِ توک ءَ مردمانی دیم ءَ مسلم ولد محمد رحیم جھمنند دشت شولی زورانسری آوار جتگ ءُ برتگ ءُ چریشی ءَ پد آئی ءِ بارو ءَ ھچ ھال نیست اِنت-
کھول ءِ گوشگ اِنت مسلم ءِ بارو ءَ ما دمگ ءِ میر ءُ متبراں جست ءُ پرس کتگ آیاں مارا آئی ءِ یل کنگ ءِ آسر داتگ بلے چار ماہ ءُ بیست روچ ءِ گوزگ ءَ پد آئی ءِ ھچ ھال نیست اِنت-
آیاں گوشتگ یک رندے پیسر مسلم 2018 جون ءِ ماہ ءَ پاکستانی پوج ءَ آوار جتگ ءُ سک لٹ ءُ کٹ کنگ بیتگ ءُ پد ءَ نیم مردگی ھالت ءَ ھسپتال ءَ چگل داتگ ءُ پد ما وتی وس ءُ گنجائش ءَ کراچی ءَ برتگ ءُ اود ءَ ڈاکٹراں گشتگ آئی ءِ گٹگ ءِ ھراب اِنت ءُ بازیں ھرچ ءُ درچے ءَ پد آ جوڑ بیتگ بلے یک رندے پد ءُ برگ بیتگ –
کھوَل ءَ گوشتگ مارا مسلم ءِ زند ءِ سر ءَ ترس اِنت کہ یک رندے پیسر ءَ برگ ءُ تشدد کنگ بیگ ءَ نی ھما وڑ کنگ ءُ چگل دیگ مہ بیت ما انسانی حقانی تنظیم ءُ مردم دوستیں مھلوک ءَ گون دزبندی کن ایں پہ مسلم ءَ توار چِست بہ کن اَنت دانکہ آ جلدی سلامتی یل کنگ بہ بیت-